ᒨᓯᓯ ᓯᕗᓪᓖᑦ 43 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᓯᐱᐅᑉ ᐊᖓᔪᖏᑕ ᐅᑎᕐᓂᖓ ᐄᑦᔨᑉᑎᒧᑦ ᐱᓐᔭᒥᓂᒥᒃ ᐃᓚᖃᓕᕐᓗᑎᒃ

¹ ᑳᖕᓇᕐᑐᕐᔪᐊᕐᓕ ᓄᓇᒧᑦ ᐱᕙᓪᓕᐊᑐᐃᓐᓇᕐᐳᖅ.

² ᓂᐊᖂᔭᒃᓮᓪᓗ ᐄᑦᔨᑉᑎᒥᑦ ᓇᒃᓴᓚᐅᕐᑕᖏᑦ ᓄᖑᒻᒪᑕ, ᐊᑖᑕᖓᑦᑕ ᐅᖃᐅᑎᕔᑦ, “ᐊᐅᓪᓚᓚᐅᕐᒥᒋᑦᓯ, ᓂᐅᕕᕆᐊᕐᓗᓯ ᓂᕿᒃᓴᑦᑎᓐᓂᒃ.”

³ ᔫᑕᐅᓪᓕ ᐅᖃᐅᑎᕙ, “ᑖᑦᓱᒪ ᐊᖑᑎᐅᑉ ᑯᒃᓴᓇᕐᑐᓪᓚᕆᐊᓗᖕᒥᒃ ᐅᖃᐅᑎᓚᐅᕐᐹᑎᒍᑦ, ᐅᖃᕐᓗᓂ, ‘ᑮᓇᕋ ᑕᑯᓂᐊᓐᖏᓚᓯ, ᓄᑲᓯ ᐃᓚᒋᓐᖏᑐᐊᕈᑦᓯᐅᒃ.’

⁴ ᓄᑲᕗᑦ ᐅᕙᑦᑎᓐᓄᑦ ᒪᓕᒃᑎᓐᓂᐊᑐᐊᕈᕕᐅᒃ, ᑕᕝᕙ ᑕᐅᓄᖓ ᐊᐅᓪᓚᕐᓂᐊᕐᐳᒍᑦ ᓂᕿᒃᓴᓂᒃ ᓂᐅᕕᕆᐊᕐᓗᑕ;

⁵ ᑭᓯᐊᓂᓕ ᐅᕙᑦᑎᓐᓄᑦ ᒪᓕᒃᑎᓐᓂᐊᓐᖏᑐᐊᕈᕕᐅᒃ, ᑕᐅᓄᖓ ᐊᐅᓪᓚᕐᓂᐊᓐᖏᓚᒍᑦ, ᑖᑦᓱᒪ ᐊᖑᑎᐅᑉ ᐅᖃᐅᑎᓚᐅᕐᒪᑎᒍᑦ, ‘ᑮᓇᕋ ᑕᑯᓂᐊᓐᖏᓚᓯ, ᓄᑲᓯ ᐃᓚᒋᓐᖏᑐᐊᕈᑦᓯᐅᒃ.’”

⁶ ᐃᓴᕆᐊᓕ ᐅᖃᕐᐳᖅ, “ᖃᓄᐃᒻᒪᑦ ᐅᕙᓐᓄᑦ ᐱᐅᖏᑦᑐᐊᓗᖕᒥᒃ ᐱᓂᐊᕐᓯᒪᕕᓯ ᐊᖑᑦ ᐅᖃᐅᑎᓚᐅᕋᑦᓯᐅᒃ ᓱᓕ ᓄᑲᖃᒃᑲᓐᓂᕐᓂᕋᕐᓗᓯ?”

⁷ ᑖᒃᑯᐊ ᑭᐅᕗᑦ, “ᐊᖑᑎᐅᑉ ᐊᐱᕐᓱᓚᐅᕐᒪᑎᒍᑦ ᖃᐅᔨᓇᓱᐊᕐᓗᑕ ᐃᓚᕗᓪᓗ ᖃᐅᔨᓇᓱᐊᕐᓗᓂᒋᑦ, ᐅᖃᕐᓗᓂ, ‘ᐊᑖᑕᓯ ᓱᓕ ᐆᒪᕚ? ᓄᑲᖃᒃᑲᓐᓂᕐᐱᓰ?’ ᑕᕝᕙ ᐅᖃᐅᑎᓚᐅᕐᐸᕗᑦ ᐊᐱᖅᑯᑎᒋᔭᖓᓂᒃ ᑭᐅᓪᓗᑕ; ᖃᓄᕐᓕ ᖃᐅᔨᒪᒐᔭᓚᐅᕐᐱᑖ ᑖᑦᓱᒧᖓ ᐅᖃᐅᑎᔭᐅᓂᐊᕐᒪᖔᑦᑕ, ‘ᓄᑲᓯ ᐃᓕᑦᓯᓐᓄᑦ ᑎᑭᖃᑕᐅᖁᕙᕋ’?”

⁸ ᔫᑕᓗ ᐅᖃᕐᐳᖅ ᐃᓴᕆᐊᓕᒧᑦ ᐊᑖᑕᒥᓄᑦ, “ᑖᓐᓇ ᓄᑲᑉᐱᐊᖅ ᐅᕙᓐᓄᑦ ᑲᒪᒋᔭᐅᑎᓚᐅᕈᒃ, ᑕᕝᕙ ᐸᕐᓇᒡᓗᑕ ᐊᐅᓪᓚᕐᓂᐊᕐᐳᒍᑦ, ᐱᕐᓕᖁᓇᑕ, ᑕᒪᑦᑕ ᐅᕙᒍᑦ ᐃᕝᕕᓪᓗ ᕿᑐᕐᖓᓕᒫᕗᓪᓗ.

⁹ ᐅᕙᖓ ᓵᑕᒃᓴᐅᓂᐊᕐᐳᖓ ᑖᑦᓱᒧᖓ, ᑐᖁᑕᐅᑎᒃᑲᔭᕐᐸᕐᒪ. ᐃᓕᖕᓄᑦ ᐅᑎᕐᑎᖏᒃᑯᒃᑯ, ᑕᑯᒃᑲᓐᓂᕋᔭᖏᒃᑯᕕᐅᒡᓗ, ᑕᕝᕙ ᐅᕙᖓ ᐸᓯᔭᒃᓴᐅᑦᔪᑎᒋᓂᐊᕐᐸᕋ ᐃᓱᖃᖏᑦᑐᒧᑦ;

¹⁰ ᑕᕝᕙ ᑭᖑᕙᐅᑎᒃᓴᖃᓚᐅᖏᒃᑯᑦᑕ, ᒫᓐᓇ ᒪᕐᕈᕕᒡᓗᑕ ᐅᑎᕐᓯᒪᓪᓗᐊᓕᕐᐳᒍᑦ.”

¹¹ ᑕᕝᕙ ᐊᑖᑕᖓᑦᑕ ᐃᓴᕆᐊᓕᐅᑉ ᐅᖃᐅᑎᕔᑦ, “ᑍᒤᑦᓴᕆᐊᖃᕐᐸᑦ, ᑍᒤᓕᐅᓕᕆᑦᓯ: ᓄᓇᑦᑕ ᐱᕈᕐᑐᖏᓐᓂᑦ ᐱᐅᓂᕐᐹᓂ ᓰᕐᓇᕐᑐᓂᒃ ᓇᒃᓴᕐᓗᓯ, ᑖᑦᓱᒧᖓ ᐊᖑᒻᒧᑦ ᐂᑦᑑᑎᒃᓴᐅᖁᓪᓗᒋᑦ, ᐸᐅᕐᖓᑯᓗᖕᓂᒃ ᕼᐊᓂᑯᓗᖕᓂᒡᓗ, ᑎᐱᑦᓯᐊᕆᒃᓴᐅᑎᓂᒃ, ᒧᕋᒥᒃ, ᖃᖅᑯᐊᒐᓂᒡᓗ ᐱᔅᑕᑦᓯᐅᓂᒃ, ᖃᖅᑯᐊᒐᓂᓗ ᐋᓪᒪᓐᓂᒃ.

¹² ᓂᐅᕕᐅᑎᒃᓴᓂᒃ ᒪᕐᕈᕕᓪᓗᐊᕐᑐᓂᒃ ᑮᓇᐅᔭᒡᒋᕐᓗᓯ; ᑍᒃᑯᐊᓗ ᐃᒃᐱᐊᕐᔪᖁᑎᑦᓯᓐᓂ ᑮᓇᐅᔧᑦ ᐴᕐᓯᒪᓪᓗᑎᒃ ᐅᑎᕐᑎᑕᐅᓚᐅᕐᑐᑦ ᓇᒃᓴᕐᓂᐊᕐᐸᓯ; ᑕᒻᒪᐅᑎᕕᓂᐅᑐᐃᓐᓇᕆᐊᖃᕐᒪᑕ.

¹³ ᓄᑲᓯ ᓇᒃᓴᕐᓗᓯᐅᒃ, ᐸᕐᓇᒡᓗᓯ ᐊᐅᓪᓚᓕᕆᑦᓯ, ᐊᖑᑦ ᑍᓐᓇ ᐅᐸᒃᑲᓐᓂᕐᓗᒍ;

¹⁴ ᒎᑎᐅᑉ ᐊᔪᒐᖃᖏᑦᑑᑉ ᓂᑲᒋᔭᐅᔪᓐᓇᕐᑎᓪᓕᓯ ᑖᑦᓱᒧᖓ ᐊᖑᒻᒧᑦ, ᐅᑎᕈᓐᓇᖁᓪᓗᓯ ᖃᑕᓐᖑᑎᓯ ᐃᓚᒋᓕᕐᓗᒍ ᐱᓐᔭᒥᓂᓗ. ᐅᕙᖓᓕ ᕿᑐᕐᖓᓐᓄᑦ ᕿᒃᓵᒃᑎᑕᐅᔭᕆᐊᖃᕈᒪ, ᑕᕝᕙ ᕿᒃᓵᖕᓂᐊᕐᐳᖓ.”

¹⁵ ᑕᕝᕙ ᑖᒃᑯᐊ ᐂᑦᑑᑎᒃᓴᓂᒃ ᓇᒃᓴᕐᐳᑦ, ᑮᓇᐅᔧᓪᓗ ᒪᕐᕈᕕᓪᓗᐊᕐᑐᑦ ᓇᒃᓴᕆᕔᑦ, ᐱᓐᔭᒥᓂᓗ ᐃᓚᒋᓪᓗᒍ; ᐸᕐᓇᒃᑲᒥᒃ ᐊᐅᓪᓚᕐᐳᑦ ᐄᑦᔨᑉᑎᒧᑦ, ᑎᑭᓐᓇᒥᒡᓗ ᔫᓯᐱᒧᐊᕐᐳᑦ.

¹⁶ ᔫᓯᐱᐅᓪᓗ ᐱᓐᔭᒥᓂ ᐃᓚᒋᔭᐅᔪᖅ ᑕᑯᒐᒥᐅᒃ, ᐱᔨᑲᑖᓂ ᐅᖃᐅᑎᕚ, “ᐅᑯᐊ ᐊᖑᑏᑦ ᐃᒡᓗᓐᓄᐊᕈᑎᓚᐅᒃᑭᑦ, ᐆᒪᔪᒥᒡᓗ ᑐᖁᑦᓯᓗᓯ ᓂᕿᒃᓴᓕᐅᓕᕆᑦᓯ, ᐅᑯᐊ ᐊᖑᑏᑦ ᐅᓪᓘᑉ ᕿᑎᕋᓕᕐᓂᖓᓂ ᓂᕆᖃᑎᒋᓂᐊᕋᒃᑭᑦ.”

¹⁷ ᐊᖑᑦ ᑖᓐᓇ ᔫᓯᐱᐅᑉ ᐅᖃᐅᓯᖏᑦ ᒪᓕᒡᓗᒋᑦ ᐱᓇᓱᐊᕐᐳᖅ, ᐊᖑᑎᓪᓗ ᔫᓯᐱᐅᑉ ᐃᒡᓗᖓᓄᑦ ᐂᑎᓕᕐᐰᑦ.

¹⁸ ᑖᒃᑯᐊᓕ ᓯᕘᕋᓕᕐᐳᑦ ᔫᓯᐱᐅᑉ ᐃᒡᓗᖓᓄᐊᖁᔭᐅᒐᒥᒃ, ᐅᖃᕐᓗᑎᒡᓗ, “ᑮᓇᐅᔧᑦ ᐃᒃᐱᐊᕐᔪᖁᑎᑦᑎᓐᓄᑦ ᐴᕐᑕᐅᓯᒪᔪᑦ ᐅᑎᕈᑎᓚᐅᕐᑕᕗᑦ ᐱᑦᔪᑎᒋᔭᐅᓪᓚᕆᓕᕐᐳᑦ, ᑕᕝᕗᓐᖓ ᐃᑎᕐᑎᑕᐅᓚᕿᕗᒍᑦ, ᐊᑭᓂᐊᕈᒪᓪᓗᑕ ᑎᒍᔪᒪᓪᓗᑕᓗ, ᓯᐊᓛᕐᑖᕆᔪᒪᓪᓗᑕ ᓯᐅᑎᖅᑯᕐᑐᔪᖁᑎᕗᓪᓗ ᐱᑖᕆᔪᒪᓪᓗᒋᑦ.”

¹⁹ ᑕᕝᕙ ᔫᓯᐱᐅᑉ ᐱᔨᖓ ᒪᓕᒡᓗᒍ ᔫᓯᐱᐅᑉ ᐃᒡᓗᖓᓄᐊᓕᕐᐳᑦ, ᐃᒡᓘᓪᓗ ᐃᑎᕐᑕᕐᕕᖓᓂ ᑖᓐᓇ ᐅᖃᖃᑎᒋᓕᕐᐹᑦ,

²⁰ ᐅᖃᕐᓗᑎᒃ, “ᐊᖓᔪᖅᑳᒃ, ᓯᕗᓪᓕᕐᒥᒃ ᓂᐅᕕᕆᐊᓚᐅᕋᑦᑕ ᓂᕿᒃᓴᑦᑎᓐᓂᒃ;

²¹ ᑭᓯᐊᓂᓕ ᓯᓂᒃᑕᕋᓱᐊᓕᕐᓗᑕ ᐃᒃᐱᐊᕐᔪᖁᑎᕗᑦ ᕿᓚᕈᑦᔮᕋᑦᑎᒍ, ᐊᖑᑏᑦ ᑮᓇᐅᔭᓕᒫᖏᑦ ᐃᒃᐱᐊᕐᔪᖁᑎᖏᓐᓃᑦᑐᑦ ᓇᓂᓚᐅᕐᐸᕗᑦ, ᐊᑭᓕᐅᑎᒋᓇᓱᓚᐅᕐᑕᕗᑦ ᐊᑕᖏᑦᓯᐊᕐᓗᑎᒃ; ᑕᕝᕙ ᑖᒃᑯᐊ ᑮᓇᐅᔧᑦ ᓇᒃᓴᒃᑲᓐᓂᓚᐅᕐᐸᕗᑦ ᑕᒪᐅᖓ,

²² ᑮᓇᐅᔭᒃᑲᓐᓂᕐᓂᒡᓗ ᓇᒃᓴᒃᑲᓐᓂᕐᐳᒍᑦ ᓂᕿᒃᓴᓄᑦ ᓂᐅᕕᐅᑎᒃᓴᑦᑎᓐᓂᒃ. ᖃᐅᔨᒪᓐᖏᓚᒍᑦ ᑭᓇᒧᑦ ᑖᒃᑯᐊ ᑮᓇᐅᔭᕗᑦ ᐃᒃᐱᐊᕐᔪᖁᑎᑦᑎᓐᓄᑦ ᐴᕐᑕᐅᓐᓂᕐᒪᖔᑕ.”

²³ ᑖᓐᓇ ᑭᐅᕗᖅ, “ᐃᓱᒫᓗᖏᓪᓗᓯ, ᓯᕘᕋᓂᐊᕋᓯ; ᒎᑎᑦᓯ ᐊᑖᑕᑦᓯᓗ ᒎᑎᖓᑦᑕ ᐃᒻᒪᖄ ᑮᓇᐅᔭᓯ ᐃᒃᐱᐊᕐᔪᖁᑎᑦᓯᓐᓄᐊᕐᓂᕐᐰᑦ; ᐊᑭᓕᐅᑎᒋᓚᐅᕐᑕᓯ ᑮᓇᐅᔧᑦ ᐱᓯᒪᕙᒃᑲ.” ᑕᕝᕙ ᓯᒥᐅᓂ ᑖᒃᑯᓄᓐᖓᐅᑎᕚ.

²⁴ ᑕᕝᕙ ᐊᖑᑎᐅᑉ ᑖᒃᑯᐊ ᐊᖑᑏᑦ ᔫᓯᐱᐅᑉ ᐃᒡᓗᖓᓄᑦ ᐃᑎᕐᑎᑉᐰᑦ, ᐃᒥᕐᒥᒡᓗ ᑐᓂᓯᕕᒋᕔᑦ, ᑖᒃᑯᐊᓗ ᐃᑎᒐᖕᒥᖕᓂᒃ ᐃᕐᕈᕐᑐᐃᕗᑦ, ᓯᐅᑎᖅᑯᕐᑐᔪᖁᑎᖏᓪᓗ ᓂᕿᒃᓴᖏᓐᓂᒃ ᐊᑐᐃᓐᓇᕈᐃᕕᒋᕔᑦ,

²⁵ ᑖᒃᑯᐊᓕ ᐂᑦᑑᑎᒃᓴᒥᖕᓂᒃ ᐊᑐᐃᓐᓇᕈᐃᕗᑦ ᔫᓯᐱ ᕿᑎᕋᓕᕐᒥ ᕾᒃᐸᑦ ᑐᓂᔭᒃᓴᒥᖕᓂᒃ, ᑐᓴᐅᒪᒐᒥᒃ ᑕᕝᕙᓂ ᓂᕆᖃᑎᒋᓂᐊᕐᒪᒋᑦ.

²⁶ ᔫᓯᐱᓕ ᐊᖏᕐᕋᕐᒪᑦ, ᐃᒡᓗᒧᑦ ᐃᑎᐅᑦᔨᕗᑦ ᐂᑦᑑᑎᒃᓴᒥᖕᓂᒃ ᓇᒃᓴᓚᐅᕐᑕᒥᖕᓂᒃ, ᑖᑦᓱᒧᖓᓗ ᐅᑯᕗᑦ ᓄᓇᒧᑦ ᐹᒻᒪᒃᓗᑎᒃ.

²⁷ ᖃᓄᐃᒻᒪᖔᑕᓗ ᐊᐱᕐᓱᕐᐰᑦ, ᐅᖃᕐᓗᓂ, “ᐊᑖᑕᓯ, ᑍᓐᓇ ᐃᓄᑐᖃᐅᓕᕐᑐᖅ ᐅᖃᐅᑎᒋᓚᐅᕐᑕᓯ ᖃᓄᐃᓐᖏᓛᖅ? ᓱᓕ ᐃᓅᕚ?”

²⁸ ᑖᒃᑯᐊ ᐅᖃᕐᐳᑦ, “ᐱᔩᑦ ᐊᑖᑕᕗᑦ ᖃᓄᐃᖏᑦᓯᐊᕐᓗᓂᓗ; ᓱᓕ ᐃᓅᕗᖅ.” ᑖᒃᑯᐊᓗ ᓂᐊᖁᖏᑦ ᐅᑯᕗᑦ ᐹᒻᒪᒃᑎᕐᓗᑎᒡᓗ ᑖᑦᓱᒧᖓ.

²⁹ ᔫᓯᐱᓗ ᑕᑯᓴᕋᒥ, ᓄᑲᓂ ᐱᓐᔭᒥᓂ ᑕᑯᕚ, ᐊᓈᓇᖓᑕ ᐃᕐᓂᖓ, ᐅᖃᕐᓗᓂᓗ, “ᐅᓇ ᑕᕝᕙ ᓄᑲᕐᓯᕐᐹᓰ, ᐅᕙᓐᓄᑦ ᐅᖃᐅᓯᕆᓚᐅᕐᑕᓯ? ᐃᕐᓃᒃ, ᒎᑎᐅᑉ ᐱᑦᓯᐊᕐᕕᒋᓕᑎᑦ!”

³⁰ ᔫᓯᐱᓗ ᑐᐊᕕᕐᓗᓂ ᐊᓂᕗᖅ, ᐆᒻᒪᑎᖓ ᓄᑲᕐᒥᓂᒃ ᓇᒡᓕᒍᓱᓗᐊᕐᓂᑯᖓᓄᑦ, ᕿᐊᕕᒃᓴᕐᓯᐅᓕᕐᐳᕐᓗ. ᓯᓂᒡᕕᖕᒥᓄᓪᓗ ᐃᑎᕋᒥ ᑕᕝᕙᓂ ᕿᐊᕗᖅ.

³¹ ᑮᓇᓂᓗ ᐃᕐᕈᕐᑐᓚᐅᕐᓗᒍ ᐊᓂᕗᖅ; ᐃᒻᒥᓂᒃ ᐱᓯᒪᔪᓐᓇᕐᓯᒐᒥ ᐅᖃᕐᐳᖅ, “ᓂᕿᒃᓮᑦ ᐊᑐᐃᓐᓇᕈᕐᑕᐅᓕᕐᓕᑦ.”

³² ᔫᓯᐱᓗ ᐃᒻᒥᒍᑦ ᓂᕆᕕᖃᕐᓗᓂ ᓂᕆᑎᑕᐅᕗᖅ, ᑖᒃᑯᐊᓗ ᐃᒻᒥᒍᑦ ᓂᕆᕕᖃᕐᒥᑎᓪᓗᒋᑦ, ᐄᑦᔨᑉᑎᒥᐅᓪᓗ ᓂᕆᖃᑕᐅᖕᒥᔪᑦ ᐃᒻᒥᒍᑦ ᓂᕆᕕᖃᕆᕗᑦ, ᐄᑦᔨᑉᑎᒥᐅᑦ ᐄᑉᕉᓂᒃ ᓂᕆᖃᑎᖃᕈᓐᓇᖏᒻᒪᑕ, ᑕᒪᓐᓇ ᐄᑦᔨᑉᑎᒥᐅᓄᑦ ᓇᕐᕈᓇᐅᑎᒃᓴᖃᕐᒪᑦ.

³³ ᑖᑦᓱᒪᓗ ᓵᒥᓂ ᐃᒃᓯᕙᖁᕔᑦ, ᐊᖓᔪᒃᓯᕐᐹᒥᑦ ᐱᒋᐊᕐᓗᑎᒃ ᑐᖓᓕᕇᒃᐸᓪᓕᐊᓂᖏᑦ ᒪᓕᒡᓗᒋᑦ ᓄᑲᕐᓯᕐᐹᒧᑦ ᐃᓅᓱᒃᑑᓛᖑᓂᖓᓂᒃ ᒪᓕᒡᓗᑎᒃ; ᐊᖑᑎᓪᓗ ᑖᒃᑯᐊ ᐃᒻᒥᖕᓄᑦ ᑕᑯᓴᖃᑦᑕᐅᑎᕗᑦ ᑲᒪᓗᐊᕐᓂᑯᒥᖕᓄᑦ.

³⁴ ᓂᕿᒃᓮᓪᓗ ᔫᓯᐱᐅᑉ ᓵᖓᓂᑦ ᐋᑎᕐᑕᐅᕗᑦ ᑖᒃᑯᓄᖓ, ᐱᓐᔭᒥᓂᐅᓪᓕ ᓂᕆᓂᐊᕐᑕᖏᑦ ᑕᓪᓕᒤᕐᑐᓪᓗᐊᕐᑐᒥᒃ ᐊᓯᓕᒫᒥᓂᑦ ᐊᖏᓂᕐᓴᐅᑎᓪᓗᒋᑦ ᐊᑐᐃᓐᓇᕈᕐᑎᕐᑕᐅᕗᑦ. ᑕᕝᕙ ᓂᕆᕗᑦ ᐃᒥᕐᓗᑎᒡᓗ ᖁᕕᐊᓱᖃᑎᖃᕐᓗᑎᒃ ᑖᑦᓱᒥᖓ.