ᒨᓯᓯ ᓯᕗᓪᓖᑦ 42 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᓯᐱᐅᑉ ᐊᖓᔪᖏᑕ ᐄᑦᔨᑉᑎᒧᐊᕐᓂᖓᑦ ᓂᐅᕕᕆᐊᕐᓗᑎᒃ ᓂᐊᖂᔭᒃᓴᓂᒃ

¹ ᔧᑯᓕ ᑐᓴᕋᒥ ᐄᑦᔨᑉᑎᒥ ᓂᐊᖂᔭᒃᓴᕐᑕᖃᕐᓂᖓᓂᒃ, ᐃᕐᓂᕐᒥᓄᑦ ᐅᖃᕐᐳᖅ, “ᓱᖕᒪᑦ ᐃᓕᑦᓯᓐᓄᑦ ᑕᑯᓐᓇᖃᑦᑕᐅᑎᑐᐃᓐᓇᕐᐱᓰ?”

² ᐅᖃᐅᑎᒃᑲᓂᕐᐰᑦ, “ᑕᑯᒋᑦ, ᑐᓴᕐᓯᒪᕗᖓ ᐄᑦᔨᑉᑎᒥᒎᖅ ᓂᐊᖂᔭᒃᓴᕐᑕᖃᕐᒪᑦ; ᑕᐅᓄᖓ ᐂᓚᐅᕆᑦᓯ ᓂᐅᕕᕆᐊᕐᓗᓯ ᓂᐊᖂᔭᒃᓴᒥᒃ ᓂᕿᒃᓴᑦᑎᓐᓂᒃ, ᐱᕐᓕᕐᓂᕐᒧᑦ ᑐᖁᖁᓇᑕ.”

³ ᑕᕝᕙ ᔫᓯᐱᐅᑉ ᐊᖓᔪᖏᑦ ᖁᓕᑦ ᑕᐅᓄᓐᖓᓕᕐᐳᑦ ᓂᐅᕕᕆᐊᕐᓗᑎᒃ ᓂᐊᖂᔭᒃᓴᒥᒃ ᐄᑦᔨᑉᑎᒥᑦ.

⁴ ᔧᑰᓪᓕ ᐱᓐᔭᒥᓂ ᔫᓯᐱᐅᑉ ᓄᑲᖓ ᐃᓚᐅᖁᓚᐅᓐᖏᓛ ᐊᖓᔪᖏᓐᓄᑦ, ᓯᕘᕋᓪᓗᓂ ᑖᓐᓇ ᖃᓄᐃᓐᓇᕐᑐᒧᑦ ᑎᑭᑕᐅᓂᐊᕋᓱᒋᓪᓗᒍ.

⁵ ᑕᕝᕙ ᐃᓴᕆᐊᓕᐅᑉ ᐃᕐᓂᖏᑦ ᓂᐅᕕᕆᐊᕐᑐᓄᑦ ᐃᓚᒋᔭᐅᓚᐅᕐᐳᑦ, ᐃᓄᖕᓄᑦ ᐊᓯᒥᖕᓄᑦ ᓂᐅᕕᕆᐊᕐᑐᓄᑦ, ᓄᓇ ᑬᓇᓂᒥ ᑳᖕᓇᕐᑐᕐᔪᐊᕐᒧᑦ ᑎᑭᑕᐅᓚᐅᕐᒥᖕᒪᑦ.

⁶ ᔫᓯᐱᓕ ᓄᓇᒥ ᐊᐅᓚᑦᓯᔨᐅᒐᒥ; ᓄᓇᓂᑦ ᓂᐅᕕᕆᐊᕐᑐᓕᒫᓄᑦ ᓂᐅᕕᕐᕕᐅᖃᑦᑕᓚᐅᕐᐳᖅ. ᔫᓯᐱᐅᓪᓗ ᐊᖓᔪᖏᑦ ᑎᑭᑉᐳᑦ, ᑖᑦᓱᒪᓗ ᓵᖓᓄᑦ ᐅᑯᕗᑦ ᖃᐅᖏᑦ ᓄᓇᒧᑦ ᐊᒃᑐᕐᓗᑎᒃ.

⁷ ᔫᓯᐱᐅᓪᓕ ᐊᖓᔪᓂ ᑕᑯᒐᒥᒋᑦ, ᐃᓕᑕᕆᕔᑦ, ᖃᐅᔨᒪᓐᖏᑕᒥᑐᓪᓕ ᐱᓂᐊᕐᕕᒋᕔᑦ ᓂᑲᒋᓇᒋᓪᓗ ᐅᖃᕐᕕᒋᕔᑦ. ᐅᖃᕐᓗᓂ, “ᓇᑭᓐᖔᕐᓯᒪᕕᓰ?” ᑖᒃᑯᐊ ᑭᐅᕗᑦ, “ᓄᓇᒥᑦ ᑬᓇᓂᒥᑦ ᐱᓯᒪᕗᒍᑦ, ᓂᐅᕕᕆᐊᕐᓗᑕ ᓂᕿᒃᓴᒥᒃ.”

⁸ ᔫᓯᐱᐅᑉ ᐊᖓᔪᓂ ᐃᓕᑕᕆᒐᓗᐊᕐᒪᒋᑦ, ᑖᒃᑯᐊᓕ ᐃᓕᑕᕐᓯᓚᐅᓐᖏᓚᑦ ᑖᑦᓱᒥᖓ.

⁹ ᔫᓯᐱᓕ ᐃᖅᑬᕗᖅ ᓯᓐᓇᒃᑑᒪᓂᕆᓚᐅᕐᓯᒪᔭᒥᓂᒃ ᑖᒃᑯᐊ ᐱᓪᓗᒋᑦ; ᐅᖃᐅᑎᓪᓗᒋᓪᓗ, “ᐃᔨᕋᕐᑐᕐᓗᓯ ᖃᐅᔨᓴᕆᐊᕐᓯᒪᕗᓯ; ᓄᓇ ᓇᐅᒃᑯᑦ ᓵᓚᒋᔭᒃᓴᐅᖕᒪᖔᑦ ᖃᐅᔨᔪᒪᓪᓗᓯ.”

¹⁰ ᑖᒃᑯᐊ ᐅᖃᐅᑎᕚᑦ, “ᐊᖓᔪᖅᑳᖅ ᑍᒤᓐᖏᓚᒍᑦ, ᐃᓕᖕᓄᑦ ᐱᔨᐅᕗᒍᑦ ᓂᕿᒃᓴᓂᒃ ᓂᐅᕕᕆᐊᑐᐃᓐᓇᕐᐳᒍᑦ.

¹¹ ᐊᖑᒻᒧᑦ ᐊᑕᐅᓯᕐᒧᑦ ᑕᒪᑦᑕ ᐃᕐᓂᕆᔭᐅᕗᒍᑦ; ᓴᒡᓗᕿᑦᓯᔨᐅᓇᑕ, ᐃᓕᖕᓄᑦ ᐱᔨᐅᕗᒍᑦ ᓄᓇᒥᒃ ᖃᐅᔨᓴᕐᑎᐅᓐᖏᓚᒍᑦ ᐃᔨᕋᕐᑐᕐᓂᒃᑯᑦ.”

¹² ᑖᑦᓱᒪ ᐅᖃᐅᑎᕔᑦ, “ᑍᒤᓐᖏᓚᖅ, ᓄᓇ ᓇᐅᒃᑯᑦ ᓵᓚᒋᔭᒃᓴᐅᖕᒪᖔᑦ ᑕᑯᔭᕐᑐᕐᐸᓯ.”

¹³ ᑖᒃᑯᐊ ᐅᖃᕐᐳᑦ, “ᐃᓕᖕᓄᑦ ᐱᔨᐅᕗᒍᑦ, ᓄᑲᕇᖑᓪᓗᑕ 12ᕗᒍᑦ, ᐊᖑᒻᒧᑦ ᐊᑕᐅᓯᕐᒧᑦ ᐃᕐᓂᕆᔭᐅᓪᓗᑕ ᑬᓇᓂᒥ ᓄᓇᒥ; ᑕᑯᒋᑦ ᓄᑲᕐᓯᕐᐹᕗᑦ ᐅᓪᓗᒥ ᐊᑖᑕᑦᑎᓐᓃᑉᐳᖅ, ᐊᑕᐅᓯᖅ ᐱᑕᖃᕈᓐᓃᕐᐳᖅ.”

¹⁴ ᔫᓯᐱᐅᓪᓕ ᐅᖃᐅᑎᕔᑦ, “ᓲᕐᓗ ᐅᖃᐅᑎᖅᑲᐅᒐᑦᓯ ᓱᓕᕗᑦ, ᐅᖃᖅᑲᐅᒐᒪ, ‘ᓄᓇᒥᒃ ᐃᔨᕋᕐᑐᕐᓗᓯ ᖃᐅᔨᓴᕆᐊᕐᓯᒪᕗᓯ!’

¹⁵ ᑍᒤᒻᒪᑦ ᐃᒫᒃ ᖃᐅᔨᓴᕐᑕᐅᓂᐊᕐᐳᓯ: ᐰᕉ ᐃᓅᖕᒪᑦ, ᑕᒫᓐᖓᑦ ᐊᐅᓪᓚᕐᓂᐊᓐᖏᓚᓯ ᓄᑲᕐᓯᕐᐹᕆᔭᓯ ᑕᒪᐅᓐᖓ ᑎᑭᑎᑕᐅᖅᑳᕐᑎᓐᓇᒍ.

¹⁶ ᐃᓚᓯ ᐊᑕᐅᓯᖅ ᑎᓕᓚᐅᕐᓯᐅᒃ, ᓄᑲᕐᓯᕐᐹᑦᓯᓐᓂᒃ ᐂᒃᓯᖁᓪᓗᒍ, ᐃᓕᑦᓯᓕ ᐅᕙᓂ ᑎᒍᔭᐅᓯᒪᕕᖕᒦᖕᓂᐊᕐᐳᓯ, ᐅᖃᐅᓯᓯ ᓱᓕᖕᒪᖔᑕ ᖃᐅᔨᓴᕐᑕᐅᓂᖏᓐᓂ, ᓱᓕᓂᖃᕐᒪᖔᑦᓯ; ᑍᒤᖏᑉᐸᓪᓕ, ᐰᕉ ᐃᓅᖕᒪᑦ, ᖁᓚᕐᓇᖏᑦᑐᒥᒃ ᓄᓇᒥᒃ ᐃᔨᕋᕐᑐᕐᓗᓯ ᖃᐅᔨᓴᕆᐊᕐᓯᒪᕗᓯ.”

¹⁷ ᑕᕝᕙ ᑲᑎᓐᖓᓪᓗᑎᒃ ᑎᒍᔭᐅᓯᒪᕕᖕᒧᐊᕐᑎᑉᐰᑦ ᐅᓪᓗᓂᒃ ᐱᖓᓱᓂᒃ.

¹⁸ ᐅᓪᓗᐃᑦ ᐱᖓᔪᖓᓐᓂ ᔫᓯᐱᐅᑉ ᐅᖃᐅᑎᕔᑦ, “ᐃᓅᔪᒪᒍᑦᓯ ᐃᒤᓕᐅᕐᑐᒃᓴᐅᕗᓯ, ᒎᑎ ᓯᕘᕋᒋᒐᒃᑯ:

¹⁹ ᓴᒡᓗᕿᑦᓯᔨᐅᓐᖏᒍᑦᓯ, ᖃᑕᓐᖑᑎᑦᓯ ᐃᓚᖓᑦ ᐊᑕᐅᓯᖅ ᐅᕙᓂ ᑎᒍᔭᐅᓯᒪᓚᐅᕐᓕ ᐃᓂᒋᔭᑦᓯᓐᓂ, ᐃᓕᑦᓯ ᑕᒪᑦᓯ ᐊᐅᓪᓚᕐᑎᓪᓗᓯ ᓂᐊᖂᔭᒃᓴᓂᒃ ᓇᒃᓴᕐᓗᓯ ᐃᒡᓗᒥᐅᖃᑎᓯᓐᓄᑦ ᑳᖕᓇᕐᑐᕐᔪᐊᖅ ᐱᑦᔪᑎᒋᓪᓗᒍ,

²⁰ ᓄᑲᕐᓯᕐᐹᓯᓗ ᐅᕙᓐᓄᑦ ᕾᑎᑕᒃᓴᕆᕙᓯ; ᐅᖃᐅᓯᓯ ᑕᕝᕙ ᐅᒃᐱᕆᓕᕐᓂᐊᕐᐸᒃᑲ, ᑐᖁᑕᐅᓂᐊᕋᓯᓗ.” ᑖᒃᑯᐊᓗ ᑕᒪᑐᒥᖓ ᐊᖏᕐᐳᑦ.

²¹ ᑕᕝᕙ ᐃᒻᒥᖕᓄᑦ ᐅᖃᖃᑦᑕᐅᑎᓕᕐᐳᑦ, “ᑕᒃᑰᒡᓕ ᑕᒪᑐᒧᖓ ᐸᓯᔭᒃᓴᐅᕗᒍᑦ ᓄᑲᕆᓚᐅᕐᑕᕗᑦ ᐱᑦᔪᑎᒋᓪᓗᒍ, ᑕᑯᓐᓇᓚᐅᕋᑦᑎᒍ ᐅᕙᑦᑎᓐᓄᑦ ᐃᑲᔪᕐᑕᐅᔪᒪᓪᓚᕆᒃᑎᓪᓗᒍ ᓈᓚᓚᐅᓐᖏᓐᓇᑦᑎᒍ, ᑍᒤᒻᒪᑦ ᑕᕝᕙ ᑕᒪᑐᒧᖓ ᐊᒃᓱᕈᕐᑎᑕᐅᓂᕐᒧᑦ ᑎᑭᑕᐅᕗᒍᑦ.”

²² ᕉᐱᓂᐅᑉ ᐅᖃᐅᑎᕔᑦ, “ᐅᖃᐅᑎᓚᐅᕐᓯᒪᓐᖏᓚᑦᓰ ᐊᔪᕐᑐᓕᖁᓇᓯ ᓄᑲᑉᐱᐊᒧᑦ? ᐃᓕᑦᓯᓕ ᓈᓚᒍᒪᓚᐅᓐᖏᓚᓯ, ᑕᕝᕙ ᑖᑦᓱᒪ ᐊᐅᖓᓄᑦ ᐊᑭᓂᐊᕐᑕᐅᓕᕐᐳᒍᑦ.”

²³ ᖃᐅᔨᒪᓚᐅᓐᖏᓚᓪᓕ ᔫᓯᐱᒧᑦ ᑐᑭᓯᔭᐅᖕᒪᖔᕐᒥᒃ, ᑖᒃᑯᐊ ᐅᖃᓪᓚᖃᑦᑕᐅᑎᓕᕌᖓᒥ ᑐᓵᔨᖃᖃᑦᑕᕋᒥᒃ.

²⁴ ᔫᓯᐱᓕ ᑖᒃᑯᓇᓐᖓᑦ ᕿᒪᕉᑎᓪᓗᓂ ᕿᐊᕗᖅ; ᐅᑎᕐᕕᒋᒐᒥᒋᓪᓗ ᐅᖃᓪᓚᒡᕕᒋᕔᑦ. ᓯᒥᐅᓂᓕ ᑖᒃᑯᓇᓐᖓᑦ ᑎᒍᓪᓗᒍ ᕿᓚᒃᓱᕐᐹ ᑕᑯᓐᓇᕐᑎᓪᓗᒋᑦ.

ᔫᓯᐱᐅᑉ ᐊᖓᔪᖏᑕ ᐅᑎᕐᓂᖓ ᑬᓇᓂᒧᑦ

²⁵ ᔫᓯᐱᓗ ᑎᓕᓯᕗᖅ ᐃᒃᐱᐊᕐᔪᖁᑎᖏᑦ ᐃᓗᓪᓕᕐᓱᕐᑕᐅᖁᓪᓗᒋᑦ ᓂᐊᖂᔭᒃᓴᓂᒃ, ᑮᓇᐅᔧᓪᓗ ᐊᑭᓕᐅᑎᖏᑦ ᐃᒃᐱᐊᕐᔪᖁᑎᖏᓐᓄᑦ ᐊᑐᓂᑦ ᐴᖃᓯᐅᑦᔭᐅᖁᕔᑦ, ᐃᖏᕐᕋᑎᓪᓗᒋᓪᓗ ᑕᖁᐊᒃᓴᖏᓐᓂᒃ ᓇᒃᓴᕐᑎᑕᐅᖁᕔᑦ. ᑕᕝᕙ ᑍᒤᓕᐅᕐᕕᐅᓚᐅᕐᐳᑦ.

²⁶ ᑕᕝᕙ ᓯᐅᑎᖅᑯᕐᑐᔪᖁᑎᒥᖕᓂᒃ ᓇᖕᒥᕐᓱᐃᕗᑦ ᓂᐊᖂᔭᒃᓴᕐᑖᒥᖕᓂᒃ, ᐊᐅᓪᓚᕐᓗᑎᒡᓗ.

²⁷ ᐃᓚᖓᓪᓕ ᓯᓂᒃᑕᕐᓂᐊᓕᕋᒥᒃ ᐃᒃᐱᐊᕐᔪᖁᑎᒥᓂᒃ ᕿᓚᕈᑦᔮᕐᓯᕗᖅ ᓯᐅᑎᖅᑯᕐᑐᔪᖁᑎᒥᓂᒃ ᓂᕆᑎᑦᓯᔪᒪᓪᓗᓂ, ᑕᑯᓪᓗᓂᓗ ᑮᓇᐅᔭᒥᓂᒃ ᐊᑭᓕᐅᑎᒋᓚᐅᕐᑕᒥᓂᒃ ᐃᒃᐱᐊᕐᔪᖁᑎᖓᑕ ᐹᖓᓃᑦᑐᓂᒃ;

²⁸ ᐃᓚᒥᓄᓪᓗ ᐅᖃᕐᐳᖅ, “ᑮᓇᐅᔭᒃᑲ ᐅᑎᕐᑎᑕᐅᓐᓂᕐᐳᑦ; ᑕᑯᒋᑦ ᐃᒃᐱᐊᕐᔪᖁᑎᒪ ᐹᖓᓃᑉᐳᑦ!” ᑕᕝᕙ ᑲᑉᐱᐊᓱᓕᕐᐳᑦ ᖁᐊᕐᓵᖓᓕᕐᓗᑎᒡᓗ, ᓴᔪᓕᕐᓗᑎᒡᓗ ᐃᒻᒥᖕᓄᑦ ᐅᖃᖃᑦᑕᐅᑎᓕᕐᐳᑦ, ᐅᖃᕐᓗᑎᒃ, “ᒎᑏᓐᓇ ᖃᓄᐃᓕᐅᓕᕐᑐᖅ ᐅᕙᑦᑎᓐᓄᑦ?”

²⁹ ᔧᑯᒧᓪᓕ ᐊᑖᑕᒥᖕᓄᑦ ᑎᑭᓐᓇᒥᒃ ᑬᓇᓂᒧᑦ, ᐅᓂᒃᑳᕐᕕᒋᕚᑦ ᑕᒤᓐᓂᒃ ᖃᓄᐃᓕᐅᕐᑕᐅᓂᕆᔭᒥᖕᓂᒃ, ᐅᖃᕐᓗᑎᒃ,

³⁰ “ᐊᖑᑎᐅᑉ, ᓄᓇᒥ ᐊᖓᔪᖅᑳᖑᔫᑉ, ᐃᓕᕋᓇᕐᑐᒥᒃ ᐅᖃᓪᓚᒡᕕᒋᓚᐅᕐᐹᑎᒍᑦ, ᓄᓇᒥᒃ ᐃᔨᕋᕐᑐᕐᓗᑕ ᖃᐅᔨᓴᕐᑎᐅᓂᕋᓚᐅᕐᐹᑎᒍᑦ.

³¹ ᐅᖃᐅᑎᓚᐅᕐᐸᕗᓪᓕ, ‘ᓴᒡᓗᕿᑦᓯᔨᐅᖏᓐᓂᕋᕐᓱᑕ, ᓄᓇᒥᒡᓗ ᐃᔨᕋᕐᑐᕐᓗᑕ ᖃᐅᔨᓴᕆᐊᕐᓯᒪᖏᓐᓂᕋᕐᓱᑕ;

³² ᖃᑕᓐᖑᑎᒌᖑᓪᓗᑕ 12ᕗᒍᑦ, ᐊᑕᐅᓯᕐᒥᒃ ᐊᑖᑕᖃᕐᓗᑕ; ᐊᑕᐅᓯᕐᓕ ᐱᑕᖃᕈᓐᓃᕐᐳᖅ, ᓄᑲᕐᓯᕐᐹᕗᓪᓕ ᐅᓪᓗᒥ ᐊᑖᑕᒥᓃᑉᐳᖅ ᓄᓇᒥ ᑬᓇᓂᒥ.’

³³ ᑕᕝᕙ ᐊᖑᑎᐅᑉ, ᓄᓇᒥ ᐊᖓᔪᖅᑳᖑᔫᑉ, ᐅᖃᐅᑎᓚᐅᕐᐹᑎᒍᑦ, ‘ᑕᒪᑐᒧᖓ ᖃᐅᔨᓴᕐᓂᐊᕐᐸᑦᓯ ᓴᒡᓗᕿᑦᓯᔨᐅᖏᒻᒪᖔᑦᓯ: ᖃᑕᓐᖑᑎᑦᓯ ᐃᓚᖓᑦ ᐊᑕᐅᓯᖅ ᕿᒪᓚᐅᕐᓯᐅᒃ ᐅᕙᓐᓄᑦ, ᓂᐊᖂᔭᒃᓴᓂᒃ ᐃᒡᓗᒥᐅᖃᑎᓯᓐᓄᑦ ᓇᒃᓴᕐᓗᓯ ᑳᖕᓇᕐᑐᕐᔪᐊᖅ ᐱᑦᔪᑎᒋᓪᓗᒍ, ᐊᐅᓪᓚᓕᕆᑦᓯ.

³⁴ ᓄᑲᓯ ᓄᑲᕐᓯᕐᐹᖅ ᐅᕙᓐᓄᑦ ᕾᑎᓯᐅᒃ; ᑕᕝᕙ ᖃᐅᔨᓂᐊᕐᐳᖓ ᓄᓇᒥᒃ ᐃᔨᕋᕐᑐᕐᓗᓯ ᖃᐅᔨᓴᕐᑎᐅᖏᓐᓂᑦᓯᓐᓂ ᓴᒡᓗᕿᑦᓯᔨᐅᖏᓐᓂᑦᓯᓐᓂᒡᓗ, ᖃᑕᓐᖑᑎᓯᓗ ᐃᓕᑦᓯᓐᓄᑦ ᑐᓂᓂᐊᕐᐸᕋ, ᑕᕝᕙ ᓂᐅᕕᕈᓐᓇᕐᓯᓂᐊᕐᐳᓯ ᑕᕝᕙᓐᖓᑦ ᓄᓇᒥᑦ.’”

³⁵ ᐃᒃᐱᐊᕐᔪᖁᑎᒥᖕᓂᒡᓗ ᓈᕕᑎᕆᒐᒥᒃ, ᑕᑯᒋᑦ, ᐊᖑᑏᑦ ᑕᒪᕐᒥᒃ ᐊᑐᓂᑦ ᑮᓇᐅᔭᖏᑦ ᐴᕐᓯᒪᓪᓗᑎᒃ ᐃᒃᐱᐊᕐᔪᖁᑎᖓᓃᑦᑐᑦ ᓇᓂᕔᑦ; ᑖᒃᑯᐊᓕ ᐊᑖᑕᖓᓪᓗ ᑮᓇᐅᔭᓂᒃ ᐴᕐᓯᒪᔪᓂᒃ ᑕᑯᒐᒥᒃ, ᑲᑉᐱᐊᓱᓕᕐᐳᑦ.

³⁶ ᑕᕝᕙ ᐊᑖᑕᖓᑦᑕ ᔧᑰᑉ ᐅᖃᐅᑎᕔᑦ, “ᐃᓕᑦᓯ ᐃᓚᓐᖓᕐᑎᓯᒪᕙᑦᓯᓐᖓ ᕿᑐᕐᖓᓐᓄᑦ: ᔫᓯᐱ ᐱᑕᖃᕈᓐᓃᕐᐳᖅ, ᓯᒥᐅᓂᓗ ᐱᑕᖃᕈᓐᓃᕆᕗᖅ, ᑕᕝᕙ ᐱᓐᔭᒥᓂ ᓇᒃᓴᕈᒪᓕᕆᕙᓯ; ᑕᒪᒃᑯᐊ ᑕᒪᕐᒥᒃ ᐅᕙᓐᓄᑦ ᕿᒃᓵᖕᓇᕐᑐᕐᔪᐊᖑᕗᑦ.”

³⁷ ᑕᕝᕙ ᕉᐱᓂ ᐅᖃᕐᐳᖅ ᐊᑖᑕᒥᓄᑦ, “ᐃᕐᓃᒃᑲᒃ ᒪᕐᕉᒃ ᑐᖁᓐᓂᐊᕐᐹᒃᑭᒃ ᑖᓐᓇ ᐃᓕᖕᓄᑦ ᐅᑎᕐᑎᖏᒃᑯᒃᑯ; ᐅᕙᓐᓄᑦ ᐱᓯᒪᔭᐅᑎᓚᐅᕈᒃ ᓵᑕᒃᓴᐅᑦᔪᑎᒋᓂᐊᕐᐸᕋ, ᐃᓕᖕᓄᑦ ᐅᑎᕐᑎᓛᕐᐸᕋ.”

³⁸ ᑖᓐᓇᓕ ᐅᖃᕐᐳᖅ, “ᐃᕐᓂᕋ ᐃᓕᑦᓯᓐᓄᑦ ᐊᐅᓪᓚᖃᑕᐅᓂᐊᓐᖏᓚᖅ, ᑖᑦᓱᒪ ᐊᖓᔪᐊ ᑐᖁᖓᓕᕐᒪᑦ, ᑖᓐᓇᓗ ᐊᒥᐊᒃᑯᑑᓕᕐᐳᖅ. ᐊᖅᑯᑎᑦᓯᓐᓂ ᑖᓐᓇ ᖃᓄᐃᓐᓇᕐᑐᒧᑦ ᑎᑭᑕᐅᒐᔭᕐᐸᑦ, ᑕᕝᕙ ᓄᔭᒃᑲ ᖃᑯᕐᑍᑦ ᕿᒃᓵᒃᑎᑕᐅᓗᐊᕐᓂᕐᒧᑦ ᐅᒋᐊᕐᑕᐅᓗᖓ ᐃᓕᔭᐅᔪᒫᕐᐳᖓ ᐃᓗᕕᖃᕐᕕᖕᒧᑦ.”