ᒨᓯᓯ ᓯᕗᓪᓖᑦ 40 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᓯᐱᐅᑉ ᑐᑭᓯᑎᑦᓯᓂᖓ ᑎᒍᔭᐅᓯᒪᔪᑦ ᓯᓐᓇᒃᑐᖏᑕ ᑐᑭᖏᓐᓂᒃ

¹ ᑕᒪᑐᒪᓕ ᑭᖑᓂᖓᒍᑦ, ᐄᑦᔨᑉᑎᐅᑉ ᐊᖓᔪᖅᑳᕐᔪᐊᖓᑕ ᐃᒥᕐᓂᐊᕐᑕᖓᓂᒃ ᐊᑐᐃᓐᓇᕈᐃᔨᐅᑉ ᓂᐊᖂᔭᓕᐅᕐᑎᖁᑎᖓᑕᓗ ᐊᖓᔪᖅᑳᑎᒃ ᓂᓐᖓᒃᑎᓚᐅᕐᐹᑦ ᐄᑦᔨᑉᑎᐅᑉ ᐊᖓᔪᖅᑳᕐᔪᐊᖓ.

² ᐰᕉᓗ ᓂᓐᖓᐅᑦᔨᓚᐅᕐᐳᖅ ᐊᖓᔪᖅᑳᖁᑎᒥᓂᒃ ᒪᕐᕉᖕᓂᒃ, ᐃᒥᕐᓂᐊᕐᑕᖏᓐᓄᑦ ᑲᒪᔨᐅᑉ ᐊᖓᔪᖅᑳᖓᓐᓂᒃ ᓂᐊᖂᔭᓕᐅᕐᑏᓪᓗ ᐊᖓᔪᖅᑳᖓᓐᓂᒃ,

³ ᑲᒪᒋᔭᐅᑎᓕᓚᐅᕐᐰᓪᓗ ᐅᓇᑕᕐᑐᒃᓮᑦ ᐊᖓᔪᖅᑳᖏᓐᓄᑦ, ᑎᒍᔭᐅᓯᒪᕕᖕᒧᑦ ᔫᓯᐱᐅᑉ ᓇᔪᕐᑕᖓᓃᑦᑐᒧᑦ.

⁴ ᐅᓇᑕᕐᑐᒃᓮᓪᓕ ᐊᖓᔪᖅᑳᖓᑦᑕ ᔫᓯᐱ ᑲᒪᔨᓐᖑᕐᑎᓚᐅᕐᐹ ᑖᒃᑯᓂᖓ, ᐱᔨᑦᓯᖃᑦᑕᓚᐅᕐᐳᖅ; ᐊᑯᓂᒐᓚᒡᓗ ᑲᒪᔨᐅᖃᑕᐅᓕᓚᐅᕐᐳᖅ ᑖᒃᑯᓂᖓ.

⁵ ᐅᓐᓄᐊᓪᓕ ᐃᓚᖓᓐᓂ ᑖᒃᑯᐊᒃ ᐊᑐᓂᑦ ᓯᓐᓇᒃᑐᓚᐅᕐᐴᒃ ᐃᒥᕐᑕᐅᓂᐊᕐᑐᓂᒃ ᑲᒪᔨᐅᔪᖅ ᓂᐊᖂᔭᓕᐅᕐᑎᓪᓗ ᑲᒪᔨᖓᑦ ᐄᑦᔨᑉᑎᒥᐅᑦ ᐊᖓᔪᖅᑳᕐᔪᐊᖓᓂᒥᐅᑕᐅᔫᒃ, ᑎᒍᔭᐅᑎᑕᐅᓯᒪᔫᒃ ᑕᕝᕙᓂ ᐊᑐᓂᑦ ᓯᓐᓇᒃᑐᕐᐴᒃ, ᐊᑐᓂᓪᓗ ᓯᓐᓇᒃᑐᖏᑦ ᐃᒻᒥᒍᑦ ᑐᑭᖃᕐᓗᑎᒃ.

⁶ ᔫᓯᐱᐅᓪᓕ ᐅᓪᓛᒃᑯᑦ ᐅᐸᒃᑲᒥᒋᒃ ᑕᑯᒐᒥᒋᒡᓗ, ᖁᕕᐊᓱᖏᒻᒪᑎᒃ.

⁷ ᑕᕝᕙ ᐰᕉᑉ ᐊᖓᔪᖅᑳᖁᑎᖏᒃ ᑖᒃᑯᐊᒃ ᐃᓚᒋᕙᓚᐅᕐᑖᖕᓂ ᐊᖓᔪᖅᑳᖓᑕ ᐃᒡᓗᖓᓂ, ᐊᐱᕆᕚᒃ, “ᓱᖕᒪᑦ ᐅᓪᓗᒥ ᖁᕕᐊᓱᖏᑦᑐᐊᓘᕕᓯᒃ?”

⁸ ᑖᒃᑯᐊᒃ ᑭᐅᕘᒃ, “ᐊᑐᓂᑦ ᓯᓐᓇᒃᑑᒪᖅᑲᐅᕗᒍᒃ, ᓇᓪᓕᐊᓐᓂᒡᓘᓐᓃᓪᓕ ᑐᑭᓯᑎᑕᐅᔪᓐᓇᓐᖏᓚᒍᒃ.” ᔫᓯᐱᐅᓪᓗ ᐅᖃᐅᑎᕚᒃ, “ᒎᑎ ᑭᓯᒥ ᑐᑭᓯᑎᑦᓯᔪᓐᓇᕐᑐᑑᕗᖅ, ᐅᖃᐅᑎᓚᐅᕐᓯᓐᖓ ᑖᒃᑯᓂᖓ.”

⁹ ᑕᕝᕙ ᐃᒥᕐᑕᐅᓂᐊᕐᑐᓂᒃ ᑲᒪᔨ ᓯᓐᓇᒃᑐᕐᒥᓂᒃ ᐅᖃᓕᕐᐳᖅ ᔫᓯᐱᒧᑦ, ᐅᖃᕐᓗᓂ, “ᓯᓐᓇᒃᑐᕐᑎᓪᓗᖓ ᓇᐹᕐᑐᒥᒃ ᕔᓂᓕᒃᓴᒥᒃ ᓵᓐᓃᑦᑐᖃᕐᐳᖅ,

¹⁰ ᑕᕝᕙᓂᓗ ᕔᓂᓕᒃᓴᒥ ᐱᖓᓱᓂᒃ ᐊᕙᓚᖓᔪᖃᕐᐳᖅ; ᐅᖃᐅᔭᕐᑖᑐᐊᕋᒥ ᓄᕗᖏᑎᒍᑦ ᐱᕈᕐᕕᐅᓯᑲᐅᑎᒋᕗᖅ, ᐸᐅᕐᖎᓪᓗ ᕔᓂᒃᓮᑦ ᐱᕈᕇᕐᓗᑎᒃ.

¹¹ ᐰᕉᓪᓗ ᐃᒥᐅᑎᖓᓂᒃ ᑎᒍᒥᐊᕋᒪ; ᑕᕝᕙᓐᖓᑦ ᐸᐅᕐᖓᓂᒃ ᑎᒍᓯᒐᒪ ᐃᑦᑏᔭᓕᕐᐸᒃᑲ ᐰᕉᑉ ᐃᒥᐅᑎᖓᓄᑦ, ᐃᒥᐅᑎᓗ ᐰᕉᒧᑦ ᑐᓂᓪᓗᒍ.”

¹² ᑕᕝᕙ ᔫᓯᐱ ᑖᑦᓱᒧᖓ ᐅᖃᓕᕐᐳᖅ, “ᐅᓇ ᑕᕝᕙ ᑕᒪᑐᒪ ᑐᑭᖓ: ᐅᑯᐊ ᐱᖓᓱᑦ ᐊᕙᓚᖓᔪᐃᑦ ᑐᑭᖃᕐᐳᑦ ᐅᓪᓗᓂᒃ ᐱᖓᓱᓂᒃ;

¹³ ᐅᓪᓗᐃᑦ ᐱᖓᓱᑦ ᐊᓂᒍᕐᐸᑕ ᐰᕉᑉ ᑐᑭᑖᕐᕕᒋᔪᒫᕐᐹᑎᑦ ᐅᑎᕐᑎᓪᓗᑎᓪᓗ ᐱᓇᓱᐊᕐᕕᒋᓚᐅᕐᑕᕐᓄᑦ; ᐰᕉᓪᓗ ᐃᒥᐅᑎᖓ ᑖᑦᓱᒧᖓ ᑐᓂᖃᑦᑕᓕᓛᕆᕙᑦ ᓯᕗᓂᖓᓂᑎᑐᑦ, ᑖᑦᓱᒪ ᐃᒥᕐᓂᐊᕐᑕᖏᓐᓂᒃ ᑲᒪᔨᐅᓂᕆᓚᐅᕐᑕᕐᑐᖅ.

¹⁴ ᐃᖅᑲᐅᒪᓛᕐᐸᕐᒪ ᖃᓄᐃᖏᑦᓯᐊᓕᕈᕕᑦ, ᕿᓄᕗᖓ ᓈᒃᑭᒋᔪᒫᕐᐸᕐᒪ ᐅᖃᐅᓯᕆᓗᖓᓗ ᐰᕉᒧᑦ, ᐅᕙᓐᖓᑦ ᐊᓂᑎᑕᐅᖁᓪᓗᖓ ᐃᓂᒋᔭᓐᓂᑦ.

¹⁵ ᐄᑉᕈᐃᑦ ᓄᓇᖓᓂᑦ ᑎᒡᓕᒐᕆᔭᐅᓪᓗᖓ ᐊᐅᓪᓚᕈᑦᔭᐅᓚᐅᕋᒪ; ᐊᒻᒪᑦᑕᐅᖅ ᑎᒍᔭᐅᑦᔪᑎᒃᓴᒥᒃ ᐱᓚᐅᕐᑎᓐᓇᖓ ᐅᕗᖓ ᑎᒍᔭᐅᓯᒪᕕᖕᒧᐊᕐᑕᐅᓯᒪᓪᓗᖓ.”

¹⁶ ᓂᐊᖂᔭᓕᐅᕐᑏᓪᓕ ᐊᖓᔪᖅᑳᖓᑦ ᑕᑯᒐᒥ ᑐᑭᓯᓇᕐᓯᑎᑕᐅᔪᑦ ᖁᕕᐊᓇᕐᑑᓂᖏᓐᓂᒃ, ᔫᓯᐱᒧᑦ ᐅᖃᕐᐳᖅ, “ᐅᕙᖓᑦᑕᐅᖅ ᓯᓐᓇᒃᑐᓚᐅᕐᐳᖓ: ᓂᐊᖁᓐᓂ ᐱᖓᓱᓂᒃ ᐃᕕᐅᔭᕐᓂᒃ ᖃᑯᕐᑕᓂᒃ ᐊᒡᔭᕐᓯᓚᐅᕐᐳᖓ,

¹⁷ ᐊᒡᔭᕐᑕᒪ ᖄᖓᓃᓐᓂᕐᐹᖅ ᐃᓗᓕᖃᓚᐅᕐᐳᖅ ᐰᕉᑉ ᓂᕆᔭᒃᓴᖏᓐᓂᒃ ᐆᓯᒪᔪᓂᒃ ᐊᑦᔨᒌᖏᑦᑐᓂᒃ, ᑎᖕᒥᐊᓪᓕ ᑕᕝᕙᓐᖓᑦ ᐃᕕᐅᔭᕐᒥᑦ ᓂᕆᓚᐅᕐᐳᑦ ᓂᐊᑯᕐᒪ ᖄᖓᓃᑦᑐᒥᑦ.”

¹⁸ ᔫᓯᐱᐅᓪᓗ ᑭᐅᕚ ᐅᖃᐅᑎᓪᓗᒍᓗ, “ᐅᓇ ᑕᕝᕙ ᑕᒪᑐᒪ ᑐᑭᖓ: ᐅᑯᐊ ᐃᕕᐅᔧᑦ ᐱᖓᓱᑦ ᐅᓪᓗᑦ ᐱᖓᓲᕗᑦ;

¹⁹ ᐅᓪᓗᐃᑦ ᐱᖓᓱᑦ ᐊᓂᒍᕐᐸᑕ ᐰᕉᑉ ᑐᑭᑖᕐᕕᒋᔪᒫᕐᐹᑎᑦ ᕿᒥᑕᐅᖁᓪᓗᑎᑦ ᓇᐹᕐᑐᒥ! ᑎᖕᒥᐊᓂᓪᓗ ᑎᒦᑦ ᓂᕆᔭᐅᔪᒫᕐᐳᖅ.”

²⁰ ᐅᓪᓗᐃᑦ ᐱᖓᓱᑦ ᐊᓂᒍᕐᒪᑕ, ᐰᕉ ᐃᓅᓕᕐᕕᒃᓯᐅᓕᕐᐳᖅ, ᓂᕆᕕᒃᔪᐊᕐᑎᑦᓯᕗᓪᓗ ᐱᔨᒥᓄᑦ ᑕᒤᓐᓄᑦ, ᑐᑭᑖᕈᑎᖃᕐᐳᕐᓗ ᐃᒥᕐᑎᑦᓯᔩᑦ ᑲᒪᔨᖓᓐᓂᒃ ᓂᐊᖂᔭᓕᐅᕐᑏᓪᓗ ᑲᒪᔨᖓᓐᓂᒃ ᐱᔨᖏᑕ ᐊᑯᕐᖓᓐᓂ.

²¹ ᐃᒥᕐᑎᑦᓯᔩᓪᓗ ᑲᒪᔨᖓᑦ ᐅᑎᕐᑎᑉᐹ ᐃᒥᕐᑎᑦᓯᔨᓄᑦ ᑲᒪᔨᐅᓂᕐᒧᑦ, ᐰᕉᑉ ᐃᒥᕐᓂᐊᕐᑕᖓᓂᒃ ᑐᓂᓯᖃᑦᑕᖁᓪᓗᒍ ᑖᑦᓱᒧᖓ;

²² ᓂᐊᖂᔭᓕᐅᕐᑏᓪᓕ ᑲᒪᔨᖓ ᕿᒥᑕᐅᑎᑉᐹ, ᓲᕐᓗ ᔫᓯᐱᐅᑉ ᑐᑭᓯᓇᕐᑎᑦᓯᓂᕆᓚᐅᕐᑕᖓᑐᑦ ᑖᒃᑯᓄᖓ.

²³ ᐃᒥᕐᑎᑦᓯᔩᓪᓕ ᑲᒪᔨᖓᑕ ᔫᓯᐱ ᐃᖅᑲᐅᒪᓚᐅᓐᖏᓛ, ᐳᐃᒍᑦᓯᐊᕐᓗᒍᓗ.