ᒨᓯᓯ ᓯᕗᓪᓖᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᑬᓂᐅᓪᓗ ᐂᐱᓕᐅᓪᓗ ᐅᓂᒃᑲᐅᑕᐅᓂᖏᒃ

¹ ᐋᑕᒥᐅᓪᓗ ᓄᓕᐊᓂ ᐄᕕ ᐱᖃᑎᒋᖕᒪᒍ, ᑕᕝᕙ ᕿᑐᕐᖓᒃᓴᕐᑖᕐᐳᖅ, ᐃᕐᓂᕐᑖᕐᓗᓂᓗ ᑬᓂᒥᒃ, ᐅᖃᕐᓗᓂ, “ᕿᑐᕐᖓᕐᑖᕐᐳᖓ ᐊᖑᒻᒥᒃ ᐊᑕᓂᐅᑉ ᐃᑲᔪᕐᓂᖓᓄᑦ.”

² ᑭᖑᓂᖓᒍᑦ ᐃᕐᓂᕐᑖᕆᕗᖅ ᓄᑲᖓᓂᒃ ᐂᐱᓕᒥᒃ, ᐂᐱᓕᓗ ᓰᐱᓕᕆᔨᐅᓕᓚᐅᕐᐳᖅ, ᑬᓂᓕ ᐱᕈᕐᓰᕕᓕᕆᔨᐅᓪᓗᓂ.

³ ᑕᒪᑐᒪ ᑭᖑᓂᑐᖃᕆᓕᕐᑕᖓᒍᑦ ᑬᓂ ᓄᓇᒥᑦ ᐱᕈᕐᑐᓂᒃ ᐊᑕᓂᕐᒧᑦ ᑐᓂᕐᕈᓯᕐᐳᖅ.

⁴ ᐂᐱᓕᓕ ᓰᐱᖁᑎᒥ ᕿᑐᕐᖓᕐᑖᕆᐅᕈᑎᖏᓐᓂᒃ ᖁᐃᓂᓂᖏᓐᓂᒡᓗ ᑐᓂᕐᕈᓯᕐᐳᖅ, ᐊᑕᓂᐅᓪᓗ ᐂᐱᓕ ᖁᕕᐊᒋᕚ ᑐᓂᕐᕈᑎᖏᓪᓗ.

⁵ ᑬᓂᐅᓪᓕ ᑐᓂᕐᕈᑎᒋᔭᖓ ᓈᒻᒪᒋᓐᖏᓛ, ᑬᓂᓗ ᓂᓐᖓᕕᒡᔪᐊᕐᐳᖅ, ᑮᓇᕐᓗᓕᕐᓗᓂᓗ.

⁶ ᐊᑕᓂᐅᓪᓕ ᑬᓂ ᐅᖃᐅᑎᕚ, “ᓱᖕᒪᑦ ᓂᓐᖓᐅᒪᕖᑦ, ᑮᓇᕐᓕᕐᓯᒪᓪᓗᑎᓪᓘ?

⁷ ᐊᑲᐅᔪᒥᒃ ᐱᓐᓂᕈᕕᑦ, ᐃᓚᓕᐅᕐᑕᐅᒐᔭᓐᖏᓚᑏᑦ? ᓈᒻᒪᖏᑦᑐᒥᒡᓕ ᐱᒍᕕᑦ, ᐊᔪᕐᑐᓕᓂᐅᑉ ᐅᑕᖅᑭᕚᑎᑦ ᐃᑎᕐᑕᕐᕕᖕᒥ; ᐃᓕᖕᓂᒡᓗ ᐱᔪᒪᓪᓗᓂ, ᐃᕝᕕᓪᓕ ᓵᓚᒋᔭᕆᐊᖃᕐᐸᑦ.”

⁸ ᑬᓂᐅᓪᓕ ᓄᑲᓂ ᐂᐱᓕ ᐅᖃᐅᑎᕚ, “ᐊᕗᖓ ᓇᑎᕐᓇᒧᑦ ᐂᓚᐅᕐᓗᒃ.” ᓇᑎᕐᓇᒦᓕᕐᓗᑎᒡᓗ ᑬᓂᐅᑉ ᓄᒃᑲᓂ ᐂᐱᓕ ᓵᓪᓗᒍ ᑐᖁᑉᐹ.

⁹ ᑕᕝᕙ ᐊᑕᓂᐅᑉ ᑬᓂ ᐊᐱᕆᓕᕐᐹ, “ᓇᐅᒡᓕ ᓄᑬᑦ ᐂᐱᓕ?” ᑖᓐᓇ ᐅᖃᕐᐳᖅ, “ᖃᐅᔨᒪᓐᖏᓚᕋ; ᖃᓄᖅ ᓄᑲᓐᓂᒃ ᑲᒪᔨᐅᒐᒫ?”

¹⁰ ᐊᑕᓂᕐᓗ ᐅᖃᕐᐳᖅ, “ᖃᓄᐃᓕᐅᕐᓂᕐᐲᑦ? ᓄᑲᕐᐱᑦ ᐊᐅᖓ ᐅᕙᓐᓄᑦ ᓂᓪᓕᐊᖕᒪᑦ ᓄᓇᒥᑦ.

¹¹ ᓇᕐᕈᓇᕐᓯᑎᑕᐅᕗᑎᑦ ᓄᓇᒥᑦ, ᐂᑦᑕᕐᓗᓂ ᐄᓯᖕᒪᑦ ᓄᑲᕐᐱᑦ ᐊᐅᖓᓂᒃ ᐊᒡᒐᐱᑦ ᑍᒤᑎᑕᖓᓄᑦ.

¹² ᐱᕈᕐᓯᐊᒃᓴᓂᒃ ᐱᕈᕐᑎᑦᓯᓇᓱᒃᑲᓗᐊᕈᕕᑦ, ᓄᓇᐅᑉ ᐱᕈᕐᑎᑦᓯᔪᓐᓇᕐᓂᓕᒫᖓ ᐃᓚᑰᖃᑦᑕᕐᓂᐊᓕᕐᐳᖅ; ᕿᒫᖏᓐᓇᐅᔭᕐᓗᑎᑦ ᐃᓂᓪᓚᔪᐃᑦᑑᓂᐊᓕᕐᐳᑎᑦ ᓄᓇᕐᔪᐊᒥ.”

¹³ ᑬᓂᓗ ᐊᑕᓂᕐᒧᑦ ᐅᖃᕐᐳᖅ, “ᓱᒋᐊᕐᑕᐅᓂᕋ ᑕᒪᓐᓇ ᐊᑐᕈᓐᓇᕐᑕᒪ ᐅᖓᑖᓃᑉᐳᖅ.

¹⁴ ᑕᑯᒋᑦ, ᐅᓪᓗᒥ ᓄᓇᒥᒃ ᕿᒤᑎᑉᐸᕐᒪ; ᑮᓇᕐᓂᓪᓗ ᐃᔨᕐᑕᐅᓯᒪᓂᐊᓕᕐᓗᖓ; ᕿᒫᖏᓐᓇᐅᔭᕐᓗᖓ ᐃᓂᓪᓚᔪᐃᑦᑑᓂᐊᓕᕐᐳᖓ ᓄᓇᕐᔪᐊᒥ, ᓇᓪᓕᐊᓐᓄᓪᓗ ᑕᑯᔭᐅᒍᒪ ᑐᖁᑕᐅᔪᒃᓴᐅᓕᕐᐳᖓ.”

¹⁵ ᐊᑕᓂᐅᓪᓕ ᑭᐅᕚ, “ᑍᒫᖑᓐᖏᓚᖅ! ᓇᓪᓕᐊᑦ ᑬᓂᒥᒃ ᑐᖁᑦᓯᔪᖅ, 7ᐃᕐᑐᓪᓗᐊᕐᑐᒥᒃ ᐊᑭᔭᐅᔭᕆᐊᖃᕐᐳᖅ.” ᐊᑕᓂᐅᓪᓗ ᑬᓂ ᓇᓗᓁᒃᑯᓯᕐᐹ, ᓇᓪᓕᐊᑦ ᑬᓂᒥᒃ ᑲᑎᓯᔪᖅ ᑐᖁᑦᓯᖁᓇᒍ ᑖᑦᓱᒥᖓ.

¹⁶ ᑬᓂᓗ ᐊᑕᓂᐅᑉ ᓇᔪᕐᓂᖓᓂᑦ ᕿᒪᕉᑎᕗᖅ, ᓄᓇᑖᕐᓗᓂᓗ ᐊᑎᖃᕐᑐᒥᒃ ᓈᑦ, ᐄᑕᓂᐅᑉ ᖃᐅᓕᕐᕕᐊᑕ ᓇᓛᓃᑦᑐᒥᒃ.

ᑬᓂᐅᑉ ᑭᖑᕚᖏᑦ

¹⁷ ᑬᓂᐅᑉ ᓄᓕᐊᓂ ᐱᖃᑎᒋᒐᒥᐅᒃ, ᕿᑐᕐᖓᒃᓴᖃᓕᕐᐳᖅ ᐃᕐᓂᓪᓗᓂᓗ ᐃᓅᑭᒥᒃ; ᐃᒡᓗᒐᓴᒡᔪᐊᓕᐅᕐᐳᕐᓗ ᐊᑎᖃᕐᑎᓪᓗᓂᒋᑦ ᐃᕐᓂᖓᑕ ᐊᑎᖓᓂᒃ, ᐃᓅᑭᒥᒃ.

¹⁸ ᐃᓅᑭᓗ ᐃᕐᓂᕐᑖᕐᐳᖅ ᐃᕌᑎᒥᒃ; ᐃᕌᑦ ᐊᑖᑕᒋᔭᐅᓚᐅᕐᐳᖅ ᒥᕼᐅᔧᓪᒧᑦ, ᒥᕼᐅᔧᓗ ᐊᑖᑕᒋᔭᐅᓚᐅᕐᐳᖅ ᒥᑐᓮᓪᒧᑦ, ᑖᓐᓇᓗ ᐊᑖᑕᒋᔭᐅᓚᐅᕐᐳᖅ ᓔᒥᑭᒧᑦ.

¹⁹ ᓔᒥᑭᓕ ᓄᓕᐊᖃᓚᐅᕐᐳᖅ ᒪᕐᕉᖕᓂᒃ; ᐂᑉᐸᖓ ᐊᑎᖃᕐᓗᓂ ᐋᑕᒥᒃ, ᐂᑉᐸᖓᓗ ᐊᑎᖃᕐᓗᓂ ᔨᓚᒥᒃ.

²⁰ ᐋᑕᓗ ᐃᕐᓂᕐᑖᕐᐳᖅ ᔭᐸᐅᓪᒥᒃ; ᑖᓐᓇᓗ ᓯᕗᓕᕆᔭᐅᕗᖅ ᑐᐱᕐᓂ ᐊᖏᕐᕋᖃᕐᑐᓄᑦ ᓂᕐᔪᑎᓂᒃ ᐱᕈᕐᓮᔪᓂᒃ.

²¹ ᑖᑦᓱᒪᓗ ᓄᑲᖓ ᐊᑎᖃᕐᐳᖅ ᔪᐸᐅᓪᒥᒃ; ᑖᓐᓇᓗ ᓯᕗᓕᕆᔭᐅᕗᖅ ᑕᒤᓐᓄᑦ ᓂᓪᓕᐊᔫᓕᒫᓂᒃ ᐊᑐᓲᓄᑦ ᑯᑭᑦᑕᐸᐅᑎᐅᔮᕐᑐᓄᓪᓗ ᕼᐊᕐᐱᓄᑦ ᐱᓐᖑᐊᕐᐸᒃᑐᓄᑦ ᓱᐴᒐᓄᓪᓗ.

²² ᔨᓚᓗ ᐃᕐᓂᕐᑖᕐᐳᖅ ᑐᐸᓪ-ᑬᓂᒥᒃ; ᑖᓐᓇᓗ ᓴᓇᕐᕈᑎᓕᐅᓚᐅᕐᐳᖅ ᖃᓄᐃᑦᑐᑐᐃᓐᓇᕐᓂᒃ ᑲᓐᓄᔭᓂᒃ ᓴᕕᕋᔭᖕᓂᒡᓗ. ᑐᐸᓪ-ᑬᓐᓗ ᓇᔭᖓ ᐊᑎᖃᕐᐳᖅ ᓈᒪᒥᒃ.

²³ ᓔᒥᑭᓗ ᓄᓕᐊᒥᓄᑦ ᒪᕐᕉᖕᓄᑦ ᐅᖃᕐᐳᖅ: “ᐋᑕ ᔨᓚᓗ, ᓈᓚᓚᐅᕐᓯᓐᖓ; ᐃᓕᑦᓯ ᓔᒥᑭᐅᑉ ᓄᓕᐊᖏᒃ, ᐅᖃᐅᓯᒃᑲ ᓈᓚᒃᓯᒋᑦ: ᐊᖑᒻᒥᒃ ᑐᖁᑦᓯᓚᐅᕋᒪ ᑍᑦᓱᒪ ᐃᑭᓕᓚᐅᕐᒪᖓ, ᑖᓐᓇ ᐃᓅᓱᒃᑐᖅ ᐅᕙᓐᓂᒃ ᐱᒋᐊᓚᐅᕐᒪᑦ.

²⁴ ᑬᓂᒥᒃ ᑐᖁᑦᓯᔪᕕᓂᖅ 7ᐃᕐᑐᓪᓗᐊᕐᑐᒥᒃ ᐊᑭᔭᐅᔭᕆᐊᖃᕐᐸᑦ, ᓔᒥᑭᒥᒡᓕ ᑐᖁᑦᓯᔪᖅ 77ᐃᕐᑐᓪᓗᐊᕐᑐᒥᒃ ᐊᑭᔭᐅᔭᕆᐊᖃᕐᐳᖅ.”

ᓰᑎᓗ ᐃᓅᓯᓗ

²⁵ ᐋᑕᒥᐅᑉ ᓄᓕᐊᓂ ᐱᖃᑎᒋᒃᑲᓐᓂᕐᒪᒍ, ᓄᓕᐊᖓ ᐃᕐᓂᕐᑖᓚᐅᕐᐳᖅ ᐋᑕᒥᐅᑉ ᐊᑎᖃᕐᑎᑉᐹ ᓰᑎᒥᒃ, ᐄᕕ ᐅᖃᓚᐅᕐᒪᑦ, “ᒎᑎᐅᑉ ᐃᕐᓂᕐᒥᒃ ᑐᓂᓯᕕᒋᕚᖓ ᐂᐱᓕ ᐃᓇᖏᕐᓗᒍ, ᑬᓂᐅᑉ ᑐᖁᓚᐅᕐᒪᒍ.”

²⁶ ᓰᑎᓗ ᐃᕐᓂᕐᑖᓚᐅᕆᕗᖅ, ᐊᑎᖃᕐᑎᓪᓗᒍᓗ ᐃᓅᓯᒥᒃ. ᑍᑦᓱᒪᓂᐅᑎᓪᓗᒍ ᐃᓄᐃᑦ ᐊᑕᓂᕐᒧᑦ ᑐᒃᓯᐊᖃᑦᑕᓕᓚᐅᕐᐳᑦ ᐊᑎᖓ ᑍᓪᓗᒍ.