ᒨᓯᓯ ᓯᕗᓪᓖᑦ 39 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᓯᐱᓗ ᐹᑎᐸᐅᓪᓗ ᓄᓕᐊᖓ

¹ ᔫᓯᐱᓕ ᐄᑦᔨᑉᑎᒧᐊᕈᑦᔭᐅᒐᒥ, ᐹᑎ-ᐸᕆᒧᑦ ᐂᑦᑑᑎᒋᔭᐅᕗᖅ, ᐰᕉᑉ ᐊᖓᔪᖅᑳᖁᑎᖓᓄᑦ, ᖃᐅᔨᓴᕐᑎᓄᑦ ᐄᑦᔨᑉᑎᒥᐅᑕᓄᑦ ᐊᖓᔪᖅᑳᖑᔪᒧᑦ, ᑖᓐᓇ ᐃᓯᒤᓕᒥᐅᓂᑦ ᓂᐅᕕᓚᐅᕐᑕᖓ ᑖᑦᓱᒥᖓ ᑎᑭᐅᑦᔨᓚᐅᕐᑐᓂᑦ.

² ᐊᑕᓂᐅᓪᓕ ᔫᓯᐱ ᐃᓚᒋᕚ, ᐱᓇᓱᐊᕐᑕᒥᓂᒡᓗ ᐱᕙᓪᓕᐊᑦᓯᐊᕐᑎᑉᐹ; ᐊᖓᔪᖅᑳᖓᑕᓗ ᐄᑦᔨᑉᑎᒥᐅᑕᐅᑉ ᐃᒡᓗᖓᓂᒥᐅᑕᐅᓕᕐᐳᖅ.

³ ᐊᖓᔪᖅᑳᖓᑕᓕ ᖃᐅᔨᕚ ᐊᑕᓂᐅᑉ ᐃᓚᒋᖕᒪᒍ, ᐊᑕᓂᐅᓪᓗ ᖃᓄᐃᓕᐅᕐᑕᓕᒫᖏᑦ ᐱᕙᓪᓕᐊᑦᓯᐊᕐᑎᖃᑦᑕᕐᒪᒋᑦ.

⁴ ᑕᕝᕙ ᔫᓯᐱ ᐊᖓᔪᖅᑳᖓᑕ ᖁᕕᐊᒋᑦᓯᐊᕐᐹ ᓇᖕᒥᓂᖅ ᐱᔨᑖᕆᓪᓗᒍ, ᐃᒡᓗᒥᓂᓗ ᑲᒪᔨᓐᖑᕐᑎᑉᐹ ᐊᖓᔪᖅᑳᓐᖑᕐᑎᓪᓗᒍᓗ ᑕᒤᓐᓄᑦ ᐱᖁᑎᓕᒫᒥᓄᑦ.

⁵ ᑍᒪᓐᖓᑦ ᑲᒪᔨᓐᖑᕐᑎᑕᐅᓂᖓᓂᑦ ᐃᒡᓗᒥᓄᑦ ᐱᖁᑎᓕᒫᖏᓐᓄᓪᓗ ᐊᑕᓂᐅᑉ ᐄᑦᔨᑉᑎᒥᐅᑕᐅᑉ ᐃᒡᓗᖓ ᓮᒻᒪᕐᑎᓚᐅᕐᐹ ᔫᓯᐱ ᐱᑦᔪᑎᒋᓪᓗᒍ; ᐊᑕᓂᐅᓪᓗ ᓮᒻᒪᕐᑎᓚᐅᕆᕔᑦ ᐱᖁᑎᓕᒫᖏᑦ, ᐃᒡᓗᖓᓂ ᐱᕈᕐᓰᕕᖁᑎᖓᓂᓗ.

⁶ ᑍᒤᒻᒪᑦ ᐱᖁᑎᓕᒫᓂ ᑕᒪᕐᒥᒃ ᔫᓯᐱᒧᑦ ᑲᒪᒋᔭᐅᑎᓕᕐᐰᑦ; ᓇᖕᒥᓂᕐᓕ ᑲᒪᖏᑦᓯᐊᓕᕐᐳᖅ ᓱᓇᓕᒫᓂᒃ ᓂᕆᓂᐊᕐᑕᒥᓂᒃ ᑭᓯᐊᓂ ᑲᒪᒋᔭᑐᐊᖃᓕᕐᓗᓂ. ᔫᓯᐱᓕ ᐊᖑᑎᑦᓯᐊᕙᐅᓚᐅᕐᐳᖅ ᑕᑯᒥᓇᕐᑑᓪᓗᓂᓗ.

⁷ ᐊᑯᓂᐅᕙᓪᓕᐊᓕᕐᑎᓪᓗᒍ ᐊᖓᔪᖅᑳᖓᑕ ᓄᓕᐊᖓᑕ ᔫᓯᐱ ᑕᑯᒥᓇᕆᓪᓗᒍ ᐊᖑᓐᓂᐊᕈᒪᓕᕐᐹ, ᐅᖃᐅᑎᓪᓗᒍᓗ, “ᐃᓐᓇᖓᖃᑎᒋᓚᐅᓐᖓ.”

⁸ ᔫᓯᐱᓕ ᕿᐱᓗᒃᐳᖅ ᐊᖓᔪᖅᑳᒥᓗ ᓄᓕᐊᖓ ᐅᖃᐅᑎᓪᓗᒍ, “ᑕᑯᒋᑦ, ᐊᖓᔪᖅᑳᒪ ᐃᒡᓗᒥᓂ ᐃᓱᒪᕐᓱᕐᑎᑦᓯᐊᕐᐹᖓ ᐃᓱᒫᓗᖏᑦᓯᐊᕐᓗᓂᓗ, ᐱᖁᑎᓕᒫᒥᓄᓪᓗ ᑲᒪᔨᓐᖑᕐᑎᓯᒪᓪᓗᖓ;

⁹ ᐃᒡᓗᖓᓂᓗ ᐅᕙᓐᓂᑦ ᐊᖓᔪᖅᑳᖑᓂᕐᓴᕐᑕᖃᓐᖏᓚᖅ, ᓱᓇᓕᒫᒥᓂᒡᓗ ᐃᓪᓕᕈᑎᖏᑦᓯᐊᕐᓗᓂᖓ ᐃᕝᕕᑐᐊᖅ ᐂᑦᑑᑎᒋᓯᒪᓐᖏᓛᑎᑦ, ᑖᑦᓱᒪ ᓄᓕᐊᕆᖕᒪᑎᑦ; ᖃᓄᕐᓕ ᑍᒫᒃ ᐱᐅᖏᑦᑐᐊᓗᖕᒥᒃ ᐱᓇᓱᐊᕐᕈᓐᓇᕐᐳᖓ, ᐊᔪᕐᑐᓕᓗᖓᓗ ᒎᑎᒧᑦ?”

¹⁰ ᐊᕐᓇᕐᓕ ᖃᐅᑕᒫᑦ ᔫᓯᐱᒧᑦ ᑍᒤᓕᐅᖃᑦᑕᕋᓗᐊᕐᑎᓪᓗᒍ, ᓈᓚᓚᐅᓐᖏᓛ, ᐃᓐᓇᖓᖃᑎᖃᕈᒪᓇᓂ ᐱᖃᑎᖃᕈᒪᓇᓂᓗ ᑖᑦᓱᒥᖓ.

¹¹ ᐅᓪᓗᐃᓪᓕ ᐃᓚᖓᓐᓂ ᔫᓯᐱ ᐃᒡᓗᒧᐊᕋᒥ ᐱᓕᕆᔭᕐᑐᕐᓗᓂ ᐱᓇᓱᐊᑦᑎᐅᖃᑦᑕᕐᑐᓂᒃ ᑕᕝᕙᓃᑦᑐᖃᓚᐅᓐᖏᓚᖅ,

¹² ᑕᕝᕙ ᐊᕐᓇᐅᑉ ᐊᓐᓄᕌᖓᒍᑦ ᑎᒍᕚ, ᐅᖃᕐᓗᓂᓗ, “ᐃᓐᓇᖓᖃᑎᒌᓚᐅᓐᖓ.” ᐊᓐᓄᕌᓂᓕ ᐊᕐᓇᐅᑉ ᑎᒍᒥᐊᕐᑕᖓ ᐲᕐᓱᒍ, ᕿᒪᒃᓯᕗᖅ ᐃᒡᓗᒥᓪᓗ ᐊᓂᓪᓗᓂ.

¹³ ᑕᕝᕙ ᐊᕐᓇᖅ ᖃᐅᔨᓕᕋᒥ ᐊᓐᓄᕌᓂ ᕿᒪᖕᒪᒍ, ᑎᒍᒥᐊᕐᑎᓪᓗᓂᐅᒃ, ᕿᒫᓪᓗᓂᓗ ᐃᒡᓗᒥᑦ,

¹⁴ ᐊᖑᑎᓂᒃ ᐃᒡᓗᒥᓃᑦᑐᓂᒃ ᕾᖁᔨᕗᖅ ᐅᖃᐅᑎᓪᓗᒋᓪᓗ, “ᑕᑯᓕᕆᑦᓯ, ᐂᑉᐸᕐᒪ ᐅᕗᓐᖓᕐᑎᓯᒪᔭᖓᑕ ᐄᑉᕉᖑᔫᑉ ᒥᑕᐅᑎᒋᓕᕐᐹᑎᒍᑦ; ᐅᕙᓐᓄᑦ ᐃᑎᕐᓗᓂ ᐃᓐᓇᖓᖃᑎᖃᕋᓱᖅᑲᐅᕗᖅ, ᓂᐱᖅᑯᕐᑐᓪᓗᖓᓕ ᓂᓪᓕᐊᓕᕋᒪ;

¹⁵ ᑐᓴᓕᕋᒥ ᓂᐱᖅᑯᕐᑐᓪᓗᖓ ᕾᖁᔨᓕᕋᒪ, ᐊᓐᓄᕌᓂ ᕿᒪᒃᓗᓂᐅᒃ ᕿᒪᒃᓯᕗᖅ ᐊᓂᓪᓗᓂᓗ ᐃᒡᓗᒥᑦ.”

¹⁶ ᐊᓐᓄᕌᖓᓕ ᓴᓂᒥᓄᑦ ᐃᓕᕚ ᐊᖓᔪᖅᑳᖓ ᐊᖏᕐᕋᓚᐅᖏᓐᓂᖓᓂ,

¹⁷ ᕾᖕᒪᑦ, ᐅᖃᐅᑎᕚ ᑍᒫᑦᓮᓐᓇᖅ, ᐅᓂᒃᑳᕐᓱᓂ, “ᐄᑉᕉᖑᔫᑉ ᐱᔨᕕᑦ, ᐅᕙᑦᑎᓐᓅᕐᓯᒪᔭᕕᑦ, ᐅᐹᒃᓗᓂᖓ ᒥᑕᐅᑎᒋᓯᒪᕚᖓ;

¹⁸ ᓂᐱᖅᑯᕐᑐᓪᓗᖓᓕ ᕾᖁᔨᓕᕋᒪ, ᐊᓐᓄᕌᓂ ᐅᕙᓐᓄᑦ ᕿᒪᒃᓗᓂᐅᒃ, ᕿᒪᒃᓯᖅᑲᐅᕗᖅ ᐊᓂᓪᓗᓂᓗ ᐃᒡᓗᒥᑦ.”

¹⁹ ᐊᖓᔪᖅᑳᖓᑕᓕ ᓄᓕᐊᒥ ᐅᖃᐅᓯᕆᔭᖏᑦ ᑐᓴᕋᒥᒋᑦ ᐅᖃᕐᒪᑦ, “ᑕᕝᕙ ᐱᔨᕕᑦ ᑍᒤᓕᐅᕐᕕᒋᕚᖓ,” ᓂᓐᖓᒃᑐᐊᓘᕗᖅ.

²⁰ ᐊᖓᔪᖅᑳᖓᑕᓗ ᔫᓯᐱ ᑎᒍᓪᓗᓂᐅᒃ ᑎᒍᔭᐅᓯᒪᕕᖕᒧᐊᕐᑎᑉᐹ, ᐊᖓᔪᖅᑳᕐᔪᐊᑉ ᑎᒍᔭᐅᓯᒪᔪᖁᑎᖏᑕ ᐃᓂᖓᓐᓄᑦ, ᑕᕝᕙᓃᓕᕐᓗᓂᓗ.

²¹ ᐊᑕᓂᐅᓪᓕ ᔫᓯᐱ ᐃᓚᒋᓚᐅᕐᐹ, ᓇᒡᓕᖕᓂᕐᒥᓂᒡᓗ ᓱᖁᓯᔪᐃᑦᑐᒥᒃ ᖃᐅᔨᒪᑎᓪᓗᒍ, ᖁᕕᐊᒋᔭᐅᓕᕐᑎᓪᓗᒍᓗ ᑎᒍᔭᐅᓯᒪᕕᐅᑉ ᐊᖓᔪᖅᑳᖓᓄᑦ.

²² ᑎᒍᔭᐅᓯᒪᕕᐅᓪᓗ ᐊᖓᔪᖅᑳᖓᑕ ᑎᒍᔭᐅᓯᒪᔪᓕᒫᑦ ᔫᓯᐱᒧᑦ ᑲᒪᒋᔭᐅᑎᓕᕐᐰᑦ; ᖃᓄᑐᐃᓐᓇᕐᓗ ᐱᔭᕆᐊᖃᕐᑐᖃᕌᖓᑦ, ᑖᑦᓱᒧᖓ ᐱᓇᓱᐊᕐᑕᐅᑎᖃᑦᑕᕐᐰᑦ;

²³ ᑎᒍᔭᐅᓯᒪᕕᐅᑉ ᐊᖓᔪᖅᑳᖓ ᔫᓯᐱᐅᑉ ᐱᓇᓱᐊᕐᑕᓕᒫᖏᓐᓂᒃ ᐃᒃᐱᒍᓱᒋᐊᖃᖃᑦᑕᓚᐅᓐᖏᓚᑦ, ᐊᑕᓂᐅᑉ ᐃᓚᒋᓚᐅᕐᒪᒍ; ᖃᓄᑐᐃᓐᓇᕐᓗ ᐱᓇᓱᐊᑐᐊᕌᖓᑦ, ᐊᑕᓂᐅᑉ ᐱᕙᓪᓕᐊᑦᓯᐊᕐᑎᖃᑦᑕᓚᐅᕐᐹ.