ᒨᓯᓯ ᓯᕗᓪᓖᑦ 38 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᑕᓗ ᑕᒫᕆᓗ

¹ ᑍᑦᓱᒪᓂᐅᑎᓪᓗᒍᓕ ᔫᑕ ᖃᑕᓐᖑᑎᒥᓂᒃ ᕿᒤᕗᖅ, ᐊᑑᓚᒤᑎᓯᐅᒧᓪᓗ ᐳᓛᕆᐊᕐᓗᓂ, ᕼᐂᕋᒥᒃ ᐊᑎᖃᕐᑐᒧᑦ.

² ᑕᕝᕙᓂᓗ ᔫᑕ ᑲᑎᓯᕗᖅ ᑬᓇᓂᒥᐅᑕᐅᑉ ᓱᐊᑉ ᐸᓂᖓᓂᒃ; ᓄᓕᐊᕐᑖᕆᒐᒥᐅᒡᓗ ᐃᓐᓇᖓᖃᑎᒋᕚ,

³ ᑖᓐᓇᓗ ᓄᑕᕋᒃᓴᕐᑖᕐᐳᖅ, ᐃᕐᓂᕐᑖᕐᓗᓂᓗ, ᐊᑦᓯᕐᐹᓗ ᐃᕆᒥᒃ.

⁴ ᐊᒻᒪ ᑭᖑᓂᖓᒍᑦ ᓄᑕᕋᒃᓴᕐᑖᕐᒥᒐᒥ ᐃᕐᓂᕐᑖᕆᕗᖅ, ᑖᓐᓇᓗ ᐊᑦᓯᕐᐹᓗ ᐅᓇᓐᒥᒃ.

⁵ ᐊᒻᒪ ᐃᕐᓂᕐᑖᒃᑲᓐᓂᕆᕗᖅ, ᑖᓐᓇᓗ ᐊᑦᓯᕐᐹᑦ ᓰᓚᒥᒃ. ᑍᑦᓱᒪᓂᐅᑎᓪᓗᒍ ᓄᓇᒥ ᓯᔨᐱᒦᓚᐅᕋᒥ ᐃᕐᓂᐊᕆᓪᓗᓂᐅᒃ.

⁶ ᔫᑕᐅᓪᓗ ᐃᕐᓂᓂ ᐃᕆ ᐊᖓᔪᒃᓯᕐᐹᖁᑎᓂ ᓄᓕᐊᕐᑖᕐᑎᑉᐹ, ᑕᒫᕆᒥᒃ ᐊᑎᓕᖕᒥᒃ.

⁷ ᐃᕆᓕ, ᔫᑕᐅᑉ ᐊᖓᔪᒃᓯᕐᐹᖁᑎᖓ, ᐊᑕᓂᐅᑉ ᓵᖓᓂ ᐱᐅᖏᑦᑑᓚᐅᕐᐳᖅ; ᐊᑕᓂᐅᓪᓗ ᑐᖁᑎᓚᐅᕐᐹ.

⁸ ᑕᕝᕙ ᔫᑕ ᐅᓇᓐᒧᑦ ᐅᖃᕐᐳᖅ, “ᐊᖓᔪᕕᑦ ᓄᓕᐊᖓᓄᐊᓕᕆᑦ, ᓄᓕᐊᕐᑖᕆᓗᒍ ᖃᑕᓐᖑᑍᕐᑑᓪᓗ ᐱᔭᒃᓴᕆᔭᖓᓂᒃ ᐊᑐᕐᕕᒋᓕᕈᒃ, ᐊᖓᔪᕕᑦ ᑭᖑᕚᖏᓐᓂᒃ ᐱᕈᕐᓮᖁᓪᓗᑎᑦ.”

⁹ ᐅᓇᓐᓕ ᖃᐅᔨᒪᒐᒥ ᑭᖑᕚᒃᓴᓕᐅᕈᓂ ᓇᖕᒥᓂᕆᓂᐊᖏᓐᓇᒥᒋᑦ; ᐊᖓᔪᐊᑕ ᓄᓕᐊᖓᓄᐊᕐᐳᖅ, ᐃᓐᓇᖓᖃᑎᒋᓕᕌᖓᒥᐅᒡᓕ ᑕᒪᐅᖓᑐᐃᓐᓇᖅ ᖃᐰᖃᑦᑕᕐᐳᖅ, ᐊᖓᔪᒥᓂᒃ ᑭᖑᕚᒃᓴᓕᐅᕈᒪᓇᓂ.

¹⁰ ᐱᓂᐊᕐᓂᕆᔭᖓᓕ ᐊᑕᓂᐅᑉ ᓵᒥᓂ ᖁᕕᐊᒋᓚᐅᓐᖏᓚᖅ, ᑍᒤᒻᒪᑦ ᑐᖁᒃᑭᕚ.

¹¹ ᑕᕝᕙ ᔫᑕ ᐅᑯᐊᒥᓄᑦ ᑕᒫᕆᒧᑦ ᐅᖃᕐᐳᖅ, “ᐅᐃᒡᒐᕐᓂᐅᑐᐃᓐᓇᓕᕆ ᐊᑖᑕᕕᑦ ᐃᒡᓗᖓᓃᓪᓗᑎᑦ, ᐃᕐᓂᕋ ᓰᓚ ᐱᕈᕋᓱᐊᕐᓂᖓᓂ.” ᓯᕘᕋᓕᕋᒥ ᑐᖁᓂᐊᕋᓱᒋᒋᓪᓗᒍ ᐊᖓᔪᖏᑎᑐᑦ. ᑍᒤᒻᒪᑦ ᑕᒫᕆ ᐊᑖᑕᒥ ᐊᖏᕐᕋᖓᓄᑦ ᓄᒃᑎᓚᐅᕐᐳᖅ ᑕᕝᕙᓃᓕᕐᓗᓂᓗ.

¹² ᑕᒪᑐᒪᓕ ᑭᖑᕐᖓᒍᑦ ᔫᑕᐅᑉ ᓄᓕᐊᖓ, ᓱᐊᑉ ᐸᓂᖓ ᑐᖁᕗᖅ; ᔫᑕᐅᓪᓗ ᕿᒃᓵᖕᓂᖏᑕ ᐅᓪᓗᖏᑦ ᓈᖕᒪᑕ ᑭᖑᓂᖓᒍᑦ, ᑎᒻᓇᒧᐊᕈᒪᓕᕐᐳᖅ ᐃᓚᓐᓇᕆᔭᓂ ᕼᐂᕋ ᐊᑑᓚᒤᑎᒥᐅᑕᖅ ᐃᓚᒋᓪᓗᒍ, ᓰᐱᖁᑎᒥᓂᒃ ᓴᓕᓯᔨᖁᑎᒥᓄᑦ.

¹³ ᑕᒫᕆᓕ ᐅᖃᐅᑦᔭᐅᕗᖅ, “ᓴᑮᑦ ᑎᒻᓇᒧᐊᕈᒪᓕᕐᐳᖅ ᓰᐱᖁᑎᒥᓂᒃ ᓴᓕᓯᔭᕐᑐᕐᓗᓂ,”

¹⁴ ᑕᕝᕙ ᐊᓐᓄᕌᒥᓂᒃ ᐅᐃᒡᒐᕐᓂᓯᐅᑏᑦ ᐲᕐᓱᒋᑦ, ᑮᓇᓂᓗ ᒪᑐᐊᕐᓗᓂᐅᒃ ᐅᓕᒃᓱᓂᓗ, ᐃᓁᒻ ᐃᑎᕐᑕᕐᕕᖓᓂ ᐃᒃᓯᕚᓕᕐᐳᖅ, ᑎᒻᓇᒧᐊᕆᐊᑉ ᐊᖅᑯᑎᖓᓃᒻᒪᑦ; ᖃᐅᔨᒪᒐᒥ ᓰᓚ ᐱᕈᕇᕐᓯᒪᓕᕋᓗᐊᕐᒪᑦ, ᑖᑦᓱᒧᖓᓕ ᓱᓕ ᑐᓂᔭᐅᓚᐅᖏᓐᓇᒥ ᓄᓕᐊᕐᑖᕆᖁᔭᐅᓗᓂ.

¹⁵ ᔫᑕᐅᓪᓕ ᑕᑯᒐᒥᐅᒃ, ᐊᖑᓐᓂᐊᕐᑎᐅᓇᓱᒋᕚ, ᑮᓇᒥᓂᒃ ᒪᑐᐊᕐᓯᓯᒪᖕᒪᑦ.

¹⁶ ᑕᕝᕙ ᐅᐸᒃᐹ ᐊᖅᑯᑎᐅᑉ ᓴᓂᐊᓄᑦ, ᐅᖃᐅᑎᓪᓗᒍᓗ, “ᐃᓐᓇᖓᖃᑎᒋᓚᐅᕐᓚᒋᑦ,” ᐅᑯᐊᕆᖕᒪᖔᕐᒥᐅᒃ ᖃᐅᔨᒪᖏᓐᓇᒥ. ᑖᑦᓱᒪ ᐅᖃᐅᑎᕚ, “ᓱᓇᒥᒃ ᑐᓂᓯᓂᐊᕋᕕᑦ, ᐃᓐᓇᖓᖃᑎᒋᒍᕕᖓ?”

¹⁷ ᑖᑦᓱᒪ ᑭᐅᕚ, “ᒎᑦᓯᖁᑎᒪ ᓄᕐᕋᖓᓂᒃ ᑐᓂᓯᕕᐅᑎᓐᓂᐊᕐᐸᒋᑦ.” ᑖᓐᓇ ᑭᐅᕗᖅ, “ᑐᓂᓯᓚᐅᖏᓐᓂᕐᓂ ᓇᓗᓁᒃᑯᑕᒃᓴᒥᒃ ᑐᓂᓯᕕᒋᔪᓐᓇᕐᐱᖔ?”

¹⁸ ᑖᑦᓱᒪ ᐊᐱᕆᕚ, “ᖃᓄᐃᑦᑐᒥᒃ ᓇᓗᓁᒃᑯᑕᒥᒃ ᑐᓂᓯᕕᒋᒐᔭᕋᒃᑭᑦ?” ᑖᓐᓇ ᑭᐅᕗᖅ, “ᓇᓗᓁᒃᑯᑕᕕᑦ ᓇᕿᑦᓯᑦᔪᑎᖓᓂᒃ ᐃᐱᐅᑕᖓᓂᒡᓗ, ᐊᔭᐅᑉᐱᐊᕐᓂᒡᓗ ᑎᒍᒥᐊᕐᑕᕐᓂᒃ.” ᑕᕝᕙ ᑖᒃᑯᐊ ᑐᓂᕔᑦ ᑖᑦᓱᒧᖓ, ᐃᓐᓇᖓᖃᑎᒋᓪᓗᒍᓗ, ᐊᕐᓇᕐᓗ ᓄᑕᕋᒃᓴᕐᑖᕐᐳᖅ ᑖᑦᓱᒪᓐᖓᑦ.

¹⁹ ᐊᕐᓇᕐᓕ ᑕᕝᕙᓐᖓᑦ ᒪᑭᓐᓇᒥ ᐊᓯᐊᓄᐊᕐᐳᖅ, ᒪᑐᐊᓂᓗ ᐲᕐᓗᓂᐅᒃ ᐊᓐᓄᕌᒥᓂᒃ ᐅᐃᒡᒐᕐᓂᓯᐅᑎᓂᒃ ᐊᑎᒋᕗᖅ.

²⁰ ᔫᑕᐅᓪᓕ ᒎᑦᓯᐅᑉ ᓄᕐᕋᖓ ᐃᓚᓐᓇᕆᔭᒥᓄᑦ ᐊᑑᓚᒤᑎᒥᐅᑕᕐᒧᑦ ᓇᒃᓴᕐᑕᐅᑎᑉᐹ, ᐊᕐᓇᒧᑦ ᐊᑭᓕᐅᑎᒃᓴᖓ ᓇᓗᓁᒃᑯᓯᐅᑎᓚᐅᕐᑕᓂ ᐊᕐᓇᒥᑦ ᐱᔪᒪᓪᓗᓂᒋᑦ, ᑖᑦᓱᒪᓕ ᑎᓕᔭᖓᑕ ᐊᕐᓇᖅ ᓇᓂᔪᓐᓇᓐᖏᓛ.

²¹ ᑕᕝᕙ ᐊᖑᑎᓂᒃ ᑕᕝᕙᓃᑦᑐᓂᒃ ᐊᐱᕐᓱᓕᕐᐳᖅ, “ᓇᐅᒡᓕ ᐊᖑᓐᓂᐊᕐᑎ ᐃᓁᒥᐅᑉ ᐊᖅᑯᑎᖓᑕ ᓴᓂᐊᓂ ᐃᒃᓯᕙᓚᐅᕐᑐᖅ?” ᑖᒃᑯᐊ ᑭᐅᕚᑦ, “ᐊᖑᓐᓂᐊᕐᑎᒥᒃ ᑕᒫᓃᑦᑐᖃᓚᐅᓐᖏᓚᖅ.”

²² ᑕᕝᕙ ᔫᑕᒧᑦ ᐅᑎᕐᐳᖅ, ᐅᖃᕐᓗᓂᓗ, “ᐊᕐᓇᖅ ᓇᓂᓐᖏᓚᕋ; ᐊᖑᑎᓪᓗ ᑕᕝᕙᓃᑦᑐᑦ ᐅᖃᕐᓗᑎᒃ, ‘ᐊᖑᓐᓂᐊᕐᑎᒥᒃ ᑕᒫᓃᑦᑐᖃᓚᐅᓐᖏᓚᖅ.’”

²³ ᑕᕝᕙ ᔫᑕ ᑭᐅᕗᖅ, “ᑍᒃᑯᐊ ᑐᓂᓚᐅᕐᑕᒃᑲ ᓇᖕᒥᓂᕐᑖᕆᓕᕐᓕᒋᑦ, ᐃᓄᖕᓂᑦ ᒥᑕᐅᑎᒋᔭᐅᖁᓇᓄᒃ; ᒎᑦᓯᐅᑉ ᓄᕐᕋᖓ ᓇᒃᓯᐅᑎᒋᐊᕋᓗᐊᕋᒃᑯ, ᐊᕐᓇᖅ ᓇᓂᔪᓐᓇᓚᐅᓐᖏᓚᑦ.”

²⁴ ᑕᖅᑮᓪᓕ ᐱᖓᓱᐸᓗᐃᑦ ᓈᓯᒪᓕᕐᑎᓪᓗᒋᑦ ᔫᑕ ᐅᖃᐅᑦᔭᐅᕗᖅ, “ᑕᒫᕆ ᐅᑯᐊᑦ ᐊᖑᓐᓂᐊᕐᑎᐅᓐᖑᐊᕐᑐᕕᓂᐅᕗᖅ; ᓄᑕᕋᒃᓴᕐᑖᕐᑐᕕᓂᐅᓪᓗᓂᓗ ᐊᖑᓐᓂᐊᕐᓂᒃᑯᑦ.” ᑕᕝᕙ ᔫᑕ ᐅᖃᕐᐳᖅ, “ᕾᑎᑕᐅᓗᓂ, ᐃᑯᐊᓪᓚᒃᑎᑕᐅᓕ.”

²⁵ ᑖᓐᓇᓕ ᑕᕝᕗᖓ ᕾᑎᑕᐅᓕᕐᑎᓪᓗᒍ, ᓴᑭᒥᓂᒃ ᐅᖃᐅᑦᔭᐅᖁᔨᕗᖅ, “ᐊᖑᒻᒧᑦ ᐅᑯᓂᖓ ᐱᖁᑎᓕᖕᒧᑦ, ᓄᑕᕋᒃᓴᖃᕐᑎᑕᐅᕗᖓ.” ᐅᖃᕐᓗᓂᓗ, “ᓇᓗᓁᕐᓯᓕᕆᑦ, ᕿᓄᕕᒋᕙᒋᑦ ᐅᑯᐊ ᑭᐊ ᐱᖏᑦ, ᓇᓗᓁᒃᑯᑕᖅ ᓇᕿᑦᑎᑦᔪᑎ, ᐃᐱᐅᑕᖓᓗ ᐊᔭᐅᑉᐱᐊᕐᓗ.”

²⁶ ᔫᑕᐅᓪᓕ ᑖᒃᑯᐊ ᐱᒋᓂᕋᕐᓱᒋᑦ ᐅᖃᕐᐳᖅ, “ᑖᓐᓇ ᐅᕙᓐᓂᑦ ᓱᓕᓂᕐᓴᐅᕗᖅ, ᐃᕐᓂᓐᓄᑦ ᓰᓚᒧᑦ ᑐᓂᓚᐅᖏᓐᓇᒃᑯ ᓄᓕᐊᕐᑖᕆᔭᐅᖁᓪᓗᒍ.” ᔫᑕᐅᓪᓕ ᑕᒪᑐᒪ ᑭᖑᓂᖓᒍᑦ ᐃᓐᓇᖓᖃᑎᒋᒃᑲᓐᓂᓚᐅᕈᓐᓂᕐᐹ.

²⁷ ᐃᕐᓂᕕᒃᓴᖓᓕ ᓇᓪᓕᐅᑎᖕᒪᑦ, ᖃᐅᔨᔭᐅᓕᕐᐳᖅ ᒪᕐᕈᓕᐊᖕᓂᒃ ᓈᖓᓃᑦᑐᖃᕐᒪᑦ.

²⁸ ᐃᕐᓂᓱᓕᕐᒪᓪᓗ, ᓄᑕᕋᐅᑉ ᑕᓕᖓ ᓄᐃᕗᖅ; ᐃᕐᓂᓱᒃᓰᔫᓪᓗ ᐊᐅᐸᓪᓚᓇᕆᒃᑐᒥᒃ ᐃᕙᓗᒃᓴᔭᒥᒃ ᕿᓚᒃᓯᕕᒋᕚ ᐊᒡᒐᐅᑎᖓᒍᑦ ᐅᖃᕐᓗᓂᓗ, “ᐅᓇ ᓯᕗᓪᓕᐅᕗᖅ.”

²⁹ ᕿᓚᒃᓯᕕᒋᔭᖓᑕᓕ ᑕᓕᓂ ᐅᑎᕐᑎᒻᒪᒍ, ᐂᑉᐸᖓ ᓯᕗᓪᓕᐅᖔᓕᕐᓗᓂ ᐊᓂᕗᖅ; ᐃᕐᓂᓱᒃᓰᔪᖅ ᐅᖃᓕᕐᐳᖅ, “ᑍᒫᒃ ᑕᕝᕙ ᐊᓂᖅᑳᕈᒪᕗᑎᑦ!” ᑖᓐᓇ ᐊᑦᓯᕐᐹᑦ ᐱᕆᔾᒥᒃ.

³⁰ ᑭᖑᓂᖓᒍᑦ ᓄᑲᖓ ᐊᓂᓕᕆᕗᖅ ᐊᒡᒐᐅᑎᖓᒍᑦ ᐊᐅᐸᓪᓚᕆᒃᑐᒥᒃ ᐃᕙᓗᒃᓴᒥᒃ ᕿᓚᒃᓯᕕᒋᓯᒪᓪᓗᓂ; ᑖᓐᓇᓕ ᐊᑦᓯᕐᐹᑦ ᔨᕋᒥᒃ.