ᒨᓯᓯ ᓯᕗᓪᓖᑦ 37 - ᐊᒡᓔᑦ ᐃᑦᔪᕐᖕᓁᑦᑐᑦ

ᔫᓯᐱ ᐊᖓᔪᖏᓪᓗ

¹ ᔧᑯᓕ ᓱᓕ ᓄᓇᖃᓚᐅᕐᐳᖅ ᑬᓇᓂᒥ, ᑕᒫᓂ ᐊᑖᑕᖓᑕ ᓄᓇᒋᓚᐅᕐᑕᖓᓂ,

² ᑕᒪᑦᔭᓗ ᔧᑰᑉ ᐃᓚᒋᔭᖏᑕ ᐅᓂᒃᑳᕐᑕᐅᓂᖏᑦ ᑕᒫᓂ ᐅᖃᐅᓯᐅᓯᒪᕗᑦ. ᔫᓯᐱ ᐃᓅᓱᒃᑐᖅ ᐊᕐᕌᒍᖃᕐᓗᓂ 17ᓂᒃ, ᐆᒪᔪᓂᒃ ᒥᐊᓂᕐᓯᖃᑕᐅᓚᐅᕐᐳᖅ ᐊᖓᔪᓂ ᐃᓚᒋᓪᓗᒋᑦ, ᑖᒃᑯᐊ ᐱᓪᕼᐊᑉ ᔨᐅᓪᐸᐅᓪᓗ ᐃᕐᓂᖏᑦ, ᔧᑰᑉ ᓄᓕᐊᒃᑲᓐᓂᖏᑕ; ᐊᑖᑕᒥᓄᓪᓗ ᐅᓐᓂᕐᓗᒃᓴᓚᐅᕐᐳᖅ ᐊᖓᔪᖏᑕ ᐱᑦᓯᐊᖏᓐᓂᖏᓐᓂᒃ.

³ ᐃᓴᕆᐊᓕᐅᑉ ᔫᓯᐱ ᓇᒡᓕᒋᓂᕐᓴᕆᓚᐅᕐᒪᒍ ᕿᑐᕐᖓᒥᓂᑦ ᑕᒤᓐᓂᑦ, ᐃᓄᑐᖃᐅᓕᕐᓗᓂ ᐃᕐᓂᕐᑖᕆᓯᒪᒐᒥᐅᒃ; ᐊᓐᓄᕌᒃᓴᖓᓂᒡᓗ ᓴᓇᓚᐅᕐᐳᖅ ᑕᑭᔪᒥᒃ ᐂᖅᑯᕐᑐᔪᒥᒃ.

⁴ ᐊᖓᔪᖏᓪᓕ ᖃᐅᔨᓕᕋᒥᒃ ᐊᑖᑕᖓᑕ ᓇᒡᓕᒋᓂᕐᓴᕆᖕᒪᒍ ᐃᕐᓂᓕᒫᒥᓂᑦ ᑕᒤᓐᓂᑦ, ᑕᕝᕙ ᐆᒥᒋᓕᕐᐹᑦ ᐊᒡᓛᑦ ᑐᓐᖓᓇᕐᑐᓂᒃ ᐅᖃᐅᑎᔪᓐᓁᓪᓕᓪᓗᒍ.

⁵ ᔫᓯᐱᓕ ᓯᓐᓇᒃᑐᓚᐅᕐᐳᖅ, ᐊᖓᔪᓂᓕ ᑕᒪᑐᒥᖓ ᐅᓂᒃᑳᕐᕕᒋᖕᒪᒋᑦ, ᑖᒃᑯᓄᖓ ᐆᒥᒋᔭᐅᒋᐊᓪᓚᑐᐃᓐᓇᕐᐳᖅ.

⁶ ᐅᓂᒃᑳᕐᕕᒋᓕᕐᐰᑦ ᐅᖃᕐᓗᓂ, “ᓯᓐᓇᒃᑐᕆᓚᐅᕐᑕᓐᓂᒃ ᑐᓵᓚᐅᕆᑦᓯ;

⁷ ᑕᑯᒋᑦ, ᓂᐊᖂᔭᒃᓴᓂᒃ ᑲᑎᕐᓱᕐᓯᒪᔪᓂᒃ ᕿᓚᒃᓱᐃᑎᓪᓗᑕ ᐱᕈᕐᓰᕕᖕᒥ, ᑲᑎᓯᒪᔭᒃᑲᓕ ᕿᐱᑍᑦ ᓇᑉᐸᕋᒥᒃ ᓇᐸᑦᓯᐊᓕᕐᐳᑦ; ᐃᓕᑦᓯᓗ ᑲᑎᓯᒪᔭᓯ ᑲᑎᓯᒪᔭᒪ ᐊᕙᑖᓄᐊᕐᓗᑎᒃ ᑕᕝᕗᖓ ᐅᑯᕗᑦ.”

⁸ ᐊᖓᔪᖏᑕᓗ ᐊᐱᕆᕚᑦ, “ᐅᕙᑦᑎᓐᓄᑦ ᐊᖓᔪᖅᑳᓐᖑᓛᕐᑐᕆᕖᑦ? ᐊᐅᓚᑦᓯᓕᕐᓗᑎᓪᓗ ᐅᕙᑦᑎᓐᓂᒃ?” ᑕᕝᕙ ᐆᒥᒋᒋᐊᓪᓚᓕᕐᐹᑦ ᓯᓐᓇᒃᑐᕐᓂᖓᓄᑦ ᐅᖃᐅᓯᖏᓐᓄᓪᓗ.

⁹ ᑕᕝᕙ ᔫᓯᐱ ᓱᓕ ᓯᓐᓇᒃᑑᒪᒃᑲᓐᓂᓚᐅᕐᐳᖅ, ᐊᖓᔪᒥᓄᓪᓗ ᐅᖃᐅᓯᕆᓪᓗᓂᐅᒃ, ᐅᖃᕐᓗᓂ, “ᑕᑯᒋᑦ ᓯᓐᓇᒃᑑᒪᒃᑲᓐᓂᓚᐅᕐᐳᖓ; ᑕᑯᒋᑦ, ᓯᕿᓂᖅ, ᑕᖅᑭᕐᓗ, ᐅᓪᓗᕆᐊᓪᓗ 11ᐃᑦ ᐅᕙᓐᓄᑦ ᐹᒻᒪᒃᑎᓚᐅᕐᐳᑦ.”

¹⁰ ᑕᒪᑐᒥᖓᓕ ᐊᑖᑕᓂ ᐊᖓᔪᓂᓗ ᐅᓂᒃᑲᐅᑎᖕᒪᒋᑦ, ᐊᑖᑕᖓᑕ ᓱᐊᒡᓗᒍ, ᐅᖃᐅᑎᕚ, “ᓯᓐᓇᒃᑐᐃᓄᓇ ᖃᓄᖅ ᑐᑭᓕᒃ? ᐊᓈᓁᓪᓗ ᐊᖓᔪᑎᓪᓗ ᑍᒤᓪᓚᕆᒋᐊᖃᕐᐱᑖ ᓄᓇᒧᑦ ᐹᒻᒪᒃᑎᕐᑐᒃᓴᐅᕕᑖ ᓵᖕᓂ?”

¹¹ ᐊᖓᔪᖏᑕᓗ ᓯᒡᒐᑎᓕᕐᐹᑦ, ᐊᑖᑕᖓᑕᓕ ᑕᒪᓐᓇ ᐃᓱᒪᒥᐅᑕᕆᓕᕐᐹ.

ᔫᓯᐱᐅᑉ ᓂᐅᕐᕈᑕᐅᓂᖓ ᐄᑦᔨᑉᑎᒧᓪᓗ ᐊᐅᓪᓚᕈᑦᔭᐅᓂᖓ

¹² ᐊᖓᔪᖏᓪᓕ ᐊᑖᑕᖓᑕ ᓰᐱᖁᑎᖏᓐᓂᒃ ᓂᕆᑎᑦᓯᔭᕐᑐᓚᐅᕐᐳᑦ ᓯᑭᒻᒥᐅᑉ ᖃᓂᒋᔮᓄᑦ.

¹³ ᐃᓴᕆᐊᓕᐅᓪᓗ ᔫᓯᐱ ᐅᖃᐅᑎᕚ, “ᐊᖓᔪᑎᑦ ᓰᐱᓂᒃ ᓂᕆᑎᑦᓯᔭᕐᑐᕐᓯᒪᓐᖏᓛᑦ ᓯᑭᒻᒥ? ᑍᒃᑯᓄᖓ ᑎᓕᔪᒪᕙᒋᑦ.” ᑖᑦᓱᒪᓕ ᐅᖃᐅᑎᕚ, “ᐊᑐᐃᓐᓇᐅᕗᖓ.”

¹⁴ ᐅᖃᐅᑎᕚᓗ, “ᑍᒃᑯᓄᓐᖓᓚᐅᕆᑦ, ᑕᑯᔭᕐᑐᕐᓗᑎᑦ ᐊᖓᔪᑎᑦ ᓰᐱᖁᑎᕗᓪᓗ ᖃᓄᐃᖏᑦᓯᐊᕋᓗᐊᕐᒪᖔᑕ; ᐅᑎᕈᕕᑦ ᑐᓴᕐᑎᑦᓱᒫᕋᕕᖓ.” ᑕᕝᕙᓐᖓᑦ ᕼᐃᐸᕋᓂᐅᑉ ᓇᕐᓴᖓᓂᑦ ᑎᓕᖕᒪᒍ, ᓯᑭᒻᒧᐊᓕᕐᐳᖅ.

¹⁵ ᐊᖑᒻᒧᓪᓗ ᑕᑯᔭᐅᒐᒥ ᐱᕈᕐᓰᕕᖕᒥ ᐅᑎᕐᑕᕐᑎᓪᓗᒍ; ᐊᖑᑎᐅᑉ ᐊᐱᕆᕚ, “ᓱᓇᒦᒃ ᕿᓂᕐᐱᑦ?”

¹⁶ ᑭᐅᕚ, “ᐊᖓᔪᒃᑲ ᕿᓂᕐᐸᒃᑲ, ᐅᖃᐅᑎᓚᐅᓐᖓ, ᓇᓃᒃᑯᐊ ᓰᐱᓂᒃ ᒥᐊᓂᕐᓯᔪᑦ?”

¹⁷ ᐊᖑᑎᐅᑉ ᐅᖃᐅᑎᕚ, “ᑕᒫᓐᖓᑦ ᓅᓯᒪᓕᕐᐳᑦ, ᐅᖃᕐᑎᓪᓗᒋᑦ ᑐᓴᓚᐅᕐᑕᒃᑲ, ‘ᑑᑖᓂᒧᐊᓚᐅᕐᑕ.’” ᑕᕝᕙ ᔫᓯᐱ ᐊᖓᔪᒥᓂᒃ ᒪᓕᒃᓴᕐᐳᖅ, ᑑᑖᓂᒥᓗ ᓇᓂᕔᑦ.

¹⁸ ᓱᓕᓕ ᐅᖓᓯᒃᑎᓪᓗᒍ ᑕᑯᕚᑦ, ᖃᒡᓕᓚᐅᕐᑎᓐᓇᒍ ᓱᓕ ᑕᕝᕙ ᐃᓱᒪᓕᐅᖃᑎᒌᓕᕐᐳᑦ ᑐᖁᑦᓱᒪᓪᓗᒍ.

¹⁹ ᐃᒻᒥᖕᓄᑦ ᐅᖃᖃᑦᑕᐅᑎᕗᑦ, “ᓯᓐᓇᒃᑐᑎ ᕾᓕᕐᐳᖅ.

²⁰ ᐊᑏ ᑲᑐᑎᓗᒍ, ᑐᖁᓚᐅᕐᓚᕗᑦ ᐃᑎᕐᓴᒧᓪᓗ ᑲᑕᒃᑎᓪᓗᒍ; ᐅᖃᓛᕋᑦᑕ ᐆᒪᔪᒧᑦ ᐃᕐᓯᓇᕐᑐᒧᑦ ᓂᕆᔭᕕᓂᐅᓂᕋᕐᓗᒍ, ᑕᕝᕙ ᖃᐅᔨᓛᕐᐳᒍᑦ ᓯᓐᓇᒃᑐᕆᓚᐅᕐᑕᖏᑦ ᖃᓄᐃᓕᖓᓛᕐᒪᖔᑕ.”

²¹ ᕉᐱᓂᓕ ᑕᒪᑐᒥᖓ ᑐᓴᕋᒥ, ᑖᒃᑯᓇᓐᖓᑦ ᓴᐳᑎᕚ, ᐅᖃᕐᓗᓂ, “ᐅᓇ ᑐᖁᓐᓇᑎᒍ.”

²² ᕉᐱᓂᐅᑉ ᐅᖃᐅᑎᒃᑲᓐᓂᕐᐰᑦ, “ᑐᖁᖏᓪᓗᒍ; ᐅᕗᖓ ᐃᑎᕐᓴᒧᑦ ᑲᑕᒃᑎᓚᐅᕐᓯᐅᒃ ᐃᓄᖃᖏᑦᑑᒦᑦᑐᒧᑦ, ᖃᓄᐃᓕᖏᓪᓗᒍ.” ᑍᒤᓕᓚᐅᕐᐳᖅ ᑖᒃᑯᓇᓐᖓᑦ ᓴᐳᑎᔪᒪᒐᒥᐅᒃ, ᐊᑖᑕᖓᓄᓪᓗ ᐅᑎᕐᑎᑦᓱᒪᓪᓗᒍ.

²³ ᑕᕝᕙ ᔫᓯᐱ ᐊᖓᔪᒥᓄᑦ ᑎᑭᒻᒪᑦ, ᐅᓕᖓ ᐊᑐᕐᑕᖓ ᐲᕐᐹᑦ, ᑕᑭᔪᖅ ᐂᖅᑯᕐᑐᓪᓗᓂ;

²⁴ ᑎᒍᓪᓗᒍᓗ ᐃᑎᕐᓴᒧᑦ ᑲᑕᒃᑎᑉᐹᑦ. ᐃᑎᕐᓴᕐᓕ ᓱᓇᖃᓐᖏᓚᖅ, ᐃᒪᖃᕋᓂᓗ.

²⁵ ᑕᕝᕙ ᐃᖏᑉᐳᑦ ᓂᕆᓇᓱᐊᓕᕐᓗᑎᒃ; ᑕᑯᓴᕋᒥᒡᓗ ᑕᑯᕗᑦ, ᐃᓯᒤᓕᒥᐅᓂᒃ ᐅᓄᕐᑐᓂᒃ ᐃᖏᕐᕋᖃᑎᒌᒃᑐᓂᒃ, ᓄᓇᒥᑦ ᒋᓕᐊᑎᒥᑦ ᐱᔪᓂᒃ ᑳᒥᓕᒃᑯᑦ ᐃᖏᕐᕋᔪᓂᒃ, ᑎᐱᑦᓯᐊᕆᒃᓴᐅᑎᓂᒃ ᓇᒃᓴᕐᑐᑦ, ᐹᓪᒥᓂᒃ, ᒧᕆᓂᒡᓗ, ᐄᑦᔨᑉᑎᒧᓐᖓᐅᑎᔭᒥᖕᓂᒃ.

²⁶ ᑕᕝᕙ ᔫᑕ ᖃᑕᓐᖑᑎᒥᓄᑦ ᐅᖃᓕᕐᐳᖅ, “ᓱᓇᒥᒃ ᐱᕙᓪᓕᕈᑎᖃᕋᔭᕐᐱᑕ ᓄᑲᕗᑦ ᑐᖁᒃᑲᔭᕈᑦᑎᒍ, ᐊᐅᖓᓗ ᐊᓐᖏᐊᕆᓗᒍ?

²⁷ ᓂᐅᕐᕈᑎᒋᓚᐅᕐᓚᕗᑦ ᐃᓯᒤᓕᒥᐅᓄᑦ, ᐊᒡᒐᑦᑎᓐᓄᑦ ᖃᓄᐃᓕᖏᓪᓗᒍ, ᓄᑲᕆᒐᑦᑎᒍ, ᓇᖕᒥᓂᕆᓪᓗᑎᒍᓗ.” ᑕᕝᕙ ᖃᑕᓐᖑᑎᖏᑕ ᐊᖏᖃᑎᒋᕚᑦ.

²⁸ ᑍᒤᒻᒪᑦ ᒥᑎᐊᓂᒥᐅᑦ ᑕᐅᕐᓰᔩᑦ ᐊᖅᑯᓵᓕᕐᐳᑦ; ᑕᕝᕙ ᔫᓯᐱ ᐃᑎᕐᓴᒥᑦ ᐊᒧᓪᓗᒍ ᐊᓂᑎᑉᐹᑦ, ᓂᐅᕐᕈᑎᒋᓪᓗᒍᓗ ᐃᓯᒤᓕᒥᐅᓄᑦ 20ᓂᒃ ᓯᐅᓪᕕᕆᓂᒃ ᐊᑭᖃᕐᓱᓂ; ᑖᒃᑯᐊᓗ ᔫᓯᐱ ᓇᒃᓴᓕᕐᐹᑦ ᐄᑦᔨᑉᑎᒧᑦ.

²⁹ ᕉᐱᓂᓕ ᐅᑎᕋᒥ ᐃᑎᕐᓴᒧᓪᓗ ᑕᑯᒋᐊᕋᒥ ᔫᓯᐱ ᑕᑯᓐᖏᓛ, ᐊᓐᓄᕌᓂᓗ ᐊᓕᒃᐰᑦ.

³⁰ ᖃᑕᓐᖑᑎᒥᓄᓪᓗ ᐅᑎᕋᒥ, ᐅᖃᕐᐳᖅ, “ᐃᓅᓱᒃᑐᖅ ᑍᑲᓃᑦᓱᓐᓃᕐᐳᖅ, ᖃᓄᐃᓐᓂᐊᓕᕐᑐᖓᓕ, ᓇᒧᓐᖓᕐᕕᒃᓴᖃᕈᓐᓃᕐᐳᖔ?”

³¹ ᑕᕝᕙ ᔫᓯᐱᐅᑉ ᐅᓕᖓ ᑖᒃᑯᐊ ᑎᒍᕚᑦ, ᒎᑦᓯᒥᒡᓗ ᑐᖁᑦᓯᓪᓗᑎᒃ, ᐅᓕᒡᓗ ᐊᐅᖕᒧᑦ ᒥᓱᒃᑎᕐᐹᑦ.

³² ᐅᓕᒡᔪᐊᖅ ᑕᑭᔪᖅ ᐂᖅᑯᕐᑐᔪᖅ ᓇᒃᓴᕐᐹᑦ ᐊᑖᑕᒥᖕᓄᑦ, ᐅᖃᐅᑎᓪᓗᒍᓗ, “ᐅᓇ ᓇᓂᓚᐅᕐᑕᕗᑦ; ᑕᑯᒍᒃ ᐃᕐᓂᕐᐱᑦ ᐊᓐᓄᕌᕆᖕᒪᖔᒍ ᐊᓐᓄᕌᕆᖏᒻᒪᖔᒍᓗ?”

³³ ᑖᑦᓱᒪᓗ ᐃᓕᑕᕆᕚ, ᐅᖃᕐᓗᓂᓗ, “ᐅᓇ ᐃᕐᓂᕐᒪ ᐅᓕᖓ; ᐃᕐᓂᕋ ᐆᒪᔪᒧᑦ ᐃᕐᓯᓇᕐᑐᒧᑦ ᓂᕆᔭᐅᓐᓂᕐᐳᖅ; ᔫᓯᐱ ᓇᓗᓇᓐᖏᓚᖅ ᓄᖑᑕᐅᑦᓯᐊᕐᑐᕕᓂᖅ.”

³⁴ ᑕᕝᕙ ᔧᑰᑉ ᐊᓐᓄᕌᓂ ᐊᓕᒃᐰᑦ, ᖃᓪᓗᓈᕐᑕᒥᒡᓗ ᐳᑐᕐᓛᒥᒃ ᐊᑎᓯᓪᓗᓂ, ᐃᕐᓂᓂᓗ ᕿᒃᓵᒍᑎᒋᕚ ᐅᓪᓗᓂᒃ ᐅᓄᕐᑐᓂᒃ.

³⁵ ᐃᕐᓂᖏᑕᓕ ᐸᓂᖏᑕᓗ ᑕᒪᕐᒥᒃ ᓮᒻᒪᕐᓴᕋᓱᐊᕋᓗᐊᕐᐹᑦ; ᓮᒻᒪᕐᓴᕐᑕᐅᔪᒪᓐᖏᓚᕐᓕ, ᐅᖃᕐᓗᓂᓗ, “ᕿᒃᓵᒻᒪᕆᒡᓗᖓ ᑐᖁᖓᔪᑦ ᐃᓂᖓᓄᐊᖔᕈᒪᓕᕐᐳᖓ ᐃᕐᓂᕋ ᐅᐸᒡᓗᒍ.” ᑕᕝᕙ ᐊᑖᑕᖓᑕ ᑍᒫᒃ ᕿᒃᓴᕕᒡᔪᐊᕈᑎᒋᓚᐅᕐᐹ.

³⁶ ᑍᑦᓱᒪᓂᐅᑎᓪᓗᒍᓕ ᒥᑎᐊᓂᒥᐅᑦ ᓂᐅᕐᕈᑎᒋᕚᑦ ᐄᑦᔨᑉᑎᒥ ᐹᑎ-ᐸᕆᒧᑦ, ᐰᕉᑉ ᐊᖓᔪᖅᑳᖁᑎᖓᓄᑦ, ᐊᖓᔪᖅᑳᒃᑯᕕᖕᒥ ᖃᐅᔨᓴᕐᑏᑦ ᐊᖓᔪᖅᑳᖓᓐᓄᑦ.