ᒨᓯᓯ ᓯᕗᓪᓖᑦ 35 - ᐊᒡᓔᑦ ᐃᑦᔪᕐᖕᓁᑦᑐᑦᒎᑎᐅᑉ ᓮᒻᒪᕐᑎᑦᓯᓂᖓ ᔧᑯᒥᒃ ᐱᑎᓕᒥ 1 ᒎᑎ ᔧᑯᒧᑦ ᐅᖃᕐᐳᖅ, “ᒪᑭᓪᓗᑎᑦ, ᐱᑎᓕᒧᑦ ᐂᓕᕆᑦ, ᑍᑲᓂᓗ ᓄᓇᑖᕐᓗᑎᑦ; ᑕᕝᕙᓂᓗ ᑐᓂᕐᕈᓯᕐᕕᓕᐅᕐᓗᑎᑦ ᒎᑎᒧᑦ ᐃᓕᖕᓄᑦ ᓴᖅᑭᓚᐅᕐᑐᒧᑦ ᕿᒫᑎᓪᓗᑎᑦ ᐊᖓᔪᖕᓂᑦ ᐄᓴᒥᑦ.” 2 ᑕᕝᕙ ᔧᑯ ᓇᖕᒥᓂᕐᒥᓄᑦ ᐃᓚᒋᔭᓕᒫᒥᓄᓪᓗ ᐅᖃᕐᐳᖅ, “ᐃᓅᖃᑎᑐᖃᕆᓐᖏᑕᑦᑕ ᒎᑎᓐᖑᐊᖏᑦ ᐱᓯᒪᔭᓯ ᐃᒋᓚᐅᕐᓯᐅᒃ; ᐃᓕᑦᓯᓐᓂᒃ ᓴᓗᒻᒪᕐᓴᕆᑦᓯ, ᐊᓯᖏᓐᓂᒡᓗ ᐊᓐᓄᕌᕐᓗᓯ. 3 ᑕᕝᕙᓐᖓᑦ ᐊᐅᓪᓚᕐᓂᐊᓕᕋᑦᑕ ᐱᑎᓕᒧᓐᖓᐅᓗᑕ, ᑍᑲᓂ ᑐᓂᕐᕈᓯᕐᕕᓕᐅᕐᓂᐊᕋᒪ ᒎᑎᒧᑦ ᐅᕙᓐᓂᒃ ᑐᓴᓚᐅᕐᑐᒧᑦ ᐃᓱᒪᔮᕐᓇᕐᑐᒦᑎᓪᓗᖓ ᐅᕙᓐᓂᒡᓗ ᐃᓚᕾᓐᓇᖃᑦᑕᕐᑐᒧᑦ ᓇᒧᓐᖓᕋᓗᐊᕌᖓᒪ.” 4 ᑍᒤᒻᒪᑦ ᔧᑯ ᑐᓂᕚᑦ ᑕᒤᓐᓂᒃ ᐃᓅᖃᑎᑐᖃᕆᓐᖏᑕᖏᑕ ᒎᑎᓐᖑᐊᖏᓐᓂᒃ ᐱᒋᔭᒥᖕᓂᒃ, ᓯᐅᑎᒥᐅᑕᓂᒡᓗ ᐊᑐᕐᑕᒥᖕᓂᒃ; ᑖᒃᑯᐊᓗ ᔧᑰᑉ ᓴᐅᕔᑦ ᓄᓇᒧᑦ ᓇᐹᕐᑑᑉ ᐆᒃᒥᒃ ᐊᑎᓕᐅᑉ ᐊᑖᓄᑦ ᓯᑭᒻᒥᐅᑉ ᖃᓂᒋᔮᓄᑦ. 5 ᑕᕝᕙᓐᖓᑦ ᐊᐅᓪᓚᓕᕐᓗᑎᒃ, ᓄᓇᓖᑦ ᖃᓂᒋᔮᓃᑦᑐᑦ ᑲᑉᐱᐊᓱᖕᓂᕐᔪᐊᕐᒧᑦ ᒎᑎᒥᑦ ᐱᔪᒧᑦ ᑎᑭᑕᐅᕗᑦ, ᒪᓕᒃᓴᖁᓇᒋᑦ ᔧᑰᑉ ᐃᕐᓂᖏᓐᓂᒃ. 6 ᔧᑯᓗ ᐃᓅᖃᑎᓕᒫᖏᓪᓗ ᑎᑭᑉᐳᑦ ᓚᔾᒧᑦ, ᑕᕝᕗᖓ ᑍᔭᐅᔪᒧᑦ ᐱᑎᓕᒥᒃ, ᑬᓇᓂᒥᐅᑦ ᓄᓇᖓᓃᑦᑐᒧᑦ. 7 ᑕᕝᕙᓂᓗ ᑐᓂᕐᕈᓯᕐᕕᓕᐅᕐᐳᖅ, ᑖᓐᓇᓗ ᐊᑎᖃᕐᑎᑉᐹ ᐃᓪ-ᐱᑎᓕᒥᒃ, ᑕᕝᕙᓂ ᒎᑎᐅᑉ ᓴᖅᑭᕝᕕᒋᓚᐅᕐᒪᒍ ᕿᒫᑎᓪᓗᒍ ᐊᖓᔪᒥᓂᑦ. 8 ᑎᐴᕋᓗ ᕇᐱᑲᐅᑉ ᐃᑲᔪᕐᑎᖓ ᑐᖁᕗᖅ, ᐃᓗᕕᕐᑕᐅᓪᓗᓂᓗ ᓇᐹᕐᑑᑉ ᐆᒃᒥᒃ ᐊᑎᓕᐅᑉ ᐊᑖᓄᑦ ᐱᑎᓕᐅᑉ ᐊᑖᓃᑦᑐᒧᑦ; ᑖᓐᓇᓗ ᐊᑦᓯᕐᐹᑦ ᐊᑦᓘᓐ-ᐸᑯᑎᒥᒃ. 9 ᒎᑎᐅᓪᓕ ᔧᑯ ᓴᖅᑭᕝᕕᒋᒃᑲᓐᓂᕐᐹ, ᐅᑎᕐᓯᒪᓕᕐᑎᓪᓗᒍ ᐸᑖᓐ-ᐊᕋᓐᒥᑦ ᓮᒻᒪᕐᑎᓪᓗᒍᓗ. 10 ᒎᑎᐅᓪᓗ ᐅᖃᐅᑎᕚ, “ᔧᑯᒥᒃ ᐊᑎᖃᕋᕕᑦ; ᒫᓐᓇᒥᑦ ᔧᑯᒥᒃ ᑍᔭᐅᓂᐊᕈᓐᓃᕐᐳᑎᑦ, ᐃᓴᕆᐊᓕᒥᒃ ᐊᑎᖃᕐᓂᐊᓕᕐᐳᑎᑦ.” ᑍᒤᒻᒪᑦ ᐃᓴᕆᐊᓕᒥᒃ ᑍᔭᐅᕙᓕᓚᐅᕐᐳᖅ. 11 ᒎᑎᐅᓪᓗ ᐅᖃᐅᑎᕚ, “ᐅᕙᖓ ᒎᑎᐅᕗᖓ ᐊᔪᒐᖃᖏᑦᑐᖅ; ᐅᓄᕐᑐᓂᒃ ᕿᑐᕐᖏᐅᕆᑦᓯ ᐅᓄᕐᓯᕙᓪᓕᐊᓗᓯᓗ; ᐃᓅᖃᑎᒌᒡᔪᐊᑦ ᐃᓅᖃᑎᒌᒐᓴᒡᔪᐊᓪᓗ ᐃᓕᖕᓂᑦ ᐱᔪᒫᕐᐳᑦ, ᐊᖓᔪᖅᑳᕐᔪᐊᓂᒡᓗ ᑭᖑᕚᖃᕈᒫᕐᐳᑎᑦ. 12 ᓄᓇ ᑐᓂᓚᐅᕐᑕᕋ ᐂᑉᕋᕼᐋᒻᒧᑦ ᐂᓴᑭᒧᓪᓗ ᑐᓂᓂᐊᕆᕙᕋ ᐃᓕᖕᓄᑦ, ᑭᖑᕚᒃᓴᕐᓄᓪᓗᑦᑕᐅᖅ ᑐᓂᔪᒫᕆᕙᕋ ᑭᖑᓂᕐᓂ.” 13 ᒎᑎᓗ ᑕᕝᕙᓐᖓᑦ ᖁᒻᒧᐊᒃᐳᖅ ᐅᖃᓪᓚᒌᕋᒥ ᔧᑯᒧᑦ. 14 ᔧᑯᓗ ᑕᕝᕙᓂ ᓇᑉᐸᕐᓯᕗᖅ ᐅᖃᓪᓚᒡᕕᐅᕕᖕᒥᓂ, ᐅᔭᕋᖕᒥᒃ ᓇᓗᓁᒃᑯᑕᕐᒥᒃ; ᐃᒥᒃᓴᓕᐊᕆᓯᒪᔪᒥᒡᓗ ᑐᓂᕐᕈᑎᒃᓴᒥᒃ ᑯᕝᕕᕆᕚ, ᓇᐹᕐᑑᓪᓗ ᐅᕐᓱᖓᓂᒃ ᑯᕝᕕᕆᒋᓪᓗᒍ. 15 ᑖᓐᓇᓗ ᔧᑰᑉ ᐊᑎᖃᕐᑎᑉᐹ ᐱᑎᓕᒥᒃ ᑕᕝᕙᓂ ᒎᑎᐅᑉ ᐅᖃᕐᕕᒋᓚᐅᕐᒪᒍ. ᕅᒋᓕᐅᑉ ᑐᖁᓂᖓ 16 ᑕᕝᕙᓐᖓᓪᓗ ᐱᑎᓕᒥᑦ ᐊᐅᓪᓚᕐᐳᑦ, ᓱᓕ ᐃᐸᕋᑦᒧᑦ ᐅᖓᓯᒃᑎᓪᓗᒋᑦ, ᕅᒋᓕᐅᑉ ᐃᕐᓂᕕᒃᓴᖓ ᓇᓪᓕᐅᑎᕗᖅ, ᐃᕐᓂᓱᒃᓗᓂᓕ ᐃᕐᓂᔪᓐᓁᓪᓕᖅᑲᓕᕐᐳᖅ ᐋᓐᓂᐊᒻᒪᕆᒃᓗᓂᓗ. 17 ᐃᕐᓂᓱᒃᓗᓂᓕ ᐋᓐᓂᐊᕐᓂᖓᑕ ᐱᓗᐊᕐᓂᖓᓂ, ᐃᕐᓂᓱᒃᓰᔨᐅᑉ ᐅᖃᐅᑎᕚ, “ᑲᑉᐱᐊᓱᖏᓪᓗᑎᑦ ᐃᕐᓂᕐᑖᒃᑲᓐᓂᓕᕋᕕᑦ.” 18 ᑐᖁᓕᒑᓕᕐᓗᓂᓕ ᐊᓂᕐᓇᖏᕐᓂᐊᓕᕐᓱᓂ, ᐃᕐᓂᕐᑖᓂ ᐊᑦᓯᕐᐹ ᐱᓐ-ᐆᓂᒥᒃ; ᐊᑖᑕᖓᑕᓕ ᐊᑦᓯᕐᐹ ᐱᓐᔭᒥᓂᒥᒃ. 19 ᕅᒋᓕᓕ ᑐᖁᖕᒪᑦ, ᐃᓗᕕᕐᑕᐅᕗᖅ ᐃᐸᕋᑕᓕᐊᕆᐊᑉ ᐊᖅᑯᑎᖓᓂ, ᒫᓐᓇᒃᑯᑦ ᐊᑎᖃᓕᕐᑑᑉ ᐱᑦᓕᐊᒥᒃ. 20 ᑕᕝᕙᓂᓗ ᔧᑯ ᐃᖅᑲᐅᒪᑦᔪᑎᒃᓴᒥᒃ ᐃᓗᕕᖓᑕ ᓇᑉᐸᖅᑯᑎᖓᓂᒃ ᓇᑉᐸᕐᓯᕗᖅ, ᐅᓪᓗᒥᒧᓪᓗ ᓱᓕ ᑎᑭᓪᓗᒍ ᑖᓐᓇ ᕅᒋᓕᐅᑉ ᐃᓗᕕᖓᑕ ᓇᑉᐸᖅᑯᑎᒋᕚ. 21 ᐃᓴᕆᐊᓕᒥᐅᓪᓕ ᓱᓕ ᐃᖏᕐᕋᕗᑦ ᑕᖕᒫᕐᓗᑎᒡᓗ ᐄᑕᕆᐅᑉ ᓇᐸᔪᖓᑕ ᐃᒡᓗᒐᓮᑦ ᐅᖓᑖᓂ. ᔧᑰᑉ ᐃᕐᓂᖏᑦ ᑯᕉᓂᑲ ᓯᕗᓪᓖᑦ 2:1-2 22 ᐃᓴᕆᐊᐅᓕ ᑕᕝᕙᓂ ᓄᓇᖃᕐᑎᓪᓗᒍ, ᕉᐱᓂ ᐃᓐᓇᖓᖃᑎᖃᕐᐳᖅ ᐱᓪᕼᐊᒥᒃ, ᐊᑖᑕᖓᑕ ᐱᔨᒋᓪᓗᒍ ᓄᓕᐊᒃᑲᓐᓂᖓᓂ; ᐃᓴᕆᐊᓪᓗ ᑕᒪᓐᓇ ᑐᓴᕐᐹ. ᔧᑯ ᐃᕐᓂᖃᓚᐅᕐᐳᖅ 12ᓂᒃ. 23 ᓕᐊᑉ ᐃᕐᓂᖏᑦ ᐅᑯᐊᖑᕗᑦ; ᕉᐱᓂ (ᔧᑰᑉ ᐃᕐᓂᖏᓐᓂᑦ ᐊᖓᔪᒃᓯᕐᐹᖅ), ᓯᒥᐅᓂ, ᓕᕔ, ᔫᑕ, ᐃᓴᑳᕆ, ᐊᒻᒪ ᓯᐳᓗᓂ. 24 ᕅᒋᓕᐅᑉ ᐃᕐᓂᖏᒃ ᐅᑯᐊᖑᕗᒃ; ᔫᓯᐱ, ᐱᓐᔭᒥᓂᓗ. 25 ᕅᒋᓕᐅᑉ ᐱᔨᖓᑕ ᐱᓪᕼᐊᐅᑉ ᐃᕐᓂᖏᑦ ᐅᑯᐊᖑᕗᑦ; ᑖᓐ, ᓈᑉᑕᓕᓗ. 26 ᓕᐊᓪᓕ ᐱᔨᖓᑕ ᔨᐅᓪᐸᐅᑉ ᐃᕐᓂᖏᑦ ᐅᑯᐊᖑᕗᑦ; ᒑᑎ ᐋᓱᕆᓗ. ᑖᒃᑯᐊ ᔧᑰᑉ ᐃᕐᓂᖏᑦ ᐃᕐᓂᐊᖑᓚᐅᕐᐳᑦ ᐸᑖᓐ-ᐊᕋᒻᒥ. ᐂᓴᑭᐅᑉ ᑐᖁᓂᖓ 27 ᔧᑯᓗ ᐊᑖᑕᒥᓄᐊᕐᐳᖅ ᐂᓴᑭᒧᑦ ᓄᓇᒥ ᒪᒻᕆᒦᑦᑐᒧᑦ, ᐅᕝᕙᓗ ᑭᕆᐊᑦ-ᐊᕋᐸᒧᑦ ᕼᐃᐸᕋᓐᒥᒃ ᑍᔭᐅᔪᒧᑦ, ᑕᕝᕗᖓ ᐂᑉᕋᕼᐋᒻ ᐂᓴᑭᐅᓪᓗ ᓄᓇᑖᕆᓚᐅᕐᑕᖓᓄᑦ. 28 ᐂᓴᑭᓕ ᐃᓅᓚᐅᕐᐳᖅ ᐊᕐᕌᒍᓂᒃ 180ᓂᒃ 29 ᐂᓴᑭᓕ ᐊᓂᕐᓇᖏᕐᐳᖅ; ᑐᖁᒐᒥ ᐃᓚᒥᓄᑦ ᐅᑎᕐᐳᖅ, ᐃᑦᑐᐊᓘᓕᕐᓗᓂ; ᐃᕐᓂᖏᒃᑕᓗ ᐄᓴᐅᑉ ᔧᑰᓪᓗ ᐃᓗᕕᕐᐹ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society