ᒨᓯᓯ ᓯᕗᓪᓖᑦ 34 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᓇᐅᑉ ᖁᓄᔪᕐᓂᐊᕐᑕᐅᓂᖓ

¹ ᑍᓇᓕ, ᔧᑰᑉ ᓕᐊᓪᓗ ᐸᓂᖓ, ᐳᓛᕆᐊᓚᐅᕐᐳᖅ ᓄᓇᐅᑉ ᓇᔪᕐᑕᖓᑦᑕ ᐊᕐᓇᖏᓐᓄᑦ;

² ᓯᑭᒻᒥᐅᓪᓕ ᕼᐊᒧᕆᐅᑉ ᐃᕐᓂᖓᑕ ᕼᐃᕔᑎᒥᐅᑕᐅᑉ, ᑕᕝᕙᓂ ᐊᖓᔪᖅᑳᖑᔫᑉ, ᑕᑯᒐᒥᐅᒃ ᑎᒍᕚ ᖁᓄᑎᓪᓗᒍᓗ ᐃᓐᓇᖓᖃᑎᒋᕚ,

³ ᑕᕝᕙ ᐃᓗᒥᒍᑦ ᐅᖓᓕᕐᐳᖅ ᑍᓇᒧᑦ ᔧᑰᑉ ᐸᓂᖓᓄᑦ; ᐅᐃᒡᒐᓱᒃ ᓇᒡᓕᒋᒐᒥᐅᒃ ᐃᓚᓐᓂᕐᓴᕐᓗᒍ ᐅᖄᕕᒋᓕᕐᐹ.

⁴ ᓯᑭᒻᒥᐅᓪᓕ ᐊᑖᑕᓂ ᕼᐊᒧᕆ ᐅᖃᐅᑎᕚ, “ᐅᐃᒡᒐᓱᖕᒥᒃ ᐆᒥᖓ ᓄᓕᐊᕐᑖᕐᑎᓚᐅᓐᖓ.”

⁵ ᔧᑯᓗ ᑐᓴᕐᐳᖅ ᐸᓂᖓᑕ ᑍᓇᐅᑉ ᓴᓗᒤᓕᑎᑕᐅᓂᖓᓂᒃ, ᐃᕐᓂᖏᑦ ᐱᕈᕐᓰᕕᖕᒦᒻᒪᑕ ᐆᒪᔪᖁᑎᖏᓐᓂᒃ ᑲᒪᓪᓗᑎᒃ, ᖃᓄᐃᓕᒋᐊᓚᐅᓐᖏᓚᖅ ᐃᕐᓂᖏᑦ ᐅᑎᓚᐅᖏᓐᓂᖏᓐᓂ.

⁶ ᓯᑭᒻᒥᐅᓪᓗ ᐊᑖᑕᖓᑕ ᕼᐊᒧᕆᐅᑉ ᔧᑯ ᐅᐸᒃᓗᒍ ᐅᖃᖃᑎᒋᔭᕐᑐᕐᐹ,

⁷ ᔧᑰᓪᓕ ᐃᕐᓂᖏᑦ ᐱᕈᕐᓰᕕᖕᒥᓐᖔᕐᓗᑎᒃ ᑕᕝᕗᓐᖓᕋᒥᒃ ᑕᒪᑐᒥᖓᓗ ᑐᓴᓕᕋᒥᒃ; ᐃᓗᐃᓪᓕᕐᐳᑦ ᓂᓐᖓᒻᒪᕆᒃᓗᑎᒡᓗ, ᓯᑭᒥ ᑍᒤᓕᐅᕐᓯᒪᖕᒪᑦ ᓈᒻᒪᖏᑦᑐᒥᒃ ᐃᓴᕆᐊᓕᒥᐅᓂᒡᓗ ᒥᑕᐅᑎᖃᕐᓗᓂ ᔧᑰᑉ ᐸᓂᖓᓂᒃ ᐃᓐᓇᖓᖃᑎᖃᕐᓂᕐᒥᓄᑦ, ᑍᒤᓕᐅᕐᑐᖃᕆᐊᖃᕐᑎᓐᓇᒍ.

⁸ ᕼᐊᒧᕆᐅᓪᓕ ᐅᖃᕐᕕᒋᓪᓗᒋᑦ, ᐅᖃᕐᐳᖅ, “ᐃᕐᓂᕋ ᓯᑭᒻ ᐸᓂᖕᓂᒃ ᐅᖓᓕᕐᒪᑦ; ᑐᒃᓯᕋᕐᕕᒋᓕᕐᐸᒋᑦ, ᓄᓕᐊᕐᑖᕐᑎᓚᐅᕈᒃ ᑖᑦᓱᒥᖓ.

⁹ ᓄᓕᐊᓂᖃᑦᑕᐅᑎᔪᓐᓇᕐᓯᓚᐅᕐᑕ; ᐸᓂᓯ ᐅᕙᑦᑎᓐᓄᑦ ᑐᓂᓕᕐᓯᐅᒃ, ᐸᓂᕗᓪᓗ ᐱᓂᐊᕆᕙᓯ.

¹⁰ ᑕᒫᓂ ᓄᓇᖅᑲᑎᒌᖕᓂᐊᕋᑦᑕ, ᓇᓂᑐᐃᓐᓇᑦᓯᐊᕐᓗ ᑕᒫᓂ ᓄᓇᒋᔪᒪᔭᑦᓯᓐᓂ ᓄᓇᖃᕈᓐᓇᕐᓂᐊᕐᐳᓯ; ᐃᓂᖃᕐᓗᓯ ᑕᐅᕐᓰᑦᔪᑎᕙᒡᓗᓯᓗ, ᓄᓇᖁᑎᑖᕐᐸᒡᓗᓯᓗ.”

¹¹ ᑕᕝᕙ ᓯᑭᒻ ᐅᖃᓕᕐᐳᖅ ᑍᓇᐅᑉ ᐊᑖᑕᖓᓄᑦ ᐊᓂᖏᓐᓄᓪᓗ, “ᖁᕕᐊᒋᔭᐅᔪᒪᔪᖓ ᐃᓕᑦᓯᓐᓄᑦ, ᓱᓇᑐᐃᓐᓇᑦᓯᐊᒥᒃ ᐱᔪᒪᑐᐊᕈᑦᓯ ᑕᕝᕙ ᑐᓂᓯᔪᓐᓇᕐᐳᖓ.

¹² ᑐᒃᓯᕋᓚᐅᕆᑦᓯ ᓱᓇᒥᒃ ᐊᑭᓕᕐᑕᐅᔪᒪᖕᒪᖔᑦᓯ, ᓄᓕᐊᒃᓴᒧᑦ, ᑐᓂᕐᕈᑕᐅᖁᔭᑦᓯᓐᓂᒡᓘᓐᓃᑦ ᑐᓂᔭᕆᐊᖃᕐᑕᓐᓂᒃ ᐱᔪᒪᔭᑦᓯᓐᓂᒃ, ᑕᕝᕙ ᑐᓂᓯᕕᒋᓂᐊᕐᐸᑦᓯ ᖃᓄᑐᐃᓐᓇᖅ ᐅᖃᑐᐊᕈᑦᓯ ᐅᕙᓐᓄᑦ; ᑖᑦᓱᒥᖓ ᓄᓕᐊᕐᑖᕈᓐᓇᕐᑎᑕᐅᑦᓴᓚᐅᕈᒪ.”

¹³ ᔧᑰᑉ ᐃᕐᓂᖏᑦ ᑭᐅᓕᕐᐳᑦ ᓯᓔᕐᕆᒃᓯᕐᓗᑎᒃ ᓯᑭᒻᒥᒃ ᐊᑖᑕᖓᓂᒡᓗ ᕼᐊᒧᕆᒥᒃ, ᓇᕐᕈᓇᕐᓯᑎᑦᓯᓚᐅᕐᓂᖓᓄᑦ ᓇᔭᖓᓐᓂᒃ ᑍᓇᒥᒃ.

¹⁴ ᐅᖃᐅᑎᓪᓗᒋᓪᓗ, “ᑍᒤᓕᐅᕈᓐᓇᓐᖏᓚᒍᑦ, ᓇᔭᕗᑦ ᓄᓕᐊᕐᑖᖑᑎᑦᓱᓐᓇᓐᖏᓐᓇᑦᑎᒍ ᐊᖑᒻᒧᑦ ᑭᐱᔭᐅᓯᒪᖏᑦᑐᒧᑦ; ᑕᒪᓐᓇ ᐅᕙᑦᑎᓐᓄᑦ ᑲᓐᖑᓲᑎᒃᓴᐅᒐᔭᕐᒪᑦ.

¹⁵ ᐃᒤᓕᐅᕈᑦᓯ ᑭᓯᐊᓂ ᐊᖏᕈᓐᓇᕐᑐᒍᑦ, ᐅᕙᑦᑎᓐᓂᒃ ᐊᑦᔨᖃᓕᕈᑦᓯ ᑭᐱᔭᐅᓯᒪᓕᕐᓗᓯ ᐊᖑᑎᓕᒫᑦ.

¹⁶ ᑕᕝᕙ ᐸᓂᕗᑦ ᑐᓂᔪᓐᓇᓕᕋᔭᕐᐸᕗᑦ ᐃᓕᑦᓯᓐᓄᑦ, ᐸᓂᑦᓯᓐᓂᒡᓗ ᓄᓕᐊᕐᑖᕈᓐᓇᕐᓯᓗᑕ. ᐃᓕᑦᓯᓐᓂᒃ ᓄᓇᖅᑲᑎᖃᓕᕐᓗᑕ ᐊᑕᐅᓯᐅᖃᑎᒌᓕᕐᓗᑕᓗ.

¹⁷ ᑕᒪᓐᓇᓕ ᐱᐅᓯᐅᖁᔭᕗᑦ ᐊᖏᖏᒃᑯᑦᓯᐅᒃ ᑭᐱᔭᐅᓂᐊᖏᒃᑯᑦᓯᓗ, ᐅᓇ ᓇᔭᕗᑦ ᑎᒍᓗᒍ, ᐊᐅᓪᓚᕐᓂᐊᕐᐳᒍ.”

¹⁸ ᑖᒃᑯᐊᓗ ᐅᖃᐅᓰᑦ ᕼᐊᒧᕆᐅᑉ ᓈᒻᒪᒋᕔᑦ ᐃᕐᓂᖓᑕᓗ ᓯᑭᒻᒥᐅᑉ.

¹⁹ ᑖᓐᓇᓗ ᐊᖑᑦ ᐃᓅᓱᒃᑐᖅ ᐱᒋᐊᑦᓴᐅᑎᒋᓚᐅᕐᐳᖅ ᐃᓱᒪᓕᐅᕈᑕᐅᔪᒥᒃ, ᐅᖓᓕᕋᒥ ᔧᑰᑉ ᐸᓂᖓᓂᒃ. ᐅᐱᒋᔭᐅᓂᕐᐹᐅᓕᕐᓗᓂᓗ ᐃᓚᒥᓂᑦ.

²⁰ ᕼᐊᒧᕆᓗ ᐃᕐᓂᖓᓗ ᓯᑭᒻᒥ ᑲᑎᕕᐅᕙᒃᑐᓄᐊᕐᓗᑎᒃ ᐃᒡᓗᒐᓮᑦ ᐃᑎᕐᑕᕐᕕᖓᓄᑦ; ᐅᖃᓪᓚᓕᕐᐳᑦ ᓄᓇᖃᑎᒥᖕᓄᑦ:

²¹ “ᐅᑯᐊ ᐃᓄᐃᑦ ᐃᓚᒋᔭᒃᓴᑦᓯᐊᑦ ᐅᕙᑦᑎᓐᓄᑦ; ᑕᒫᓂ ᓄᓇᖃᓚᐅᕐᓕᑦ ᑕᐅᕐᓰᖃᑦᑕᕈᓐᓇᕐᓗᑎᒡᓗ ᑕᒫᓂ. ᑕᒪᓐᓇᓗ ᓄᓇ ᑖᒃᑯᓄᖓ ᐊᖏᓂᖓ ᓈᒻᒪᒡᓗᓂ; ᐸᓂᖏᓐᓂᒃ ᓄᓕᐊᓂᒍᓐᓇᓚᐅᕐᑕ ᐅᕙᒍᓪᓗ ᐸᓂᑦᑎᓐᓂᒃ ᓄᓕᐊᕐᑖᖑᑎᑦᓯᓗᑕ ᑖᒃᑯᓄᖓ.

²² ᐅᑯᐊ ᐊᖑᑎᑦ ᐃᒤᓕᐅᕈᑦᑕ ᑭᓯᐊᓂ ᐊᖏᕈᓐᓇᕐᑐᑦ ᓄᓇᖅᑲᑎᖃᕈᒪᓗᑎᒃ ᐅᕙᑦᑎᓐᓂᒃ, ᐃᓅᖃᑎᒌᒍᑎᒃᓴᑦᑎᓐᓂᒃ ᐊᑕᐅᓯᐅᓗᑕ; ᐊᖑᑎᓕᒫᑦ ᓄᓇᖃᑎᕗᑦ ᑭᐱᔭᐅᓂᐊᕐᐸᑕ ᑭᓯᐊᓂ, ᑖᒃᑯᐊ ᑭᐱᔭᐅᓯᒪᖕᒪᑕ.

²³ ᐃᒻᒧᒃᓯᐅᒐᖁᑎᖏᑦ ᓄᓇᖁᑎᖏᓪᓗ ᐆᒪᔪᖁᑎᓕᒫᖏᓪᓗ ᐱᒋᓕᕐᓂᐊᓐᖏᓚᕘᑦ? ᐊᖏᖃᑎᒋᒍᑦᑎᒍ ᑭᓯᐊᓂ, ᓄᓇᖅᑲᑎᒋᓕᕐᓂᐊᕋᑦᑎᒍ.”

²⁴ ᐃᒡᓗᒐᓴᖕᒥᐅᑦ ᐃᑎᕐᑕᕐᕕᒃᑯᑦ ᐊᓂᔪᓕᒫᑦ ᐊᖏᖃᑕᐅᕗᑦ ᕼᐊᒧᕆᐅᑉ ᐃᕐᓂᖓᑕᓗ ᓯᑭᒻᒥᐅᑉ ᐅᖃᐅᓯᖏᓐᓂᒃ; ᐊᖑᑎᓪᓗ ᑕᒪᕐᒥᒃ ᑭᐱᔭᐅᕗᑦ, ᐊᓂᕙᒃᑐᓕᒫᑦ ᐃᓗᒐᓮᑦ ᐃᑎᕐᑕᕐᕕᖓᒍᑦ.

²⁵ ᐅᓪᓗᐃᓪᓕ ᐱᖓᓱᑦ ᐊᓂᒍᕐᑎᓪᓗᒋᑦ, ᐊᖑᑎᑦ ᓱᓕ ᐋᓐᓂᐊᑎᓪᓗᒋᑦ ᑭᐱᔭᐅᓂᕕᓂᕐᒥᖕᓄᑦ, ᔧᑰᑉ ᐃᕐᓂᖏᒃ ᒪᕐᕉᒃ, ᓯᒥᐅᓂᓗ ᓕᕔᓗ, ᑍᓇᐅᑉ ᐊᓂᖏᒃ, ᓴᕕᒡᔪᐊᒡᒋᕐᓗᑎᒃ ᐃᒡᓗᒐᓴᖕᓃᑦᑐᑦ ᑎᓪᓕᓐᖏᓈᕐᓗᒋᑦ, ᐊᖑᑎᓕᒫᑦ ᑐᖁᕋᕐᐰᑦ,

²⁶ ᕼᐊᒧᕆ ᐃᕐᓂᖓᓗ ᓯᑭᒻᒥ ᓴᕕᒡᔪᐊᒧᑦ ᑐᖁᑉᐹᒃ, ᑍᓇᓗ ᑎᒍᓪᓗᒍ ᓯᑭᒻᒥᐅᑉ ᐃᒡᓗᖓᓂᑦ, ᑕᕝᕙᓐᖓᓪᓗ ᐊᓂᓪᓗᑎᒃ.

²⁷ ᔧᑰᓪᓕ ᐃᕐᓂᖏᑦ ᑐᖁᑕᐅᓯᒪᔪᓄᐊᕐᐳᑦ, ᑎᒎᖅᑬᕕᒋᓪᓗᒋᓪᓗ ᐃᒡᓗᒐᓴᒡᔪᐊᕐᒥᐅᑦ, ᓇᔭᖓᑦᑕ ᓇᕐᕈᓇᕐᓯᑎᑕᐅᓯᒪᓂᖓᓄᑦ.

²⁸ ᓰᐱᖁᑎᖏᓂᒃ ᐱᕗᑦ, ᐃᒻᒧᒃᓯᐅᒐᖁᑎᖏᓐᓂᒡᓗ, ᓯᐅᑎᖅᑯᕐᑐᔪᓂᒡᓗ ᓱᓇᓕᒫᓂᒡᓗ ᐃᒡᓗᒐᓴᖕᓃᑦᑐᓂᒃ ᐱᕗᑦ ᐱᕈᕐᓰᕕᖕᓃᑦᑐᓂᒡᓗ.

²⁹ ᐊᔪᕐᓴᖏᑦᔪᑎᓕᒫᖏᓐᓂᒃ ᐱᕗᑦ, ᕿᑐᕐᖓᖏᑦ ᓄᓕᐊᖏᓪᓗ ᑎᒍᕔᑦ, ᐃᒡᓗᒥᐅᑕᓕᒫᖏᓪᓗ ᐱᑖᕆᓪᓗᒋᑦ.

³⁰ ᔧᑯᓗ ᐅᖃᕐᐳᖅ ᓯᒥᐅᓂᒧᑦ ᓕᕔᒧᓪᓗ, “ᐊᑲᐅᖏᑦᔪᑎᒃᓴᕐᑖᕐᑎᑉᐸᑦᓯᓐᖓ; ᐆᒥᓇᕐᓯᑎᑦᓱᖓᓗ ᑕᒫᓂ ᓄᓇᖃᕐᑐᓄᑦ ᑬᓇᓂᒥᐅᓄᑦ, ᐱᕆᔧᑎᓄᓪᓗ; ᐅᓄᕐᑐᓂᒃ ᐃᓄᖁᑎᖃᖏᓐᓇᒪ; ᑕᒪᒃᑯᐊᓕ ᑲᑎᓪᓗᑎᒃ ᐅᕙᓐᓄᑦ ᐅᓇᑕᕆᐊᓕᕐᐸᑕ, ᐃᓚᓕᒫᑦᓯᐊᒃᑲ ᑕᒪᕐᒥᒃ ᓄᖑᑕᐅᒐᔭᕐᐳᑦ ᐃᒡᓗᒥᐅᖃᑎᒃᑲᓗ.”

³¹ ᑖᒃᑯᐊᒡᓕ ᑭᐅᕗᒃ, “ᓇᔭᕗᑦ ᓄᓕᐊᒐᑐᐃᓐᓇᕐᑎᑐᑦ ᑍᒤᑕᐅᔭᕆᐊᖃᕐᐹ?”