ᒨᓯᓯ ᓯᕗᓪᓖᑦ 32 - ᐊᒡᓔᑦ ᐃᑦᔪᕐᖕᓁᑦᑐᑦ

ᔧᑰᑉ ᐅᐸᓗᖕᒊᔭᕐᓂᖓ ᐄᓴᒥᒃ ᑲᑎᓯᓂᒃᓴᒥᓂᒃ

¹ ᔧᑯᓗ ᐊᐅᓪᓚᓕᕐᑎᓪᓗᒍ, ᒎᑎᐅᑉ ᐂᖏᓕᖏᓐᓄᑦ ᐅᐸᒃᑕᐅᕗᖅ.

² ᔧᑰᓪᓗ ᑕᑯᒐᒥᒋᑦ ᐅᖃᕐᐳᖅ, “ᐅᑯᐊ ᒎᑎᐅᑉ ᐅᓇᑕᕐᑐᒃᓴᖁᑎᖏᑦ”; ᑍᒤᒻᒪᑦ ᑖᓐᓇ ᐊᑦᓯᕐᐹ ᒪᕼᐊᓁᒥᒃ.

³ ᔧᑯᓗ ᑎᓕᓯᕗᖅ ᓯᕗᓂᕐᒥᓂ ᐅᖃᕆᐊᕐᑐᕐᑐᖃᖁᓪᓗᒍ ᐊᖓᔪᒥᓄᑦ ᐄᓴᒧᑦ ᓄᓇᒧᑦ ᓰᐊᕆᒧᑦ ᐄᑐᒥᒦᑦᑐᒧᑦ.

⁴ ᐃᒫᒡᓗ ᐅᖃᖁᕔᑦ: “ᐊᖓᔪᖅᑳᕋ ᐄᓴ ᐅᖃᐅᑎᓯᐅᒃ; ‘ᔧᑯ ᐱᔩᑦ ᐅᖃᖁᔨᖕᒪᑦ, ᓔᐸᓂᒥ ᐊᑯᓂ ᓇᔫᑎᓚᐅᕋᒪ, ᒫᓐᓇᓕ ᐊᐅᓪᓚᕈᓐᓇᕐᓯᑍᓐᓇᕐᐳᖓ;

⁵ ᐆᒪᔪᖁᑎᖃᕐᐳᖓ ᐃᒻᒧᒃᓯᐅᒐᕐᓂᒃ, ᓯᐅᑎᖅᑯᕐᑐᔪᓂᒡᓗ, ᓰᐱᓂᒡᓗ, ᐱᔨᖃᕐᓗᖓᓗ ᐊᖑᑎᓂᒃ ᐊᕐᓇᓂᒡᓗ; ᐃᓕᖕᓄᑦ ᐅᖃᕆᐊᕐᑐᕐᑎᑦᓯᕗᖓ ᐊᖓᔪᖅᑳᓐᓄᑦ, ᓂᕆᐅᒍᒪᓪᓗᖓ ᖁᕕᐊᒋᔭᐅᓂᕐᒥᒃ.’”

⁶ ᐅᖃᕆᐊᕐᑐᕐᑎᑕᐅᓯᒪᔪᓪᓕ ᔧᑯᒧᑦ ᐅᑎᕋᒥᒃ ᐅᖃᕐᐳᑦ, “ᐊᖓᔪᖕᓄᐊᓚᐅᕐᐳᒍᑦ ᐄᓴᒧᑦ, ᒫᓐᓇᓕ ᑕᒪᐅᓐᖓᐅᓯᕗᖅ ᐃᓕᖕᓄᑦ ᐸᕐᕆᐊᕈᒪᓪᓗᓂ, ᐃᓚᖃᕐᓗᓂ ᐊᖑᑎᓂᒃ 400ᓂᒃ.”

⁷ ᔧᑯᓕ ᑲᑉᐱᐊᓱᒃᑐᐊᓘᓕᕐᐳᖅ ᐃᓱᒪᔮᓕᕐᓗᓂᓗ; ᐃᓚᒋᔭᓕᒫᓂᓗ ᐊᕕᒃᐰᑦ, ᓰᐱᖁᑎᓂᓗ, ᒎᑦᓰᓪᓗ, ᐃᒻᒧᒃᓯᐅᒊᓪᓗ, ᑳᒥᓖᓪᓗᑦᑕᐅᖅ.

⁸ ᐃᓱᒪᖃᓚᐅᕋᒥ, “ᐄᓴ ᑎᑭᒃᑯᓂ ᑐᖁᕅᓯᒃᐸᑦ ᐊᕕᒃᓯᒪᔪᑦ ᐂᑉᐸᖏᓐᓄᑦ, ᑕᕝᕙ ᐂᑉᐸᖏᑦ ᕿᒫᔪᓐᓇᕐᓯᒐᔭᕆᐊᖏᓐᓂᒃ.”

⁹ ᑕᕝᕙ ᔧᑯ ᑐᒃᓯᐊᕐᐳᖅ, “ᐊᑖᑕᒪ ᐂᑉᕋᕼᐋᒻ ᒎᑎᖓ ᐊᑖᑕᒪᓗ ᐂᓴᑭᐅᑉ ᒎᑎᖓ, ᐊᑕᓃᖅ, ᐅᖃᐅᑎᓚᐅᕋᕕᖓ, ‘ᓄᓇᑐᖃᓐᓄᑦ ᐅᑎᕆᑦ ᐃᓚᖕᓄᑦ, ᐱᐅᔪᒥᒡᓗ ᐱᓂᐊᕐᕕᒋᓂᐊᕐᐸᒋᑦ.’

¹⁰ ᓂᑲᒋᔭᒃᓴᐅᖏᒃᑲᓗᐊᕐᑎᓪᓗᖓ ᐱᑦᓯᐊᕐᕕᒋᓯᒪᒐᕕᖓ ᓇᒡᓕᖕᓂᕐᓄᑦ ᓱᖁᓯᔪᐃᑦᑐᒧᑦ, ᑲᔪᓯᑦᓮᓐᓇᕐᓂᕐᓂᒃ ᐱᔩᑦ ᑕᑯᑎᓯᒪᒐᕕᐅᒃ, ᑰᒃ ᔪᐊᕐᑕᓂ ᐃᑳᓚᐅᕐᓯᒪᕙᕋ ᐊᔭᐅᑉᐱᐊᓕᔭᑐᐃᓐᓇᕐᓗᖓ, ᒫᓐᓇᓕ ᐅᑎᓕᕐᐳᖓ ᒪᕐᕈᐃᓕᖓᔪᓂᒃ ᐃᓚᖃᓕᕐᓗᖓ.

¹¹ ᐃᓕᖕᓄᑦ ᑐᒃᓯᐊᕐᐳᖓ, ᓴᐳᑎᔭᐅᔪᒪᓪᓗᖓ, ᐊᖓᔪᓐᓂᑦ ᐄᓴᒥᑦ, ᑲᑉᐱᐊᒋᒐᒃᑯ, ᑲᑉᐱᐊᓱᒃᑲᒪ ᑎᑭᑉᐸᑦ ᐅᕙᓐᓂᒃ ᑐᖁᑦᓯᓂᐊᕋᓱᒋᓪᓗᒍ ᐊᓈᓇᐅᔪᓂᒃ ᕿᑐᕐᖓᖏᓐᓂᒡᓗ.

¹² ᐅᖃᓚᐅᕐᐳᑎᓪᓕ, ‘ᐱᐅᔪᒥᒃ ᐱᓂᐊᕐᕕᒋᓂᐊᕐᐸᒋᑦ, ᑭᖑᕚᒃᓴᑎᓪᓗ ᐃᒪᐅᑉ ᑭᒡᓕᖓᓂ ᓯᐅᕋᕐᑎᑐᑦ ᐅᓄᕐᑎᒋᔪᒫᕐᐳᑦ, ᐃᓄᒋᐊᓗᐊᕐᓂᕐᒧᑦ ᓈᓴᕐᑕᐅᔪᓐᓇᖏᓪᓗᑎᒃ.’”

¹³ ᐅᓐᓄᐊᒥᓗ ᑕᕝᕙᓂ ᓯᓂᒃᑕᓚᐅᕐᐳᖅ, ᓂᕈᐊᕐᓗᓂᓗ ᐱᑯᑎᒥᓂᑦ ᑐᓂᔭᒃᓴᕆᓂᐊᕐᑕᒥᓂᒃ ᐊᖓᔪᒥᓄᑦ ᐄᓴᒧᑦ,

¹⁴ 200ᓂᒃ ᒎᑦᓯᓂᒃ ᐊᕐᓇᓪᓗᖕᓂᒃ, 20ᓂᒡᓗ ᒎᑦᓯᓂᒃ ᐊᖑᓴᓪᓗᕐᓂᒃ, ᓰᐱᓂᒡᓗ ᐊᕐᓇᓪᓗᖕᓂᒃ 200ᓂᒃ, ᓰᐱᓂᒡᓗ ᐊᖑᓴᓪᓗᕐᓂᒃ 20ᓂᒃ,

¹⁵ 30ᓂᒡᓗ ᑳᒥᓕᖕᓂᒃ ᓄᕐᕋᖃᕐᑐᓂᒃ ᓄᕐᕋᖏᓐᓂᒡᓗ, ᐃᒻᒧᒃᓯᐅᒐᕐᓂᒡᓗ 40ᓂᒃ ᐊᕐᓇᓪᓗᖕᓂᒃ, ᐊᖑᓴᓪᓗᖏᓐᓂᖏᓗ 10ᓂᒃ, ᓯᐅᑎᖅᑯᕐᑐᔪᓂᒡᓗ ᐊᕐᓇᓪᓗᖕᓂᒃ 20ᓂᒃ, ᐊᖑᓴᓪᓗᖏᓐᓂᒡᓗ 10ᓂᒃ.

¹⁶ ᐱᔨᓂᓗ ᑲᒪᒋᔭᖃᕐᑎᑉᐰᑦ, ᐊᑐᓂᑦ ᐆᒪᔪᓂᒃ ᐊᑦᔨᒌᓂᒃ ᑲᒪᒋᔭᖃᕐᑎᓪᓗᒋᑦ, ᐅᖃᐅᑎᓪᓗᒋᓪᓗ, “ᓯᕗᓂᓐᓃᓐᓂᐊᕐᐳᓯ, ᑕᒪᒃᑯᐊ ᐃᒻᒥᒎᕐᑐᑦ ᐊᑐᓂᑦ ᐊᑯᓐᓂᖃᐅᕐᑎᓪᓗᒋᑦ.”

¹⁷ ᓯᕗᓪᓕᕐᐹᕐᓗ ᐱᔨᓂ ᑲᒪᔨ ᐅᖃᐅᑎᓪᓗᒍ, “ᐊᖓᔪᒪ ᐄᓴᐅᑉ ᑲᑎᒃᐸᑎᑦ, ᐊᐱᕆᒃᐸᑎᓪᓗ, ‘ᑭᓇᒥᒃ ᐊᖓᔪᖅᑳᖃᕐᐲᑦ? ᓇᒧᓐᖓᐅᕕᓪᓗ? ᑭᐊᓗ ᐆᒪᔪᖁᑎᒋᕔᑦ ᐱᓯᒪᔭᑎᑦ?’

¹⁸ ᐃᒫᒃ ᑭᐅᔪᒫᕐᐳᓯ, ‘ᐅᑯᐊ ᐱᒋᔭᐅᔪᑦ ᐱᔨᖕᓄᑦ ᔧᑯᒧᑦ; ᐅᑯᐊ ᓇᒃᓯᐅᑎᔭᖏᑦ ᐊᖓᔪᖅᑳᒥᓄᑦ ᐄᓴᒧᑦ; ᔧᑯᓗ ᑍᒪ ᑭᖑᓂᑦᓯᐊᑦᑎᓐᓃᑉᐳᖅ.’”

¹⁹ ᐊᒻᒪᑦᑕᐅᖅ ᐱᔨᓂ ᑭᖑᓪᓕᖅ ᑍᒫᑦᓮᓐᓇᖅ ᐅᖃᖁᒋᕚ, ᐱᖓᔪᖓᓪᓗ ᑍᒫᑦᓮᓐᓇᕐᑕᐅᖅ ᐆᒪᔪᓄᑦ ᐃᒻᒥᒍᑦ ᑲᑎᓯᒪᔪᓄᑦ ᑲᒪᔨᓂ ᑕᒪᕐᒥᒃ ᐱᖁᒋᕔᑦ: “ᑍᒫᑦᓮᓐᓇᖅ ᐅᖃᕐᑐᒃᓴᐅᕗᓯ ᐄᓴ ᑲᑎᒍᑦᓯᐅᒃ;

²⁰ ᐃᒤᓕᓗᓯ, ‘ᓱᓕ ᔧᑯ ᐱᔩᑦ ᑭᖑᓂᑦᑎᓐᓃᑉᐳᖅ.’” ᔧᑯ ᐃᓱᒪᖃᓚᐅᕋᒥ, “ᐱᑦᓯᐊᓕᕐᑎᒍᓐᓇᖅᑰᕐᑕᕋ ᑐᓂᕐᕈᑎᓄᑦ ᓯᕗᓂᓐᓃᑦᑐᓄᑦ, ᑭᖑᓂᖓᒍᓪᓗ ᑕᑯᒍᒃᑯ; ᐃᒻᒪᖄ ᐃᓚᓕᐅᕐᓂᐊᕐᐹᖓ.”

²¹ ᑐᓂᕐᕈᑎᖏᑦ ᓯᕗᓪᓕᐅᓪᓗᑎᒃ ᐊᐅᓪᓚᓚᐅᕐᐳᑦ; ᐃᒻᒥᓂᒡᓕ ᐅᓐᓄᐊᒥ ᑕᕝᕙᓂ ᑕᖕᒫᕐᓯᒪᕕᖕᓂ ᓯᓂᒃᑕᕐᐳᖅ.

ᔧᑰᑉ ᐅᓇᑕᖃᑎᖃᕐᓂᖓ ᐱᓂᐅᓪᒥ

²² ᑕᒪᑐᒪᓂ ᐅᓐᓄᐊᒥ ᔧᑯ ᒪᑭᑉᐳᖅ, ᓄᓕᐊᖕᓂᓗ ᒪᕐᕉᒃ, ᐱᔩᖕᓂᓗ ᐊᕐᓈᒃ ᒪᕐᕉᒃ, ᕿᑐᕐᖓᓂᓗ 11ᐅᔪᑦ, ᑰᖕᒥᒃ ᔭᐴᑉ ᑰᖓᓂᒃ ᐃᑳᕐᓯᕗᑦ ᐃᑳᕐᑎᕐᕕᖓᒍᑦ.

²³ ᑖᒃᑯᐊᓗ ᐃᑳᕐᑎᑦᓴᕇᕋᒥᒋᑦ ᑰᑉ ᐊᑭᐊᓄᑦ, ᐱᖁᑎᓕᒫᓂᑦᑕᐅᖅ ᐃᑳᕐᑎᒃᑭᕔᑦ,

²⁴ ᔧᑯᓕ ᕿᒪᒃᑕᐅᓪᓗᓂ, ᐃᓄᑑᓕᓚᐅᕐᐳᖅ. ᑕᕝᕙ ᐊᖑᒻᒥᒃ ᐅᓇᑕᖃᑎᖃᓕᕐᐳᖅ, ᖃᐅᓕᕐᓂᖓᓄᑦ ᑎᑭᓪᓗᒍ.

²⁵ ᑖᓐᓇᓗ ᐊᖑᑦ ᖃᐅᔨᓕᕋᒥ ᓵᓚᖃᕈᓐᓇᖏᓐᓂᕐᒥᓂᒃ, ᔧᑯ ᓯᕝᕕᐊᖓᒍᑦ ᑎᒡᓗᒃᐹ; ᔧᑰᓪᓗ ᓯᕝᕕᐊᖓ ᐱᒡᓗᐃᕗᖅ ᐅᓇᑕᕐᓗᑎᒃ.

²⁶ ᐊᖑᓪᓗ ᐅᖃᕐᐳᖅ, “ᓴᒃᑯᓕᓐᖓ, ᖃᐅᒻᒪᓕᕐᒪᑦ.” ᔧᑰᓪᓗ ᑭᐅᕚ, “ᓴᒃᑯᓐᓂᐊᓐᖏᓚᒋᑦ, ᓮᒻᒪᕐᑎᓐᖏᑐᐊᕈᕕᖓ.”

²⁷ ᐊᖑᑎᐅᓪᓗ ᐊᐱᕆᕚ, “ᑭᓇᐅᕕᑦ?” ᑖᑦᓱᒪ ᑭᐅᕚ, “ᔧᑰᕗᖓ.”

²⁸ ᐊᖑᑎᐅᑉ ᐅᖃᐅᑎᕚ, “ᒫᓐᓇᒥᑦ ᐱᒋᐊᕐᓗᒍ ᔧᑯᒥᒃ ᐊᑎᖃᕐᓂᐊᕈᓐᓃᕐᐳᑎᑦ, ᐃᓴᕆᐊᓕᐅᓂᐊᓕᕐᐳᑎᑦ, ᒎᑎᒥᒃ ᐅᓇᑕᖃᑎᖃᕐᓯᒪᒐᕕᑦ ᓵᓚᖃᕐᓱᑎᑦ ᐃᓄᖕᓂᒡᓗ ᓵᓚᖃᕆᓪᓗᑎᑦ.”

²⁹ ᔧᑰᓪᓗ ᐅᖃᐅᑎᕚ, “ᐅᖃᐅᑎᓚᐅᓐᖓ ᑭᓇᐅᖕᒪᖔᕐᐱᑦ.” ᑖᑦᓱᒪᓕ ᑭᐅᕚ, “ᓱᖕᒪ ᖃᐅᔨᔪᒪᕕᑦ ᑭᓇᐅᖕᒪᖔᕐᒪ?” ᑕᕝᕙᓂᓗ ᔧᑯ ᓮᒻᒪᕐᑎᑉᐹ.

³⁰ ᔧᑰᓪᓗ ᓄᓇ ᑖᓐᓇ ᐊᑦᓯᕐᐹ ᐱᓂᐅᓪᒥᒃ ᐅᖃᕋᒥ, “ᒎᑎ ᑕᑯᓯᒪᕙᕋ ᑮᓇᕐᒥᑦ ᑮᓇᕐᒧᑦ, ᓱᓕᓕ ᐃᓅᓪᓗᖓ.”

³¹ ᓯᕿᓂᕐᓗ ᖁᑦᑎᒃᓯᓚᐅᕐᐳᖅ ᔧᑯ ᑕᕝᕙᓐᖓᑦ ᐱᓄᐃᓕᒥᑦ ᕿᒪᕉᑎᓕᕐᑎᓪᓗᒍ, ᑐᓯᐊᓕᓚᐅᕐᐳᕐᓗ ᓯᕝᕕᐊᓂ ᐱᑦᔪᑎᒋᓪᓗᒍ.

³² ᑍᒤᒻᒪᑦ ᐅᓪᓗᒥᒧᑦ ᑎᑭᓪᓗᒍ ᐃᓴᕆᐊᓕᐅᑉ ᑭᖑᕚᖏᑦ ᓯᕝᕕᐊᑉ ᓴᐅᓂᖓᑕ ᐃᓗᐊᓃᑦᑐᒥᒃ ᓄᑭᖕᒥᒃ ᓂᕆᔪᓐᓇᓐᖏᓚᑦ, ᔧᑯ ᓯᕝᕕᐊᖓᑕ ᐃᑎᕐᓴᖓᑕ ᓄᑭᖓ ᑎᒡᓗᓚᐅᕐᒪᒍ.