ᒨᓯᓯ ᓯᕗᓪᓖᑦ 31 - ᐊᒡᓔᑦ ᐃᑦᔪᕐᖕᓁᑦᑐᑦᔧᑰᑉ ᕿᒫᓂᖓ ᓔᐸᓂᒥᑦ 1 ᔧᑯᓗ ᑐᓴᕐᐳᖅ ᓔᐸᓂᐅᑉ ᐃᕐᓂᖏᑦ ᐅᖃᑲᑕᓕᕐᒪᑕ ᐃᒫᒃ, “ᔧᑯ ᑕᒤᓐᓂᒃ ᐊᑖᑕᑦᑕ ᐱᖁᑎᒋᓐᓂᒃ ᐱᑖᕐᓯᒪᓕᕐᐳᖅ, ᐃᒻᒥᓂᒡᓗ ᐊᔪᕐᓴᕈᓐᓃᕐᑎᓪᓗᓂ ᐊᑖᑕᑦᑕ ᐱᖁᑎᕕᓂᖏᓐᓂᑦ.” 2 ᔧᑯᓗ ᑐᑭᓯᓕᕐᐳᖅ ᓔᐸᓂᐅᑉ ᐱᑦᓯᐊᕐᓂᖓ ᓯᕗᓪᓕᕐᑑᕈᓐᓃᕐᐸᓪᓕᐊᓂᖓᓂᒃ. 3 ᐊᑕᓂᐅᓪᓗ ᔧᑯ ᐅᖃᐅᑎᕚ, “ᓯᕗᓕᕐᐱᑦ ᐃᓚᕕᓪᓗ ᓄᓇᖓᓄᑦ ᐅᑎᓕᕆᑦ, ᐅᕙᖓᓗ ᐃᓚᒋᓂᐊᕐᐸᒋᑦ.” 4 ᑕᕝᕙ ᔧᑯ ᐅᖃᕆᐊᕐᑐᕐᑎᑦᓯᕗᖅ ᕅᒋᓕᒧᑦ ᓕᐊᒧᓪᓗ ᑲᑎᔭᐅᔪᒪᓪᓗᓂ ᓇᑎᕐᓇᖕᒥ ᐆᒪᔪᖁᑎᖏᑕ ᓇᔪᕐᑕᖓᓂ. 5 ᐅᖃᐅᑎᓪᓗᒋᒡᓗ, “ᖃᐅᔨᒪᓕᕋᒪ ᐊᑖᑕᓯᒃ ᐅᕙᓐᓄᑦ ᓯᕗᓂᖓᒍᑦ ᐱᑦᓯᐊᕐᓂᕆᓚᐅᕐᑕᒥᑐᑦ ᑍᒤᑦᑐᓐᓃᕐᓂᖓᓂᒃ; ᐊᑖᑕᒪᓕ ᒎᑎᖓᑕ ᐃᓚᒋᕚᖓ. 6 ᖃᐅᔨᒪᕗᓯᒡᓗ ᐊᑖᑕᓯᓐᓄᑦ ᐱᔨᑦᓯᓚᐅᕋᒪ ᐱᔪᓐᓇᕐᓂᓕᒫᓐᓄᑦ. 7 ᐊᑖᑕᑦᓯᓕ ᓯᓔᕐᕆᓯᒪᕚᖓ ᐊᑭᓕᕐᑕᐅᑦᔪᑎᒃᑲᓗ ᖁᓕᕕᒃᓗᒋᑦ ᐊᓯᑦᔨᕐᓯᒪᕔᑦ, ᒎᑎᐅᓪᓕ ᑖᑦᓱᒪᓐᖓᑦ ᓴᐳᑎᓯᒪᓚᐅᕐᐹᖓ ᖃᓄᐃᓕᔭᐅᖁᓇᖓ. 8 ᓔᐸᓂᓗ ᐅᖃᑐᐊᕐᒪᑦ, ‘ᐆᒪᔪᐃᑦ ᐅᑭᓕᕆᐊᑦ ᑕᕝᕙ ᐊᑭᓕᕐᑕᐅᑦᔪᑎᒃᓴᕆᕙᑎᑦ,’ ᑕᕝᕙ ᐆᒪᔪᖁᑎᓕᒫᖏᑦ ᕿᑐᕐᖏᐅᓕᓚᐅᕐᐳᑦ ᐅᑭᓕᕆᐊᓂᒃ; ᐊᒻᒪ ᐅᖃᕐᒥᖕᒪᑦ, ‘ᐆᒪᔪᐃᓪᓗ ᖁᐱᓴᕈᐊᑦᑐᓂᒃ ᑕᕐᓴᓖᑦ ᑖᒃᑯᐊ ᐊᑭᓕᕐᑕᐅᑦᔪᑎᒃᓴᕆᕙᑎᑦ,’ ᑕᕝᕙ ᑕᒪᕐᒥᒃ ᐆᒪᔪᖁᑎᖏᑦ ᕿᑐᕐᖏᐅᓕᓚᐅᕆᕗᑦ ᖁᐱᓴᕈᐊᑦᑐᓂᒃ ᑕᕐᓴᓕᖕᓂᒃ. 9 ᑍᒫᒃ ᑕᕝᕙ ᐊᑖᑕᑦᓯᒃ ᒎᑎᐅᑉ ᐊᕐᓵᕐᓯᒪᕚ ᐆᒪᔪᖁᑎᖏᓐᓂᒃ ᑐᓂᓪᓗᒋᓪᓗ ᐅᕙᓐᓄᑦ. 10 “ᐆᒪᔪᐃᓪᓗ ᓄᓕᐊᓕᕐᕕᖏᑦ ᓇᓪᓕᐅᑎᓯᒪᓕᕐᑎᓪᓗᒋᑦ ᓯᓐᓇᒃᑑᒪᓂᒃᑯᑦ ᑕᑯᓴᓚᐅᕐᐳᖓ, ᑕᑯᓪᓗᖓᓗ ᒎᑦᓯᐅᑉ ᐊᖑᓴᓪᓗᖓᓂᒃ ᓄᓕᐊᕐᑐᒥᒃ ᖁᐱᓴᕈᐊᑦᑐᒥᒃ ᑕᕐᓴᓕᖕᒥᒃ, ᐅᑭᓕᕆᐊᒃᑐᒥᒡᓗ, ᑕᕐᓴᒐᓛᕐᑐᒥᒡᓗ. 11 ᒎᑎᐅᓪᓗ ᐂᖏᓕᖓᑕ ᐅᖃᐅᑎᕚᖓ ᓯᓐᓇᕐᑑᒪᑎᓪᓗᖓ, ‘ᔧᑰ!’ ᑭᐅᕙᕋᓗ, ‘ᒫᓃᑉᐳᖓ.’ 12 ᐅᖃᐅᑎᕚᖓᓗ, ‘ᑕᑯᓴᕐᓗᑎᑦ ᑕᑯᓕᕆᑦ, ᐊᖑᓴᓪᓗᐃᑦ ᒎᑦᓰᑦ ᓄᓕᐊᕐᑐᑦ ᒥᖅᑯᖏᑦ ᖁᐱᓴᕈᐊᑦᑑᕗᑦ, ᐅᑭᓕᕆᐊᒃᓗᑎᒡᓗ, ᑕᕐᓴᒐᓛᒃᓗᑎᒡᓗ; ᑕᒪᓐᓇᓗ ᑍᒤᑎᓯᒪᕙᕋ ᑕᑯᓯᒪᒐᒪ ᓔᐸᓂᐅᑉ ᐃᓕᖕᓄᑦ ᖃᓄᐃᓕᐅᕐᓂᖓᓂᒃ. 13 ᐅᕙᖓ ᒎᑎᐅᕗᖓ ᐱᑎᓕᒥ, ᑕᕝᕙᓂ ᐅᔭᕋᒃ ᒥᖑᐊᓚᐅᕋᕕᐅᒃ ᓇᐹᕐᑑᑉ ᐅᕐᓱᖓᓂᒃ ᐃᖅᑲᐅᒪᑦᔪᑎᒃᓴᐅᖁᓪᓗᒍ ᑕᕝᕙᓂᓗ ᐅᖃᕕᓚᐅᕐᐳᑎᑦ ᐅᕙᓐᓄᑦ. ᑍᒤᒻᒪᑦ ᐸᕐᓇᓕᕆᑦ ᐅᑎᓕᕐᓗᑎᓪᓗ ᓄᓇᒧᑦ ᐃᓅᕕᒋᓚᐅᕐᑕᕐᓄᑦ.’” 14 ᑕᕝᕙ ᕅᒋᓕᐅᑉ ᓕᐊᓪᓗ ᑭᐅᕚᒃ, “ᐊᑖᑕᑦᑕ ᐱᖁᑎᖏᓐᓂᑦ ᐱᔭᒃᓴᑦᑎᓐᓂᒃ ᑭᖑᕐᖑᑎᔭᒃᓴᑦᑎᓐᓂᒡᓘᓐᓃᑦ ᓱᓕ ᐱᔭᒃᓴᖃᕐᐱᑖ? 15 ᑖᑦᓱᒪᓗ ᐃᓚᒋᓐᖏᑕᒥᑐᑦ ᑕᑯᓐᓇᓕᓐᖏᓛᑎᒎᑦ? ᓂᐅᕐᕈᑎᒋᓚᐅᕋᒥᑎᒃᑯᒃ, ᐅᕙᑦᑎᓐᓄᓪᓗ ᐊᑭᓕᐅᑕᐅᓯᒪᔪᑦ ᑮᓇᐅᔧᑦ ᑕᒪᕐᒥᒃ ᓄᖑᓯᒪᓕᕐᐰᑦ. 16 ᑕᒪᒃᑯᐊᓕ ᐊᒃᓗᐃᑦᔪᑏᑦ ᒎᑎᐅᑉ ᐊᑖᑕᑦᑎᓐᓂᒃ ᐊᕐᓵᕐᓯᑦᔪᑎᒋᓚᐅᕐᒪᒋᑦ ᐅᕙᒍᑦ ᕿᑐᕐᖓᑦᑕᓗ ᐱᒋᕙᕗᑦ; ᒫᓐᓇᓕ ᖃᓄᑐᐃᓐᓇᖅ ᐱᓇᓱᐊᓕᕆᑦ ᒎᑎᒧᑦ ᐅᖃᐅᑦᔭᐅᓃᑦ ᒪᓕᒡᓗᒍ.” 17 ᑕᕝᕙ ᔧᑯ ᐸᕐᓇᓕᕐᐳᖅ, ᕿᑐᕐᖓᓂᓗ ᓄᓕᐊᓂᓗ ᑳᒥᓕᖕᒧᑦ ᐃᑭᑎᓪᓗᒋᑦ; 18 ᐆᒪᔪᖁᑎᓂᓗ ᑕᒪᕐᒥᒃ ᐱᖁᑎᓕᒫᓂᓗ ᑕᒪᕐᒥᒃ ᐱᑖᕆᓚᐅᕐᑕᓂ ᐸᑖᓐ-ᐊᕌᒥᒥᑦ ᓇᒃᓴᕐᓗᒋᑦ, ᐃᖏᕐᕋᓯᕗᑦ ᐂᔪᒪᓪᓗᓂ ᑬᓇᓂᒧᑦ ᐊᑖᑕᖓᑕ ᐂᓴᑭᐅᑉ ᓄᓇᖓᓄᑦ. 19 ᓔᐸᓂᓕ ᓰᐱᖁᑎᒥᓂᒃ ᕿᐅᕐᑍᔭᕐᑐᕐᓯᒪᑎᓪᓗᒍ, ᕅᒋᓕᐅᑉ ᐊᑖᑕᖓᑕ ᐃᒡᓗᒥᓂ ᒎᑎᓐᖑᐊᖁᑎᖏᑦ ᑎᒡᓕᒐᕆᕔᑦ. 20 ᔧᑰᓪᓕ ᓔᐸᓂ ᐊᕋᒥᐊᒥᐅᑕᖅ ᓯᓔᕐᕆᓚᐅᕐᐹ ᐅᖃᐅᑎᓚᐅᖏᒻᒪᒍ ᕿᒫᓇᓱᐊᕐᓂᕐᒥᓂᒃ. 21 ᐱᖁᑎᓕᒫᓂᓗ ᓇᒃᓴᕐᓗᒋᑦ ᕿᒫᓪᓗᓂ ᐊᐅᓪᓚᕐᐳᖅ, ᑰᒃ ᐃᕗᕅᑎ ᐃᑳᕐᓗᓂᐅᒃ, ᖃᖅᑲᓕᖕᒧᑦ ᒋᓕᐊᑎᒥᒃ ᐊᑎᓕᖕᓄᑦ ᑐᕌᕐᓗᓂ. ᓔᐸᓂᐅᑉ ᒪᓕᒃᓴᕐᓂᖓ ᔧᑯᒥᒃ 22 ᐅᓪᓗᐃᑦ ᐱᖓᓱᑦ ᐊᓂᒍᕐᑎᓪᓗᒋᑦ ᓔᐸᓂ ᐅᖃᐅᑦᔭᐅᓕᕐᐳᖅ ᔧᑰᑉ ᕿᒫᓂᖓᓂᒃ. 23 ᐃᓚᓂᓗ ᐊᖑᑎᑦ ᐃᓚᒋᓪᓗᒋᑦ ᔧᑯᒥᒃ ᒪᓕᒃᓴᕐᐳᑦ ᐅᓪᓗᓂᒃ 7ᓂᒃ ᒪᓕᒃᐹᑦ ᐊᖑᓕᕐᓗᒋᓪᓗ ᒋᓕᐊᑎᐅᑉ ᐱᖑᖏᓐᓃᓕᕐᑎᓪᓗᒋᑦ. 24 ᒎᑎᐅᓪᓕ ᓔᐸᓂ ᐊᕋᒥᐊᒥᐅᑕᖅ ᓴᖅᑭᕝᕕᒋᕚ ᓯᓐᓇᒃᑑᒪᒃᑯᑦ ᐅᓐᓄᐊᒥ, ᐅᖃᐅᑎᓪᓗᒍᓗ, “ᐃᒃᐱᒍᓱᑦᓯᐊᕆᑦ ᔧᑯ ᐅᖃᐅᑎᓂᐊᕐᓇᒍ, ᓯᕘᕋᓇᕐᑐᒥᒃ.” 25 ᓔᐸᓂᐅᓪᓕ ᔧᑯ ᐊᖑᕚ, ᑕᖕᒫᕐᓯᒪᑎᓪᓗᒍ ᐱᖑᖃᕐᑐᒥ, ᓔᐸᓂᓗ ᑕᖕᒫᓚᐅᕐᐳᖅ ᐃᓚᓂ ᐃᓚᒋᓪᓗᒋᑦ ᒋᓕᐊᑎᒥ ᐱᖑᖃᕐᑐᒥ. 26 ᓔᐸᓂᓗ ᐅᖃᕐᐳᖅ ᔧᑯᒧᑦ, “ᓱᖕᒪᑦ ᐅᐃᕕᕆᓚᐅᕐᐱᖔ? ᐸᓃᒃᑲᒡᓗ ᐊᐅᓪᓚᕈᑎᓪᓗᒋᒃ ᐅᓇᑕᕐᑐᓂ ᓵᓚᖃᕐᑐᑐᑦ? 27 ᓱᖕᒪᑦ ᐊᓐᖏᒍᑦᔨᓪᓗᑎᑦ ᕿᒫᕕᑦ, ᐅᐃᕕᕆᓪᓗᖓᓗ, ᐅᕙᓐᓄᑦ ᐅᖃᓚᐅᕋᑎᑦ, ᐊᐅᓪᓚᕐᑎᒐᔭᓚᐅᕐᐸᒋᑦ ᖁᕕᐊᓱᖃᑎᒌᒡᓗᑕ ᐃᓐᖏᕐᓗᑕᓗ ᓂᑦᔭᐅᓯᔭᕐᓗᑕ ᐊᕕᓗᕋᐅᑎᓄᑦ ᓄᖃᕐᑎᓕᖕᓄᓪᓗ. 28 ᐱᕕᖃᕐᑎᓚᐅᖏᓐᓇᕕᖓᓗ ᐃᕐᖑᑕᒃᑲᓘᓐᓃᑦ ᐸᓂᒃᑲᓗ ᑯᓂᓚᐅᓐᖏᓚᒃᑲ ᑕᕝᕙᐅᕗᑏᕐᓗᒋᑦ, ᑍᒤᓕᐅᕐᓗᑎᑦ ᓯᓔᑦᑐᐊᓗᖕᒥᒃ ᐱᓂᐊᓚᐅᕐᐳᑎᑦ. 29 ᐱᔪᓐᓇᕐᓂᖃᕋᓗᐊᕐᐳᖓ ᖃᓄᐃᓕᐅᕈᓐᓇᕐᓗᑎᑦ; ᐅᓐᓄᐊᕐᓕ ᐊᑖᑕᕕᑦ ᒎᑎᖓ ᐅᕙᓐᓄᑦ ᐅᖃᓚᐅᕐᐳᖅ, ᐅᖃᕐᓗᓂ, ‘ᐃᒃᐱᒍᓱᑦᓯᐊᕆᑦ ᔧᑯ ᐅᖃᐅᑎᓂᐊᕐᓇᒍ ᓯᕘᕋᓇᕐᑐᒥᒃ.’ 30 ᐊᐅᓪᓚᓚᐅᕋᕕᓪᓕ ᐊᖏᕐᕋᕐᓯᕐᓂᕐᒧᑦ ᐊᑖᑕᕕᑦ ᓄᓇᖓᓄᑦ, ᓱᖕᒪᓪᓕ ᐃᒡᓗᑦᑎᓐᓂ ᒎᑎᓐᖑᐊᖁᑎᒃᑲ ᑎᒡᓕᒐᕆᓚᐅᕐᐱᒌᑦ?” 31 ᔧᑰᑉ ᓔᐸᓂ ᑭᐅᕚ, “ᓯᕘᕋᓚᐅᕋᒪ, ᐃᓱᒪᓪᓗᖓ ᐸᓂᖕᓂᒃ ᐊᕐᓵᑕᐅᓂᐊᕋᓱᒋᓪᓗᖓ ᐅᓇᑕᕐᓂᒃᑯᑦ. 32 ᓇᓂᓯᒍᕕᑦ ᒎᑎᓐᖑᐊᖁᑎᖕᓂᒃ ᐱᓯᒪᔪᒥᒃ, ᑖᓐᓇ ᐃᓅᑎᑕᐅᓂᐊᓐᖏᓚᖅ, ᐅᑯᐊ ᐃᓚᕗᑦ ᑕᑯᓐᓇᕐᑎᓪᓗᒋᑦ, ᐱᓯᒪᔭᓐᓂᒃ ᐱᖁᑎᖕᓂᒃ ᕿᓂᓕᕆᑦ, ᓇᓂᓯᒍᕕᓪᓗ ᑎᒍᓂᐊᕐᐸᑎᑦ.” ᔧᑯ ᖃᐅᔨᒪᓚᐅᖏᒻᒪᑦ ᕅᒋᓕᐅᑉ ᑎᒡᓕᒃᓯᒪᓂᖓᓂᒃ. 33 ᑕᕝᕙ ᓔᐸᓂ ᔧᑰᑉ ᑐᐱᖓᓄᐊᕐᐳᖅ ᕿᓂᕆᐊᕐᓗᓂ; ᐊᒻᒪ ᓕᐊᑉ ᑐᐱᖓᓂ, ᐊᒻᒪ ᑖᒃᑯᐊᒃ ᐊᕐᓈᒃ ᐱᔩᒃ ᑐᐱᖏᖕᓂ, ᓇᓂᓯᓚᐅᓐᖏᓚᕐᓕ, ᓕᐊᑉ ᑐᐱᖓᓂᑦ ᐊᓂᒐᒥ, ᕅᒋᓕᐅᑉ ᑐᐱᖓᓄᐊᓚᐅᕆᕗᖅ. 34 ᕅᒋᓕᐅᓪᓕ ᒎᑎᓐᖑᐊᑦ ᐃᔨᕐᓯᒪᓚᐅᕐᐰᑦ ᑳᒥᓕᐅᑉ ᐃᑭᒪᕕᖓᓄᑦ, ᖄᖓᓂᓗ ᐃᒃᓯᕚᕐᓗᓂ. ᓔᐸᓂᓗ ᑐᐱᐅᑉ ᐃᓗᓕᒫᖓ ᕿᓂᓚᐅᕐᐹ, ᓇᓂᓯᓚᐅᓐᖏᓚᕐᓕ. 35 ᕅᒋᓕᓗ ᐅᖃᕐᐳᖅ ᐊᑖᑕᒥᓄᑦ, “ᓂᓐᖓᐅᑎᑦᑍᓕᓐᖓ, ᐊᑖᑖᒃ, ᑕᕝᕙᓃᑎᓪᓗᑎᑦ ᓂᑯᕕᒍᓐᓇᖏᓐᓇᒪ; ᒫᓐᓇ ᐊᐅᓈᕋᒪ.” ᓔᐸᓂᓕ ᕿᓂᓚᐅᕋᓗᐊᕐᐳᖅ ᓇᓂᓯᓇᓂᓕ ᒎᑎᓐᖑᐊᖁᑎᒥᓂᒃ. 36 ᔧᑯ ᑕᕝᕙ ᓂᓐᖓᒡᓗᓂ ᓱᐊᖓᓕᕐᐳᖅ ᓔᐸᓂᒧᑦ, “ᓱᓇᒥᒃ ᐱᕋᔭᒃᓯᒪᒐᒪ? ᓱᓇᒥᒡᓗ ᐱᐅᖏᑦᑐᓕᓯᒪᒐᒪ ᐊᒃᓱᕈᕐᓗᑎᑦ ᒪᓕᓚᐅᕐᐱᖓ? 37 ᐱᖁᑎᓕᒫᒃᑲ ᕿᓂᕐᓯᒪᒐᕕᒋᑦ, ᓱᓇᒥᒡᓕ ᐃᒡᓗᒥᐅᑕᕐᓂᒃ ᓇᓂᓯᓯᒪᕖᑦ? ᐊᑏ ᑕᒪᒃᑯᐊ ᒪᐅᖓ ᓴᖅᑭᓚᐅᒃᑭᑦ ᐃᓚᒋᔭᕐᓄᑦ ᐃᓚᒋᔭᓐᓄᓪᓗ ᑕᒤᓐᓄᑦ ᑕᑯᔭᐅᓂᐊᕐᒪᑕ, ᐃᓚᕗᒃ ᑐᑭᑖᕐᓂᐊᕐᒪᑕ ᓇᓕᑦᑎᓐᓄᑦ ᐱᒋᔭᐅᖕᒪᖔᑕ. 38 ᐊᕐᕌᒍᓂᒃ 20ᓂᒃ ᐃᓕᖕᓃᓯᒪᓕᕋᒪ; ᓰᐱᖁᑎᑎᑦ ᒎᑦᓯᖁᑎᑎᓪᓗ ᐃᕐᓂᐊᕐᓗᒃᑐᖃᓚᐅᓐᖏᓚᑦ, ᓰᐱᖁᑎᕕᓪᓗ ᐊᖑᓴᓪᓗᖏᓐᓂᒃ ᓂᕆᓚᐅᕐᓯᒪᓐᖏᓚᖓ. 39 ᐆᒪᔪᓂᒃ ᓄᔪᐊᕐᑕᓄᑦ ᐅᒋᐊᕐᑕᐅᔪᖃᕌᖓᑦ, ᐃᓕᖕᓂᑦ ᐱᔭᐅᓂᕋᕐᐸᓚᐅᓐᖏᓚᒃᑲ; ᓇᖕᒥᓂᕐᓕ ᐊᓯᐅᔨᑦᔪᑎᒋᖃᑦᑕᓚᐅᕐᐸᒃᑲ; ᐅᕙᓐᓂᓪᓗ ᑕᒪᒃᑯᓂᖓ ᐊᑭᓕᕐᑕᐅᖁᖃᑦᑕᓚᐅᕐᐸᑎᑦ, ᑎᒡᓕᒃᑕᐅᔪᖃᕐᓂᕐᐸᑦ ᐅᓪᓗᒃᑯᑦ ᐅᓐᓄᐊᒃᑯᓪᓘᓐᓃᑦ. 40 ᐃᒤᑉᐸᓚᐅᕐᐳᖓ ᐅᓪᓗᒃᑯᑦ ᐅᖅᑰᓗᐊᕐᐸᒃᓱᖓ, ᐅᓐᓄᐊᒃᑯᓪᓗ ᕿᐅᔭᕙᒃᓱᖓ, ᓯᓂᒍᓐᓁᓪᓕᖅᑲᕙᒃᓱᖓᓗ. 41 ᐊᕐᕌᒍᑦ ᐊᕙᑎᑦ ᓈᓪᓗᒋᑦ ᐃᓕᑦᓯᓐᓂᒥᐅᑕᐅᓚᐅᕐᐳᖓ; ᐊᕐᕌᒍᓂᒡᓗ 14ᓂᒃ ᐃᓕᖕᓂᒃ ᐱᔨᑦᓯᓚᐅᕐᐳᖓ ᐸᓃᖕᓂᒃ ᒪᕐᕉᖕᓂᒃ ᐊᑭᓕᕐᑕᐅᑦᔪᑎᖃᕈᒪᓪᓗᖓ, ᐊᕐᕌᒍᓂᒡᓗ ᐱᖓᓲᔪᕐᑐᓂᒃ ᐱᔨᑦᓯᓚᐅᕆᕗᖓ ᐆᒪᔪᖁᑎᖕᓂᒃ ᐱᑖᕈᓐᓇᖁᓪᓗᖓ, ᓱᓕ ᐊᑭᓕᕐᑕᐅᑦᔪᑎᒃᓴᒃᑲ ᖁᓕᕕᒃᓗᒋᑦ ᐊᓯᑦᔨᖃᑦᑕᓚᐅᕐᐸᑎᑦ. 42 ᓯᕗᓕᕐᒪᓕ ᒎᑎᖓᑕ, ᐂᑉᕋᕼᐋᒻ ᒎᑎᖓᑕ ᐂᓴᑭᐅᓪᓗ ᓯᕘᕋᒋᔭᖓᑕ, ᐃᓚᒋᓚᐅᖏᑉᐸᖓ, ᐊᐅᓪᓚᕐᑎᓯᒪᓕᕋᔭᕐᐸᕐᒪ ᓱᓇᖃᖏᑦᓯᐊᕐᓗᖓ, ᒎᑎᐅᓪᓕ ᓯᕐᓕᕿᓇᕐᑐᒃᑰᕐᓯᒪᓂᒃᑲ ᐊᒃᓱᕈᕐᓗᖓᓗ ᐱᓇᓱᐊᕐᓯᒪᓂᒃᑲ ᑕᑯᓐᓇᕋᒥᒋᑦ, ᑕᕝᕙ ᐅᓐᓄᐊᖅ ᐃᓂᕐᑎᓚᐅᕐᐹᑎᑦ.” ᔧᑰᓪᓗ ᓔᐸᓂᐅᓪᓗ ᐊᖏᖃᑎᒌᖕᓂᖏᒃ 43 ᓔᐸᓂᐅᑉ ᔧᑯ ᑭᐅᕚ, “ᐅᑯᐊᒃ ᐊᕐᓈᒃ ᐸᓂᒋᕚᒃᑲᒃ; ᕿᑐᕐᖓᖏᓪᓗ ᐱᒋᕙᒃᑲ, ᐅᑯᐊᓗ ᐆᒪᔪᑦ ᐆᒪᔪᖁᑎᒋᕙᒃᑲ, ᑕᑯᔭᑎᓪᓗ ᑕᒪᕐᒥᒃ ᑕᒪᒃᑯᐊ ᐱᖁᑎᒋᕙᒃᑲ, ᐅᓪᓗᒥᓕ ᖃᓄᐃᓕᐅᕆᐊᖃᓕᕐᐳᖓ ᐸᓂᓐᓄᑦ ᐅᑯᓄᖓ ᕿᑐᕐᖓᖏᓐᓄᓪᓗ ᐃᕐᓂᐊᕆᓚᐅᕐᑕᖏᓐᓄᑦ? 44 ᐊᑏ ᐊᖏᖃᑎᒌᒍᑎᓕᐅᓚᐅᕐᓗᒃ ᐅᕙᑦᑎᖕᓄᑦ; ᓇᓗᓁᒃᑯᑕᓕᐅᕐᓗᓄᒡᓗ.” 45 ᑕᕝᕙ ᔧᑯ ᐅᔭᕋᖕᒥᒃ ᓇᑉᐸᕐᓯᕗᖅ ᓇᓗᓁᒃᑯᑕᓕᐅᕐᓗᓂ. 46 ᔧᑰᓪᓗ ᐃᓅᖃᑎᓂ ᐅᖃᐅᑎᕔᑦ, “ᐅᔭᕋᖕᓂᒃ ᑲᑎᑦᓯᒋᑦᓯ.” ᑕᕝᕙ ᐅᔭᕋᖕᓂᒃ ᑲᑎᑦᓯᕗᑦ ᖃᓕᕇᓕᑎᓪᓗᒋᑦ, ᑖᑦᓱᒪᓗ ᓴᓂᐊᓂ ᑕᕝᕙ ᓂᕆᖃᑎᒌᓕᕐᐳᑦ. 47 ᑖᓐᓇᓗ ᓔᐸᓂᐅᑉ ᑍᕚ ᔨᒐᕐ-ᓴᕼᐊᑐᑕᒥᒃ; ᔧᑰᓪᓕ ᑍᕚ ᒐᓖᑎᒥᒃ. 48 ᓔᐸᓂᓗ ᐅᖃᕐᐳᖅ ᔧᑯᒧᑦ, “ᐅᑯᐊ ᐅᔭᕅᑦ ᖃᓕᕇᑦ ᐳᕐᑐᓯᓯᒪᔪᑦ ᐅᓪᓗᒥᒥᑦ ᓇᓗᓁᒃᑯᑕᐅᓂᐊᕐᐳᑦ ᐃᓕᖕᓄᑦ ᐅᕙᓐᓄᓪᓗ.” ᑍᒤᒻᒪᑦ ᐊᑦᑎᕐᑕᐅᓚᐅᕐᐳᖅ ᒐᓖᑎᒥᒃ. 49 ᐅᔭᕋᒡᓗ ᓇᐸᔪᖅ ᐊᑎᖃᕆᕗᖅ ᒥᑦᔨᐸᒥᒃ, ᓔᐸᓂᓗ ᐅᖃᒃᑲᓐᓂᕐᐳᖅ, “ᐊᑕᓂᐅᑉ ᑲᒪᒋᓕᑎᒍᒃ ᐊᑐᓂᑦ ᐊᕕᓯᒪᓕᕐᑎᓪᓗᓄᒃ. 50 ᐸᓃᒃᑲᒃ ᐱᑦᓯᐊᖏᒃᑯᕕᒋᒃ ᐅᕝᕙᓗ ᐊᓯᖏᖕᓂᒃ ᓄᓕᐊᓂᒃᑯᕕᑦ, ᖃᐅᔨᔭᐅᖏᒃᑲᓗᐊᕈᕕᑦ, ᐃᖅᑲᐅᒪᒋᑦ, ᒎᑎ ᐅᕙᑦᑎᖕᓂᒃ ᑕᑯᓐᓇᕐᒪᑦ.” 51 ᑕᕝᕙ ᓔᐸᓂ ᔧᑯᒧᑦ ᐅᖃᕐᐳᖅ, “ᑕᑯᒃᑭᑦ ᐅᑯᐊ ᐅᔭᕅᑦ ᖃᓕᕇᒃᑎᓯᒪᔭᕗᑦ, ᐅᓇᓗ ᐅᔭᕋᒃ ᓇᐸᔪᖅ ᓇᓗᓁᕐᓯᖕᒥᔪᖅ ᐃᓕᖕᓄᑦ ᐅᕙᓐᓄᓪᓗ. 52 ᐅᑯᐊ ᐅᔭᕅᑦ ᖃᓕᕇᑦ ᓇᓗᓁᒃᑯᑍᑦ, ᐅᔭᕋᒡᓗ ᓇᑉᐸᕐᑎᓯᒪᔭᕗᑦ ᓇᓗᓁᕐᓯᔪᑦ ᖄᖏᕆᐊᖃᕐᓂᐊᓐᖏᓚᒃᑲ ᐃᓕᑦᓯᓐᓄᐊᕐᓗᖓ, ᐃᕕᓪᓗᑦᑕᐅᖅ ᖄᖏᕆᐊᖃᕐᓂᐊᖏᒻᒥᔭᑎᑦ ᐅᕝᕙᓐᓄᐊᕐᓗᑎᑦ, ᐅᓇᑕᕆᐊᕐᓂᕐᒧᑦ. 53 ᐂᑉᕋᕼᐋᒻ ᒎᑎᖓ ᓇᕼᐅᕆᐅᓪᓗ ᒎᑎᖓ, ᐊᑖᑕᕕᓂᖏᑕᓗ ᒎᑎᖓ, ᐅᕙᑦᑎᓐᓂᒃ ᖃᐅᔨᓴᕐᑎᐅᓂᐊᕐᐳᖅ ᑕᒪᑐᒥᖓ.” ᑕᕝᕙ ᔧᑯ ᐊᖏᒻᒪᕆᒃᐳᖅ ᐊᑖᑕᖓᑕ ᐂᓴᑭᐅᑉ ᒎᑎᖓᑕ ᐊᑎᖓᓂ. 54 ᔧᑯᓗ ᐆᒪᔪᒥᒃ ᑐᓂᕐᕈᑎᖃᕐᐳᖅ ᑐᓂᕐᕈᓯᕈᑎᒋᓪᓗᒍ ᖃᖅᑲᒥ, ᐃᓚᓂᓗ ᕾᖁᕔᑦ ᓂᕆᑲᑎᒌᒃᓗᑎᒡᓗ; ᓂᕆᔭᕇᕋᒥᒡᓗ, ᑕᕝᕙᓂ ᖃᖅᑲᒥ ᓯᓂᒃᑕᓚᐅᕐᐳᑦ. 55 ᖃᐅᑎᓪᓗᒍᓕ ᐅᓪᓛᒻᒪᕆᒃᑯᑦ ᓔᐸᓂᐅᑉ ᐃᕐᖑᑕᓂ ᐸᓂᓂᓗ ᑯᓂᒃᐰᑦ ᓮᒻᒪᕐᑎᓪᓗᒋᓪᓗ; ᑕᕝᕙᓐᖓᓪᓗ ᐊᐅᓪᓚᓯᕗᖅ ᐊᖏᕐᕋᐅᓕᕐᓗᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society