ᒨᓯᓯ ᓯᕗᓪᓖᑦ 30 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᕅᒋᓕᓕ ᕿᑐᕐᖓᕐᑖᕐᓚᐅᓐᒋᓚᖅ ᔧᑯᒥᑦ, ᑭᖑᓂᖓᒍᓪᓗ ᐊᖓᔪᓂ ᓯᒡᒐᑎᓕᕐᐹ ᔧᑯᒧᓪᓗ ᐅᖃᕐᓗᓂ, “ᕿᑐᕐᖓᕐᑖᕐᑎᓚᐅᓐᖓ, ᕿᑐᕐᖓᕐᑖᖏᒃᑯᒪ ᑐᖁᑐᐃᓐᓇᖔᕈᒪᓕᕐᐳᖓ.”

² ᔧᑯᓗ ᓂᓐᖓᒃᐳᖅ ᕅᒋᓕᒧᑦ ᐅᖃᕐᓗᓂᓗ, “ᒎᑎᐅᑉ ᐃᓂᖓᓃᑉᐳᖔ? ᑖᑦᓱᒪ ᑭᓯᒥ ᕿᑐᕐᖓᕐᑖᕐᑎᑦᓯᒪᓐᖏᓛᑎᑦ?”

³ ᕅᒋᓕᓗ ᐅᖃᕐᐳᖅ, “ᐅᓇ ᐱᔨᒐ ᐱᓪᕼᐊ; ᑐᑎᓚᐅᕈᒃ, ᐅᕙᓐᓂᒃ ᕿᑐᕐᖓᕐᑖᕐᑎᑦᓯᔪᓐᓇᖁᓪᓗᒍ, ᑕᕝᕙ ᕿᑐᕐᖓᕐᑖᕐᓂᐊᕐᐳᖓ ᑖᑦᓱᒨᓇ.”

⁴ ᑍᒤᒻᒪᑦ ᐱᔨᓂ ᐱᓪᕼᐊ ᑐᓂᕚ ᐅᐃᒥᓄᑦ ᓄᓕᐊᕆᔭᐅᖁᓪᓗᒍ; ᔧᑰᓪᓗ ᐃᓐᓇᖓᖃᑎᒋᕚ.

⁵ ᐱᓪᕼᐊᓗ ᓯᖎᓕᕐᐳᖅ ᔧᑯᒥᑦ ᐃᕐᓂᕐᑖᕐᓗᓂᓗ.

⁶ ᕅᒋᓕᓗ ᐅᖃᕐᐳᖅ, “ᒎᑎᐅᑉ ᓈᒻᒪᒋᔭᓐᓂᒃ ᐱᓂᐊᕐᕕᒋᕚᖓ; ᑐᒃᓯᐊᕐᓂᓐᓂᒡᓗ ᑐᓴᕐᓯᒪᕚᖓ ᐃᕐᓂᕐᑖᕐᑎᓪᓗᓂᖓᓗ”; ᑍᒤᒻᒪᑦ ᐊᑦᓯᕐᐹ ᑖᓐᒥᒃ.

⁷ ᕅᒋᓕᐅᓪᓗ ᐱᔨᖓ ᐱᓪᕼᐊ ᓯᖎᓕᒃᑲᓐᓂᕐᐳᖅ ᔧᑯᒥᑦ ᐃᕐᓂᕐᑖᒃᑲᓐᓂᕐᓗᓂᓗ,

⁸ ᕅᒋᓕᓗ ᐅᖃᕐᐳᖅ, “ᐊᒃᓱᕈᒻᒪᕆᒃᓗᖓ ᐊᖓᔪᓐᓂᒃ ᐅᓇᑕᕆᐊᖃᓚᐅᕋᒪ, ᒫᓐᓇᓕ ᓵᓚᖃᕐᐳᖓ”; ᑍᒤᒻᒪᑦ ᐊᑦᓯᕐᐹ ᓈᑉᑕᓕᒥᒃ.

⁹ ᓕᐊᓕ ᖃᐅᔨᓕᕋᒥ ᕿᑐᕐᖓᕐᑖᒃᑲᓐᓂᕈᓐᓃᕐᓂᕐᒥᓂᒃ, ᐱᔨᓂ ᔨᐅᓪᐸ ᑐᓂᕚ ᔧᑯᒧᑦ ᓄᓕᐊᕆᔭᐅᖁᓪᓗᒍ.

¹⁰ ᑕᕝᕙ ᓕᐊᑉ ᐱᔨᖓ ᔨᐅᓪᐸ ᐃᕐᓂᕐᑖᕐᐳᖅ ᔧᑯᒥᑦ.

¹¹ ᓕᐊᓗ ᐅᖃᕐᐳᖅ, “ᐅᐱᓐᓇᕐᑐᒥᒃ ᐱᕗᖓ”; ᑍᒤᒻᒪᑦ ᐊᑦᓯᕐᐹ ᒑᑎᒥᒃ.

¹² ᓕᐊᓪᓗ ᐱᔨᖓ ᔨᐅᓪᐸ ᐃᕐᓂᕐᑖᒃᑲᓐᓂᕐᐳᖅ ᔧᑯᒥᑦ,

¹³ ᓕᐊᓗ ᐅᖃᕐᐳᖅ, “ᐊᒃᓱᒻᒪᕆᐊᓗᒃ ᖁᕕᐊᓱᒃᐳᖓ! ᒫᓐᓇᒥᑦ ᐊᕐᓇᓂᑦ ᑍᔭᐅᕙᖕᓂᐊᓕᕐᐳᖓ ᖁᕕᐊᓱᒃᑐᒥᒃ”; ᑍᒤᒻᒪᑦ ᐊᑦᓯᕐᐹ ᐋᓱᕆᒥᒃ.

¹⁴ ᓂᐊᖂᔭᒃᓴᓂᒡᓕ ᑲᑎᕐᓱᐃᑎᓪᓗᒋᑦ ᕉᐱᓂ ᐱᕈᕐᓰᕕᖕᒧᐊᕋᒥ ᓇᓂᓯᕗᖅ ᒫᓐᑐᕅᒃᓯᒥᒃ ᑖᑦᓱᒪᓗ ᐊᓈᓇᒥᓄᐊᕈᑎᕚ ᓕᐊᒧᑦ. ᕅᒋᓕᓗ ᓕᐊᒧᑦ ᐅᖃᕐᐳᖅ, “ᑕᕝᕙᓐᖓᑦ ᐃᕐᓂᕐᐱᑦ ᓇᓂᔭᖓᑕ ᐃᓚᖓᓐᓂᒃ ᕾᑦᓯᓚᐅᕆᑦ ᒫᓐᑐᕅᒃᓯᒥᒃ.”

¹⁵ ᓕᐊᑉ ᑭᐅᕚ, “ᐅᐃᓐᓂᒃ ᐊᕐᓵᕐᓯᒪᒐᕕᖓ ᑕᒪᓐᓇᓕ ᓈᒻᒪᓐᖏᓛᖅ? ᒫᓐᓇᓕ ᐃᕐᓂᕐᒪ ᒫᓐᑐᕅᒃᓯ ᓇᓂᔭᖓ ᐊᕐᓵᓯᑦᔪᑎᒋᓇᓱᐊᓕᕆᕙᑦ.” ᕅᒋᓕᓗ ᐅᖃᕐᐳᖅ, “ᐃᕐᓂᕐᐱᑦ ᓇᓂᔭᖓ ᒫᓐᑐᕅᒃᓯ ᐅᕙᓐᓄᐊᕐᓂᐊᕈᕕᐅᒃ, ᐅᓐᓄᒃ ᔧᑯ ᓯᓂᖃᑎᒋᔪᓐᓇᕐᓂᐊᕐᐸᑦ.”

¹⁶ ᔧᑯᓕ ᐅᓐᓄᒃᑎᓪᓗᒍ ᑎᑭᓕᕐᒪᑦ ᐱᕈᕐᓰᕕᖕᒥᓐᖔᕐᓗᓂ, ᓕᐊᑉ ᐸᕐᕆᐊᕐᐹ ᐅᖃᐅᑎᓪᓗᒍᓗ, “ᐅᓐᓄᒃ ᓯᓂᖃᑎᒋᓂᐊᕋᒃᑭᑦ, ᐊᑭᓕᐅᑎᖃᖅᑲᐅᒐᒪ ᐃᕐᓂᕐᒪ ᓇᓂᔭᕕᓂᖓᓂᒃ ᒫᓐᑐᕅᒃᓯᒥᒃ.” ᑍᒤᒻᒪᑦ ᑕᒪᑐᒪᓂ ᐅᓐᓄᒥ ᔧᑰᑉ ᐃᓐᓇᖓᖃᑎᒋᕚ.

¹⁷ ᒎᑎᐅᓪᓗ ᓕᐊᑉ ᑐᒃᓯᐊᕐᓂᖓ ᑭᐅᕚ, ᓯᖎᓕᕐᓗᓂᓗ ᔧᑯᒥᓪᓗ ᐃᕐᓂᕐᑖᕐᐳᖅ ᑕᓪᓕᒪᖓᓐᓂᒃ.

¹⁸ ᓕᐊᓗ ᐅᖃᕐᐳᖅ, “ᒎᑎᐅᑉ ᐊᑭᓕᕐᓯᒪᕚᖓ, ᐊᕐᓇᖅ ᐱᔨᒐ ᑐᓂᓯᒪᓚᐅᕋᒃᑯ ᐅᐃᓐᓄᑦ”; ᑍᒤᒻᒪᑦ ᐃᕐᓂᓂ ᐊᑦᓯᕐᐹ ᐃᓴᑳᕆᒥᒃ.

¹⁹ ᓕᐊᓗ ᑭᖑᓂᖓᒍᑦ ᓱᓕ ᓯᖎᓕᒃᑲᓐᓂᕐᐳᖅ ᔧᑯᒥᑦ ᐃᕐᓂᕐᑖᒃᑲᓐᓂᕐᐳᕐᓗ ᐱᖓᓲᔪᕐᑐᒋᓕᕐᑕᖓᓂᒃ.

²⁰ ᓕᐊᓗ ᐅᖃᕐᐳᖅ, “ᒎᑎᐅᑉ ᑐᓂᕐᕈᑎᑦᓯᐊᕚᓗᖕᒥᒃ ᑐᓂᓯᕕᒋᕚᖓ; ᒫᓐᓇᓕ ᐅᐃᒪ ᐃᓚᓕᐅᕐᓂᐊᓕᕐᐹᖓ, ᐃᕐᓂᕐᑖᕐᑎᓯᒪᓕᕋᒃᑯ ᐱᖓᓲᔪᕐᑐᓂᒃ”; ᑍᒤᒻᒪᑦ ᐃᕐᓂᓂ ᐊᑦᓯᕐᐹ ᓯᐳᓗᓂᒥᒃ.

²¹ ᑭᖑᓂᖓᒍᑦ ᐸᓂᒃᑖᕐᐳᖅ, ᑖᓐᓇᓗ ᐊᑦᓯᕐᐹ ᑍᓇᒥᒃ.

²² ᒎᑎᐅᓪᓗ ᕅᒋᓕ ᐃᖅᑲᐅᒪᒐᒥᐅᒃ; ᑐᒃᓯᐊᕐᓂᖓ ᑭᐅᓪᓗᒍ ᕿᑐᕐᖓᕐᑖᕈᓐᓇᕐᓯᑎᑉᐹ.

²³ ᕅᒋᓕᓗ ᓯᖎᓕᕐᐳᖅ ᐃᕐᓂᕐᑖᕐᓗᓂᓗ, ᐅᖃᕐᐳᕐᓗ, “ᒎᑎᐅᑉ ᑲᓐᖑᓲᑎᒃᓴᕋ ᐲᕐᐹ ᐃᕐᓂᕐᑖᕐᑎᒻᒪᖓ.

²⁴ ᐊᑕᓂᐅᑉ ᐃᕐᓂᕐᑖᕐᑎᒃᑲᓐᓂᕐᓂᐊᕐᐹᖓ”; ᑍᒤᒻᒪᑦ ᐊᑦᓯᕐᐹ ᔫᓯᐱᒥᒃ.

ᔧᑰᑉ ᐊᖏᕐᑕᐅᓇᓱᖕᓂᖓ ᓔᐸᓂᒧᑦ

²⁵ ᕅᒋᓕᐅᑉ ᔫᓯᐱᒥᒃ ᕿᑐᕐᖓᕐᑖᕐᓂᖓᑕ ᑭᖑᓂᖓᓂ, ᔧᑯ ᐅᖃᓕᕐᐳᖅ ᓔᐸᓂᒧᑦ, “ᐊᐅᓪᓚᕈᓐᓇᕐᑎᓚᐅᓐᖓ, ᓇᖕᒥᓂᖅ ᐊᖏᕐᕋᓐᓄᑦ ᓄᓇᓐᓄᓪᓗ ᐅᑎᕐᓂᐊᕋᒪ.

²⁶ ᓄᓕᐊᒃᑲ ᐅᕙᓐᓄᑦ ᑐᓂᓚᐅᒃᑭᑦ ᕿᑐᕐᖓᒃᑲᓗ ᑖᒃᑯᐊ ᐃᓕᖕᓄᑦ ᐱᓇᓱᐊᕐᑎᐅᓂᒃᑯᑦ ᐊᑭᓕᕐᑕᐅᑦᔪᑎᒋᓯᒪᒐᒃᑭᑦ, ᐊᐅᓪᓚᕐᑎᓪᓗᖓᓗ; ᖃᐅᔨᒪᒐᕕᑦ ᖃᓄᖅ ᐱᔨᑦᓯᑦᓯᐊᕐᓯᒪᓂᓐᓂᒃ ᐃᓕᖕᓄᑦ.”

²⁷ ᓔᐸᓂᐅᓪᓗ ᐅᖃᐅᑎᕚ, “ᐃᒫᒃ ᐅᖃᓚᐅᕐᓚᖓ: ᖃᐅᔨᓯᒪᕗᖓ ᓇᓗᓇᕐᑐᒃᑯᑦ ᐃᒫᒃ ᐊᑕᓂᐅᑉ ᓮᒻᒪᕐᑎᓯᒪᖕᒪᖓ ᐃᕝᕕᑦ ᐱᑦᔪᑎᒋᓪᓗᑎᑦ.

²⁸ ᐊᑭᓕᕐᑕᐅᑦᔪᑎᒋᔪᒪᔭᕐᓂᒃ ᐅᖃᓚᐅᕆᑦ, ᑕᕝᕙ ᑐᓂᓂᐊᕐᐸᒋᑦ.”

²⁹ ᔧᑰᑉ ᐅᖃᐅᑎᕚ, “ᐃᕝᕕᑦ ᓇᖕᒥᓂᖅ ᖃᐅᔨᒪᕗᑎᑦ ᐃᓕᖕᓂᒃ ᐱᔨᑦᓯᓚᐅᕋᒪ ᖃᓄᕐᓗ ᐆᒪᔪᖁᑎᖕᓂᒃ ᑲᒪᑦᓯᐊᓚᐅᕐᓂᓐᓂᒃ.

³⁰ ᐅᓄᖏᑦᑐᓂᒃ ᐱᖃᓚᐅᕐᐳᑎᑦ ᑎᑭᓚᐅᕐᑎᓐᓇᖓ, ᒫᓐᓇᓕ ᐅᓄᕐᑐᕐᔪᐊᕌᓗᓐᖑᕐᓯᒪᕗᑦ; ᖃᓄᑐᐃᓐᓇᕐᓗ ᐱᓕᕆᑐᐊᕌᖓᒪ ᐊᑕᓂᐅᑉ ᓮᒻᒪᕐᑎᓯᒪᕚᑎᑦ. ᒫᓐᓇᓕ ᓇᖕᒥᓂᖅ ᐱᓇᓱᐊᕈᒪᔭᓐᓄᑦ ᐱᓕᕆᕙᓪᓕᐊᔪᒃᓴᐅᓕᕐᐳᖓ ᐃᓚᒃᑲ ᐱᓪᓗᒋᑦ?”

³¹ ᓔᐸᓂᐅᑉ ᐊᐱᕆᕚ, “ᓱᓇᒥᒃ ᑐᓂᓯᕕᒋᔪᓐᓇᕐᐱᒌᑦ?” ᔧᑰᑉ ᑭᐅᕚ, “ᓱᓇᒥᒃ ᑐᓂᓯᕕᒋᔭᕆᐊᖃᓐᖏᓚᕐᒪ; ᐱᔪᒪᔭᕋᓕ ᒪᓕᖕᓂᐊᕈᕕᐅᒃ, ᓱᓕ ᐆᒪᔪᖁᑎᑎᑦ ᓂᕆᑎᑦᓱᒪᕙᒃᑲ ᑲᒪᒋᑦᓯᐊᕐᓗᒋᓪᓗ:

³² ᐅᓪᓗᒥ ᓰᐱᖁᑎᓕᒫᑎᑦ ᕿᒥᕐᕈᐊᓚᐅᕐᓚᒃᑲ, ᐲᔭᕐᓗᒋᓪᓗ ᑕᒪᕐᒥᒃ ᑕᕐᓴᒐᓛᖃᕐᑐᑦ ᐅᑭᓕᕆᐊᓪᓗ ᓰᐲᑦ ᓰᐱᐅᓪᓗ ᓄᕐᕋᖏᑦ ᕿᕐᓃᑦ, ᒎᑦᓰᓪᓗ ᐅᑭᓕᕆᐊᑦ ᑕᕐᓴᒐᓛᖃᕐᑐᓪᓗ; ᑕᒪᒃᑯᐊ ᑕᕝᕙ ᐊᑭᓕᕐᑕᐅᑦᔪᑎᒋᔪᒪᔭᑐᐊᒃᑲ.

³³ ᓯᕗᓂᑦᑎᓐᓂ ᑕᒪᓐᓇ ᖃᐅᔨᒐᔭᕐᐸᑦ ᓱᓕᑦᓯᐊᕐᓗᖓ ᐱᓕᕆᓐᓂᕐᒪᖔᕐᒪ, ᑕᒪᒃᑯᐊᓗ ᐊᑭᓕᕐᑕᐅᑦᔪᑎᒋᔭᒃᑲ ᕿᒥᕐᕈᐊᓕᕈᕕᒋᑦ, ᒎᑦᓯᖁᑎᖃᕈᒪ ᑕᕐᓴᒐᓛᖃᖏᑦᑐᒥᒃ ᐅᕝᕙᓗ ᐅᑭᓕᕆᐊᖏᑦᑐᒥᒃ ᐅᕝᕙᓘᓐᓃᑦ ᓰᐱᒥᒃ ᓇᓪᓕᐊᓐᓂᑐᐃᓐᓇᖅ ᕿᕐᓂᐅᖏᑦᑐᒥᒃ, ᑕᕝᕙ ᖃᐅᔨᒐᔭᕐᐳᑎᑦ ᑎᒡᓕᒐᕕᓂᐅᓂᖓᓂᒃ.”

³⁴ ᓔᐸᓂᐅᑉ ᑭᐅᕚ, “ᐊᖏᖃᑎᒋᕙᒋᑦ, ᑍᒤᓕᐅᕐᓂᐊᓕᕐᐳᒍᑦ ᑕᒪᑐᒥᖓ ᐅᖃᐅᓯᕆᔭᕐᓂᒃ.”

³⁵ ᑕᕝᕙᓐᖓᑦ ᐅᓪᓗᒥᑦ ᐱᒋᐊᕐᓗᓂ ᓔᐸᓂᐅᑉ ᒎᑦᓰᑦ ᐊᖑᓴᓪᓗᐃᑦ ᐊᕕᑎᑉᐰᑦ ᑕᕐᓴᓖᑦ ᐅᑭᓕᕆᐊᖑᔪᓪᓗ ᐊᕐᓇᓪᓗᐃᓪᓗ ᑕᒪᕐᒥᒃ ᑕᕐᓴᒐᓛᒃᑐᑦ ᐅᑭᓕᕆᐊᓪᓗ ᖃᐅᓪᓗᕐᑕᖃᕐᑐᓪᓗ; ᓰᐲᑦᑕᐅᖅ ᓄᕐᕋᖏᑦ ᕿᕐᓃᑦ ᐊᕝᕗᑎᑎᒃᑭᕔᑦ, ᐃᕐᓂᓂᓗ ᑖᒃᑯᓄᖓ ᐰᕐᓯᔨᓐᖑᕐᑎᓪᓗᒋᑦ,

³⁶ ᑕᕝᕙᓐᖓᓪᓗ ᐊᐅᓪᓚᕐᐳᖅ ᔧᑯᒥᑦ ᕿᒪᕉᑎᓇᓱᐊᕐᓗᓂ ᐃᖏᕐᕋᓪᓗᓂ ᐅᓪᓗᓂᒃ ᐱᖓᓱᓂᒃ; ᔧᑰᓪᓗ ᓔᐸᓂᐅᑉ ᓰᐱᖁᑎᖏᑕ ᐊᒥᐊᒃᑯᖏᑦ ᒥᐊᓂᕆᕔᑦ.

³⁷ ᔧᑯᓗ ᓇᐹᕐᑑᑉ ᐊᑎᖃᕐᑑᑉ ᐹᑉᓚᓂᒃ ᐊᕙᓚᖓᔪᖏᓐᓂᒃ ᐆᒻᒪᐅᑦᓯᐊᕐᑐᓂᒃ ᐱᕗᖅ, ᐋᓪᒧᓂᒡᓗ, ᐊᒻᒪ ᓇᐹᕐᑐᑐᐃᓐᓁᑦ ᐊᕙᓚᖓᔪᖏᓐᓂᒃ; ᑖᒃᑯᐊᓗ ᖄᖏᑦ ᐲᕐᓯᕕᒋᕔᑦ ᖃᐅᓪᓗᕐᑕᐅᓂᖃᓕᖁᓪᓗᒋᑦ.

³⁸ ᐃᓕᕔᓪᓗ ᐆᒪᔪᖁᑎᖏᑕ ᐃᒥᕐᕕᖏᑕ ᓵᖏᓐᓄᑦ, ᑕᕝᕗᓐᖓᕐᐰᑦ, ᐆᒪᔪᖁᑎᖏᑦ ᑕᕝᕙᓂ ᐃᒥᕐᕕᒥᖕᓂ ᓄᓕᐊᖃᑦᑕᕐᒪᑕ.

³⁹ ᑖᒃᑯᐊᓗ ᒎᑦᓰᑦ ᓄᓕᐊᓕᕌᖓᒥᒃ ᐃᒥᕐᑕᕐᕕᐅᑉ ᓵᖓᓂ, ᕿᑐᕐᖓᕐᑖᖃᑦᑕᕐᐳᑦ ᖃᐅᓪᓗᕐᑕᐅᓂᖃᕐᑐᓂᒃ, ᑕᕐᓴᒐᓛᒃᑐᓂᒡᓗ, ᐅᑭᓕᕆᐊᖑᔪᓂᒡᓗ.

⁴⁰ ᔧᑰᓪᓗ ᓄᕐᕅᑦ ᓇᖕᒥᓂᖅ ᐃᓂᖃᕐᑎᑉᐰᑦ, ᐆᒪᔪᐃᓪᓗ ᑮᓇᖏᑦ ᓵᓐᖓᑎᓪᓗᒋᑦ ᓰᐱᓄᑦ ᑕᕐᓴᖃᕐᑐᓄᑦ ᕿᕐᓂᕐᓄᓪᓗ ᓔᐸᓂᐅᑉ ᐆᒪᔪᖁᑎᖏᓐᓄᑦ; ᓇᖕᒥᓂᖅ ᐆᒪᔪᖁᑎᓂ ᑲᑎᒪᔭᐅᑎᓐᖏᓔᑦ, ᐃᓚᓕᐅᑎᓇᒋᓪᓗ ᓔᐸᓂᐅᑉ ᐆᒪᔪᖁᑎᖏᓐᓄᑦ.

⁴¹ ᐆᒪᔪᐃᓪᓗ ᖃᓄᐃᖏᑦᓯᐊᕐᑐᑦ ᓄᓕᐊᓕᕌᖓᑕ, ᔧᑰᑉ ᑖᒃᑯᐊ ᓇᐹᕐᑐᕕᓂᕐᓂᒃ ᐃᒥᕐᕕᖏᓐᓂ ᐃᓕᓯᒪᔪᓂᒃ ᑕᑯᓐᓇᕐᑎᖃᑦᑕᕐᐰᑦ, ᓇᐹᕐᑐᕕᓃᑦ ᐊᑯᓐᓂᖏᓐᓂ ᓄᓕᐊᖁᓪᓗᒋᑦ.

⁴² ᐆᒪᔪᐃᓪᓕ ᓴᓐᖏᔫᖏᓐᓂᕐᓴᐅᔪᑦ ᓇᐹᕐᑐᕕᓂᕐᓂᒃ ᐃᓕᓯᕕᒋᕙᖕᓇᒋᑦ; ᑍᒫᒡᓗ ᑕᕝᕙ ᓔᐸᓂ ᐆᒪᔪᖁᑎᖃᓕᓚᐅᕐᐳᖅ ᓴᓐᖏᔫᑕᐅᖏᓐᓂᕐᓴᓂᒃ, ᔧᑯᓕ ᐆᒪᔪᖁᑎᖃᓕᓚᐅᕐᐳᖅ ᖃᓄᐃᕈᔪᖏᑦᓯᐊᕐᑐᓂᒃ ᓴᓐᖏᔫᑦᓯᐊᕐᑐᓂᒡᓗ.

⁴³ ᑍᒤᓕᐅᕐᓗᓂᓗ ᔧᑯ ᐊᔪᕐᓴᖏᑦᑐᐊᓘᓕᓚᐅᕐᐳᖅ, ᐆᒪᔪᖁᑎᖃᓕᓚᐅᕐᐳᖅ ᐅᓄᕐᑐᓂᒃ, ᐱᔨᖃᓕᕐᓗᓂᒡᓗ ᐊᖑᑎᓂᒃ ᐊᕐᓇᓂᒡᓗ, ᑳᒥᓕᖁᑎᖃᕐᓗᓂᒡᓗ, ᓯᐅᑎᖅᑯᕐᑐᔪᖁᑎᖃᕐᓗᓂᒡᓗ.