ᒨᓯᓯ ᓯᕗᓪᓖᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓅᑉ ᓈᓚᖏᓐᓂᖓ ᒎᑎᒥᒃ

¹ ᖁᒡᓗᒋᐊᕐᓕ ᓯᓔᕐᕆᒃᓯᒃᑲᐅᓂᕐᐸᐅᓚᐅᕐᐳᖅ ᐆᒪᔪᓕᒫᓂᑦ ᓄᔪᐊᕐᑐᓂᑦ ᐊᑕᓂᐅᑉ ᒎᑎᐅᑉ ᐱᓐᖑᕐᑎᓯᒪᔭᖏᓐᓂᑦ. ᖁᒡᓗᒋᐊᓪᓗ ᐊᕐᓇᖅ ᐊᐱᕆᕚ, “ᒎᑎ ᐅᖃᓚᐅᕐᐹ, ᓇᐹᕐᑐᓂᑦ ᓇᓪᓕᐊᓐᓂᑐᐃᓐᓇᖅ ᓂᕆᔪᒃᓴᐅᓐᖏᓚᓯᒃ ᐱᕈᕐᓰᕕᖕᒦᑦᑐᓂᒃ?”

² ᐊᕐᓇᐅᑉ ᑭᐅᕚ, “ᓇᐹᕐᑐᑦ ᐸᐅᕐᖓᖏᓐᓂᒃ ᓂᕆᔪᓐᓇᕐᑐᒍᑦ ᐱᕈᕐᓰᕕᖕᒦᑦᑐᓂᒃ;

³ ᒎᑎᓕ ᐅᖃᓚᐅᕐᐳᖅ, ‘ᓇᐹᕐᑑᑉ ᐸᐅᕐᖓᖏᓐᓂᒃ ᐱᕈᕐᓰᕕᐅᑉ ᕿᑎᖓᓃᑦᑐᒥᒃ ᓂᕆᔪᒃᓴᐅᓐᖏᓚᓯᒃ, ᐊᒃᑐᕐᓂᐊᕐᓇᒍᓘᓐᓃᑦ, ᑐᖁᖁᓇᓯᒃ.’”

⁴ ᖁᒡᓗᒋᐊᕐᓕ ᐊᕐᓇᒧᑦ ᐅᖃᕐᐳᖅ, “ᑐᖁᓂᐊᓐᖏᓚᓯᒃ.

⁵ ᒎᑎ ᖃᐅᔨᒪᖕᒪᑦ ᑕᕝᕙᓐᖓᑦ ᓂᕆᒍᑦᓯᒃ ᐃᔨᓯᒃ ᐅᐃᓐᓂᐊᕐᒪᑎᒃ, ᒎᑎᑐᑦ ᑍᒤᓕᕐᓗᓯᒃ, ᖃᐅᔨᒪᓕᕐᓗᓯᒃ ᐱᐅᔪᒥᒃ ᐱᐅᖏᑦᑐᒥᒡᓗ.”

⁶ ᐊᕐᓇᐅᓪᓗ ᐅᑦᔨᕆᑦᓯᐊᓕᕐᐹ ᓇᐹᕐᑑᑉ ᐸᐅᕐᖓᖏᑕ ᓂᕆᔪᒥᓇᕐᓂᖏᑦ, ᑕᑯᒥᓇᕐᓂᖓᓗ, ᓯᓚᑐᓂᕐᑖᕈᒪᓐᓇᕐᓗᓂᓗ, ᑕᕝᕙ ᐸᐅᕐᖓᖏᑕ ᐃᓚᖓᓐᓂᒃ ᑎᒍᓯᓪᓗᓂ ᓂᕆᕗᖅ; ᐅᐃᒥᓄᓪᓗ ᐃᓚᖓ ᑐᓂᓪᓗᒍ, ᑖᑦᓱᒪᓗ ᓂᕆᒋᕚ.

⁷ ᑕᕝᕙ ᐃᔨᖏᒃ ᐅᐃᑎᑕᐅᓕᕐᐴᒃ, ᖃᐅᔨᓕᕐᓗᑎᒡᓗ ᐊᓐᓄᕌᖃᖏᓐᓂᕐᒥᖕᓂᒃ; ᐱᒋᓖᓪᓗ ᐅᖃᐅᔭᖏᓐᓂᒃ ᒥᕐᓱᕐᓗᑎᒃ ᓵᓕᓴᓕᐅᕐᐴᒃ.

⁸ ᐊᑕᓂᐅᓪᓗ ᒎᑎᐅᑉ ᕿᑭᕐᕋᖓ ᐱᕈᕐᓰᕕᒃᑯᑦ ᐱᓱᒃᑐᖅ ᑐᓴᕋᒥᒃᑯᒃ ᐅᓪᓗᖅ ᐅᖅᑰᓗᐊᕈᓐᓃᕐᑎᓪᓗᒍ, ᑖᒃᑯᐊᒃ ᓄᓕᐊᕇᒃ ᐃᔨᕐᐴᒃ ᐊᑕᓂᐅᑉ ᒎᑎᐅᑉ ᓇᔪᕐᓂᖓᓂᑦ, ᐱᕈᕐᓰᕕᖕᒥ ᓇᐹᕐᑐᐃᑦ ᐊᑯᕐᖓᓐᓄᑦ.

⁹ ᐊᑕᓂᐅᓪᓕ ᒎᑎᐅᑉ ᐊᖑᑦ ᓂᓪᓕᐅᑎᕚ, ᐅᖃᕐᓗᓂ, “ᓇᓃᑉᐲᑦ?”

¹⁰ ᐊᖑᓪᓗ ᑭᐅᕗᖅ, “ᑐᓴᕋᒪ ᐱᕈᕐᓰᕕᖕᒦᓐᓂᕐᓂᒃ, ᑲᑉᐱᐊᓱᒧᑦ ᐊᓐᓄᕌᖃᖏᓐᓂᓐᓂᒃ; ᐃᔨᕐᓯᒪᕗᖓ.”

¹¹ ᑖᑦᓱᒪ ᐊᐱᕆᕚ, “ᑭᐊ ᐊᓐᓅᕋᖃᖏᓐᓂᕋᕐᓗᑎᑦ ᐅᖃᐅᑎᖕᒪᑎᑦ, ᓂᕆᓚᐅᕋᕖᑦ ᓇᐹᕐᑐᒥᑦ ᓂᕆᖁᓇᒃ ᐃᓂᕐᑎᕈᑎᒋᓚᐅᕐᑕᓐᓂᒃ?”

¹² ᐊᖑᓪᓗ ᐅᖃᕐᐳᖅ, “ᐊᕐᓇᐅᑉ ᐂᑉᐸᕐᑖᕆᑎᓚᐅᕐᑕᕕᑦ ᐂᑦᑐᕐᒪᖓ ᓇᐹᕐᑑᑉ ᐸᐅᕐᖓᖓᓂᒃ, ᓂᕆᓚᐅᕐᐳᖓ.”

¹³ ᐊᑕᓂᐅᓪᓗ ᒎᑎᐅᑉ ᐊᕐᓇᖅ ᐊᐱᕆᕚ, “ᓱᖕᒪᑦ ᑍᒤᓕᐅᓚᐅᕐᐲᑦ?” ᐊᕐᓇ ᐅᖃᕐᐳᖅ, “ᖁᒡᓗᒋᐊᑉ ᓯᓔᕐᕆᖕᒪᖓ, ᓂᕆᓚᐅᕐᐳᖓ.”

ᒎᑎᐅᑉ ᓇᓗᓁᕐᓯᓂᖓ ᓱᒋᐊᕐᓯᓂᕐᒥᓂᒃ

¹⁴ ᐊᑕᓂᕐᓗ ᒎᑎ ᐅᖃᕐᐳᖅ ᖁᒡᓗᒋᐊᒧᑦ, “ᑍᒤᑎᑦᓯᓂᕐᓄᑦ, ᓇᕐᕈᓇᕐᓂᕐᐹᖑᓕᕐᐳᑎᑦ ᓂᕐᔪᑎᓕᒫᓂᑦ ᓄᔪᐃᑦᑐᓂᑦ ᓄᔪᐊᕐᑐᓂᓪᓗ; ᓈᕐᓄᑦ ᐹᕐᖑᕐᐸᖕᓂᐊᓕᕐᐳᑎᑦ, ᐃᑦᔪᕐᒥᒡᓗ ᓂᕿᖃᕐᓂᐊᓕᕐᓗᑎᑦ ᐃᓅᓂᓕᒫᕐᓂ.

¹⁵ ᐊᕐᓇᕐᓗ ᐊᑭᕋᕇᒃᑎᓐᓂᐊᓕᕐᐸᑦᓯᒃ, ᑭᖑᕚᑎᓪᓗ ᑭᖑᕚᖏᓪᓗ ᐊᑭᕋᕇᒃᓗᑎᒃ; ᑖᑦᓱᒪ ᑭᖑᕚᖓᑕ ᓂᐊᖁᐃᑦ ᑎᒡᓘᔭᕐᑎᑦᓱᒫᕐᐹ, ᐃᕝᕕᓪᓕ ᑭᖑᕚᖓ ᑭᖕᒥᖓᒍᑦ ᑎᒡᓘᔭᕐᑎᑦᓱᒫᕐᐸᑦ.”

¹⁶ ᐊᕐᓇᒧᓪᓗ ᐅᖃᕐᐳᖅ, “ᐋᓐᓂᐊᕐᔪᐊᖃᑦᑕᕈᒫᓕᕐᐳᑎᑦ ᐃᕐᓂᓱᓕᕌᖓᕕᑦ; ᐋᓐᓂᐊᕐᓗᑎᑦ ᕿᑐᕐᖓᕐᑖᖃᑦᑕᕈᒫᓕᕐᐳᑎᑦ, ᑍᒤᒃᑲᓗᐊᕐᑎᓪᓗᒍ ᐅᐃᖕᓄᑦ ᐱᔪᒪᓂᕾᓐᓇᕐᓂᐊᕐᐳᑎᑦ, ᐅᐃᓪᓗ ᐊᖓᔪᖅᑳᖑᓂᐊᕐᐳᖅ ᐃᓕᖕᓄᑦ.”

¹⁷ ᐊᖑᒻᒧᓪᓗ ᐅᖃᕆᕗᖅ, “ᓄᓕᐊᕐᓂᒃ ᓈᓚᓚᐅᕋᕕᑦ, ᓇᐹᕐᑐᒥᓪᓗ ᓂᕆᓪᓗᑎᑦ ᐃᓂᕐᑎᕈᑎᒋᓚᐅᕐᑕᓐᓂᒃ ᐃᒫᒃ, ‘ᑖᓐᓇ ᓂᕆᕕᒋᑦᑍᓕᓯᐅᒃ,’ ᓄᓇᑦᑕᐅᖅ ᓇᕐᕈᓇᕐᓯᑎᑕᐅᓂᐊᓕᕐᐳᖅ ᐱᑦᔪᑎᒋᓪᓗᑎᑦ; ᐊᒃᓱᕈᕐᓗᑎᑦ ᓂᕿᒃᓴᕐᓯᐅᕐᐸᖕᓂᐊᓕᕐᐳᑎᑦ ᓄᓇᒥ ᐃᓅᓯᓕᒫᕐᓂ.

¹⁸ ᑲᑭᓪᓚᕐᓇᕐᑐᑦ ᐅᕐᐱᒊᑦ ᐊᓯᖏᓪᓗ ᑲᑭᓪᓚᕐᓇᕐᑐᑦ ᓄᓇᖕᓂ ᐱᕈᖃᑦᑕᕈᒫᓕᕐᐳᑦ; ᓇᑎᕐᓇᒥᑦ ᐱᕈᕐᑐᓂᒃ ᓂᕿᖃᕐᐸᖕᓂᐊᓕᕐᐳᑎᑦ.

¹⁹ ᐊᐅᒃᑲᕐᓂᖓᕙᖕᓂᐊᓕᕐᐳᑎᑦ ᓂᕿᒃᓴᒥᒃ ᐱᓇᓱᐊᕐᓗᑎᑦ ᐅᑎᓚᐅᖏᓐᓂᕐᓂ ᓄᓇᒧᑦ, ᑕᒫᓐᖓᑦ ᓴᓇᔭᐅᕕᒋᓚᐅᕐᑕᕐᓄᑦ; ᐃᑦᔪᒥᑦ ᐱᓯᒪᒐᕕᑦ ᐃᑦᔪᒧᑦᑕᐅᖅ ᐅᑎᕈᒫᕆᕗᑎᑦ.”

²⁰ ᐊᖑᑎᐅᓪᓗ ᓄᓕᐊᓂ ᐊᑦᓯᕐᐹ ᐄᕕᒥᒃ; ᐊᓈᓇᒋᔭᐅᓕᕐᒪᑦ ᐃᓅᔪᓕᒫᓄᑦ.

²¹ ᐊᑕᓂᐅᓪᓗ ᒎᑎᐅᑉ ᐊᑕᒥᒃᑯᒃ ᓄᓕᐊᕇᒃ ᐊᓐᓄᕌᓕᐅᕐᐹᒃ ᐆᒪᔫᑉ ᐊᒥᕕᓂᖏᓐᓂᒃ ᐊᓐᓄᕌᕐᑎᓪᓗᒋᒡᓗ ᑖᒃᑯᓂᖓ.

ᐋᑕᒥᐅᓪᓗ ᐄᕕᐅᓪᓗ ᐱᕈᕐᓰᕕᖕᒥᑦ ᐊᐅᓪᓚᕐᑎᑕᐅᓂᖓᒃ

²² ᐊᑕᓂᕐᓗ ᒎᑎ ᐅᖃᕐᐳᖅ, “ᑕᑯᒋᑦ, ᐊᖑᒃ ᐅᕙᑦᑎᑐᑦ ᑍᒤᓕᕐᒪᑦ, ᖃᐅᔨᒪᓕᕐᓗᓂᓗ ᐱᐅᔪᒥᒃ ᐱᐅᖏᑦᑐᒥᒡᓗ; ᑎᒍᓯᑐᐃᓐᓇᕆᐊᖃᓕᕐᒪᑦ ᓇᐹᕐᑑᑉ ᐃᓅᓯᖃᕐᓇᕐᑑᑉ ᐸᐅᕐᖓᖓᓂᒃ ᓂᕆᓗᒍᓗ, ᐃᓅᓕᕐᓗᓂᓗ ᐃᓱᖃᖏᑦᑐᒧᑦ.”

²³ ᑍᒤᒻᒪᑦ ᐊᑕᓂᐅᑉ ᒎᑎᐅᑉ ᐱᕈᕐᓰᕕᖕᒥᑦ ᐄᑕᓂᒥᒃ ᐊᐅᓪᓚᕐᑎᑉᐹᒃ, ᓄᓇᒥᑦ ᓂᕿᒃᓴᓂᒃ ᐱᕈᕐᓰᖁᓪᓗᒍ ᐱᓐᖑᕐᑎᑕᐅᕕᒋᓚᐅᕐᑕᒥᓂᑦ.

²⁴ ᐊᖑᓪᓗ ᐊᓂᑎᑉᐹ ᑕᕝᕙᓐᖓᑦ; ᐂᖏᓕᓗ ᓯᕈᐱᒻ ᑕᕝᕗᓐᖓᕐᑎᑉᐹ ᐱᕈᕐᓰᕕᐅᑉ ᐄᑕᓂᐅᑉ ᖃᐅᓕᕐᕕᐊᑕ ᓇᓛᓄᑦ, ᓴᕕᒡᔪᐊᕐᒥᒡᓗ ᐃᑯᐊᓚᔪᒥᒃ ᓇᒧᑐᐃᓐᓇᖅ ᓵᖃᑦᑕᕐᑐᒥᒃ ᑕᕝᕗᓐᖓᕐᓯᒋᓪᓗᓂ, ᐊᖅᑯᑦ ᓴᐳᒻᒥᓪᓗᒍ ᓇᐹᕐᑐᒧᐊᖓᔪᖅ ᐃᓅᓯᖃᕐᓇᕐᑐᒧᑦ ᐃᓱᖃᖏᑦᑐᒧᑦ.