ᒨᓯᓯ ᓯᕗᓪᓖᑦ 28 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐂᓴᑭᐅᑉ ᔧᑯ ᕾᖁᕚ ᓱᖏᕐᑐᕈᒪᓪᓗᒍ, ᐱᖁᔨᓂᕐᒥᓂᒡᓗ ᐅᖃᐅᑎᕚ, “ᓄᓕᐊᓂᒃᑍᓕᒋᑦ ᑬᓇᓂᒥᐅᑦ ᐊᕐᓇᖏᓐᓂᑦ.

² ᒪᑭᓕᕆᑦ, ᐊᐅᓪᓚᕐᓗᑎᑦ ᐸᑖᓐ-ᐊᕋᒻᒧᑦ, ᐱᑐᐃᓕᐅᑉ ᐊᓈᓇᕕᑦ ᐊᑖᑕᖓᑕ ᐊᖏᕐᕋᖓᓄᑦ; ᑍᑲᓐᖓᓪᓗ ᓄᓕᐊᕐᑖᕐᓗᑎᑦ, ᓔᐸᓂᐅᑉ ᐊᓈᓇᕕᑦ ᐊᓂᖓᑕ ᐸᓂᖏᑕ ᐃᓚᖓᓐᓂᒃ.

³ ᒎᑎᐅᑉ ᐊᔪᒐᖃᖏᑦᑑᑉ ᓮᒻᒪᕐᑎᓐᓂᐊᕐᐹᑎᑦ ᕿᑐᕐᖓᖃᕐᑎᓪᓗᑎᓪᓗ, ᐅᓄᕐᑐᓂᒃ, ᐃᓅᒋᐊᒃᑐᕐᔪᐊᓐᖑᖁᓪᓗᓯ.

⁴ ᑖᑦᓱᒪ ᑐᓂᓯᕕᒋᓕᑎᑦ ᑭᖑᕚᑎᓪᓗ ᐂᑉᕋᕼᐋᒻ ᓮᒻᒪᕐᑎᑕᐅᑦᔪᑎᖏᓐᓂᒃ, ᓄᓇ ᑕᒪᓐᓇ ᐱᑕᕆᓂᐊᕋᕕᐅᒃ ᓂᐅᕐᕈᐊᖑᕕᒋᔧᑦ ᒎᑎᐅᑉ ᑐᓂᓚᐅᕐᑕᖓ ᐂᑉᕋᕼᐋᒧᑦ.”

⁵ ᐂᓴᑭᐅᑉ ᔧᑯ ᐊᐅᓪᓚᕐᑎᑉᐹ; ᐂᓪᓗᓂᓗ ᐸᑖᓐ-ᐊᕋᓐᒧᑦ ᓔᐸᓂᒧᑦ, ᐱᑐᐃᓕᐅᑉ ᐃᕐᓂᖓᓄᑦ ᐊᕋᒥᐊᒥᐅᑕᕐᒧᑦ, ᕇᐱᑲᐅᑉ ᐊᓂᖓᓄᑦ, ᔧᑯᑉ ᐄᓴᐅᓪᓗ ᐊᓈᓇᖓᑕ.

ᐄᓴᓗ ᓄᓕᐊᓂᒃᑲᓐᓂᕐᐳᖅ

⁶ ᐄᓴᓗ ᖃᐅᔨᒐᒥ ᐂᓴᑭᐅᑉ ᔧᑯ ᓮᒻᒪᕐᑎᓯᒪᖕᒪᒍ ᐸᑖᓐ-ᐊᕋᒧᓪᓗ ᓄᓕᐊᕐᑖᕆᐊᕐᑐᖁᓪᓗᒍ ᑕᐅᕙᓐᖓᑦ, ᐅᖃᐅᑎᓚᐅᕐᒪᒍᓗ ᓮᒻᒪᕐᑎᓐᓇᒥᐅᒃ, “ᑬᓇᓂᒥᐅᑦ ᐊᕐᓇᖏᓐᓂᑦ ᓄᓕᐊᓂᒃᑍᓕᒋᑦ.”

⁷ ᖃᐅᔨᓪᓗᓂᓗ ᔧᑯ ᓈᓚᒡᓗᓂ ᐊᑖᑕᒥᓂᒃ ᐊᓈᓇᒥᓂᒡᓗ ᐸᑖᓐ-ᐊᕋᒻᒧᐊᕐᓯᒪᓂᖓᓂᒃ.

⁸ ᐄᓴᓗ ᑐᑭᓯᓪᓗᓂ ᐊᑖᑕᖓ ᐂᓴᑭ ᖁᕕᐊᒋᔭᖃᖏᓐᓂᖓᓂᒃ ᐊᕐᓇᓂᒃ ᑬᓇᓂᒥᐅᑕᕐᓂᒃ.

⁹ ᑍᒤᒻᒪᑦ ᐄᓴ ᐃᓯᒥᐅᓪᒧᐊᕐᐳᖅ ᐂᑉᕋᕼᐋᒻ ᐃᕐᓂᖓᓄᑦ, ᐸᓂᖓᓂᒡᓗ ᓄᓕᐊᓂᒡᓗᓂ, ᐊᑎᖃᕐᑐᒥᒃ ᒪᕼᐊᓚᑕᒥᒃ, ᓂᐰᐅᑎᐅᑉ ᓇᔭᖓᓂᒃ.

ᔧᑰᑉ ᓯᓐᓇᒃᑑᒪᓂᖓ ᐱᑎᓕᒥ

¹⁰ ᔧᑯ ᐱᐊᕐᓯᐸᒥᑦ ᐊᐅᓪᓚᕐᐳᖅ, ᕼᐊᕋᓐ ᑐᕌᕐᓗᒍ.

¹¹ ᐃᓂᒃᓴᒧᓪᓗ ᑎᑭᓐᓇᒥ, ᑕᕝᕙᓂ ᓯᓂᒃᑕᕐᐳᖅ, ᓯᕿᓂᖅ ᓂᐱᓯᒪᓕᕐᑎᓪᓗᒍ. ᐅᔭᕋᖕᒥᒃ ᑕᒫᓐᖓᑦ ᐱᓪᓗᓂ, ᐊᑭᓯᓕᐅᑎᓪᓗᒍ ᓇᓪᓚᕐᐳᖅ ᓯᓂᒐᓱᓕᕐᓗᓂ.

¹² ᓯᓐᓇᒃᑐᕐᐳᕐᓗ ᑕᑯᓪᓗᓂ ᒪᔪᕋᐅᑎᓂᒃ ᓄᓇᒥᑦ, ᐃᓱᐊ ᕿᓚᖕᒧᑦ ᑎᑭᓯᒪᓪᓗᓂ; ᑕᑯᒋᓪᓗ ᒎᑎᐅᑉ ᐂᖏᓕᖏᑦ ᑕᒪᐅᓇ ᒪᔪᕋᕐᐸᒃᓗᑎᑦ ᐊᖅᑲᕐᑎᖃᑦᑕᕐᐳᑦ.

¹³ ᐊᑕᓂᕐᓗ ᑕᑯᕚ ᓇᖏᕐᑐᖅ ᖁᓛᓂ ᐅᖃᕐᓗᓂᓗ, “ᐊᑕᓂᐅᕗᖓ, ᓯᕗᓕᕐᐱᑦ ᐂᑉᕋᕼᐋᒻ ᐂᓴᑭᐅᓪᓗ ᒎᑎᖓ; ᑐᓂᓯᕕᒋᓂᐊᕋᒃᑭᑦ ᑭᖑᕚᒃᓴᑎᓪᓗ ᑕᒪᑐᒥᖓ ᓄᓇᒥᒃ ᓇᓚᕝᕕᒋᔭᕐᓂᒃ.

¹⁴ ᑭᖑᕚᑎᑦ ᓄᓇᒥ ᐳᔪᕋᕐᑎᑐᑦ ᐅᓄᕐᑎᒋᔪᒫᕐᐳᑦ, ᓄᓇᖁᑎᖏᓪᓗ ᐅᖓᓯᒃᑐᓄᑦ ᑎᑭᐅᒪᔪᒫᕐᐳᑦ; ᐸᐅᖓ ᐅᓄᖓᓗ ᓯᑭᓂᐅᑉ ᓄᐃᕕᐊᑕ ᓇᓛᓄᑦ ᓂᐱᕕᐊᑕᓗ ᓇᓛᓄᑦ; ᐃᕝᕕᓪᓗ ᑭᖑᕚᑎᓪᓗ ᐊᖅᑯᑎᒋᓗᒋᑦ ᐃᓅᖃᑎᒋᒡᔪᐊᑦ ᓄᓇᕐᔪᐊᕐᒦᑦᑐᑦ ᓮᒻᒪᕐᑎᑕᐅᔪᒫᕐᐳᑦ.

¹⁵ ᑕᑯᒋᓪᓗ ᐃᓚᒌᓐᓇᕐᓂᐊᕐᐸᒋᑦ ᓴᐳᑎᓯᒪᓗᑎᓪᓗ ᓇᒧᑐᐃᓐᓇᖅ ᐂᒐᓗᐊᕈᕕᑦ, ᓄᓇᒧᓪᓗ ᑕᒪᑐᒧᖓ ᐅᑎᕐᑎᑦᓱᒫᕆᕙᒋᑦ; ᕿᒪᖕᓂᐊᓐᖏᓚᒋᑦ ᐅᖃᐅᓯᕆᔭᓕᒫᒃᑲ ᐃᓕᖕᓄᑦ ᐊᑐᓚᐅᖏᓐᓂᖏᓐᓂ.”

¹⁶ ᔧᑯ ᐃᖅᑯᒻᒪᕋᒥ ᐅᖃᓕᕐᐳᖅ, “ᓱᓕᔪᒥᒃ ᐊᑕᓂᖅ ᒫᓃᑉᐳᖅ ᓇᔪᕐᑕᓐᓂ; ᖃᐅᔨᓐᓂᓐᖏᓚᕋᓘᓐᓃᑦ.”

¹⁷ ᑲᑉᐱᐊᓱᓕᕐᓗᓂᓗ ᐅᖃᕐᐳᖅ, “ᑲᒪᓇᕐᑐᕐᔪᐊᖑᕗᖅ ᓇᔪᕐᑕᕋ ᑕᒪᓐᓇ! ᑕᒫᓂ ᒎᑎᐅᑉ ᐃᒡᓗᖓ ᓇᔫᑎᓪᓚᕆᒃᐳᖅ; ᑖᓐᓇ ᕿᓚᖕᒧᑦ ᐃᑎᕐᑕᕐᕕᐅᕗᖅ.”

¹⁸ ᔧᑯ ᐅᓪᓛᕋᕐᔪᒃᑯᑦ ᒪᑭᓐᓇᒥ, ᐅᔭᕋᒃ ᐊᑭᓯᕆᔭᓂ ᐲᕐᓱᒍ ᓇᑉᐸᕐᐹ, ᖄᖓᒍᓪᓗ ᐸᐅᕐᒊᑦ ᐅᕐᓱᖓᓂᒃ ᑯᕝᕕᕆᓪᓗᒍ.

¹⁹ ᑖᓐᓇᓗ ᓇᔪᕐᑕᓂ ᐊᑎᖃᕐᑎᓕᕐᐹ ᐱᑎᓕᒥᒃ; ᑕᕝᕙᓂ ᓄᓇᓕᕕᓃᑦ ᑍᔭᐅᕙᓚᐅᕐᐳᑦ ᓚᔾᒥᒃ ᓯᕗᓂᖓᒍᑦ.

²⁰ ᑕᕝᕙ ᔧᑯ ᐅᖃᕕᒃᐳᖅ, ᐅᖃᕐᓗᓂ, “ᒎᑎᐅᑉ ᓇᔪᕐᓂᐊᕐᐹᖓ ᓴᐳᑎᓯᒪᓗᖓᓗ ᐊᖅᑯᑎᒋᓂᐊᕐᑕᓐᓂ, ᓂᕿᒃᓴᖃᕐᑎᓪᓗᖓᓗ, ᐊᓐᓅᕋᒃᓴᖃᕐᑎᓪᓗᖓᓗ,

²¹ ᐅᑎᕐᒥᒍᒪᓗ ᖃᓄᐃᖏᓪᓗᖓ ᐊᑕᑕᒪ ᐊᖏᕐᕋᖓᓄᑦ, ᑕᕝᕙ ᐊᑕᓂᖅ ᒎᑎᒋᔪᒫᕐᐸᕋ.

²² ᐅᓇ ᐅᔭᕋᒃ, ᓇᑉᐸᕐᑎᑕᕋ, ᒎᑎᐅᑉ ᐃᒡᓗᖃᕐᕕᒋᔪᒫᕐᐹ; ᑐᓂᓯᕕᒋᔪᒫᕐᐸᒋᓪᓗ ᕾᑕᓕᒫᕐᐱᑦ ᑕᓪᓕᒪᐅᔪᖏᓐᓂᒃ.”