ᒨᓯᓯ ᓯᕗᓪᓖᑦ 27 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᓴᑭᐅᑉ ᓮᒻᒪᕐᑎᑦᓯᓂᖓ ᔧᑯᒥᒃ

¹ ᐂᓴᑭᓗ ᐃᑦᑐᐊᓘᓕᕐᑎᓪᓗᒍ ᑕᒃᐲᓕᓚᐅᕐᐳᖅ ᑕᐅᑐᒍᓐᓃᓕᕐᓗᓂᓗ, ᐃᕐᓂᓂᓗ ᐊᖓᔪᒃᓕᖅ ᐄᓴ ᕾᖁᔭᐅᒃᑲᕐᓗᓂᐅᒃ ᐅᖃᐅᑎᕚ, “ᐃᕐᓃᒃ!” ᐃᕐᓂᖓᓗ ᑭᐅᕗᖅ, “ᑕᒫᓃᑉᐳᖓ.”

² ᐂᓴᑭᓗ ᐅᖃᕐᐳᖅ, “ᑕᑯᒋᑦ ᐃᑦᑐᐊᓘᓕᕋᒪ; ᑐᖁᕕᒃᓴᕋᓗ ᖃᐅᔨᒪᓇᒍ,

³ ᒫᓐᓇᓕ ᐊᖑᓇᓲᑎᑎᑦ ᑎᒍᓗᒋᑦ, ᐱᑎᒃᓰᑦ ᖃᕐᔪᑎᓪᓗ, ᐊᐅᓪᓚᓚᐅᕆᑦ ᐆᒪᔪᕐᓯᐅᕈᑎᓗᖓ.

⁴ ᓂᕿᓕᐅᕈᑎᓗᖓᓗ ᒪᒪᕆᔭᓐᓂᒃ, ᕾᒃᑯᕕᒋᑦ, ᓂᕆᓂᐊᕋᒃᑭᑦ; ᓂᕆᔭᕇᕈᒪ ᓮᒻᒪᕐᑎᑦᓱᒪᒐᒃᑭᑦ ᑐᖁᓚᐅᖏᓐᓂᓐᓂ.”

⁵ ᕇᐱᑲᓗ ᑐᓵᕗᖅ ᐂᓴᑭ ᐃᕐᓂᕐᒥᓄᑦ ᐄᓴᒧᑦ ᐅᖃᓪᓚᒃᑎᓪᓗᒍ, ᐄᓴ ᐆᒪᔪᕐᓯᐅᕆᐊᕐᓗᓂ ᐊᐅᓪᓚᕐᒪᑦ,

⁶ ᕇᐱᑲ ᐃᕐᓂᕐᒥᓄᑦ ᔧᑯᒧᑦ ᐅᖃᕐᐳᖅ, “ᑐᓵᒐᒪ ᐊᑖᑍᑦ ᐅᖃᓪᓚᒃᑎᓪᓗᒍ ᐊᖓᔪᖕᓄᑦ ᐄᓴᒧᑦ, ᐃᒫᒃ,

⁷ ‘ᐆᒪᔪᕐᓯᐅᕆᐊᓚᐅᕆᑦ ᓂᕿᓕᐅᕈᑎᓗᖓ ᒪᒪᕆᔭᓐᓂᒃ ᓂᕆᓂᐊᕋᒪ, ᓂᕆᔭᕇᕈᒪ ᓮᒻᒪᕐᑎᓐᓂᐊᕋᒃᑭᑦ ᐊᑕᓂᐅᑉ ᓵᖓᓂ ᑐᖁᓚᐅᖏᓐᓂᓐᓂ.’

⁸ ᑍᒤᒻᒪᑦ, ᐃᕐᓃᒃ ᐅᖃᐅᓯᒃᑲ ᒪᓕᑦᓯᐊᒃᑭᑦ,

⁹ ᓰᐱᓄᐊᕐᓗᑎᑦ, ᒎᑦᓯᑦ ᓄᕐᕋᖏᖕᓂᒃ ᒪᑦᕉᖕᓂᒃ ᐂᒃᓯᕆᑦ, ᓂᕿᓕᐅᕐᓂᕋᒪ ᒪᒪᕐᑐᒥᒃ ᐊᑖᑕᕕᑦ ᒪᒪᕆᔭᖓᓂᒃ;

¹⁰ ᑐᓂᓯᕕᒋᓂᐊᕋᕕᐅᒃ ᐊᑖᑍᑦ ᓂᕆᖁᓗᒍ, ᓮᒻᒪᕐᑎᓐᓂᐊᕐᒪᑎᑦ ᑐᖁᓚᐅᖏᓂᕐᒥᓂ.”

¹¹ ᔧᑯᓕ ᐊᓈᓇᒥᓄᑦ ᕇᐱᑲᒧᑦ ᐅᖃᕐᐳᖅ, “ᑕᑯᒋᑦ, ᐊᖓᔪᒐ ᐄᓴ ᒥᖅᑯᖃᕐᐳᖅ, ᐅᕙᖓᓕ ᒥᖅᑯᖃᓐᖏᓚᖓ.

¹² ᐊᑖᑕᒪ ᐊᒃᑐᕈᓂᖓ ᖃᐅᔨᒐᔭᕐᐳᖅ, ᐅᐃᕕᕐᕆᒃᓯᓂᓐᓂᒃ ᑖᑦᓱᒥᖓ, ᑕᕝᕙ ᐅᖃᕐᓂᕐᓗᒡᕕᒋᓂᐊᐹᖓ ᓮᒻᒪᕐᑎᑦᓱᓐᓃᕐᓗᖓ.”

¹³ ᐊᓈᓇᖓᑕᓗ ᐅᖃᐅᑎᕚ, “ᐃᕐᓃᒃ ᐅᕙᖓᖔᖅ ᐅᖃᕐᓂᕐᓗᒡᕕᐅᓂᕐᓄᑦ ᑐᕌᕐᑕᐅᓂᐊᕐᐳᖓ; ᐅᖃᐅᓯᕋ ᓈᓚᓕᕈᒃ, ᑍᒃᑯᖕᓂᖓᑦ ᐂᒃᓯᑐᐃᓐᓇᓕᕆᑦ ᐅᕙᓐᓄᐊᕈᑎᓗᒋᒃ.”

¹⁴ ᑕᕝᕙ ᐂᒃᓯᕐᐳᖅ ᐊᓈᓇᒥᓄᓪᓗ ᑐᓂᓪᓗᒋᒃ; ᐊᓈᓇᖓᓗ ᓂᕿᓕᐅᕐᐳᖅ ᒪᒪᕐᑐᓂᒃ, ᐊᑖᑕᖓᑕ ᒪᒪᕆᕙᒃᑕᖓᓂᒃ.

¹⁵ ᕇᐱᑲᐅᓪᓗ ᐄᓴᐅᑉ ᐊᓐᓄᕌᖏᑦ ᐱᐅᓂᕐᐹᑦ ᐃᒡᓗᒥᖕᓃᑦᑐᑦ ᑎᒍᓪᓗᒋᑦ, ᔧᑯᒧᑦ ᐃᕐᓂᒥᓄᑦ ᓄᑲᕐᓯᕐᒧᑦ ᐊᑎᔭᐅᑎᑉᐰᑦ.

¹⁶ ᒎᑦᓰᓪᓗ ᓄᕐᕋᖏᑕ ᐊᒥᖏᓐᓂᒃ ᑕᓕᖏᒃ ᐃᓪᓕᕆᓪᓗᒋᒃ ᖁᖓᓯᖓᑕᓗ ᒥᖅᑯᖃᖏᓐᓂᖓᓄᑦ ᐃᓕᓯᒋᕗᖅ.

¹⁷ ᓂᕿᓕᐊᕆᔭᓂᓗ ᒪᒪᕐᑐᑦ ᓂᐊᖂᔭᓪᓗ ᐃᒐᕋᑖᕐᑕᓂ ᑐᓂᕔᑦ ᐃᕐᓂᕐᒥᓄᑦ ᔧᑯᒧᑦ.

¹⁸ ᔧᑯᓗ ᐊᑖᑕᒥᓄᑦ ᐃᑎᕋᒥ ᐅᖃᐅᑎᕚ, “ᐊᑖᑖᒃ.” ᑖᑦᓱᒪ ᑭᐅᕙ, “ᒫᓃᑉᐳᖓ; ᓇᓪᓕᐊᖑᕖᑦ ᐃᕐᓃᒃ?”

¹⁹ ᔧᑯᓗ ᐅᖃᕐᐳᖅ ᐊᑖᑕᒥᓄᑦ, “ᐄᓴᐅᕗᖓ, ᐃᕐᓃᑦ ᐊᖓᔪᒃᓕᖅ, ᐱᔭᕇᕋᒪ ᐅᖃᐅᑎᖅᑲᐅᒐᕕᖓ; ᐃᖏᓪᓗᑎᑦ ᓂᕆᓚᐅᕆᑦ, ᐆᒪᔪᕐᑕᓐᓂᒃ ᓮᒻᒪᕐᑎᓐᓂᐊᕋᕕᖓ.”

²⁰ ᐂᓴᑭᓗ ᐃᕐᓂᕐᒥᓄᑦ ᐅᖃᕐᐳᖅ, “ᐃᕐᓃᒃ ᖃᓄᕐᓕ ᐊᑯᓂᐅᖏᑦᑐᖅ ᓇᓂᓯᑲᐅᕐᑐᕐᐲᑦ?” ᑖᑦᓱᒪ ᑭᐅᕚ, “ᐊᑕᓂᐅᑉ ᒎᑎᕕᑦ ᑐᓂᓯᕕᒋᓪᓗᖓ ᐱᔪᓐᓇᕐᑎᒻᒪᖓ.”

²¹ ᐂᓴᑭᓗ ᔧᑯᒧᑦ ᐅᖃᕐᐳᖅ, “ᐃᕐᓃᒃ ᕾᓚᐅᕆᑦ ᒪᐅᖓ, ᑕᑦᓯᒃᑐᕐᓂᐊᕋᒃᑭᑦ, ᖃᐅᔨᓂᐊᕋᒪ ᐄᓴᐅᖕᒪᖔᕐᐱᑦ ᑖᓐᓇᐅᖏᒻᒪᖔᕐᐱᓪᓘᓐᓃᑦ?”

²² ᔧᑯᓗ ᐊᑖᑕᒥᓄᑦ ᐂᓴᑭᒧᑦ ᖃᒡᓕᒃᑲᓐᓂᕐᒪᑦ, ᑖᑦᓱᒪ ᑕᑦᓯᒃᑐᕐᓗᒍ ᐅᖃᕐᐳᖅ, “ᔧᑰᑉ ᓂᐱᖓᓂᒃ ᓂᐱᖃᕋᕕᑦ, ᐊᒡᒐᑎᓪᓕ ᐄᓴᐅᑉ ᐊᒡᒐᒋᕔᑦ.”

²³ ᔧᑰᓂᖓᓂᒡᓕ ᐃᓕᑕᕆᓐᖏᓛ, ᐊᒡᒐᖏᑦ ᒥᖅᑯᖃᕐᒪᑎᒃ ᐊᖓᔪᒥᑐᑦ ᐄᓴᑐᑦ; ᑕᕝᕙ ᓮᒻᒪᕐᑎᑉᐹ,

²⁴ ᐊᐱᕆᕚᓗ, “ᐄᓴᓪᓚᕆᐅᒐᓗᐊᕐᐲᑦ?” ᑖᑦᓱᒪ ᑭᐅᕚ, “ᑖᓐᓇᐅᕗᖓ.”

²⁵ ᑕᕝᕙ ᐅᖃᓕᕐᐳᖅ, “ᓂᕆᓂᐊᕐᑕᕋ ᕾᓚᐅᕈᒃ, ᐃᕐᓂᕐᒪ ᐆᒪᔪᕐᑕᕕᓂᖓᓂᒃ ᓂᕆᓂᐊᕋᒪ ᓮᒻᒪᕐᑎᓪᓗᑎᓪᓗ.” ᑕᕝᕙ ᓂᕆᓂᐊᕐᑕᖓᓂᒃ ᑐᓂᕚ, ᓂᕆᓪᓗᓂᓗ; ᕔᓂᒥᒡᓗ ᑐᓂᒋᕚ, ᐃᒥᕐᓗᓂᓗ.

²⁶ ᑕᕝᕙ ᐊᑖᑕᖓᑕ ᐂᓴᑭᐅᑉ ᐅᖃᐅᑎᕚ, “ᕾᓗᑎᑦ ᐃᕐᓃᒃ ᑯᓂᓚᐅᓐᖓ.”

²⁷ ᐅᐸᒃᓗᒍ ᐊᑖᑕᓂ ᑯᓂᒃᐹ; ᑕᕝᕙ ᐊᓐᓄᕌᖏᑕ ᑎᐱᖏᑦ ᓁᕔᑦ, ᓮᒻᒪᕐᑎᓪᓗᒍᓗ ᐅᖃᕐᐳᖅ, “ᐃᕐᓂᕐᒪ ᑎᐱᑦᓯᐊᕆᖕᓂᖓ ᓁᓪᓗᒍ ᓄᓇᐅᑉ ᓇᑎᕐᓇᐅᑉ; ᐊᑕᓂᐅᑉ ᓮᒻᒪᕐᑎᓯᒪᔭᖓᑐᑦ ᑍᒤᑉᐳᖅ.

²⁸ ᒎᑎᐅᑉ ᑐᓂᓯᕕᒋᓕᑎᑦ ᕿᓚᐅᑉ ᖃᐅᓯᕐᑎᑦᓯᓂᖓᓂᒃ, ᓄᓇᒥᒡᓗ ᐊᔪᕐᓴᕐᓇᖏᑦᑐᒥᒃ, ᐊᒥᒐᖏᑦᑐᓂᒡᓗ ᓂᐊᖂᔭᒃᓴᓂᒃ ᕔᓂᒃᓴᓂᒡᓗ,

²⁹ ᐃᓅᖃᑎᒌᒡᔪᐊᑦ ᐊᓯᑦᓯᓐᓃᑦᑐᑦ ᐱᔨᑦᓯᕐᓕᑎᑦ, ᐃᓅᖃᑎᒌᒡᔪᐊᓪᓗ ᓇᓂᑐᐃᓐᓇᖅ ᐹᒻᒪᒃᑎᕐᕕᒋᓕᑎᑦ; ᐊᖓᔪᖅᑳᖑᓕᕆᑦ ᖃᑕᓐᖑᑎᖕᓄᑦ, ᐊᓈᓇᕕᓪᓗ ᑭᖑᕚᖏᑕ ᐹᒻᒪᒃᑎᕐᕕᒋᔭᒃᓴᕆᕚᑎᑦ, ᓇᕐᕈᓇᕐᓯᓕᑦ ᐃᓕᖕᓂᒃ ᓇᕐᕈᔪᑦ, ᓮᒻᒪᕐᑎᑕᐅᓕᓪᓗ ᐃᓕᖕᓂᒃ ᓮᒻᒪᕐᑎᑦᓯᔪᑦ.”

ᐄᓴᐅᑉ ᐊᑖᑕᒥᓄᑦ ᓮᒻᒪᕐᑎᑕᐅᔪᒪᓂᖓ

³⁰ ᐂᓴᑭᐅᑉ ᔧᑯ ᓮᒻᒪᕐᑎᑦᓴᕇᑐᐊᕐᒪᒍ, ᔧᑯ ᐊᑯᓂᐅᖏᑦᑐᖅ ᐊᓂᓯᒪᓕᕐᑎᓪᓗᒍ ᐊᑖᑕᒥ ᓇᔪᕐᑕᖓᓂᑦ, ᐊᖓᔪᐊ ᐄᓴ ᑎᑭᑉᐳᖅ ᐆᒪᔪᕐᓯᐅᕐᑐᕕᓂᐅᓪᓗᓂ.

³¹ ᓂᕿᓕᐅᕆᕗᕐᑕᐅᖅ ᒪᒪᕐᑐᒥᒃ, ᐊᑖᑕᒥᓄᓪᓗ ᐅᖃᕐᐳᖅ, “ᐊᑖᑕᒐ ᒪᑭᓚᐅᕆᑦ, ᐃᕐᓂᕐᐱᑦ ᐆᒪᔪᕐᑕᖓᓂᒃ ᓂᕆᓂᐊᕋᕕᑦ, ᓮᒻᒪᕐᑎᓐᓂᐊᕋᕕᖓ.”

³² ᐊᑖᑕᖓᑕᓗ ᐂᓴᑭᐅᑉ ᐊᐱᕆᕚ, “ᑭᓇᐅᒐᕖᑦ?” ᑖᑦᓱᒪ ᑭᐅᕚ, “ᐃᕐᓂᕆᕙᕐᒪ, ᐊᖓᔪᒃᓯᖁᑏᑦ ᐄᓴ.”

³³ ᐂᓴᑭᓗ ᓴᔪᓕᕐᐳᖅ ᖁᐊᕐᓵᖓᓂᕐᒧᑦ, ᐊᐱᕆᓪᓗᓂᓗ, “ᑭᓇᓖᓐᓇ ᐆᒪᔪᕐᓯᐅᓚᐅᕐᓗᓂ ᕾᑦᓯᖅᑲᐅᕚ, ᕾᑕᖓᓗ ᓂᕆᖅᑲᐅᕙᕋ ᓄᖑᓪᓗᒍ ᑎᑭᓚᐅᕐᑎᓐᓇᒃ, ᓮᒻᒪᕐᑎᖅᑲᐅᕙᕋ ᓮᒻᒪᕐᑎᑕᐅᓂᖓᓗ ᓱᖁᓯᕐᓂᐊᕈᓐᓃᕐᓗᓂ.”

³⁴ ᐄᓴᓗ ᐊᑖᑕᖓᑕ ᐅᖃᐅᓯᖏᓐᓂᒃ ᑐᓴᕋᒥ, ᐃᓗᐃᓪᓕᕐᓗᓂ ᕿᐊᔪᐊᓘᓕᕐᐳᖅ, ᐊᑖᑕᒥᓄᓪᓗ ᐅᖃᕐᓗᓂ, “ᓮᒻᒪᕐᑎᓚᐅᓐᖓᑦᑕᐅᖅ ᐊᑖᑖᒃ!”

³⁵ ᑭᐅᕙᓗ, “ᓄᑬᑦ ᕾᖅᑲᐅᖕᒪᑦ ᓯᓔᕐᕆᓪᓗᓂᖓ, ᓮᒻᒪᕐᑎᑕᐅᑦᔪᑎᒃᓴᕐᓂᒡᓗ ᐊᕐᓵᕐᐹᑎᑦ.”

³⁶ ᐄᓴᓗ ᐅᖃᕐᐳᖅ, “ᓱᓕᔪᒥᒃ ᔧᑯᒥᒃ ᐊᑎᖃᕋᒥ, ᒪᕐᕈᕕᒃᓗᓂ ᓯᓔᕐᕆᓕᕐᐹᖓ, ᐊᖓᔪᒃᓕᐅᓂᓐᓂᒃ ᐊᕐᓵᓚᐅᕐᒪᖓ; ᐊᒻᒪ ᑕᕝᕙ ᓮᒻᒪᕐᑎᑕᐅᑦᔪᑎᒃᓴᕋᓗᐊᓐᓂᒃ ᐊᕐᓵᕆᕚᖓ.” ᐅᖃᒃᑲᓐᓂᕐᐳᕐᓗ, “ᓮᒻᒪᕐᑎᑕᐅᓂᒃᓴᒥᒃ ᐊᒥᐊᒃᑯᓯᒪᓐᖏᓚᕐᒪ?”

³⁷ ᐂᓴᑭᐅᓪᓗ ᐄᓴ ᑭᐅᕚ, “ᑕᑯᒋᑦ, ᐃᓕᖕᓄᑦ ᐊᖓᔪᖅᑳᓐᖑᕐᑎᑦᓴᕇᕋᒃᑯ, ᖃᑕᓐᖑᑎᖏᓪᓗ ᐱᔨᓐᖑᕐᑎᓪᓗᒋᑦ ᑖᑦᓱᒧᖓ, ᓂᐊᖂᔭᒃᓴᓂᒃ ᕔᓂᒥᒡᓗ ᐊᒥᒐᕐᓯᔪᒃᓴᐅᖏᓐᓂᖓᓂᒃ ᓮᒻᒪᕐᑎᑦᓴᕇᕐᐸᕋ. ᐃᕐᓃᒃ ᖃᓄᐃᓕᐅᒃᑲᓐᓂᕈᓐᓇᕐᐳᖓ ᐃᓕᖕᓄᑦ!”

³⁸ ᐄᓴᓗ ᐅᖃᕐᐳᖅ ᐊᑖᑕᒥᓄᑦ, “ᓮᒻᒪᕐᑎᑦᓯᔪᑎᒥᒃ ᐊᑕᐅᓯᑐᐊᒥᒃ ᐱᓯᒪᕖᑦ ᐊᑖᑖᒃ? ᓮᒻᒪᑎᒻᒥᓐᖓᑦᑕᐅᖅ, ᐊᑖᑖᒃ!” ᐄᓴᓗ ᓂᐱᖅᑯᕐᑐᓪᓗᓂ ᕿᐊᓕᕐᐳᖅ.

³⁹ ᑕᕝᕙ ᐊᑖᑕᖓᑕ ᐂᓴᑭᐅᑉ ᑭᐅᕚ, “ᑕᑯᒋᑦ, ᓄᓇᐅᑉ ᐱᕈᑦᓯᐊᕐᓇᕐᓂᖓᑕ ᐅᖓᓯᒋᔮᓂ ᓄᓇᖃᕈᒫᕐᐳᑎᑦ, ᕿᓚᖕᒥᓪᓗ ᖃᐅᓯᕐᑎᑕᐅᓂᐅᑉ ᐅᖓᓯᒋᔭᖓᓃᓪᓗᑎᑦ.

⁴⁰ ᓴᕕᒡᔪᐊᑦ ᐊᑐᕐᓗᒍ ᐃᓅᔪᒫᕐᐳᑎᑦ, ᓄᑬᓪᓗ ᐱᔨᑦᓯᕈᒫᕐᐹᑦ; ᑖᑦᓱᒪᓐᖓᓪᓕ ᕿᓚᕈᑦᔮᕈᕕᑦ; ᐊᒡᔭᕐᓯᑎᑕᐅᓃᑦ ᑖᑦᓱᒪᓐᖓᑦ ᓯᖁᒥᑦᓱᒫᕐᐳᖅ ᖁᖓᓯᕐᓂᑦ.”

⁴¹ ᐄᓴᐅᓪᓗ ᔧᑯ ᐆᒥᒋᓕᕐᐹ ᓮᒻᒪᕐᑎᑕᐅᓯᒪᓂᖓᓄᑦ ᐊᑖᑕᖓᑕ ᓮᒻᒪᕐᑎᓚᐅᕐᒪᒍ, ᐄᓴᓗ ᓂᐱᖃᕐᓗᓂ ᐃᒻᒥᓄᑦ ᐅᖃᓕᕐᐳᖅ, “ᐊᑖᑕᒪ ᕿᒃᓵᒍᑕᐅᕕᒃᓴᖓ ᖃᒡᓕᖕᒪᑦ; ᑭᖑᕐᖓᒍᑦ ᓄᑲᕋ ᔧᑯ ᑐᖁᓛᓕᕐᐸᕋ.”

⁴² ᐃᕐᓂᖓᑕᓕ ᐊᖓᔪᒃᓯᐅᒃ ᐄᓴᐅᑉ ᐅᖃᐅᓯᖏᑦ ᐅᖃᐅᓯᐅᖕᒪᑕ ᕇᐱᑲᒧᑦ; ᐃᕐᓂᓂ ᓄᑲᕐᓯᖅ ᔧᑯ ᕾᖁᕚ, ᐅᖃᐅᑎᓪᓗᒍᓗ, “ᑕᑯᒋᑦ, ᐊᖓᔪᐃᑦ ᐄᓴ ᐃᒻᒥᓂᒃ ᓮᒻᒪᐅᓯᕈᒪᕗᖅ ᑐᖁᓪᓗᓂᑎᑦ.

⁴³ ᑍᒤᒻᒪᑦ, ᐃᕐᓃᒃ ᐅᖃᐅᓯᒃᑲ ᒪᓕᒃᑭᑦ, ᕿᒫᓗᑎᑦ ᐊᓂᓐᓄᐊᓕᕆᑦ ᓔᐸᓂᒧᑦ ᕼᐊᕋᓐᒥ ᓄᓇᖃᕐᑐᒧᑦ.

⁴⁴ ᓇᔪᑬᓐᓇᕐᓂᐊᕐᐸᑦ; ᐊᖓᔪᐃᑦ ᓂᓐᖓᐅᒪᔪᓐᓃᕐᓯᐊᕆᓗᒍ,

⁴⁵ ᐊᖓᔪᐃᑦ ᓂᓐᖓᐅᒪᔪᓐᓃᕐᐸᑦ, ᐳᐃᒍᕐᐸᓪᓗ ᑖᑦᓱᒧᖓ ᖃᓄᐃᓕᐅᕐᓯᒪᓂᕐᓂᒃ; ᐂᔭᐅᑎᑦᓱᒫᕐᐸᒋᑦ ᑕᐅᕙᓐᖓᑦ, ᓱᖕᒪᑦ ᑕᒪᑦᓯᓐᓂᒃ ᕿᒃᓵᒍᑎᖃᕆᐊᖃᕐᐳᖓ ᐅᓪᓗᒥ ᑕᕝᕙᓂᑦᓮᓐᓇᖅ?”

ᐂᓴᑭᐅᑉ ᔧᑯᒥᒃ ᑎᓕᓯᓂᖓ ᓔᐸᓂᒧᑦ

⁴⁶ ᕇᐱᑲᓗ ᐂᓴᑭᒧᑦ ᐅᖃᓕᕐᐳᖅ, “ᐃᓱᒫᓗᒍᑎᖃᕋᒪ ᐃᓅᓯᓐᓂ ᐊᕐᓁᑦ ᕼᐃᑍᑎᒥᐅᑦ ᐱᓪᓗᒋᑦ, ᔧᑯᓕ ᓄᓕᐊᓂᖕᓂᐊᕐᒥᒃᐸᑦ ᕼᐃᑍᑎᒥᐅᑦ ᐊᕐᓇᖏᓐᓂᑦ ᑕᒫᓂ ᓄᓇᖃᕐᑐᓂᑦ, ᐃᓄᓯᕋ ᓱᓇᐅᔪᓐᓃᑦᓯᐊᕐᓂᐊᕐᐳᖅ.”