ᒨᓯᓯ ᓯᕗᓪᓖᑦ 26 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᓴᑭᐅᑉ ᓄᓇᖃᕐᓂᖓ ᔨᕌᕆᒥ

¹ ᑕᕝᕙ ᑕᒫᓂ ᓄᓇᓕᒫᒥ ᑳᖕᓇᕐᑐᕐᔪᐊᖑᓕᕆᕗᖅ, ᓯᕗᓂᖓᒍᑦ ᑍᒤᓚᐅᕐᓂᕐᒥᑐᑦ ᐂᑉᕋᕼᐋᒻ ᐃᓅᑎᓪᓗᒍ. ᐂᓴᑭᓗ ᓄᓇᒧᑦ ᒋᕌᕆᒧᐊᕐᐳᖅ, ᐊᐱᒥᓕᑭᒧᐊᕐᓗᓂ ᐱᓕᔅᑍᓂᒥ ᐊᖓᔪᖅᑳᕐᔪᐊᖑᔪᒧᑦ.

² ᐊᑕᓂᖅ ᓴᖅᑭᓚᐅᕐᒪᑦ ᐂᓴᑭᒧᑦ ᐅᖃᕐᓗᓂ, “ᐄᑦᔨᑉᑎᒧᐊᕐᓂᐊᕐᓇᒃ; ᓇᔪᕐᑕᐅᖁᔭᓐᓂ ᐅᖃᐅᑎᓂᐊᕐᐸᒋᑦ ᓄᓇᒋᓂᐊᕐᑕᕐᓂᒃ.

³ ᑕᒫᓂ ᓄᓇᖃᑬᓐᓇᓕᕆᑦ, ᐃᓚᒋᓂᐊᕐᐸᒋᑦ, ᓮᒻᒪᕐᑎᓪᓗᑎᓪᓗ; ᐃᓕᖕᓄᑦ ᑭᖑᕚᕐᓄᓪᓗ ᓄᓁᑦ ᑕᒪᒃᑯᐊ ᑐᓂᔪᒫᕋᒃᑭᑦ, ᐊᖏᕈᑎᒋᓯᒪᔭᕋᓗ ᑲᔪᓯᑎᑦᓱᒫᕐᐸᕋ ᐊᑖᑕᖕᓄᑦ ᐂᑉᕋᕼᐋᒧᑦ ᐅᖃᕕᒍᑎᒋᓚᐅᕐᑕᕋ.

⁴ ᑭᖑᕚᑎᑦ ᐅᓄᕐᑐᕐᔪᐊᓐᖑᕐᑎᑦᓱᒫᕐᐸᒃᑲ ᕿᓚᐅᑉ ᐅᓪᓗᕆᐊᖏᑎᑐᑦ, ᑕᒪᒃᑯᐊᓗ ᓄᓇᒋᔭᐅᔪᓕᒫᑦ ᑐᓂᔪᒫᕐᐸᒃᑲ ᑭᖑᕚᕐᓄᑦ; ᑭᖑᕚᑎᓪᓗ ᐊᖅᑯᑎᒋᓗᒋᑦ ᐃᓅᖃᑎᒌᒡᔪᐊᑦ ᓄᓇᕐᔪᐊᕐᒥ ᓮᒻᒪᕐᑎᑕᐅᔪᒫᕐᐳᑦ;

⁵ ᐂᑉᕋᕼᐋᒻ ᓂᐱᓐᓂᒃ ᓈᓚᓚᐅᕐᓂᖓᓄᑦ ᐊᖓᔪᖅᑳᖑᓂᓐᓂᒃ, ᐊᑐᕐᑕᐅᖁᔭᓐᓂᒡᓗ, ᒪᓕᒐᒃᓴᐅᖁᔭᓐᓂᒡᓗ ᐱᖁᔭᓐᓂᒡᓗ ᒪᓕᑦᓯᐊᓚᐅᕐᒪᑦ.”

⁶ ᑍᒤᒻᒪᑦ ᐂᓴᑭ ᓄᓇᖃᓕᓚᐅᕐᐳᖅ ᒋᕌᕆᒥ.

⁷ ᑕᕝᕙᓂᓕ ᐊᖑᑎᓂᑦ ᓄᓇᖃᕐᑐᓂᑦ ᐊᐱᕆᔭᐅᔭᕌᖓᒥ ᓄᓕᐊᖓᑕ ᒥᒃᓵᓄᑦ ᐅᖃᖃᑦᑕᕐᐳᖅ, “ᓇᔭᒐᐅᓇ”; ᑲᑉᐱᐊᓱᓚᐅᕋᒥ ᐅᖃᕆᐊᒃᓴᖅ, “ᐅᓇ ᓄᓕᐊᕋ.” ᐃᓱᒪᓚᐅᕋᒥ, “ᐊᖑᑎᓄᑦ ᑐᖁᑕᐅᑐᐃᓐᓇᕆᐊᖃᕐᐳᖓ ᕇᐱᑲ ᐱᑦᔪᑎᒋᓗᒍ”; ᑖᓐᓇ ᐃᓂᖁᓇᕐᑐᒻᒪᕆᐅᖕᒪᑦ.

⁸ ᐊᑯᓂ ᑕᕝᕙᓃᓯᒪᓕᕐᑎᓪᓗᒍ, ᐊᐱᒥᓕᑭ ᐱᓕᔅᑍᓂᒥᐅᑦ ᐊᖓᔪᖅᑳᕐᔪᐊᖓᑦ ᐃᒐᓛᒥᒍᑦ ᐃᑦᑐᐊᖓᓪᓗᓂ ᑕᑯᓐᓇᕐᐳᖅ ᐂᓴᑭ ᕇᐱᑲᒥᒃ ᐃᕿᒻᒥᑎᓪᓗᒍ ᓄᓕᐊᒥᑐᑦ.

⁹ ᐊᐱᒥᓕᑭᐅᓪᓗ ᐂᓴᑭ ᕾᖁᕚ, ᐅᖃᐅᑎᓪᓗᒍᓗ, “ᑕᑯᒋᑦ, ᑖᓐᓇ ᐊᕐᓇᖅ ᓄᓕᐊᕆᕙᑦ; ᓱᒻᒪᓪᓕ ᐅᖃᖃᑦᑕᕐᐱᑦ, ‘ᐅᓇ ᓇᔭᒐ?’” ᐂᓴᑭᐅᑉ ᑭᐅᕚ, “ᐃᓱᒪᖃᑦᑕᓚᐅᕋᒪ ᑐᖁᑕᐅᓂᐊᕋᓱᒋᓪᓗᖓ.”

¹⁰ ᐊᐱᒥᓕᑭᓕ ᐅᖃᓕᕐᐳᖅ, “ᐅᕙᑦᑎᓐᓄᑦ ᖃᓄᐃᓕᐅᕋᓱᖕᓂᕐᐱᑦ? ᐊᖑᑎᑦ ᐃᓚᖓᓐᓄᑦ ᓄᓕᐊᑦ ᐃᓐᓇᖓᖃᑎᒋᔭᐅᔪᓐᓇᓚᐅᕐᐳᖅ, ᐃᓐᓇᖓᖃᑎᒋᔭᐅᓐᓂᕐᐸᑦ ᑕᕝᕙ ᐅᕙᑦᑎᓐᓂᒃ ᐸᓯᔭᒃᓴᓐᖑᕐᑎᑦᓯᒐᔭᓚᐅᕐᐳᑎᑦ.”

¹¹ ᐊᐱᒥᓕᑭᓗ ᐃᓄᓕᒫᓄᑦ ᐅᓗᕆᐊᓇᕐᑐᒥᒃ ᐅᖃᓕᕐᐳᖅ ᐃᒫᒃ: “ᓇᓪᓕᐊᑦ ᐆᒥᖓ ᐊᖑᒻᒥᒃ ᓄᓕᐊᖓᓂᒡᓘᓐᓃᑦ ᐊᒃᑐᐃᔪᖅ ᑖᓐᓇ ᑐᖁᑕᒃᓴᐅᕗᖅ.”

¹² ᐂᓴᑭᓗ ᑕᕝᕙᓂ ᓄᓇᒥ ᐱᕈᕐᓯᐊᒃᓴᓂᒃ ᑲᓐᖓᕐᓱᐃᕗᖅ, ᑕᒪᑐᒪᓂᓗ ᐊᕐᕌᒍᒥ ᐱᕈᕐᑐᓂᒃ ᑲᑎᕐᓱᐃᓚᐅᕐᐳᖅ 100ᐃᕐᑐᓪᓗᐊᕐᑐᓂᒃ ᐅᓄᕐᓂᕐᓴᓂᒃ, ᐊᑕᓂᐅᑉ ᓮᒻᒪᕐᑎᓚᐅᕐᒪᒍ.

¹³ ᐊᖑᓪᓗ ᐊᒃᓗᐃᑦᑑᐊᓘᓕᓚᐅᕐᐳᖅ, ᐱᑖᕐᐸᓪᓕᐊᑐᐃᓐᓇᕐᓗᓂ ᐊᔪᕐᓴᖏᑦᑐᕐᔪᐊᖑᓂᕐᒧᑦ ᐊᒡᓛᑦ ᑎᑭᓪᓗᓂ.

¹⁴ ᐆᒪᔪᖁᑎᖃᓚᐅᕐᒪᑦ ᐅᓄᕐᑐᒻᒪᕆᐊᓗᖕᓂᒃ ᓰᐱᓂᒃ ᐃᒻᒧᒃᓯᐅᒐᕐᓂᒡᓗ, ᐱᔨᖃᕐᓗᓂᓗ ᐅᓄᕐᑐᓂᒃ, ᐱᓕᔅᑍᓂᒥᐅᓂᓪᓗ ᐊᒡᓛᑦ ᓱᒐᓗᓗᐊᕆᔭᐅᓕᓚᐅᕐᐳᖅ.

¹⁵ ᑍᒤᒻᒪᑦ ᐃᒥᕐᑕᕐᕕᓕᒫᑦ ᐱᓕᔅᑍᓂᒥᐅᓂᑦ ᓄᓇᒥᒃ ᐃᓗᓪᓕᕐᓱᕐᑕᐅᓚᐅᕐᐳᑦ ᑕᑕᓪᓗᒋᑦ ᐂᓴᑭᐅᑉ ᐊᑖᑕᖓᑕ ᐂᑉᕋᕼᐋᒻ ᐱᔨᖏᓐᓄᑦ ᐃᑎᕐᓴᓕᐅᕐᑕᐅᓯᒪᔪᑦ ᓱᓕ ᐂᑉᕋᕼᐋᒻ ᐃᓅᑎᓪᓗᒍ.

¹⁶ ᑕᕝᕙ ᐊᐱᒥᓕᑭ ᐅᖃᓕᕐᐳᖅ ᐂᓴᑭᒧᑦ, “ᓄᓇᑦᑎᓐᓂᑦ ᐊᐅᓪᓚᓕᕆᑦ; ᐅᕙᑦᑎᓐᓂᑦ ᐊᒡᓛᑦ ᐱᔪᓐᓇᕐᓂᕐᓴᐅᓕᕋᕕᑦ.”

¹⁷ ᑍᒤᒻᒪᑦ ᐂᓴᑭ ᑕᕝᕙᓐᖓᑦ ᓄᓇᒥᑦ ᐊᐅᓪᓚᕐᐳᖅ, ᑕᖕᒫᕐᓗᓂᓗ ᒋᕌᕆᐅᑉ ᓇᕐᓴᖓᓂ, ᑕᕝᕙᓂᓗ ᓄᓇᖃᓕᕐᓗᓂ.

¹⁸ ᑕᕝᕙ ᑕᒫᓂ ᐃᒥᕐᑕᕐᕕᖕᓂᒃ ᐃᑎᕐᓴᓕᐅᕆᒋᕗᖅ ᐂᑉᕋᕼᐋᒻ ᐃᓅᑎᓪᓗᒍ ᐃᒥᕐᑕᕐᕕᓕᐊᕆᔭᐅᓚᐅᕐᑐᓂᒃ; ᑖᒃᑯᐊ ᐱᓕᔅᑍᓂᒥᐅᓂᑦ ᓄᓇᒥᒃ ᐃᓗᓪᓕᕐᓱᕐᑕᐅᓚᐅᕐᒪᑕ ᐂᑉᕋᕼᐋᒻ ᑐᖁᖓᑕ ᑭᖑᓂᖓᓂ; ᐂᓴᑭᐅᓪᓗ ᑍᒫᑦᓮᓐᓇᖅ ᐊᑎᖃᕐᑎᑉᐰᑦ ᐊᑖᑕᖓᑕ ᐊᑎᖃᕐᑎᓚᐅᕐᑕᖏᑎᑐᑦ.

¹⁹ ᐂᓴᑭᐅᓪᓗ ᐱᔨᖏᑦ ᐃᒥᕐᑕᕐᕕᒃᓴᒥᒃ ᐃᑎᕐᓴᓕᐅᕆᕗᑦ ᑕᒫᓂ ᓇᕐᓴᒥ ᓇᓂᓯᓪᓗᑎᒡᓗ ᐃᒥᕐᒥᒃ ᓄᓇᐅᑉ ᐃᓗᐊᓂᑦ ᑰᒃᑐᒥᒃ.

²⁰ ᓰᐱᓕᕆᔩᓪᓗ ᑕᒫᓂ ᒋᕌᕆᒥᐅᑦ ᐂᕙᖃᑎᖃᓕᓚᐅᕐᐳᑦ ᐂᓴᑭᐅᑉ ᓰᐱᓕᕆᔨᖁᑎᖏᓐᓄᑦ ᐅᖃᕐᓗᑎᒃ, “ᐅᓇᓕ ᐃᒪᖁᑎᕗᑦ.” ᑍᒤᒻᒪᑦ ᐂᓴᑭᐅᑉ ᑖᓐᓇ ᐃᒥᕐᑕᕐᕕᒃ ᐊᑦᓯᕐᐹ ᐃᓰᒃᒥᒃ, ᑕᒫᓂ ᐂᕙᖃᑎᒋᔭᐅᓚᐅᕋᒥᒃ.

²¹ ᐃᒥᕐᑕᕐᕕᒃᓴᒥᒡᓗ ᐃᑎᕐᓴᓕᐅᕆᒃᑲᓐᓂᕆᕗᑦ, ᑖᓐᓇᓕᑦᑕᐅᖅ ᓱᓕ ᐂᕙᑦᔪᑕᐅᓕᕆᕗᖅ, ᑍᒤᒻᒪᑦ ᐊᑦᓯᕆᕚ “ᓯᑦᓇᒥᒃ.”

²² ᑕᕝᕙᓐᖓᓪᓗ ᓄᓇᒥᑦ ᓅᓐᓇᒥ ᐊᓯᐊᓄᑦ ᐃᒥᕐᑕᕐᕕᒃᓴᒥᒃ ᐃᑎᕐᓴᓕᐅᕆᒃᑲᓐᓂᕆᕗᖅ, ᑖᓐᓇᓕ ᐂᕙᑦᔪᑕᐅᓐᖏᓚᖅ, ᑍᒤᒻᒪᑦ ᐊᑦᓯᕐᐹ “ᕆᕼᐅᐳᑎᒥᒃ.” ᐅᖃᕐᓗᓂ, “ᒫᓐᓇ ᐊᑕᓂᐅᑉ ᐃᓂᑖᕐᑎᑉᐹᑎᒍᑦ, ᑕᒫᓂᓗ ᐱᕙᓪᓕᐊᑦᓯᐊᕈᓐᓇᕐᓂᐊᓕᕐᐳᒍᑦ.”

²³ ᑕᒫᓐᖓᓪᓗ ᐱᓪᓗᓂ ᐱᐊᕐᓯᐸᒧᐊᕐᐳᖅ.

²⁴ ᑕᒪᑐᒪᓂᓗ ᐅᓐᓄᐊᒥ ᐊᑕᓂᖅ ᓴᖅᑭᑉᐳᖅ ᑖᑦᓱᒧᖓ ᐅᖃᕐᓗᓂᓗ, “ᐊᑖᑕᕕᑦ ᐂᑉᕋᕼᐋᒻ ᒎᑎᒋᕚᖓ; ᑲᑉᐱᐊᓱᖕᓂᐊᕐᓇᒃ, ᐃᓚᒋᕙᒋᑦ ᓮᒻᒪᕐᑎᓐᓂᐊᕐᐸᒋᓪᓗ ᑭᖑᕚᑎᓪᓗ ᐅᓄᕐᓯᑎᑦᓱᒫᕐᐸᒃᑲ ᐱᔨᒐ ᐂᑉᕋᕼᐋᒻ ᐱᑦᔪᑎᒋᓪᓗᒍ.”

²⁵ ᑕᕝᕙᓂᓗ ᐂᓴᑭ ᑐᓂᕐᕈᓯᕐᕕᓕᐅᕐᐳᖅ ᑐᒃᓯᐊᕐᓗᓂᓗ ᐊᑕᓂᕐᒧᑦ, ᑕᕝᕙᓂᓗ ᑕᖕᒫᕐᑎᕐᓗᓂ, ᐱᔨᖏᓪᓗ ᐃᒥᕐᑕᕐᕕᒃᓴᒥᒃ ᐃᑎᕐᓴᓕᐅᕆᕗᑦ.

ᐂᓴᑭᐅᑉ ᐊᐱᒥᓕᑭᐅᓪᓗ ᐊᖏᖃᑎᒌᖕᓂᖏᒃ

²⁶ ᐊᐱᒥᓕᑭᓗ ᒋᕌᕆᒥᓐᖔᕐᓗᓂ ᑎᑭᑉᐹ ᐃᓚᖃᕐᓗᓂ ᐊᕼᐅᔮᑎᒥᒃ ᐃᓱᒪᓕᐅᕐᑎᒥᓂ ᐱᑰᓕᒥᒡᓗ ᐅᓇᑕᕐᑐᒃᓴᖁᑎᖏᓐᓄᑦ ᐊᖓᔪᖅᑳᖑᔪᒥᒃ.

²⁷ ᑕᕝᕙ ᐂᓴᑭᐅᑉ ᐊᐱᕆᕔᑦ, “ᓱᖕᒪᑦ ᐅᕙᓐᓄᑦ ᑎᑭᑉᐱᓯ, ᖃᐅᔨᓚᐅᕋᒪ ᐆᒥᒋᓪᓗᖓ ᐊᐅᓪᓚᕐᑎᓚᐅᕋᑦᓯᓐᖓ?”

²⁸ ᑖᒃᑯᐊ ᑭᐅᕚᑦ, “ᒫᓐᓇ ᓇᓗᓇᖏᑦᑐᒥᒃ ᖃᐅᔨᒐᑦᑕ ᐊᑕᓂᐅᑉ ᐃᓚᒋᖕᒪᑎᑦ; ᐅᖃᓕᕐᐳᒍᑦ, ᐅᖃᕕᖃᑎᒌᒋᐊᖃᕋᑦᑕ ᐃᓕᖕᓄᑦ ᐅᕙᑦᑎᓐᓄᓪᓗ, ᐊᖏᖃᑎᒌᒍᑎᓕᐅᓚᐅᕐᑕ ᐃᓕᖕᓄᑦ.

²⁹ ᐅᕙᑦᑎᓐᓂᒃ ᖃᓄᐃᓕᓯᖁᓇᒃ, ᑍᒫᒃᑕᐅᖅ ᐃᓕᑦᓯᓐᓂᒃ ᐊᒃᑐᕐᓯᓚᐅᖏᓐᓇᑦᑕ ᖃᓄᐃᓕᓯᓚᐅᕋᑕᓗ ᐱᐅᔪᒥᒃ ᐱᓂᐊᕐᓂᖃᕐᓗᑕ ᓮᒪᓇᕐᑐᒥᒃ ᐊᐅᓪᓚᕐᑎᑦᓯᓚᐅᕐᐳᒍᑦ. ᒫᓐᓇᓗ ᐊᑕᓂᐅᑉ ᓮᒻᒪᕐᑎᓯᒪᕚᑎᑦ.”

³⁰ ᑍᒤᒻᒪᑦ ᓂᕆᓂᐊᕐᑕᖏᓐᓂᒃ ᐊᑐᐃᓐᓇᕈᕐᑎᕆᕗᖅ, ᑖᒃᑯᐊᓗ ᓂᕆᕗᑦ ᐃᒥᕐᓗᑎᒡᓗ.

³¹ ᖃᐅᑎᓪᓗᒍᓕ ᐅᓪᓛᒻᒪᕆᒃᑯᑦ ᑖᒃᑯᐊ ᐊᑐᓂᑦ ᐅᖃᕕᒍᑎᓕᐅᕐᐳᑦ ᐃᒻᒥᖕᓄᑦ; ᐂᓴᑭᐅᓪᓗ ᐊᐅᓪᓚᕐᑎᑉᐰᑦ, ᐊᕕᓕᕐᓗᑎᒡᓗ ᐃᓚᓐᓇᕇᑦᓯᐊᕐᓗᑎᒃ.

³² ᐅᓪᓗᒥᓗ ᑖᑦᓱᒪᓂ ᐂᓴᑭᐅᑉ ᐱᔨᖏᑕ ᐅᐸᒡᓗᒍ ᐃᒥᕐᑕᕐᕕᒃᓴᒥᒃ ᐃᑎᕐᓴᓕᐅᕐᑕᒥᖕᓂᒃ ᐅᖃᐅᑎᕚᑦ, “ᐃᒥᕐᒥᒃ ᓇᓂᓯᕗᒍᑦ.”

³³ ᑖᓐᓇᓗ ᐃᒥᕐᑕᕐᕕᒃ ᐊᑦᓯᕐᐹ “ᓯᐸᒥᒃ.” ᑍᒫᒃ ᑕᕝᕙ ᐃᒡᓗᒐᓮᑦ ᐱᐊᕐᓯᐸᒥᒃ ᐊᑎᖃᓕᕐᐳᑦ ᐅᓪᓗᒥᒧᑦ ᑎᑭᓪᓗᒍ.

ᐄᓴᐅᑉ ᐃᓅᖃᑎᒃᓴᔭᕆᓐᖏᑕᒥᓂᒃ ᓄᓕᐊᕐᑖᕐᓂᖓ ᒪᕐᕉᖕᓂᒃ

³⁴ ᐄᓴᓕ ᐊᕐᕌᒍᖃᓕᕐᓗᓂ 40ᓂᒃ, ᓄᓕᐊᓂᓚᐅᕐᐳᖅ ᔫᑎᑕᒥᒃ ᐲᕆᐅᑉ ᐸᓂᖓᓂᒃ ᕼᐃᑍᑎᒥᐅᑕᒥᒃ, ᐸᓯᒫᑎᒥᒡᓗ ᐃᓘᓂᐅᑉ ᐸᓂᖓᓂᒃ ᕼᐃᑍᑎᒥᐅᑕᐅᖕᒥᔪᒥᒃ.

³⁵ ᑖᒃᑯᐊᒡᓕ ᐂᓴᑭᐅᑉ ᕇᐱᑲᐅᓪᓗ ᐃᓅᓯᖏᖕᓂᒃ ᖁᕕᐊᓇᕐᑎᑦᓯᓚᐅᓐᖏᓚᒃ.