ᒨᓯᓯ ᓯᕗᓪᓖᑦ 25 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᑉᕋᕼᐋᒻ ᑭᖑᕚᕆᔭᖏᑕᑦᑕᐅᖅ ᐃᓚᖏᑦ

¹ ᐂᑉᕋᕼᐋᒻᓗ ᓄᓕᐊᓂᒃᑲᓐᓂᕐᐳᖅ, ᐊᑎᖃᕐᑐᒥᒃ ᑭᑑᕋᒥᒃ.

² ᑖᑦᓱᒪᓗ ᕿᑐᕐᖓᕐᑖᕐᑎᑉᐹ ᔨᒻᕋᓐᒥᒃ, ᔫᒃᓵᓐᒥᒡᓗ, ᒥᑖᓂᒥᒡᓗ, ᒥᑎᐊᓂᒥᒡᓗ, ᐃᓴᐸᒃᒥᒡᓗ, ᓱᐊᒥᒡᓗ.

³ ᔫᒃᓵᓐ ᐊᑖᑕᒋᔭᐅᓚᐅᕐᐳᖅ ᓰᐸᒧᑦ ᑎᑖᓂᒧᓪᓗ, ᑎᑖᓂᓗ ᐃᕐᓂᖃᕐᓗᓂ ᐊᓱᕆᒥᒃ, ᓕᑐᓯᒥᒡᓗ, ᓕᐅᒥᒥᒡᓗ.

⁴ ᒥᑎᐊᓂᐅᓪᓕ ᐃᕐᓂᖏᑦ ᐅᑯᐊᖑᕗᑦ ᐃᐸ, ᐃᐱᕆ, ᕼᐊᓅᒃ, ᐊᐰᑕ, ᐃᐅᓪᑖᓗ. ᑖᒃᑯᐊᓕᒫᓪᓗ ᑕᒪᕐᒥᒃ ᑭᖑᕚᕆᔭᐅᕗᑦ ᑭᑑᕋᒧᑦ.

⁵ ᐂᑉᕋᕼᐋᒻᓗ ᑕᒪᕐᒥᒃ ᐱᖁᑎᓕᒫᓂ ᐂᓴᑭᒧᑦ ᑐᓂᕔᑦ;

⁶ ᓄᓕᐊᖓᑕ ᐊᓯᐊᒍᑦ ᐃᕐᓂᕐᑖᕆᓯᒪᔭᓂ ᑐᓂᓯᕕᒋᕔᑦ ᑐᓂᕐᕈᑎᓂᒃ, ᐃᓅᓂᕐᒥᓂ ᓱᓕ ᑖᒃᑯᐊ ᐃᕐᓂᓂ ᐊᐅᓪᓚᕐᑎᑉᐰᑦ ᐃᕐᓂᕐᒥᓄᑦ ᐂᓴᑭᒧᑦ ᑲᑎᒪᔭᐅᖁᓇᒋᑦ, ᓄᓇᐅᑉ ᓯᕿᓐᓂᓕᕐᕕᐊᑕ ᓇᓛᓄᑦ.

ᐂᑉᕋᕼᐋᒻ ᑐᖁᓂᖓ ᐃᓗᕕᕐᑕᐅᓂᖓᓗ

⁷ ᐅᑯᐊ ᑕᕝᕙ ᐂᑉᕋᕼᐋᒻ ᐅᓪᓗᖏᑦ ᐊᕐᕌᒍᖏᓪᓗ ᐃᓅᓯᕐᒥᓂ, ᐊᕐᕌᒍᖃᓚᐅᕐᐳᖅ 175ᓂᒃ.

⁸ ᐂᑉᕋᕼᐋᒻ ᐊᓂᕐᓇᖏᓚᐅᕐᐳᖅ ᐃᑦᑐᐊᓘᓕᕐᓗᓂ, ᐃᓄᑐᖃᐅᓪᓗᓂ ᐊᕐᕌᒍᖏᑦ ᐅᓄᕐᑐᐊᓘᓕᕐᓗᑎᒃ, ᐃᓚᒋᓚᐅᕐᑕᒥᓄᓪᓗ ᐃᓚᓕᐅᑎᓪᓗᓂ.

⁹ ᐃᕐᓂᖏᒃᑕᓗ ᐂᓴᑭᐅᑉ ᐃᓯᒥᐅᓪᓗ ᐃᓗᕕᕐᐹᒃ ᕾᕈᓱᖕᒥ ᒪᒃ-ᐲᓚᒥ, ᐱᕈᕐᓰᕕᖃᕐᑐᒥ ᐃᐸᕋᓂᐅᑉ ᔪᕼᐊᕆᐅᑉ ᐃᕐᓂᖓᑕ ᓄᓇᖁᑎᕕᓂᖓᓄᑦ ᕼᐃᑍᑎᒥᐅᑕᕐᒧᑦ, ᒪᒻᕆᐅᑉ ᓯᕿᓐᓂᓕᕐᕕᐊᑕ ᓇᓛᓃᑦᑐᒧᑦ.

¹⁰ ᑖᓐᓇ ᐂᑉᕋᕼᐋᑉ ᐱᕈᕐᓰᕕᒃ ᓂᐅᕕᐊᕆᓚᐅᕐᒪᒍ ᕼᐃᑍᑎᒥᐅᓂᑦ; ᐂᑉᕋᕼᐋᒻᓗ ᐃᓗᕕᕐᑕᐅᕗᖅ ᓄᓕᐊᓂ ᓵᕋ ᐃᓗᕕᖃᖃᑎᒋᓪᓗᒍ.

¹¹ ᐂᑉᕋᕼᐋᒻᓗ ᑐᖁᓯᒪᓕᕐᑎᓪᓗᒍ, ᐃᕐᓂᖓ ᐂᓴᑭ ᒎᑎᐅᑉ ᓮᒻᒪᕐᑎᓚᐅᕐᐹ. ᐂᓴᑭᓗ ᓄᓇᖃᓚᐅᕐᐳᖅ ᐱᐊᕐ-ᓚᕼᐂ-ᕈᐂᒥ.

ᐄᓯᒥᐅᓪ ᑭᖑᕚᖏᑦ

¹² ᐅᑯᐊ ᑕᕝᕙ ᐃᓯᒥᐅᓪ ᑭᖑᕚᖏᑦ, ᐂᑉᕋᕼᐋᒻ ᐃᕐᓂᖓᑕ, ᐂᒡᒐᐅᑉ ᐄᑦᔨᑉᑎᒥᐅᑕᐅᑉ ᓵᕋᐅᑉ ᓯᐊᓛᖓᑕ, ᐂᑉᕋᕼᐋᒻᒥᑦ ᐃᕐᓂᕐᑖᕆᓚᐅᕐᑕᖓᑕ,

¹³ ᐅᑯᐊ ᑕᕝᕙ ᐊᑎᖏᑦ ᐃᓯᒥᐅᑉ ᐃᕐᓂᖏᑕ ᐊᖓᔪᒃᓯᕐᓂᑦ ᐱᒋᐊᕐᓗᒋᑦ; ᓂᐰᐅᑎ ᐄᓯᒥᐅᑉ ᐊᖓᔪᒃᓯᕐᐹᖁᑎᖓ; ᑭᑕᕆ, ᐊᑉᑎᐅᓪ, ᒥᑉᓵᒻ,

¹⁴ ᒥᔅᒪ, ᑑᒪ, ᒫᓴ,

¹⁵ ᕼᐊᑖᑦ, ᑎᒪ, ᔨᑖᕐ, ᓇᐱᔅ, ᑭᑎᒪᓗ.

¹⁶ ᑖᒃᑯᐊ ᑕᕝᕙ ᐃᓯᒥᐅᑉ ᐃᕐᓂᖏᑦ ᐊᑎᖏᓪᓗ, ᓄᓇᒋᔭᖏᑕ ᐊᑎᕐᑖᕆᓚᐅᕐᐰᑦ, ᓄᓇᖃᕐᕕᒋᕙᒃᑕᕕᓂᖏᓐᓄᓪᓗ ᐊᑎᕆᔭᐅᓪᓗᑎᒃ, 12ᓗᑎᒃ ᐊᖓᔪᖅᑳᖑᓚᐅᕐᐳᑦ ᑭᖑᕚᒥᖕᓄᑦ.

¹⁷ ᐅᑯᐊ ᑕᕝᕙ ᐃᓯᒥᐅᑉ ᐊᕐᕌᒍᖏᑦ ᐃᓅᓚᐅᕐᐳᖅ 137ᓂᒃ ᐊᕐᕌᒍᓂᒃ; ᐊᓂᕐᓇᖏᓚᐅᕐᐳᖅ ᑐᖁᓪᓗᓂ ᐃᓚᒋᓚᐅᕐᑕᒥᓄᓪᓗ ᐃᓚᓕᐅᑎᓪᓗᓂ.

¹⁸ ᑐᖁᓚᐅᕐᐳᖅ ᐃᓚᓕᒫᓂ ᑲᑎᒪᓪᓗᓂᒋᑦ. ᑖᒃᑯᐊ ᓄᓇᖃᓚᐅᕐᐳᑦ ᕼᐊᕕᓚᒥᑦ ᓲᕆ ᑎᑭᓪᓗᒍ, ᐄᑦᔨᑉᑎᐅᑉ ᐃᑎᕕᐊᓂ ᐊᓯᕆᐊᒧᐊᕆᐊᑉ ᓇᓛᓂ; ᑖᒃᑯᐊᓗ ᓄᓇᖃᓚᐅᕐᐳᑦ ᐃᓅᖃᑎᑎᒃ ᓄᓇᖃᖃᑎᒋᓪᓗᒋᑦ.

ᐄᓴᐅᓪᓗ ᔧᑰᓪᓗ ᐃᓅᓕᕐᓂᖏᒃ

¹⁹ ᐅᑯᐊ ᑕᕝᕙ ᐂᓴᑭᐅᑉ ᑭᖑᕚᖏᑦ, ᐂᑉᕋᕼᐋᒻ ᐃᕐᓂᖓᑕ; ᐂᑉᕋᕼᐋᒻ ᐂᓴᑭᐅᑉ ᐊᑖᑕᒋᓚᐅᕐᐹ.

²⁰ ᐂᓴᑭ ᓄᓕᐊᓂᓚᐅᕐᐳᖅ ᕇᐱᑲᒥᒃ ᐊᕐᕌᒍᖃᓕᕐᓗᓂ 40ᓂᒃ, ᐱᑐᐃᓕᐅᑉ ᐸᓂᖓᓂᒃ ᐊᕋᒥᐊᒥᐅᑕᒥᒃ ᓄᓇᒥᑦ ᐸᑖᓐ-ᐊᕌᒻᒥ, ᓔᐸᓂᐅᑉ ᓇᔭᖓᓂᒃ ᐊᕋᒥᐊᒥᐅᑕᐅᑉ.

²¹ ᐂᓴᑭᓗ ᑐᒃᓯᐊᓚᐅᕐᐳᖅ ᐊᑕᓂᕐᒧᑦ, ᓄᓕᐊᖓ ᕿᑐᕐᖏᓱᐃᑦᑑᖕᒪᑦ; ᑐᒃᓯᐊᕐᓂᖓᓗ ᐊᑕᓂᐅᑉ ᑐᓴᕐᐹ, ᓄᓕᐊᖓᓗ ᕇᐱᑲ ᓄᑕᕋᒃᓴᖃᓕᕐᐳᖅ.

²² ᓄᑕᕋᒃᓵᒡᓗ ᐃᒻᒥᖕᓅᓕᕐᐴᒃ ᐃᓗᖓᓂ; ᕇᐱᑲᓗ ᐅᖃᕐᐳᖅ, “ᖃᓄᐃᖏᑉᐸᑎᒃ, ᓱᖕᒪᑦ ᑍᒤᒃᐳᖔ?” ᐊᑕᓂᕐᒧᓪᓗ ᐊᐱᕐᓱᓕᕐᐳᖅ.

²³ ᐊᑕᓂᐅᓪᓗ ᐅᖃᐅᑎᕚ, “ᐃᓅᖃᑎᒌᒡᔪᐊᓂᒃ ᒪᕐᕈᐃᓂᒃ ᐃᓗᒥᐅᑕᖃᕐᐳᑎᑦ ᐃᒡᓕᐊᕐᓂ, ᐃᓅᒃ ᒪᕐᕉᒃ, ᐃᕐᓂᐊᕆᒍᕕᒋᒃ, ᐃᓅᖃᑎᒌᒍᓐᓇᕈᒫᓐᖏᓚᒃ; ᐂᑉᐸᖓ ᓴᓐᖏᓂᕐᓴᐅᔪᒫᕐᐳᖅ ᐂᑉᐸᕐᒥᓂᑦ, ᐊᖓᔪᒃᓯᕐᓗ ᐱᔨᑦᓯᕈᒫᕐᐳᖅ ᓄᑲᕐᒥᓂᒃ.”

²⁴ ᕿᑐᕐᖏᕕᒃᓴᖓᓗ ᓇᓪᓕᐅᑎᖕᒪᑦ, ᑕᑯᒋᑦ, ᒪᕐᕈᓕᕗᖅ.

²⁵ ᓯᕗᓪᓕᐅᓪᓗᓂ ᐊᓂᔪᖅ ᐊᐅᐸᕐᑐᒥᒃ ᐅᕕᓂᖃᕐᐳᖅ, ᒥᖅᑯᕐᒥᒡᓗ ᐅᓕᒃᓯᒪᔫᔮᕐᓗᓂ; ᑍᒤᓐᓂᖓᓄᑦ ᐊᑎᖃᕐᑎᑕᐅᓕᓚᐅᕐᐳᖅ ᐄᓴᒥᒃ.

²⁶ ᑭᖑᓪᓕᐅᓪᓗᓂ ᐊᓂᔪᖅ, ᑎᒍᒥᐊᓚᐅᕐᐳᖅ ᐄᓴᐅᑉ ᑭᖕᒥᐊᓂᒃ; ᐊᑎᖃᕐᑎᑕᐅᕗᕐᓗ ᔧᑯᒥᒃ. ᐂᓴᑭᓗ ᐊᕐᕌᒍᖃᓕᓚᐅᕐᐳᖅ 60ᓂᒃ ᐃᕐᓂᖏᒃ ᐃᓅᓕᕐᑎᓪᓗᒋᒃ.

ᐄᓴᐅᑉ ᓂᐅᕐᕈᑎᖃᕐᓂᖓ ᐊᖓᔪᒃᓯᐅᓂᕐᒥᓂᒃ

²⁷ ᑖᒃᑯᐊᒡᓗ ᓄᑲᑉᐱᐊᒃ ᐱᕈᕋᒥᒃ, ᐄᓴ ᐊᔪᖏᑦᑑᓪᓗᓂ ᐆᒪᔪᕐᓯᐅᕐᑎᐅᓚᐅᕐᐳᖅ, ᓯᓚᒥᐅᑕᐅᓪᓗᓂᓗ, ᔧᑯᓕ ᐃᓱᒪᒃᓴᕐᓯᐅᕐᑎᓚᐅᕐᐳᖅ, ᑐᐱᕐᒥᐅᑕᐅᓪᓗᓂ.

²⁸ ᐂᓴᑭᐅᓪᓗ ᓇᒡᓕᒋᓚᐅᕐᐹ ᐄᓴ, ᐆᒪᔪᕐᑕᕕᓂᖏᓐᓂᒃ ᓂᕆᖃᑦᑕᕋᒥ; ᕇᐱᑲᐅᓪᓕ ᔧᑯ ᓇᒡᓕᒋᕚ.

²⁹ ᐅᓪᓗᐃᑦ ᐃᓚᖓᓐᓂ ᔧᑰᑉ ᓂᕿᓕᐅᓚᐅᕐᐳᖅ ᖃᔪᓕᐅᕐᓗᓂ ᐃᓚᖃᐅᕐᑐᒥᒃ, ᐄᓴᓗ ᑎᑭᑉᐳᖅ ᐆᒪᔪᕐᓯᐅᕐᑐᕕᓂᐅᓪᓗᓂ, ᑳᓕᕐᓯᒪᓪᓗᓂᓗ.

³⁰ ᐄᓴᓗ ᔧᑯᒧᑦ ᐅᖃᕐᐳᖅ, “ᑳᒃᑐᐊᓘᒐᒪ; ᑕᕝᕙᓐᖓᑦ ᐊᐅᐸᕐᑐᒥᑦ ᓂᕆᑎᓚᐅᓐᖓ.” (ᑍᒤᒻᒪᑦ ᐄᓴ ᐊᑎᖃᕐᑎᑕᐅᓕᓚᐅᕐᐳᖅ ᐄᑐᒥᒥᒃ.)

³¹ ᔧᑰᑉ ᑭᐅᕚ, “ᓯᕗᓪᓕᕐᒥᒃ ᐊᖓᔪᒃᓯᐅᓃᑦ ᐊᑭᓕᐅᑎᓚᐅᕈᒃ ᐅᕙᓐᓄᑦ.”

³² ᐄᓴᓗ ᐅᖃᕐᐳᖅ, “ᐱᕐᓕᕐᓗᖓ ᑐᖁᑐᐃᓐᓇᕆᐊᖃᓕᕋᒪ; ᓱᓇᒧᓪᓕ ᐊᑐᕋᔭᓕᕐᐹ ᐊᖓᔪᒃᓯᐅᓂᖅ?”

³³ ᔧᑰᑉ ᑭᐅᕚ, “ᐅᖃᕕᖅᑳᓚᐅᕆᑦ ᐅᕙᓐᓄᑦ.” ᐄᓴᓗ ᐅᖃᕕᒃᐳᖅ, ᐊᖓᔪᒃᓯᐅᓂᓂ ᐊᑭᓕᐅᑎᒋᔪᒪᓪᓗᒍ ᔧᑯᒧᑦ.

³⁴ ᑕᕝᕙ ᔧᑰᑉ ᐄᓴ ᓂᐊᖂᔭᒥᒃ ᑐᓐᓂᕆᕚ ᖃᔪᓕᐊᒥᓂᒡᓗ ᐱᕈᕐᑐᓂᒃ ᓕᓐᑎᓪᓯᓂᒃ ᐊᑎᖃᕐᑐᒥᒃ ᐃᓚᓕᖕᒥᒃ, ᓂᕆᕗᖅ ᐃᒥᕐᓗᓂᓗ, ᒪᑭᓐᓇᒥ ᑕᕝᕙᓐᖓᑦ ᐅᐸᒃᑕᒥᓄᐊᕆᓪᓗᓂ. ᑍᒫᒃ ᐄᓴᐅᑉ ᐊᖓᔪᒃᓯᐅᓂᓂ ᖁᔭᓈᓚᐅᕐᐹ.