ᒨᓯᓯ ᓯᕗᓪᓖᑦ 24 - ᐊᒡᓔᑦ ᐃᑦᔪᕐᖕᓁᑦᑐᑦᐂᓴᑭᐅᑉ ᓄᓕᐊᓂᖕᓂᖓ 1 ᐂᑉᕋᕼᐋᒻᓕ ᐃᓄᑐᖃᒻᒪᕆᐅᓕᕐᐳᖅ, ᐊᕐᕌᒍᖃᓕᓚᐅᕐᐳᖅ ᐅᓄᕐᑐᓂᒃ; ᐊᑕᓂᐅᓪᓗ ᓮᒻᒪᕐᑎᓯᒪᓚᐅᕐᐹ ᖃᓄᑐᐃᓐᓇᖅ ᐱᓇᓱᐊᕐᓂᓕᒫᖓᒍᑦ. 2 ᐂᑉᕋᕼᐋᒻ ᐱᔨᒥᓄᑦ ᐅᖃᕐᐳᖅ, ᐃᒡᓗᒥᓂ ᐊᖓᔪᒃᓯᕐᐹᒧᑦ, ᐱᖁᑎᓕᒫᖏᓐᓄᑦ ᑕᒤᓐᓄᑦ ᐊᖓᔪᖅᑲᐅᔪᒧᑦ, “ᐊᒡᒐᑎᑦ ᖁᒃᑐᕋᕐᒪ ᐊᑯᓐᓂᖓᓄᐊᓚᐅᒃᑭᑦ. 3 ᐅᖃᕕᒃᑎᓐᓂᐊᕋᒃᑭᑦ ᐊᑕᓂᐅᑉ ᐊᑎᖓᓂ ᕿᓚᐅᑉ ᓄᓇᐅᓪᓗ ᒎᑎᖓᓄᑦ, ᐃᕐᓂᕐᒪ ᓄᓕᐊᒃᓴᖓᓂᒃ ᓂᕈᐊᖁᓇᒃ ᑬᓇᓂᒥᐅᑦ ᐸᓂᖓᓐᓂᒃ ᓄᓇᖅᑲᑎᖏᔭᓐᓂᒃ. 4 ᓄᓇᓐᓄᓪᓕ ᐂᓕᕆᑦ ᐃᓚᓐᓄᑦ, ᓄᓕᐊᒃᓴᕐᓯᐅᕆᐊᕐᓗᑎᑦ ᐃᕐᓂᓐᓄᑦ ᐂᓴᑭᒧᑦ.” 5 ᐱᔨᐅᓪᓗ ᐊᐱᕆᕚ, “ᖃᓄᕐᓕ ᐊᕐᓇᖅ ᓄᓇᒧᑦ ᒪᐅᓐᖓᕈᒪᖏᑉᐸᑦ? ᑕᕝᕙ ᐃᕐᓃᑦ ᑕᐅᕗᖓ ᓄᓇᕕᓂᕐᓄᑦ ᐅᑎᕐᑎᒋᐊᖃᕋᔭᕐᐸᕌ?” 6 ᐂᑉᕋᕼᐋᒻ ᑭᐅᕚ, “ᐅᑦᔨᕐᓱᑦᓯᐊᕆᑦ ᐃᕐᓂᕋ ᑕᐅᕗᖓ ᐅᑎᖅᑯᓇᒍ! 7 ᐊᑕᓂᐅᑉ, ᕿᓚᐅᑉ ᒎᑎᖓᑕ, ᑕᒪᐅᓐᖓᕐᑎᓚᐅᕐᒪᖓ ᐊᑖᑕᒪ ᐊᖏᕐᕋᖓᓂᑦ ᓄᓇᒥᓪᓗ ᐃᓅᓕᕐᕕᒋᓚᐅᕐᑕᓐᓂᑦ, ᑖᑦᓱᒪ ᐅᖃᕕᒃᓗᓂ ᐅᖃᕐᕕᒋᓚᐅᕐᒪᖓ, ‘ᑭᖑᕚᒃᓴᕐᓄᑦ ᑕᒪᓐᓇ ᓄᓇ ᑐᓂᔪᒪᕙᕋ,’ ᐂᖏᓕᖁᑎᓂᓗ ᓯᕗᓂᕐᓂ ᑎᓕᓂᐊᕐᐹ, ᐃᕐᓂᕐᒪ ᓄᓕᐊᒃᓴᖓᓂᒃ ᓇᓂᓯᓂᐊᕐᐳᑎᑦ ᑕᐅᕙᓐᖓᑦ. 8 ᐊᕐᓇᕐᓕ ᐃᓕᖕᓄᑦ ᒪᓕᒍᒪᖏᑉᐸᑦ, ᑕᕝᕙ ᑕᒪᑐᒧᖓ ᐅᖃᕕᒍᑎᒋᔭᑦᑎᓐᓄᑦ ᕿᓚᕈᑦᔮᕐᓂᐊᕐᐳᑎᑦ; ᑭᓯᐊᓂᓕ ᐃᕐᓂᕋ ᑕᐅᕗᖓ ᐅᑎᕐᑎᑦᓴᐊᕆᐊᖃᓐᖏᓚᑦ.” 9 ᑕᕝᕙ ᐱᔨᐅᑉ ᐊᒡᒐᓂ ᐂᑉᕋᕼᐋᒻ ᐊᖓᔪᖅᑳᒥ ᖁᒃᑐᕋᖏᑕ ᐊᑯᓐᓂᖓᓄᐊᕐᐰᑦ, ᐅᖃᕕᒃᓗᓂᓗ ᐱᓇᓱᐊᕈᒪᓪᓗᓂ ᑕᒪᑐᒥᖓ. 10 ᑕᕝᕙ ᐱᔨᐅᑉ, ᐊᖓᔪᖅᑳᖓᑕ ᑳᒥᓕᖁᑎᖏᓐᓂᒃ 10ᓂᒃ ᓇᒃᓴᕐᓗᓂ ᐊᐅᓪᓚᕐᐳᖅ, ᐱᐅᓂᕐᐹᓂᒡᓗ ᓇᒃᓴᕐᓗᓂ ᑐᓂᕐᕈᑎᒃᓴᓂᒃ ᐊᖓᔪᖅᑳᖓᑕ ᐱᖏᓐᓂᒃ; ᐊᐅᓪᓚᕋᒥ ᒥᓱᐳᑍᒥᐊᒧᐊᕐᐳᖅ, ᓇᕼᐅᕆᐅᑉ ᐃᒡᓗᒐᓴᖏᓐᓄᑦ. 11 ᑕᕝᕗᖓᓗ ᑎᑭᓐᓇᒥ, ᑳᒥᓕᖁᑎᓂ ᐊᖁᕕᑎᑉᐰᑦ ᐃᒥᕐᑕᕐᕕᐅᑉ ᓴᓂᐊᓄᑦ ᐃᒡᓗᒐᓮᑦ ᓯᓚᑖᓃᑦᑐᒧᑦ, ᐅᓐᓄᓕᕐᑎᓪᓗᒍ, ᑍᒤᓪᓗᐊᓕᕌᖓᑦ ᐊᕐᓁᑦ ᐃᒥᕐᑕᕐᐸᖕᒪᑕ. 12 ᐅᖃᕐᐳᕐᓗ, “ᐊᑕᓃᖅ, ᐊᖓᔪᖅᑳᒪ ᐂᑉᕋᕼᐋᒻ ᒎᑎᖓ, ᐅᓪᓗᒥ ᐱᓇᓱᐊᕐᑕᓐᓂᒃ ᐱᔪᓐᓇᕐᑎᓚᐅᓐᖓ, ᑐᒃᓯᐊᕐᕕᒋᕙᒋᑦ, ᓇᒡᓕᖕᓃᑦ ᓱᖁᓯᔪᐃᑦᑐᖅ ᓴᖅᑭᑎᓚᐅᕈᒃ ᐊᖓᔪᖅᑳᓐᓄᑦ ᐂᑉᕋᕼᐋᒻᒧᑦ. 13 ᑕᑯᒋᑦ, ᐃᒥᕐᑕᕐᕕᐅᑉ ᓴᓂᐊᓂ ᓇᖏᕐᐳᖓ, ᐃᒡᓗᒐᓴᒡᔪᐊᑦ ᐃᓄᖏᑕ ᐸᓂᖏᑦ ᕾᓕᕐᐳᑦ ᐃᒥᕐᑕᕆᐊᕐᓗᑎᒃ. 14 ᐅᖃᐅᑎᔭᕋ ᐊᕐᓇᖅ ᐃᓅᓱᒃᑐᖅ ᐃᒫᒃ, ‘ᐃᒪᖃᐅᑏᑦ ᒪᓂᓗᒍ ᐃᒥᕐᑎᓚᐅᓐᖓ.’ ᑕᕝᕙ ᑖᑦᓱᒪ ᑭᐅᒃᐸᖓ, ‘ᐃᒥᓕᕆᑦ, ᑖᒃᑯᐊᓗ ᑳᒥᓕᖁᑎᑎᑦ ᐃᒥᕐᑎᓐᓂᐊᕐᐸᒃᑲ,’ ᑕᕝᕙ ᑍᒤᓕᔪᖅ ᑖᓐᓇ ᓇᓗᓁᓚᐅᕈᒃ ᐱᔨᖕᓄᑦ ᐂᓴᑭᒧᑦ ᓄᓕᐊᒃᓴᐅᖁᒐᕕᐅᒃ. ᑍᒫᒃ ᐱᒍᕕᑦ ᑕᕝᕙ ᖃᐅᔨᓂᐊᕐᐳᖓ ᓇᒡᓕᖕᓃᑦ ᓱᖁᓯᔪᐃᑦᑐᖅ ᓴᖅᑭᔮᕐᑎᓐᓇᕕᐅᒃ ᐊᖓᔪᖅᑳᓐᓄᑦ.” 15 ᓱᓕᓕ ᐅᖃᕇᕐᑎᓐᓇᒍ, ᑕᑯᒋᑦ, ᕇᐱᑲ ᕾᕗᖅ ᐃᒪᖃᐅᑎᓂ ᐃᕐᓱᒡᓗᒍ, ᑖᓐᓇ ᐂᑉᕋᕼᐋᒻ ᓄᑲᖓᑕ ᓇᕼᐅᕆᐅᑉ ᓄᓕᐊᖓᑕᓗ ᒥᐅᓪᑲᐅᑉ ᐃᕐᓂᖓᑕ ᐱᑐᐃᓕᐅᑉ ᐸᓂᖓ. 16 ᑖᓐᓇᓗ ᐊᕐᓇᖅ ᐃᓂᖁᓇᕐᑐᐊᓘᕗᖅ, ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑐᖅ; ᐊᒻᒧᐊᒃᓗᓂ ᐃᒥᕐᑕᕐᕕᖕᒧᐊᕋᒥ, ᐃᒪᖃᐅᑎᓂ ᐃᒻᒥᕇᕋᒥᐅᒃ ᒪᑭᑉᐳᖅ ᒪᔪᐊᓕᕐᓗᓂ. 17 ᑖᑦᓱᒪᓗ ᐱᔨᐅᑉ ᐅᓪᓚᒡᓗᓂ ᐸᕐᕆᐊᕋᒥᐅᒃ, ᐅᖃᐅᑎᕚ, “ᐃᒥᕐᑎᐊᕐᔪᓚᐅᓐᖓ ᐃᒪᖃᐅᑎᖕᓂᑦ.” 18 ᐊᕐᓇᐅᑉ ᐅᖃᐅᑎᕚ, “ᐊᖓᔪᖅᑳᒃ, ᐊᑏ ᐃᒥᓕᕆᑦ,” ᐃᒪᖃᐅᑎᓗ ᐃᕐᓱᒃᑕᓂ ᑐᐊᕕᕐᓗᓂ ᑎᒍᓪᓗᒍ, ᐃᒥᕐᑎᓕᕐᐹ. 19 ᐃᒥᕐᑎᑦᓴᕇᕋᒥᐅᒡᓕ, ᐊᕐᓇᖅ ᐅᖃᕐᐳᖅ, “ᑳᒥᓕᖁᑎᑎᑦᑕᐅᖅ ᐃᒥᕐᑎᑦᓱᒪᕙᒃᑲ ᐃᒥᕈᐃᑦᓯᐊᖁᓪᓗᒋᑦ.” 20 ᑕᕝᕙ ᑐᐊᕕᕐᓗᓂ ᐃᒪᖃᐅᑎᓂ ᐆᒪᔪᐃᑦ ᐃᒥᕐᕕᖏᓐᓄᑦ ᑯᕕᕚ, ᑐᐊᕕᕐᓗᓂᓗ ᐃᒥᕐᑕᕐᕕᖕᒥᑦ ᖃᓗᓯᔭᕐᑐᒃᑲᓐᓂᕐᐳᖅ, ᑳᒥᓕᖁᑎᖏᑦ ᑕᒪᕐᒥᒃ ᐃᒥᕇᓚᐅᖏᓐᓂᖏᓐᓂ. 21 ᐊᖑᑎᐅᓪᓕ ᑕᑯᓐᓇᑐᐃᓐᓇᓚᐅᕐᐹ ᓂᐱᖃᕋᓂ ᑐᑭᓯᔪᒪᓪᓗᓂ ᐊᑕᓂᐅᑉ ᐱᑎᒻᒪᖔᒍ ᐱᔪᒪᔭᒥᓂᒃ. 22 ᑳᒥᓖᓪᓕ ᐃᒥᕇᕐᒪᑕ, ᐊᖑᑦ ᑎᒍᓯᕗᖅ ᒎᓗᒥᒃ ᓴᓪᑰᑉ ᐊᕝᕙᖓᓂᒃ ᐅᖁᒤᓐᓂᖃᕐᑐᒥᒃ ᕿᖓᕐᒥᐅᑕᕐᒥᒃ, ᒪᕐᕉᖕᓂᒡᓗ ᐊᒡᒐᐅᒻᒥᐅᑕᒃᓴᖏᖕᓂᒃ ᒎᓗᓂᒃ ᐅᖁᒤᓐᓂᖃᕐᑐᓂᒃ ᖁᓕᓂᒃ ᓴᓪᑯᓂᒃ. 23 ᐅᖃᕐᓗᓂᓗ, “ᐅᖃᐅᑎᓚᐅᓐᖓ ᑭᓇᒧᑦ ᐸᓂᒋᔭᐅᖕᒪᖔᕐᐱᑦ ᐊᑖᑕᕕᓪᓗ ᐃᒡᓗᖓᓂ ᐃᓂᒃᓴᖃᕐᐹ, ᐅᕙᑦᑎᓐᓄᑦ ᓯᓂᒃᑕᕐᕕᒃᓴᒥᒃ?” 24 ᐊᕐᓇᐅᑉ ᑭᐅᕚ, “ᐱᑐᐃᓕᐅᑉ ᐸᓂᒋᕚᖓ ᒥᐅᓪᑲᐅᓪᓗ ᓇᕼᐅᕆᐅᓪᓗ ᐃᕐᓂᖓᑕ.” 25 ᐅᖃᕆᓪᓗᓂᒡᓗ, “ᐃᕕᒃᓱᒐᕐᓂᒃ ᐱᑕᖃᕐᐳᒍᑦ ᐆᒪᔪᐃᓪᓗ ᓂᑭᒃᓴᖏᓐᓂᒃ ᓈᒻᒪᒃᑐᓂᒃ, ᐃᓂᒃᓴᖃᑦᓯᐊᕐᓗᑕᓗ ᐅᕙᑦᑎᓐᓂ.” 26 ᐊᖑᑎᐅᓪᓗ ᓂᐊᖁᓂ ᐅᑯᓪᓗᒍ ᐊᑕᓂᖅ ᑐᒃᓯᐊᕐᕕᒋᕚ, 27 ᐅᖃᕐᓗᓂᓗ, “ᐊᑕᓂᖅ ᓂᕐᑐᕐᑕᐅᓕ, ᐊᖓᔪᖅᑳᒪ ᐂᑉᕋᕼᐋᒻ ᒎᑎᖓ, ᑖᑦᓱᒪ ᓇᒡᓕᖕᓂᓂ ᓱᖁᓯᔪᐃᑦᑐᖅ ᐳᐃᒍᖏᒻᒪᒍ ᓱᖁᓯᔪᐃᑦᑑᓂᓂᓗ ᐊᖓᔪᖅᑳᓐᓄᑦ ᓴᖅᑭᑎᒻᒪᒍ. ᐅᕙᖓᓕ, ᐊᑕᓂᐅᑉ ᑕᓯᐅᓚᐅᕐᐹᖓ ᐊᖅᑯᒻᒧᑦ ᐊᖓᔪᖅᑳᒪ ᐃᓚᖏᑕ ᐃᒡᓗᖓᓄᑦ.” 28 ᐊᕐᓇᕐᓗ ᐅᓪᓚᒡᓗᓂ ᐊᓈᓇᒃᑯᒥᓄᑦ ᐅᖃᕆᐊᕐᑐᕐᐳᖅ ᑕᒪᒃᑯᓂᖓ ᑕᒤᓐᓂᒃ. 29 ᕇᐱᑲᓕ ᐊᓂᖃᕐᐳᖅ ᓔᐸᓂᒥᒃ ᐊᑎᖃᕐᑐᒥᒃ; ᑖᓐᓇᓗ ᐅᓪᓚᒡᓗᓂ ᐊᓂᕗᖅ ᐊᖑᒻᒧᐊᕐᓗᓂᓗ ᐃᒥᕐᑕᕐᕕᖕᒦᑦᑐᒧᑦ. 30 ᓔᐸᓂᓗ ᑕᑯᒐᒥ ᕿᖓᕐᒥᐅᑕᕐᒥᒃ ᐊᒡᒐᐅᒻᒥᐅᑕᓂᒡᓗ ᓇᔭᖓᑕ ᐊᑐᕐᑕᖏᓐᓂᒃ, ᑐᓴᕋᒥᓗ ᓇᔭᖓ ᕇᐱᑲ ᐅᓂᒃᑳᕐᑎᓪᓗᒍ ᐃᒫᒃ, “ᐊᖑᑦ ᑕᕝᕙ ᐅᖃᓪᓚᓚᐅᕐᑐᖅ ᐅᕙᓐᓄᑦ.” ᑕᕝᕙ ᐊᖑᒻᒧᑦ ᐂᕗᖅ; ᑕᑯᒋᓪᓗ, ᑳᒥᓕᖁᑎᖏᑕ ᓴᓂᐊᓂ ᓇᖏᕐᐳᖅ ᐃᒥᕐᑕᕐᕕᐅᑉ ᓴᓂᐊᓂ. 31 ᐅᖃᕐᓗᓂᓗ, “ᐅᕙᑦᑎᓐᓄᐊᓚᐅᕆᑦ; ᖃᐅᔨᒐᒪ ᐊᑕᓂᐅᑉ ᓮᒻᒪᕐᑎᓯᒪᖕᒪᑎᑦ; ᓱᖕᒪᑦ ᓯᓚᒥ ᓇᖏᑐᐃᓐᓇᕐᐲᑦ? ᐃᒡᓗ ᐃᓂᒃᓴᓕᐅᕐᓯᒪᕙᕋ, ᑳᒥᓕᖁᑎᑎᓪᓗ ᐃᓂᒃᓴᖃᕐᓗᑎᒃ.” 32 ᑕᕝᕙ ᐊᖑᑦ ᐃᒡᓗᒧᑦ ᐃᑎᕐᐳᖅ; ᓔᐸᓂᐅᓪᓗ ᑳᒥᓖᑦ ᓇᖕᒪᒃᑕᖏᑦ ᐲᔭᕐᐰᑦ, ᐃᕕᒃᓱᒐᕐᓂᒡᓗ ᓂᕿᖏᓐᓂᒡᓗ ᑐᓂᓯᕕᒋᓪᓗᒍ ᑳᒥᓕᖁᑎᖏᑕ ᐱᓂᐊᕐᑕᖏᓐᓂᒃ, ᐃᒥᕐᒥᒡᓗ ᐃᑎᒐᖏᑕ ᐃᓚᒋᔭᖏᑕᓗ ᐊᖑᑎᑦ ᐅᐊᓴᐅᑎᒋᓂᐊᕐᑕᖏᓐᓂᒃ. 33 ᓂᕆᔭᒃᓮᓪᓕ ᐊᑐᐃᓐᓇᕈᕐᑕᐅᖕᒪᑕ, ᑖᓐᓇ ᐊᖑᑦ ᐅᖃᓕᕐᐳᖅ, “ᓂᕆᓂᐊᓐᖏᓚᖓ ᑎᓕᔭᐅᑦᔪᑎᒋᔭᓐᓂᒃ ᐅᖃᓚᐅᖅᑳᕐᓇᖓ.” ᓔᐸᓂᓗ ᐅᖃᕐᐳᖅ, “ᐊᑏ ᐅᖃᓪᓚᓚᐅᕆᑦ.” 34 ᐅᖃᕐᐳᕐᓗ, “ᐂᑉᕋᕼᐋᒻ ᐱᔨᒋᕚᖓ, 35 ᐊᖓᔪᖅᑳᕋ ᐊᑕᓂᐅᑉ ᓮᒻᒪᕐᑎᕐᔪᐊᕐᓯᒪᖕᒪᒍ, ᐊᔪᕐᓴᕈᓐᓃᕐᑎᓯᒪᓪᓗᓂᐅᒡᓗ; ᑐᓂᓯᕕᒋᓯᒪᓪᓗᓂᐅᒡᓗ ᓰᐱᓂᒃ ᐃᒻᒧᒃᓯᐅᒐᕐᓂᒡᓗ ᐅᓄᕐᑐᓂᒃ, ᓯᐅᓪᕕᕆᓂᒃ, ᒎᓗᓂᒡᓗ, ᓯᐊᓛᓂᒡᓗ ᐊᖑᑎᓂᒃ ᐊᕐᓇᓂᒡᓗ, ᑳᒥᓕᖕᓂᒡᓗ, ᓯᐅᑎᖅᑯᕐᑐᔪᓂᒡᓗ. 36 ᓵᕋᐅᓪᓗ ᐊᖓᔪᖅᑳᒪ ᓄᓕᐊᖓᑕ ᐃᕐᓂᕐᑖᕐᑎᓚᐅᕐᐹ ᓂᖏᐅᖑᓕᕋᓗᐊᕐᓗᓂ; ᐊᖓᔪᖅᑳᒪᓗ ᐱᔨᓕᒫᒥᓂᒃ ᐃᕐᓂᓂ ᑐᓂᓯᕕᒋᓯᒪᕚ. 37 ᐊᖓᔪᖅᑳᒪᓗ ᐊᖏᒻᒪᕆᒃᑎᓚᐅᕐᐹᖓ ᐅᖃᕐᓗᓂ, ‘ᐃᕐᓂᕋ ᓄᓕᐊᒃᓴᕐᓯᐅᕐᓂᐊᕐᓇᒍ ᑬᓇᓂᒥᐅᑦ ᐸᓂᖏᓐᓂᑦ, ᓄᓇᖃᑎᒋᔭᓐᓂᑦ; 38 ᐊᑖᑕᒪᓕ ᐃᓚᖏᓐᓄᑦ ᐃᓚᓐᓄᓪᓗ, ᓄᓕᐊᒃᓴᕐᓯᐅᕆᐊᕆᑦ ᐃᕐᓂᓐᓄᑦ.’ 39 ᐊᖓᔪᖅᑳᕋᓗ ᐅᖃᐅᑎᓚᐅᕐᐸᕋ, ‘ᖃᓄᕐᓕ ᐊᕐᓇᖅ ᐅᕙᓐᓂᒃ ᒪᓕᒍᒪᖏᑉᐸᑦ?’ 40 ᑖᑦᓱᒪ ᑭᐅᓚᐅᕐᐹᖓ, ‘ᐊᑕᓂᐅᑉ, ᑍᒪᓐᖓᑦ ᒪᓖᓐᓇᕐᑕᒪ, ᐂᖏᓕᖁᑎᓂ ᑎᓕᓂᐊᕐᐹ ᑕᓯᐅᕐᑕᐅᖁᓪᓗᑎᑦ ᐊᖅᑯᑎᖕᓂ; ᐃᕐᓂᕐᒪᓗ ᓄᓕᐊᒃᓴᖓᓂᒃ ᓇᓂᓯᔪᒫᕐᐳᑎᑦ ᓇᖕᒥᓂᖅ ᐃᓚᒋᔭᓐᓂᑦ, ᐊᑖᑕᒪᓗ ᐃᓚᒋᔭᖏᓐᓂᑦ. 41 ᐅᖃᕕᒍᑎᒋᔭᓐᓂᑦ ᑭᓯᐊᓂ ᕿᓚᕈᑦᔮᕐᑕᐅᔪᒫᕐᐳᑎᑦ ᐃᓚᒋᔭᓐᓄᑦ ᑎᑭᒃᑯᕕᑦ; ᑖᒃᑯᓇᓐᖓᑦ ᕿᐱᓗᒡᕕᐅᒍᕕᑦ, ᑕᕝᕙ ᐅᖃᕕᒍᑎᒋᔭᓐᓂᑦ ᕿᓚᕈᑦᔮᕐᑕᐅᔪᒫᕐᐳᑎᑦ.’ 42 “ᐅᓪᓗᒥᓕ ᐃᒥᕐᑕᕐᕕᖕᒧᐊᕋᒪ, ᐅᖃᖅᑲᐅᕗᖓ, ‘ᐊᑕᓃᖅ, ᐊᖓᔪᖅᑳᒪ ᐂᑉᕋᕼᐋᒻ ᒎᑎᖓ, ᐱᓇᓱᐊᕐᑕᓐᓂᒃ ᐊᖅᑯᒻᒥ ᑕᓯᐅᕐᓂᕈᕕᖓ. 43 ᑕᑯᒋᑦ, ᐃᒥᕐᑕᕐᕕᐅᑉ ᓴᓂᐊᓃᒃᑲᒪ; ᐊᕐᓇᒥᒃ ᐃᓅᓱᒃᑐᒥᒃ ᕾᔪᖃᕐᐸᑦ ᐃᒥᕐᑕᕐᑐᒥᒃ, ᑖᑦᓱᒧᖓ ᐅᖃᕈᒪ, ᐃᒪᖃᐅᑎᖕᓂᑦ ᐃᒥᕐᑎᐊᕐᔪᓚᐅᓐᖓ.’ 44 ᑖᓐᓇᓗ ᐊᕐᓇᖅ ᐅᖃᕐᐸᑦ ‘ᐃᒥᕆᑦ, ᑳᒥᓕᖁᑎᑎᓪᓗ ᐃᒥᕐᑎᓐᓂᐊᕆᕙᒃᑲ.’ ᑕᕝᕙ ᑖᓐᓇᐅᓂᐊᕐᐳᖅ ᐊᕐᓇᖅ ᐊᑕᓂᐅᑉ ᓂᕈᐊᕐᑕᖓ ᓄᓕᐊᒃᓴᐅᖁᓪᓗᒍ ᐊᖓᔪᖅᑳᒪ ᐃᕐᓂᖓᓄᑦ. 45 ᓂᐱᖃᖏᓪᓗᖓᓕ ᑐᒃᓯᐊᕐᓂᕋ ᓱᓕ ᐃᓱᓕᓚᐅᕐᓇᒍ, ᑕᑯᒋᑦ ᕇᐱᑲ ᕾᖅᑲᐅᕗᖅ ᐃᒪᖃᐅᑎᒥᒃ ᐃᕐᓱᒡᓗᓂ; ᑕᐅᓄᖓᓗ ᐃᒥᕐᑕᕐᕕᖕᒧᐊᕐᓗᓂ ᐃᒪᖃᐅᑎᓂ ᐃᒻᒥᕇᕐᒪᒍ, ᐅᖃᐅᑎᖅᑲᐅᕙᕋ, ‘ᐃᒥᕐᑎᑦᓱᓐᓇᕐᐱᖔ.’ 46 ᑐᐊᕕᕐᓗᓂ ᐃᕐᓱᒃᑕᓂ ᐲᕐᓗᓂᐅᒃ ᐅᖃᖅᑲᐅᕗᖅ, ‘ᐃᒥᓕᕆᑦ, ᑳᒥᓕᖁᑎᑎᑦᑕᐅᖅ ᐃᒥᕐᑎᓐᓂᐊᕆᕙᒃᑲ.’ ᑕᕝᕙ ᐃᒥᕇᕋᒪ, ᑳᒥᓕᖁᑎᒃᑲ ᐃᒥᕐᑎᓕᖅᑲᐅᒋᕔᑦ. 47 ᐊᐱᕆᒐᒃᑯᓗ, ‘ᑭᐊ ᐸᓂᒋᕚᑎᑦ?’ ᑖᑦᓱᒪ ᑭᐅᕚᖓ, ‘ᐱᑐᐃᓕᐅᑉ ᐸᓂᒋᕚᖓ, ᓇᕼᐅᕆᐅᑉ ᒥᐅᓪᑲᐅᓪᓗ ᐃᕐᓂᖓᑕ,’ ᑕᕝᕙ ᕿᖓᕐᒥᐅᑕᕐᒥᒃ ᑐᓂᓯᕕᒋᓕᖅᑲᐅᕙᕋ ᐊᒡᒐᐅᒻᒥᐅᑕᓂᒡᓗ ᐃᒡᓗᒃᑐᑦ ᐊᑎᑎᓪᓗᒍ. 48 ᐅᑯᓪᓗᖓᓗ ᐊᑕᓂᖅ ᑐᒃᓯᐊᕐᕕᒋᓕᖅᑲᐅᕙᕋ, ᐊᑕᓂᖅ ᓂᕐᑐᕐᓗᒍ, ᐊᖓᔪᖅᑳᒪ ᐂᑉᕋᕼᐋᒻ ᒎᑎᖓ, ᑖᑦᓱᒪ ᐊᖅᑯᑎᓐᓂ ᓈᒻᒪᓈᑦᓯᐊᕐᑐᒥᒃ ᑕᓯᐅᕐᒪᖓ ᐊᖓᔪᖅᑳᒪ ᐃᓚᒋᔭᖓᑕ ᐸᓂᖓᓄᑦ ᐃᕐᓂᖓᑕ ᓄᓕᐊᒃᓴᖓᓄᑦ. 49 ᒫᓐᓇᓕ, ᐊᖓᔪᖅᑳᕋ ᐱᓂᐊᕕᒋᔪᒪᒍᑦᓯᐅᒃ ᐅᐱᒋᓗᒍ ᓱᓕᑦᓯᐊᕐᕕᒋᓗᒍᓗ, ᐅᖃᐅᑎᓚᐅᕐᓯᓐᖓ; ᑍᒤᖏᑉᐸᓪᓗ, ᐅᖃᑦᓯᐊᕐᓗᓯ, ᑕᕝᕙ ᓴᖑᓂᐊᕐᐳᖓ ᑕᓕᕐᐱᒧᑦ ᓴᐅᒥᒧᓪᓘᓐᓃᑦ.” 50 ᑕᕝᕙ ᓔᐸᓂᒃᑯᒃ ᐱᑐᐃᓕᒃᑯᒃ ᑭᐅᕘᒃ, “ᑕᒪᓐᓇ ᐊᑕᓂᕐᒥᑦ ᐱᓯᒪᖕᒪᑦ; ᐅᕙᒍᓪᓕ ᐅᖃᒃᑲᓐᓂᕈᓐᓇᓐᖏᓚᒍᑦ ᐱᐅᖏᑦᑐᒥᒃ ᐱᐅᔪᒥᒡᓘᓐᓃᑦ. 51 ᑕᑯᒋᑦ, ᑕᕝᕙ ᕇᐱᑲ ᓵᑦᓯᓐᓃᑉᐳᖅ; ᓇᒃᓴᕐᓗᒍ ᐊᐅᓪᓚᕈᓐᓇᓕᕐᐳᑎᑦ, ᐊᖓᔪᖅᑳᕕᑦ ᐃᕐᓂᖓᑕ ᓄᓕᐊᕐᑖᕆᓕᕐᓕᐅᒃ, ᐊᑕᓂᐅᑉ ᐱᖁᔨᓯᒪᓂᖓ ᒪᓕᒡᓗᒍ.” 52 ᐂᑉᕋᕼᐋᒻᓕ ᐱᔨᖓᑕ ᑕᒪᓐᓇ ᑐᓴᕋᒥᐅᒃ, ᓄᓇᒧᑦ ᐅᑯᕗᖅ ᐊᑕᓂᖅ ᑐᒃᓯᐊᕐᕕᒋᓪᓗᒍ. 53 ᓇᒃᓴᕐᓯᒪᔭᒥᓂᒃ ᐲᔧᓕᕐᐳᖅ ᓯᐅᓪᕕᕆᓂᒃ ᒎᓗᓂᒡᓗ ᓴᓇᓯᒪᔪᓂᒃ, ᐊᓐᓄᕌᓂᒡᓗ, ᕇᐱᑲᒧᓪᓗ ᑐᓂᓪᓗᒋᑦ; ᐊᓂᖓᓄᑦᑕᐅᖅ ᐊᓈᓇᖓᓄᓪᓗ ᑐᓂᓯᕗᖅ ᐊᑭᑐᔪᒃᓴᔭᓂᒃ. 54 ᑕᕝᕙ ᑖᓐᓇ ᐃᓚᒋᔭᖏᓪᓗ ᐊᖑᑎᑦ ᓂᕆᓕᕐᐳᑦ ᐃᒥᕐᓗᑎᒡᓗ, ᑕᕝᕙᓂᓗ ᓯᓂᒃᑕᕐᐳᑦ ᐅᓐᓄᐊᒥ. ᐅᓪᓛᒃᑯᓪᓕ ᒪᑭᓐᓇᒥᒃ, ᐊᖑᑦ ᐱᔨ ᐅᖃᓕᕐᐳᖅ, “ᐊᖓᔪᖅᑳᓐᓄᑦ ᐊᐅᓪᓚᕈᓐᓇᕐᑎᓕᕐᓯᓐᖓ.” 55 ᐊᓂᖓᓕ ᐊᓈᓇᖓᓗ ᐅᖃᕐᐳᒃ, “ᐊᕐᓇᖅ ᐅᕙᑦᑎᓐᓃᒃᑲᓐᓂᑬᓐᓇᕐᓕ, ᐅᓪᓗᓂᒃ ᖁᓕᓂᒃ, ᑭᖑᓂᖓᒍᑦ ᐊᐅᓪᓚᕈᓐᓇᕐᓯᓂᐊᕐᐳᖅ.” 56 ᑖᓐᓇᓕ ᐅᖃᕐᐳᖅ, “ᓄᖅᑲᖓᑎᓐᓂᐊᕐᓇᓯᓐᖓ; ᐊᑕᓂᐅᑉ ᐃᖏᕐᕋᓂᕋ ᓈᒻᒪᓈᑦᓯᐊᕐᑎᓯᒪᖕᒪᒍ; ᐊᐅᓪᓚᕐᑎᓕᕐᓯᓐᖓ ᐅᑎᕐᓂᐊᓕᕋᒪ ᐊᖓᔪᖅᑳᓐᓄᑦ.” 57 ᑖᒃᑯᐊ ᐅᖃᕐᐳᑦ, “ᐊᕐᓇᖅ ᕾᖁᓗᒍ ᐊᐱᕆᓚᐅᕐᓚᕗᑦ.” 58 ᕇᐱᑲᓗ ᕾᖁᒐᒥᑦᔪᒃ ᐊᐱᕆᕚᑦ, “ᐅᓇ ᐊᖑᑦ ᐊᐅᓪᓚᖃᑎᒋᔪᒪᕕᐅᒃ?” ᑭᐅᕔᑦ, “ᐊᐅᓪᓚᖃᑎᒋᔪᒪᕙᕋ.” 59 ᑍᒤᒻᒪᑦ ᓇᔭᑎᒃ ᕇᐱᑲ ᑲᒪᔨᖓᓗ ᐊᐅᓪᓚᖃᑕᐅᑎᑉᐹᑦ, ᐂᑉᕋᕼᐋᒻ ᐱᔨᖓᓄᑦ ᐃᓚᒋᔭᖏᓐᓄᓪᓗ. 60 ᑖᒃᑯᐊᓗ ᕇᐱᑲ ᓮᒻᒪᕐᑎᑉᐹᑦ ᐃᒫᒃ ᐅᖃᕐᓗᑎᒃ, “ᓇᔭᒃᐳᑦ, ᐅᓄᕐᑐᕐᔪᐊᓄᑦ ᐊᓈᓇᐅᓕᕆᑦ ᓈᓴᒐᒃᓴᐅᖏᑦᑐᓄᑦ; ᑭᖑᕚᒃᓴᑎᓪᓗ ᐱᖃᕈᒫᕐᓕᑦ ᐊᑭᕋᕐᑐᕐᑎᖏᑕ ᐃᑎᕐᑕᕐᕕᖏᓐᓂᒃ!” 61 ᑕᕝᕙ ᕇᐱᑲ ᐱᔨᖏᓪᓗ ᐊᕐᓁᑦ ᐃᓅᓱᒃᑐᑦ ᐸᕐᓇᓕᕐᐳᑦ, ᑳᒥᓕᖕᓂᓗ ᐃᑭᒪᓪᓗᑎᒃ ᐊᖑᑦ ᒪᓕᒃᐹᑦ; ᑍᒤᒻᒪᑦ ᐱᔨᐅᑉ ᕇᐱᑲ ᓇᒃᓴᕐᐹ, ᐊᐅᓪᓚᓕᕐᓗᑎᒡᓗ. 62 ᐂᓴᑭᓕ ᑎᑭᓚᐅᕐᐳᖅ ᐱᐊᕐ-ᓚᕼᐂ-ᕈᐂᒥᑦ, ᓄᓇᖃᓕᕐᓗᓂᓗ ᓯᕿᓂᐅᑉ ᓇᓛᓂ ᓂᒋᑉᒥ. 63 ᐂᓴᑭᓗ ᐊᓂᕗᖅ ᐅᓐᓄᓕᕋᑖᕐᑎᓪᓗᒍ ᐃᓱᒪᒃᓴᕐᓯᐅᕈᒪᓪᓗᓂ ᐱᕈᕐᓰᕕᖕᒥ; ᑕᑯᓴᕋᒥᓗ ᑕᑯᓕᕐᐳᖅ ᑳᒥᓕᖕᓂᒃ ᑎᑭᓕᕐᑐᓂᒃ. 64 ᕇᐱᑲᓗ ᑕᑯᓴᕋᒥ, ᐂᓴᑭ ᑕᑯᒐᒥᐅᒃ, ᐃᑭᒪᕕᒋᔭᒥᓂᑦ ᑳᒥᓕᒥᑦ ᐊᖅᑲᕐᐳᖅ; 65 ᐱᔨᓗ ᐊᐱᕆᕚ, ᐅᖃᕐᓗᓂ, “ᑭᓈᓐᓇ ᐊᖑᑦ ᐱᕈᕐᓰᕕᒃᑯᑦ ᐱᓱᒃᐸ ᐅᕙᑦᑎᓐᓂᒃ ᐸᕐᕆᐊᕐᑐᖅ?” ᐱᔨᐅᑉ ᑭᐅᕚ, “ᐅᓇ ᐊᖓᔪᖅᑳᕋ.” ᑕᕝᕙ ᕇᐱᑲᐅᑉ ᑮᓇᕐᒥᓄᑦ ᑖᓗᑕᓂ ᑎᒍᓪᓗᒍ ᑮᓇᓂ ᒪᑐᐊᕐᐹ. 66 ᐱᔨᐅᓪᓗ ᐂᓴᑭ ᐅᓂᒃᑲᐅᑎᕚ ᑕᒤᓐᓂᒃ ᐱᓂᐊᕐᓂᕆᓚᐅᕐᑕᒥᓂᒃ. 67 ᑕᕝᕙ ᐂᓴᑭᐅᑉ ᕇᐱᑲ ᑐᐱᕐᒧᐊᕈᑎᕚ ᐊᓈᓇᖓᑕ ᓵᕋᐅᑉ ᐊᖏᕐᕋᕆᖃᑦᑕᓚᐅᕐᑕᖓᓄᑦ, ᓄᓕᐊᕐᑖᕆᓪᓗᒍᓗ; ᐂᓴᑭᐅᓪᓗ ᕇᐱᑲ ᓇᒡᓕᒋᒻᒪᕆᒃᐹ, ᐂᓴᑭᓗ ᒪᓂᒍᕐᑕᐅᕗᖅ ᐊᓈᓇᒥ ᑐᖁᓂᖓᑕ ᑭᖑᕐᖓᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society