ᒨᓯᓯ ᓯᕗᓪᓖᑦ 23 - ᐊᒡᓔᑦ ᐃᑦᔪᕐᖕᓁᑦᑐᑦ

ᓵᕋᐅᑉ ᑐᖁᓂᖓ ᐂᑉᕋᕼᐋᒻᓗ ᐃᓗᕕᕐᕕᒃᓴᒥᒃ ᓂᐅᕕᕐᓂᖓ

¹ ᓵᕋᓗ ᐃᓅᓚᐅᕐᐳᖅ ᐊᕐᕌᒍᓂᒃ 127ᓂᒃ; ᑖᒃᑯᐊ ᑕᕝᕙ ᓵᕋᐅᑉ ᐊᕐᕌᒍᒋᓚᐅᕐᑕᖏᑦ.

² ᓵᕋᓗ ᑐᖁᓚᐅᕐᐳᖅ ᓄᓇᒥ ᑭᕆᐊᑦ-ᐊᕋᐸᒥ (ᑍᔭᐅᔪᖅ ᕼᐃᐸᕋᓐᒥᒃ) ᑬᓇᓂᒥ, ᐂᑉᕋᕼᐋᒻᓗ ᐅᐸᒃᓗᒍ ᕿᒃᓵᒍᑎᒋᕚ ᓵᕋ ᕿᐊᑦᔪᑎᒋᓪᓗᒍ.

³ ᐂᑉᕋᕼᐋᒻᓗ ᒪᑭᑉᐳᖅ ᑐᖁᔨᐊᓂ ᕿᒪᒡᓗᒍ, ᕼᐃᑍᑎᓄᐊᕐᐳᖅ, ᐅᖃᑎᓪᓗᒋᓪᓗ,

⁴ “ᑕᒫᓂ ᓂᐅᕐᕈᐊᖑᒐᒪ ᓄᓇᖃᕐᑐᑐᖃᐅᓇᖓᓗ ᓄᓇᑦᓯᓐᓂ; ᓂᐅᕕᕈᓐᓇᕐᑎᑕᐅᔪᒪᕗᖓ ᓄᓇᒥᒃ ᐃᓗᕕᕐᕕᒃᓴᒥᒃ, ᐃᓗᕕᕐᓯᔪᓐᓇᖁᓪᓗᖓ ᑐᖁᔨᐊᕆᓯᒪᔭᓐᓂᒃ.”

⁵ ᕼᐃᑍᑎᒥᐅᓪᓗ ᐂᑉᕋᕼᐋᒻ ᑭᐅᕚᑦ, ᐅᖃᐅᑎᓪᓗᒍ,

⁶ “ᐅᕙᑦᑎᓐᓂᒃ ᓈᓚᓚᐅᕆᑦ ᐊᖓᔪᖅᑳᒃ; ᖃᐅᔨᒪᒐᑦᑕ ᐱᔪᓐᓇᕐᓂᖃᒻᒪᕆᒡᓗᑎᑦ ᑕᓯᐅᕐᑎᐅᒐᕕᑦ; ᑐᖁᔨᐊᑦ ᐃᓗᕕᓚᐅᕈᒃ ᐃᓗᕕᕐᕕᑦᑎᓐᓄᑦ ᐱᐅᓂᕐᐹᒧᑦ; ᓇᓪᓕᑐᐃᓐᓇᕗᑦ ᐊᓂᕈᓱᓐᖏᓚᖅ ᐃᓗᕕᕐᕕᒃᓴᒥᓂᒃ ᐃᓕᖕᓄᑦ, ᓇᓪᓕᐊᓪᓘᓐᓃᑦ ᐃᓗᕕᕐᑍᓕᑎᑦᓯᓂᐊᓐᖏᓚᖅ ᑐᖁᔨᐊᕐᓂᒃ.”

⁷ ᐂᑉᕋᕼᐋᒻᓗ ᒪᑭᓪᓗᓂ ᐅᑯᕗᖅ ᕼᐃᑍᑎᓄᑦ, ᑕᒫᓂ ᓄᓇᖃᕐᑐᓄᑦ.

⁸ ᐅᖃᐅᑎᓪᓗᒋᓪᓗ, “ᐃᓗᕕᕐᓯᔪᓐᓇᕐᑎᑦᓯᒍᑦᓯ ᑐᖁᖓᔨᐊᓐᓂᒃ ᑕᑯᓐᓇᕈᓐᓃᕐᓂᐊᕋᒃᑯ, ᐱᖁᔨᔪᓐᓇᕐᑎᓚᐅᕐᓯᐅᒃ ᐃᐸᕋᓐ ᔪᕼᐊᕆᐅᑉ ᐃᕐᓂᖓ.

⁹ ᐅᕙᓐᓄᑦ ᑐᓂᓯᖁᓪᓗᒍ ᒪᒃ-ᐲᓚᒥᒃ ᐊᑎᓕᖕᒥᒃ ᕾᕈᓱᖕᒥᒃ, ᑖᑦᓱᒪ ᐱᒋᖕᒪᒍ; ᐱᕈᕐᓰᕕᖁᑎᖓᑕ ᑭᒡᓕᖓᑕ ᐃᓱᐊᓃᑦᑐᖅ. ᐊᑭᖓ ᐃᓗᐃᑦᑑᓗᓂ ᓂᐅᕕᐊᕆᔭᐅᖁᓚᐅᕐᓯᐅᒃ ᐃᓕᑦᓯ ᑕᑯᓐᓇᕐᑎᓪᓗᓯ ᐃᓗᕕᕐᕕᒃᑖᕆᓂᐊᕋᒃᑯ.”

¹⁰ ᐃᐳᕋᓐᓗ ᑕᕝᕙᓂ ᐃᒃᓯᕙᖃᑕᐅᓚᐅᕐᐳᖅ ᕼᐃᑍᑎᓄᑦ; ᑕᕝᕙ ᐃᐸᕋᓐ ᑭᐅᓕᕐᐳᖅ ᐂᑉᕋᕼᐋᒻᒧᑦ ᕼᐃᑍᑎᑦ ᑐᓵᑎᓪᓗᒋᑦ, ᑕᒪᕐᒥᒃ ᐃᒃᓯᕙᖃᑕᐅᔪᑦ ᐃᑎᕐᑕᕐᕕᖕᒥ,

¹¹ “ᐋᒃᑲ ᐊᖓᔪᖅᑳᒃ, ᓈᓚᓚᐅᓐᖓ; ᑕᒪᓐᓇ ᐱᕈᕐᓰᕕᒃ ᑐᓂᕙᕋ ᐃᓕᖕᓄᑦ ᕾᕈᓱᒡᓗ ᑕᕝᕙᓃᑦᑐᖅ ᐃᓕᖕᓄᑦ ᑐᓂᔪᒪᕙᕋ; ᐅᑯᐊ ᐃᓅᖃᑎᒪ ᑭᖑᕚᖏᑦ ᑕᑯᓐᓇᕐᑎᓪᓗᒋᑦ ᑐᓂᕙᕋ ᐃᓕᖕᓄᑦ; ᑐᖁᔨᐊᑦ ᑕᕝᕙᓂ ᐃᓗᕕᓕᕈᒃ.”

¹² ᐂᑉᕋᕼᐋᒻᓕ ᐅᑯᕗᖅ ᑕᒫᓂ ᓄᓇᖃᕐᑐᓄᑦ.

¹³ ᐃᐸᕋᓐᒧᓪᓗ ᐅᖃᕐᓗᓂ, ᓄᓇᖃᕐᑐᑦ ᑐᓵᑎᓪᓗᒋᑦ, “ᓈᓚᖕᓂᐊᕈᕕᖓ; ᑕᒪᓐᓇ ᐱᕈᕐᓰᕕᒃ ᐊᑭᓕᕈᒪᕙᕋ; ᐊᑭᓕᐅᑎᒋᔭᒃᑲ ᐃᓚᓕᐅᓚᐅᒃᑭᑦ, ᑐᖁᔨᐊᕋ ᑕᕝᕙᓂ ᐃᓗᕕᕐᓂᐊᕋᒃᑯ.”

¹⁴ ᐃᐸᕋᓐᓗ ᑭᐅᕗᖅ ᐂᑉᕋᕼᐋᒻᒧᑦ,

¹⁵ “ᐊᖓᔪᖅᑳᒃ ᓇᓛᓚᐅᓐᖓ, ᓄᓇ ᐊᑭᖃᑐᐃᓐᓇᕐᐳᖅ 400ᓂᒃ ᓯᐅᓪᕕᕆᓂᒃ, ᑕᒪᓐᓇᓕ ᐅᕙᑦᑎᖕᓄᑦ ᐊᒡᕕᐊᕈᑕᐅᓐᖏᓚᖅ, ᑐᖁᔨᐊᑦ ᐃᓕᔭᕐᑐᓕᕈᒃ.”

¹⁶ ᐂᑉᕋᕼᐋᒻᓗ ᐃᐸᕋᓐ ᐊᖏᖃᑎᒋᒐᒥᐅᒃ; ᐅᖁᒤᓐᓂᕐᓯᐅᑎᒃᑯᑦ ᐋᖅᑭᒃᓱᐃᓕᕐᐳᖅ ᐃᐸᕋᐅᑉ ᐊᑭᒋᖁᓪᓗᒋᑦ ᐅᖃᐅᓯᕆᖅᑲᐅᔭᖏᓐᓂᒃ ᓯᐅᓪᕕᕆᓂᒃ ᕼᐃᑍᑎᒥᐅᑦ ᑕᕝᕙᓃᑦᑐᑦ ᑐᓵᑎᓪᓗᒋᑦ, 400ᓂᒃ ᓯᐅᓪᕕᕆᓂᒃ, ᑍᑦᓱᒪᓂᐅᑎᓪᓗᒍ ᐅᖁᒤᓐᓂᕐᓯᐅᑕᐅᓪᓗᑎᒃ ᓂᐅᕕᕐᑎᑦᓯᕙᒃᑐᓂᑦ ᐊᑐᕐᑕᐅᕙᒃᑐᑦ ᐊᑐᕐᓗᒋᑦ.

¹⁷ ᑍᒫᒃ ᑕᕝᕙ ᐃᐸᕋᓂᐅᑉ ᓄᓇᖁᑎᒋᓚᐅᕐᑕᖓ ᒪᒃ-ᐲᓚᒥᒃ ᐊᑎᓕᒃ ᒪᒻᕆᐅᑉ ᑕᓕᕐᐱᐊᓃᑦᑐᖅ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ, ᐱᕈᕐᓰᕕᒃ ᕾᕈᓱᒡᓗ ᑕᕝᕙᓃᑦᑐᖅ ᐱᖃᓯᐅᑎᒋᓪᓗᒍ, ᓇᐹᕐᑐᐃᓪᓗ ᑕᒪᕐᒥᒃ ᐱᕈᕐᓰᕕᖕᒦᑦᑐᑦ, ᖃᓂᒋᔭᓕᒫᖓᓗ ᑐᓂᔭᐅᕗᖅ.

¹⁸ ᐂᑉᕋᕼᐋᒻᒧᑦ ᓇᖕᒥᓂᕐᑖᕆᔭᐅᑎᑕᐅᕗᖅ ᕼᐃᑍᑎᒥᐅᑦ ᖃᐅᔨᑎᓪᓗᒋᑦ, ᐃᒡᓗᒐᓮᑦ ᐃᑎᕐᑕᕐᕕᖓᓄᑦ ᕾᓚᐅᕐᑐᓕᒫᑦ.

¹⁹ ᑭᖑᓂᖓᒍᑦ, ᐂᑉᕋᕼᐋᒻ ᓄᓕᐊᓂ ᓵᕋ ᑕᕝᕗᖓ ᕾᕈᓱᖕᒧᑦ ᐃᓗᕕᕐᐹ ᐱᕈᕐᓰᕕᖕᒥ ᒪᒃ-ᐲᓚᒥ ᒪᒻᕆᐅᑉ ᓯᕿᓂᐊᑕ ᓇᓛᓃᑦᑐᒥ ᕼᐃᐸᕋᓐᒥ ᑬᓇᓂᐅᑉ ᓄᓇᖓᓃᑦᑐᒥ.

²⁰ ᑕᕝᕙ ᐱᕈᕐᓰᕕᒃ ᕾᕈᓱᒡᓗ ᑕᕝᕙᓃᑦᑐᖅ ᑐᓂᔭᐅᓚᐅᕐᐳᖅ ᐂᑉᕋᕼᐋᒻᒧᑦ, ᐃᓗᕕᕐᓯᕕᒃᓴᕐᑖᕆᓪᓗᒍ ᕼᐃᑍᑎᒥᐅᓂᑦ.