ᒨᓯᓯ ᓯᕗᓪᓖᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᑉᕋᕼᐋᒻ ᒎᑎᒧᑦ ᑐᓂᕐᕈᓯᖁᔭᐅᓂᖓ ᐃᕐᓂᒥᓂᒃ ᐂᓴᑭᒥᒃ

¹ ᑕᒪᒃᑯᐊ ᖄᖏᕐᓯᒪᓕᕐᑎᓪᓗᒋᑦ ᒎᑎᐅᑉ ᐂᑉᕋᕼᐋᒻ ᖃᐅᔨᓴᓚᐅᕐᐹ, ᐅᖃᐅᑎᓪᓗᒍᓗ, “ᐂᑉᕋᕼᐋᒻ!” ᐂᑉᕋᕼᐋᒻᓗ ᑭᐅᕚ, “ᒫᓃᑉᐳᖓ.”

² ᒎᑎᐅᓪᓗ ᐅᖃᐅᑎᓕᕐᐹ, “ᐃᕐᓂᑐᐊᑦ ᓇᒡᓕᒋᒻᒪᕆᒃᑕᑦ ᐂᓴᑭ ᓇᒃᓴᕐᓗᒍ ᒧᕅᐊᑉ ᓄᓇᖓᓄᓐᖓᐅᒋᑦ, ᐃᕐᓃᑦ ᐂᓴᑭ ᐃᑯᐊᓪᓚᒡᓗᒍ ᑐᓂᕐᕈᓯᐅᑎᔭᕐᑐᕈᒃ ᖃᖅᑲᓂ ᐃᓂᒋᓂᐊᕐᑕᑦᓯᓐᓂᒃ ᑍᑲᓂ ᐅᖃᐅᑎᔪᒫᕐᐸᒋᑦ.”

³ ᐅᓪᓛᕌᕐᔪᒃᑯᑦ ᖃᐅᑎᓪᓗᒍ ᐂᑉᕋᕼᐋᒻ ᒪᑭᑉᐳᖅ, ᓯᐅᑎᖅᑯᕐᑐᔪᖁᑎᓂᓗ ᓇᖕᒥᕐᓱᕐᓗᒍ, ᐱᔩᖕᓂᓗ ᒪᕐᕉᒃ, ᐃᕐᓂᓂᓗ ᐂᓴᑭ ᓇᒃᓴᕐᓗᒋᑦ, ᕿᔪᖕᓂᒡᓗ ᓇᑲᑎᕆᓪᓗᓂ ᑐᓂᕐᕈᓯᕐᓗᓂ ᐃᑯᐊᓪᓚᖅᑯᑎᒃᓴᒥᓂᒃ, ᐊᐅᓪᓚᕐᐳᑦ ᒎᑎᐅᑉ ᐅᐸᒃᑕᐅᖁᔭᖓᓄᑦ.

⁴ ᐅᓪᓗᐃᓪᓗ ᐱᖓᔪᒋᓕᕐᑕᖓᓐᓂ ᐂᑉᕋᕼᐋᒻ ᑕᑯᓴᕋᒥ ᓄᓇ ᐅᐸᒃᑕᐅᖁᔭᐅᔪᖅ ᑕᑯᕚ ᐅᖓᓯᒃᑐᒥᑦ.

⁵ ᐱᔩᖕᓂᓗ ᐃᓅᓱᒃᑑᒃ ᐅᖃᐅᑎᕚᒃ, ᓯᐅᑎᖅᑯᕐᑐᔪᖅ ᓇᔪᓚᐅᕐᓯᒃᑯᒃ ᓄᑲᑉᐱᐊᕐᓗ ᐃᑯᓐᖓᐅᓂᐊᕋᓐᓄᒃ ᑐᒃᓯᐊᕆᐊᕐᑐᕐᓗᓄᒃ, ᐱᔭᕇᕈᓐᓄᒃ ᐅᑎᕐᓂᐊᕆᕗᒍᒃ ᐃᓕᑦᓯᖕᓄᑦ.

⁶ ᐂᑉᕋᕼᐋᒻᓗ ᕿᔪᐃᑦ ᑐᓂᕐᕈᓯᕐᓗᑎᒃ ᐃᑯᐊᓪᓚᖅᑯᑎᒃᓴᑦ ᐊᒡᔭᕐᑕᐅᑎᑉᐰᑦ ᐃᕐᓂᕐᒥᓄᑦ ᐂᓴᑭᒧᑦ; ᓇᖕᒥᓂᕐᓕ ᓴᕝᕕᔭᕐᐳᖅ ᐃᑯᒪᔪᒥᒡᓗ ᐊᒡᔭᕐᓯᒋᓪᓗᓂ. ᒪᕐᕈᐃᓐᓇᐅᓕᕐᓗᑎᒃ ᐱᓱᓯᕘᒃ.

⁷ ᐂᓴᑭᓕ ᐅᖃᕐᐳᖅ, ᐊᑖᑕᒥᓄᑦ ᐂᑉᕋᕼᐋᒻᒧᑦ, “ᐊᑖᑕᒃ!” ᑖᑦᓱᒪ ᑭᐅᕚ, “ᓱᕙ ᐃᕐᓃᒃ.” ᐂᓴᑭᓗ ᐅᖃᕐᐳᖅ, “ᑕᑯᒋᑦ, ᐃᑯᒪ ᕿᔪᐃᓪᓗ ᐃᑯᐊᓚᑦᔪᑎᒃᓮᓪᓗ; ᓇᐅᒡᓕ ᑍᒪ ᓄᕐᕋᐅᔭᖅ ᑐᓂᕐᕈᑎᒃᓴᖅ?”

⁸ ᐂᑉᕋᕼᐋᒻᓕ ᑭᐅᕚ, “ᒎᑎᐅᑉ ᑐᓂᕐᕈᑎᒃᓴᖅ ᑐᓂᓂᐊᕐᐹ ᐃᕐᓃᒃ.” ᑕᕝᕙ ᐱᓱᖃᑎᒌᓕᕐᐴᒃ.

⁹ ᒎᑎᐅᓪᓗ ᐃᓂᒋᔭᐅᖁᔭᖓ ᑎᑭᓐᓇᒥᒃᑯᒃ, ᐂᑉᕋᕼᐋᒻ ᑐᓂᕐᕈᓯᕐᕕᒃᓴᒥᒃ ᓴᓇᕗᖅ; ᕿᔪᐃᓪᓗ ᖄᖓᓄᑦ ᐋᖅᑭᒃᓱᑦᓯᐊᕐᓗᒋᑦ, ᐃᕐᓂᓂᓗ ᐂᓴᑭ ᕿᓚᒃᓱᕐᐹ, ᕿᔪᐃᓪᓗ ᑐᓂᕐᕈᓯᕐᕕᐅᑉ ᖄᖓᓃᑦᑐᑦ ᖄᖓᓄᐊᕐᓗᓂᐅᒃ,

¹⁰ ᑕᕝᕙ ᐂᑉᕋᕼᐋᒻ ᐃᓴᒃᓗᓂ ᓴᕕᒃ ᑎᒍᕚ ᐃᕐᓂᓂ ᑐᖁᓐᓂᐊᓕᕋᒥᐅᒃ.

¹¹ ᐊᑕᓂᐅᓪᓕ ᐂᖏᓕᖓᑕ ᕿᓚᖕᒥᑦ ᓂᓪᓕᕐᕕᒋᕚ, ᐅᖃᕐᓗᓂᓗ, “ᐂᑉᕋᕼᐋᒻ, ᐂᑉᕋᕼᐋᒻ!” ᑖᓐᓇᓗ ᑭᐅᕗᖅ, “ᒫᓃᑉᐳᖓ.”

¹² ᐅᖃᐅᑎᕚᓗ, “ᓄᑲᑉᐱᐊᖅ ᐋᓐᓂᕐᑍᓕᒍᒃ ᖃᓄᐃᓕᑦᑍᓕᓗᒍᓗ; ᒫᓐᓇ ᖃᐅᔨᕗᖓ ᒎᑎ ᓯᕘᕋᒋᒐᕕᐅᒃ, ᐃᕐᓃᓪᓗ ᐊᓐᓂᕆᖏᓐᓇᕕᐅᒃ, ᐃᕐᓂᑐᐊᑦ.”

¹³ ᐂᑉᕋᕼᐋᒻᓗ ᑐᓄᒥᓄᑦ ᑕᑯᓴᕋᒥ ᑕᑯᕗᖅ, ᓰᐱᒥᒃ ᐊᖑᓴᓪᓗᕐᒥᒃ ᐅᕐᐱᒐᕐᓄᑦ ᓇᒡᔪᖕᒥᒍᑦ ᓈᑎᓯᒪᔪᒥᒃ; ᐅᐸᒃᑲᒥᐅᒡᓗ ᑎᒍᕚ ᑐᓂᕐᕈᓯᐅᑎᖔᓕᕐᓗᒍ ᐃᕐᓂᕐᒥᓄᒃ ᐃᓇᖏᐅᑎᑎᓪᓗᒍ.

¹⁴ ᐂᑉᕋᕼᐋᒻᓗ ᑖᓐᓇ ᓇᔪᕐᑕᓂ ᐊᑦᓯᕐᐹ, ᐊᑕᓂᖅ ᐱᒃᓴᖃᕐᑎᑦᓯᓂᐊᕐᐳᖅ; ᐅᓪᓗᒥᒧᑦ ᑎᑭᓪᓗᒍ ᐅᖃᐅᓯᐅᕙᓕᕐᐳᖅ, “ᐊᑕᓂᐅᑉ ᖃᖅᑲᖁᑎᖓᓂ ᐱᒃᓴᖃᕐᑎᑕᐅᓇᕐᐳᖅ.”

¹⁵ ᐊᑕᓂᐅᓪᓗ ᐂᖏᓖᖓᑕ ᐂᑉᕋᕼᐋᒻ ᐅᖃᕐᕕᒋᒃᑲᓐᓂᕐᐹ ᕿᓚᖕᒥᑦ;

¹⁶ ᐅᖃᕐᓗᓂᓗ, “ᐅᕙᖓᐅᓂᕋ ᐊᑐᕐᓗᒍ ᐅᖃᕕᓚᐅᕐᐳᖓ, ᐊᑕᓂᖅ ᐅᖃᕐᐳᖅ, ᑍᒤᓕᐅᓚᐅᕐᓂᕐᓄᑦ, ᐃᕐᓃᓪᓗ ᐊᓐᓂᕆᓚᐅᖏᓐᓇᕕᐅᒃ, ᐃᕐᓂᑐᐊᑦ,

¹⁷ ᓱᓕᔪᒥᒃ ᓮᒻᒪᕐᑎᑦᓱᒫᕐᐸᒋᑦ, ᑭᖑᕚᒃᓴᑎᑦ ᐅᓄᕐᓯᑎᑦᓱᒫᕐᐸᒃᑲ ᕿᓚᖕᒥ ᐅᓪᓗᕆᐊᑎᑐᑦ ᓯᐅᖅᑲᑎᑐᓪᓗ ᑕᕆᐅᑉ ᓯᓈᓃᑦᑐᑎᑐᑦ ᐅᓄᕐᑎᒋᔪᓂᒃ. ᑭᖑᕚᑎᓪᓗ ᐊᑭᕋᒥ ᐃᑎᕐᑕᕐᕕᖏᓐᓂᒃ ᐱᓯᒪᔪᒫᕐᐳᑦ.

¹⁸ ᑭᖑᕚᒃᑯᓪᓗ ᐃᓅᖃᑎᒌᒡᔪᐊᓕᒫᑦ ᓄᓇᕐᔪᐊᕐᒥ ᓮᒻᒪᕐᑎᑕᐅᔪᒫᕐᐳᑦ, ᓂᐱᒐ ᓈᓚᓚᐅᕋᕕᐅᒃ.”

¹⁹ ᐂᑉᕋᕼᐋᓗ ᐱᔨᒥᓄᑦ ᐃᓅᓱᒃᑐᓄᑦ ᐅᑎᕐᒪᑦ, ᐊᐅᓪᓚᕐᐳᑦ ᓄᓇᒧᑦ ᐱᐅᕐᓰᐸᒧᑦ; ᑕᕝᕙᓂᓗ ᐂᑉᕋᕼᐋᒻ ᐱᐊᕐᓯᐸᒥ ᓄᓇᑖᓚᐅᕐᐳᖅ.

ᓂᕼᐅᕆᐅᑉ ᑭᖑᕚᒋᑦ

²⁰ ᑕᒪᒃᑯᐊ ᑭᖑᓂᖓᑦᑎᒍᑦ ᐂᑉᕋᕼᐋᒻ ᑐᓴᕐᑎᑕᐅᓚᐅᕐᐳᖅ, “ᑕᑯᒋᑦ, ᒥᐅᓪᑲ ᕿᑐᕐᖓᖃᓕᕐᐳᖅ ᓯᑕᒪᐅᔪᕐᑐᓂᒃ ᓄᑲᕐᓂᑦ ᓇᕼᐅᕆᒥᑦ:

²¹ ᐊᖓᔪᒃᓯᕐᐹᖁᑎᖓ ᐊᑎᖃᕐᐳᖅ ᐅᔾᒥᒃ, ᓄᑲᖓᓗ ᐳᔾ, ᑭᒧᐃᓕᓗ ᐊᕌᒥᐅᑉ ᐊᑖᑕᖓ,

²² ᓴᓰᑦ, ᕼᐊᔪᑦ, ᐱᐅᓪᑕ, ᔨᓪᓚᐸ, ᐱᑐᐃᓕᓗ,

²³ ᐱᑐᐃᓕᓗ ᕇᐱᑲᐅᑉ ᐊᑖᑕᒋᓚᐅᕐᐹ. ᒥᐅᓪᑲᐅᓪᓗ ᑖᒃᑯᐊ ᓯᑕᒪᐅᔪᕐᑐᑦ ᕿᑐᕐᖓᕐᑖᕆᓚᐅᕐᐰᑦ ᓇᕼᐅᕆᒥᑦ, ᐂᑉᕋᕼᐋᒻ ᓄᑲᖓᓂᑦ.

²⁴ ᓱᓕᓗ ᕆᐅᒪ, ᓂᕼᐅᕆᐅᑉ ᐊᑐᒐᕆᓪᓗᓂᐅᒃ ᓄᓕᐊᖓ, ᕿᑐᕐᖓᕐᑖᓚᐅᕆᕗᖅ ᑏᐸᒥᒃ, ᒐᕼᐋᒥᒥᒡᓗ, ᑕᕼᐋᓴᒥᒡᓗ, ᒫᑲᒥᒡᓗ.”