ᒨᓯᓯ ᓯᕗᓪᓖᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᓴᑭᐅᑉ ᐃᕐᓂᐊᖑᓂᖓ

¹ ᐊᑕᓂᖅ ᓵᕋᒧᑦ ᐳᓛᕆᐊᓚᐅᕐᐳᖅ ᐅᖃᕐᓯᒪᓂᓂ ᒪᓕᒡᓗᒍ, ᐊᑕᓂᕐᓗ ᓵᕋᒧᑦ ᐱᓇᓱᐊᓚᐅᕐᐳᖅ ᐊᖏᕐᓯᒪᓂᓂ ᒪᓕᒡᓗᒍ.

² ᓵᕋᓗ ᓄᑕᕋᒃᓴᖃᓕᕐᐳᖅ, ᐃᕐᓂᕐᑖᕐᑎᓪᓗᒍᓗ ᐂᑉᕋᕼᐋᒻ ᐃᓄᑐᖃᐅᓕᕐᑎᓪᓗᒍ, ᓯᕗᓂᖓᒍᑦ ᑕᒪᓐᓇ ᓇᓪᓕᐅᑎᓛᕐᓂᕋᕐᓗᒍ ᒎᑎᐅᑉ ᐅᖃᐅᑎᓚᐅᕐᒪᒍ.

³ ᐂᑉᕋᕼᐋᒻᓗ ᐃᕐᓂᕐᑖᓂ ᐂᓴᑭᒥᒃ ᐊᑦᓯᕐᐹ, ᑖᓐᓇ ᓵᕋᒃᑯᑦ ᐃᕐᓂᕐᑖᕆᔭᓂ.

⁴ ᐂᑉᕋᕼᐋᒻᓗ ᐃᕐᓂᓂ ᐂᓴᑭ ᐅᓪᓗᖃᓕᕐᒪᑦ 8ᓂᒃ ᑭᐱᕚ, ᑍᒫᒃ ᒎᑎᐅᑉ ᐱᖁᔨᓚᐅᕐᓂᖓ ᒪᓕᒡᓗᒍ.

⁵ ᐂᑉᕋᕼᐋᒻᓗ 100ᓂᒃ ᐊᕐᕌᒍᖃᓕᓚᐅᕐᐳᖅ ᐃᕐᓂᖓ ᐂᓴᑭ ᐃᓅᑎᓪᓗᒍ.

⁶ ᓵᕋᓗ ᐅᖃᕐᐳᖅ, “ᒎᑎᐅᑉ ᖁᖓᒍᓐᓇᕐᓯᑎᑉᐹᖓ, ᑐᓴᕐᑐᓪᓗ ᑕᒪᕐᒥᒃ ᐅᕙᓐᓄᑦ ᖁᖓᖃᑕᐅᔪᒫᓕᕐᐳᑦ.”

⁷ ᐅᖃᒃᑲᓐᓂᕆᓪᓗᓂᓗ, “ᑭᓇᓕ ᐅᖃᕈᓐᓇᕋᔭᓚᐅᕐᐹ ᐂᑉᕋᕼᐋᒻᒧᑦ ᓵᕋ ᐊᒫᒪᒃᑎᑦᓯᔪᓐᓇᕐᓂᕋᕐᓗᒍ ᓄᑕᕋᕐᓂᒃ? ᑍᒤᒃᑲᓗᐊᕐᑎᓪᓗᒍ ᐂᑉᕋᕼᐋᒻ ᐃᕐᓂᕐᑖᑎᓯᒪᕙᕋ ᐃᑦᑐᓕᕐᑎᓪᓗᒍ.”

⁸ ᓱᕈᓯᕐᓗ ᐊᖏᒡᓕᕙᓪᓕᐊᕗᖅ, ᐊᒫᒪᔪᐃᕐᓗᓂᓗ; ᐅᓪᓗᕐᒥᓗ ᐂᓴᑭᐅᑉ ᐊᒫᒪᔪᐃᕐᕕᐊᓂ, ᐂᑉᕋᕼᐋᒻ ᓂᕆᕕᒡᔪᐊᓕᐅᓚᐅᕐᐳᖅ.

ᐂᒡᒐᐅᑉ ᐄᓯᒥᐅᓪᓗ ᐊᐅᓪᓚᕐᑎᑕᐅᓂᖏᒃ

⁹ ᓵᕋᐅᓪᓕ ᐂᒡᒐᐅᑉ ᐄᑦᔨᑉᑎᒥᐅᑕᐅᑉ ᐃᕐᓂᖓ ᑕᑯᓐᓇᕐᐹ, ᑖᓐᓇ ᐂᑉᕋᕼᐋᒃᑯᑦ ᐃᕐᓂᕐᑖᕆᓚᐅᕐᑕᖓ, ᒥᑕᐅᑎᖃᕐᑎᓪᓗᒍ ᐂᓴᑭᒥᒃ.

¹⁰ ᑕᕝᕙ ᓵᕋ ᐂᑉᕋᕼᐋᒧᑦ ᐅᖃᕐᐳᖅ, “ᐅᓇ ᐊᕐᓇᖅ ᐱᔨ ᐃᕐᓂᖓᓗ ᐊᐅᓪᓚᕐᑎᓚᐅᒃᑭᒃ; ᑖᑦᓱᒪ ᐱᔨᐅᑉ ᐊᕐᓇᐅᑉ ᐃᕐᓂᖓ ᐱᖁᑎᖕᓂᒃ ᑭᖑᕐᖑᑦᔨᖃᑎᖃᕆᐊᖃᓐᖏᓚᖅ ᐃᕐᓂᓐᓂᒃ ᐂᓴᑭᒥᒃ.”

¹¹ ᑕᒪᓐᓇᓗ ᐂᑉᕋᕼᐋᒻ ᖁᕕᐊᓱᒍᓐᓃᕈᑎᒋᕚ ᐊᖏᔪᒥᒃ, ᐃᕐᓂᓂ ᐱᓪᓗᒍ.

¹² ᒎᑎᐅᓪᓕ ᐂᑉᕋᕼᐋᒻ ᐅᖃᐅᑎᕚ, “ᐃᓱᒫᓘᑎᒋᓂᐊᕐᓇᒋᒃ ᑖᓐᓇ ᓄᑲᑉᐱᐊᖅ ᐊᕐᓇᕐᓗ ᐱᔨᒋᔧᑦ; ᐱᓇᓱᐊᓕᕆᓪᓕ ᓵᕋᐅᑉ ᐅᖃᐅᓯᖓ ᒪᓕᒡᓗᒍ; ᑖᑦᓱᒨᓇ ᐂᓴᑭᒃᑯᑦ ᑭᖑᕚᒃᓴᑎᑦ ᐊᑎᖃᕈᒫᕐᒪᑕ ᐃᓕᖕᓂᒃ.

¹³ ᑖᓐᓇᓗ ᐱᔨᕕᑦ ᐃᕐᓂᖓ ᐃᓅᖃᑎᒌᒡᔪᐊᓐᖑᕐᑎᑦᓱᒫᕐᐸᕋᑦᑕᐅᖅ, ᐃᕐᓂᕆᖕᒥᒐᕕᐅᒃ.”

¹⁴ ᖃᐅᑎᓪᓗᒍ ᐅᓪᓛᒻᒪᕆᒃᑯᑦ ᐂᑉᕋᕼᐋᒻ ᒪᑭᑉᐳᖅ, ᐂᒡᒐ ᑐᓂᓯᕕᒋᕚ ᓂᕿᓂᒃ ᑕᖁᐊᒃᓴᖏᓐᓂᒃ ᐊᒥᕐᒥᒡᓗ ᐃᒥᖃᐅᑎᒥᒃ ᑖᒃᑯᓂᖓ ᓇᖕᒪᒃᑎᓪᓗᒍ, ᓱᕈᓯᕐᓗ ᐱᖃᑎᒋᓪᓗᓂᐅᒃ ᑕᕝᕙᓐᖓᑦ ᐊᐅᓪᓚᕐᑎᑉᐹ. ᑕᕝᕙᓐᖓᓪᓗ ᐊᐅᓪᓚᕋᒥᒃ ᐃᖏᕐᕋᓚᐅᕐᐴᒃ ᐃᓄᖃᖏᑦᑐᒥ ᐱᐊᕐᓯᐸᐅᑉ ᐃᓚᖓᓂ.

¹⁵ ᐃᒥᕐᓕ ᑕᖁᐊᕆᔭᖓ ᓄᖑᒻᒪᑦ, ᓱᕈᓯᖅ ᐅᕐᐱᒊᑦ ᑭᒡᓕᖓᓄᑦ ᐃᓕᕚ.

¹⁶ ᐱᓱᒃᓗᓂᓗ ᐃᖏᑉᐳᖅ ᐅᖓᓯᒋᐊᕐᔪᒃᑕᖓᓄᑦ. ᐱᓯᒃᓯᐅᑉ ᖃᕐᔪᖓᑕ ᑎᑭᑦᓱᓐᓇᕐᑕᖓᓄᑦ; ᐃᒻᒥᓄᓪᓗ ᐅᖃᓕᕐᓗᓂ, “ᕿᑐᕐᖓᕋ ᑐᖁᓕᕐᑎᓪᓗᒍ ᑕᑯᓐᓇᕈᒪᓐᖏᓚᖓ.” ᐊᑭᐊᓂ ᐃᒃᓯᕚᕐᑎᓪᓗᒍ, ᓄᑲᑉᐱᐊᖅ ᓂᐱᖅᑯᕐᑐᓪᓗᓂ ᕿᐊᓯᕗᖅ.

¹⁷ ᒎᑎᐅᓪᓗ ᓄᑲᑉᐱᐊᑉ ᓂᐱᖓ ᑐᓴᕐᐹ; ᕿᓚᖕᒥᓪᓗ ᒎᑎᐅᑉ ᐂᖏᓖᖓᑕ ᐂᒡᒐ ᐅᖃᕐᕕᒋᕚ, “ᐂᒡᒑ, ᓱᓇᒥᒃ ᖁᕕᐊᓱᖏᑦᔪᑎᖃᕐᐲᑦ? ᑲᑉᐱᐊᓱᖕᓂᐊᕐᓇᒃ, ᒎᑎᐅᑉ ᓄᑲᑉᐱᐊᑉ ᕿᐊᓂᖓ ᑐᓴᕐᒪᒍ.

¹⁸ ᒪᑭᓪᓗᑎᑦ, ᐅᐸᓚᐅᕈᒃ ᑎᒍᓗᒍ, ᐃᕿᓚᐅᕈᒃ; ᑖᓐᓇ ᐃᓅᖃᑎᒌᒡᔪᐊᓐᖑᕐᑎᑦᓱᒫᕋᒃᑯ.”

¹⁹ ᐂᒡᒐᐅᓪᓗ ᐃᔨᖏᒃ ᒎᑎᐅᑉ ᑕᑯᑎᒻᒪᒋᒃ, ᑕᑯᕗᖅ ᐃᒥᕐᑕᕐᕕᖕᒥᒃ; ᑕᕝᕗᓐᖓᕋᒥᓗ ᐃᒥᖃᐅᑎᓂ ᐊᒥᖅ ᐃᒻᒥᕐᐹ ᐃᒥᕐᒥᒃ; ᓄᑲᑉᐱᐊᕐᓗ ᐃᒥᕐᑎᓪᓗᒍ.

²⁰ ᒎᑎᐅᓪᓗ ᐃᓚᒋᕚ ᓄᑲᑉᐱᐊᖅ, ᐱᕈᕇᓚᐅᕐᐳᖅ; ᓄᓇᖃᓚᐅᕐᐳᕐᓗ ᐃᓄᖃᖏᑦᑐᒥ, ᐱᑎᒃᓯᒧᓪᓗ ᐊᔪᖏᑦᓯᐊᓕᓚᐅᕐᐳᖅ.

²¹ ᓄᓇᖃᓚᐅᕐᐳᕐᓗ ᐸᕌᓐ ᐃᓄᖃᖏᑦᑐᖓᓂ; ᐊᓈᓇᖓᑕᓗ ᓄᓕᐊᓂᒃᑎᑉᐹ ᐄᑦᔨᑉᑎᒥᐅᑕᕐᒥᒃ.

ᐂᑉᕋᕼᐋᒻᓗ ᐊᐱᒥᓕᑭᐅᓪᓗ ᐊᖏᖃᑎᒌᖕᓂᖏᒃ

²² ᑍᑦᓱᒪᓂᐅᑎᓪᓗᒍ ᐊᐱᒥᓕᑭ ᐱᖃᑎᖃᕐᓗᓂ ᐱᑰᓕᒥᒃ, ᐅᓇᑕᕐᑐᒃᓴᖁᑎᖏᑕ ᐊᖓᔪᖅᑳᖓᓂᒃ, ᐂᑉᕋᕼᐋᒻᒧᑦ ᐅᖃᕐᐳᖅ, “ᒎᑎᐅᑉ ᐃᓚᒋᕚᑎᑦ ᐱᓇᓱᐊᕐᑕᓕᒫᕐᓂ;

²³ ᑍᒤᒻᒪᑦ ᐊᖏᒻᒪᕆᒃᓗᑎᑦ ᐅᖃᕕᓚᐅᕆᑦ ᒎᑎᐅᑉ ᓵᖓᓂ ᓇᓗᓁᕐᓯᓗᑎᑦ ᐅᕙᓐᓄᑦ ᓱᓕᖏᓐᓂᒃᑯᑦ ᐱᓂᐊᖏᓐᓂᕋᕐᓗᑎᑦ, ᕿᑐᕐᖓᓐᓄᓪᓘᓐᓃᑦ, ᐃᓕᖕᓄᑦ ᐱᑦᓯᐊᕐᓯᒪᒐᒪ, ᑍᒫᑦᓮᓐᓇᖅ ᐱᓇᓱᐊᕐᕕᒋᓚᐅᓐᖓ, ᓄᓇᑦᑎᓐᓄᓪᓗ ᑕᒪᐅᖓᓗ ᓇᔪᕐᑕᕐᓄᑦ.”

²⁴ ᐂᑉᕋᕼᐋᒻᓗ ᐅᖃᕐᐳᖅ, “ᐅᖃᕕᒃᓗᖓ ᐊᖏᕐᓂᐊᕐᐳᖓ.”

²⁵ ᐂᑉᕋᕼᐋᒻᓗ ᐊᐱᒥᓕᑭᒧᑦ ᓈᒻᒪᒃᓴᖏᑦᔪᑎᒥᓂᒃ ᐅᖃᐅᓯᖃᓕᕐᐳᖅ ᐃᒥᕐᑕᕐᕕᖕᒥᒃ ᐊᐱᒥᓕᑭᐅᑉ ᐱᔨᖏᓐᓄᑦ ᑎᒍᔭᐅᓚᐅᕐᑐᒥᒃ.

²⁶ ᐊᐱᒥᓕᑭᓗ ᐅᖃᓕᕐᐳᖅ, “ᖃᐅᔨᒪᓐᖏᓚᖓ ᑭᓇ ᑍᒤᓕᐅᕐᓂᕐᒪᖔᑦ; ᐅᖃᐅᑎᓚᐅᖏᓐᓇᕕᖓ, ᑕᕝᕙ ᓯᕗᓪᓕᕐᐹᒥᒃ ᑐᓴᓕᑍᓐᓇᕐᐸᕋ.”

²⁷ ᑕᕝᕙ ᐂᑉᕋᕼᐋᒻ ᑐᓂᓯᓕᕐᐳᖅ ᓰᐱᓂᒃ ᐃᒻᒧᒃᓯᐅᒐᓂᒡᓗ ᐊᐱᒥᓕᑭᒧᑦ, ᑖᒃᑯᐊᒡᓗ ᐃᒻᒥᖕᓄᑦ ᐊᖏᖃᑎᒌᒃᐴᒃ.

²⁸ ᐂᑉᕋᕼᐋᒻᓗ ᓰᐱᐅᑉ ᓄᕐᕋᖏᓐᓂᒃ ᐊᕐᓇᓪᓗᖕᓂᒃ 7ᓂᒃ ᓴᓂᕐᕔᕗᖅ ᓰᐱᖁᑎᒥᓂᑦ,

²⁹ ᐊᐱᒥᓕᑭᐅᓪᓗ ᐂᑉᕋᕼᐋᒻ ᐊᐱᕆᕚ, “ᖃᓄᐃᓕᐅᕐᐲᑦ ᐅᑯᓄᖓ 7ᓄᑦ ᓰᐱᐅᑉ ᓄᕐᕋᖏᓐᓄᑦ ᓴᓂᕐᕙᒃᑕᕐᓄᑦ?”

³⁰ ᑖᑦᓱᒪ ᑭᐅᕚ, “ᐅᑯᐊ ᓰᐱᐅᑉ ᓄᕐᕋᖏᑦ ᐊᕐᓇᓪᓗᐃᑦ 7ᐃᑦ ᑎᒍᒃᑭᑦ ᐅᕙᓐᓂᑦ, ᖃᐅᔨᓂᐊᕋᕕᑦ ᐅᕙᖓ ᑖᑦᓱᒥᖓ ᐃᒥᕐᑕᕐᕕᖕᒥᒃ ᐃᑎᕐᓴᓕᐅᕆᓯᒪᓂᓐᓂᒃ.”

³¹ ᑕᕝᕙᓗ ᑖᓐᓇ ᐃᒥᕐᑕᕐᕕᒃ ᐊᑎᖃᓕᕐᐳᖅ ᐱᐊᕐᓯᐸᒥᒃ; ᐱᑦᔪᑎᖃᕐᓗᓂ ᑕᕝᕙᓂ ᑖᒃᑯᐊᒃ ᐅᖃᕕᒃᓗᑎᒃ ᐊᖏᖃᑎᒌᓚᐅᕐᒪᑎᒃ.

³² ᑕᕝᕙᓂᓕ ᐊᖏᖃᑎᒌᖕᓂᕐᒥᒃ ᐱᔭᕇᕋᒥᒃ ᐱᐊᕐᓯᐸᒥ. ᐊᐱᒥᓕᑭ ᐱᑰᓕᓗ ᐅᓇᑕᕐᑐᒃᓴᖁᑎᖏᑕ ᐊᖓᔪᖅᑳᖓᑦ ᒪᑭᑉᐴᒃ ᐅᑎᓕᕐᓗᑎᒃ ᐱᓕᔅᑍᓂᒧᑦ.

³³ ᑭᖑᓂᖓᒍᓪᓗ ᐂᑉᕋᕼᐋᒻ ᓇᐹᕐᑐᒃᓴᒥᒃ ᑕᒪᕆᔅᑭᒥᒃ ᐊᑎᓕᖕᒥᒃ ᓇᑉᐸᕐᓯᕗᖅ ᐱᐊᕐᓯᐸᒥ, ᐊᑕᓂᕐᓗ ᑕᕝᕙᓂ ᑐᒃᓯᐊᕐᕕᒋᕚ, ᒎᑎᐅᔪᖅ ᐃᓱᖃᖏᑦᑐᒧᑦ.

³⁴ ᐂᑉᕋᕼᐋᒻᓗ ᑕᕝᕙᓃᓚᐅᕐᐳᖅ ᐱᓕᔅᑍᓂᒥ ᐅᓪᓗᓂᒃ ᐅᓄᕐᑐᓂᒃ.