ᒨᓯᓯ ᓯᕗᓪᓖᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᑉᕋᕼᐋᒻ ᐊᐱᒥᓕᑭᓗ

¹ ᐂᑉᕋᕼᐋᒻᓗ ᐃᖏᕐᕋᕗᖅ ᓯᕿᓂᐅᑉ ᓇᓛᓄᑦ ᓂᒋᑉᒧᑦ, ᓄᓇᖃᓕᕐᓗᓂᓗ ᑲᑎᓯᐅᑉ ᓲᕆᐅᓪᓗ ᐊᑯᓐᓂᖓᓂ; ᑭᖑᓂᖓᒍᓪᓗ, ᓄᓇᖃᓕᕐᓗᓂ ᒋᕌᕆᒥ,

² ᐂᑉᕋᕼᐋᒻᓗ ᓄᓕᐊᓂ ᓵᕋ ᐅᖃᐅᓯᕆᕚ, “ᐅᓇ ᓇᔭᒐ.” ᐊᖓᔪᖅᑳᕐᔪᐊᓪᓗ ᐊᐱᒥᓕᑭᐅᑉ ᓄᓇᒥ ᒋᕌᕆᒥ ᐊᖓᔪᖅᑳᕐᔪᐊᖑᔫᑉ ᓵᕋ ᐂᔭᐅᖁᕚ ᐂᑉᐸᕆᔪᒪᓪᓗᒍ.

³ ᒎᑎᐅᓪᓕ ᐅᓐᓄᐊᒥ ᐊᐱᒥᓕᑭ ᓯᓐᓇᒃᑑᒪᒃᑯᑦ ᓴᖅᑭᕝᕕᒋᕚ, ᐅᖃᐅᑎᓪᓗᒍᓗ, “ᑕᑯᒋᑦ, ᑐᖁᒦᓕᕐᐳᑎᑦ, ᐊᕐᓇᖅ ᐱᓚᐅᕐᑍᑦ ᐱᓪᓗᒍ; ᑖᓐᓇ ᐊᖑᑎᐅᑉ ᓄᓕᐊᕆᖕᒪᒍ.”

⁴ ᐊᐱᒥᓕᑭᐅᓪᓕ ᐅᐸᓚᐅᓐᖏᓛ ᐱᖃᑎᒋᔪᒪᓗᒍ; ᑍᒤᒻᒪᑦ ᐅᖃᕐᐳᖅ, “ᐊᑕᓃᖅ, ᐃᓄᖕᓂᒃ ᐸᓯᔭᒃᓴᐅᖏᑦᑐᓂᒃ ᑐᖁᑦᓯᔪᒪᕖᑦ?

⁵ ᑍᓐᓇ ᓇᖕᒥᓂᖅ ᐅᖃᓚᐅᓐᖏᓛᖅ ᐅᕙᓐᓄᑦ? ‘ᐅᓇ ᓇᔭᒐ.’ ᑖᓐᓇᓗ ᐊᕐᓇᖅ ᓇᖕᒥᓂᖅ ᑍᒫᒃ ᐅᖃᓚᐅᕆᓪᓗᓂ, ‘ᐅᓇ ᐊᓂᒐ.’ ᐆᒻᒪᑎᒃᑯᑦ ᓱᓕᑦᓯᐊᕐᓗᖓ ᐊᒡᒐᒃᑯᓪᓗ ᐸᓯᔭᒃᓴᐅᓇᖓ ᑍᒤᓚᐅᕐᐳᖓ.”

⁶ ᒎᑎᐅᑉ ᑭᐅᕚ ᓯᓐᓇᒃᑑᒪᒃᑯᑦ, “ᐄᓛᒃ, ᖃᐅᔨᒪᕙᒋᑦ ᑍᒫᒃ ᐱᓚᐅᖏᓐᓇᕕᑦ ᐆᒻᒪᑎᕕᑦ ᓱᓕᑦᓯᐊᕐᓂᖓᓄᑦ, ᐅᕙᖓᓗ ᐊᔪᕐᑐᓕᑎᑦᑍᓕᓚᐅᕐᐸᒋᑦ ᐅᕙᓐᓄᑦ; ᑍᒤᒻᒪᑦ ᑖᑦᓱᒥᖓ ᐊᒃᑐᐃᑎᓚᐅᓐᖏᓚᒋᑦ.

⁷ ᒫᓐᓇᓕ, ᐊᕐᓇᖅ ᐅᐃᖓᓄᑦ ᐅᑎᕐᑎᓕᕈᒃ; ᑖᑦᓱᒪ ᐅᐃᖓ ᒎᑎᒧᑦ ᐅᖃᕐᑎᒋᔭᐅᖕᒪᑦ, ᑖᑦᓱᒪᓗ ᑐᒃᓯᐅᑎᓂᐊᕐᐹᑎᑦ ᐃᓅᓂᐊᕐᐳᑎᓪᓗ. ᐅᑎᕐᑎᓐᓂᐊᖏᒃᑯᕕᐅᒡᓕ, ᖃᐅᔨᒪᓕᕆᑦ ᓱᓕᓪᓗᖓ ᐅᖃᐅᑎᕙᒋᑦ ᑐᖁᓂᐊᕋᕕᑦ, ᐃᓚᑎᓪᓗ ᑕᒪᕐᒥᒃ.”

⁸ ᐊᐱᒥᓕᑭ ᐅᓪᓛᒻᒪᕆᒃᑯᑦ ᒪᑭᑉᐳᖅ, ᐱᔨᓂᓗ ᑕᒪᕐᒥᒃ ᕾᖁᕔᑦ, ᑕᒪᒃᑯᓂᖓᓗ ᑕᒤᓐᓂᒃ ᐅᓂᒃᑳᕐᕕᒋᓪᓗᒋᑦ, ᑖᒃᑯᐊᓗ ᐊᖏᔪᒥᒃ ᑲᑉᐱᐊᓱᓕᕐᐳᑦ.

⁹ ᑕᕝᕙ ᐊᐱᒥᓕᑭᐅᑉ ᐂᑉᕋᕼᐋᒻ ᕾᖁᕚ, ᐊᐱᕆᓪᓗᒍᓗ, “ᐅᕙᑦᑎᓐᓄᑦ ᖃᓄᐃᓕᐅᓕᕐᐱᑦ? ᖃᓄᕐᓗ ᐊᔪᕐᑐᓕᓯᒪᕗᖓ ᐃᓕᖕᓄᑦ, ᑎᑭᑎᑦᓯᒐᕕᑦ ᐅᕙᓐᓄᑦ ᐊᖓᔪᖅᑲᐅᕕᓐᓄᓪᓗ ᐊᔪᕐᑐᓕᓂᕐᒥᒃ ᐊᖏᔪᒥᒃ? ᐱᓂᐊᕐᓂᖃᓚᐅᕋᕕᑦ ᐅᕙᓐᓄᑦ ᐱᓂᐊᕐᓂᐅᔭᕆᐊᖃᖏᑦᑐᒥᒃ.”

¹⁰ ᐊᐱᒥᓕᑭ ᐂᑉᕋᕼᐋᒧᑦ ᐅᖃᕐᐳᖅ, “ᓱᓇᒥᒃ ᐃᓱᒪᓚᐅᕋᕕᑦ ᑍᒤᓕᐅᓚᐅᕐᐲᑦ?”

¹¹ ᐂᑉᕋᕼᐋᒻ ᑭᐅᕚ, “ᑍᒤᓕᐅᓚᐅᕐᐳᖓ ᐃᓱᒪᖃᓚᐅᕋᒪ, ᐅᕙᓂ ᓄᓇᒥ ᒎᑎᒥᒃ ᓯᕘᕋᔪᖃᕋᓱᒋᓇᒍ, ᑐᖁᑕᐅᓂᐊᕋᓱᒋᓚᐅᕋᒪ ᓄᓕᐊᓐᓂᒃ ᐱᔪᒪᔪᓄᑦ.

¹² ᐃᓛᒡᓕ ᓱᓕᔪᒥᒃ ᓇᔭᓪᓚᕆᒋᒐᓗᐊᕐᐸᕋ, ᐊᑖᑕᒪ ᐸᓂᒋᖕᒪᒍ, ᐊᓈᓇᒪᓕ ᐸᓂᖏᓇᓂᐅᒃ; ᑖᓐᓇᓗ ᓄᓕᐊᕐᑖᕆᓚᐅᕐᐸᕋ.

¹³ ᒎᑎᐅᓪᓕ ᐊᑖᑕᒪ ᓇᔪᕐᑕᖓᓂᑦ ᑎᓕᓕᕐᒪᖓ ᓄᓇᒧᑦ ᓄᓇᒋᓐᖏᑕᓐᓄᑦ, ᐊᕐᓇᖅ ᐅᖃᐅᑎᓚᐅᕐᐸᕋ, ‘ᐅᕙᓐᓂᒃ ᐱᑦᓯᐊᖁᕙᒋᑦ ᐃᒫᒃ: ᓄᓇᓕᖕᓄᑦ ᑕᒤᓐᓄᑦ ᐅᐸᒃᑕᑦᑎᓐᓄᑦ ᐅᕙᓐᓂᒃ ᐊᓂᖃᕐᓂᕋᖃᑦᑕᖁᕙᒋᑦ.’”

¹⁴ ᑕᕝᕙ ᐊᐱᒥᓕᑭ ᓰᐱᓂᒃ ᑎᒍᓯᕗᖅ, ᐃᒻᒧᒃᓯᐅᒐᕐᓂᒡᓗ, ᐊᖑᑎᓂᒃ ᐊᕐᓇᓂᒡᓗ ᐱᔨᓂᒃ, ᑐᓂᓪᓗᒋᓪᓗ ᐂᑉᕋᕼᐋᒧᑦ, ᓵᕋᓗ ᐅᑎᕐᑎᓪᓗᒍ ᑖᑦᓱᒪ ᓄᓕᐊᖓ.

¹⁵ ᐊᐱᒥᓕᑭᓗ ᐅᖃᕐᐳᖅ, “ᑕᑯᒋᑦ, ᓄᓇᖁᑎᒐ ᑕᒪᓐᓇ ᑕᑯᓐᓇᕐᑍᑦ; ᓇᓂᑐᐃᓐᓇᑦᓯᐊᖅ ᓄᓇᒋᔪᒪᔭᕐᓂ ᓄᓇᖃᕈᓐᓇᕐᐳᑎᑦ.”

¹⁶ ᓵᕋᒧᓪᓗ ᐅᖃᕆᕗᖅ, “ᑕᑯᒋᑦ, ᐊᓃᑦ ᑐᓂᓯᕕᒋᕙᕋ ᓯᐅᓪᕕᕆᓂᒃ 1,000ᓂᒃ; ᑕᒪᓐᓇ ᑕᕝᕙ ᓴᐳᑎᔭᐅᓃᑦ ᐸᓯᔭᒃᓴᐅᖏᓐᓂᕐᓄᑦ ᑕᒪᕐᒥᒃ ᐃᓚᒋᔭᑎᑦ ᖃᐅᔨᑎᓪᓗᒋᑦ; ᐸᓯᔭᒃᓴᐅᖏᓐᓂᕐᓂᒃ ᑕᒪᕐᒥᒃ ᖃᐅᔨᖁᓪᓗᒋᑦ.”

¹⁷ ᐂᑉᕋᕼᐋᒻᓗ ᒎᑎᒧᑦ ᑐᒃᓯᐊᕐᐳᖅ; ᒎᑎᐅᓪᓗ ᐊᐱᒥᓕᑭ ᓄᓕᐊᖓᓗ ᐋᖅᑭᒃᐹᒃ, ᐱᔨᖏᓪᓗ ᐊᕐᓁᑦ ᐋᖅᑭᒃᑭᕔᑦ, ᑕᕝᕙ ᕿᑐᕐᖓᕐᑖᕈᓐᓇᕐᓯᓚᐅᕐᐳᑦ.

¹⁸ ᐊᑕᓂᐅᑉ ᕿᑐᕐᖓᕐᑖᕈᓐᓁᓪᓕᑎᓚᐅᕐᒪᒋᑦ ᐊᐱᒥᓕᑭᐅᑉ ᐃᒡᓗᒥᐅᖃᑎᖏᑦ ᓵᕋ ᐱᓪᓗᒍ, ᐂᑉᕋᕼᐋᒻ ᓄᓕᐊᖓ.