ᒨᓯᓯ ᓯᕗᓪᓖᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑕᕝᕙ ᕿᓔᓪᓗ ᓄᓇᕐᔪᐊᕐᓗ ᐱᔭᕇᓚᐅᕐᐳᑦ, ᐃᓂᖃᕐᑐᓪᓗ ᑖᒃᑯᓇᓂ.

² ᐅᓪᓗᐃᑦ 7ᖓᓐᓂ ᒎᑎᐅᑉ ᐱᓇᓱᐊᕐᑕᓂ ᐱᔭᕇᕋᒥᒋᑦ, ᑕᕾᕐᓯᕐᐳᖅ ᓴᓇᔭᓕᒫᒥᓂᑦ ᐱᓇᓱᐊᓚᐅᕐᑕᒥᓂᑦ.

³ ᒎᑎᐅᓪᓗ ᐅᓪᓗᐃᑦ 7ᖓ ᓮᒻᒪᕐᑎᑉᐹ ᐃᑦᔪᕐᓁᑎᓪᓗᒍᓗ, ᑕᕝᕙᓂ ᒎᑎ ᑕᕾᕐᓯᓚᐅᕋᒥ ᐱᓇᓱᐊᕐᑕᓕᒫᒥᓂᑦ ᐱᓐᖑᕐᑎᑦᓯᓪᓗᓂ.

⁴ ᐅᑯᐊ ᑕᕝᕙ ᑭᖑᓕᕇᑦ ᕿᓚᖕᒥ ᓄᓇᒥᓗ ᐱᓐᖑᕐᑎᑕᐅᓚᐅᕐᑐᑦ. ᑍᑦᓱᒪᓂ ᐊᑕᓂᖅ ᒎᑎ ᓄᓇᕐᔪᐊᕐᒥᒃ ᕿᓚᖕᒥᐅᑕᓕᒫᓂᒡᓗ ᐱᓐᖑᕐᑎᑦᓯᑎᓪᓗᒍ,

ᐱᕈᕐᓰᕕᒃ ᐄᑕᓂ

⁵ ᓱᓕ ᐱᕈᕐᑐᖃᓚᐅᓐᖏᓚᖅ ᓄᓇᒥ ᐱᕈᕐᓯᐊᒃᓴᑦ ᐱᕈᓕᓚᐅᖏᒻᒪᑕ ᐊᑕᓂᖅ ᒎᑎ ᓯᓚᓗᒃᑎᑦᓯᓚᐅᖏᒻᒪᑦ ᓱᓕ ᓄᓇᒧᑦ, ᐃᓄᖕᓂᒃ ᓄᓇᓕᕆᔪᒃᓴᕐᑕᖃᓚᐅᖏᒻᒪᑦ ᐱᕈᕐᑐᒃᓴᑦ ᐃᓂᒃᓴᖏᓐᓂᒃ.

⁶ ᓴᓗᐊᕐᐸᓪᓕᐊᔪᖅ ᖁᒻᒧᐊᖃᑦᑕᓚᐅᕐᐳᖅ ᓄᓇᓕᒫᖅ ᖃᐅᓯᕐᑎᓪᓗᒍ.

⁷ ᐊᑕᓂᕐᓕ ᒎᑎ ᐃᓄᒃᓴᓕᐅᕐᐳᖅ ᓄᓇᐅᑉ ᐃᓚᖓᓂᒃ ᐱᓪᓗᓂ; ᓱᕐᓗᖓᒍᑦ ᐊᓂᕐᓵᕐᕕᒋᕚ ᐃᓅᓯᖃᕐᓇᕐᑐᒥᑦ; ᐃᓄᒡᓗ ᑕᕝᕙ ᐆᒻᒪᕐᐳᖅ.

⁸ ᐊᑕᓂᕐᓗ ᒎᑎ ᐱᕈᕐᓰᕕᓕᐅᕐᐳᖅ ᐄᑕᓂᒥᒃ, ᓯᕿᓂᐅᑉ ᓄᐃᕕᐊᑕ ᓇᓛᓂ; ᐊᖑᓪᓗ ᑕᕝᕗᓐᖓᕐᑎᑉᐹ ᓴᓇᓚᐅᕐᑕᓂ.

⁹ ᓄᓇᒥᓪᓗ ᐊᑕᓂᖅ ᒎᑎ ᓇᐹᕐᑐᓂᒃ ᑕᒤᓐᓂᒃ ᐱᕈᕐᑎᑦᓯᕗᖅ ᑕᑯᒥᓇᕐᑐᓂᒃ ᓂᕿᒃᓴᐅᑦᓯᐊᕐᑐᓂᒃ, ᐱᕈᕐᓰᕕᐅᓪᓗ ᕿᑎᖓᓃᑦᑐᖃᕆᕗᖅ ᓇᐹᕐᑐᒥᒃ ᐃᓅᓯᖃᕐᓇᕐᑐᒥᒃ, ᓇᐹᕐᑐᖃᕆᓪᓗᓂᓗ ᐱᐅᔪᒥᒃ ᐱᐅᖏᑦᑐᒥᒡᓗ ᖃᐅᔨᒪᓕᕐᓇᕐᑐᒥᒃ.

¹⁰ ᑰᒃᑕᖃᕐᐳᖅ ᐄᑕᓂᒥᑦ ᑰᒃᑐᒥᒃ ᐱᕈᕐᓰᕕᖕᒥᒃ ᐃᒻᒥᕐᓱᐃᔪᒥᒃ, ᑕᕝᕙᓐᖓᓪᓗ ᑕᒪᓐᓇ ᑰᒃ ᓯᑕᒪᐅᓕᖅᑲᖓᕗᖅ.

¹¹ ᓯᕗᓪᓕᖅ ᑰᒃ ᐊᑎᖃᕐᐳᖅ ᐱᓴᓐᒥᒃ; ᓄᓇᐅᑉ ᕼᐊᕕᓚᒥᒃ ᐊᑎᓕᐅᑉ ᐊᕙᑎᓕᒫᖓᒍᑦ ᑰᒃᑐᒥᒃ, ᒎᓗᖃᕐᑐᒥᒃ.

¹² ᑕᕝᕙᓂᓗ ᓄᓇᒥ ᒎᓗ ᐱᐅᔪᐊᓘᕗᖅ; ᑎᓕᐊᒻ ᑎᐱᑦᓯᐊᕆᒃᑐᒃᓴᖅ ᐊᒻᒪᓗ ᐅᔭᕋᖕᒥᒃ ᐆᓂᒃᒥᒃ ᐊᑎᓕᖕᒥᒃ ᑕᕝᕙᓃᑦᑐᖃᕆᕗᖅ.

¹³ ᑰᓪᓗ ᐂᑉᐹ ᐊᑎᖃᕐᐳᖅ ᒋᕼᐅᓂᒥᒃ; ᓄᓇᐅᑉ ᑯᔅᒥᒃ ᐊᑎᓕᐅᑉ ᐊᕙᑎᓕᒫᖓᒍᑦ ᑰᒃᑐᒥᒃ.

¹⁴ ᑰᓪᓗ ᐱᖓᔪᖓᑦ ᐊᑎᖃᕐᐳᖅ ᑍᒍᕆᓯᒥᒃ, ᐊᓯᕆᐊᑉ ᖃᐅᓕᕐᕕᐊᑕ ᓇᓛᒍᑦ ᑰᒃᑐᖅ. ᑰᓪᓗ ᓯᑕᒪᖓᑦ ᐊᑎᖃᕐᐳᖅ ᐃᕗᕅᑎᒥᒃ.

¹⁵ ᐊᑕᓂᐅᓪᓗ ᒎᑎᐅᑉ ᐊᖑᑦ ᐄᑕᓂᒧᐊᕐᑎᑉᐹ ᐱᕈᕐᓰᕕᖕᒧᑦ ᓄᓇᒥᒃ ᐋᖅᑭᒃᓱᐃᖁᓪᓗᒍ ᑲᒪᒋᓗᒍᓗ.

¹⁶ ᐊᑕᓂᐅᓪᓗ ᒎᑎᐅᑉ ᐊᖑᑦ ᐱᖁᓪᓚᕆᒃᓗᒍ ᐅᖃᐅᑎᕚ, “ᓇᐹᕐᑐᓂᒃ ᑕᒤᓐᓂᑦ ᐃᓱᒪᕐᓱᕐᓗᑎᑦ ᐱᕈᕐᑐᖏᓐᓂᒃ ᓂᕆᔪᓐᓇᕐᓂᐊᕐᐳᑎᑦ ᐱᕈᕐᓰᕕᖕᒦᑦᑐᓂᑦ.

¹⁷ ᓇᐹᕐᑐᒥᓪᓕ ᐱᐅᔪᒥᒃ ᐱᐅᖏᑦᑐᒥᒡᓗ ᖃᐅᔨᒪᓕᕐᓇᕐᑑᑉ ᐸᐅᕐᖓᖏᓐᓂᒃ ᓂᕆᔪᒃᓴᐅᓐᖏᓚᑎᑦ, ᓂᕆᕕᒋᒍᕕᐅᒃ ᐅᓪᓗᒥ ᑕᕝᕙᓂ ᑐᖁᔪᒫᕐᐳᑎᑦ.”

¹⁸ ᐊᑕᓂᕐᓕ ᒎᑎ ᐅᖃᕐᐳᖅ, “ᓈᒻᒪᓐᖏᓚᖅ ᐊᖑᑦ ᐃᓄᑑᒃᐸᑦ; ᑖᑦᓱᒪ ᐃᑲᔪᕐᑎᒃᓴᖓᓂᒃ ᓴᓇᓂᐊᕐᐳᖓ ᓈᒻᒪᒋᓗᒍ ᐂᑉᐸᕆᓂᐊᕐᑕᖓᓂᒃ.”

¹⁹ ᐊᑕᓂᖅ ᒎᑎ ᓄᓇᒥᑦ ᐱᓪᓗᓂ ᐆᒪᔪᓂᒃ ᓇᑎᕐᓇᒥᐅᑕᕐᓂᒃ ᓴᓇᕗᖅ; ᑎᖕᒥᐊᓂᒡᓗ ᖃᖓᑕᕙᒃᑐᓂᒃ, ᐊᖑᑎᒧᐊᕐᑎᓪᓗᓂᒋᓪᓗ ᖃᓄᖅ ᑍᓂᐊᕐᒪᖔᒋᑦ ᖃᐅᔨᔪᒪᓪᓗᓂ; ᖃᓄᑐᐃᓐᓇᖅ ᐊᖑᑎᐅᑉ ᑍᖕᒪᒋᑦ ᐆᒪᔪᑦ ᖃᓄᐃᑦᑐᑐᐃᓐᓁᑦ, ᑍᒫᒃ ᐊᑎᖃᓕᓚᐅᕐᐳᑦ.

²⁰ ᐊᖑᑎᐅᓪᓗ ᐊᑎᖃᕐᑎᑉᐰᑦ ᐆᒪᔪᓕᒫᑦ ᓄᔪᐊᕐᑐᑦ ᓄᔪᐃᑦᑐᓪᓗ, ᑎᖕᒥᐊᓕᒫᓪᓗ ᖃᖓᑕᕙᒃᑐᑦ, ᐆᒪᔪᓕᒫᓪᓗ ᓄᓇᒦᑦᑐᑦ ᑭᓯᐊᓂᓕ ᑕᒪᒃᑯᐊ ᐊᖑᑎᐅᑉ ᐃᑲᔪᕐᑎᒃᓴᖓᓂᒃ ᓈᒻᒪᒋᔭᖓᓂᒃ ᐱᑕᖃᕐᑐᖃᓚᐅᓐᖏᓚᑦ.

²¹ ᐊᑕᓂᐅᓪᓕ ᒎᑎᐅᑉ ᐊᖑᑦ ᐃᑎᔪᒥᒃ ᓯᓂᓕᕐᑎᑉᐹ, ᓯᓂᒃᑎᓪᓗᒍᓗ ᑐᓕᒫᖓᑕ ᐃᓚᖓᓐᓂᒃ ᐲᕐᓯᕗᖅ ᐲᕐᓯᕕᒋᔭᓂᓗ ᒪᒥᑎᑉᐹ ᐅᕕᓂᖓᓗ;

²² ᐊᑕᓂᐅᓪᓗ ᒎᑎᐅᑉ ᑐᓕᒫᖅ ᐲᕐᑕᓂᒃ ᐊᖑᒻᒥᑦ ᓴᓇᕚ ᐊᕐᓇᓕᐊᕆᓪᓗᒍ ᑐᓂᓪᓗᒍᓗ ᐊᖑᒻᒧᑦ.

²³ ᐊᖑᓪᓗ ᐅᖃᕐᐳᖅ, “ᐅᓇ ᐊᓱᐃᓛᒃ ᓴᐅᓂᖅ ᓴᐅᓂᓐᓂᑦ ᐱᓯᒪᔪᖅ ᐅᕕᓂᐅᓪᓗᓂᓗ ᐅᕕᓂᓐᓂᑦ ᐱᓯᒪᔪᖅ, ᐊᕐᓇᒥᒃ ᐊᑎᖃᕐᓂᐊᓕᕐᐳᖅ, ᐊᖑᒻᒥᑦ ᐲᕐᑕᐅᓯᒪᖕᒪᑦ.”

²⁴ ᑍᒤᓐᓂᖓᓄᑦ ᐊᖑᑎᐅᑉ ᐊᑖᑕᓂ ᐊᓈᓇᓂᓗ ᕿᒪᖕᓂᐊᕐᐹᒃ ᓄᓕᐊᓂ ᑲᑎᖔᕐᓗᓂᐅᒃ, ᑖᒃᑯᐊᒡᓗ ᐅᕕᓂᒃᑯᑦ ᐊᑕᐅᓯᐅᓕᕐᐴᒃ.

²⁵ ᐊᖑᓪᓗ ᓄᓕᐊᖓᓗ ᑕᒪᕐᒥᒃ ᐊᓐᓄᕌᖃᓚᐅᓐᖏᓚᒃ, ᑲᓐᖑᓱᒐᑎᒡᓗ.