ᒨᓯᓯ ᓯᕗᓪᓖᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦᓱᑑᒪᒥᐅᑦ ᐊᔪᕐᑐᓕᓂᖏᑦ 1 ᐅᓐᓄᒃᑎᓪᓗᒍ ᐂᖏᓖᒃ ᒪᕐᕉᒃ ᓱᑑᒪᒧᑦ ᑎᑭᑉᐴᒃ, ᓘᑎᓗ ᓱᑑᒪᐅᑉ ᐃᑎᕐᑕᕐᕕᖓᓂ ᐃᒃᓯᕙᓚᐅᕐᐳᖅ. ᓘᑎᐅᓪᓗ ᑕᑯᒐᒥᒋᒃ, ᓂᑯᕕᓪᓗᓂ ᐸᕐᕆᐊᕐᐹᒃ. ᐅᑯᓪᓗᓂᓗ ᑮᓇᓂ ᐊᒃᑐᕐᓗᒍ ᓄᓇᒧᑦ. 2 ᐅᖃᕐᐳᖅ, “ᐊᖓᔪᖅᑳᒃᑲᒃ ᐅᖃᐅᑎᕙᑦᓯᒃ ᑕᒪᐅᖓ ᓄᖅᑲᖁᓪᓗᓯᒃ, ᐱᔨᑦᓯᓗ ᐃᒡᓗᖓᓄᐊᖁᓪᓗᓯᒃ ᓯᓂᒃᑕᕐᓗᓯᒡᓗ, ᐃᑎᒐᓯᒡᓗ ᐅᐊᓴᕐᓗᒋᑦ. ᐅᓪᓛᕈᕐᓗᓯᒃ ᒪᑭᒃᑯᑦᓯᒃ ᐅᐸᒃᑕᑦᓯᖕᓄᑦ ᐊᐅᓪᓚᕐᓂᐊᕋᑦᓯᒃ.” ᑖᒃᑯᐊᒡᓕ ᑭᐅᕘᒃ, “ᐋᒃᑲᓕ, ᒫᓂ ᐃᒡᓗᒐᓴᒡᔪᐊᑦ ᐊᖅᑯᑎᖏᓐᓂ ᐅᓐᓄᐊᕐᓯᐅᕐᓂᐊᕐᑐᒍᒃ.” 3 ᑖᑦᓱᒪᓕ ᐊᔪᐃᓐᓈᕆᒐᒥᒋᒃ, ᑭᖑᓂᖓᒍᑦ ᐃᒡᓗᒥᓄᐊᖃᑎᒋᓕᕐᐹᒃ; ᓂᕆᔭᒃᓴᑦᑎᐊᕙᖕᓂᒡᓗ ᓂᕿᓕᐅᕈᑎᓪᓗᒋᒃ, ᓂᐊᖂᔭᓂᒡᓗ ᐳᕙᓪᓚᕐᓴᐅᑎᖃᖏᑦᑐᓂᒃ, ᓂᕆᓪᓗᑎᒡᓗ. 4 ᑖᒃᑯᐊᒡᓕ ᓯᓂᒐᓱᓕᓚᐅᕐᑎᓐᓇᒋᒃ ᓱᓕ, ᐃᒡᓗᒐᓴᖕᒥᐅᑦ ᐊᖑᑎᑦ, ᓱᑑᒪᒥᐅᑦ ᐃᓅᓱᒃᑐᑦ ᐃᓄᑐᕾᓪᓗ, ᓘᑎᐅᑉ ᐃᒡᓗᖓ ᐃᓗᕚᑦ ᓯᓚᑖᓂᑦ. 5 ᓘᑎᓗ ᐅᖃᐅᑎᕚᑦ ᐅᖃᕐᓗᑎᒃ, “ᓇᐅᒡᓕ ᐊᖑᑎᑦ ᐅᓐᓄᒃ ᐃᒡᓗᖕᓄᐊᖅᑲᐅᔪᑦ? ᑖᒃᑯᐊ ᐅᕙᑦᑎᓐᓄᑦ ᐊᓂᑎᓚᐅᒃᑭᑦ! ᓄᓕᐊᕈᒪᒐᑦᑎᒍ.” 6 ᓘᑎᓗ ᐃᒡᓗᒥᑦ ᐊᓂᓪᓗᓂ ᐃᓄᖕᓄᑦ, ᐃᒡᓘᑉ ᐹᖓ ᒪᑐᕚ ᓯᓚᑖᓂᑦ. 7 ᐅᖃᕐᓗᓂᓗ, “ᐃᓚᓐᓇᕆᔭᒃᑲ, ᕿᓄᕕᒋᕙᑦᓯ ᑍᒫᒃ ᐱᐅᖏᑦᑐᐊᓗᖕᒥᒃ ᐱᓇᓱᐊᕐᓂᐊᕋᓯ! 8 ᑕᑯᒋᑦ, ᒪᕐᕉᖕᓂᒃ ᐸᓂᖃᕐᑐᖓ ᓱᓕ ᐊᖑᒻᒧᑦ ᐊᒃᑐᕐᑕᐅᓚᐅᕐᓯᒪᖏᑦᑑᖕᓂᒃ; ᑖᒃᑯᐊᒃ ᐃᓕᑦᓯᓐᓄᑦ ᐊᓂᑎᓚᐅᕐᓛᒃᑲᒃ, ᐃᓱᒪᕐᓲᑎᒋᓂᐊᕋᑦᓯᐅᒃ; ᐅᑯᐊᒡᓕ ᐊᖑᑏᒃ ᐱᓕᕆᐊᕆᓇᓱᐊᕐᓂᐊᕋᓯᐅᒃ; ᐃᒡᓗᓐᓂ ᑖᒃᑯᐊ ᑐᔪᕐᒥᐊᕆᒐᒃᑭᒃ.” 9 ᑖᒃᑯᐊᓕ ᐅᖃᕐᐳᑦ, “ᐊᒡᕕᐊᕋᓱᓐᖏᓚᐅᕆᑦ, ᐅᓇ ᑕᒫᓂ ᓄᓇᖃᕐᑐᑐᖃᐅᖏᑦᑐᖅ, ᐅᕙᑦᑎᓐᓂᒃ ᐅᖃᐅᑦᔨᓇᓱᒃᑐᖅ! ᐱᐅᖏᓐᓂᕐᓴᒥᒃ ᐱᓇᓱᐊᕐᕕᒋᓂᐊᕐᐸᑦᑎᒋᑦ ᑖᒃᑯᓄᖓ ᐱᓇᓱᐊᕈᒪᔭᑦᑎᓐᓂᑦ.” ᓘᑎᓗ ᐊᔭᒃᐹᑦ ᐹᖓ ᓱᕋᒍᒪᓪᓗᒍ. 10 ᐊᖑᑏᒡᓕ ᑖᒃᑯᐊᒃ ᐃᒡᓗᒦᑦᑑᒃ ᓘᑎ ᑎᒍᓪᓗᒍ ᐃᑎᕐᑎᑉᐹᒃ, ᐹᖓᓗ ᒪᑐᓪᓗᒍ. 11 ᐊᖑᑎᓪᓗ ᑕᐅᑐᒍᓐᓃᕐᑎᑉᐰᑦ, ᐹᖓᑕ ᓯᓚᑖᓃᑦᑐᑦ, ᐃᓅᓱᒃᑐᑦ ᐃᓄᑐᕾᓪᓗ, ᐃᒡᓘᑉ ᒪᑐᐊᓂᒃ ᓇᓂᓯᓇᓱᒡᓗᑎᒃ ᓴᐱᓕᖁᓪᓗᒋᑦ. ᓘᑎᐅᑉ ᓱᑑᒪᒥᒃ ᕿᒤᓂᖓ 12 ᐊᖑᑏᒡᓗ ᑖᒃᑯᐊᒃ ᓘᑎᒧᑦ ᐅᖃᕐᐴᒃ, “ᑕᕝᕙᓂ ᐊᓯᖕᓂᒃ ᐃᓚᖃᕐᐲᑦ? ᓂᖓᐅᖃᕈᕕᑦ, ᐃᕐᓂᖃᕈᕕᑦ, ᐸᓂᖃᕈᕕᓪᓘᓐᓃᑦ, ᐊᓯᖏᓐᓂᒡᓘᓐᓃᑦ ᐃᓚᖃᕈᕕᑦ ᐃᒡᓗᒐᓴᖕᓂ, ᑖᒃᑯᐊ ᑕᕝᕙᓐᖓᑦ ᐊᐅᓪᓚᕐᑎᓕᒃᑭᑦ; 13 ᑖᒃᑯᐊ ᓄᓇᓖᑦ ᐊᓯᕈᕐᓂᐊᓕᕋᑦᑎᒍ, ᓂᐱᖃᕈᑕᐅᒻᒪᕆᓕᕐᒪᑕ ᐊᔪᕐᑐᓕᓂᕋᕐᑕᐅᓪᓗᑎᒃ ᐱᐅᖏᑦᑐᕐᔪᐊᓂᒃ ᐊᑕᓂᐅᑉ ᓵᖓᓂ, ᐊᑕᓂᐅᓪᓗ ᑎᓕᕚᑎᒍᒃ ᐊᓯᕈᐃᖁᓪᓗᑕ ᑖᒃᑯᓂᖓ.” 14 ᑕᕝᕙ ᓘᑎ ᐊᓂᕗᖅ ᓂᖓᐅᒃᓴᓂ ᐅᖃᐅᑎᔭᕐᑐᕐᓗᒋᑦ, ᐸᓂᖏᑕ ᐅᐃᒃᓴᖏᑦ, ᐅᖃᐅᑎᓪᓗᒋᒡᓗ, “ᑐᐊᕕᕐᓗᓯᒃ ᑕᕝᕙᓐᖓᑦ ᐊᐅᓪᓚᓕᕆᑦᓯᒃ; ᐊᑕᓂᐅᑉ ᑖᒃᑯᐊ ᐃᒡᓗᒐᓮᑦ ᐊᓯᕈᕐᓂᐊᓕᕐᒪᒋᑦ.” ᓂᖓᐅᒃᓴᖏᓐᓄᓪᓕ ᓘᑎ ᐅᖃᖑᐊᑐᐃᓐᓇᕐᑑᔮᕐᐳᖅ. 15 ᐅᓪᓛᖅ ᖃᐅᓕᕐᑎᓪᓗᒍ, ᐂᖏᓖᒃ ᓘᑎᒥᒃ ᑐᐊᕕᕐᓱᐃᓕᕐᐴᒃ, ᐅᖃᕐᓗᑎᒃ, “ᐸᕐᓇᓕᕆᑦ! ᓄᓕᐊᑦ ᓇᒡᓴᕐᓗᒍ ᐸᓃᒃᑭᒡᓗ ᑕᕝᕙᓃᑦᑑᒃ, ᐊᐅᓪᓚᓕᕆᑦᓯ, ᐱᖃᓯᐅᑦᔭᐅᖁᓇᓯ ᐃᒡᓗᒐᓮᑦ ᐊᓯᕈᕐᑕᐅᓕᕐᐸᑕ.” 16 ᓘᑎᓕ ᓄᖅᑲᖓᓕᕐᒪᑦ; ᐊᖑᑏᑦ ᐊᒡᒐᖏᑎᒍᑦ ᑎᒍᓪᓗᒋᑦ ᓄᓕᐊᖓᓗ ᐸᓂᖏᒡᓗ ᑕᓯᐅᕐᑕᐅᓕᕐᐳᑦ, ᐊᑕᓂᕐᒧᑦ ᓂᑲᒋᔭᐅᖕᒪᑕ, ᑖᒃᑯᐊᓗ ᐊᐅᓪᓚᕈᑎᕚᑦ ᐃᒡᓗᒐᓮᑦ ᓯᓚᑖᓄᑦ. 17 ᐊᐅᓪᓚᕈᑎᒐᒥᒋᓪᓗ, ᐂᖏᓖᒃ ᐅᖃᕐᐳᒃ, “ᕿᒫᒋᑦᓯ ᐃᓅᓂᐊᕋᑦᓯ; ᐅᑎᒧᑦ ᕿᕕᐊᕐᓂᐊᕋᓯ ᓇᕐᓴᒥᓗ ᑕᒫᓂ ᓄᖅᑲᕐᓂᐊᕋᓯ, ᖃᖅᑲᓄᓪᓕ ᕿᒫᒋᑦᓯ, ᑐᖁᖃᑕᐅᖁᓇᓯ.” 18 ᓘᑎᐅᓪᓕ ᐅᖃᐅᑎᕚᒃ, “ᑍᒤᓕᐅᕐᑎᑦᓯᖏᓪᓗᓯᒃ, ᐊᑕᓃᒃᑳᒃ; 19 ᑕᑯᒋᑦ ᐱᔩᑦ ᖁᕕᐊᒋᔭᐅᖕᒪᑦ ᓵᖕᓂ, ᐊᖏᔪᒥᒃ ᐱᑦᓯᐊᕐᕕᒋᒐᕕᖓ ᐃᓅᓕᐊᕆᓪᓗᖓ; ᖃᖅᑲᓄᓪᓕ ᕿᒫᓇᓱᐊᕈᒪᓐᖏᓚᖓ, ᐊᓯᕈᕐᑕᐅᓇᕐᑐᒧᑦ ᑎᑭᖁᓇᖓ, ᑐᖁᓗᖓᓗ. 20 ᑕᑯᒋᑦ, ᐃᒃᑯᐊ ᓄᓇᓖᑦ ᒥᑭᔪᑦ ᐊᕙᓃᑦᑐᑦ ᖃᓂᒻᒪᑕ ᕿᒫᕕᒋᔪᓐᓇᕐᑕᒃᑲ, ᒥᑭᔫᓪᓗᑎᒡᓗ, ᑍᑲᓂ ᐊᓐᓇᒃᑲᔭᕐᐳᖓ!” 21 ᑖᑦᓱᒪ ᑭᐅᕚ, “ᑕᑯᒋᑦ ᑍᒫᒃ ᐱᔪᓐᓇᕐᑎᒃᑭᕙᒋᑦ, ᑖᒃᑯᐊ ᐃᒡᓗᒐᓮᑦ ᐅᖃᐅᓯᕆᔭᑎᑦ ᐊᓯᕈᕐᓂᐊᓐᖏᓚᒃᑲ. 22 ᐊᑏ, ᑐᐊᕕᕐᓗᓯ, ᑍᑯᖓ ᕿᒫᓕᕆᑦᓯ; ᖃᓄᐃᓕᐅᕈᓐᓇᖏᓐᓇᒪ ᑍᑯᖓ ᑎᑭᓚᐅᖏᓐᓂᑦᓯᓐᓂ.” ᑍᒤᒻᒪᑦ ᐃᒡᓗᒐᓮᑦ ᑍᔭᐅᓕᓚᐅᕐᐳᖅ ᔪᐊᕆᒥᒃ. ᓱᑑᒪᐅᑉ ᒍᒨᕋᐅᓪᓗ ᐊᓯᕈᕐᑕᐅᓂᖏᒃ 23 ᓯᕿᓂᕐᓗ ᖁᑦᑎᒃᓯᓚᐅᕐᐳᖅ ᓘᑎᒃᑯᑦ ᓄᓇᓕᖕᓄᑦ ᔪᐊᕆᒧᑦ ᑎᑭᑎᓪᓗᒋᑦ, 24 ᑕᕝᕙᓕ ᐊᑕᓂᖅ ᑲᑕᒐᕐᑎᑦᓯᓕᕐᐳᖅ ᐃᒃᑭᕆᒃᑐᓂᒃ ᐃᑯᒪᒥᒡᓗ ᐃᒡᓗᒐᓴᖕᓄᑦ ᓱᑑᒪᒧᑦ ᒍᒨᕋᒧᓪᓗ ᐊᑕᓂᕐᒥᑦ ᕿᓚᖕᒥᑦ ᐱᔪᓂᒃ. 25 ᑖᒃᑯᐊᓗ ᐃᒡᓗᒐᓮᑦ ᐊᓯᕈᕐᐰᑦ, ᓇᕐᓴᓕᒫᕐᓗ, ᐃᓄᖏᓪᓗ ᑕᒪᕐᒥᒃ ᐃᒡᓗᒐᓴᖕᓃᑦᑐᑦ, ᐱᕈᕐᑐᓕᒫᓪᓗ ᓄᓇᒥ. 26 ᓘᑎᐅᓪᓕ ᓄᓕᐊᖓ ᐅᑎᒧᑦ ᑕᑯᓴᕋᒥ, ᑕᕆᐅᓐᖑᕐᓗᓂ ᓇᐸᔫᓕᕐᐳᖅ. 27 ᐅᓪᓛᒻᒪᕆᒃᑯᓪᓕ ᖃᐅᑎᓪᓗᒍ ᐂᑉᕋᕼᐋᒻ ᐅᐸᒃᓯᒪᓚᐅᕐᑕᒥᓄᐊᕐᐳᖅ ᐊᑕᓂᐅᑉ ᓇᔪᓚᐅᕐᑕᖓᓄᑦ. 28 ᐳᕐᑐᔪᒥᑦ ᐊᒻᒧᑦ ᑕᑯᓐᓇᕋᒥᒋᑦ ᓱᑑᒪ ᒍᒨᕋᓗ ᓄᓇᓕᒫᕐᓗ ᓇᕐᓴᖅ, ᑕᑯᕚ ᐳᔪᖅ ᖁᒻᒧᐊᒃᑐᖅ ᓲᕐᓗ ᐃᑯᐊᓚᑦᓯᕕᐊᓗᖕᒥᑦ ᐳᔫᕐᑐᖅ. 29 ᐃᒤᓚᐅᕐᐳᖅ, ᒎᑎᐅᑉ ᐃᒡᓗᒐᓮᑦ ᐊᓯᕈᕋᒥᒋᑦ ᓇᕐᓴᒦᑦᑐᑦ, ᒎᑎᐅᑉ ᐂᑉᕋᕼᐋᒻ ᐃᖅᑲᐅᒪᓚᐅᕐᐹ, ᓘᑎ ᐊᐅᓪᓚᕐᑎᓪᓗᒍ ᓄᖑᑕᐅᔪᑦ ᐊᑯᕐᖓᓐᓂᑦ, ᓄᖑᓐᓂᐊᓕᕋᒥᒋᑦ ᐃᓗᒐᓮᑦ ᓘᑎᐅᑉ ᓄᓇᖃᕐᕕᒋᔭᖏᑦ. ᒧᐊᐱᒥᐅᑦ ᐊᒧᓁᑎᓪᓗ ᐱᒋᐊᕐᓂᖏᑦ 30 ᓘᑎᓕ ᔪᐊᕆᒥᑦ ᐊᐅᓪᓚᕋᒥ, ᓄᓇᖃᓚᐅᕐᐳᖅ ᖃᖅᑲᓂ ᐸᓃᖕᓂ ᒪᕐᕉᒃ ᐃᓚᒋᓪᓗᒋᒃ, ᑲᑉᐱᐊᓱᓚᐅᕋᒥ ᔪᐊᕆᒥ ᓄᓇᖃᕆᐊᒃᓴᖅ; ᕾᕈᓱᖕᒥᐅᑕᓕᕐᓗᑎᒃ ᐸᓃᖕᓂ ᒪᕐᕉᒃ ᐃᓚᒋᓪᓗᒋᒃ. 31 ᐸᓂᖓᓕ ᐊᖓᔪᒃᓕᖅ ᓄᑲᕐᒥᓄᑦ ᐅᖃᕐᐳᖅ, “ᐊᑖᑕᕗᒃ ᐃᓄᑐᖃᐅᓕᕐᒪᑦ, ᐊᖑᑎᑕᖃᕋᓂᓗ ᓄᓇᒥ ᐅᕙᑦᑎᓐᓂᒃ ᓄᓕᐊᕈᓐᓇᕐᑐᒥᒃ ᓄᓇᕐᔪᐊᕐᒥᐅᑦ ᐱᐅᓯᖏᑦ ᒪᓕᒡᓗᒋᑦ. 32 ᕾᒋᑦ, ᐊᑖᑕᕗᒃ ᐃᒥᕐᑎᓚᐅᕐᓚᕗᒃ ᕔᓂᒥᒃ, ᐃᓐᓇᖓᖃᑎᒋᓂᐊᕋᑦᑎᒃᑯᒃ, ᕿᑐᕐᖓᕐᑖᕐᓂᐊᕋᓐᓄᒃ ᐊᑖᑕᑦᑎᓐᓄᑦ ᑭᖑᕚᓕᐅᕐᑐᒃᓴᒥᒃ.” 33 ᑕᕝᕙ ᑍᑦᓱᒪᓂ ᐅᓐᓄᒥ ᕔᓂᒥᒃ ᐃᒥᕐᑎᑉᐹᒃ; ᐸᓂᖓᑕᓗ ᐊᖓᔪᒃᓕᐅᑉ ᓄᓕᐊᕐᓂᒃᑯᑦ ᐊᑖᑕᓂ ᐱᖃᑎᒋᕚ; ᐊᑖᑕᖓᓕ ᖃᐅᔨᓚᐅᓐᖏᓚᖅ ᖃᖓ ᐃᓐᓇᕐᓂᕐᒪᖔᑦ ᖃᖓᓗ ᒪᑭᓐᓂᕐᒪᖔᑦ. 34 ᖃᐅᑎᓪᓗᒍᓕ, ᐊᖓᔪᒃᓕᐅᑉ ᓄᑲᓂ ᐅᖃᐅᑎᕚ, “ᑕᑯᒋᑦ, ᐅᓐᓄᒃ ᐃᓐᓇᖓᖃᑎᒋᓚᐅᕐᐸᕋ; ᐅᓐᓄᒃ ᓱᓕ ᕔᓂᒥᒃ ᐃᒥᕐᑎᒃᑲᓐᓂᓚᐅᕐᓂᐊᕐᐸᕗᒃ, ᐅᐸᒡᓗᒍ ᐱᖃᑎᒋᓂᐊᕋᕕᐅᒃ; ᑭᖑᕚᒃᓴᖃᕐᓂᐊᕋᑦᑕ ᐊᑖᑕᑦᑎᒍᑦ.” 35 ᑍᒤᒻᒪᑦ ᐊᑖᑕᑎᒃ ᕔᓂᒥᒃ ᐃᒥᕐᑎᒃᑭᕚᒃ, ᓄᑲᕐᓕᐅᑉ ᐅᐸᒃᓗᒍ, ᐃᓐᓇᖓᖃᑎᒋᕚ; ᐊᑖᑕᖓᓗ ᖃᐅᔨᓚᐅᓐᖏᓚᖅ ᖃᖓ ᐃᓐᓇᕐᓂᕐᒪᖔᑦ ᖃᖓᓗ ᒪᑭᓐᓂᕐᒪᖔᑦ. 36 ᑕᕝᕙ ᓘᑎᐅᑉ ᐸᓂᖏᒃ ᑕᒪᕐᒥᒃ ᐊᑐᓂᑦ ᓄᑕᕋᒃᓴᖃᓕᓚᐅᕐᐴᒃ ᐊᑖᑕᒥᖕᓂᑦ. 37 ᐸᓂᖓᓗ ᐊᖓᔪᒃᓕᖅ ᐃᕐᓂᕐᑖᕐᐳᖅ, ᑖᓐᓇᓗ ᐊᑦᓯᕐᐹ ᒧᐊᐱᒥᒃ. ᑖᓐᓇᓗ ᓯᕗᓕᕆᔭᐅᕗᖅ ᐅᓪᓗᒥᒧᑦ ᑎᑭᓪᓗᒍ ᒧᐊᐱᒥᐅᓂᑦ. 38 ᐸᓂᖓᑦᑕᐅᖅ ᓄᑲᕐᓕ ᐃᕐᓂᕐᑖᓚᐅᕆᕗᖅ, ᑖᓐᓇᓗ ᐊᑦᓯᕐᐹ ᐱᓐ-ᐋᒥᒥᒃ. ᑖᓐᓇᓗ ᓯᕗᓕᕆᔭᐅᕗᖅ ᐅᓪᓗᒥᒧᑦ ᑎᑭᓪᓗᒍ ᐊᒧᓁᑎᓂᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society