ᒨᓯᓯ ᓯᕗᓪᓖᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᑉᕋᕼᐋᒻ ᐃᕐᓂᕐᑖᓛᕐᓂᖓᓂᒃ ᐊᖏᕐᕕᐅᓂᖓ

¹ ᐊᑕᓂᕐᓗ ᓴᖅᑭᑉᐳᖅ ᐂᑉᕋᕼᐋᒻᒧᑦ ᓇᐹᕐᑐᖃᕐᑐᒥ ᐆᒃᓂᒃ ᑍᔭᐅᔪᓂ ᒪᒻᕆᒥᒃ, ᐃᒃᓯᕙᑎᓪᓗᒍ ᑐᐱᖓᑕ ᐹᖓᓂ ᐅᓪᓘᑉ ᐅᖅᑰᓂᕐᐹᖓ ᓇᓪᓕᐅᑎᓯᒪᑎᓪᓗᒍ.

² ᑕᑯᓴᕋᒥᓗ ᑕᑯᕗᖅ, ᐊᖑᑎᓂᒃ ᐱᖓᓱᓂᒃ ᓇᖏᕐᑐᓂᒃ ᖃᓂᒋᔭᒥᓂ; ᑖᒃᑯᐊᓗ ᑕᑯᑐᐊᕋᒥᒋᑦ, ᐅᓪᓚᒃᓯᕗᖅ ᑐᐱᕐᒥᓂᑦ ᐸᕐᕆᐊᕐᓗᒋᑦ, ᐅᑯᓪᓗᓂᓗ ᑮᓇᓂ ᓄᓇᒧᑦ ᐊᒃᑐᕐᑎᓪᓗᒍ,

³ ᐅᖃᕐᐳᕐᓗ, “ᐊᑕᓂᕋ ᐃᓕᖕᓄᑦ ᖁᕕᐊᒋᔭᐅᒍᒪ ᓵᖕᓂ, ᐱᔩᑦ ᖄᖏᑐᐃᓐᓇᕐᑍᓕᒍᒃ.

⁴ ᐃᒥᕐᒥᒃ ᒥᑭᔪᒥᒃ ᕾᑦᓯᓂᐊᕋᒪ, ᐃᑎᒐᑦᓯ ᐅᐊᓴᐅᑎᒃᓴᖓᓂᒃ, ᓇᐹᕐᑑᓪᓗ ᐊᑖᓂ ᑕᕾᕐᓯᕐᓗᓯ.

⁵ ᐂᒃᓯᕐᓂᐊᕐᐳᖓ ᓂᐊᖂᔭᓂᒃ ᒥᑭᔪᓂᒃ, ᐃᓱᐊᕐᓯᑦᓯᐊᕐᓂᐊᕋᑦᓯ, ᑭᖑᓂᖓᒍᑦ ᖄᖏᕈᓐᓇᕐᓂᐊᕐᐳᓯ, ᐱᔨᑦᓯᓐᓄᑦ ᑎᑭᓐᓇᑦᓯ.” ᑖᒃᑯᐊ ᐅᖃᕐᐳᑦ, “ᑍᒤᓕᐅᓕᕆᑦ ᐅᖃᐅᓯᑎᑦ ᒪᓕᒡᓗᒋᑦ.”

⁶ ᐂᑉᕋᕼᐋᒻᓗ ᑐᐊᕕᕐᓗᓂ ᑐᐱᕐᒥᓄᐊᕋᒥ ᓵᕋᒧᑦ ᐅᖃᕐᐳᖅ, “ᑐᐊᕕᕐᓗᑎᑦ, ᓂᐊᖂᔭᒃᓴᑦᓯᐊᒥᒃ ᐃᖑᑦᑎᓵᕆᑦ ᐆᒃᑑᑎᓂᒃ ᐱᖓᓱᓂᒃ; ᐆᑦᓯᓗᑎᓪᓗ.”

⁷ ᐂᑉᕋᕼᐋᒻᓗ ᐅᓪᓚᒡᓗᓂ ᐆᒪᔪᖁᑎᒥᓄᐊᕐᐳᖅ ᓂᕈᐊᕐᓗᓂᓗ ᓄᕐᕋᕐᒥᒃ, ᐊᕿᑦᑐᒥᒃ ᐱᐅᔪᒥᒃ ᐱᔨᒥᓄᓪᓗ ᑐᓂᕚ, ᑖᑦᓱᒪᓗ ᑐᐊᕕᕐᓗᓂ ᓂᕿᓕᐊᕆᕚ.

⁸ ᓰᓯᓕᐊᕆᓯᒪᔪᒥᒡᓗ ᐱᕗᖅ, ᐃᒻᒧᖕᒥᒡᓗᑦᑕᐅᖅ, ᐃᒻᒧᒃᓯᐅᒐᐅᓪᓗ ᓄᕐᕋᖓ ᐃᒐᔭᐅᕋᑖᕐᑐᖅ, ᑖᒃᑯᐊᓗ ᒪᓂᕔᑦ ᑖᒃᑯᓄᖓ; ᓇᐹᕐᑑᓪᓗ ᐊᑖᓂ ᓇᖕᒥᓂᖅ ᐱᔨᑦᓯᕋᕐᐰᑦ, ᑖᒃᑯᐊᓗ ᓂᕆᑎᓪᓗᒋᑦ.

⁹ ᑖᒃᑯᐊᓗ ᐅᖃᐅᑎᕚᑦ, “ᓇᐅᒡᓕ ᓄᓕᐊᑦ ᓵᕋ?” ᑖᑦᓱᒪ ᑭᐅᕔᑦ, “ᑐᐱᕐᒦᑉᐳᖅ.”

¹⁰ ᑖᒃᑯᐊᓗ ᐃᓚᖓᑦᑕ ᐅᖃᐅᑎᕚ, “ᐱᕕᒃᓴᖅ ᓇᓪᓕᐅᑎᒃᐸᑦ ᐅᑎᓛᕆᕗᖓ, ᓄᓕᐊᓪᓗ ᓵᕋ ᐃᕐᓂᕐᑖᓛᕐᐳᖅ.” ᓵᕋᓗ ᐂᑉᕋᕼᐋᒻ ᑐᓄᐊᓂ ᑐᐱᐅᑉ ᐹᖓᑕ ᐃᓗᐊᓃᑉᐳᖅ ᑐᓵᓪᓗᓂ.

¹¹ ᐂᑉᕋᕼᐋᒻᓗ ᓵᕋᓗ ᐃᓄᑐᖃᒻᒪᕆᐅᓕᓚᐅᕐᒪᑎᒃ; ᓵᕋᐅᓪᓗ ᐊᒡᓛᑦ ᑕᕿᑕᒫᑦ ᐊᐅᓈᖃᑦᑕᕐᓂᖓ ᓄᖅᑲᖓᓕᓚᐅᕐᐳᖅ.

¹² ᑍᒤᒻᒪᑦ ᓵᕋ ᐃᓗᒥᒍᑦ ᐃᔪᕈᓱᓕᕐᐳᖅ, ᐅᖃᕐᓗᓂᓗ, “ᒫᓐᓇ ᓂᖏᐅᖑᓕᕋᒪ ᐅᐃᒐᓗ ᐃᑦᑑᓕᕐᓗᓂ, ᓱᓕ ᓄᓕᐊᕐᓂᕐᒥᒃ ᐊᓕᐊᓁᒍᓱᒍᓐᓇᕐᐳᖔ?”

¹³ ᑕᕝᕙ ᐊᑕᓂᐅᑉ ᐂᑉᕋᕼᐋᒻ ᐅᖃᐅᑎᕚ, “ᖃᓄᐃᒻᒪᑦ ᓄᓕᐊᑦ ᓵᕋ ᑕᒪᑐᒥᖓ ᐃᔪᕈᓱᒃᐸ ᐅᖃᕐᓗᓂᓗ, ‘ᕿᑐᕐᖓᕐᑖᕈᓐᓇᕋᓗᐊᕐᐳᖔ ᐃᓄᑐᖄᓘᓕᕐᓗᖓ?’

¹⁴ ᐊᑕᓂᕐᒧᑦ ᐊᔪᕐᓇᓗᐊᕐᑐᖃᕐᐹ? ᐅᖃᖅᑲᐅᒐᒪ, ᐱᕕᒃᓴᖅ ᓈᒻᒪᒃᓯᒃᐸᑦ ᐅᑎᓛᕆᕗᖓ, ᓵᕋᓗ ᐃᕐᓂᖃᓕᓛᕐᐳᖅ.”

¹⁵ ᓵᕋᓗ ᒥᓯᐊᕐᐳᖅ. ᐅᖃᕐᓗᓂᓗ, “ᐃᔪᕈᓱᓚᐅᖏᑦᑐᖓ.” ᑲᑉᐱᐊᓱᓚᐅᕋᒥ. ᑖᑦᓱᒪ ᑭᐅᕚ, “ᓱᓕᖏᓐᓇᕕᑦ, ᐃᔪᕈᓱᑬᓐᓇᕐᑐᑎᑦ.”

ᐂᑉᕋᕼᐋᑉ ᓱᑑᒪᒥᒃ ᓴᐳᑦᔨᓇᓱᐊᕐᓂᖓ

¹⁶ ᐊᖑᑎᓪᓗ ᑖᒃᑯᐊ ᑕᕝᕙᓐᖓᑦ ᐱᓱᓯᕗᑦ, ᓱᑑᒪᐅᓪᓗ ᓇᓛᓄᑦ ᑕᑯᓐᓈᕐᓗᑎᒃ; ᐂᑉᕋᕼᐋᒻᓗ ᐃᓚᒋᕔᑦ ᖃᓂᐅᕐᓗᒋᑦ ᐊᐅᓪᓚᕐᕕᒋᔭᖏᓐᓄᑦ.

¹⁷ ᐊᑕᓂᕐᓗ ᐅᖃᕐᐳᖅ, “ᐱᓇᓱᐊᕈᒪᔭᓐᓂᒃ ᐂᑉᕋᕼᐋᒧᑦ ᐊᓐᖏᒍᑦᔨᓂᐊᓐᖏᓚᖓ.

¹⁸ ᖃᐅᔨᒪᒐᒪ ᐂᑉᕋᕼᐋᒻ ᑭᖑᕚᒃᓴᖏᑦ ᐃᓄᒐᓴᒡᔪᐊᓐᖑᕈᒫᕐᒪᑕ ᐱᔪᓐᓇᕐᑐᕐᔪᐊᖑᓗᑎᒡᓗ, ᑖᑦᓱᒨᓇᓗ ᐃᓅᖃᑎᒌᒡᔪᐊᑦ ᓮᒻᒪᕐᑎᑦᓱᒫᕐᐸᒃᑲ.

¹⁹ ᐊᓐᖏᒍᑎᓂᐊᓐᖏᓚᕋ, ᓂᕈᐊᕐᓯᒪᒐᒃᑯ, ᐱᖁᔨᔪᒫᕐᒪᑦ ᕿᑐᕐᖓᒥᓂᒃ ᐃᓚᒥᓂᒡᓗ ᐊᑕᓂᐅᑉ ᐊᖅᑯᑎᖓᓃᖁᓪᓗᒋᑦ ᐃᓱᐊᕐᑐᓕᓂᒃᑯᑦ ᐊᑦᔨᒌᒃᑎᑦᓯᓂᒃᑯᓪᓗ; ᐊᑕᓂᖅ ᑐᓂᓯᖁᓪᓗᒍ ᐂᑉᕋᕼᐋᒧᑦ ᐊᖏᕈᑎᒋᓯᒪᔭᒥᓂᒃ ᑖᑦᓱᒧᖓ.”

²⁰ ᑕᕝᕙ ᐊᑕᓂᖅ ᐅᖃᕐᐳᖅ, “ᓂᐱᖃᕈᑕᐅᒻᒪᕆᓕᕐᒪᑎᒃ ᓱᑑᒪ ᒍᒨᕋᓗ, ᐊᔪᕐᑐᓕᓂᕋᕐᑕᐅᓪᓗᑎᒃ ᐱᐅᖏᑦᑐᕐᔪᐊᓂᒃ.

²¹ ᑖᒃᑯᖕᓄᖓ ᐊᖅᑲᕆᐊᖃᕐᐳᖓ ᓂᐱᖃᕈᑕᐅᓂᖏᒃ ᑐᓴᕐᓯᒪᔭᒃᑲᒃ ᓱᓕᖕᒪᖔᑕ; ᑍᒤᖏᑉᐸᑕᓘᓐᓃᑦ ᖃᐅᔨᓂᐊᕋᒪ.”

²² ᑕᕝᕙ ᐊᖑᑎᑦ ᑕᕝᕙᓐᖓᑦ ᕿᒪᕉᑎᕘᑦ, ᐱᓱᓯᓪᓗᑎᒡᓗ ᓱᑑᒪᐅᑉ ᓇᓛᓄᑦ, ᐂᑉᕋᕼᐋᒻᓕ ᓱᓕ ᓇᖏᓚᐅᕐᐳᖅ ᐊᑕᓂᐅᑉ ᓵᖓᓂ.

²³ ᐂᑉᕋᕼᐋᒻᓗ ᐊᑕᓂᖅ ᐅᐸᒃᑲᓐᓂᕐᓗᒍ ᐅᖃᐅᑎᕚ, “ᐸᓯᔭᒃᓴᐅᖏᑦᑐᓂᒃ ᐱᖃᓯᐅᑦᔨᓗᑎᑦ ᐱᐅᖏᑦᑐᓕᔪᓂᒃ ᓱᒋᐊᕐᓯᓂᐊᕐᐲᑦ?

²⁴ ᑕᕝᕙᓂ ᐃᒡᓗᒐᓴᖕᓂ 50ᓂᒃ ᐸᓯᔭᒃᓴᐅᖏᑦᑐᓂᒃ ᐃᓄᖃᕋᓗᐊᕐᐸᑦ, ᑖᒃᑯᐊ ᐃᒡᓗᒐᓮᑦ ᐊᑕᖏᕐᓗᒋᑦ ᓄᖑᑎᒃᑲᔭᕐᐱᒌᑦ? ᑖᒃᑯᐊᓘᓐᓃᑦ 50 ᓴᐳᑎᒐᔭᓐᖏᓚᑏᑦ?

²⁵ ᑍᒤᓕᐅᕈᒪᓂᕐᒥᒃ ᐃᓱᒪᓂᐊᕐᓇᒃ, ᐸᓯᔭᒃᓴᐅᖏᑦᑐᓂᒃ ᑐᖁᑦᓯᖃᓯᐅᑦᔨᓗᑎᑦ ᐊᔪᕐᑐᓕᔪᓄᑦ, ᐃᓱᐊᕐᑐᑦ ᐊᑦᔨᐅᓕᕐᓗᑎᒃ ᐃᓱᐃᑦᑐᓕᔪᓄᑦ! ᑕᒪᓐᓇ ᐃᓱᒪᒋᑦᑍᓕᒍᒃ! ᓄᓇᕐᔪᐊᕐᒥᐅᓄᑦ ᑕᒤᓐᓄᑦ ᐃᖅᑲᕐᑐᐃᔨ ᑍᒤᒍᓂ ᐃᓱᐊᕐᑐᒥᒃ ᐱᓂᐊᓐᖏᓚᖅ.”

²⁶ ᐊᑕᓂᖅ ᐅᖃᕐᐳᖅ, “ᓱᑑᒪᒥ ᐃᓄᖕᓂᒃ ᐸᓯᔭᒃᓴᐅᖏᑦᑐᓂᒃ 50ᓂᒃ ᓇᓂᓯᒐᔭᕈᒪ, ᑕᕝᕙ ᐃᒡᓗᒐᓮᑦ ᓱᒋᐊᕋᔭᓐᖏᓚᒃᑲ ᑖᒃᑯᐊ ᐱᓪᓗᒋᑦ.”

²⁷ ᐂᑉᕋᕼᐋᒻ ᐅᖃᒃᑲᓐᓂᕆᕗᖅ: “ᐸᓯᔭᒃᓴᐅᓚᖓ ᐅᕙᓐᓂᒃ ᐅᖃᕈᒪᒐᒪ ᐊᑕᓂᕐᒧᑦ, ᓴᓂᑐᐃᓐᓇᐅᔪᖓ ᐊᕐᔭᓕᓂᐅᓪᓗᖓᓗ.

²⁸ ᐃᒻᒪᖄᓕ ᐃᓄᖃᕋᔭᕐᐸᑦ ᐸᓯᔭᒃᓴᐅᒋᑦᑐᓂᒃ ᑕᓪᓕᒪᓂᒃ ᐅᓄᖏᓐᓂᕐᓴᐅᓗᑎᒃ 50ᓂᑦ. ᑖᒃᑯᐊ ᐃᒡᓗᒐᓮᑦ ᐊᑕᖏᕐᓗᒋᑦ ᓄᖑᒃᑲᔭᕐᐱᒌᑦ? ᑕᓪᓕᒪᓂᒃ ᖃᑦᓰᓐᓇᐅᓗᐊᕐᓂᖏᓐᓄᑦ?” ᐊᑕᓂᐅᑉ ᑭᐅᕚ, “ᐃᒡᓗᒐᓮᑦ ᓄᖑᓐᓂᐊᓐᖏᓚᒃᑲ ᓇᓂᓯᒐᔭᕈᒪ 45ᓂᒃ ᐃᓄᖕᓂᒃ ᐸᓯᔭᒃᓴᐅᖏᑦᑐᓂᒃ.”

²⁹ ᐂᑉᕋᕼᐋᒻ ᐅᖃᒃᑲᓐᓂᕆᕗᖅ: “ᐃᒻᒪᖄᓕ 40ᑐᐃᓐᓇᐅᒃᐸᑕ?” ᑖᑦᓱᒪ ᑭᐅᕚ, “40ᐅᒃᐸᑕ ᓄᖑᓐᓂᐊᓐᖏᓚᒃᑲ.”

³⁰ ᐂᑉᕋᕼᐋᒻ ᐅᖃᕐᐳᖅ, “ᐊᑕᓃᖅ, ᓂᓐᖓᐅᑎᑦᑍᓕᓐᖓ, ᓱᓕ ᐅᖃᒃᑲᓐᓂᕈᒪᒐᒪ. ᖃᓄᐃᒃᑲᔭᕐᐱᒋᓪᓕ 30ᑐᐃᓐᓇᐅᒃᐸᑕ?” ᑖᑦᓱᒪ ᐅᖃᐅᑎᕚ, “30ᐅᒃᐸᑕ ᓄᖑᓐᓂᐊᓐᖏᓚᒃᑲ.”

³¹ ᐂᑉᕋᕼᐋᒻ ᐅᖃᕐᐳᖅ, “ᐸᓯᔭᒃᓴᐅᓚᖓ ᐅᖃᕈᒪᖓᒪ ᐊᑕᓂᕐᒧᑦ, ᑕᕝᕙᓕᑭᐊᖅ 20ᑐᐃᓐᓇᐅᒐᔭᕐᐸᑕ?” ᑖᑦᓱᒪ ᐅᖃᐅᑎᕚ, “ᓇᓂᓯᒐᔭᕈᒪ 20ᓂᒃ ᐃᓄᖕᓂᒃ ᐸᓯᔭᒃᓴᐅᖏᑦᑐᓂᒃ ᑖᒃᑯᐊ ᐱᓪᓗᒋᑦ ᐃᒡᓗᒐᓮᑦ ᓄᖑᓐᓂᐊᓐᖏᓚᒃᑲ.”

³² ᐂᑉᕋᕼᐋᒻ ᐅᖃᕐᐳᖅ, “ᐊᑕᓃᖅ, ᓂᓐᖓᒃᑍᓕᒋᑦ, ᓱᓕ ᐊᑕᐅᓯᐊᕐᓗᖓ ᐅᖃᒃᑲᓐᓂᕈᒪᒐᒪ. ᖁᓕᑐᐃᓐᓇᐅᒃᐸᑕᓕ?” ᑖᑦᓱᒪ ᐅᖃᐅᑎᕚ, “ᓇᓂᓯᒐᔭᕈᒪ ᖁᓕᓂᒃ ᑖᒃᑯᐊ ᐱᓪᓗᒋᑦ ᓄᖑᓐᓂᐊᓐᖏᓚᒃᑲ.”

³³ ᐂᑉᕋᕼᐋᒻᒧᑦ ᐅᖃᓪᓚᒌᕋᒥ, ᐊᑕᓂᖅ ᑕᕝᕙᓐᖓᑦ ᕿᒪᕉᑎᓯᕗᖅ, ᐂᑉᕋᕼᐋᒻᓗ ᐊᖏᕐᕋᒥᓄᑦ ᐅᑎᕐᓗᓂ.