ᒨᓯᓯ ᓯᕗᓪᓖᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᑭᐱᔭᐅᓂᐅᑉ ᓇᓗᓁᒃᑯᑕᐅᓕᕐᓂᖓ ᐊᖏᖃᑎᒌᖕᓂᕐᒧᑦ

¹ ᐂᑉᕋᒻᓕ 99ᓂᒃ ᐊᕐᕌᒍᖃᓕᕐᓗᓂ, ᐊᑕᓂᐅᑉ ᓴᖅᑭᕝᕕᒋᕚ ᐅᖃᐅᑎᓪᓗᒍᓗ, “ᐅᕙᖓ ᒎᑎᐅᕗᖓ ᐊᔪᒐᖃᖏᑦᑐᖅ; ᓵᓐᓂ ᐃᓅᒋᑦ ᐸᓯᔭᒃᓴᐅᖏᓪᓗᑎᓪᓗ.

² ᐃᓕᖕᓄᑦ ᐅᕙᓐᓄᓪᓗ ᐊᖏᖃᑎᒌᒍᑎᓕᐅᕈᒪᕗᖓ, ᐅᓄᕐᑐᕐᔪᐊᓂᒃ ᑭᖑᕚᒃᓴᖃᕐᑎᑦᓱᒪᒐᒃᑭᑦ.”

³ ᐂᑉᕋᒻᓗ ᐹᒻᒪᒃᐳᖅ ᑮᓇᓂ ᓄᓇᒧᑦ ᐳᓪᓗᓂᐅᒃ; ᒎᑎᐅᓪᓗ ᐅᖃᐅᑎᕚ,

⁴ “ᑕᑯᒋᑦ, ᐊᖏᖃᑎᒌᒍᑎᓕᐅᕐᐳᖓ ᐃᓕᖕᓄᑦ, ᓯᕗᓕᕆᔭᐅᔪᒫᕋᕕᑦ ᐃᓅᖃᑎᒌᒡᔪᐊᓄᑦ ᐅᓄᕐᑐᓄᑦ.

⁵ ᐂᑉᕋᒻᒥᒃ ᐊᑎᖃᕐᓂᐊᕈᓐᓃᕐᐳᑎᑦ, ᐂᑉᕋᕼᐋᒻᒥᒡᓕ; ᐅᓄᕐᑐᓄᑦ ᐃᓅᖃᑎᒌᒡᔪᐊᓄᑦ ᓯᕗᓕᕆᔭᐅᑎᓐᓂᐊᓕᕋᒃᑭᑦ.

⁶ ᑭᖑᕚᒃᓴᖃᕐᑎᓐᓂᐊᕐᐸᒋᑦ ᐅᓄᕐᑐᕐᔪᐊᓂᒃ, ᐃᓅᖃᑎᒌᒡᔪᐊᓐᖑᕐᑎᑦᓱᒫᕐᐸᑦᓯ, ᐊᖓᔪᖅᑳᕐᔪᐊᓪᓗ ᐃᓕᖕᓂᑦ ᐱᔪᒫᕐᐳᑦ.

⁷ “ᐊᖏᖃᑎᒌᒍᑎᒋᔭᕋᓗ ᐅᕙᓐᓂᑦ ᐃᓕᖕᓄᑦ ᑭᖑᕚᒃᓴᕐᓄᓪᓗᑦᑕᐅᖅ ᑭᖑᓂᕐᓂ ᑭᖑᕚᕇᖑᔪᒫᕐᑐᓄᓪᓗ ᐃᓱᖃᖏᑦᑐᒧᑦ ᑐᕌᖓᓂᐊᕐᐳᖅ, ᐃᓕᖕᓄᑦ ᒎᑎᒋᔭᐅᓂᐊᕐᐳᖓ ᑭᖑᕚᒃᓴᕐᓄᓪᓗ ᒎᑎᒋᔭᐅᔪᒫᕆᕗᖓ.

⁸ ᑕᒪᓐᓇᓗ ᓄᓇ ᐃᓕᖕᓄᑦ ᑐᓂᓂᐊᕐᐸᕋ, ᑭᖑᕚᒃᓴᕐᓄᓪᓗ ᑭᖑᓂᕐᓂ. ᑕᒪᓐᓇ ᓄᓇ ᓂᐅᕐᕈᐊᖑᕕᒋᔧᑦ, ᑕᒪᓐᓇᓕᒫᕐᓗ ᓄᓇ ᑬᓇᓂ, ᓄᓇᒋᔪᒫᕐᐸᓯ ᐃᓱᖃᖏᑦᑐᒧᑦ; ᐅᕙᖓᓗ ᑖᒃᑯᓄᖓ ᒎᑎᒋᔭᐅᔪᒫᕐᐳᖓ.”

⁹ ᒎᑎᓗ ᐅᖃᕐᐳᖅ ᐂᑉᕋᕼᐋᒧᑦ, “ᐃᕝᕕᑦᑕᐅᖅ, ᐊᖏᖃᑎᒌᒍᑎᓕᐊᕋ ᑲᔪᓯᑎᑦᓴᕆᐊᖃᕐᐸᑦ, ᑭᖑᕚᒃᓴᕕᓪᓗ ᑭᖑᓂᕐᓂ ᑭᖑᕚᕇᖑᔪᒫᕐᑐᓄᓪᓗ ᑕᒤᓐᓄᑦ.

¹⁰ ᐃᒫᒃ ᐊᖏᖃᑎᒌᒍᑎᓕᐅᕐᐳᖓ, ᑲᔪᓯᑎᑦᓴᕆᐊᖃᕐᓂᐊᕐᑕᕐᓂᒃ, ᐅᕙᓐᓄᑦ ᐃᓕᖕᓄᓪᓗ ᑭᖑᕚᕐᓄᓪᓗ ᑭᖑᓂᕐᓂ; ᐊᖑᑎᑦ ᐃᓕᑦᓯᓐᓂ ᑕᒪᕐᒥᓕᒫᖅ ᑭᐱᔭᐅᔭᕆᐊᖃᕐᐳᑦ.

¹¹ ᑭᐱᔭᐅᔪᒃᓴᐅᕗᓯ ᐊᖑᑎᓕᒫᑦ ᐅᓕᕝᕙᖏᑦ; ᑕᒪᓐᓇᓗ ᓇᓗᓁᒃᑯᑕᐅᓂᐊᕐᐳᖅ ᐊᖏᖃᑎᒌᒍᑎᑦᑎᓐᓄᑦ ᐅᕙᓐᓄᑦ ᐃᓕᖕᓄᓪᓗ.

¹² ᐃᕐᓂᐊᖑᔪᑦ ᐅᓪᓗᖃᓕᕐᐸᑕ ᓯᑕᒪᐅᔪᕐᑐᓂᒃ ᑭᐱᔭᐅᔪᒃᓴᐅᕗᑦ, ᐊᖑᑎᓕᒫᑦ ᑭᖑᕚᑦᓯᓐᓂ, ᐃᓕᑦᓯᓐᓂ ᐃᕐᓂᕐᑖᕆᔭᐅᔪᑦ, ᑮᓇᐅᔭᒧᓪᓗ ᓂᐅᕕᐊᖑᓯᒪᔪᑦ ᐊᒡᓛᑦ ᕿᑐᕐᖓᕆᓐᖏᑕᕋᓗᐊᓯ ᑭᐱᔭᐅᔪᒃᓴᐅᒋᕗᑦ.

¹³ ᐃᓕᑦᓯᓐᓂ ᐃᕐᓂᐊᖑᔪᓕᒫᑦ ᑮᓇᐅᔭᓄᓪᓗ ᓂᐅᕕᐊᕆᓯᒪᔭᓯ ᐃᓕᑦᓯᓐᓃᑦᑐᑦ ᐃᕐᓂᖏᑦ, ᑭᐱᔭᐅᔭᕆᐊᖃᕐᐳᑦ. ᐊᖏᖃᑎᒌᒍᑎᒐ ᐅᕕᓂᑦᓯᓐᓃᓐᓂᐊᕐᒪᑦ ᐃᓱᖃᖏᑦᑐᒧᑦ ᓇᓗᓁᒃᑯᑕᐅᓗᓂ.

¹⁴ ᓇᓪᓕᐊᓪᓗ ᐊᖑᑦ ᐅᕕᓂᒃᑯᑦ ᐅᓕᕝᕙᖓ ᑭᐱᔭᐅᓯᒪᖏᑉᐸᑦ ᑖᓐᓇ ᐃᓅᖃᑎᒥᓂᑦ ᐃᓚᒋᔭᐅᑎᑕᐅᔭᕆᐊᖃᓐᖏᓚᖅ; ᐊᖏᖃᑎᒌᒍᑎᓐᓂᒃ ᒪᓕᖏᒻᒪᑦ.”

¹⁵ ᒎᑎᓗ ᐂᑉᕋᕼᐋᒧᑦ ᐅᖃᕐᐳᖅ, ᓄᓕᐊᑦ ᓴᕅ ᐊᑎᖃᕐᓂᐊᕈᓐᓃᕐᐳᖅ ᓴᕅᒥᒃ, ᐊᑎᖃᕐᓂᐊᓕᕐᐳᕐᓕ ᓵᕋᒥᒃ.

¹⁶ ᓮᒻᒪᕐᑎᓐᓂᐊᕐᐸᕋ, ᓱᓕᓗ ᑖᑦᓱᒨᓇ ᐃᕐᓂᕐᑖᕐᑎᑦᓱᒫᕐᐸᒋᑦ; ᓮᒻᒪᕐᑎᓐᓂᐊᕋᒃᑯ, ᐃᓅᖃᑎᒌᒡᔪᐊᓄᓪᓗ ᐊᓈᓇᒋᔭᐅᔪᒫᕐᐳᖅ; ᐃᓄᐃᓪᓗ ᐊᖓᔪᖅᑳᕐᔪᐊᖏᑦ ᑖᑦᓱᒪᓐᖓᑦ ᐱᔪᒫᕐᐳᑦ.

¹⁷ ᐂᑉᕋᕼᐋᒻᓗ ᐅᑯᕗᖅ ᑮᓇᓂ ᒪᓂᖅᑲᒧᑦ ᐊᒃᑐᕐᑎᓪᓗᒍ, ᐃᒡᓚᕈᓱᓕᕐᐳᖅ, ᐃᓱᒪᓕᕋᒥ, “ᐊᖑᑦ ᕿᑐᕐᖓᕐᑖᕈᓐᓇᕐᐹ 100ᓂᒃ ᐊᕐᕌᒍᖃᓕᕐᓗᓃ? ᓵᕋᓗ ᕿᑐᕐᖓᕐᑖᕈᓐᓇᕐᐹ 90ᓂᒃ ᐊᕐᕌᒍᖃᓕᕐᓗᓂ?”

¹⁸ ᐂᑉᕋᕼᐋᒻᓗ ᒎᑎ ᐅᖃᐅᑎᕚ, “ᐃᓯᒥᐅᓪ ᓵᖕᓂ ᐃᓅᖁᕙᕋ.”

¹⁹ ᒎᑎᐅᑉ ᑭᐅᕚ, “ᑍᒫᖑᓐᖏᓚᖅ, ᓄᓕᐊᕕᑦ ᓵᕋᐅᑉ ᐃᕐᓂᕐᑖᕐᑎᑦᓱᒫᕐᐹᑎᑦ, ᐊᑎᖃᕐᑎᑦᓱᒫᕐᐸᓪᓗ ᐂᓴᑭᒥᒃ, ᐊᖏᖃᑎᒌᒃᓯᒪᓂᕋ ᑲᔪᓯᑎᓐᓂᐊᕋᒃᑯ ᑖᑦᓱᒨᓇ ᑭᖑᕚᒃᓴᖏᓐᓄᑦ ᐊᖏᖃᑎᒌᒍᑎᓕᐊᕋ ᑕᒪᓐᓇ ᐃᓱᖃᖏᑦᑑᖕᒪᑦ ᑭᖑᕚᖏᓐᓄᓪᓗ ᑐᕌᖓᔪᒫᕆᕗᖅ ᑭᖑᓂᖓᓂ.

²⁰ ᐃᓯᒥᐅᓪ ᐱᓪᓗᒍ, ᑐᓴᕐᓯᒪᕙᒋᑦ; ᑕᑯᒋᑦ, ᓮᒻᒪᕐᑎᑦᓱᒪᕙᕋ ᕿᑐᕐᖓᖃᕐᑎᓪᓗᒍᓗ ᐅᓄᕐᑐᓂᒃ ᑭᖑᕚᒃᓴᖃᕐᑎᓪᓗᒍᓗ ᐅᓄᕐᑐᕐᔪᐊᓂᒃ; ᐊᑖᑕᒋᔭᐅᔪᒫᕐᐳᕐᓗ ᐊᖓᔪᖅᑳᕐᔪᐊᑦ ᐃᕐᓂᖏᓐᓄᑦ 12ᓄᑦ ᑭᖑᕚᖏᓪᓗ ᐃᓅᖃᑎᒌᒡᔪᐊᓐᖑᕐᑎᑦᓱᒫᕆᕙᒃᑲ.

²¹ ᐊᖏᖃᑎᒌᒍᑎᒐᓕ ᑲᔪᓯᑎᑦᓱᒫᕐᐸᕋ ᐂᓴᑭᒃᑯᑦ, ᐊᕐᕌᒍᑉᐸᑦ ᐃᓅᔪᒫᕐᐳᖅ ᓵᕋᒃᑯᑦ, ᑕᒪᓐᓇ ᐊᑐᕐᑐᖅ ᓇᓪᓕᐅᑎᖕᒥᒃᐸᑦ ᐊᕐᕌᒎᔪᒫᕐᑐᖅ.”

²² ᑍᒫᒃ ᐅᖃᕐᕕᒋᔭᕇᕋᒥᐅᒃ, ᒎᑎᐅᑉ ᐂᑉᕋᕼᐋᒻ ᕿᒪᒃᐹ.

²³ ᑕᕝᕙ ᐂᑉᕋᕼᐋᒻ ᐃᕐᓂᓂ ᐃᓯᒥᐅᓪ ᐱᕚ ᐃᓚᒥᓂᓗ ᐱᔩᑦ ᐃᕐᓂᐊᖑᓯᒪᔪᑦ ᐅᕝᕙᓘᓐᓃᑦ ᑮᓇᐅᔭᒧᑦ ᓂᐊᕕᐊᖑᓯᒪᔪᑦ, ᐊᖑᑎᓕᒫᓪᓗ ᐃᓚᒋᔭᓕᒫᓂ ᐅᓕᕝᕙᖏᑦ ᑭᐱᕔᑦ ᐅᓪᓗᒥ ᑍᑦᓱᒪᓂᑦᓮᓐᓇᖅ, ᑍᒫᒃ ᒎᑎᐅᑉ ᐅᖃᐅᑎᓚᐅᕐᒪᒍ.

²⁴ ᐂᑉᕋᕼᐋᒻᓗ ᐊᕐᕌᒍᖃᓕᓚᐅᕐᐳᖅ 99ᓂᒃ ᐅᓕᕝᕙᖓ ᑭᐱᔭᐅᑎᓪᓗᒍ,

²⁵ ᐃᕐᓂᖓᓗ ᐃᓯᒥᐅᓪ 13ᓂᒃ ᐊᕐᕌᒍᖃᓚᐅᕐᐳᖅ ᐅᓕᕝᕙᖓ ᑭᐱᔭᐅᑎᓪᓗᒍ.

²⁶ ᐅᓪᓗᒥᓗ ᑕᕝᕙᓂᑦᓮᓐᓇᖅ ᐂᑉᕋᕼᐋᒻ ᐃᕐᓂᖓᓗ ᐃᓯᒥᐅᓪ ᑭᐱᔭᐅᓚᐅᕐᐴᒃ;

²⁷ ᑕᒪᕐᒥᒡᓗ ᐊᖑᑎᑦ ᐃᓚᒋᔭᖏᑦ, ᐃᓚᒋᔭᒥᒍᑦ ᐃᕐᓂᐊᖑᓯᒪᔪᑦ ᑮᓇᐅᔭᓄᓪᓗ ᓂᐅᕕᐊᖑᓯᒪᔪᑦ ᐱᔨᖏᑦ, ᐊᑕᐅᑦᓯᒃᑯᑦ ᑭᐱᔭᐅᖃᑎᒋᓚᐅᕐᐰᑦ.