ᒨᓯᓯ ᓯᕗᓪᓖᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᒡᒐᓗ ᐄᓯᒤᓕᓗ

¹ ᓴᕅᓕ, ᐂᑉᕋᐅᑉ ᓄᓕᐊᖓ ᕿᑐᕐᖏᓱᐃᑦᑑᒐᒥ ᕿᑐᕐᖓᕐᑖᓚᐅᓐᖏᓚᖅ. ᐄᑦᔨᑉᑎᒥᐅᑕᕐᒥᒡᓕ ᐊᕐᓇᒥᒃ ᐱᔨᖃᓚᐅᕐᐳᖅ ᐂᒡᒐᒥᒃ ᐊᑎᓕᖕᒥᒃ;

² ᑍᒤᒻᒪᑦ ᐅᐃᓂ ᐂᑉᕋᒻ ᐅᖃᐅᑎᕚ, “ᑕᑯᓕᕆᑦ, ᐊᑕᓂᐅᑉ ᕿᑐᕐᖓᕐᑖᕈᓐᓇᕐᑎᖏᒻᒪᖓ; ᐱᔨᒐᑐᕐᖑᓇ ᐱᖃᑎᒋᓚᐅᕈᒃ ᐃᒻᒪᖄᓕ ᕿᑐᕐᖓᕐᑖᕈᓐᓇᕐᐳᖅ ᕿᑐᕐᖓᒃᓴᓐᓂᒃ.” ᐂᑉᕋᐅᓪᓗ ᓴᕅᑉ ᐅᖃᐅᓯᖏᑦ ᓈᓚᓚᐅᕐᐰᑦ.

³ ᑕᕝᕙ ᐂᑉᕋᒻ ᓄᓇᖃᕐᓯᒪᓕᕐᑎᓪᓗᒍ ᑬᓇᓂᒥ ᐊᕐᕌᒍᓂᒃ ᖁᓕᓂᒃ, ᓴᕅᑉ ᐱᔨᓂ ᐂᒡᒐ ᐄᑦᔨᑉᑎᒥᐅᑕᖅ ᐂᑉᕋᒻᒧᑦ ᑐᓂᕚ ᓄᓕᐊᕆᔭᐅᖁᓪᓗᒍ.

⁴ ᐂᑉᕋᐅᓪᓗ ᐱᖃᑎᒋᖕᒪᒍ ᐂᒡᒐ, ᓄᑕᕋᒃᓴᖃᓕᕐᐳᖅ; ᐂᒡᒐᓗ ᖃᐅᔨᓕᕋᒥ ᓄᑕᕋᒃᓴᖃᓕᕐᓂᕐᒥᓂᒃ, ᐱᐅᔪᕆᓕᕐᐳᖅ ᐊᑭᕋᕐᑐᓕᕐᓗᓂᓗ ᓴᕅᒥᒃ.

⁵ ᑕᕝᕙ ᓴᕅ ᐅᖃᕐᐳᖅ ᐂᑉᕋᒻᒧᑦ, “ᓈᒻᒪᖏᑦᑐᓕᕕᐅᓂᕋ ᐃᕝᕕᑦ ᓵᑕᒃᓴᐅᑦᔪᑎᒃᓴᕆᕙᑦ! ᐱᔨᒐ ᑐᓂᓚᐅᕋᒃᑯ ᐃᓕᖕᓄᑦ, ᑍᒪᓐᖓᓪᓕ ᓄᑕᕋᒃᓴᖃᓕᕐᓂᕐᒥᓂᒃ ᖃᐅᔨᑐᐊᕋᒥ, ᐅᕙᓐᓂᒃ ᐆᒥᓱᓕᕐᐳᖅ. ᐊᑕᓂᕐᓕ ᓇᖕᒥᓂᖅ ᖃᐅᔨᓴᕐᓕ ᓇᓕᕐᐳᒃ ᑕᒻᒪᕐᓯᒪᖕᒪᖔᑦ ᐃᕝᕕᓪᓘᓐᓃᑦ ᐅᕙᖓᓘᓐᓃᑦ!”

⁶ ᐂᑉᕋᐅᓪᓗ ᑭᐅᕚ, “ᐄᓛᒃ, ᑖᓐᓇ ᐃᕝᕕᑦ ᐱᔨᒋᒐᕕᐅᒃ ᓇᖕᒥᓂᕐᓗ ᐱᔪᓐᓇᕐᓂᖃᕐᕕᒋᓪᓗᒍ; ᐃᓱᒪᒋᔭᕐᓂᒃ ᐱᓂᐊᕐᕕᒋᓕᕈᒃ.” ᑕᕝᕙ ᓴᕅᑉ ᐂᒡᒐ ᓂᑲᒋᖃᑦᑕᕈᓐᓃᕐᒪᒍ, ᐂᒡᒐ ᕿᒫᓕᓚᐅᕐᐳᖅ ᑖᑦᓱᒪᓐᖓᑦ.

⁷ ᑕᕝᕙ ᐊᑕᓂᐅᑉ ᐂᖏᓕᖓᑕ ᐂᒡᒐ ᐅᐸᒃᐹ ᐃᒥᕐᑕᕐᕕᖕᒦᑎᓪᓗᒍ ᐊᖅᑯᑎᒥ ᐃᓄᖃᖏᑦᑐᒥ ᓲᕐᒧᐊᕆᐊᒥ.

⁸ ᐅᖃᐅᑎᓪᓗᒍᓗ, “ᐂᒡᒑ, ᓴᕅᑉ ᐱᔨᖓ, ᓇᑭᓐᖔᕐᐱᑦ ᐊᒻᒪ ᓇᒧᓐᖓᐅᕖᑦ?” ᑖᑦᓱᒪᓗ ᑭᐅᕚ, “ᕿᒫᕗᖓ ᐊᕐᓇᒥᑦ ᐊᖓᔪᖅᑳᓐᓂᑦ ᓴᕅᒥᑦ.”

⁹ ᐊᑕᓂᐅᑉ ᐂᖏᓕᖓᑕ ᐅᖃᐅᑎᕚ, “ᐊᖓᔪᖅᑳᕐᓄᑦ ᐅᑎᓚᐅᕆᑦ ᐃᓕᖕᓂᒡᓗ ᑐᓂᓗᑎᑦ ᑖᑦᓱᒧᖓ.”

¹⁰ ᐊᑕᓂᐅᓪᓗ ᐂᓐᖏᓕᖓ ᐅᖃᒃᑲᓐᓂᕐᐳᖅ, “ᐅᓄᕐᑐᕐᔪᐊᓂᒃ ᑭᖑᕚᕐᑖᕐᑎᑦᓱᒫᕐᐸᒋᑦ ᑭᓇᒧᓪᓘᓐᓃᑦ ᓈᓴᕐᑕᐅᔪᓐᓇᖏᑦᑐᓂᒃ.”

¹¹ ᐊᑕᓂᐅᓪᓗ ᐂᖏᓕᖓᑕ ᐅᖃᐅᑎᕚ: “ᑕᑯᒋᑦ, ᕿᑐᕐᖓᒃᓴᖃᕐᐳᑎᑦ ᐃᕐᓂᕐᑖᓛᕐᐳᑎᓪᓗ; ᑖᓐᓇᓗ ᐊᑦᓯᕈᒫᕐᐸᑦ ᐃᓯᒥᐅᓪᒥᒃ; ᐃᓛᒃ ᐊᑕᓂᐅᑉ ᑐᓴᓚᐅᕐᒪᑎᑦ ᐅᖁᒤᒃᓴᕕᒡᔪᐊᕈᑎᖕᓂᒃ.

¹² ᐃᕐᓃᓪᓕ ᐃᓅᓯᖃᕈᒫᕐᐳᖅ ᓄᔪᐊᕐᑕᑎᑐᑦ ᓯᐅᑎᖅᑯᕐᑐᔪᑎᑐᑦ, ᑕᒤᓐᓂᒃ ᐊᑭᕋᖃᕈᒫᕐᐳᖅ, ᑕᒤᓐᓄᓪᓗ ᐊᑭᕋᕆᔭᐅᓗᓂ. ᓄᓇᖃᕈᒫᕐᐳᕐᓗ ᐃᓚᒥᓄᑦ ᑲᑎᒪᔭᐅᖏᓪᓗᓂ.”

¹³ ᐂᒡᒐᐅᓪᓗ ᐊᑕᓂᖅ ᐅᖃᕐᕕᒋᔨᓂ ᐊᑎᖃᕐᑎᑉᐹ, “ᒎᑏ ᑕᑯᓐᓇᕐᐳᑎᑦ”; ᐅᖃᓚᐅᕋᒥ, “ᒎᑎᒥᒃ ᑕᑯᓪᓚᕆᒃᐳᖓ ᑐᖁᓇᖓᓗ ᑕᑯᓚᐅᕐᓗᒍ?”

¹⁴ ᑍᒤᒻᒪᑦ ᑖᓐᓇ ᐃᒥᕐᑕᕐᕕᒃ ᑲᑎᓯᐅᑉ ᐱᕇᓪᓗ ᐊᑯᓐᓂᖓᓃᑦᑐᖅ ᐃᓄᖕᓄᑦ ᑍᔭᐅᕙᓕᕐᐳᖅ “ᐱᐊᕐ-ᓚᕼᐂ-ᕈᐂ.” ᑐᑭᓕᒃ “ᐃᓅᖏᓐᓇᕐᑐᖅ ᐅᕙᓐᓂᒃ ᑕᑯᓐᓇᕐᐳᖅ.”

¹⁵ ᐂᒡᒐᓗ ᐂᑉᕋᒻᒥᑦ ᐃᕐᓂᕐᑖᕐᐳᖅ; ᑖᓐᓇᓗ ᐂᑉᕋᐅᑉ ᐊᑦᓯᕐᐹ ᐃᓯᒥᐅᓪᒥᒃ, ᐂᒡᒐᒃᑯᑦ ᐃᕐᓂᕐᑖᕆᔭᓂ.

¹⁶ ᐂᑉᕋᒻᓗ ᐊᕐᕌᒍᖃᓕᓚᐅᕐᐳᖅ 86ᓂᒃ ᐂᒡᒐᒃᑯᑦ ᐃᕐᓂᕐᑖᕋᒥ ᐃᓯᒥᐅᓪᒥᒃ.