ᒨᓯᓯ ᓯᕗᓪᓖᑦ 15 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᐂᑉᕋᒻᒧᑦ ᐊᖏᖃᑎᒌᒍᑎᓕᐅᕐᓂᖓ

¹ ᑕᒪᑐᒪᓗ ᑭᖑᓂᖓᒎᓕᕐᑐᖅ ᐊᑕᓂᐅᑉ ᐅᖃᐅᓯᖓ ᐂᑉᕋᒻᒧᑦ ᑎᑭᑉᐳᖅ ᑕᑯᑎᑕᐅᓂᒃᑯᑦ, ᐅᖃᕐᓗᓂ, “ᑲᑉᐱᐊᓱᖕᓇᒃ ᐂᑉᕋᒻ ᓴᐴᓗᑕᕆᕙᕐᒪ; ᐊᑭᓕᕐᑕᐅᓃᑦ ᐊᖏᔪᕐᔪᐊᖑᔪᒫᕐᐳᖅ.”

² ᐂᑉᕋᒻᓗ ᐅᖃᕐᐳᖅ, “ᐊᑕᓃᖅ ᒎᑏ, ᓱᓇᒥᒃ ᑐᓂᔭᒃᓴᖃᕋᕕᑦ ᐅᕙᓐᓄᑦ, ᓱᓕ ᕿᑐᕐᖓᖃᖏᓐᓇᒪ, ᐅᕙᓐᓂᑦ ᑭᖑᕐᖑᑦᔨᔪᒃᓴᑐᐊᖑᖕᒪᑦ ᐃᓔᓯᕆ ᑕᒫᓯᑰᓯᒥᐅᑕᖅ.”

³ ᐂᑉᕋᒻ ᐅᖃᕐᐳᖅ, “ᑕᑯᒋᑦ ᕿᑐᕐᖓᕐᑖᑎᓚᐅᖏᓐᓇᕕᖓ; ᐱᔨᒪ ᐃᓚᖓᑦ ᐅᕙᑦᑎᓐᓂ ᐃᓅᓚᐅᕐᑐᖅ ᐱᖁᑎᓐᓂᒃ ᑭᖑᕐᖑᔨᔪᒃᓴᑑᖕᒪᑦ.”

⁴ ᑕᑯᒋᓪᓗ, ᐊᑕᓂᖅ ᐅᖃᓕᕆᕗᖅ ᑖᑦᓱᒧᖓ, “ᑖᓐᓇ ᐊᖑᑦ ᑭᖑᕐᖑᑦᔨᔨᒃᓴᕆᓂᐊᓐᖏᓚᑦ; ᓇᖕᒥᓂᕐᓕ ᐃᕐᓂᕐᓂᒃ ᑭᖑᕐᖑᑦᔨᔨᒃᓴᖃᕐᓂᐊᕐᐳᑎᑦ.”

⁵ ᐊᓂᑎᓪᓗᓂᐅᒃ ᓯᓚᒧᑦ ᐅᖃᐅᑎᕚ, “ᐸᐅᖓ ᕿᓚᖕᒧᑦ ᑕᑯᓴᕆᑦ, ᐅᓪᓗᕆᐊᑦ ᓈᓴᒃᑭᑦ, ᓈᓴᕈᓐᓇᕈᕕᒋᑦ.” ᐅᖃᐅᑎᒃᑲᓐᓂᕐᓗᒍᓗ, “ᑍᒫᒃ ᐅᓄᕐᑐᑎᒋᔪᓂᒃ ᑭᖑᕚᖃᕈᒫᕐᐳᑎᑦ.”

⁶ ᐂᑉᕋᐅᓪᓗ ᐊᑕᓂᖅ ᐅᒃᐱᕆᕚ; ᑕᒪᑐᒧᖓᓗ ᐊᑕᓂᐅᑉ ᐃᓱᐊᕐᓯᑎᑕᐅᓂᕋᓚᐅᕐᐹ.

⁷ ᐅᖃᐅᑎᓪᓗᒍᓗ, “ᐅᕙᖓᐅᕗᖓ ᐊᑕᓂᖅ, ᓄᓇᒥᑦ ᐅᕐᒥᑦ ᑲᐅᓪᑎᐊᒦᑦᑐᒥᑦ ᐊᐅᓪᓚᕐᑎᓚᐅᕐᐸᒋᑦ, ᑕᒪᓐᓇ ᓄᓇ ᑐᓂᔪᒪᓪᓗᒍ ᐃᓕᖕᓄᑦ ᓄᓇᑖᕆᔭᐅᖁᓪᓗᒍ.”

⁸ ᐂᑉᕋᐅᓪᓕ ᐊᐱᕆᕚ, “ᐊᑕᓃᖅ ᒎᑏ, ᖃᓄᕐᓕ ᖃᐅᔨᓂᐊᕐᐳᖓ ᓄᓇᑖᕆᓂᐊᕐᒪᖔᒃᑯ?”

⁹ ᐊᑕᓂᐅᑉ ᑭᐅᕚ, “ᐃᒻᒧᒃᓯᐅᒐᕐᒥᒃ ᕾᑦᓯᓚᐅᕆᑦ, ᐱᖓᓱᓂᒃ ᐊᕐᕌᒍᓕᖕᒥᒃ, ᒎᑦᓯᒥᒡᓗ ᐊᕐᓇᓪᓗᖕᒥᒃ ᐱᖓᓱᓂᒃ ᐊᕐᕌᒍᓕᖕᒥᒃ, ᓰᐱᒥᒡᓗ ᐊᖑᓴᓪᓗᕐᒥᒃ ᐱᖓᓱᓂᒃ ᐊᕐᕌᒍᓕᖕᒥᒃ, ᑑᕕᒥᒡᓗ ᐊᕿᒡᒋᐅᔮᕐᑐᒥᒡᓗ ᐱᐊᕋᕕᓂᕐᒥᒃ.”

¹⁰ ᑕᕝᕙ ᑖᒃᑯᓂᖓ ᐆᒪᔪᓂᒃ ᐋᑦᓯᕗᖅ, ᖁᐱᓪᓗᒋᓪᓗ ᐊᕕᒃᐰᑦ ᒪᕐᕉᓕᓪᓗᒋᑦ, ᐃᓕᐅᕋᕐᐰᑦ ᐊᑭᓕᕇᒃᑕᕐᑎᓪᓗᒋᑦ ᒪᕐᕈᐃᖑᓕᕐᑎᑉᐰᑦ; ᑎᖕᒥᐊᒡᓕ ᐊᕕᓐᖏᓛᒃ.

¹¹ ᑎᖕᒥᐊᓪᓗ ᓂᕿᑐᓲᑦ ᐆᒪᔪᕕᓂᕐᓄᑦ ᐅᓂᓪᓗᑎᒃ ᒥᑦᓴᕐᑐᕐᐳᑦ, ᐂᑉᕋᐅᓪᓕ ᕿᒪᒃᓯᑎᑉᐰᑦ.

¹² ᓯᕿᓂᕐᓕ ᐊᒃᐸᓕᕐᒪᑦ, ᐂᑉᕋᒻ ᐃᑎᔪᒥᒃ ᓯᓂᓕᕐᐳᖅ; ᑕᑯᒋᓪᓗ, ᑲᑉᐱᐊᓇᕐᑐᒥ ᑖᕐᑐᐊᓗᖕᒦᓕᕐᐳᖅ.

¹³ ᑕᕝᕙ ᐊᑕᓂᐅᑉ ᐂᑉᕋᒻ ᐅᖃᐅᑎᕚ, “ᓱᓕᔪᒥᒃ ᖃᐅᔨᑦᓯᐊᕆᑦ ᑭᖑᕚᑎᑦ ᓂᐅᕐᕈᐊᖑᔪᒫᕐᐳᑦ ᓄᓇᒥ ᓄᓇᒋᓐᖏᑕᒥᖕᓂ; ᑕᕝᕙᓂᓗ ᓄᓇᒥ ᓯᐊᓛᕆᔭᐅᔪᒫᕐᐳᑦ, ᐅᖁᒤᒃᓴᕐᑎᑕᐅᔪᒫᕐᓗᑎᒡᓗ ᐊᕐᕌᒍᓂᒃ 400ᓂᒃ;

¹⁴ ᑖᒃᑯᐊᓕ ᓱᒋᐊᕈᒫᕐᐸᒃᑲ ᐃᓅᖃᑎᒌᒡᔪᐊᑦ ᑖᒃᑯᓂᖓ ᓯᐊᓛᖃᕐᑐᑦ, ᑕᕝᕙᓐᖓᓪᓗ ᓄᓇᒥᑦ ᓄᓇᒋᓐᖏᑕᒥᖕᓂᑦ ᐊᐅᓪᓚᓕᕈᑎᒃ, ᐊᔪᕐᓴᖏᑦᔪᑎᕐᔪᐊᓂᒃ ᓇᒃᓴᕈᒫᕐᐳᑦ.

¹⁵ ᐃᕝᕕᓪᓕ ᓯᕗᓕᕐᓄᑦ ᐂᔪᒫᕐᐳᑎᑦ ᓮᒪᓗᑎᑦ; ᐃᓗᕕᕐᑕᐅᔪᒫᕐᐳᑎᓪᓗ ᐃᓄᑐᖃᒻᒪᕆᐅᓕᕐᓗᑎᑦ.

¹⁶ ᑭᖑᕚᑎᓪᓕ ᐃᕐᓂᕇᑦ ᓯᑕᒪᖏᑦ ᑭᓯᐊᓂ ᐊᓂᒍᕐᐸᑕ ᑕᒪᐅᖓ ᓄᓇᒧᑦ ᐅᑎᕈᒫᕆᕗᑦ, ᐊᒧᕅᑎᑦ ᐊᔪᕐᑐᓕᓂᖏᑦ ᓱᒋᐊᕐᑕᐅᓚᐅᖏᒻᒪᑕ ᓱᓕ.”

¹⁷ ᓯᕿᓂᕐᓕ ᓂᐱᓯᒪᓕᕐᑎᓪᓗᒍ ᑖᕐᓯᖕᒪᑦ, ᑕᑯᒋᑦ, ᐃᑯᒪᔪᒥᒃ ᐳᔫᕐᑐᒥᒡᓗ ᐃᑯᐊᓚᔪᒥᒃ ᓇᓂᕈᐊᕐᒥᒃ ᓴᖅᑭᑦᑐᖃᕐᐳᖅ ᐆᒪᔪᕕᓃᓪᓗ ᐊᒡᒍᕐᓯᒪᔪᑦ ᖁᓛᑦᑎᒎᕐᓗᓂ.

¹⁸ ᑕᕝᕙ ᐊᑕᓂᖅ ᐅᓪᓗᒥ ᑕᕝᕙᓂ ᐂᑉᕋᒻᒥᒃ ᐊᖏᖃᑎᒌᒍᑎᓕᐅᕐᐳᖅ. ᐅᖃᕐᓗᓂ, “ᑭᖑᕚᕐᓄᑦ ᑕᒪᓐᓇ ᓄᓇ ᑐᓂᕙᕋ, ᐄᑦᔨᑉᑎᐅᑉ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᒍ ᑰᒡᔪᐊᕌᓗᒃ, ᐃᕗᕅᑎᐅᑉ ᑰᖓ ᑎᑭᓪᓗᒍ,

¹⁹ ᐅᑯᓄᖓ ᓄᓇᒋᔭᐅᔪᑦ ᑭᓁᑎᓄᑦ, ᑭᓂᔧᑎᓄᓪᓗ, ᑲᑦᒧᓁᑎᓄᓪᓗ,

²⁰ ᕼᐃᑍᑎᓄᑦ, ᐱᕆᔧᑎᓄᑦ, ᕆᐰᒻᓄᓪᓗ,

²¹ ᐊᒧᕅᑎᓄᓪᓗ, ᑬᓇᓂᒥᐅᓄᓪᓗ, ᒋᕐᒐᓮᑎᓄᓪᓗ, ᔨᐳᓮᑎᓄᓪᓗᑦᑕᐅᖅ.”