ᒨᓯᓯ ᓯᕗᓪᓖᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᒎᑎᐅᑉ ᕾᖁᔨᓂᖓ ᐂᑉᕋᒻᒥᒃ

¹ ᐊᑕᓂᖅ ᐂᑉᕋᒻᒧᑦ ᐅᖃᕐᐳᖅ, “ᓄᓇᖕᓂᑦ ᐊᐅᓪᓚᕆᑦ ᐃᓚᑎᓪᓗ ᐊᑖᑕᒃᑯᑎᓪᓗ ᕿᒻᒪᒡᓗᒋᑦ, ᑕᑯᑎᑦᓱᒫᕐᐸᒋᑦ ᓄᓇᒥᒃ ᐅᐸᖕᓂᐊᕐᑕᕐᓂᒃ.

² ᐃᓅᖃᑎᒌᒡᔪᐊᓐᖑᕐᑎᑦᓱᒫᕋᒃᑭᑦ, ᓮᒻᒪᕐᑎᓪᓗᑎᓪᓗ, ᐊᑏᓪᓗ ᐅᐱᒋᔭᐅᑦᓯᐊᕐᑎᓪᓗᒍ, ᓮᒻᒪᕐᑎᑦᓯᑦᔪᑎᒃᓴᐅᖁᓪᓗᑎᑦ.

³ ᓮᒻᒪᕐᑎᑦᓱᒫᕐᐸᒃᑲ ᐃᓕᖕᓂᒃ ᓮᒻᒪᕐᑎᑦᓯᔪᑦ; ᓇᕐᕈᓇᕐᑎᑦᓯᔪᑦ ᓇᕐᕈᓇᕐᓯᑎᑦᓱᒫᕐᐸᒃᑲ; ᐊᖅᑯᑎᒋᓗᑎᓪᓗ ᐃᓚᒌᓕᒫᑦ ᓄᓇᕐᔪᐊᕐᒥ ᓮᒻᒪᕐᑎᑕᐅᔪᒫᕐᐳᑦ.”

⁴ ᐂᑉᕋᒻᓗ ᐊᐅᓪᓚᕐᐳᖅ, ᐊᑕᓂᐅᑉ ᐅᖃᐅᓯᖓ ᒪᓕᒡᓗᒍ; ᓘᑎᓗᑦᑕᐅᖅ ᐃᓚᐅᓪᓗᓂ ᑖᑦᓱᒧᖓ, ᐂᑉᕋᒻ 75ᓂᒃ ᐊᕐᕌᒍᖃᓚᐅᕐᐳᖅ ᕼᐊᕋᓐᒥᑦ ᐊᐅᓪᓚᕋᒥ.

⁵ ᐂᑉᕋᒻ ᓄᓕᐊᓂ ᓴᕅ ᐃᓚᒋᕚ, ᓘᑎᓗ ᐊᖓᔪᐊᑕ ᐃᕐᓂᖓ; ᐱᖁᑎᑎᒡᓗᑦᑕᐅᖅ ᑕᒪᕐᒥᒃ ᐱᑖᕆᓯᒪᔭᑎᒃ, ᐃᓄᖁᑎᑖᕆᓯᒪᔭᑎᒡᓗ ᕼᐊᕋᓐᒥᑦ; ᑕᕝᕙ ᐊᐅᓪᓚᓯᓚᐅᕐᐳᑦ ᑬᓇᓂᒧᑦ. ᓄᓇᒧᓪᓗ ᑬᓇᓂᒧᑦ ᑎᑭᒃᑲᓗᐊᕋᒥᒃ,

⁶ ᐂᑉᕋᒻᑯᑦ ᖄᖏᓚᐅᕐᐳᑦ ᓄᓇᒧᑦ ᓯᑭᒻᒥᒃ ᐊᑎᓕᖕᒧᑦ, ᓇᐹᕐᑐᖅ ᐆᒃ ᒨᕆᒦᑦᑐᖅ ᑎᑭᓪᓗᒍ. ᑍᑦᓱᒪᓂ ᑬᓇᓂᒥᐅᑦ ᓱᓕ ᑕᒫᓂ ᓄᓇᖃᕐᑎᓪᓗᒋᑦ.

⁷ ᐊᑕᓂᐅᓪᓗ ᐂᑉᕋᒻ ᓴᖅᑭᕝᕕᒋᒐᒥᐅᒃ ᐅᖃᐅᑎᕚ, “ᓄᓇ ᑕᒪᓐᓇ ᑭᖑᕚᒃᓴᕐᓄᑦ ᓄᓇᑖᖑᑎᑦᓱᒫᕐᑕᕋ.” ᑕᕝᕙᓂᓗ ᑐᓂᕐᕈᓯᕐᕕᓕᐅᕐᐳᖅ ᐊᑕᓂᕐᒧᑦ, ᓴᖅᑭᕝᕕᐅᓚᐅᕐᓂᕐᒥᓄᑦ.

⁸ ᑭᖑᕐᖓᒍᓪᓗ ᐊᐅᓪᓚᓚᐅᕆᕗᖅ ᖃᖅᑲᒧᑦ ᐱᑎᓕᐅᑉ ᖃᐅᓕᕐᕕᖓᑕ ᓇᓛᓄᑦ, ᑕᕝᕗᖓᓗ ᑕᖕᒫᕐᑎᕐᐳᖅ, ᓄᓇᐅᑉ ᐱᑎᓕᐅᑉ ᐂᓪᓗ ᐊᑯᓐᓂᖓᓃᑦᑐᒧᑦ, ᑕᕝᕙᓂᓗ ᑐᓂᕐᕈᓯᕐᕕᓕᐅᕆᓪᓗᓂ ᐊᑕᓂᕐᒧᑦ ᐊᑕᓂᐅᓪᓗ ᐊᑎᖓ ᑐᒃᓯᐊᕐᕕᒋᕚ.

⁹ ᐂᑉᕋᒻᓗ ᑕᕝᕙᓐᖓᑦ ᐊᐅᓪᓚᕐᐳᖅ, ᓱᓕ ᓇᔪᕐᑕᖓᑕ ᓯᕿᓂᖓᑕ ᓇᓛᓄᑦ ᓂᒋᑉᒧᑦ.

ᐂᑉᕋᐅᑉ ᐄᑦᔨᑉᑎᒦᓐᓂᖓ

¹⁰ ᑍᑦᓱᒪᓂᓕ ᓄᓇᒥ ᑳᖕᓇᕐᑐᕐᔪᐊᖃᓚᐅᕐᐳᖅ, ᑕᕝᕙ ᐂᑉᕋᒻ ᐊᐅᓪᓚᓚᐅᕐᐳᖅ ᐄᑦᔨᑉᑎᒧᑦ ᓄᓇᖃᑬᓐᓇᕆᐊᕐᑐᕐᓗᓂ, ᓄᓇᒥ ᑳᖕᓇᕐᑐᕐᔪᐊᖅ ᐱᕙᓪᓕᐊᑐᐃᓐᓇᕐᒪᑦ.

¹¹ ᐄᑦᔨᑉᑎᒧᓪᓕ ᐃᑎᕆᐊᕐᑐᕐᓂᐊᓕᕐᓗᓂ ᓄᓕᐊᓂ ᓴᕅ ᐅᖃᐅᑎᕚ, “ᖃᐅᔨᒪᒐᒪ ᐊᕐᓇᑦᓯᐊᕙᐅᓪᓗᑎᑦ ᐃᓂᖁᓇᕐᑐᐊᓘᒐᕕᑦ.

¹² ᐄᑦᔨᑉᑎᒥᐅᓂᑦ ᑕᑯᔭᐅᒍᕕᑦ, ᐅᖃᕐᑐᖃᕋᔭᕐᐳᖅ, ‘ᐅᓇ ᓄᓕᐊᖓ’; ᑕᕝᕙ ᑐᖁᑕᐅᒐᔭᕐᐳᖓ, ᑐᖁᑕᐅᓐᖏᑎᓪᓗᑎᑦ.

¹³ ᐅᖃᐅᑎᖃᑦᑕᕐᓂᐊᕐᐸᑎᑦ ᐅᕙᓐᓄᑦ ᓇᔭᒋᔭᐅᓂᕋᕐᓗᑎᑦ, ᖃᓄᐃᓕᔭᐅᖁᓇᖓ, ᐃᕝᕕᓪᓗ ᐱᑦᔪᑎᒋᓗᑎᑦ ᐃᓅᑎᑕᐅᖁᓪᓗᖓ.”

¹⁴ ᐄᑦᔨᑉᑎᒧᓪᓕ ᑎᑭᓕᕋᒥᒃ, ᐄᑦᔨᑉᑎᒥᐅᓂᑦ ᑕᑯᔭᐅᕗᖅ ᓄᓕᐊᖓᑕ ᐃᓂᖁᓇᕐᑐᐊᓘᓂᖓ.

¹⁵ ᐊᖓᔪᖅᑳᒃᑯᕕᖕᒥᐅᑍᓪᓗ ᑕᑯᒐᒥᑦᔪᒃ, ᐰᕉᒧᑦ ᐅᖃᐅᓯᕆᕚᑦ ᐊᕐᓇᑦᓯᐊᕙᐅᓂᕋᕐᓗᒍ; ᑍᒤᒻᒪᑦ ᑖᓐᓇ ᐰᕉᑉ ᐃᒡᓗᕐᔪᐊᖓᓄᐊᕈᑦᔭᐅᕗᖅ.

¹⁶ ᑖᓐᓇᓕ ᐊᕐᓇᖅ ᐱᑦᔪᑎᒋᓪᓗᒍ ᐂᑉᕋᒻ ᐱᑦᓯᐊᕐᕕᒋᕚ; ᓰᐱᖁᑎᖃᓚᐅᕐᒪᑦ, ᐃᒻᒧᒃᓯᐅᒐᓂᒡᓗ, ᓯᐅᑎᖅᑯᕐᑐᔪᓂᒡᓗ ᐊᖑᓴᓪᓗᕐᓂᒃ, ᐱᔨᖃᕐᓗᓂᓗ ᐊᖑᑎᓂᒃ, ᐊᕐᓇᓂᒡᓗ, ᓯᐅᑎᖅᑯᕐᑐᔪᖁᑎᖃᕐᓗᓂᓗ ᐊᕐᓇᓪᓗᖕᓂᒃ, ᑳᒥᓕᖕᓂᒡᓗᑦᑕᐅᖅ.

¹⁷ ᐊᑕᓂᐅᓪᓕ ᐰᕉ ᐃᒡᓗᒥᐅᖃᑎᖏᓪᓗ ᐋᓐᓂᐊᓇᕐᑐᓄᑦ ᑎᑭᕝᕕᐅᑎᑉᐰᑦ ᓴᕅ ᐱᑦᔪᑎᒋᓪᓗᒍ, ᐂᑉᕋᒻ ᓄᓕᐊᖓ.

¹⁸ ᑕᕝᕙ ᐰᕉᑉ ᐂᑉᕋᒻ ᕾᖁᕚ, ᐊᐱᕆᓪᓗᒍᓗ, “ᐅᕙᓐᓄᑦ ᖃᓄᐃᓕᐅᕋᓱᒃᐲᑦ? ᓱᖕᒪᑦ ᐅᖃᐅᑎᓚᐅᓐᖏᓚᕐᒪ ᑖᓐᓇ ᓄᓕᐊᕆᓂᕋᕐᓗᒍ?

¹⁹ ᓱᖕᒪᓪᓗ ᐅᖃᓚᐅᕐᐲᑦ, ‘ᐅᓇ ᓇᔭᒐ’ ᐅᕙᓐᓄᑦ ᓄᓕᐊᕐᑖᕆᖁᓪᓗᒎ? ᑕᕝᕙ ᓄᓕᐊᑦ; ᑕᓱᓕᕈᒃ ᑕᕝᕙᓐᖓᓪᓗ ᐊᓂᓕᕆᑦ!”

²⁰ ᐰᕉᓗ ᑎᓕᓯᕗᖅ ᐃᓄᖁᑎᒥᓂᒃ; ᑖᒃᑯᐊᓗ ᑕᕝᕙᓐᖓᑦ ᓄᓇᒥᑦ ᐊᐅᓪᓚᕐᑎᑉᐹᑦ, ᓄᓕᐊᖓᓗ ᐱᖁᑎᓕᒫᖏᓪᓗ ᑕᒪᕐᒥᒃ.