ᒨᓯᓯ ᓯᕗᓪᓖᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᓐᖑᕐᑎᑕᐅᓂᐅᑉ ᐅᓂᒃᑲᐅᓯᐅᓂᖓ

¹ ᐱᒋᐊᕐᓂᕐᒥ ᒎᑎ ᐱᓐᖑᕐᑎᑦᓯᓚᐅᕐᐳᖅ ᕿᓚᖕᓂᒃ ᓄᓇᕐᔪᐊᕐᒥᒡᓗ.

² ᓄᓇᕐᔪᐊᕐᓕ ᐋᖅᑭᒃᓯᒪᓚᐅᓐᖏᓚᖅ ᓱᓇᑕᖃᕋᓂᓗ, ᐃᑎᔪᕐᔪᐊᒥᒃ ᑖᕐᑐᐊᓘᓪᓗᓂ; ᒎᑎᐅᓪᓗ ᐊᓂᕐᓂᖓ ᐃᖏᕐᕋᓚᐅᕐᐳᖅ ᐃᒫᓘᑉ ᖁᓛᒍᑦ.

³ ᒎᑎᓗ ᐅᖃᕐᐳᖅ, “ᖃᐅᒪᔪᖃᕐᓕ” ᖃᐅᒪᔪᒥᒡᓗ ᓴᖅᑭᑦᑐᖃᕐᐳᖅ.

⁴ ᒎᑎᐅᓪᓗ ᖃᐅᒪᔪᖅ ᕿᒥᕐᕈᒐᒥᐅᒃ ᓈᒻᒪᒋᕚ; ᒎᑎᐅᓪᓗ ᖃᐅᒪᔪᖅ ᐊᕕᑎᑉᐹ ᑖᕐᑐᒥᑦ,

⁵ ᒎᑎᐅᓪᓗ ᖃᐅᒪᔪᖅ ᑍᕚ ᐅᓪᓗᒥᒃ, ᑖᕐᑐᕐᓗ ᑍᓪᓗᒍ ᐅᓐᓄᐊᒥᒃ. ᐅᓐᓄᐊᕐᓗ ᐊᓂᒍᕐᒪᑦ ᐅᓪᓛᓐᖑᕐᐳᖅ, ᑕᕝᕙ ᐅᓪᓗᖅ ᓯᕗᓪᓕᕐᐹᖅ.

⁶ ᒎᑎᓗ ᐅᖃᕆᕗᖅ, “ᐃᒪᖅ ᖁᓕᒥᐅᑕᕐᑖᕐᓕ ᐊᐅᓚᖏᑦᑐᒥᒃ ᐃᒪᐅᑉ ᕿᑎᖓᓂ, ᐊᕕᒃᓯᓗᓂ ᐃᒪᕐᒥᒃ ᐃᒪᕐᓂᒡᓗ.”

⁷ ᒎᑎᓗ ᑕᕝᕙ ᓴᓇᕗᖅ ᐊᐅᓚᖏᑦᑐᒥᒃ ᐊᕕᒃᓗᒋᑦ ᐃᒪᖅ ᐊᓪᓕᐅᓕᕐᓗᓂ ᐃᒪᕐᒥᑦ ᖁᓕᕆᔭᒥᓂᑦ ᑍᒤᓕᖓᓕᓚᐅᕐᐳᖅ.

⁸ ᒎᑎᐅᓪᓗ ᖁᓛᓕᐊᓂ ᐊᐅᓚᖏᑦᑐᖅ ᑍᕙ ᕿᓚᖕᒥᒃ. ᐅᓐᓄᐊᕐᓗ ᐊᓂᒍᕐᒪᑦ ᐅᓪᓛᓐᖑᕐᐳᖅ, ᑕᕝᕙ ᐅᓪᓘᑉ ᐂᑉᐸᖓ.

⁹ ᒎᑎᓗ ᐅᖃᕆᕗᖅ, “ᐃᒪᕐᔪᐊᖅ ᕿᓚᐅᑉ ᐊᑖᓂᑦᑐᖅ ᑲᑎᓪᓕ ᐊᑕᐅᓯᕐᒧᑦ, ᓄᓇᓗ ᐸᓂᕐᑐᖅ ᓴᖅᑭᓕᕐᓕ.” ᑍᒤᓕᕐᐳᕐᓗ.

¹⁰ ᒎᑎᐅᓪᓗ ᐸᓂᕐᑐᖅ ᑍᕚ ᓄᓇᕐᔪᐊᒥᒃ, ᐃᒪᖅ ᐊᑕᐅᓯᕐᒧᑦ ᑲᑎᓯᒪᔪᖅ ᑍᓪᓗᓂᐅᒃ ᐃᒪᕐᔪᐊᕐᒥᒃ. ᒎᑎᐅᓪᓗ ᑕᑯᓪᓗᒋᑦ ᓈᒻᒪᒋᕔᑦ.

¹¹ ᐊᒻᒪ ᒎᑎ ᐅᖃᕆᕗᖅ, “ᓄᓇᕐᔪᐊᖅ ᖃᓄᐃᑦᑐᑐᐃᓐᓇᕐᓂᒃ ᐱᕈᕐᑐᖃᕐᓕ, ᐱᕈᕐᑐᓂᒃ ᐱᕈᕐᓯᐊᒃᓴᖃᕈᓐᓇᕐᑐᓂᒃ, ᐸᐅᕐᖓᓕᖕᓂᒡᓗ ᓇᐹᕐᑐᓂᒃ ᐸᐅᕐᖓᖏᓪᓗ ᐱᕈᕐᓯᐊᒃᓴᖃᕐᓗᑎᒃ ᐃᓗᐊᒍᑦ, ᐊᑐᓂᑦ ᖃᓄᐃᑦᑑᓂᑎᒃ ᒪᓕᒡᓗᒋᑦ ᓄᓇᒥ.” ᑍᒤᓕᕐᐳᕐᓗ.

¹² ᓄᓇᕐᔪᐊᕐᓗ ᐱᕈᕐᑐᖃᓕᕐᐳᖅ, ᐱᕈᕐᑐᑦ ᐊᑦᔨᒥᖕᓂᒃ ᐱᕈᕐᓯᐊᒃᓴᓖᑦ, ᓇᐹᕐᑐᓪᓗ ᐸᐅᕐᖓᓖᑦ ᐱᕈᕐᓯᐊᒃᓴᓖᑦ ᐸᐅᕐᖓᒥᖕᓂᒃ, ᖃᓄᐃᑦᑑᓂᑎᒃ ᒪᓕᒡᓗᒋᑦ. ᒎᑎᐅᓪᓗ ᑕᑯᓪᓗᒋᑦ ᓈᒻᒪᒋᕔᑦ.

¹³ ᐅᓐᓄᐊᖑᓚᐅᕐᓗᓂ ᐅᓪᓛᖑᓕᕆᕗᖅ, ᑕᕝᕙ ᐅᓪᓗᐃᑦ ᐱᖓᔪᐊᑦ.

¹⁴ ᒎᑎᓗ ᐅᖃᕆᕗᖅ, ᖃᐅᒪᔫᖕᓂᒃ ᓴᖅᑭᑦᑐᖃᕐᓕ ᐊᐅᓚᖏᑦᑐᒥ ᕿᓚᖕᒥ ᐅᓪᓗᕐᓗ ᐅᓐᓄᐊᕐᓗ ᐊᕕᓯᒪᖁᓪᓗᒋᒃ; ᑖᒃᑯᐊ ᓇᓗᓁᒃᑯᑕᐅᓂᐊᕐᒪᑕ ᐅᑭᐅᖃᑦᑕᕐᑐᒧᑦ ᐊᐅᔭᕈᖃᑦᑕᕐᑐᒧᓪᓗ ᐅᓪᓗᓄᑦ ᐊᕐᕌᒍᓄᓪᓗ.

¹⁵ ᑖᒃᑯᐊᓗ ᖃᐅᒪᔪᒃᓴᐅᓪᓗᑎᒃ ᐊᐅᓚᖏᑦᑐᒥ ᕿᓚᖕᒥ ᓄᓇᕐᔪᐊᕐᒥᒃ ᖃᐅᒪᑎᑦᓯᖁᓪᓗᒋᑦ, ᑍᒤᓕᕐᐳᕐᓗ.

¹⁶ ᒎᑎᓗ ᒪᕐᕉᖕᓂᒃ ᖃᐅᒪᑎᑦᓯᓂᕐᐹᖕᓂᒃ ᐱᓐᖑᕐᑎᑦᓯᕗᖅ, ᖃᐅᒪᓂᕐᓴᖅ ᐊᐅᓚᑦᓯᖁᓪᓗᒍ ᐅᓪᓗᒃᑯᑦ, ᖃᐅᒪᖏᓐᓂᕐᓴᕐᓗ ᐊᐅᓚᑦᓯᖁᓪᓗᒍ ᐅᓐᓄᐊᒃᑯᑦ; ᐅᓪᓗᕆᐊᓪᓗᑦᑕᐅᖅ ᐱᓐᖑᕐᑎᑉᐰᑦ.

¹⁷ ᑖᒃᑯᐊᓗ ᒎᑎᐅᑉ ᐊᐅᓚᖏᑦᑐᒥ ᕿᓚᖕᒥ ᐃᓂᖃᕐᑎᑉᐰᑦ ᓄᓇᕐᔪᐊᖅ ᖃᐅᒪᑎᑕᐅᖁᓪᓗᒍ,

¹⁸ ᖃᐅᒪᓂᕐᐹᕐᑕᖃᖁᓪᓗᒍ ᐅᓪᓗᒃᑯ ᐅᓐᓄᐊᒃᑯᓪᓗ ᑖᕐᑐᐊᓗᒃ ᐊᕕᒡᓗᒍ ᖃᐅᒪᔪᒥᑦ. ᒎᑎᐅᓪᓗ ᑕᑯᓪᓗᒋᑦ ᓈᒻᒪᒋᕔᑦ.

¹⁹ ᐅᓐᓄᐊᖑᓚᐅᕐᓗᓂ ᐅᓪᓛᖑᓕᕆᕗᖅ, ᑕᕝᕙ ᐅᓪᓗᐃᑦ ᓯᑕᒪᖓᑦ.

²⁰ ᒎᑎᓗ ᐅᖃᕆᕗᖅ, “ᐃᒪᖅ ᐃᒪᕐᒥᐅᑕᓂᒃ ᐆᒪᔪᖃᕐᓕ ᐅᓄᕐᑐᕐᔪᐊᓂᒃ, ᓯᓚᓗ ᑎᖕᒥᐊᖃᕐᓕ ᓄᓇᐅᑉ ᖁᓛᒎᑦ ᑎᖏᕙᒃᑐᓂᒃ ᕿᓚᖕᒥ ᐊᐅᓚᖏᑦᑐᒥ.”

²¹ ᑍᒫᒃ ᒎᑎ ᐱᓐᖑᕐᑎᑦᓯᕗᖅ ᐆᒪᔪᐊᓗᖕᓂᒃ ᐊᖏᔪᓂᒃ ᐃᑎᔪᒥᐅᑕᕐᓂᒃ ᐆᒪᔪᓕᒫᓂᒡᓗ ᐃᖏᕐᕋᔪᓐᓇᕐᑐᓂᒃ, ᐃᒪᕐᒥᐅᑕᕐᓂᒃ ᐃᒻᒥᒍᑦ ᐊᑦᔨᒌᖕᓂᖃᕐᑐᓂᒃ ᐅᓄᕐᑐᕐᔪᐊᓂᒃ, ᑎᖕᒥᐊᓂᒡᓗ ᐃᒻᒥᒍᑦ ᐊᑦᔨᒌᖕᓂᖃᕐᑐᓂᒃ ᐅᓄᕐᑐᕐᔪᐊᓂᒃ. ᒎᑎᐅᓪᓗ ᑕᑯᓪᓗᒋᑦ ᓈᒻᒪᒋᕔᑦ.

²² ᒎᑎᐅᓪᓗ ᓮᒻᒪᕐᑎᑉᐰᑦ, ᐅᖃᕐᓗᓂ, ᕿᑐᕐᖏᐅᓕᕆᑦᓯ ᐅᓄᕐᓯᓗᓯᓗ ᐃᒪᕐᕕᒃ ᐆᒪᔪᓂᒃ ᑕᑕᓪᓗᒍ, ᑎᖕᒥᐊᓪᓗ ᐅᓄᕐᓯᓕᑦ ᓄᓇᕐᔪᐊᕐᒥ.

²³ ᐅᓐᓄᐊᖑᓚᐅᕐᓗᓂ ᐅᓪᓛᓐᖑᕐᐳᖅ ᑕᕝᕙ ᐅᓪᓗᑦ ᑕᓪᓕᒪᖓᑦ.

²⁴ ᒎᑎᓗ ᐅᖃᕆᕗᖅ, “ᓄᓇᕐᔪᐊᖅ ᐆᒪᔪᖃᕐᓕ ᐃᒻᒥᒍᑦ ᐊᑦᔨᒌᖕᓂᖏᑦ ᒪᓕᒡᓗᒋᑦ; ᐱᓱᒃᑎᓂᒃ ᐹᕐᖑᕐᑐᓂᒡᓗ ᓄᓇᒥ ᓄᔪᐊᕐᑐᓂᒃ ᐃᒻᒥᒍᑦ ᐊᑦᔨᒌᖕᓂᖏᑦ ᒪᓕᒡᓗᒋᑦ.” ᑍᒤᓕᕐᐳᕐᓗ.

²⁵ ᒎᑎᐅᓪᓗ ᑕᒪᕐᒥᒃ ᑕᒪᒃᑯᐊ ᐱᓐᖑᕐᑎᑉᐰᑦ ᐆᒪᔪᐃᑦ ᐃᒻᒥᒍᑦ ᐊᑦᔨᒌᖕᓂᖏᑦ ᒪᓕᒡᓗᒋᑦ, ᐹᕐᖑᕐᑐᓪᓗ ᒪᓂᖅᑲᒥ ᐃᒻᒥᒍᑦ ᐊᑦᔨᒌᖕᓂᖏᑦ ᒪᓕᒡᓗᒋᑦ, ᒎᑎᐅᓪᓗ ᑕᑯᓪᓗᒋᑦ ᓈᒻᒪᒋᕔᑦ.

²⁶ ᑕᕝᕙ ᒎᑎ ᐅᖃᕆᕗᖅ, “ᒫᓐᓇᓕ ᐃᓄᖕᒥᒃ ᐊᑦᔨᑦᑎᓐᓂᒃ ᓴᓇᓚᐅᕐᑕ, ᐅᕙᑦᑎᓐᓂᒃ ᐊᑦᔨᖃᐸᓗᖕᓂᐊᕐᑐᓂᒃ; ᐊᖓᔪᖅᑲᐅᓂᐊᕐᑐᓂᒃ ᐃᖃᓗᖕᓄᑦ ᐃᒪᕐᒥᐅᑕᓄᓪᓗ, ᑎᖕᒥᐊᓄᓪᓗ ᖃᖓᑕᕙᒃᑐᓄᑦ, ᐆᒪᔪᓕᒫᓄᓪᓗ ᓄᔪᐊᖏᑦᑐᓄᑦ, ᓄᓇᒦᑦᑐᓕᒫᓄᓪᓗ, ᐹᕐᖑᕐᑐᓄᓪᓗ ᑕᒤᓐᓂᒃ ᓄᓇᒥ ᐹᕐᖑᕐᑐᓕᒫᓄᑦ.”

²⁷ ᑕᕝᕙ ᒎᑎ ᓴᓇᕗᖅ ᐃᓄᖕᒥᒃ ᐃᒻᒥᑐᑦ ᐊᑦᔨᖃᕐᑎᓪᓗᒍ, ᑕᕝᕙ ᒎᑎ ᐊᑦᔨᒥᓂᒃ ᐃᓄᖕᒥᒃ ᓴᓇᕗᖅ; ᐂᑉᐹ ᐊᖑᑕᐅᓪᓗᒍ ᐂᑉᐹᓗ ᐊᕐᓇᐅᓪᓗᒍ ᓴᓇᕚᒃ.

²⁸ ᒎᑎᐅᓪᓗ ᑖᒃᑯᐊᒃ ᓮᒻᒪᕐᑎᑉᐹᒃ, ᐅᖃᐅᑎᓪᓗᒋᒡᓗ, “ᕿᑐᕐᖏᐅᕆᑦᓯᒃ ᐅᓄᕐᑐᕐᔪᐊᓂᒃ ᓄᓇᕐᔪᐊᖅ ᑕᑕᓪᓗᒍ ᐊᐅᓚᓕᕐᓗᒍᓗ; ᐊᖓᔪᖅᑲᐅᕕᒋᓕᕐᓗᒋᑦ ᐃᖃᓗᐃᑦ ᐃᒫᓃᑦᑐᑦ ᑎᖕᒥᐊᓪᓗ ᖃᖓᑕᕙᒃᑐᑦ ᐆᒪᔪᓕᒫᓪᓗ ᓄᓇᒥ ᐊᐅᓚᕙᒃᑐᑦ.”

²⁹ ᒎᑎᓗ ᐅᖃᕆᕗᖅ, “ᑕᑯᒋᑦ, ᑐᓂᓯᕕᒋᕙᑦᓯ ᖃᓄᐃᑦᑐᑐᐃᓐᓇᕐᓂᒃ ᐱᕈᕐᑐᓂᒃ ᑕᒤᓐᓂᒃ ᐱᕈᕐᓯᐊᒃᓴᓕᐅᕐᑐᓂᒃ ᓄᓇᕐᔪᐊᕐᒥ, ᓇᐹᕐᑐᓂᒡᓗ ᑕᒤᓐᓂᒃ ᐱᕈᕐᓯᐊᒃᓴᓕᖕᓂᒃ ᐸᐅᕐᖓᒥᖕᓂᒃ; ᑕᒪᒃᑯᓂᖓ ᓂᕿᒃᓴᖃᖁᓪᓗᓯ.

³⁰ ᐊᒻᒪᑦᑕᐅᖅ ᐆᒪᔪᓕᒫᑦ ᓄᓇᕐᔪᐊᕐᒥ, ᑎᖕᒥᐊᓕᒫᓪᓗ ᖃᖓᑕᕙᒃᑐᑦ, ᐹᕐᖑᕐᑐᓕᒫᓪᓗ ᓄᓇᒥ, ᐊᓂᕐᑎᕆᔪᓐᓇᕐᑐᓕᒫᑦ ᓄᓇᕐᔪᐊᕐᒥ, ᐱᕈᕐᑐᓕᒫᑦ ᑐᖑᔪᕐᑐᑦ ᓂᕿᒃᓴᐅᖁᓪᓗᒋᑦ ᑐᓂᕙᒃᑲ.” ᑕᒪᓐᓇᓗ ᑍᒤᓕᕐᐳᖅ.

³¹ ᒎᑎᐅᓪᓗ ᐱᓐᖑᕐᑎᑕᓂ ᑕᒪᕐᒥᒃ ᕿᒥᕐᕈᕔᑦ, ᑕᑯᓪᓗᒋᑦ ᓈᒻᒪᒋᒻᒪᕆᒃᐰᑦ. ᐅᓐᓄᐊᖑᓚᐅᕐᓗᓂ ᐅᓪᓛᖑᓕᕐᐳᖅ ᑕᕝᕙ ᐅᓪᓗᑦ ᐱᖓᓲᔪᕐᑐᖓᑦ.