ᒐᓔᑎᐊᒥᐅᓄᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐃᒫᒃ ᐅᖃᕐᐳᖓ ᑭᖑᕐᖑᑦᔨᔪᒃᓴᖅ, ᓄᑕᕋᐅᓂᖓᓂ, ᓯᐊᓛᑎᑐᑦ ᐱᔭᐅᕗᖅ, ᑕᒤᓐᓂᒃ ᑭᖑᕐᖑᑎᔭᒃᓴᓂᒃ ᐱᖃᕋᓗᐊᕐᑎᓪᓗᒍ;

² ᑲᒪᔨᓄᑦ ᐊᐅᓚᑦᓯᔨᓄᓪᓗ ᐱᕈᕐᓴᑎᓪᓗᒍ ᑲᒪᒋᔭᐅᕗᖅ ᐱᒃᓴᖏᑦ ᐊᐅᓚᑕᐅᓪᓗᑎᒃ ᐊᑖᑕᖓᑕ ᐱᑖᕐᕕᐅᖁᔭᖓ ᑎᑭᓚᐅᓐᖏᓐᓂᖓᓂ.

³ ᑍᒫᒃᑕᐅᖅ ᐅᕙᒍᑦ; ᓄᑕᕋᐅᑎᓪᓗᑕ ᓯᐊᓛᕆᔭᐅᓚᐅᕐᐳᒍᑦ ᓯᓚᕐᔪᐊᑦᑎᓐᓂ ᐊᓂᕐᓂᕐᓄᑦ ᑕᑯᒃᓴᐅᖏᑦᑐᓄᑦ ᐊᐅᓚᑕᐅᑎᓪᓗᑕ.

⁴ ᓇᓪᓕᐅᑦᑐᕐᓕ ᓈᒻᒪᓈᑦᓯᐊᕐᑐᖅ ᓇᓪᓕᐅᑎᖕᒪᑦ, ᒎᑎᐅᑉ ᐃᕐᓂᓂ ᑎᓕᓚᐅᕐᐹ, ᐊᕐᓇᒧᑦ ᐃᕐᓂᐊᖑᓪᓗᓂ, ᐱᖁᔭᓄᑦ ᐊᐅᓚᑕᐅᓪᓗᓂ,

⁵ ᐱᖁᔭᓄᑦ ᐊᐅᓚᑕᐅᔪᑦ ᐱᐅᓕᔪᒪᓪᓗᒋᑦ, ᑎᒍᐊᕐᑖᖑᓗᑕ ᕿᑐᕐᖓᕐᑖᕆᔭᐅᖁᓪᓗᑕ.

⁶ ᕿᑐᕐᖓᕆᔭᐅᓕᕋᑦᓯᓗ, ᒎᑎᐅᑉ ᐃᕐᓂᕐᒥ ᐊᓂᕐᓂᖓ ᐃᓗᑦᓯᓐᓄᐊᕐᑎᑉᐹ, ᑖᓐᓇ ᓂᓪᓕᐊᔪᖅ, “ᐋᐸ, ᐊᑖᑖᒃ!”

⁷ ᑍᒤᒻᒪᑦ ᒎᑎᒃᑯᑦ ᓯᐊᓛᖑᔪᓐᓃᕐᐳᓯ ᕿᑐᕐᖓᕆᔭᐅᓕᕐᐳᓯᓕ, ᕿᑐᕐᖓᕆᓕᕋᒥᓯ ᑕᕝᕙ ᐱᑖᕐᑎᑎᑦᔪᑎᒃᓴᒥᓂᒃ ᐱᔭᒃᓴᖃᕐᑎᓕᕐᐹᓯ.

ᐸᐅᓗᓯᐅᑉ ᐃᓱᒫᓘᑎᖃᕐᓂᖓ ᒐᓔᑎᐊᒥᐅᓂᒃ

⁸ ᑕᒪᑐᒪ ᓯᕗᓂᖓᒍᑦ, ᒎᑎᒥᒃ ᖃᐅᔨᒪᓚᐅᕐᑎᓐᓇᓯ, ᓯᐊᓛᕆᔭᐅᓚᐅᕐᐳᓯ ᐃᓕᖅᑯᓯᑐᐃᓐᓇᕐᓄᑦ ᒎᑎᐅᖏᑦᑐᓄᑦ.

⁹ ᒫᓐᓇᓕ ᒎᑎᒥᒃ ᖃᐅᔨᒪᓕᕋᑦᓯ, ᐅᕝᕙᓗ ᒎᑎᒧᑦ ᖃᐅᔨᒪᔭᐅᓕᕋᑦᓯ, ᓱᖕᒪᑦ ᐅᑎᕐᓯᒪᓕᕐᐱᓰ ᐊᓂᕐᓂᕐᓄᑦ ᐱᔪᓐᓇᕐᓂᖃᖏᑦᑐᓄᑦ? ᓯᐊᓛᕆᔭᐅᒃᑲᓐᓂᕈᒪᓕᕆᕕᓰ ᑍᒃᑯᓄᖓ?

¹⁰ ᐃᒃᐱᒍᓱᑦᓯᐊᓲᖑᒐᑦᓯ ᓇᓪᓕᐅᑎᕙᒃᑐᓄᑦ ᐅᓪᓗᓄᑦ, ᑕᖅᑭᓄᓪᓗ, ᐊᕐᕌᒍᒥᓗ ᓇᓪᓕᐅᑎᕙᒃᑐᓄᑦ, ᐊᕐᕌᒍᓂᒡᓗ.

¹¹ ᐃᓱᒫᓗᓕᕐᐳᖓ ᐱᓇᓱᐊᕐᓂᕆᓚᐅᕐᑕᒃᑲ ᐃᓕᑦᓯᓐᓄᑦ ᑕᒪᐅᖓᑐᐃᓐᓈᕐᓯᒪᔪᕆᓪᓗᒋᑦ.

¹² ᐅᒃᐱᕐᑑᖃᑎᒃᑲ, ᕿᓄᕕᒋᕙᑦᓯ, ᐅᕙᑦᑐᑦ ᑍᒤᓚᐅᕆᑦᓯ, ᐅᕙᖓᑦᑕᐅᖅ ᐃᓕᑦᓯᑐᑦ ᑍᒤᓐᓇᒪ. ᐅᕙᓐᓄᑦ ᐱᓂᐊᕐᓗᒃᓯᒪᖏᓐᓇᑦᓯ.

¹³ ᐃᖅᑲᐅᒪᕗᓯ ᑎᒥᒃᑯᑦ ᐊᑲᕐᕆᖏᓐᓂᓐᓄᑦ ᐃᓕᑦᓯᓐᓂᒃ ᓯᕗᓪᓕᐅᑦᔨᓪᓗᖓ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᓪᓚᒡᕕᒋᖅᑳᓚᐅᕋᑦᓯ.

¹⁴ ᑎᒥᒪ ᐊᑲᕐᕆᖏᓐᓂᖓ ᐊᒃᓱᕉᑎᒋᒐᓗᐊᕐᓗᓯᐅᒃ, ᖁᔭᓈᓚᐅᓐᖏᓚᑦᓯᓐᖓ ᓇᕐᕈᒋᓇᖓᓗ, ᒎᑎᐅᓪᓕ ᐂᖏᓕᖏᑎᑐᑦ ᕿᓚᖕᒥᑦ ᑎᑭᑦᑐᑎᑐᑦ ᑐᓐᖓᓱᒃᑎᓚᐅᕐᐸᑦᓯᓐᖓ, ᙭ᔅᑑᓯ ᔩᓱᓯᑐᑦ ᐊᒡᓛᑦ.

¹⁵ ᓇᐅᒡᓕ ᐃᑲᔪᕈᒪᓂᕆᓚᐅᕐᑕᓯ? ᐅᕙᖓᓕ ᐅᖃᐅᑎᔪᓐᓇᕐᐸᑦᓯ ᐃᒫᒃ; ᐊᒡᓛᑦ ᐃᔨᓯ ᐱᕈᓐᓇᕈᑦᓯᐅᒃ ᐲᕐᓗᒋᑦ, ᐅᕙᓐᓄᑦ ᑐᓂᔪᒪᓚᐅᕋᓗᐊᕐᐸᓯ.

¹⁶ ᒫᓐᓇᓕ ᐊᑭᕋᕐᑎᑐᑦ ᐃᓱᒪᒋᓕᕐᐱᓯᓐᖔ ᓱᓕᔪᒥᒃ ᐅᖃᐅᑎᓕᕋᑦᓯ?

¹⁷ ᑍᒃᑯᐊ ᐊᓯᕗᑦ ᐊᒃᓱᕈᑦᓯᐊᕐᑐᐊᓘᔮᕐᒪᑕ ᐃᓕᑦᓯᓐᓄᑦ, ᑭᓯᐊᓂᓕ ᐃᓱᒪᒋᔭᖏᑦ ᓈᒻᒪᓈᕐᓯᒪᓐᖏᓚᑦ; ᐃᓕᑦᓯᓐᓂᒃ ᐊᕕᑎᑦᓯᓇᓱᐊᑐᐃᓐᓇᕐᐳᑦ ᐅᕙᓐᓂᑦ, ᐃᓕᑦᓯᓐᓄᑦ ᐃᓱᒪᒋᔭᐅᑦᓯᐊᕈᒪᑐᐃᓐᓇᕐᓗᑎᒃ.

¹⁸ ᐃᓛᒃ ᐃᓱᒪᒋᑦᓯᐊᖃᑦᑕᐅᑎᓂᖅ ᐱᐅᔫᒐᓗᐊᕐᐳᖅ ᐱᑦᔪᑎᒃᓴᖓ ᓈᒻᒪᓈᕐᓯᒪᒃᐸᑦ, ᐃᓕᑦᓯᓐᓂ ᓇᔫᑎᖏᒃᑲᓗᐊᕈᒪ.

¹⁹ ᕿᑐᕐᖓᑯᓗᒃᑲ, ᐊᓈᓇᐅᔪᑎᑐᑦ ᐃᒃᐱᒍᓱᒐᒪ ᓲᕐᓗ ᐃᕐᓂᓱᒃᑐᑐᑦ, ᐋᓐᓂᐊᕈᑎᒋᕙᑦᓯ, ᙭ᔅᑑᓯᐅᑉ ᐃᓅᓯᖓᓂᒃ ᐃᓅᓕᓚᐅᖏᓐᓂᑦᓯᓐᓂ.

²⁰ ᒫᓐᓇ ᓇᔪᕈᒪᓪᓚᕆᒃᑲᓗᐊᕐᐸᑦᓯ ᐊᑦᔨᒋᓐᖏᑕᖓᓂᒃ ᐱᐅᓯᖃᕐᕕᒋᔪᓐᓇᓪᓚᕆᓕᕋᑦᓯ, ᐃᓱᒫᓘᑎᖃᓪᓚᕆᓕᕋᒪ ᐃᓕᑦᓯᓐᓂᒃ.

ᕼᐂᒐᐅᑉ ᓵᕋᐅᓪᓗ ᐊᑦᔨᐅᑎᑕᐅᓂᖏᒃ

²¹ ᐊᐱᕆᓚᐅᕐᓚᑦᓯ ᐱᖁᔭᓄᑦ ᐊᐅᓚᑕᐅᔪᒪᔪᓯ, ᐱᖁᔧᑦ ᑐᓴᕐᓯᒪᖏᓐᓇᑦᓯᐅᒃ?

²² ᐅᖃᕐᓯᒪᖕᒪᑕ ᐂᑉᕋᕼᐋᒻᒎᖅ ᐃᕐᓂᖃᓚᐅᕐᐳᖅ ᒪᕐᕉᖕᓂᒃ, ᐂᑉᐸᖓ ᓯᐊᓛᒃᑯᑦ ᐃᕐᓂᖓ, ᐂᑉᐸᖓᓕ ᓯᐊᓛᖑᖏᑦᑐᒃᑯᑦ ᐃᕐᓂᖓ.

²³ ᐃᕐᓂᖓᓗ ᓯᐊᓛᒃᑯᑦ ᐃᕐᓂᐊᖑᓚᐅᕐᑐᖅ ᑎᒥᐅᑉ ᐱᔪᒪᔭᖓ ᒪᓕᒡᓗᒍ ᐃᕐᓂᕐᑖᕆᓚᐅᕐᐹ, ᓯᐊᓛᖑᖏᑦᑐᒃᑯᓪᓕ ᐃᕐᓂᕐᑖᖓ ᐃᕐᓂᐊᖑᓚᐅᕐᐳᖅ ᐊᖏᕐᓯᒪᓂᒃᑯᑦ.

²⁴ ᑖᒃᑯᐊᒃ ᑐᑭᓯᑦᔪᑎᒃᓴᐅᔪᓐᓇᕐᐴᒃ: ᐊᕐᓈᒃ ᒪᕐᕉᒃ ᑐᑭᖃᕈᓐᓇᕐᒪᑎᒃ ᐊᖏᕐᓯᒪᓃᖕᓂᒃ ᒪᕐᕉᖕᓂᒃ. ᖃᖅᑲᒥ ᓮᓁᒥ ᐊᖏᖃᑎᒌᒍᑕᐅᓚᐅᕐᑐᒥᒃ ᓴᖅᑭᑎᑦᓯᔪᖅ ᑖᓐᓇ ᕿᑐᕐᖓᕐᑖᕐᓯᒪᕗᖅ ᓯᐊᓛᖑᓪᓗᓂ; ᐂᒐᕐ.

²⁵ ᐂᒐᕐ ᖃᖅᑲᒥ ᓮᓁᒥ ᐱᓂᐊᓂᐅᓯᒪᔪᒥᒃ ᑐᑭᖃᕐᐳᖅ ᐊᕅᐱᐊᒥᒃ; ᑖᓐᓇᓗ ᑐᑭᖃᕐᐳᖅ ᔨᕉᓴᓕᐅᑉ ᐃᒡᓗᒐᓴᒡᔪᐊᖏᓐᓂᒃ ᐅᓪᓗᒥ, ᑎᒍᔭᐅᓯᒪᓪᓗᑎᒃ ᓯᐊᓛᕆᔭᐅᔪᓂᒃ.

²⁶ ᕿᓚᖕᒥᓕ ᔨᕉᓴᓕᐅᔪᒫᕐᑐᖅ ᕿᓚᒃᓱᕐᑕᐅᓯᒪᓐᖏᓚᖅ, ᑖᓐᓇᓗ ᑕᕝᕙ ᐊᓈᓇᒋᕙᕗᑦ.

²⁷ ᐊᒡᓔᑦ ᑎᑎᕋᕐᓯᒪᖕᒪᑕ, “ᐊᕐᓈᖅ ᕿᑐᕐᖏᓱᐃᑦᑐᑎᑦ ᖁᕕᐊᓱᒋᑦ; ᕾᒐᓛᕐᓗᑎᑦ ᓂᓪᓕᐊᒋᑦ, ᐃᕐᓂᓱᖕᓂᕐᒧᑦ ᐋᓐᓂᐊᓚᐅᕐᓯᒪᖏᑦᑐᑎᑦ; ᐊᕐᓇᖅ ᑐᓄᑕᐅᓯᒪᔪᕕᓂᖅ ᕿᑐᕐᖏᐅᕐᓂᕐᓴᐅᖕᒪᑦ ᐊᕐᓇᐅᖃᑎᒥᓂᑦ ᐅᐃᒥᓄᑦ ᕿᒪᒃᑕᐅᓚᐅᕐᓯᒪᖏᑦᑐᒥᑦ.”

²⁸ ᑕᕝᕙᓕ, ᐅᒃᐱᕐᑑᖃᑎᒃᑲ, ᐂᓴᑭᑐᑦ ᕿᑐᕐᖓᐅᕗᓯ ᐊᖏᕐᓯᒪᓂᒃᑯᑦ.

²⁹ ᑍᑦᓱᒪᓂ ᑎᒥᐅᑉ ᐱᔪᒪᔭᖓ ᐊᑐᕐᓗᒍ ᐃᕐᓂᕐᑖᖑᓚᐅᕐᑑᑉ ᐊᓂᕐᓂᒃᑯᑦ ᐃᕐᓂᕐᑖᕆᔭᐅᓯᒪᔪᖅ ᐊᑭᕋᕐᑐᓚᐅᕐᒪᒍ, ᒫᓐᓇᑦᑕᐅᖅ ᑍᒤᑦᑑᒋᕗᖅ.

³⁰ ᖃᓄᕐᓕ ᐊᒡᓔᑦ ᐅᖃᕐᐸ? “ᐊᕐᓇᖅ ᓯᐊᓛᖑᔪᖅ ᐃᕐᓂᖓᓗ ᐊᐅᓪᓚᕐᑎᑕᐅᓕᒃ; ᓯᐊᓛᑉ ᐃᕐᓂᖓ ᐊᑖᑕᒥ ᐱᖏᓐᓂᒃ ᑭᖑᕐᖑᔨᖃᑦᑕᐅᓂᐊᖏᒻᒪᑦ ᓯᐊᓛᖑᖏᑦᑑᑉ ᐃᕐᓂᖓᓄᑦ.”

³¹ ᑍᒤᒻᒪᑦ ᐅᒃᐱᕐᑑᖃᑎᒃᑲ, ᐊᕐᓇᒧᑦ ᓯᐊᓛᒧᑦ ᕿᑐᕐᖓᕆᔭᐅᓐᖏᓚᒍᑦ ᓯᐊᓛᖑᖏᑦᑐᒧᓪᓕ.