ᒐᓔᑎᐊᒥᐅᓄᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᖁᔭᓪᓘᓐᓃᑦ ᐅᒃᐱᕐᓂᕐᓘᓐᓃᑦ

¹ ᒐᓔᑎᐊᒥᐅᖑᔪᓯ ᓯᓔᑦᑑᕗᓯ! ᑭᓇᒧᑦ ᐊᖓᒃᑯᕐᑕᐅᓐᓂᕐᐱᓰ? ᑐᑭᓯᑦᓯᐊᓚᐅᕋᓗᐊᕋᑦᓯ ᔩᓱᓯ ᙭ᔅᑑᓯᐅᑉ ᓴᓐᓂᖓᔪᓕᖕᒥ ᑐᖁᑕᐅᓚᐅᕐᓂᖓᓂᒃ.

² ᐊᑕᐅᓯᕐᒥᒃ ᑐᑭᓯᑎᑕᐅᔪᒪᓕᕐᐳᖓ ᐃᓕᑦᓯᓐᓄᑦ, ᒎᑎᐅᑉ ᐊᓂᕐᓂᖓᓂᒃ ᐱᑎᑕᐅᓚᐅᕐᐱᓰ? ᐱᖁᔭᓂᒃ ᒪᓕᖕᓂᑦᓯᓐᓄᑦ, ᐅᕝᕙᓗ ᐅᒃᐱᕐᓂᑦᓯᓐᓄᑦ ᐅᖃᐅᓯᕐᓂᒃ ᑐᓴᕐᑕᑦᓯᓐᓂᒃ?

³ ᖃᓄᐃᒻᒪᑦ ᓯᓔᑦᑐᒻᒪᕆᐊᓘᕕᓯ? ᒎᑎᐅᑉ ᐊᓂᕐᓂᖓᓄᑦ ᐱᒋᐊᓚᐅᕐᐳᓯ, ᒫᓐᓇᓕ ᑎᒥᐅᑉ ᐱᓇᓱᐊᕐᓂᖓᓄᑦ ᐱᔭᕇᕋᓱᐊᓕᕐᐱᓰ?

⁴ ᐃᒃᑯᐊᓕ ᖃᐅᔨᓚᐅᕐᑕᓯ ᐊᑑᑎᖃᕐᓂᖏᑦᑑᑦ? ᐊᑑᑎᓕᐅᒐᓗᐊᓂᒃᑯᐊ ᐃᓕᑦᓯᓐᓄᑦ.

⁵ ᒎᑎᐅᑉ ᐊᓂᕐᓂᕐᒥᓂᒃ ᑐᓂᓯᕕᒋᓪᓗᓂᓯ ᑲᒪᓇᕐᑐᓕᓂᕐᒥᓂᒃ ᑕᑯᑎᓚᐅᕐᐹᓯ ᐱᖁᔭᓂᒃ ᒪᓕᑦᓯᐊᕐᓂᑦᓯᓐᓅᑦ ᐅᕝᕙᓗ ᐅᒃᐱᕐᓂᑦᓯᓐᓄᑦ ᐅᖃᐅᓯᕐᓂᒃ ᑐᓴᕐᑕᑦᓯᓐᓂᒃ?

⁶ ᐂᑉᕋᕼᐋᒻ ᑐᑭᓯᑦᔪᑎᒋᓚᐅᕐᓯᐅᒃ, ᐅᖃᐅᓯᐅᓯᒪᖕᒪᑦ, “ᒎᑎ ᐅᒃᐱᕆᕚ, ᑕᒪᑐᒧᖓ ᒎᑎᐅᑉ ᐃᓗᐊᕐᑑᓂᕋᓚᐅᕐᐹ.”

⁷ ᑕᕝᕙ ᖃᐅᔨᔪᒃᓴᐅᕗᓯ, ᐅᒃᐱᕐᓂᕐᒥᒃᑎᒍᑦ ᑖᒃᑯᐊ ᐂᑉᕋᕼᐋᒻᒧᑦ ᑭᖑᕚᖑᖕᒪᑕ.

⁸ ᐊᒡᓔᑦ, ᓯᕗᓂᒃᓴᒥᒃ ᓇᓗᓁᕐᓯᓚᐅᕐᒪᑕ ᔫᑎᐅᖏᑦᑐᑦ ᒎᑎᐅᑉ ᐸᓯᔭᒃᓴᐅᔪᓐᓃᕐᑎᑦᓱᒫᕐᒪᒋᑦ ᐅᒃᐱᕐᓂᖏᑎᒍᑦ, ᑍᒤᒻᒪᑦ ᐂᑉᕋᕼᐋᒻ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᕐᕕᐅᔭᕇᕐᓂᕐᐳᖅ ᓯᕗᓂᖓᒍᑦ, ᐃᒫᒃ, “ᐃᕝᕕᑦ ᐊᖅᑯᑎᒋᓗᑎᑦ ᐃᓅᖃᑎᒌᒡᔪᐊᓕᒫᑦ ᓮᒻᒪᕐᑎᑕᐅᔪᒫᕐᐳᑦ.”

⁹ ᐂᑉᕋᕼᐋᒻ ᐅᒃᐱᕐᒪᑦ ᓮᒻᒪᕐᑕᐅᓚᐅᕐᐳᖅ; ᑍᒫᒃᑕᐅᖅ ᐅᒃᐱᕐᑐᓕᒫᑦ ᓮᒻᒪᕐᑎᑕᐅᓯᒪᔪᒥᒃ ᐃᓅᓯᖃᕆᕗᑦ ᐂᑉᕋᕼᐋᒻᑎᑐᑦ.

¹⁰ ᐱᖁᔧᓪᓕ ᒪᓕᑦᓯᐊᕐᑕᐅᔭᕆᐊᖃᕐᓂᖏᓐᓂᒃ ᑕᑎᖃᕐᓗᑎᒃ ᐃᓅᔪᑦ ᐃᓅᓯᖃᕐᐳᑦ ᒎᑎᒧᑦ ᓇᕐᕈᒋᔭᐅᔪᒦᑦᑐᒥᒃ; ᑎᑎᕋᕐᓯᒪᔪᖃᕐᒪᑦ, “ᐱᖁᔧᑦ ᒪᓕᒃᑕᐅᖁᔭᖏᓐᓂᒃ ᑎᑎᕋᕐᓯᒪᔪᓂᒃ ᒪᓕᑦᓯᐊᕈᓐᓇᖏᑦᑐᑦ ᑕᒪᕐᒥᒃ ᒎᑎᒧᑦ ᓇᕐᕈᓇᕐᑐᒦᑉᐳᑦ.”

¹¹ ᑕᕝᕙ ᓇᓗᓇᕈᓐᓃᕐᐳᖅ ᐸᓯᔭᒃᓴᐅᔪᓐᓃᕐᑐᖃᕈᓐᓇᖏᓐᓂᖓᓂᒃ ᐱᖁᔭᑎᒍᑦ; ᐅᖃᕐᓯᒪᔪᖃᕐᒪᑦ, “ᐃᓗᐊᕐᑐᓕᔪᖅ ᐃᓅᔪᒫᕐᐳᖅ ᐅᒃᐱᕐᓂᕐᒥᓄᑦ.”

¹² ᐱᖁᔭᓪᓕ ᐅᒃᐱᕐᓂᒃᑯᑦ ᐱᓐᖏᓚᑦ, ᐅᖃᕐᓯᒪᖕᒪᑦ, “ᑍᒤᓕᐅᕈᓂ ᒪᓕᑦᑎᐊᕋᓱᐊᕐᓂᕆᔭᓂ ᐃᓅᑦᔪᑎᒋᓂᐊᕐᐹ.”

¹³ ᙭ᔅᑑᓯᐅᑉ ᐱᐅᓕᓚᐅᕐᐹᑎᒍᑦ ᐱᖁᔧᑦ ᐱᐅᖏᑦᑐᐊᓘᓂᕅᓂᖓᓂᑦ, ᑖᑦᓱᒪ ᐱᑦᔪᑎᒋᓪᓗᑕ ᐱᐅᖏᑦᑐᐊᓘᓂᕋᕐᑕᐅᓂᖓᓄᑦ; ᐅᖃᕐᓯᒪᔪᖃᕐᒪᑦ, “ᓇᐹᕐᑐᒥ ᓂᕕᓐᖓᕐᑕᐅᔪᑦ ᑕᒪᕐᒥᒃ ᒎᑎᒧᑦ ᐱᐅᖏᑦᑐᐊᓘᓂᕋᕐᑕᐅᕗᑦ.”

¹⁴ ᑕᕝᕙ ᙭ᔅᑑᓯ ᔩᓱᓯᒃᑯᑦ ᐂᑉᕋᕼᐋᒻ ᓮᒻᒪᕐᑎᑕᐅᓯᒪᓂᖓ ᔫᑎᐅᖏᑦᑐᓄᑦᑕᐅᖅ ᐱᔭᐅᔪᓐᓇᕐᓯᖁᓪᓗᒍ, ᐅᕙᒍᑦᑕᐅᖅ ᐅᒃᐱᕐᓂᑦᑎᒍᑦ ᒎᑎᐅᑉ ᐊᖏᕈᑎᒋᓯᒪᔭᖓᓂᒃ ᐊᓂᕐᓂᕐᒥᒃ ᐱᑎᑕᐅᖁᓪᓗᑕ.

ᐱᖁᔧᓪᓗ ᒎᑎᐅᓪᓗ ᐊᖏᕐᓯᒪᓂᖓ

¹⁵ ᙭ᔅᑑᓯᒥᐅᑕᐅᖃᑎᒃᑲ, ᐃᓅᓯᑦᑎᓐᓂ ᐊᑐᕐᐸᒃᑐᒥᒃ ᐊᑦᔨᐅᑎᑦᓯᓂᐊᕐᐳᖓ; ᐃᓅᒃ ᒪᕐᕉᒃ ᐊᖏᖃᑎᒌᑐᐊᕋᒥᒃ, ᐊᖏᖃᑎᒌᒍᑎᒥᖕᓂᒃ ᐊᑎᓕᐅᓲᖑᖕᒪᑎᒃ, ᑖᓐᓇ ᐊᖏᖃᑎᒌᖕᓂᖓᑦ ᓯᖁᒥᑕᐅᔪᓐᓇᖏᒻᒪᑦ ᐃᓚᔭᐅᔪᓐᓇᕋᓂᓗ.

¹⁶ ᑍᒫᒃ ᒎᑎ ᐊᖏᕐᓯᒪᕗᖅ ᐂᑉᕋᕼᐋᒻᒧᑦ ᑭᖑᕚᖓᓄᓪᓗ. ᐅᖃᕐᓯᒪᖏᒻᒪᑦ, “ᑭᖑᕚᖏᓐᓄᑦ,” ᐅᓄᕐᑐᓄᑦ ᑐᑭᖃᕐᓗᓂ; ᑭᓯᐊᓂᓕ ᐅᖃᖔᕐᐳᖅ “ᑭᖑᕚᖓᓄᑦ,” ᐊᑕᐅᓯᕐᒥᒃ ᐅᖃᐅᓯᖃᕐᓗᓂ, ᓇᓗᓇᓐᖏᓚᖅ ᙭ᔅᑑᓯᒥᒃ ᐅᖃᕐᓯᒪᖕᒪᑕ.

¹⁷ ᐃᒫᒃ ᐅᖃᕋᓱᐊᕐᐳᖓ; ᒎᑎ ᐊᖏᖃᑎᖃᓚᐅᕐᑐᖅ ᐂᑉᕋᕼᐋᒥᒃ ᐊᖏᕈᑎᖃᕐᓯᒪᓪᓗᓂᓗ ᓴᖑᑎᑦᔮᖏᓐᓂᕋᕐᓗᒍ, ᐱᖁᔧᑦ ᑐᓂᔭᐅᓚᐅᕐᑐᑦ 430 ᐊᕐᕌᒍᐃᑦ ᓈᓯᒪᓕᕐᑎᓪᓗᒋᑦ, ᐊᖏᖃᑎᒌᒍᑕᐅᓯᒪᔪᒥᒃ ᓯᖁᒥᑦᓯᔪᓐᓇᖏᒻᒪᑕ ᒎᑎᐅᓪᓗ ᐊᖏᕈᑎᒋᓯᒪᔭᖓᓂᒃ ᑎᑎᕋᕐᓯᒪᔪᓂᒃ ᐊᑐᕈᓐᓃᕐᑎᑦᓯᔪᓐᓇᕋᑎᒃ.

¹⁸ ᒎᑎᐅᓪᓕ ᑭᖑᕐᖑᑎᔭᒃᓴᐅᖁᔭᖓ ᐱᖁᔭᑎᒍᑦ ᑭᓯᐊᓂ ᐱᔭᐅᔪᓐᓇᕐᐸᑦ, ᐊᖏᖃᑎᒌᒍᑎᒃᑯᑦ ᐱᔭᒃᓴᐅᒐᔭᓐᖏᓚᖅ; ᒎᑎᐅᓪᓕ ᑐᓂᓚᐅᕐᐹ ᐂᑉᕋᕼᐋᒻᒧᑦ ᐊᖏᖃᑎᒌᒍᑎᒃᑯᑦ.

¹⁹ ᓱᖕᒪᓪᓕ ᐱᖁᔭᕐᑕᖃᕐᐸ? ᑖᒃᑯᐊᓕ ᐃᓚᓕᐅᑦᔭᐅᓯᒪᕗᑦ ᐱᐅᖏᑦᑐᓕᓂᖅ ᖃᐅᔨᒪᔭᐅᖁᓪᓗᒍ, ᑐᓂᑦᔪᑕᐅᓯᒪᓂᖏᑦ ᐊᑑᑎᒃᓴᖃᓚᐅᕐᐳᑦ ᐂᑉᕋᕼᐋᒻ ᑭᖑᕚᒃᓴᖓ ᑎᑭᖏᓐᓂᖓᓂ ᑖᑦᓱᒧᖓ ᐊᖏᕈᑕᐅᓯᒪᔪᖅ ᑐᕌᖓᖕᒪᑦ; ᐱᖁᔧᑦ ᑐᓂᔭᐅᓚᐅᕐᐳᑦ ᐂᖏᓕᒃᑯᑦ ᐃᓄᒃ ᐊᖅᑯᓯᐅᑎᔭᐅᓪᓗᓂ ᑐᓂᔭᐅᓪᓗᑎᒃ.

²⁰ ᐊᖅᑯᓵᒐᕐᑕᖃᕈᓐᓇᕐᐳᕐᓕ ᐃᓄᖕᒧᑦ ᐊᑕᐅᓯᐅᖏᑦᑐᒧᑦ ᐱᓇᓱᐊᕐᓗᓂ; ᒎᑎᓕ ᐊᑕᐅᓯᐅᕗᖅ ᑍᒤᓕᐅᕐᑐᖅ.

ᐱᖁᔧᑦ ᐊᑐᕐᑐᒃᓴᓕᐊᖑᓂᖏᑦ

²¹ ᑍᒪᓕ ᐱᖁᔧᑦ ᐊᑭᕋᕐᑐᕐᐹᑦ ᒎᑎᐅᑉ ᐊᖏᕈᑎᒋᓯᒪᔭᖏᓐᓄᑦ? ᑍᒤᓐᖏᓚᖅ; ᐃᓄᐃᑦ ᐱᖁᔭᓂᒃ ᐱᑎᑕᐅᓚᐅᕐᐸᑕ ᐃᓅᓯᖃᕐᓇᕐᑐᓂᒃ, ᐃᓗᐊᕐᑐᓐᖑᕈᓐᓇᕋᔭᓚᐅᕐᐳᑦ ᒪᓕᑦᓯᐊᕐᓂᕐᒥᖕᓄᑦ ᐱᖁᔭᓂᒃ.

²² ᐊᒡᓔᑦ ᓇᓗᓁᕐᓯᕗᑦ, ᐃᓘᓐᓇᑎᒃ ᐊᔪᕐᓂᕐᒧᑦ ᐱᑎᑕᐅᓯᒪᓂᖏᓐᓂᒃ, ᑍᒤᒻᒪᑦ ᐊᖏᕈᑕᐅᓯᒪᔪᖅ ᑐᓐᖓᕕᖃᕐᑐᖅ ᐅᒃᐱᕐᓂᒃᑯᑦ ᔩᓱᓯ ᙭ᔅᑑᓯᒧᑦ ᑐᓂᔭᐅᔪᓐᓇᖁᓪᓗᒍ ᐅᒃᐱᕐᑐᓄᑦ.

²³ ᐅᒃᐱᕐᓂᒃᑯᓪᓕ ᑲᔪᓯᓂᖅ ᐊᑐᓕᓚᐅᕐᑎᓐᓇᒍ, ᐱᖁᔭᓄᑦ ᑎᒍᔭᐅᓯᒪᔪᑎᑐᑦ ᐊᔪᓕᕐᑎᑕᐅᓯᒪᓚᐅᕐᐳᒍᑦ, ᐅᒃᐱᕐᓂᒃᑰᕆᐊᖃᕐᓂᐅᑉ ᓴᖅᑭᑎᑕᐅᕕᐊ ᑎᑭᓪᓗᒍ.

²⁴ ᑕᕝᕙ ᐱᖁᔭᑦ ᐅᕙᑦᑎᓐᓂᒃ ᐊᐅᓚᑦᓯᓚᐅᕐᐳᑦ ᙭ᔅᑑᓯ ᑎᑭᓚᐅᕐᑎᓐᓇᒍ, ᐅᒃᐱᕐᓂᒃᑯᑦ ᐸᓯᔭᒃᓴᐅᔪᓐᓃᕈᓐᓇᖁᓪᓗᑕ.

²⁵ ᒫᓐᓇᓕ ᐅᒃᐱᕐᓂᑰᕐᓂᖅ ᑎᑭᒻᒪᑦ, ᐱᖁᔭᓄᑦ ᐊᔪᓕᕐᑎᑕᐅᓯᒪᓗᑕ ᐱᓯᒪᔭᐅᔪᓐᓃᕐᐳᒍᑦ.

²⁶ ᙭ᔅᑑᓯ ᔩᓱᓯᒃᑯ ᑕᒪᑦᓯ ᒎᑎᐅᑉ ᕿᑐᕐᖓᕆᕚᓯ, ᐅᒃᐱᕐᓂᑦᓯᒃᒍᑦ

²⁷ ᐅᓄᕐᑑᓪᓗᓯ ᙭ᔅᑑᓯᒃᑯᑦ ᐹᑉᑎᑕᐅᓯᒪᔪᓯ ᐊᑎᑎᑕᐅᓯᒪᕗᓯ ᙭ᔅᑑᓯᒥᒃ.

²⁸ ᑖᑦᓱᒪᓂᓗ ᔫᑎᐅᒍᕕᑦ ᒍᕇᑭᐅᒍᕕᓪᓘᓐᓃᑦ, ᓯᐊᓛᖑᒍᕕᑦ ᓯᐊᓛᖑᖏᒃᑯᕕᓪᓘᓐᓃᑦ, ᐊᖑᑕᐅᒍᕕᑦ ᐊᕐᓇᐅᒍᕕᓪᓘᓐᓃᑦ; ᑕᒪᑦᓯ ᐊᑕᐅᓯᐅᕗᓯ ᙭ᔅᑑᓯ ᔩᓱᓯᒥ.

²⁹ ᑕᕝᕙ ᙭ᔅᑑᓯᒥᐅᑕᐅᒍᕕᑦ, ᐂᑉᕋᕼᐋᒻᒧᑦ ᑭᖑᕚᕆᔭᐅᓕᕐᐳᑎᑦ, ᐊᖏᕈᑕᐅᓯᒪᔪᒥᒡᓗ ᑭᖑᕐᖑᑦᔨᖃᑕᐅᔪᒫᓕᕐᐳᑎᑦ.