ᒐᓔᑎᐊᒥᐅᓄᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᒋᐊᕈᑎᑦ

¹ ᐸᐅᓗᓯᒥᑦ ᐋᐴᓯᑕᓕᓐᖑᕐᑎᑕᐅᓯᒪᔪᒥᑦ ᐃᓄᖕᓂᐅᖏᑦᑐᖅ ᐃᓄᒃᑎᒎᖏᑦᑐᕐᓘᓐᓃᑦ, ᔩᓱᓯ ᙭ᔅᑑᓯᒥᓪᓕ ᒎᑎᒥᓪᓗ ᐊᑖᑕᒥᑦ, ᑖᓐᓇ ᔩᓱᓯᒥᒃ ᒪᑭᑎᑦᓯᓚᐅᕐᑐᖅ ᑐᖁᖓᔪᓂᑦ.

² ᙭ᔅᑑᓯᒥᐅᑕᐅᖃᑎᒌᓕᒫᓪᓗ ᓇᔪᕐᑎᒋᔭᒃᑲ, ᐃᓚᒋᓪᓗᒋᑦ ᓂᓪᓕᐅᑦᔨᕗᒍᑦ ᐅᒃᐱᕐᑑᖃᑎᒌᓄᑦ ᒐᓔᑎᐊᒦᑦᑐᓄᑦ:

³ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᓄᑦ ᑐᓂᓯᕕᐅᒋᑦᓯ ᓮᓕᑦᓯᐊᕐᓂᕐᒥᒃ ᒎᑎᒥᑦ ᐊᑖᑕᑦᑎᓐᓂᑦ ᐊᑕᓂᕐᒥᓪᓗ ᔩᓱᓯ ᙭ᔅᑑᓯᒥᑦ.

⁴ ᑖᓐᓇ ᐃᒻᒥᓂᒃ ᑐᓂᓚᐅᕐᐳᖅ ᐊᔪᕐᓂᑦᑎᓐᓂᑦ ᐱᐅᓕᔪᒪᓪᓗᑕ ᒫᓐᓇ ᐱᐅᖏᑦᑐᒥᑦ ᐊᑐᕐᑕᑦᑎᓐᓂᑦ, ᒎᑎᐅᑉ ᐊᑖᑕᑦᑕ ᐱᖁᔨᓂᖓᒍᑦ;

⁵ ᑖᓐᓇ ᓂᕐᑐᕐᑕᐅᓕ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ. ᐋᒥᓐ.

ᐅᖃᐅᓰᑦ ᑐᓴᕈᒥᓇᕐᑐᑦ ᐊᑕᐅᓯᐅᓂᖓ

⁶ ᑲᒪᓂᐊᕈᑎᒋᕙᑦᓯ ᕿᒤᓯᒪᓕᕇᕋᑦᓯ ᕾᖁᔭᐅᓂᕆᓚᐅᕐᑕᑦᓯᓐᓂᒃ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᒍᑦ ᐊᓯᖏᓐᓂᒡᓗ ᐅᖃᐅᓯᕐᓂᒃ ᑐᓴᕈᒥᓇᕐᑑᓂᕋᕐᑕᐅᖕᒥᔪᓂᒃ ᐃᓚᓕᐅᕐᓯᓪᓗᓯ.

⁷ ᐅᖃᐅᓰᑦ ᑐᓴᕈᒥᓇᕐᑐᑦ ᐊᓯᖃᓐᖏᒃᑲᓗᐊᕐᑎᓪᓗᒋᑦ, ᐃᓄᖃᑎᑦᓯᓕ ᐃᓚᖏᓐᓄᑦ ᐃᓱᒪᔮᕐᑎᑕᐅᕗᓯ ᙭ᔅᑑᓯᒥ ᑐᓴᕈᒥᓇᕐᑐᑦ ᓇᕐᕈᓇᕐᓯᑎᓐᓇᓱᐊᕐᓗᒋᑦ.

⁸ ᐅᕙᒍᓪᓘᓐᓃᑦ, ᐂᖏᓕᒥᒡᓘᓐᓃᑦ ᕿᓚᖕᒥᑦ ᑎᑭᑦᑐᖃᕐᓗᓂ, ᐊᔪᕆᕐᑐᐃᔪᖃᕋᔭᕐᐸᑦ ᐃᓕᑦᓯᓐᓄᑦ ᐊᔪᕆᕐᑐᐃᑦᔪᑎᒋᓯᒪᔭᑦᑎᓐᓄᑦ ᐊᑭᕋᕐᑐᕐᑐᓂᒃ, ᑍᒫᒃ ᐊᔪᕆᑦᑐᐃᔪᑦ ᐃᒋᑕᒃᓴᓐᖑᕐᑐᒃᓴᐅᕗᖅ.

⁹ ᓯᕗᓂᖓᒍᑦ ᐅᖃᓚᐅᕐᓯᒪᒐᓗᐊᕐᑐᒍᑦ, ᒫᓐᓇ ᐅᖃᒃᑲᓐᓂᓕᕆᕙᕋ, ᐊᔪᕆᕐᑐᐃᔪᖃᕐᐸᑦ ᐅᖃᐅᓯᕐᓄᑦ ᑐᓴᕈᒥᓇᕐᑐᓄᑦ ᐃᓚᓕᐅᓚᐅᕐᑕᑦᓯᓐᓄᑦ ᐊᑭᕋᕐᑐᕐᑐᓂᒃ, ᑖᓐᓇ ᐃᒋᑕᒃᓴᓐᖑᕐᑐᒃᓴᐅᕗᖅ.

¹⁰ ᑍᒤᓕᐅᕐᐳᖔ ᐃᓄᖕᓄᑦ ᓈᒻᒪᒋᔭᐅᓇᓱᐊᕐᑐᑎᑐᑦ ᒎᑎᒧᓪᓘᓐᓃᑦ ᓈᒻᒪᒋᔭᐅᓇᓱᐊᕐᑐᑎᑐᑦ? ᐃᓄᖕᓂᒡᓘᓐᓃᑦ ᖁᕕᐊᓱᒃᑎᑦᓯᓇᓱᐊᕐᐳᖔ? ᓱᓕ ᐃᓄᖕᓂᒃ ᖁᕕᐊᓱᒃᑎᑦᓯᓇᓱᐊᕋᔭᕈᒪ, ᙭ᔅᑑᓯᒧᑦ ᐱᔨᒋᔭᐅᒐᔭᓐᖏᓚᖓ.

ᐸᐅᓗᓯᐅᑉ ᐋᐴᓯᑕᓕᓐᖑᕐᑎᑕᐅᓯᒪᓂᖓ

¹¹ ᖃᐅᔨᒪᖁᕙᑦᓯ, ᙭ᔅᑑᓯᒥᐅᑕᐅᖃᑎᒃᑲ, ᐅᖃᐅᓰᑦ ᑐᓴᕈᒥᓇᕐᑐᑦ ᐊᔪᕆᕐᑐᐃᑦᔪᑎᒋᓯᒪᔭᒃᑲ ᐃᓄᖕᓂᑦ ᐱᒋᐊᕐᑎᑕᐅᓯᒪᓐᖏᓚᑦ.

¹² ᐃᓄᖕᒥᑦ ᓇᓪᓕᐊᓐᓂᓪᓘᓐᓃᑦ ᐱᓯᒪᓐᖏᓚᒃᑲ, ᐃᓄᖕᒥᓪᓘᓐᓃᑦ ᐊᔪᕆᕐᑐᐃᑦᔪᑕᐅᓚᐅᓐᖏᓚᑦ ᐅᕙᓐᓄᑦ, ᔩᓱᓯ ᙭ᔅᑑᓯᐅᓪᓕ ᑕᑯᑎᑦᓯᑦᔪᑎᒋᓯᒪᕔᑦ ᐅᕙᓐᓄᑦ.

¹³ ᖁᓚᕐᓇᓐᖏᓚᖅ ᑐᓴᐅᒪᒐᑦᓯ ᐃᓅᓯᕆᓚᐅᕐᑕᓐᓂᒃ ᔫᑎᑦ ᐅᒃᐱᕐᓂᖓᓄᑦ ᐃᓚᒋᔭᐅᓪᓚᕆᒃᑎᓪᓗᖓ. ᒎᑎᐅᑉ ᐅᒃᐱᕐᑐᖁᑎᖏᑦ ᐊᑭᕋᕐᑐᓚᐅᕋᒃᑭᑦ ᓂᑲᒋᓇᒋᑦ ᐊᒃᓱᕉᑎᓪᓗᒋᑦ ᓄᖅᑲᕐᑎᓐᓇᓱᓚᐅᕐᐸᒃᑲ;

¹⁴ ᔫᑎᓂᓪᓗ ᑍᒤᓪᓗᐊᖃᑎᒋᔭᓐᓂᑦ ᐃᓕᓯᒪᓂᕐᓴᐅᓚᐅᕐᐳᖓ ᔫᑎᑦ ᐅᒃᐱᕐᓂᖓᓐᓂᒃ, ᓯᕗᓕᕕᓂᑦᑕᓗ ᐅᒃᐱᕐᓂᕐᒥ ᐱᐅᓯᕕᓂᖏᑦ ᓯᕐᓂᒋᓂᕐᓴᕆᓚᐅᕐᐸᒃᑲ.

¹⁵ ᒎᑎᐅᓪᓕ ᓂᕈᐊᕐᓯᒪᓚᐅᕐᐹᖓ ᐃᓅᓕᓚᐅᕐᑎᓐᓇᖓ ᓱᓕ, ᐱᑦᓯᐊᕐᓂᒥ ᐱᔪᓐᓇᕐᑎᑦᓯᓂᕐᒥᒍᑦ ᕾᖁᓚᐅᕐᐹᖓ,

¹⁶ ᐃᕐᓂᕐᒥᓂᒡᓗ ᖁᕕᐊᓱᒡᓗᓂ ᑕᑯᑎᑦᓱᒪᓚᐅᕐᐹᖓ, ᐊᔪᕆᕐᑐᐃᔪᓐᓇᖁᓪᓗᖓ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᔫᑎᐅᖏᑦᑐᓄᑦ, ᑭᓇᒥᒡᓘᓐᓃᑦ ᑕᒪᑐᒥᖓ ᖃᐅᔨᓇᓱᒡᕕᖃᓚᐅᓐᖏᓚᖓ.

¹⁷ ᔨᕉᓴᓕᒻᒧᓪᓘᓐᓃᑦ ᐂᖅᑳᓚᐅᓐᖏᓚᖓ ᓯᕗᓪᓕᐅᓪᓗᑎᒃ ᐋᐴᓯᑕᓕᓐᖑᖅᑳᕐᑐᕕᓃᑦ ᑕᑯᔭᕐᑐᕐᓗᒋᑦ, ᐊᕅᐱᐊᒧᐊᓚᐅᕐᐳᖓᓕ; ᑭᖑᓂᖓᒍᓪᓗ ᑕᒫᓯᑰᓯᒧᑦ ᐅᑎᕆᓪᓗᖓ.

¹⁸ ᐊᕐᕌᒍᑦ ᐱᖓᓱᑦ ᐊᓂᒍᕐᓯᒪᓕᕐᒪᑕ ᑭᓯᐊᓂ ᔨᕉᓴᓕᒻᒧᑦ ᐂᓕᓚᐅᕐᐳᖓ ᓰᐸᓯᒥᒃ ᐳᓛᕆᐊᕐᓗᖓ, ᓇᔪᓚᐅᕐᐸᕋ ᐅᓪᓗᓂᒃ 15ᓂᒃ.

¹⁹ ᐋᐴᓯᑕᓕᐅᖃᑎᖏᓐᓂᒃ ᑕᑯᓚᐅᓐᖏᓚᖓ ᔧᒥᓯᐅᑉ ᐊᑕᓂᐅᑉ ᓄᑲᖓᑕ ᐊᓯᐊᓂᒃ.

²⁰ ᑎᑎᕋᕐᑕᒃᑲ ᐃᓕᑦᓯᓐᓄᑦ ᒎᑎᐅᑉ ᖃᐅᔨᒪᕔᑦ, ᓴᒡᓗᖏᓐᓇᒪ.

²¹ ᑭᖑᓂᖓᒍᑦ ᑕᕝᕙ ᓯᕆᐊᑉ ᑲᓂᖏᔭᖓᓃᓚᐅᑉᐳᖓ ᓯᓕᓯᐊᓪᓗ ᓄᓇᓕᖏᓐᓄᐊᓕᓚᐅᕐᐳᖓ.

²² ᓱᓕ ᑍᑦᓱᒪᓂ ᐅᒃᐱᕐᑑᖃᑎᒌᓄᑦ ᙭ᔅᑑᓯᒥ ᖃᐅᔨᒪᔭᐅᓚᐅᓐᖏᓚᖓ ᔫᑎᐊᒥ.

²³ ᐅᖃᐅᓯᑐᐃᓐᓇᕐᑎᒍᓪᓕ ᖃᐅᔨᒪᔭᐅᓚᐅᕐᐳᖓ ᐅᖃᕐᑐᖃᖃᑦᑕᓚᐅᕐᒪᑦ, “ᐅᕙᑦᑎᓐᓂᒃ ᐊᑭᕋᕐᑐᓚᐅᕐᑐᖅ ᒫᓐᓇ ᐊᔪᕆᕐᑐᐃᕙᓕᕆᕗᖅ ᐅᒃᐱᕐᓂᕐᒥᒃ ᓄᖅᑲᕐᑎᓐᓇᓱᐊᓚᐅᕐᑕᒥᓂᒃ.”

²⁴ ᑍᒤᒻᒪᑦ ᐅᕙᓐᓂᒃ ᐱᑦᔪᑎᖃᕐᓗᑎᒃ ᒎᑎᒥᒃ ᓂᕐᑐᐃᖃᑦᑕᕐᐳᑦ.