ᐄᓱᕋᐅᑉ ᐊᒡᓚᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᐄᓱᕋᐅᑉ ᖃᐅᔨᓂᖓ ᔫᑎᐅᖏᑦᑐᓂᒃ ᓄᓕᐊᓂᖃᑦᑕᕐᓂᖏᓐᓂᒃ

¹ ᑕᒪᒃᑯᐊᓕᒫᑦ ᐱᔭᕇᕐᑕᐅᑎᓪᓗᒋᑦ, ᐃᓴᕆᐊᓕᒥᐅᑦ ᐃᓄᖏᑦᑕ ᓯᕗᓕᕐᑎᖏᑦᑕ ᐃᓚᖏᓐᓄᑦ ᐅᖃᐅᑦᔭᐅᓚᐅᕐᐳᖓ ᐃᓄᐃᑦ, ᑐᓂᕐᕈᓯᕐᑎᑦᓯᔩᑦ, ᓕᕔᑏᓪᓗ ᐃᒻᒥᖕᓂᒃ ᐊᑦᔨᐅᖏᑦᑑᑎᓯᒪᖏᒻᒪᑕ ᐃᓄᖕᓂᑦ ᓯᓚᖅᑲᑎᒥᖕᓂᑦ ᐅᑯᓇᓐᖓᑦ ᐊᒧᓁᑎᒃᑯᓂᑦ, ᒧᐊᐱᒥᐅᓂᓪᓗ, ᐄᑦᔨᑉᑎᒥᐅᓂᓪᓗ, ᐅᑯᓇᓐᖓᓪᓗ ᑬᓇᓂᒥᐅᓂᑦ, ᕼᐃᑍᑎᒥᐅᓂᑦ, ᐱᕆᔧᑎᒥᐅᓂᑦ, ᔨᐳᓮᑎᒥᐅᓂᑦ, ᐊᒧᕅᑎᒥᐅᓂᓪᓗ. ᑖᒃᑯᐊ ᑍᒫᑦᓮᓐᓇᖅ ᐱᐅᖏᑦᑐᓂᒃ ᐃᓅᓯᖃᕐᒪᑕ ᐃᓅᖃᑎᖏᑕ ᐱᐅᓯᖏᑎᑐᑦ.

² ᐊᖑᑏᑦ ᔫᑎᑦ ᓄᓕᐊᓂᒃᓯᒪᖕᒪᑕ ᐃᓅᖃᑎᒃᓴᔭᕆᓐᖏᑕᒥᖕᓂᒃ ᐊᕐᓇᓂᒃ, ᒎᑎᐅᓪᓗ ᐃᓄᖁᑎᖏᑦ ᐃᑦᔪᕐᓁᑦᑐᑦ ᓱᕈᕐᑕᐅᓯᒪᖕᒪᑕ, ᓯᕗᓕᕐᑏᑦ ᐱᓇᓱᐊᕐᑏᓪᓗ ᐊᖓᔪᖅᑳᖏᑦ ᓱᕅᓂᕐᐸᐅᓯᒪᕗᑦ.

³ ᑕᒪᑐᒥᖓ ᑐᓴᕋᒪ, ᕿᒃᓵᖕᓂᕐᒧᑦ ᐊᓐᓄᕌᒃᑲ ᐊᓕᓚᐅᕐᐸᒃᑲ, ᓄᔮᕐᑐᓚᐅᕐᐳᖓ ᐅᒥᒃᑲᓗ ᓄᓱᓚᐅᕐᐸᒃᑲ, ᐃᖏᓪᓗᖓᓗ ᓯᖁᒥᑦᓯᐊᓚᐅᕐᐳᖓ ᕿᒃᓵᖕᓂᕐᒧᑦ.

⁴ ᑕᕝᕙᓂ ᐃᒃᓯᕔᓐᓇᓚᐅᕐᐳᖓ ᕿᒃᓵᒡᓗᖓ ᐅᓐᓄᒃᑯᑦ ᑐᓂᕐᕈᓯᕐᕕᐅᕙᒃᑐᖅ ᑎᑭᓪᓗᒍ, ᐃᓄᐃᓪᓗ ᑲᑎᑉᐸᓪᓕᐊᓕᓚᐅᕐᐳᑦ ᐊᕙᑎᓐᓄᑦ ᓯᕘᕋᔪᑦ ᐃᓴᕆᐊᓕᒥᐅᑦ ᒎᑎᖓᓂᒃ, ᐅᑎᕐᓯᒪᔪᑦ ᐊᔪᕐᑐᓕᓂᖏᑕ ᐅᖃᐅᓯᐅᓯᒪᓂᖏᑦ ᐱᓪᓗᒋᑦ.

⁵ ᐅᓐᓄᒃᑯᑦ ᑐᓂᕐᕈᓯᕐᓂᖅ ᓇᓪᓕᐅᑎᖕᒪᑦ, ᒪᑭᓚᐅᕐᐳᖓ ᕿᒃᓵᒡᕕᒋᔭᓐᓂᑦ, ᓱᓕ ᐊᓐᓄᕌᑦ ᐊᓕᒃᑐᓚᐅᕐᑕᒃᑲ ᐊᑐᕐᓗᒋᑦ, ᓰᖅᑯᓚᐅᕐᐳᖓ ᑐᒃᓯᐊᕐᓗᖓ ᐊᒡᒐᒃᑲᓗ ᐃᓵᓚᐅᕐᐸᒃᑲ ᐊᑕᓂᕐᒧᑦ ᒎᑎᓐᓄᑦ.

⁶ ᐅᖃᕐᓗᖓᓗ: “ᒎᑏᒃ, ᑲᓐᖑᓱᓗᐊᕐᐳᖓ ᐃᓕᕋᓱᒃᓗᖓᓗ ᐃᓕᖕᓄᑦ ᐋᕐᓗᕆᐊᒃᓴᖅ ᒎᑎᒐ, ᓵᖕᓂ ᐊᔪᕐᓂᕗᑦ ᐳᕐᑐᓂᕐᓴᐅᓕᕐᒪᑕ ᓂᐊᖁᑦᑎᓐᓂᑦ; ᐸᓯᔭᒃᓴᐅᓂᕗᓪᓗ ᐊᓪᓛᑦ ᑎᑭᐅᑎᕗᑦ ᕿᓚᖕᒧᑦ.

⁷ ᓯᕗᓕᑦᑕ ᐅᓪᓗᖏᓐᓂᑦ ᒫᓐᓇᒧᑦ, ᐅᕙᒍᑦ ᐃᓄᖁᑎᑎᑦ ᐊᔪᕐᑐᓕᓯᒪᕗᒍᑦ ᐊᖏᔪᒻᒪᕆᐊᓗᖕᒥᒃ, ᐸᓯᔭᒃᓴᐅᓂᕗᑦ ᐱᓪᓗᒋᑦ ᐊᖓᔪᖅᑳᕐᔪᐊᕗᑦ, ᑐᓂᕐᕈᓯᕐᑎᑦᓯᔨᕗᓪᓗ ᑎᒍᔭᐅᓚᕿᓯᒪᕗᑦ, ᐃᓅᖃᑎᒃᓴᔭᕆᓐᖏᑕᑦᑎᓐᓄᑦ ᐊᖓᔪᖅᑳᕐᔪᐊᓄᑦ, ᑐᖁᓴᕐᑕᐅᓯᒪᕗᒍᑦ, ᑎᒡᓕᒡᕕᐅᓯᒪᕗᒍᑦ, ᐊᐅᓪᓚᕈᑦᔭᐅᓯᒪᕗᒍᑦ ᑎᒍᔭᐅᓯᒪᔪᑎᑐᑦ, ᓇᕐᕈᓇᕐᓯᑎᑕᐅᓯᒪᕗᒍᑦ ᐅᓪᓗᒥ ᓱᓕ ᑍᒤᑉᐳᒍᑦ.

⁸ ᒫᓐᓇ ᕿᓚᒥᐊᐱᒃ, ᐊᑕᓃᖅ ᒎᑎᕗᑦ, ᐱᔪᓐᓇᕐᑎᑦᓯᓂᕐᔪᐊᕐᓄᑦ ᐃᓛᑎᒍᑦ ᕿᒪᕉᑎᑎᓯᒪᕙᑦᑎᒍᑦ ᓯᐊᓛᖑᓂᕐᒥᑦ ᐃᓂᖃᓕᕐᑎᓪᓗᑕᓗ ᐃᑦᔪᕐᓁᑦᑐᒥ ᑲᑉᐱᐊᓇᖏᑦᑐᒥ, ᕿᒪᕉᑎᑎᓯᒪᕙᑦᑎᒍᑦ ᓯᐊᓛᖑᓂᕐᒥᑦ ᑐᓂᓯᒪᕙᑦᑎᒍᓪᓗ ᐃᓅᓯᕐᒥᒃ ᓄᑖᒥᒃ.

⁹ ᓯᐊᓛᖑᓚᐅᕐᐳᒍᑦ, ᑭᓯᐊᓂᓕ ᓯᐊᓛᖑᑏᓐᓇᓚᐅᓐᖏᓚᑦᑎᒍᑦ ᐴᕐᓯᐊᒥᐅᓪᓗ ᐊᖓᔪᖅᑳᕐᔪᐊᖏᑦ ᐅᕙᑦᑎᓐᓂᒃ ᐱᐅᒃᓴᕐᑎᓚᐅᕐᐸᑎᑦ ᐱᔪᓐᓇᕐᑎᑕᐅᓚᐅᕐᐳᒍᓪᓗ ᐃᓅᖏᓐᓇᕐᓗᑕ ᑐᒃᓯᐊᕐᕕᒡᔪᐊᖅ ᐋᖅᑭᒋᐊᕈᓐᓇᕐᓗᒍ, ᓯᖁᒥᓯᒪᓚᐅᕐᑐᖅ ᑲᑉᐱᐊᓇᖏᑦᑐᒦᑦᓱᓐᓇᕐᓗᑕᓗ ᑕᒫᓂ ᔫᑎᐊᒥ ᔨᕉᓴᓕᒥᓗ.

¹⁰ ᒫᓐᓇᓕ ᒎᑎᕗᑦ, ᖃᓄᖅ ᐅᖃᕐᑐᒃᓴᐅᕕᑖ ᐅᕙᑦᑎᓐᓄᑦ ᐱᓂᐊᕐᓂᐅᓯᒪᔪᑦ ᐱᓪᓗᒋᑦ? ᓈᓚᒍᓐᓁᕇᕐᒥᒐᑦᑕ ᐱᖁᔭᕐᓂᒃ,

¹¹ ᑐᓂᓚᐅᕐᑕᑎᑦ ᐅᕙᑦᑎᓐᓄᑦ ᐱᔨᒃᑯᑦ, ᐅᖃᕐᑎᒃᑯᓪᓗ, ᐅᖃᐅᑦᔭᐅᓚᐅᕐᐳᒍᑦ ᓄᓇᑖᕆᓂᐊᕐᑕᕗᑦ ᐃᑦᔪᕐᓇᕐᑑᖕᒪᑦ ᑕᒫᓂ ᓄᓇᓖᑦ ᐃᓄᐃᑦ ᐃᓱᐊᓂᑦ ᐃᓱᐊᓄᑦ ᐃᓅᓯᖃᕐᒪᑕ ᐱᐅᖏᑦᑐᓂᒃ ᐃᑦᔪᕐᓇᕐᑐᓂᒡᓗ.

¹² ᐅᖃᐅᑦᔭᐅᓚᐅᕐᐳᒍᑦ ᐂᑉᐸᕐᑖᓚᐅᕐᓯᒪᖁᔭᐅᓇᑕ ᕿᑐᕐᖓᕗᓪᓗ ᑖᒃᑯᓇᖓ ᐃᓄᖕᓂᑦ, ᐊᒻᒪᓗ ᑖᒃᑯᓂᖓ ᐂᑉᐸᕐᑖᕐᑎᑦᓯᖁᔭᐅᓇᑕ ᕿᑐᕐᖓᑦᑎᓐᓂᒡᓗ; ᐃᓅᖃᑎᒋᓇᓱᐊᕐᑕᐅᖁᓇᒋᓪᓗ ᐱᕙᓪᓕᕐᑎᑕᐅᖁᓇᒋᓪᓗ, ᓲᖑᔫᔪᓐᓇᖁᓪᓗᑕ ᓄᓇᐅᑉ ᐱᐅᓂᖓ ᓂᕿᖏᓪᓗ ᓂᕿᒋᑦᓯᐊᕐᓗᒋᑦ ᐱᔪᓐᓇᖁᓪᓗᑕ, ᑭᖑᕚᑦᑎᓐᓄᓪᓗ ᑭᖑᕐᖑᑎᔭᐅᖁᑐᐊᕈᑦᑎᒍ ᐃᓱᖃᖏᑦᑐᒧᑦ.

¹³ ᐸᓯᔭᒃᓴᐅᓂᕗᑦ ᐊᔪᕐᑐᓕᓂᑦᑎᓐᓄᑦ ᑕᒻᒪᕐᓂᑦᑎᓐᓄᓪᓗ ᐊᑐᕇᕋᓗᐊᕐᒪᑕ, ᖃᐅᔨᒪᕗᒍᑦ ᐃᕝᕕᑦ ᒎᑎᕘᑦ, ᓱᒋᐊᓚᐅᕋᑦᑎᒍᑦ ᓱᒋᐊᕐᑕᐅᔭᕆᐊᖃᕐᓂᑦᑕ ᒥᒃᓯᑦᑎᓐᓄᑦ ᐃᓅᔪᓐᓇᕐᑎᓚᐅᕋᑦᑎᒍᓪᓗ ᑍᒤᒃᑲᓗᐊᕐᑎᓪᓗᑕ,

¹⁴ ᖃᓄᕐᓕ ᑲᒪᖏᑦᑑᔭᕆᐊᖃᓕᕇᕆᕕᑖ ᐱᖁᔭᕐᓂᒃ ᐂᑉᐸᕐᑖᕐᓗᑕᓗ ᓇᕐᕈᓇᕐᓂᕋᕐᑕᐅᔪᓂᒃ ᐃᓅᓯᖃᕐᑐᓃᒃ? ᑍᒤᒃᑯᑦᑕᓗ, ᓂᓐᖓᖕᓂᕐᓄᑦ ᐊᓯᕈᕐᓂᐊᕐᐸᑦᑎᒍᑦ ᐊᑕᐅᓯᕐᒥᒡᓘᓐᓃᑦ ᐊᒥᐊᒃᑰᔪᒍᑦ ᐃᓅᔪᖃᕈᓐᓃᕐᑎᓪᓗᒍ.

¹⁵ ᐊᑕᓃᖅ ᐃᓴᕆᐊᓕᒥᐅᑦ ᒎᑎᖓ, ᐃᕝᕕᑦ ᐃᓱᐊᕐᑑᕗᑎᑦ, ᐅᕙᒍᑦ ᐊᒥᐊᒃᑰᔪᒍᑦ ᐃᓅᑎᓯᒪᕙᑦᑎᒍᑦ ᐅᓪᓗᒥᒧᑦ ᑎᑭᓪᓗᒍ. ᑕᕝᕙ ᐃᕝᕕᑦ ᓵᖓᓃᑉᐳᒍᑦ, ᐸᓯᔭᒃᓴᐅᓂᑦᑎᓐᓂᑦ ᖃᕿᐊᓕᕐᐳᒍᑦ ᐃᓕᓐᓄᑦ; ᐱᔪᒃᓴᐅᓐᖏᓚᒍᓪᓘᓐᓃᑦ ᓵᖕᓄᑦ ᕾᓗᑕ ᑍᒤᑦᑑᓗᑕ!”