ᐄᓱᕋᐅᑉ ᐊᒡᓚᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓚᒌᓂ ᐊᖓᔪᖅᑳᕆᔭᐅᔪᑦ ᐅᑎᓚᐅᕐᑐᑦ ᐊᐅᓪᓚᕈᑦᔭᐅᓯᒪᕕᖕᒥᓂᑦ

¹ ᐅᑯᐊ ᑕᕝᕙ ᑎᑎᕋᕐᑕᐅᓯᒪᔪᑦ ᐃᓚᒌᑦ ᐊᖓᔪᖅᑳᖏᑦ ᐊᐅᓪᓚᕈᑦᔭᐅᓯᒪᓚᐅᕐᑐᑦ ᐹᐱᓘᓂᒧᑦ ᐅᑎᖃᑕᐅᓚᐅᕐᑐᑦ ᔨᕉᓴᓕᒧᑦ ᐄᓱᕋ ᐱᖃᑎᒋᓪᓗᒍ ᑭᖑᕚᕇᑦ ᑭᖑᓕᕇᖕᓂᖏᑕ ᓇᓗᓁᕐᑕᐅᓯᒪᓂᖏᑦ, ᐋᕐᑕᔮᒃᓯ ᐊᖓᔪᖅᑳᕐᔪᐊᖑᑎᓪᓗᒍ:

² ᒌᕐᓲᒻ ᐃᕐᓂᖓ ᐱᓂᕼᐋᔅ, ᐱᓂᕼᐋᓯᐅᑉ ᐃᕐᓂᖓ ᐃᑕᒫᕐ, ᐃᑕᒫᕆᐅᑉ ᐃᕐᓂᖓ ᑖᓂᐊᓕ, ᑖᓂᐊᓕᐅᑉ ᐃᕐᓂᖓ ᑍᕕᑎ, ᑍᕕᑎᐅᑉ ᐃᕐᓂᖓ ᕼᐊᑑᓯ;

³ ᕼᐊᑑᓯᐅᑉ ᐃᕐᓂᖓ ᓯᑲᓁᐊ, ᓯᑲᓁᐊᐅᑉ ᐃᕐᓂᖓ ᐸᕉᓯ, ᐸᕉᓯᐅᑉ ᐃᕐᓂᖓ ᓴᑲᕅᐊ, ᓴᑲᕅᐊᐅᑉ ᐃᓚᖏᓪᓗ ᐊᖑᑏᑦ 150 ᑎᑎᕋᕐᑕᐅᓯᒪᔪᑦ ᐃᓚᒌᑦ;

⁴ ᐸᕼᐊᑕ-ᒧᐊᐱᐅᑉ ᐃᕐᓂᖓ ᐃᓔᐃᕼᐅᐃᓁ, ᐃᓔᕼᐅᐃᓁᑉ ᐃᕐᓂᖓ ᔨᕋᕼᐂᐊ, ᐃᓚᖃᕐᓗᓂ ᐊᖑᑎᓂᒃ 200ᓂᒃ;

⁵ ᔨᕋᕼᐂᐊᑉ ᐃᕐᓂᖓ ᓯᑲᓁᐊ, ᓯᑲᓁᐊᐅᑉ ᐃᕐᓂᖓ ᐱᓐ-ᔭᕼᐊᔨᐅᓪ, ᐃᓚᖃᕐᓗᓂᓗ ᐊᖑᑎᓂᒃ 300ᓂᒃ;

⁶ ᐱᓐ-ᔭᕼᐊᔨᐅᑉ ᐃᕐᓂᖓ ᐊᑎᓐ, ᐊᑎᓐᓂᐅᑉ ᐃᕐᓂᖓ ᐃᐱᑎ, ᐃᐱᑎᐅᑉ ᐃᕐᓂᖓ ᔫᓇᑕᓂ, ᐃᓚᖃᕐᓗᓂᓗ ᐊᖑᑎᓂᒃ 50ᓂᒃ;

⁷ ᔫᓇᑕᓂᐅᑉ ᐃᕐᓂᖓ ᐃᓛᒻ, ᐃᓛᒻᒥᐅᑉ ᐃᕐᓂᖓ ᔨᓮᐊ, ᔨᓮᐊᐅᑉ ᐃᕐᓂᖓ ᐊᑕᓔᐊ, ᐃᓚᖃᕐᓗᓂᓗ ᐊᖑᑎᓂᒃ 70ᓂᒃ;

⁸ ᐊᑕᓔᐊᐅᑉ ᐃᕐᓂᖓ ᔨᐸᑍᐊ, ᔨᐸᑍᐊᐅᑉ ᐃᕐᓂᖓ ᓯᕚᑍᐊ, ᓯᕚᑍᐊᐅᑉ ᐃᕐᓂᖓ ᒤᑯ, ᐃᓚᖃᕐᓗᓂᓗ ᐊᖑᑎᓂᒃ 80ᓂᒃ;

⁹ ᒤᑰᑉ ᐃᕐᓂᖓ ᔪᐊᐱ, ᔪᐊᐱᐅᑉ ᐃᕐᓂᖓ ᐅᐸᑍᐊ, ᐅᐸᑍᐊᐅᑉ ᐃᕐᓂᖓ ᔨᕼᐃᐅᓪ, ᐃᓚᖃᕐᓗᓂᓗ ᐊᖑᑎᓂᒃ 218ᓂᒃ;

¹⁰ ᔨᕼᐃᐅᓕᐅᑉ ᐃᕐᓂᖓ ᓯᓗᒥᑎ, ᓯᓗᒥᑎᐅᑉ ᐃᕐᓂᖓ ᔫᓯᐱᐊ, ᐃᓚᖃᕐᓗᓂᓗ ᐊᖑᑎᓂᒃ 160ᓂᒃ;

¹¹ ᔫᓯᐱᐊᑉ ᐃᕐᓂᖓ ᐱᐰ, ᐱᐰᑉ ᐃᕐᓂᖓ ᓴᑲᕅᐊᓯ, ᓴᑲᕅᐊᐅᑉ ᐃᕐᓂᖓ ᐱᐰ, ᐃᓚᖃᕐᓗᓂᓗ ᐊᖑᑎᓂᒃ 28ᓂᒃ;

¹² ᐱᐰᑉ ᐃᕐᓂᖓ ᐊᔾᒑᑦ, ᐊᔾᒑᑉ ᐃᕐᓂᖓ ᔪᕼᐋᓇᓐ, ᔪᕼᐋᓇᓂᐅᑉ ᐃᕐᓂᖓ ᕼᐊᑲᑖᓐ, ᐃᓚᖃᕐᓗᓂᓗ ᐊᖑᑎᓂᒃ 110ᓂᒃ;

¹³ ᕼᐊᑲᑖᓂᐅᑉ ᐃᕐᓂᖓ ᐊᑐᓂᑲᒻ, ᐅᑯᐊᓗ ᐃᓚᖏᑦ ᐃᓕᕕᓕᑦ, ᔨ-ᐂᓕ, ᓯᒤᐊ, ᐃᓚᖃᕐᓗᓂᓗ ᐊᖑᑎᓂᒃ 60ᓂᒃ;

¹⁴ ᐊᑐᓂᑲᒻ ᐃᕐᓂᖓ ᐱᒡᕔ, ᔪᑍᓗ, ᔭᑯᕆᓗ ᐃᓚᖃᕐᓗᓂᓗ ᐊᖑᑎᓂᒃ 70ᓂᒃ.

ᐄᓱᕋᐅᑉ ᓂᕈᐊᕐᓂᖓ ᓕᕔᑎᐅᓂᐊᕐᑐᓂᒃ ᑐᒃᓯᐊᕐᕕᒡᔪᐊᒧᑦ

¹⁵ ᑖᒃᑯᐊᓗ ᑲᑎᑎᓚᐅᕐᐸᒃᑲ ᑰᖕᒧᑦ ᐊᕼᐋᕙᒧᑦ ᑰᒃᑐᒧᑦ, ᐃᓄᒃᒧᑦ ᓴᓇᔭᐅᓯᒪᔫᑉ ᓴᓂᐊᓄᑦ ᓄᓇᓕᖕᒧᑦ ᑎᑭᐅᑎᓯᒪᔪᒧᑦ, ᑕᖕᒫᕐᓯᒪᓚᐅᕐᐳᒍᓪᓗ ᐅᓪᓗᓂᒃ ᐱᖓᓱᓂᒃ. ᐃᓄᖕᓂ ᕿᓂᓕᕋᒪ ᑐᓂᕐᕈᓯᕐᑎᑦᓯᔨᓂ ᑕᕝᕙᓂ ᑲᑎᒪᔪᓂ, ᓕᕔᑎᓄᑦ ᑭᖑᕚᕆᔭᐅᔪᕐᑕᖃᓚᐅᓐᖏᓚᖅ.

¹⁶ ᕾᖁᔭᐅᒃᑲᓚᐅᕐᐸᒃᑲᓗ ᓯᕗᓕᕐᑏᑦ ᐅᑯᐊ: ᐃᓕᓯᕆ, ᐊᕅᐅᓪ, ᓯᒤᐊ, ᐃᐅᓪᓇᓴᓐ, ᔭᕆᑉ, ᐃᓖᓇᓴᓐ, ᓁᑕᓂ, ᓴᑲᕅᐊ, ᒥᓱᓚᒻᓗ, ᓯᕗᓕᕐᑎᐅᔫᒡᓗ ᐅᑯᐊᒃ, ᔪᐃᐊᕆᑉ, ᐃᐅᓪᓇᑖᓂ, ᑖᒃᑯᐊᒃ ᖃᐅᔨᒪᑦᓯᐊᕐᑑᒃ.

¹⁷ ᐃᑐᒧᓪᓗ ᑎᓕᓚᐅᕐᐹᒃᑲᒃ ᓄᓇᓖᑦ ᐊᖓᔪᖅᑳᖓᓐᓄᑦ ᑲᓰᐱᐊᒧᑦ, ᐊᐱᕆᔭᐅᖁᓪᓗᒍ ᐃᑲᔪᕐᑎᖏᓪᓗ, ᑐᒃᓯᐊᕐᕕᖕᒥ ᐱᓇᓱᐊᕐᑎᓂᒃ ᑲᓰᐱᐊᒦᑦᑐᓂᒃ ᐅᕙᑦᑎᓐᓄᑦ ᐃᓚᐅᑎᑦᓯᔪᓐᓇᕐᒪᖔᑦ ᐃᓄᖕᓂᒃ ᑭᒡᒐᕐᑐᕐᓂᐊᕐᑐᓂᒃ ᒎᑎᑦᑎᓐᓄᑦ ᑐᒃᓯᐊᕐᕕᒡᔪᐊᒥ.

¹⁸ ᒎᑎᒧᑦ ᐱᑦᓯᐊᕐᕕᐅᓗᐊᕐᓂᑯᑦᑎᓐᓄᑦ, ᑎᓕᓯᓚᐅᕐᐳᑦ ᐊᖑᒻᒥᒃ ᖃᐅᔨᒪᑦᓯᐊᕐᑐᒥᒃ ᓯᕆᐰᐊᒥᒃ ᐊᑎᓕᖕᒥᒃ, ᓕᕔᑎᐅᔪᖅ ᒪᕼᐊᓔᑉ ᑭᖑᕚᖏᓐᓂᑦ ᐱᓯᒪᔪᖅ; ᒫᕼᐊᓕ ᓕᕔᑎᐅᑉ ᐃᕐᓂᕆᓚᐅᕐᐹ, ᓕᕔᑎᓗ ᐃᕐᓂᕆᔭᐅᓪᓗᓂ ᐃᓴᕆᐊᓕᒧᑦ, ᐃᓚᖃᕐᓗᓂᓗ 18ᓂᒃ ᐃᕐᓂᕐᒥᓂᒃ ᖃᑕᓐᖑᑎᒥᓂᒡᓗ.

¹⁹ ᑎᓕᓯᓚᐅᕆᕗᑦ ᕼᐊᓴᐰᐊᒥᒃ, ᐃᓚᖃᕐᑎᓪᓗᒍ ᔨᓮᐊᒥᒃ, ᑖᓐᓇ ᒥᕋᕆᐅᑉ ᐃᕐᓂᖓ, ᖃᑕᓐᖑᑎᖏᓪᓗ ᐃᕐᓂᖏᓪᓗ 20ᓂᒃ ᐃᓚᖃᕆᓪᓗᓂ.

²⁰ ᐃᓚᖃᕆᐊᓪᓚᓚᐅᕆᕗᑦ 220ᓂᒃ ᑐᒃᓯᐊᕐᕕᒡᔪᐊᑉ ᐱᓇᓱᐊᕐᑎᖏᓐᓂᒃ ᓯᕗᓕᖏᑦ ᐊᖅᑭᒃᑕᕕᓃᑦ ᐊᖓᔪᖅᑳᕐᔪᐊᒧᑦ ᑍᕕᑎᒧᑦ ᐃᑲᔪᕐᑎᓂ ᐃᓚᒋᓪᓗᒋᑦ ᐃᑲᔪᕋᓱᐊᕐᓗᑎᑦ ᓕᕔᑎᓂᒃ. ᑖᒃᑯᐊᓕᒫᑦ ᐊᑎᖏᑦ ᑎᑎᕋᕐᓯᒪᓚᐅᕐᐳᑦ.

ᐄᓱᕋᐅᑉ ᑕᓯᐅᕐᓯᓂᖓ ᐃᓄᖕᓂᒃ ᓂᕆᑦᑍᓕᓂᒃᑯᑦ ᑐᒃᓯᐊᕐᓂᒃᑯᓪᓗ

²¹ ᑰᖕᒥ ᓴᓇᔭᐅᓯᒪᔪᒥ ᐊᕼᐋᕙᒥ ᐱᖁᔨᓚᐅᕐᐳᖓ ᓂᕆᑦᑍᓕᖁᓪᓗᑕ ᒥᑭᓕᑎᕐᓗᑕᓗ ᓇᖕᒥᓂᑦᑎᓐᓂᒃ ᒎᑎᑦᑕ ᓵᖓᓂ, ᑕᓯᐅᕐᑕᐅᔪᒪᓪᓗᑕ ᐃᖏᕐᕋᓂᑦᑎᓐᓂ ᓴᐳᑎᔭᐅᓯᒪᖁᓪᓗᑕᓗ ᕿᑐᕐᖓᕗᑦ ᐱᖁᑎᕗᓪᓗ ᑖᑦᓱᒧᖓ.

²² ᑲᓐᖑᓱᒃᑲᔭᓚᐅᕐᐳᖓ ᐊᖓᔪᖅᑳᕐᔪᐊᖅ ᐊᐱᕆᓗᒍ ᐅᓇᑕᕐᑐᒃᓴᓂᒃ ᕿᒻᒥᕐᔪᐊᒃᑰᕐᑎᓂᒡᓗ ᓴᐳᑦᔨᔨᖃᕈᒪᓗᖓ ᐊᑭᕋᑦᑎᓐᓂᑦ ᐃᖏᕐᕋᑎᓪᓗᑕ, ᐅᖃᐅᑎᓚᐅᕋᑦᑎᒍ, “ᒎᑎᑦᑕ ᓮᒻᒪᕐᑎᖃᑦᑕᕐᐰᑦ ᑕᑎᖃᕐᑐᓕᒫᑦ ᑖᑦᓱᒥᖓ, ᐱᔪᓐᓇᕐᓂᖓᑕᓕ ᓂᓐᖓᐅᓯᖓᑕᓗ ᑐᕌᕐᕕᒋᕙᒃᐰᑦ ᕿᒤᔪᓕᒫᑦ ᑖᑦᓱᒥᖓ.”

²³ ᑍᒤᒻᒪᑦ ᓂᕆᑦᑍᓕᓚᐅᕐᐳᒍᑦ ᑐᒃᓯᐊᕐᓗᑕᓗ ᒎᑎᒧᑦ ᓴᐳᑎᔭᐅᔪᒪᓪᓗᑕ, ᑖᑦᓱᒪᓗ ᑭᐅᓚᐅᕐᐹᑎᒍᑦ ᑐᒃᓯᐊᕐᓂᑦᑎᓐᓂᒃ.

ᑐᓂᕐᕈᑏᑦ ᑐᒃᓯᐊᕐᕕᒡᔪᐊᒧᑦ

²⁴ ᓯᕗᓕᕐᑎᒻᒪᕆᐅᓂᐊᕐᑐᓂᒃ ᑐᓂᕐᕈᓯᕐᑎᑦᓯᔨᓂᒃ 12ᓂᒃ ᓂᕈᐊᓚᐅᕐᐳᖓ ᓯᕆᐰᐊᒥᒃ, ᕼᐊᓴᐰᐊᒥᒡᓗ ᐊᓯᖏᓐᓂᒡᓗ 10ᓂᒃ ᐃᓚᒋᔭᖏᓐᓂᒃ.

²⁵ ᐅᖁᒤᓐᓂᕐᓯᐅᓕᓚᐅᕐᐸᒃᑲᓗ ᓯᐅᓪᕕᕇᑦ, ᒎᓗᐃᑦ, ᑐᒃᓯᐊᕐᕕᒡᔪᐊᒥᓗ ᐊᑐᕐᑕᐅᔪᒃᓮᑦ, ᑐᓂᕐᕈᑕᐅᓯᒪᔪᑦ ᐊᖓᔪᖅᑳᕐᔪᐊᕐᒥᑦ ᐃᑲᔪᕐᑎᖏᓐᓂᓪᓗ ᐱᓇᓱᐊᕐᑎᖏᓐᓂᓪᓗ, ᐃᓴᕆᐊᓕᒥᐅᓪᓗ ᐃᓄᖁᑎᖏᑕ ᓇᔫᑎᔪᓕᒫᑦ ᑐᓂᕐᕈᑎᒋᓚᐅᕐᑕᖏᑦ ᑐᒃᓯᐊᕐᕕᒡᔪᐊᒧᑦ.

²⁶ ᑐᓂᓚᐅᕐᐸᒃᑲᓗ ᑐᓂᕐᕈᓯᕐᑎᑦᓯᔨᓄᑦ ᐅᑯᐊ: ᓯᐅᓪᕕᕇᑦ 25ᑕᓐᓂᒃ ᐅᖁᒤᓐᓂᓖᑦ, ᓯᐅᓪᕕᕇᑦ ᑐᒃᓯᐊᕐᕕᒡᔪᐊᒥ ᐊᑐᕐᑕᐅᔪᒃᓴᑦ 150ᑕᓐᓂᒃ ᐅᖁᒤᓐᓂᓖᑦ, ᒎᓗᐃᑦ 7,500ᑕᓐᓂᒃ ᐅᖁᒤᓐᓂᓖᑦ,

²⁷ ᒎᓗᐃᑦ 20 ᐴᒍᑍᑦ 270ᐊᐅᓐᓯᓯᓂᒃ ᐅᖁᒤᓐᓂᓖᑦ, ᒪᕐᕉᒃ ᐴᒍᑖᒃ ᐱᐅᔪᒻᒪᕇᒃ ᕿᓪᓚᕆᒃᓴᕐᓯᒪᔫᒃ ᖃᑯᕐᓖᒃ, ᒎᓗᑎᑐᑦ ᐴᒍᑕᕐᑎᑐᑦ ᐊᑭᖃᓪᓗᐊᕐᑑᒃ.

²⁸ ᐅᖃᐅᑎᓚᐅᕐᐸᒃᑲ, “ᐃᓕᑦᓯ ᐃᑦᔪᕐᓁᑦᑑᕗᓯ ᐊᑕᓂᕐᒧᑦ; ᑖᒃᑯᐊᓗ ᓯᐅᓪᕕᕇᑦ ᒎᓗᐃᓪᓗ ᐃᑦᔪᕐᓁᑦᑑᒋᕗᑦ ᑐᒃᓯᐊᕐᕕᒡᔪᐊᒥ ᐊᑐᕐᑕᐅᔪᒃᓮᑦ; ᑐᓂᕐᕈᑎᒋᔭᐅᓯᒪᔪᑦ ᐃᓱᒪᕐᓱᕐᓂᒃᑯᑦ ᑖᑦᓱᒧᖓ ᓯᕗᓕᕕᓂᑦᓯ ᐊᑕᓂᖓᓄᑦ ᒎᑎᖓᓄᓪᓗ.

²⁹ ᑲᒪᒋᑦᓯᐊᕐᓂᐊᕐᐸᓯ ᐱᓯᒪᑦᓯᐊᕐᓗᓯᐅᒡᓗ ᑐᒃᓯᐊᕐᕕᒡᔪᐊᒧᑦ ᑎᑭᓚᐅᖏᓐᓂᑦᓯᓐᓂ; ᑍᑲᓂ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑲᐅᔪᑦ ᓕᕔᑎᓪᓗ ᓵᖏᓐᓂ ᐅᖁᒤᓐᓂᕐᓯᐅᓛᕐᐸᓯ ᐂᑦᑑᑎᒋᓗᒋᓪᓗ ᑖᒃᑯᓄᖓ, ᐃᓴᕆᐊᓕᒥᐅᓪᓗ ᐃᓄᖏᑕ ᓯᕗᓕᕐᑎᖏᓐᓄᑦ ᔨᕉᓴᓕᒦᑦᑐᓄᑦ.”

³⁰ ᑕᕝᕙ ᑐᓂᕐᕈᓯᕐᑎᑦᓯᔩᑦ ᓕᕔᑏᓪᓗ ᑎᒍᓯᓚᐅᕐᐳᑦ ᓯᐅᓪᕕᕆᓂᒃ, ᒎᓗᓂᒃ, ᑐᒃᓯᐊᕐᕕᒡᔪᐊᒥ ᐊᑐᕐᑕᐅᔪᒃᓴᓂᒡᓗ, ᐂᑦᑑᑎᒃᓴᒥᖕᓂᒃ ᒎᑎᑦᑕ ᑐᒃᓯᐊᕐᕕᒡᔪᐊᖁᑎᖓᓄᑦ ᔨᕉᓴᓕᒦᑦᑐᒧᑦ.

ᔨᕉᓴᓕᒧᑦ ᐅᑎᕐᓂᖓᑦ

³¹ ᑕᖅᑭᐅᑉ ᓯᕗᓪᓕᕐᐹᑉ ᐅᓪᓗᖓᑕ 12ᒋᓕᕐᑕᖓᓂ ᑰᖕᒥᑦ ᐊᕼᐋᕙᒥᑦ ᐊᐅᓪᓚᓚᐅᕐᐳᒍᑦ, ᔨᕉᓴᓕᒧᐊᕐᐸᓪᓕᐊᓕᕐᓗᑕ. ᒎᑎᑦᑕ ᐃᓚᒋᓚᐅᕐᐹᑎᒍᑦ ᓴᐳᑎᓚᐅᕐᐹᑎᒍᓪᓗ ᐊᑭᕋᕐᑐᕐᑎᑦᑎᓐᓂᑦ ᐅᓇᑕᕐᑕᐅᓂᕐᒥᓪᓗ ᐃᖏᕐᕋᑎᓪᓗᑕ.

³² ᔨᕉᓴᓕᒧᓪᓕ ᑎᑭᐅᑎᒐᑦᑕ, ᑕᕾᕐᓯᓚᐅᕐᐳᒍᑦ ᐅᓪᓗᓂᒃ ᐱᖓᓱᓂᒃ.

³³ ᐅᓪᓘᑉ ᓯᑕᒪᒋᓕᕐᑕᖓᓂ ᑐᒃᓯᐊᕐᕕᒡᔪᐊᒧᐊᓚᐅᕐᐳᒍᑦ, ᐅᖁᒤᓐᓂᕐᓯᐅᓚᐅᕐᐸᕗᓪᓗ ᓯᐅᓪᕕᕇᑦ, ᒎᓗᐃᑦ, ᑐᒃᓯᐊᕐᕕᒡᔪᐊᒥᓗ ᐊᑐᕐᑐᒃᓮᑦ, ᑐᓂᓚᐅᕐᐸᕗᓪᓗ ᑐᓂᕐᕈᓯᕐᑎᑦᓯᔨᒧᑦ ᒥᕆᒫᑎᒧᑦ, ᔪᕅᐊᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓᓄᑦ, ᐃᓚᖃᓚᐅᕐᐳᖅ ᐅᑯᓂᖓ ᐃᓕᓯᕆ ᐱᓂᕼᐋᓯᐅᑉ ᐃᕐᓂᖓ; ᐃᓚᖃᕐᑎᓪᓗᒍ ᓕᕔᑎᓂᒃ, ᔫᓴᐸᑦᒥᒃ ᔩᓱᐊᑉ ᐃᕐᓂᖓᓂᒃ, ᓄᐊᑎᐊᒥᒡᓗ ᐱᓄᐃᑉ ᐃᕐᓂᖓᓂᒃ,

³⁴ ᑕᒪᕐᒥᒡᓗ ᓈᓴᕐᑕᐅᓚᐅᕐᐳᑦ ᐅᖁᒤᓐᓂᕐᓯᐅᕐᑕᐅᓪᓗᑎᒡᓗ, ᑎᑎᕋᕐᑕᐅᔪᐃᓐᓇᐅᓚᐅᕐᐳᑦ ᑍᑦᓱᒪᓂᐅᑎᓪᓗᒍ.

³⁵ ᐊᐅᓪᓚᕈᑦᔭᐅᓯᒪᕕᖕᒥᖕᓂᑦ ᐅᑎᕐᑐᕕᓂᓕᒫᑦ ᑐᓂᕐᕈᓯᓚᐅᕐᐳᑦ ᐃᑭᑕᐅᓂᐊᕐᑐᓂᒃ ᑐᓂᕐᕈᑎᒃᓴᐅᓪᓗᑎᒃ ᐃᓴᕆᐊᓕᒥᐅᑦ ᒎᑎᖓᓄᑦ: ᑐᓂᕐᕈᓯᓚᐅᕐᐳᑦ ᐃᒻᒧᒃᓯᐅᒊᑦ ᐊᖑᓴᓪᓗᖏᓐᓂᒃ 12ᓂᒃ ᐃᓴᕆᐊᓕᒥᐅᓕᒫᓄᑦ, 96ᓂᒃ ᓰᐱᐅᑉ ᐊᖑᓴᓪᓗᖏᓐᓂᒃ, 77ᓂᒃ ᓰᐲᑦ ᓄᕐᕋᐅᔭᖏᓐᓂᒃ, 12ᓂᒡᓗ ᒎᑦᓯᓂᒃ ᐊᖑᑎᓂᒃ ᐊᔪᕐᑐᓕᓂᕐᒧᑦ ᐃᓱᒪᒋᔪᓐᓁᕐᑕᐅᑦᔪᑎᒃᓴᒧᑦ. ᐆᒪᔪᐃᑦ ᐃᑯᐊᓪᓚᒃᑕᐅᓚᐅᕐᐳᑦ ᑐᓂᕐᕈᑕᐅᔪᓕᒫᑦ ᐊᑕᓂᕐᒧᑦ.

³⁶ ᑎᑎᕋᕐᓯᒪᔪᓪᓗ ᐊᖓᔪᖅᑳᕐᔪᐊᑉ ᑎᑎᕋᖏᑦ ᐂᑦᑑᑎᒋᔭᐅᓚᐅᕐᐳᑦ ᐊᐅᓚᑦᓯᔨᓄᑦ ᐱᓇᓱᐊᕐᑎᓄᓪᓗ ᐃᕗᕅᑎᐅᑉ ᓴᐅᒥᖔᖓᓂᒥᐅᓄᑦ. ᑖᒃᑯᐊᓗ ᐃᑲᔪᕐᑐᓕᓚᐅᕐᐳᑦ ᐃᓄᖕᓂᒃ ᒎᑎᐅᓪᓗ ᑐᒃᓯᐊᕐᕕᒡᔪᐊᖁᑎᖓᓂᒃ.