ᐄᓱᕋᐅᑉ ᐊᒡᓚᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᐄᓱᕋᐅᑉ ᔨᕉᓴᓕᒧᑦ ᑎᑭᓐᓂᖓ

¹ ᑕᒪᒃᑯᐊ ᐊᓂᒍᕐᓯᒪᓕᕐᑎᓪᓗᒋᑦ, ᐋᕐᑕᔮᒃᓯ ᐊᖓᔪᖅᑳᕐᔪᐊᖑᑎᓪᓗᒍ ᐴᕐᓯᐊᒥ, ᐊᖑᑎᑕᖃᓚᐅᕐᐳᖅ ᐄᓱᕋᒥᒃ ᐊᑎᓕᖕᒥᒃ, ᓯᕗᓕᕕᓂᕐᒥᓂᒃ ᖃᐅᔨᓴᕋᒥ ᐂᕋᓐᒧᑦ ᑎᑭᐅᒪᔪᓂᒃ ᖃᐅᔨᓚᐅᕐᐳᖅ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᒻᒪᕆᒋᓚᐅᕐᑕᖓᓄᑦ, ᐃᒤᓕᖓᓚᐅᕐᐳᑦ: ᐄᓱᕋ ᐃᕐᓂᕆᔭᐅᓚᐅᕐᐳᖅ ᓯᕅᐊᒧᑦ, ᓯᕅᐊ ᐃᕐᓂᕆᔭᐅᓪᓗᓂ ᐊᔭᕅᐊᒧᑦ, ᐊᔭᕅᐊ ᐃᕐᓂᕆᔭᐅᓪᓗᓂ ᕼᐃᓪᑬᐊᒧᑦ,

² ᕼᐃᓪᑬᐊ ᐃᕐᓂᕆᔭᐅᕗᖅ ᓴᓗᒻᒧᑦ, ᓴᓗᒻ ᐃᕐᓂᕆᔭᐅᕗᖅ ᔭᑑᒡᒧᑦ, ᔭᑑᒃ ᐃᕐᓂᕆᔭᐅᕗᖅ ᐊᕼᐃᑑᑉᒧᑦ,

³ ᐊᕼᐃᑑᑉ ᐃᕐᓂᕆᔭᐅᕗᖅ ᐊᒪᕅᐊᒧᑦ, ᐊᒪᕅᐊ ᐃᕐᓂᕆᔭᐅᕗᖅ ᐊᔭᕅᐊᒧᑦ, ᐊᔭᕅᐊ ᐃᕐᓂᕆᔭᐅᕗᖅ ᒥᕅᐅᑎᒧᑦ,

⁴ ᒥᕅᐊ ᐃᕐᓂᕆᔭᐅᕗᖅ ᔨᕋᕼᐂᐊᒧᑦ, ᔨᕋᕼᐂᐊ ᐃᕐᓂᕆᔭᐅᕗᖅ ᐅᔨᒧᑦ, ᐅᔨ ᐃᕐᓂᕆᔭᐅᕗᖅ ᐳᒃᑭᒧᑦ,

⁵ ᐳᑭ ᐃᕐᓂᕆᔭᐅᕗᖅ ᐊᐱᓱᐊᒧᑦ, ᐊᐱᓱᐊ ᐃᕐᓂᕆᔭᐅᕗᖅ ᐱᓂᕼᐋᓯᒧᑦ, ᐱᓂᕼᐋᓯ ᐃᕐᓂᕆᔭᐅᕗᖅ ᐃᓕᓯᕆᒧᑦ, ᐃᓕᓯᕆ ᐃᕐᓂᕆᔭᐅᕗᖅ ᐂᕉᓂᒧᑦ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᓐᓄᑦ.

⁶ ᑖᓐᓇ ᐄᓱᕋ ᐊᐅᓪᓚᓚᐅᕐᐳᖅ ᐹᐱᓘᓂᒥᑦ; ᐃᓕᓐᓂᐊᕐᓯᒪᒻᒪᕆᓚᐅᕐᐳᖅ ᖃᐅᔨᒪᔪᒻᒪᕆᐅᓪᓗᓂᓗ ᐱᖁᔭᓂᒃ ᐊᑕᓂᐅᑉ ᐃᓴᕆᐊᓕᒥᐅᑦ ᒎᑎᖓᑕ ᑐᓂᓚᐅᕐᑕᖏᓐᓂᒃ ᒨᓯᓯᒧᑦ, ᐊᖓᔪᖅᑳᕐᔪᐊᑉ ᐄᓱᕋ ᑐᓂᓯᕕᒋᓚᐅᕐᐹ ᐱᔪᒪᔭᓕᒫᖏᓐᓂᒃ, ᐊᑕᓂᐅᑉ ᐃᓴᕆᐊᓕᒥᐅᑦ ᒎᑎᖓᑦᑕ ᐱᓇᓱᐊᕐᑕᐅᖁᔭᓕᒫᖏᓐᓂᒃ ᑖᑦᓱᒧᖓ.

⁷ ᑍᒤᒻᒪᑦ ᓮᒻᒪᕐᑎᑕᐅᓯᒪᓂᕐᒥᓄᑦ ᐊᑕᓂᕐᒧᑦ ᒎᑎᒥᓄᑦ, ᐋᕐᑕᔮᒃᓯᐅᑉ ᐊᐅᓚᑦᓯᓂᖓᑕ ᐊᕐᕌᒍᖏᑕ 7ᖓᓐᓂ, ᔨᕉᓴᓕᒧᐊᓚᐅᕐᐳᖅ ᐃᓴᕆᐊᓕᒥᐅᓂᒃ ᐃᓚᖃᕐᓱᓂ ᐅᑯᐊ ᐃᓚᒋᔭᐅᓪᓗᑎᒃ ᑐᓂᕐᕈᓯᕐᑎᑦᓯᔩᑦ, ᓕᕔᑏᑦ, ᑐᒃᓯᐊᕐᕕᒡᔪᐊᓪᓗ ᐃᓐᖏᕐᑎᖏᑦ, ᑐᒃᓯᐊᕐᕕᒡᔪᐊᓪᓗ ᖃᐅᔨᓴᕐᑎᖏᑦ, ᐃᖃᓁᔭᕐᑎᖏᓪᓗ.

⁸ ᐅᓪᓘᑉ ᓯᕗᓪᓕᕐᐹᖓᓂ ᑕᖅᑭᐅᑉ ᑕᓪᓕᒪᖓᓐᓂ, ᐊᖓᔪᖅᑳᕐᔪᐊᑉ ᐊᐅᓚᑦᓯᓂᖓᑕ ᐊᕐᕌᒍᖏᑕ 7ᖓᓂ.

⁹ ᐅᓪᓘᑉ ᓯᕗᓪᓕᕐᐹᖓᓂ ᑕᖅᑭᐅᓪᓗ ᓯᕗᓪᓕᕐᐹᖓᓂ ᐹᐱᓘᓂᒥᑦ ᐊᐅᓪᓚᓚᐅᕐᐳᑦ, ᑕᖅᑮᑦ ᑕᓪᓕᒪᖓᑦᑕ ᐅᓪᓗᖏᑕ ᓯᕗᓪᓕᕐᐹᖓᓂ ᔨᕉᓴᓕᒧᑦ ᑎᑭᓚᐅᕐᐳᑦ, ᒎᑎᖓᑕ ᐃᑲᔪᑦᓯᐊᕐᓂᖓᓄᑦ.

¹⁰ ᐄᓱᕋᐅᑉ ᐃᓅᓯᓂ ᑐᓂᓯᒪᓚᐅᕐᐹ ᐃᓕᓴᕐᓗᓂ ᐊᑕᓂᐅᑉ ᐱᖁᔭᖏᓐᓂᒃ, ᐊᑐᖃᑦᑕᓪᓗᒋᑦ, ᐃᓕᓮᑦᔪᑎᒋᓪᓗᒋᓪᓗ ᐱᖁᔧᑦ ᐊᑐᕐᑕᐅᔭᕆᐊᓖᓪᓗ ᐃᓴᕆᐊᓕᒥᐅᑦ ᐃᓄᖁᑎᖏᓐᓄᑦ.

ᑎᑎᕋᕐᓯᒪᔪᑦ ᐊᖓᔪᖅᑳᕐᔪᐊᑉ ᐋᑕᔮᒃᓯᐅᑉ ᑐᓂᓚᐅᕐᑕᖏᑦ ᐄᓱᕋᒧᑦ

¹¹ ᐅᑯᐊ ᑕᕝᕙ ᐊᑦᔨᖏᑦ ᐊᖓᔪᖅᑳᕐᔪᐊᑉ ᐋᕐᑕᔮᒃᓯᐅᑉ ᑎᑎᕋᓚᐅᕐᑕᖏᑦ ᐄᓱᕋᒧᑦ, ᑐᓂᕐᕈᓯᕐᑎᑦᓯᔨᒧᑦ ᐃᓕᓯᒪᔪᒧᓪᓗ, ᖃᐅᔨᒪᑦᓯᐊᕐᑐᒧᑦ ᐱᖁᔭᓂᒃ ᐊᑕᓂᐅᑉ ᐱᖁᓯᒪᔭᖏᓐᓂᒃ, ᐊᑐᕐᑕᐅᖁᓚᐅᕐᑕᖏᓐᓂᒡᓗ ᐃᓴᕆᐊᓕᒥᐅᓄᑦ:

¹² “ᐊᖓᔪᖅᑳᕐᔪᐊᒥᑦ ᐋᕐᑕᔮᒃᓯᒥᑦ ᐊᖓᔪᖅᑳᕐᔪᐊᒥᑦ ᐊᖓᔪᖅᑳᕐᔪᐊᓄᑦ, ᑐᓂᕐᕈᓯᕐᑎᑦᓯᔨᒧᑦ ᐄᓱᕋᒧᑦ, ᒎᑎᐅᑉ ᕿᓚᖕᒦᑦᑑᑉ ᐱᖁᔭᖏᓐᓂᒃ ᐃᓕᓯᒪᔪᒧᑦ. ᓮᒪᓂᒻᒪᕆᐅᑉ ᐃᓚᒋᓕᓯ.

¹³ ᐅᕙᖓ ᐱᖁᔨᕗᖓ ᐊᐅᓚᑕᓕᒫᓐᓂ ᐃᓴᕆᐊᓕᒥᐅᑦ ᐃᓄᖏᑦ, ᑐᓂᕐᕈᓯᕐᑎᑦᓯᔩᑦ, ᓕᕔᑏᓪᓗ ᒪᓕᒍᒪᔪᓕᒫᑦ ᐃᓕᖕᓂᒃ ᒪᓕᒍᓐᓇᕐᑎᑉᐸᒃᑲ ᔨᕉᓴᓕᒧᑦ.

¹⁴ ᐊᒻᒪᓗ ᐅᕙᖓ ᑲᑐᑦᔨᖃᑎᒋᓪᓗᒋᑦ ᑲᑎᒪᔨᒃᑲ 7ᐃᑦ, ᐊᐅᓪᓚᕐᑎᑉᐸᑦᓯ ᖃᐅᔨᓴᕆᐊᖁᓪᓗᓯ ᔨᕉᓴᓕᒧᑦ ᔫᑕᒧᓪᓗ, ᒎᑎᑦᓯ ᐱᖁᔭᖏᓐᓂᒃ ᑐᓂᔭᐅᓯᒪᔪᓂᒃ ᐃᓕᑦᓯᓐᓄᑦ, ᓈᓚᒃᑕᐅᑦᓯᐊᕋᓗᐊᕐᒪᖔᑕ;

¹⁵ ᐊᒻᒪᓗ ᒎᓗᐃᑦ ᓯᐅᓪᕕᕇᓪᓗ ᓇᒃᓴᕐᑕᒃᓴᕆᕙᑎᑦ ᑐᓂᔭᕗᑦ ᑲᑎᒪᔨᖁᑎᒃᑲᓗ ᐃᓴᕆᐊᓕᐅᑉ ᒎᑎᖓᓄᑦ, ᑐᒃᓯᐊᕐᕕᖁᑎᖃᕐᑐᒧᑦ ᔨᕉᓴᓕᒥ.

¹⁶ ᐊᒻᒪᓗ ᓇᒃᓴᕐᑕᒃᓴᕆᕙᓯ ᓯᐅᓪᕕᕇᑦ ᒎᓗᐃᓪᓗ ᐱᓚᐅᕐᑕᓯ ᐹᐱᓘᓂᐅᑉ ᓄᓇᖁᑎᖓᓂᑦ ᑐᓂᕐᕈᑎᒋᔭᐅᔪᓪᓗ ᐃᓴᕆᐊᓕᐅᑉ ᐃᓄᖁᑎᖏᓐᓂᑦ ᑐᓂᕐᕈᓯᕐᑎᑦᓯᔨᖁᑎᖏᑦᑕᓗ ᐃᓱᒪᕐᓱᕐᓗᑎᒃ ᑐᓂᓚᐅᕐᑕᖏᑦ, ᑖᒃᑯᐊ ᐃᓱᒪᕐᓱᕐᓗᑎᒃ ᑐᓂᔭᐅᔪᒃᓴᐅᕗᑦ ᑐᒃᓯᐊᕐᕕᒡᔪᐊᒧᑦ ᒎᑎᒥᖕᓄᑦ ᔨᕉᓴᓕᒦᑦᑐᒧ.

¹⁷ ᑍᒤᒻᒪᑦ, ᐃᒃᐱᒍᓱᑦᓯᐊᕐᓗᓯ ᑮᓇᐅᔧᑦ ᓂᐅᕕᐅᑎᒋᔭᒃᓴᕆᕙᓯ ᑲᒪᑦᓯᐊᕐᓗᓯ ᐃᒻᒧᒃᓯᐅᒊᑦ ᐊᖑᓴᓪᓗᖏᓐᓄᑦ, ᓰᐲᓪᓗ ᐊᖑᓴᓪᓗᖏᓐᓄᑦ, ᓰᐲᓪᓗ ᓄᕐᕋᐅᔭᖏᓐᓄᑦ, ᓂᐊᖂᔭᒃᓴᓄᑦ, ᕔᓂᓄᓪᓗ ᑐᓂᕐᕈᑎᒋᔭᐅᔪᒃᓴᐅᕗᑦ ᑐᓂᕐᕈᓯᕐᕕᖕᒧᑦ ᑐᒃᓯᐊᕐᕕᒡᔪᐊᒧᑦ ᔨᕉᓴᓕᒦᑦᑐᒧᑦ.

¹⁸ ᐊᑐᕈᓐᓇᕆᕙᓯᓗ ᓈᒻᒪᒐᓱᒋᔭᑦᓯᓐᓄᑦ ᓯᐅᓪᕕᕇᑦ ᒎᓗᐃᓪᓗ ᐊᒥᐊᒃᑯᐃᑦ ᐃᓅᖃᑎᑦᓯ ᓄᓇᖅᑲᑎᑦᓯᓗ ᐊᑐᕈᒪᔭᖏᓐᓄᑦ, ᒎᑎᐅᑉ ᐱᔪᒪᔭᖓ ᐱᖁᔨᓂᖓᓗ ᒪᓕᒡᓗᒍ.

¹⁹ ᑖᒃᑯᐊ ᑐᓂᔭᒃᓴᕆᕙᑎᑦ ᒎᑎᒧᑦ ᔨᕉᓴᓕᒦᑦᑐᒧᑦ ᑐᒃᓯᐊᕐᕕᒡᔪᐊᒥ ᐱᓇᓱᐊᕈᑎᒃᓴᓕᒫᑦ ᑐᓂᔭᐅᓯᒪᔪᑦ ᐃᓕᖕᓄᑦ ᐊᑐᕐᑕᐅᖁᓪᓗᒋᑦ ᑐᒃᓯᐊᕐᕕᒡᔪᐊᒥ ᑐᒃᓯᐊᕐᑎᑦᓯᔪᖃᕐᑎᓪᓗᒍ.

²⁰ ᓱᓇᑐᐃᓐᓇᒥᒡᓗ ᐱᔭᕆᐊᖃᒃᑲᓐᓂᑐᐊᕈᕕᑦ ᑐᒃᓯᐊᕐᕕᒡᒧᑦ ᐊᑐᒐᒃᓴᓂᒃ, ᐊᖓᔪᖅᑳᕐᔪᐊᑉ ᑮᓇᐅᔭᖁᑎᖏᓐᓂᑦ ᐱᔪᓐᓇᕐᐳᑎᑦ ᐊᑭᓕᐅᑎᒋᓗᒋᑦ.

²¹ ᐅᕙᖓ ᓇᖕᒥᓂᖅ ᐋᕐᑕᔮᒃᓯ, ᐊᖓᔪᖅᑳᕐᔪᐊᖅ, ᐱᖁᔨᕗᖓ ᑮᓇᐅᔭᓂᒃ ᑲᒪᔨᓕᒫᓂᒃ ᓄᓇᓕᖕᓂ ᐊᕕᒃᑐᕐᓯᒪᔪᓂ ᐃᕗᕅᑎᐅᑉ ᓴᐅᒥᖔᖓᓂᒥᐅᓂᒃ ᑐᓂᓯᔪᓐᓇᖁᓪᓗᒋᑦ ᑕᕝᕙᑦᓴᐅᑎᒋ ᐄᓱᕋᒧᑦ, ᑐᓂᕐᕈᓯᕐᑎᑦᓯᔨᒧᑦ ᒎᑎᐅᓪᓗ ᕿᓚᖕᒦᑦᑑᑉ ᐱᖁᔭᖏᓐᓂᒃ ᐃᓕᓯᒪᔪᒧᑦ, ᐱᔪᒪᔭᓕᒫᖏᓐᓂᒃ ᑲᑦᓱᖎᕐᓯᒪᑦᓯᐊᕐᓗᓯ ᐂᑦᑐᐃᔪᒃᓴᐅᕗᓯ.

²² 7,500ᓂᒃ ᐅᖁᒤᓐᓂᓕᖕᓂᒃ ᓯᐅᓪᕕᕆᓂᒃ, 500ᓂᒃ ᖃᑦᑕᓂᒃ ᓂᐊᖂᔭᒃᓴᓂᒃ, 550ᓂᒃ ᖃᓪᓗᑎᓂᒃ ᕔᓂᓂᒃ, 550ᓂᒃ ᖃᓪᓗᑎᓂᒃ ᓇᐹᕐᑑᑉ ᐅᕐᓱᖓᓂᒃ, ᑕᕆᐅᕐᒥᒡᓗ ᐱᔪᒪᔭᓕᒫᒥᓂᒃ ᐃᓱᓕᕝᕕᖃᖏᓪᓗᒍ.

²³ ᖃᓄᑐᐃᓐᓇᖅ ᒎᑎᐅᑉ ᕿᓚᒃᒦᑦᑑᑉ ᐱᖁᔨᑦᔪᑎᒋᔭᖏᓐᓂᒃ ᑐᒃᓯᐊᕐᕕᖁᑎᒥᓄᑦ, ᑲᒪᑦᓯᐊᕐᑐᒃᓴᐅᕗᓯ ᐱᓇᓱᐊᑦᓯᐊᕐᓗᓯᓗ ᒎᑎᐅᑉ ᕿᓚᖕᒦᑦᑑᑉ ᑐᒃᓯᐊᕐᕕᖁᑎᖓᓄᑦ. ᐅᕙᓐᓄᓪᓗ ᓂᓐᖓᐅᒻᒪᑦᔪᑎᒃᓴᖃᖁᓇᒍ ᑭᖑᓂᓐᓂᓗ ᐊᐅᓚᑦᓯᖃᑦᑕᓛᕐᑐᓄᑦ.

²⁴ ᑖᒃᓰᔭᕐᑎᑦᓯᔪᒃᓴᐅᓐᖏᓚᓯ ᑐᓂᕐᕈᓯᕐᑎᑦᓯᔨᓂᒃ, ᓕᕔᑎᓂ, ᐃᓐᖏᕐᑎᓂᒃ, ᖃᐅᔨᓴᕐᑎᓂᒃ, ᐃᖅᑲᓁᔭᕐᑎᓂᒃ ᓇᓪᓕᐊᓐᓂᒡᓘᓐᓃᑦ ᑐᒃᓯᐊᕐᕕᒡᔪᐊᒧᑦ ᐊᑕᔪᓂᒃ.

²⁵ ᐃᕝᕕᓪᓗ ᐄᓱᕌ, ᓯᓚᑐᓃᑦ ᐊᑐᕐᓗᒍ ᒎᑎᐅᑉ ᑐᓂᓚᐅᕐᑕᖓ ᐃᓕᖕᓄᑦ, ᑎᓕᓯᔪᒃᓴᐅᕗᑎᑦ ᑲᒪᔨᐅᓂᐊᕐᑐᓂᒃ ᓯᕗᓕᕐᑎᓂᒃ ᐃᖅᑲᕐᑐᐃᔨᓂᒡᓗ ᐊᐅᓚᑦᓯᔪᒃᓴᓂᒃ ᐃᓄᖕᓂᒃ ᐃᕗᕅᑎᐅᑉ ᓴᐅᒥᖔᖓᓂᒥᐅᓂᒃ ᐃᓅᔪᓂᒃ ᒎᑎᑦᓯ ᐱᖁᔭᖏᑦ ᒪᓕᒡᓗᒋᑦ ᐃᓕᓐᓂᐊᕐᑎᑦᓯᔪᒃᓴᐅᕗᓯᓗ ᐱᖁᔭᓂᒃ ᖃᐅᔨᒪᖏᑦᑐᓂᒃ.

²⁶ ᓇᓪᓕᐊᑦ ᒎᑎᑦᓯ ᐱᖁᔭᖓᓂᒃ ᓈᓚᖏᑦᑐᖅ ᐊᖓᔪᖅᑳᐅᕕᑦᑕᓘᓐᓃᑦ ᐱᖁᔭᖏᓐᓂᒃ, ᑖᓐᓇ ᓱᒋᐊᕐᑕᐅᑦᓴᐅᑎᒋᔪᒃᓴᐅᕗᖅ: ᑐᖁᑕᐅᓗᓂ ᐊᐅᓪᓚᕈᑦᔭᐅᓪᓗᓂᓘᓐᓃᑦ ᐅᕝᕙᓗ ᐱᖁᑎᖏᓐᓂᒃ ᐊᕐᓵᕐᑕᐅᓪᓗᓂ ᑎᒍᔭᐅᓗᓂᓘᓐᓃ.”

ᐄᓱᕋᐅᑉ ᓂᕐᑐᐃᓂᖓ ᒎᑎᒥᒃ

²⁷ ᐄᓱᕋ ᐅᖃᓚᐅᕐᐳᖅ, “ᐊᑕᓂᖅ ᓂᕐᑐᕐᑕᐅᓕ, ᓯᕗᓕᕕᓂᑦᑕ ᒎᑎᖓ ᐊᖓᔪᖅᑳᕐᔪᐊᖅ ᑍᒫᒃ ᐅᐱᒍᓱᒍᓐᓇᕐᑎᒻᒪᒍ ᐱᐅᓯᑎᑦᓯᓗᓂᓗ ᐊᑕᓂᐅᑉ ᑐᒃᓯᐊᕐᕕᒡᔪᐊᖓᓂᒃ ᔨᕉᓴᓕᒦᑦᑐᒥᒃ.

²⁸ ᒎᑎᐅᓪᓗ ᓮᒻᒪᕐᑎᑦᓯᓂᖓᓄᑦ ᐊᖓᔪᖅᑳᕐᔪᐊᒧᑦ ᑲᑎᒪᔨᖁᑎᖏᓐᓄᓪᓗ ᐱᑦᓯᐊᕐᑕᐅᕗᖓ, ᐱᓯᑎᕐᔪᐊᓄᓪᓗ ᐱᓇᓱᐊᕐᑎᓕᒫᖏᓐᓂᑦ. ᑖᒃᑯᓄᖓ ᐱᕙᓪᓕᕐᑎᑕᐅᕗᖓ ᐊᑕᓂᑦᑕᓗ ᒎᑎᐅᑉ ᑐᓂᓯᕕᒋᓚᐅᕐᐹᖓ ᓯᕘᕋᖏᓐᓂᕐᒥᒃ, ᑲᔪᖏᕐᓴᓚᐅᕋᒃᑭᑦ ᐃᓴᕆᐊᓕᒥᐅᑉ ᑭᖑᕚᖏᑕ ᐊᖓᔪᖅᑳᖏᑦ ᐅᑎᖃᑕᐅᔪᓐᓇᖁᓪᓗᒋᑦ ᐅᕙᓐᓄᑦ.”