ᐄᓱᕋᐅᑉ ᐊᒡᓚᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖓᔪᖅᑳᕐᔪᐊᑉ ᓮᕋᓯᐅᑉ ᑎᓕᓯᓂᕕᓂᖓ

¹ ᑍᒤᒻᒪᑦ ᐊᖓᔪᖅᑳᕐᔪᐊᖅ ᑍᕉᓯ ᑎᓕᓯᓚᐅᕐᐳᖅ ᕿᓂᖁᔨᓪᓗᓂ ᑎᑎᕋᕐᓯᒪᔪᓂᒃ ᐹᐱᓘᓂᒦᑦᑐᓂᒃ.

² ᐊᒃᐸᑖᓇᐅᑉ ᐃᒡᓗᒐᓴᖏᓐᓂ ᓄᓇᓖᑦ ᐊᕕᒃᑐᕐᓯᒪᓂᖏᓐᓂ ᒥᑎᐊᒦᑦᑐᒥ ᑎᑎᕋᕐᓯᒪᔪᑦ ᓇᓂᔭᐅᓚᐅᕐᐳᑦ ᐃᒤᓕᔪᑦ:

³ “ᐊᖓᔪᖅᑳᕐᔪᐊᖅ ᓮᕋᓯ ᐊᐅᓚᑦᓯᔨᐅᑎᓪᓗᒍ ᐊᕐᕌᒍᒥ ᓯᕗᓪᓕᕐᐹᒥ ᑎᓕᓯᓚᐅᕐᓯᒪᕗᖅ ᑐᒃᓯᐊᕐᕕᒡᔪᐊᖅ ᔨᕉᓴᓕᒦᑦᑐᖅ ᓴᓇᒋᐊᕐᑕᐅᖁᓪᓗᒍ, ᑐᓂᕐᕈᓯᕐᕕᐅᖃᑦᑕᕐᑐᕐᓗ ᐃᓂᒋᕙᒃᑕᖓᑕ ᑐᓐᖓᕕᖓ ᐋᖅᑭᒃᑕᐅᓗᓂ, ᑐᒃᓯᐊᕐᕕᒡᔪᐊᖅ ᐳᕐᑐᓂᖃᕆᐊᖃᕐᐳᖅ 90ᓂᒃ ᐃᑎᒐᖕᓂᒃ ᓴᓂᒧᓪᓗ ᐃᑎᒐᖕᓂᒃ 90ᓂᒃ,

⁴ ᐊᕙᓗᐊᓗ ᓴᓇᔭᐅᔭᕆᐊᖃᕐᐳᖅ ᐅᔭᕅᑦ ᐊᑯᓪᓕᕇᑦ ᐱᖓᓲᓕᕋᖓᑕ ᕿᔪᓕᕐᐸᒡᓗᒍ. ᐊᑭᓕᕆᐊᓕᓕᒫᓪᓗ ᐊᑭᓕᕐᑕᐅᔪᒃᓴᐅᕗᑦ ᐊᖓᔪᖅᑳᕐᔪᐊᑉ ᑮᓇᐅᔭᖁᑎᖏᓐᓂᑦ.

⁵ ᑍᒃᑯᐊᓗ ᒎᓗᐃᑦ ᓯᐅᓪᕕᕇᓪᓗ ᑐᒃᓯᐊᕐᕕᒡᔪᐊᑉ ᐱᖁᑎᖏᑦ, ᐊᖓᔪᖅᑳᕐᔪᐊᑉ ᓂᐱᑯᓁᓴᐅᑉ ᐹᐱᓘᓂᒧᐊᕈᑎᓚᐅᕐᓯᒪᔭᖏᑦ ᑐᒃᓯᐊᕐᕕᒡᔪᐊᒥᑦ ᔨᕉᓴᓕᒦᑦᑐᒥᑦ, ᐅᑎᕐᑎᑕᐅᔪᒃᓴᐅᕗᑦ ᔨᕉᓴᓕᐅᑉ ᑐᒃᓯᐊᕐᕕᒡᔪᐊᖓᓄᑦ ᐃᓂᒋᒋᐊᓕᖏᓐᓄᐊᕐᑕᐅᓗᑎᒃ.”

ᐊᖓᔪᖅᑳᕐᔪᐊᑉ ᑍᕉᓯᐅᑉ ᑎᓕᓯᓂᖓ ᐃᖅᑲᓁᔭᕐᑐᑦ ᑲᔪᓯᖁᓪᓗᒋᑦ

⁶ ᐊᖓᔪᖅᑳᕐᔪᐊᖅ ᑭᐅᓚᐅᕐᐳᖅ ᐃᒤᓕᐅᕐᓗᓂ: “ᑕᑎᓁᒧᑦ ᐊᐅᓚᑦᓯᔨᐅᔪᒧᑦ ᐃᕗᕅᑎᐅᑉ ᓴᐅᒥᖔᖓᓂᒥᐅᓄᑦ, ᓯᑕᕆ-ᐳᔨᓁᒥᐅᑕᓄᓪᓗ, ᐱᓇᓱᐊᖃᑎᖏᓐᓄᓪᓗ ᐃᕗᕅᑎᐅᑉ ᓴᐅᒥᖔᖓᓂᒥᐅᓄᑦ. ᑐᒃᓯᐊᕐᕕᒡᔪᐊᖅ ᑲᒪᒋᑦᑍᓕᒍᒃ.

⁷ ᐃᓚᓕᐅᑎᑦᑍᓕᒋᑦᓯᓗ ᓴᓇᔪᓄᑦ ᑐᒃᓯᐊᕐᕕᒡᔪᐊᒥ; ᐊᐅᓚᑦᓯᔨᐅᔪᖅ ᔫᑎᐊᒥ ᔫᑎᓪᓗ ᓯᕗᓕᕐᑎᖏᑦ ᐋᖅᑭᒋᐊᕐᓯᓇᓱᐊᕐᑐᑦ ᒎᑎᐅᑉ ᑐᒃᓯᐊᕐᕕᒡᔪᐊᖓᓂᒃ ᐃᓂᖓᓄᐊᕐᓯᓇᓱᐊᕐᑐᑦ ᑲᒪᒋᑦᑍᓕᓯᐅᒃ.

⁸ ᓱᓕᓗ ᑎᓕᓕᕐᐸᑦᓯ ᐃᒤᓕᐅᖁᓪᓗᓯ ᔫᑎᓄᑦ ᓯᕗᓕᕐᑎᐅᔪᓂᒃ ᐃᑲᔪᖁᓪᓗᓯ ᑐᒃᓯᐊᕐᕕᒡᔪᐊᒥ ᓴᓇᔪᓂᒃ: ᐊᑭᓕᕆᐊᓕᖏᓪᓗ ᐊᑭᓕᕐᑕᐅᑦᓴᐅᑎᒋᔭᕆᐊᖃᕐᐳᑦ ᐊᖓᔪᖅᑳᕐᔪᐊᑉ ᑮᓇᐅᔭᖁᑎᖏᓐᓂᑦ ᑖᒃᓯᔭᕐᓂᒃᑯᒃ ᑐᓂᔭᐅᕙᒃᑐᓂᑦ ᐃᐅᐸᕅᑎᐅᑉ ᓴᐅᒥᖔᖓᓂᒥᐅᓂᑦ; ᑖᒃᑯᐊ ᐃᓄᖕᓄᑦ ᓴᓇᔪᓄᑦ ᑐᓂᔭᐅᑦᔭᐅᑎᒋᔭᕆᐊᖃᕐᐳᑦ, ᐱᓇᓱᐊᕐᑐᑦ ᐊᒡᕕᐊᕐᑕᐅᖁᓇᒋᑦ.

⁹ ᖃᐅᑕᒫᑦ ᐱᓐᖏᓮᓐᓇᕐᑍᓕᓗᓯ ᓱᓇᑐᐃᓐᓇᑦᓯᐊᒥᒃ ᐱᔭᕆᐊᖃᑐᐊᕐᐸᑕ ᐃᑲᔪᕐᑕᐅᔭᕆᐊᖃᕐᐳᑦ; ᐃᒻᒧᒃᓯᐅᒊᑦ ᐊᖑᓴᓪᓗᖏᑕ ᐅᕕᒃᑲᖏᓐᓂᒃ, ᓰᐲᑦ ᐊᖑᓴᓪᓗᖏᓐᓂᒃ, ᓰᐱᐅᑉ ᓄᕐᕋᐅᔭᖏᓐᓂᒃ ᐃᑭᓪᓗᒋᑦ ᑐᓂᕐᕈᑎᒃᓴᖏᓐᓂᒃ ᒎᑎᒧᑦ ᕿᓚᖕᒦᑦᑐᒧᑦ, ᐅᕝᕙᓗ ᓂᐊᖂᔭᒃᓴᓂᒃ, ᑕᕆᐅᓂᒃ, ᕔᓂᓂᒃ, ᐅᕝᕙᓗ ᓇᐹᕐᑑᑉ ᐅᕐᓱᖓᓂᒃ, ᑐᓂᕐᕈᓯᕐᑎᑦᓯᔩᑦ ᔨᕉᓴᓕᒦᑦᑐᑦ ᐱᔪᒪᔭᖏᑦ ᒪᓕᒡᓗᒋᑦ.

¹⁰ ᑕᒪᓐᓇ ᐱᓇᓱᐊᕐᑕᐅᔪᒃᓴᐅᕗᖅ ᑖᒃᑯᐊ ᑐᓂᕐᕈᓯᕈᓐᓇᖁᓪᓗᒋᑦ ᒎᑎᒧᑦ ᕿᓚᖕᒦᑦᑐᒧᑦ ᑎᐱᑦᓯᐊᕆᒃᑐᒥᒃ, ᑐᒃᓯᐅᑦᔨᖁᓪᓗᒋᓪᓗ ᐅᕙᓐᓂᒃ ᐃᕐᓂᒃᑲᓂᒡᓗ ᓮᒻᒪᕐᑎᑕᐅᖁᓪᓗᑕ.

¹¹ ᑎᓕᓯᒃᑲᓐᓂᓕᕐᐳᖓᓗ ᓇᓪᓕᐊᑦ ᑕᒪᑐᒥᖓ ᓈᓚᖏᑦᑐᖅ ᑎᓕᓯᑦᔪᑎᒋᔭᓐᓂᒃ, ᐃᒡᓗᖓᑕ ᕿᒥᕐᓗᐊ ᕿᔪᐊᓗᒃ ᐲᕐᑕᐅᓗᓂ ᕿᔪᖕᒧᑦ ᓂᕕᓐᖓᕐᑕᐅᔪᒃᓴᐅᕗᖅ; ᐃᒡᓗᖓᓗ ᓯᖁᑦᑎᕐᑕᐅᓪᓗᓂ ᐃᒋᑕᒃᓴᕈᕐᑎᑕᐅᔪᒃᓴᐅᕗᖅ.

¹² ᒎᑎᐅᑉ ᔨᕉᓴᓕᒥᒃ ᓂᕈᐊᓚᐅᕐᑑᑉ ᑐᒃᓯᐊᕐᕕᐅᔪᒪᓪᓗᓂ ᓵᓚᒋᓕᒋᑦ ᐊᖓᔪᖅᑳᕐᔪᐊᑦ ᓄᓇᓕᕐᔪᐊᓪᓘᓐᓃᑦ ᑖᑦᓱᒥᖓ ᐱᖁᔭᒥᒃ ᐊᓯᕈᐃᔪᑦ ᐊᓯᕈᐃᓇᓱᐊᕐᑐᓪᓘᓐᓃᑦ ᑐᒃᓯᐊᕐᕕᒡᔪᐊᒥᒃ ᑍᑲᓃᑦᑐᒥᒃ. ᐅᕙᖓ ᑍᕉᓯ ᑎᓕᓯᕗᖓ; ᑎᓕᓯᑦᔪᑎᒋᔭᕋᓗ ᑲᑦᓱᒊᑦᓯᐊᕐᑐᒥᒃ ᓈᓚᒃᑕᐅᔪᒃᓴᐅᕗᖅ.”

ᑐᒃᓯᐊᕐᕕᒡᔪᐊᑉ ᐱᔭᕇᕐᑕᐅᓂᖓ ᐃᑦᔪᕐᓁᑎᑕᐅᓂᖓᓗ

¹³ ᑕᕝᕙ ᑕᑎᓁ, ᐊᐅᓚᑦᓯᔨ ᑰᑉ ᐃᕗᕅᑎᐅᑉ ᐊᑭᐊᓂ ᓯᑕᕆ-ᐳᔨᓁᒥᓗ, ᐊᓯᖏᓪᓗ ᐱᓇᓱᐊᖃᑎᖏᑦ ᐊᖓᔪᖅᑳᕐᔪᐊᑉ ᑍᕉᓯᐅᑉ ᐱᖁᔭᖓᓂᒃ ᐊᑐᓚᐅᕐᐳᑦ.

¹⁴ ᔫᑎᑦ ᓯᕗᓕᕐᑎᖏᑦ ᐱᕙᓪᓕᐊᒻᒪᕆᓚᐅᕐᐳᑦ ᑐᒃᓯᐊᕐᕕᒡᔪᐊᒥᒃ ᓴᓇᓪᓗᑎᒃ ᓇᓚᐅᑦᑍᑦᔪᑕᐅᓚᐅᕐᑐᓂᒃ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᖕᓄᑦ ᕼᐊᒊᒧᑦ ᓴᑲᕅᐊᒧᓪᓗ ᐃᑑᑉ ᐃᕐᓂᖓᓄᑦ. ᐱᔭᕇᓚᐅᕐᐳᑦ ᑐᒃᓯᐊᕐᕕᒡᔪᐊᒥᒃ ᑎᓕᔭᐅᓚᐅᕐᓂᕐᒥᓂᒃ ᐃᓴᕆᐊᓕᒥᐅᑦ ᒎᑎᖓᓄᑦ, ᓮᕋᓯᐅᓪᓗ ᑎᓕᓯᓂᖓᒍᑦ, ᑍᕉᓯᐅᓪᓗ, ᐋᕐᑕᔮᒃᓯᐅᓪᓗ ᐊᖓᔪᖅᑳᕐᔪᐊᑉ ᐴᕐᓯᐊᒥ.

¹⁵ ᐱᔭᕇᓚᐅᕐᐳᑦ ᑐᒃᓯᐊᕐᕕᒡᔪᐊᒥᒃ ᐊᑖᑉ ᑕᖅᑭᐅᑉ ᐅᓪᓗᖓᑕ ᐱᖓᔪᐊᓐᓂ, ᐊᖓᔪᖅᑳᕐᔪᐊᑉ ᑍᕉᓯᐅᑉ ᐊᖓᔪᖅᑳᕐᔪᐊᖑᓂᖓᑕ ᐊᕐᕌᒍᖓᑕ ᐱᖓᓲᔪᕐᑐᖓᓂ.

¹⁶ ᐊᒻᒪ ᐃᓴᕆᐊᓕᒥᐅᑦ ᐃᓄᖁᑎᖏᑦ ᑐᓂᕐᕈᓯᕐᑎᑦᓯᔩᑦ, ᓕᕔᑏᑦ, ᐊᓯᓕᒫᖏᓪᓗ ᐊᐅᓪᓚᕈᑦᔭᐅᓯᒪᕕᖕᒥᓂᑦ ᐅᑎᓚᐅᕐᑐᑦ ᑐᒃᓯᐊᕐᕕᒡᔪᐊᑉ ᐃᑦᔪᕐᓁᑎᑕᐅᓂᖓᓂᒃ ᓇᓪᓕᐅᓐᓂᕐᓯᐅᓚᐅᕐᐳᑦ ᖁᕕᐊᓱᒃᑐᐊᓘᓪᓗᑎᒃ.

¹⁷ ᐃᑦᔪᕐᓁᑎᑦᓯᑎᓪᓗᒋᑦ ᑐᒃᓯᐊᕐᕕᒡᔪᐊᒥᒃ ᑐᓂᕐᕈᓯᓚᐅᕐᐳᑦ ᐃᒻᒧᒃᓯᐅᒊᑦ ᐊᖑᓴᓪᓗᖏᓐᓂᒃ 100ᓂᒃ, ᓰᐱᐅᓪᓗ ᐊᖑᓴᓪᓗᖏᓐᓂᒃ 200ᓂᒃ, ᓰᐱᐅᓪᓗ ᓄᕐᕋᐅᔭᖏᓐᓂᒃ 400ᓂᒃ, ᒎᑦᓯᓂᒡᓗ ᐊᖑᓴᓪᓗᕐᓂᒃ 12ᓂᒃ ᐊᔪᕐᓂᕐᒧᑦ ᑐᓂᕐᕈᑎᓂᒃ, ᐃᓴᕆᐊᓕᒥᐅᑦ ᑭᖑᕚᕇᖏᑦ ᐊᑐᓂᑦ ᒪᓕᒡᓗᒋᑦ.

¹⁸ ᐋᖅᑭᒃᓱᐃᓚᐅᕐᐳᑦ ᑐᓂᕐᕈᓯᕐᑎᑦᓯᔩᑦ ᐱᓇᓱᐊᕐᕕᒃᓴᖏᓐᓂᒃ ᓕᕔᑎᓪᓗ ᑐᒃᓯᐊᕐᑎᑦᓯᖃᑦᑕᕐᓂᒃᓴᖏᓐᓂᒃ ᑐᒃᓯᐊᕐᕕᒡᔪᐊᒥ ᔨᕉᓴᓕᒦᑦᑐᒥ, ᒨᓯᓯᐅᑉ ᐊᓪᓚᖏᑕ ᐱᖁᔨᓂᖏᑦ ᒪᓕᒡᓗᒋᑦ.

ᓇᓪᓕᐅᓐᓂᕐᓯᐅᕐᓂᖅ ᖄᖏᕐᑕᐅᕕᖕᒥᒃ

¹⁹ ᐃᓄᐃᑦ ᐅᑎᓚᐅᕐᑐᑦ ᐊᐅᓪᓚᕈᑦᔭᐅᓯᒪᕕᖕᒥᓂᑦ ᓇᓪᓕᐅᓂᕐᓯᐅᖃᑦᑕᓚᐅᕐᐳᑦ ᖄᖏᕐᑕᐅᕕᖕᒥᒃ ᐅᓪᓗᐃᑦ 14ᖓᓂ ᑕᖅᑭᐅᑉ ᓯᕗᓪᓕᕐᐹᖓᓂ.

²⁰ ᑐᓂᕐᕈᓯᕐᑎᑦᓯᔩᑦ ᓕᕔᑏᓪᓗ ᐃᒻᒥᖕᓂᒃ ᐃᑦᔪᕐᓁᓕᑎᓚᐅᕐᐳᑦ; ᓴᓗᒻᒪᕐᑎᑕᐅᔪᐃᓐᓇᐅᓪᓗᑎᒃ ᐱᐅᓯᖅ ᒪᓕᒡᓗᒍ. ᓕᕔᑏᑦ ᑐᖁᑦᓯᓚᐅᕐᐳᑦ ᓰᐲᑦ ᓄᕐᕋᐅᔭᖏᓐᓂᒃ ᖄᖏᕐᑕᐅᕕᖕᒥ ᑐᓂᕐᕈᑎᒋᔭᐅᔪᓂᒃ ᐃᓄᓕᒫᓄᑦ ᐅᑎᓚᐅᕐᑐᑦ ᑭᖑᕚᓕᒫᖏᓐᓄᑦ, ᐃᓚᒥᖕᓄᓪᓗ ᑐᓂᕐᕈᓯᕐᑎᑦᓯᔨᓄᑦ, ᐃᒻᒥᖕᓄᓪᓗ.

²¹ ᑕᕝᕙ ᑐᓂᕐᕈᑎᐅᔪᑦ ᓂᕆᔭᐅᓚᐅᕐᐳᑦ ᐃᓴᕆᐊᓕᒥᐅᓕᒫᓄᑦ ᐊᐅᓪᓚᕈᑦᔭᐅᓯᒪᕕᖕᒥᓂᑦ ᐅᑎᓚᐅᕐᑐᓕᒫᓂᒃ ᐃᓚᖃᕐᓗᑎᒃ ᐃᓅᖃᑎᒌᑦ ᐱᐅᓯᖏᓐᓂᒃ ᐊᑐᕈᓐᓃᕐᓗᑎᒃ ᒎᑎᖃᕈᒪᓕᕐᑐᓂᒃ ᐃᓴᕆᐊᓕᒥᐅᑦ ᒎᑎᖓᓂᒃ ᐊᑕᓂᕐᒥᒃ.

²² ᓇᓪᓕᐅᓐᓂᕐᓯᐅᓚᐅᕐᐳᑦ ᐳᕙᓪᓚᕐᓴᐅᑎᖃᖏᑦᑐᓂᒃ ᓂᐊᑰᔭᓂᒃ ᓇᓪᓕᐅᓐᓂᕐᓯᐅᕈᑎᒥᒃ ᐅᓪᓗᓂᒃ 7ᓂᒃ ᖁᕕᐊᓱᒡᓗᑎᒃ; ᐊᖓᔪᖅᑳᕐᔪᐊᖅ ᐊᓯᕆᐊᒥᐅᑕᖅ ᐊᑕᓂᐅᑉ ᐱᐅᒃᓴᕐᑎᓚᐅᕐᒪᒍ ᑖᒃᑯᓂᖓ, ᑖᑦᓱᒪ ᐃᑲᔪᕐᑐᓚᐅᕐᒪᒋᑦ ᐱᓇᓱᐊᕐᑎᓪᓗᒋᑦ ᐃᓴᕆᐊᓕᒥᐅᑦ ᒎᑎᖓᑕ ᑐᒃᓯᐊᕐᕕᒡᔪᐊᖓᓂᒃ ᓴᓇᑎᓪᓗᒋᑦ.