ᐄᓱᕋᐅᑉ ᐊᒡᓚᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᒃᓯᐊᕐᕕᒡᔪᐊᑉ ᓴᓇᔭᐅᒋᐊᒃᑲᓐᓂᓕᕐᓂᖓ

¹ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᒃ ᒪᕐᕉᒃ, ᕼᐊᒊ ᐊᒻᒪ ᓴᑲᕅᐊ ᐃᑑᑉ ᐃᕐᓂᖓ, ᐅᖃᓪᓚᓯᓚᐅᕐᐴᒃ ᐃᓴᕆᐊᓕᒥᐅᑦ ᒎᑎᖓᑕ ᐊᑎᖓᓂᒃ ᔫᑎᓄᑦ ᓄᓇᖃᕐᑐᓄᑦ ᔫᑕᒥ ᔨᕉᓴᓕᒥᓗ.

² ᑕᕝᕙ ᔨᕈᐸᐱᐅᓪ ᓯᐅᓪᑎᐅᑉ ᐃᕐᓂᖓ ᔩᓱᐊᓗ ᔫᔭᑕᐅᑉ ᐃᕐᓂᖓ ᐅᖃᐅᓯᕐᓂᒃ ᑐᓴᕋᒥᒃ, ᑐᒃᓯᐊᕐᕕᖕᒥᒃ ᓴᓇᒋᐊᓪᓚᓯᓚᐅᕐᐳᑦ ᔨᕉᓴᓕᒦᑦᑐᒥᒃ, ᑖᒃᑯᐊᒡᓗ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᒃ ᐃᑲᔪᓚᐅᕐᐴᒃ.

³ ᑕᕝᕔᓐᓇᑦᓴᐅᑎᒋ ᑕᑎᓁ ᐊᐅᓚᑦᓯᔨᐅᔪᖅ ᑰᑉ ᐃᕗᕅᑎᐅᑉ ᓴᐅᒥᖔᖓᓂᒥᐅᓄᑦ, ᓯᑕᕆ-ᐳᔨᓁᓗ ᐱᓇᓱᐊᖃᑎᑎᒃ ᐃᓚᒋᓪᓗᒋᑦ ᐂᕗᑦ ᔨᕉᓴᓕᒧᑦ ᑐᑭᓯᓇᓱᐊᕐᐳᓪᓗ ᐊᔪᐃᓐᓇᕐᓗᑎᒃ: “ᑭᓇᒨᑦ ᓴᓇᖁᔭᐅᓚᐅᕐᐱᓯ ᐆᒥᖓ ᑐᒃᓯᐊᕐᕕᖕᒥᒃ ᐊᕙᓗᕐᔪᐊᖓᓗ ᐱᔭᕇᕐᓗᒍ?”

⁴ ᑕᕝᕙ ᐊᐱᕐᓱᕐᒪᑕ ᑭᐅᓪᓗᑎᒍ ᑐᒃᓯᐊᕐᕕᖕᒥ ᐃᑲᔪᕐᑐᓕᒫᑦ ᐊᑎᖏᓐᓂᒃ ᐅᖃᐅᑎᓚᐅᕐᐸᕗᑦ.

⁵ ᒎᑎᐅᓪᓕ ᐅᐊᑦᓯᓚᐅᕐᐰᑦ ᔫᑎᑦ ᓯᕗᓕᕐᑎᖏᑦ, ᐴᕐᓯᐊᒥᐅᓪᓗ ᑲᒪᔨᖏᑦ ᓱᒋᐊᓚᐅᓐᖏᓚᑦ ᑎᑎᕋᓚᐅᖅᑳᖏᓐᓂᕐᒥᖕᓂ ᑭᐅᔭᐅᓚᐅᖅᑳᖏᓐᓂᕐᒥᖕᓂᓗ ᐊᖓᔪᖅᑳᕐᔪᐊᒧᑦ ᑍᕉᓯᒧᑦ. ᑕᕝᕙ ᑎᑎᕋᕐᓯᒪᔪᓂᒃ ᑭᐅᔭᐅᓚᐅᕐᐳᑦ.

⁶ ᐅᑯᐊ ᑕᕝᕙ ᑎᑎᖅᑲᑦ ᑕᑎᓁᑉ ᐊᐅᓪᓚᕐᑎᓚᐅᕐᑕᖏᑦ: ᐊᐅᓚᑦᓯᔨᐅᔪᒥᑦ ᑕᒪᑐᒪ ᑰᑉ ᐃᕗᕅᑎᐅᑉ ᐊᑭᐊᓂᒥᐅᓂ, ᓯᑕᕆ-ᐳᔨᓁᒥ, ᐱᓇᓱᐊᖃᑎᒋᔭᖏᓐᓂᓪᓗ, ᐴᕐᓯᐊᒥᐅᓄᑦ ᐊᖓᔪᖅᑳᕐᔪᐊᕐᒧᑦ ᑍᕉᓯᒧᑦ.

⁷ ᐅᓂᒃᑲᐅᓯᕆᓚᐅᕐᑕᖏᑦ ᐊᐅᓪᓚᕐᑎᓪᓗᒋᓪᓗ ᐊᖓᔪᖅᑳᕐᔪᐊᒧᑦ ᐃᒤᓕᖓᕗᑦ: “ᐊᖓᔪᖅᑳᕐᔪᐊᒧᑦ ᑍᕉᓯᒧᑦ: ᐊᐅᓚᑦᓯᓃᑦ ᓮᒪᓂᖃᑦᓯᐊᕐᓕ ᐃᓄᓕᒫᓄᓪᓗ ᓮᒪᓇᕐᑐᖃᕐᓕ.

⁸ ᐊᖓᔪᖅᑳᕐᔪᐊᖅ ᖃᐅᔨᒪᔪᒃᓴᐅᕗᑎᑦ ᔫᑕᐅᑉ ᓄᓇᖓᓄᐊᓚᐅᕋᑦᑕ, ᑕᑯᓚᐅᕐᐳᒍᓪᓗ ᒎᑎᐅᑉ ᐱᓯᑎᒻᒪᕆᐊᓘᑉ ᑐᒃᓯᐊᕐᕕᖓ ᓴᓇᒋᐊᓪᓚᒃᑕᐅᓕᕐᒥᖕᒪᑦ ᐅᔭᕋᒡᔪᐊᓄᑦ ᑭᒃᐹᕆᒃᑐᓄᑦ, ᕿᔪᖕᓂᒡᓗ ᕿᒥᕐᓗᖃᕐᓗᑎᒃ ᐊᑭᓐᓇᒨᓕᖓᔪᓂᒃ, ᐱᓇᓱᐊᕐᑐᑦ ᐱᑦᓯᐊᒻᒪᕆᒐᓱᐊᕐᓱᑎᒃ ᑲᔪᓯᒐᓱᑦᓯᐊᕐᑐᑦ.

⁹ ᐊᐱᕐᓱᓚᐅᕋᑦᑎᒍᑦ ᐃᓄᖕᓄᑦ ᓯᕗᓕᕐᑏᑦ ᖃᐅᔨᔪᒪᓪᓗᑕ ᑭᓇᒧᑦ ᐱᔪᓐᓇᕐᓯᑎᑕᐅᓚᐅᕐᒪᖔᑕ ᑐᒃᓯᐊᕐᕕᖕᒥᒃ ᓴᓇᒋᐊᓪᓚᖁᔭᐅᓪᓗᑎᒃ ᐃᓚᒃᓴᖃᕐᑎᓪᓗᒍᓗ.

¹⁰ ᐊᐱᕐᓱᓚᐅᕆᕙᕗᑦ ᑭᓇᒃᑯᒃ ᓯᕗᓕᕐᑎᐅᖕᒪᖔᑕ ᐊᑎᖏᑦ ᐅᖃᐅᓯᕆᔪᓐᓇᕈᒪᓪᓗᒋᑦ ᐃᓕᖕᓄᑦ ᐃᖅᑲᓁᔭᕐᑐᑦ.

¹¹ ᑭᐅᓚᐅᕐᐳᑦ, ᐅᖃᕐᓗᑎᒃ: ‘ᒎᑎᐅᑉ ᕿᓚᖕᒧᑦ ᓄᓇᒧᓪᓗ ᑭᒡᒐᕆᕚᑎᒍᑦ, ᓴᓇᒋᐊᓪᓚᓕᕐᑕᕗᑦ ᑐᒃᓯᐊᕐᕕᒃ ᑍᑦᓱᒪᓂᐊᓗᒃ ᓴᓇᔭᐅᓚᐅᕐᓯᒪᔪᖅ ᐱᓯᑎᐊᓗᖕᓄᑦ ᐃᓴᕆᐊᓕᒥᐅᑦ ᐊᖓᔪᖅᑳᕐᔪᐊᖏᓐᓄᑦ.

¹² ᓯᕗᓕᕕᓂᑦᑕᓕ ᕿᓚᐅᑉ ᒎᑎᖓ ᓂᓐᖓᒃᑎᓚᐅᕐᒪᒍ, ᓵᓚᐅᑎᓚᐅᕐᒪᒋᓪᓗ ᐊᖓᔪᖅᑳᕐᔪᐊᒧᑦ ᓂᐱᑯᓁᓴᒧᑦ ᐹᐱᓘᓂᒥᐅᑕᕐᒧᑦ, ᐊᖓᔪᖅᑳᕐᔪᐊᖑᓚᐅᕐᑐᖅ ᑲᐅᓪᑎᐊᒥᐅᓄᑦ ᐊᐅᓚᑦᓯᓂᓕᒫᖓᓂ, ᑐᒃᓯᐊᕐᕕᒡᔪᐊᕐᓗ ᐊᓯᕈᕐᑕᐅᓚᐅᕐᐳᖅ, ᐃᓄᖏᓪᓗ ᐊᐅᓪᓚᕈᑦᔭᐅᓪᓗᑎᒃ ᐹᐱᓘᓂᒧᑦ.

¹³ ᐊᖓᔪᖅᑳᕐᔪᐊᖅ ᓮᕋᓯ ᐊᕐᕌᒍᒥ ᓯᕗᓪᓕᕐᐹᒥ ᐊᐅᓚᑦᓯᔨᐅᑎᓪᓗᒍ ᐹᐱᓘᓂᒥ, ᓮᕋᓯ ᑎᓕᓯᓚᐅᕐᐳᖅ ᑐᒃᓯᐊᕐᕕᒡᔪᐊᖅ ᐋᖅᑭᒋᐊᕐᑕᐅᖁᓪᓗᒍ.

¹⁴ ᐅᑎᕐᑎᓚᐅᕐᐰᓪᓗ ᒎᓗᐃᑦ ᓯᐅᓪᕕᕇᓪᓗ ᑐᒃᓯᐊᕐᕕᐅᑉ ᓱᓇᑐᐃᓐᓇᖁᑎᖏᑦ ᑖᑦᓱᒪ ᓂᐱᑯᓁᓴᐅᑉ ᑎᒍᓚᐅᕐᑕᖏᑦ ᔨᕉᓴᓕᒥᑦ ᑐᒃᓯᐊᕐᕕᖕᒧᐊᕈᑎᓪᓗᒋᓪᓗ ᐹᐱᓘᓂᒦᑦᑐᒧᑦ, ᐊᖓᔪᖅᑳᕐᔪᐊᑉ ᓮᕋᓯᐅᑉ ᐅᑎᕐᑎᓚᐅᕐᐰᑦ ᐊᖑᒻᒧᑦ ᓯᓯᐸᔮᕐᒧᑦ, ᑎᓕᓚᐅᕐᑕᒥᓄᑦ ᐊᐅᓚᑦᓯᔨᐅᖁᓪᓗᒍ ᔫᑎᐊᒥ.

¹⁵ ᐊᖓᔪᖅᑳᕐᔪᐊᑉ ᐅᖃᐅᑎᓚᐅᕐᒪᒍ, “ᑖᒃᑯᐊ ᐅᑎᕐᑎᓐᓂᐊᕐᐸᑎᑦ ᑐᒃᓯᐊᕐᕕᒡᔪᐊᒧᑦ ᔨᕉᓴᓕᒦᑦᑐᒧᑦ, ᑐᒃᓯᐊᕐᕕᒡᔪᐊᕐᓗ ᓴᓇᔭᐅᒋᐊᓪᓚᖁᓪᓗᒍ ᐃᓂᑐᖃᕆᓚᐅᕐᑕᖓᓂ.”

¹⁶ ᑍᒤᒻᒪᑦ ᓯᓯᐸᔮᕐ ᐂᓚᐅᕐᐳᖅ ᑐᒃᓯᐊᕐᕕᒡᔪᐊᓪᓗ ᑐᓐᖓᕕᖓᓂᒃ ᐋᖅᑮᓪᓗᓂ ᔨᕉᓴᓕᒦᑦᑐᒥ; ᐱᓇᓱᐊᕐᑕᐅᓂᖓ ᑲᔪᓰᓐᓇᕋᓗᐊᕐᐳᖅ ᑍᑲᓐᖓᓂᑦ ᐅᓪᓗᒥᒧᑦ, ᑭᓯᐊᓂᓕ ᓱᓕ ᐱᔭᕇᓐᖏᓚᖅ.’

¹⁷ ᒫᓐᓇᓕ ᐊᖓᔪᖅᑳᕐᔪᐊᖅ ᖃᓄᐃᒃᓴᖏᒃᑯᕕᑦ, ᕿᓂᕐᑎᑦᓯᓚᐅᕆᑦ ᐹᐱᓘᓂᐅᑉ ᑎᑎᕋᖁᑎᖏᓐᓂ ᐊᖓᔪᖅᑳᕐᔪᐊᖅ ᓮᕋᓯ ᑎᓕᓯᓐᓂᕐᒪᖔᑦ ᑐᒃᓯᐊᕐᕕᒡᔪᐊᖅ ᔨᕉᓴᓕᒦᑦᑐᖅ ᐋᖅᑭᒋᐊᕐᑕᐅᖁᓪᓗᒍ, ᖃᐅᔨᑎᓐᓂᐊᕐᐸᑦᑎᒍᓪᓗ ᖃᓄᐃᓕᐅᖁᔨᒻᒪᖔᕐᐱᑦ ᑕᒪᓐᓇ ᐱᓪᓗᒍ.”