ᐄᓱᕋᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᒃᓯᐊᕐᓂᐅᑉ ᐱᒋᐊᓕᖅᑭᒃᑕᐅᓂᖓ ᔨᕉᓴᓕᒥ

¹ ᑕᖅᑭᐅᑉ 7ᒋᓕᕐᑕᖓᓂ, ᐃᓴᕆᐊᓕᐅᑉ ᐃᓄᖏᑦ ᓄᓇᑖᕐᑐᐃᓐᓇᐅᓚᐅᕐᐳᑦ ᓄᓇᒥᖕᓂ, ᐃᓄᐃᓪᓗ ᑲᑎᓚᐅᕐᐳᑦ ᔨᕉᓴᓕᒥ ᐊᑕᐅᓯᐅᓕᖅᑲᖓᑦᓯᐊᕐᓗᑎᒃ.

² ᔩᓱᐊᓗ ᔫᔭᑕᐅᑉ ᐃᕐᓂᖓ, ᑐᓂᕐᕈᓯᕐᑎᑦᓯᔨᐅᖃᑎᖏᓪᓗ, ᔨᕈᐸᐱᐅᓗ ᓯᐅᓪᑎᐅᓕᐅᑉ ᐃᕐᓂᖓ ᐃᓚᓂ ᐃᓚᒋᓪᓗᒋᑦ, ᐃᓴᕆᐊᓕᒥᐅᑦ ᒎᑎᖓᑕ ᑐᓂᕐᕈᓯᕕᖓᓂᒃ ᐋᖅᑭᒃᓱᐃᓚᐅᕐᐳᑦ, ᑐᓂᕐᕈᑎᓂᒃ ᐃᑯᐊᓪᓔᔪᓐᓇᕐᓯᖁᓪᓗᒋᑦ ᒎᑎᐅᑉ ᐃᓄᖁᑎᖓᑕ ᒨᓯᓯᐅᑉ ᐱᖁᔭᖏᑕ ᐱᖁᔨᓂᖏᑦ ᒪᓕᒡᓗᒋᑦ.

³ ᑖᒃᑯᐊ ᐊᐅᓚᕈᑦᔭᐅᓯᒪᔪᕕᓃᑦ ᐅᑎᓚᐅᕐᑐᑦ ᐃᓄᖕᓂᒃ ᓄᓇᖃᕐᑐᓂ ᑲᑉᐱᐊᓱᒃᑲᓗᐊᕐᓱᑎᒃ, ᑐᓂᕐᕈᓯᕐᕕᖕᒥᒃ ᓴᓇᒋᐊᓯᐊᓚᐅᕐᐳᑦ ᐃᓂᑐᖃᖓᓂ, ᑐᓂᕐᕈᓯᕆᐊᓪᓚᖃᑦᑕᓕᓚᐅᕆᕗᑦ ᐃᑯᐊᓪᓔᓪᓗᑎ ᑐᓂᕐᕈᑎᓂᒃ ᐅᓪᓛᒃᑯᑦ ᐅᓐᓄᒃᑯᓪᓗ.

⁴ ᓇᓪᓕᐅᓐᓂᕐᓯᐅᓚᐅᕆᕗᑦ ᑐᐲᓐᓇᕐᒥ ᐃᓂᖃᖃᑕᕐᓂᕕᓂᕐᒥᒃ ᑕᐸᓈᑯᒥᒃ, ᐊᒡᓚᖕᓂ ᐊᒡᓚᐅᑕᐅᓯᒪᓂᖓ ᒪᓕᒃᓗᒍ; ᖃᐅᑕᒫᓪᓗ ᑐᓂᕐᕈᓯᖃᑦᑕᓚᐅᕐᐳᑦ ᐅᓪᓗᒧᑦ ᑐᓂᕐᕈᓯᕆᐊᓕᖕᒥᖕᓂᒃ ᒪᓕᒃᓗᑎᒃ.

⁵ ᑭᖑᓂᖓᒍᓪᓗ ᑐᓂᕐᕈᓯᖃᑦᑕᓕᓚᐅᕆᕗᑦ ᑐᓂᕐᕈᓯᕈᑎᓪᓚᕆᖕᓂᒃ ᐃᑯᐊᓚᑎᑕᐅᓪᓗᑎᒃ, ᑐᓂᕐᕈᑏᓪᓗ ᑕᖅᑭᓂᕋᑖᒧᑦ ᓇᓪᓕᐅᓐᓂᕐᓯᐅᕈᑎᒧᑦ ᑐᓂᕐᕈᑎᒃᓮᑦ ᐊᓯᖏᓪᓗ ᓇᓪᓕᐅᓐᓂᑐᐃᓐᓁᑦ ᐊᑕᓂᕐᒧᑦ ᐃᑦᔪᕐᓁᑎᑕᐅᓯᒪᔪᑦ ᐊᑐᕐᑕᐅᖃᑦᑕᓚᐅᕆᕗᑦ, ᐃᓄᓕᒫᓪᓗ ᐃᓱᒪᕐᓱᕐᓗᑎᒃ ᑐᓂᕐᕈᓯᖃᑦᑕᓚᐅᕐᐳᑦ ᐊᑕᓂᕐᒧᑦ ᐱᔪᒪᓂᑎᒃ ᒪᓕᒃᓗᒍ.

⁶ ᑐᒃᓯᐊᕐᕕᐅᑉ ᐋᖅᑭᒋᐊᕐᑕᐅᓂᖓ ᓱᓕ ᐱᒋᐊᕐᑕᐅᓚᐅᖏᒃᑲᓗᐊᕐᑎᓪᓗᒍ, ᑕᖅᑭᐅᑉ 7ᖓᓂ ᐅᓪᓘᑉ ᓯᕗᓕᕐᐹᖓᓂ ᐱᒋᐊᓚᐅᕐᐳᑦ ᑐᓂᕐᕈᓯᕐᓱᑎᒃ ᐃᑯᐊᓚᑎᒋᐊᓕᖕᓂᒃ ᐊᑕᓂᕐᒧᑦ.

ᑐᒃᓯᐊᕐᕕᐅᑉ ᐋᖅᑭᒋᐊᕐᑕᐅᓂᖓ

⁷ ᐃᓄᐃᑦ ᑮᓇᐅᔭᓂᒃ ᑐᓂᓯᓚᐅᕐᐳᑦ ᐊᑭᓕᐅᑎᒃᓴᓂᒃ ᐅᔭᕋᓕᕆᔨᓄᑦ ᕿᔪᓕᕆᔨᓄᓪᓗ ᑐᓂᓯᓚᐅᕆᕗᑦ ᓂᕿᒃᓴᓂᒃ, ᐃᒥᒐᒃᓴᓂᒡᓗ, ᓇᐹᕐᑑᓪᓗ ᐅᕐᓱᖏᓐᓂᒃ ᑐᔫᑎᒃᓴᓂᒃ ᐃᒡᓗᒐᓴᖕᓄᑦ ᑍᕆᒧᑦ ᓮᑐᓂᒧᓪᓗ ᑕᐅᕐᓰᒍᑎᒃᓴᓂᒃ ᓰᑕᕆᓄᑦ ᓯᑎᔪᓄᑦ ᓕᐸᓇᓂᒥᑦ ᐱᓯᒪᔪᓄᑦ, ᑎᑭᐅᑦᔭᐅᒐᔭᕐᑐᓄᑦ ᑕᕆᐅᒃᑯᑦ ᔮᐸᒃᑯᑦ, ᑕᒪᓐᓇ ᐱᓇᓱᐊᕐᑕᐅᓚᐅᕐᐳᖅ ᐊᖏᕈᑎᒋᔭᐅᓯᒪᖕᒪᑦ ᐊᖓᔪᖅᑳᕐᔪᐊᕐᒧᑦ ᓮᕋᓯᒧᑦ ᐴᕐᓯᐊᒥᐅᒧᑦ.

⁸ ᑕᖅᑭᐅᑉ ᐂᑉᐸᖓᓂ ᐊᕐᕌᒎᑉ ᓯᕗᓪᓕᕐᐹᖓᓂ ᐅᑎᓚᐅᕐᑎᓪᓗᒋᑦ ᑐᒃᓯᐊᕐᕕᖕᒧᑦ ᔨᕉᓴᓕᒧᑦ, ᐱᓇᓱᐊᕆᐊᓯᓚᐅᕐᐳᑦ, ᔨᕈᐸᐱᐅᓪ ᓯᐅᓪᑎᐅᑉ ᐃᕐᓂᖓ, ᔩᓱᐊᓗ ᔫᔭᑕᐅᑉ ᐃᕐᓂᖓ, ᐊᓯᓕᒫᖏᓪᓗ ᓄᓇᖅᑲᑎᖏᑦ ᑐᓂᕐᕈᓯᕐᑎᑦᓯᔩᓪᓗ ᓕᕔᑎᓪᓗ, ᐊᓯᓕᒫᖏᓪᓗ ᐊᐅᓚᕈᑦᔭᐅᓯᒪᔪᕕᓃᑦ ᐅᑎᓚᐅᕐᑐᑦ ᔨᕉᓴᓕᒧᑦ, ᐃᑲᔪᕐᑎᒌᒃᓗᑎᒃ ᐱᓇᓱᐊᓕᓚᐅᕐᐳᑦ, ᓕᕔᑎᓕᒫᑦ ᐊᕐᕌᒍᓖᑦ 20ᓂᒃ ᐅᖓᑖᓂᓗ ᑲᒪᔨᐅᑎᑕᐅᓚᐅᕐᐳᑦ ᑐᒃᓯᐊᕐᕕᖕᒥᒃ ᓴᓇᒋᐊᓕᕐᑎᓪᓗᒋᑦ.

⁹ ᓕᕔᑎ ᔩᓱᐊ ᐃᕐᓂᖏᓪᓗ ᐃᓚᖏᓪᓗ, ᑲᑦᒤ-ᓗ ᐃᕐᓂᖏᓪᓗ, ᔫᑕᐅᓪᓗ ᐃᓚᖏᑦ ᑲᑐᑦᔨᓪᓗᑎᒃ ᐃᑲᔪᓕᓚᐅᕐᐳᑦ ᑐᒃᓯᐊᕐᕕᒃ ᐋᖅᑭᒋᐊᕐᑕᐅᓕᕐᑎᓪᓗᒍ; ᐃᑲᔪᕐᑕᐅᓪᓗᑎᒃ ᓕᕔᑎᓄᑦ ᕼᐃᓇᑕᐅᑉ ᐃᕐᓂᖏᓐᓄᑦ ᐃᓚᖏᓐᓄᓪᓗ.

¹⁰ ᐃᖅᑲᓁᔭᕐᑏᑦ ᑐᓐᖓᕕᓕᐅᓕᕐᑎᓪᓗᒋᑦ ᑐᒃᓯᐊᕐᕕᖕᒥᒃ, ᑐᓂᕐᕈᓯᕐᑎᑦᓯᔩᑦ ᐊᓐᓄᕌᕐᓯᒪᓪᓗᑎᒃ ᐃᓂᒥᓄᐊᓚᐅᕐᐳᑦ ᑎᑦᑐᓚᐅᓯᔭᕐᓱᑎᒃ, ᓕᕔᑏᓪᓗ ᐊᓴᐸᐅᑉ ᐃᕐᓂᖏᑦ ᓂᑯᕕᖓᓚᐅᕐᐳᑦ ᓯᕙᓂᐅᑎᓕᔭᕐᓱᑎᒃ, ᓂᕐᑐᐃᓪᓗᑎᒃ ᐊᑕᓂᕐᒥᒃ, ᒪᓕᒃᓱᑎᒃ ᐊᑐᕐᑕᐅᖁᔭᐅᓯᒪᔪᓂᒃ ᑍᕕᑎᒧᑦ ᐊᖓᔪᖅᑳᕐᔪᐊᕐᒧᑦ.

¹¹ ᐃᓐᖏᓚᐅᕐᐳᑦ ᐊᑕᓂᕐᒥᒃ ᓂᕐᑐᐃᓪᓗᑎᒃ, ᓇᓪᓕᒃᑭᑕᕐᓗᑎᒃ ᐅᑎᕐᑕᕐᓂᖓᓂᒃ: “ᐊᑕᓂᖅ ᐱᐅᔫᕗᖅ, ᓇᒡᓕᖕᓂᖓᓗ ᐃᓴᕆᐊᓕᒧᑦ ᐃᓱᖃᖏᑦᑑᕗᖅ.” ᐱᕕᓕᒫᒥᖕᓄᑦ ᐃᓄᓕᒫᑦ ᕾᒐᓛᓚᐅᕐᐳᑦ, ᓂᕐᑐᐃᓪᓗᑎᒃ ᐊᑕᓂᕐᒥᒃ, ᐱᑦᔪᑎᖃᕐᓗᑎᒃ ᑐᒃᓯᐊᕐᕕᐅᑉ ᑐᓐᖓᕕᖓᑕ ᐱᒋᐊᕐᑕᐅᓂᖓᓂᒃ.

¹² ᐅᓄᕐᑐᑦ ᐃᓐᓇᐅᓂᕐᓮᑦ ᑐᓂᕐᕈᓯᕐᑎᑦᓯᔩᑦ, ᓕᕔᑏᓪᓗ, ᐃᓚᒌᓄᓪᓗ ᐊᖓᔪᖅᑲᐅᔪᑦ ᑕᑯᓚᐅᕐᓯᒪᔪᑦ ᑐᒃᓯᐊᕐᕕᖕᒥᒃ ᓯᕗᓪᓕᕐᒥᒃ, ᑕᑯᓐᓇᕐᑎᓪᓗᒋᑦ ᑐᒃᓯᐊᕐᕕᐅᑉ ᑐᓐᖓᕕᖓ ᐋᖅᑭᒃᑕᐅᓕᕐᒪᑦ, ᕿᐊᓯᓪᓗᑎᒃ ᓂᐹᓕᓚᐅᕐᐳᑦ. ᐊᓯᖏᓪᓕ ᑍᑲᓃᑦᑐᑦ ᐅᓄᕐᑐᑦ ᕾᒐᓛᓚᐅᕐᐳᑦ ᖁᕕᐊᓱᖕᓂᕐᒧᑦ.

¹³ ᑭᓇᒧᓪᓘᓐᓃᑦ ᖃᐅᔨᔭᐅᓚᐅᓐᖏᓚᖅ ᓇᓪᓕᐊᑦ ᕾᒐᓛᕐᒪᖔᑕ ᖁᕕᐊᓱᖕᓂᕐᒧᓪᓗ ᐃᓄᐃᑦ ᕿᐊᕙᓗᖏᑕ ᓂᐱᖃᓗᐊᕐᓂᖏᓐᓄᑦ, ᓂᐱᖅᑯᕐᑐᓗᐊᕐᓂᖏᓐᓄᓪᓗ ᐅᖓᓯᒃᑐᒥᑦ ᑐᓵᔭᐅᔪᓐᓇᓚᐅᕐᐳᑦ.