ᐄᓱᕋᐅᑉ ᐊᒡᓚᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᐸᓗᖎᔭᕐᓂᖅ ᓄᖅᑲᕐᑎᑦᓯᓂᕐᒧᑦ ᓄᓕᐊᓂᖃᑦᑕᕐᓂᕐᒥᒃ ᐃᓅᖃᑎᒃᓴᔭᕆᓐᖏᑕᒥᒃ

¹ ᐄᓱᕋ ᐅᑯᖓᓪᓗᓂ ᑐᒃᓯᐊᕐᑎᓪᓗᒍ ᑐᒃᓯᐊᕐᕕᒡᔪᐊᑉ ᓯᕗᕌᓂ, ᕿᐊᓪᓗᓂᓗ ᖃᕿᐊᓕᕐᓗᓂᓗ ᑖᒃᑯᐊ ᐊᔪᕐᑐᓕᓃᑦ ᐱᓪᓗᒋᑦ, ᐃᓴᕆᐊᓕᒥᐅᑦ ᐅᓄᕐᑐᒻᒪᕆᐊᓗᐃᑦ ᐊᖑᑏᑦ, ᐊᕐᓁᓪᓗ, ᓱᕈᓰᓪᓗ ᑲᑎᕙᓪᓕᐊᓕᕐᐳᑦ ᑖᑦᓱᒧᖓ ᐃᓚᓕᐅᑎᕙᓪᓕᐊᓪᓗᑎᒃ; ᐊᒃᓱᐊᓗᒃ ᕿᐊᓪᓗᑎᒃ.

² ᑕᕝᕙ ᓯᑲᓁᐊ ᔨᕼᐃᐅᓕᐅᑉ ᐃᕐᓂᖓ, ᐃᓛᒻ ᑭᖑᕚᖏᓐᓂᑦ ᐱᓯᒪᔪᖅ, ᐅᖃᕐᐳᖅ ᐄᓱᕋᒧᑦ, “ᐅᒃᐱᕐᓂᕗᑦ ᒎᑎᒧᑦ ᓯᖁᒥᓯᒪᕗᖅ ᐂᑉᐸᕐᑖᕐᓯᒪᓂᑦᑎᓐᓄᑦ ᐃᓅᖃᑎᒃᓴᔭᕆᓐᖏᑕᑦᑎᓐᓂᒃ, ᑍᒤᒃᑲᓗᐊᕐᑎᓪᓗᒍ ᓱᓕ ᓂᕆᐅᖕᓂᒃᓴᖃᕐᐳᑦ ᐃᓴᕆᐊᓕᒥᐅᑦ.

³ ᒫᓐᓇᓕ ᐊᖏᖃᑎᒌᒍᑎᖃᕐᑐᒃᓴᐅᕗᒍᑦ ᒎᑎᑦᑎᓐᓄᑦ ᑖᒃᑯᐊ ᐊᕐᓁᑦ ᓄᓕᐊᕐᑖᕆᓯᒪᔭᕗᑦ ᕿᑐᕐᖓᖏᓪᓗ ᐊᐅᓪᓚᕐᑎᑦᓱᒪᓗᒋᑦ, ᐱᓇᓱᐊᕐᓂᐊᕐᐳᒍᑦ ᐃᓕᑦᓯ ᐃᓱᒪᓕᐅᕆᔨᐅᔪᓯ ᐊᑕᓂᑦᑎᓐᓄᑦ ᒎᑎᐅᑉ ᐱᖁᔭᖏᓐᓂᒃ ᐅᐱᒍᓱᒃᑐᓯ ᐱᖁᔭᑦᓯᓐᓂᒃ ᒪᓕᒡᓗᑕ; ᐊᑏ ᐱᓇᓱᐊᕐᑐᖃᓕᕐᓕ ᒎᑎᐅᑉ ᐱᖁᔭᖏᓐᓂ ᐱᓇᓱᐊᕐᑕᐅᖁᔭᐅᔪᑦ ᒪᓕᒡᓗᒋᑦ.

⁴ ᐃᓕᑦᓯ ᐱᓇᓱᐊᕐᑐᒃᓴᐅᕗᓯ ᐱᔭᕆᐊᓕᓯ ᒪᓕᒡᓗᒋᑦ. ᐅᕙᒍᑦ ᐃᑲᔪᕐᑐᕐᓂᐊᕐᐳᒍᑦ ᐃᓕᑦᓯᓐᓂᒃ, ᓴᐱᖏᓪᓗᓯ ᑲᔪᓯᓕᕆᑦᓯ ᑕᒪᓐᓇᓗ ᑲᔪᓯᑎᓪᓗᒍ.”

⁵ ᑕᕝᕙ ᐄᓱᕋ ᒪᑭᑉᐳᖅ, ᓯᕗᓕᕐᑎᓪᓗ ᑐᓂᕐᕈᓯᕐᑎᑦᓯᔨᓄᑦ, ᓕᕔᑎᓄᓪᓗ, ᐃᓄᓕᒫᓪᓗ ᐃᓴᕆᐊᓕᒃᑯᓐᓂᒃ ᐊᖏᒻᒪᕆᒃᑎᑦᓯᓕᕐᓗᑎᒃ ᑲᔪᓯᑎᓐᓂᐊᕐᑕᒥᖕᓂᒃ ᓯᑲᓂᐊᑉ ᐱᓇᓱᐊᕐᑕᐅᖁᔭᖓᓂᒃ ᐊᑐᖁᓪᓗᒋᑦ. ᑕᕝᕙ ᐊᖏᒻᒪᕆᒍᑎᒥᖕᓂᒃ ᐊᖏᕐᐳᑦ.

⁶ ᐄᓱᕋ ᑕᕝᕙᓐᖓᑦ ᑐᒃᓯᐊᕐᕕᒡᔪᐊᑉ ᓯᕗᕌᓂᑦ ᒪᑭᓪᓗᓂ, ᐂᓕᕐᐳᖅ ᔨᕼᐅᕼᐊᓇᒧᑦ ᐃᓔᐊᓯᐅᑉ ᐃᕐᓂᖓᓄᑦ ᐃᒡᓗᕈᓯᖓᓄᐊᕐᓗᓂᓗ, ᑕᕝᕙᓃᓕᕋᒥᓗ ᓂᕆᓚᐅᓐᖏᓚᖅ ᐃᒥᓚᐅᕋᓂᓗ, ᕿᒃᓵᒍᑎᖃᕐᓗᓂ ᐅᑎᓚᐅᕐᑐᐃᑦ ᐸᓯᔭᒃᓴᐅᓂᖏᑦ ᐱᓪᓗᒋᑦ.

⁷ ᑐᓴᕐᑕᐅᔭᕆᐊᓕᖕᓂᒃ ᐊᐅᓪᓚᕐᑎᑦᓯᓚᐅᕐᐳᑦ ᔨᕉᓴᓕᒧᑦ ᔫᑎᐊᒧᓪᓗ ᐊᓯᓕᒫᖏᓐᓄᓪᓗ ᐊᐅᓪᓚᕈᑦᔭᐅᓯᒪᔪᕕᓃᑦ ᐅᑎᕐᓯᒪᓕᕐᑐᑦ ᑭᖑᕚᖏᓪᓗ, ᑲᑎᖁᓪᓗᒋᑦ ᔨᕉᓴᓕᒥ,

⁸ ᐃᓄᖕᓄᑦ ᐊᖓᔪᖅᑳᖑᔪᑦ ᐱᖁᔨᓂᖏᑦ ᒪᓕᒡᓗᒋᑦ, ᕾᖁᔭᐅᔪᓪᓗ ᕾᓐᖏᑐᐊᕐᐸᑕ ᐅᓪᓘᑉ ᐱᖓᔪᒋᓕᕐᑕᖓᓂ, ᐱᖁᑎᓕᒫᖏᑦ ᐊᓯᕈᕐᑕᐅᒐᔭᕐᐳᑦ, ᐃᓚᒋᔭᐅᔪᓐᓃᕐᑎᑕᐅᓗᓂᓗ ᐅᑎᓚᐅᕐᑐᓄᑦ.

⁹ ᑕᕝᕙ ᐅᓪᓗᐃᑦ ᐱᖓᔪᒋᓕᕐᑕᖓᓂ, ᑕᖅᑭᐅᑉ 9ᖓᓂ ᐅᓪᓗᖓᑕ 20ᖓᓂ, ᐊᖑᑏᑦ ᔫᑕᐅᑉ ᐱᓐᔭᒥᓂᐅᓪᓗ ᑭᖑᕚᓕᒫᖏᑦ ᑲᑎᓚᐅᕐᐳᑦ ᔨᕉᓴᓕᒧᑦ ᑐᒃᓯᐊᕐᕕᒃᔪᐊᑉ ᐱᕕᑐᓂᖓᓂ ᐃᒃᓯᕙᓕᕐᓗᑎᒃ. ᑕᕝᕙ ᓯᓚᓗᒻᒪᕆᓕᕐᐳᖅ, ᓯᓚᖓ ᐱᓪᓗᒍ ᑲᑎᒪᓂᐅᓪᓗ ᐱᒻᒪᕆᐅᓂᖓᓄᑦ ᑕᒪᕐᒥᒃ ᓴᔪᓕᕐᐳᑦ.

¹⁰ ᑕᕝᕙ ᐄᓱᕋ ᑐᓂᕐᕈᓯᕐᑎᑦᓯᔨ ᓂᑯᕕᓪᓗᓂ ᐅᖃᓕᕐᐳᖅ, “ᐱᐅᖏᑦᑐᓕᓚᐅᕐᐳᓯ ᓄᓕᐊᓂᖕᓂᑦᓯᓐᓄᑦ ᐊᕐᓇᓂᒃ ᐃᓅᖃᑎᒃᓴᔭᕆᓐᖏᑕᑦᓯᓂᒃ, ᐃᓴᕆᐊᓕᒥᐅᓪᓗ ᐸᓯᔭᒃᓴᐅᓂᖏᑦ ᐃᓚᒃᑲᓐᓂᕐᓗᒋᑦ.

¹¹ ᒫᓐᓇᓕ ᖃᕿᐊᓕᓕᕆᑦᓯ ᐊᔪᕐᑐᓕᓂᑦᓯᓐᓂᒃ ᐊᑕᓂᕐᒧᑦ ᓯᕗᓕᑦᓯ ᒎᑎᖓᓄᑦ, ᑖᑦᓱᒪᓗ ᖁᕕᐊᒋᔭᖓᓂᒃ ᐱᓇᓱᐊᕐᓗᓯ; ᐊᕝᕗᑎᓕᕆᑦᓯ ᐃᓅᖃᑎᒃᓴᔭᕆᓐᖏᑕᑦᓯᓐᓂᑦ ᓄᓇᖃᖃᑎᑦᓯᓐᓂᑦ ᓄᓕᐊᓯᓗ ᐃᓅᖃᑎᒃᓴᔭᕆᓐᖏᑕᓯ ᐊᕕᓪᓗᓯᐅᒃ.”

¹² ᑕᕝᕙ ᐃᓄᐃᑦ ᑲᑎᒪᔭᕐᑐᕐᓯᒪᔪᑦ ᑭᐅᓪᓗᑎᒃ ᕾᒐᓪᓛᕐᐳᑦ, “ᐊᖏᕐᐳᒍᑦ! ᐅᖃᐅᓯᕆᔭᕐᓂᒃ, ᑍᒫᒃ ᐱᓇᓱᐊᕐᓂᐊᕐᐳᒍᑦ.”

¹³ ᐅᖃᕆᐊᓪᓚᓚᐅᕐᐳᑦ, “ᐃᓄᐃᑦ ᐅᓄᓗᐊᕐᒪᑕ; ᓯᓚᓗᓗᐊᕐᓗᓂᓗ ᓯᓚᑐᐃᓐᓇᕐᒥ ᐊᑯᓂ ᓇᖏᑐᐃᓐᓇᕈᓐᓇᓐᖏᓚᒍᑦ ᑍᒤᑦᑐᒥ. ᑕᒪᓐᓇ ᐱᔭᕇᕐᑕᐅᔪᓐᓇᖏᒻᒪᑦ ᐅᓪᓗᒥ ᐊᑕᐅᓯᕐᒥ ᐅᕝᕙᓘᓐᓃᑦ ᐅᓪᓘᖕᓂᒃ ᒪᕐᕉᖕᓂᒃ, ᐅᓄᓗᐊᕐᑐᒍᑦ ᐊᔪᕐᑐᓕᓂᕐᒥᒃ ᑕᒪᑐᒥᖓ ᐊᑐᕐᓯᒪᒐᑦᑕ.

¹⁴ ᐊᖓᔪᖅᑳᕗᑦ ᔨᕉᓴᓕᒦᑬᓐᓇᕐᓗᑎᒃ ᑕᒪᑐᒥᖓ ᐱᓇᓱᐊᓚᐅᕐᓕᑦ; ᑍᒃᑯᐊᓗ ᓄᓕᐊᓖᑦ ᕾᖁᔭᐅᓛᕐᐳᑦ ᐅᓪᓗᒥ ᕾᖁᔭᐅᓯᒪᕕᖕᒥᓂ, ᐃᓚᖃᕐᓗᑎᒃ ᓯᕗᓕᕐᑎᓂᒃ ᐃᖅᑲᕐᑐᐃᔨᓂᒡᓗ ᐃᒡᓗᒐᓴᒡᔪᐊᖃᕐᕕᖕᒥᓂᑦ, ᑍᒤᓕᐅᕈᑦᑕ ᒎᑎᐅᑉ ᓂᓐᖓᐅᒪᓂᖓ ᑕᒪᓐᓇ ᐱᓪᓗᒍ ᕿᒪᕉᑎᓂᐊᕐᐳᖅ.”

¹⁵ ᑭᓇᓘᓐᓃᑦ ᑕᒪᑐᒥᖓ ᐊᑭᕋᕐᑐᓚᐅᓐᖏᓚᖅ, ᐅᑯᐊᑐᐊᖅ ᔫᓇᑕᓂ ᐊᓴᕼᐃᐅᓕᐅᑉ ᐃᕐᓂᖓ ᔭᕼᐊᔧᐊᓗ ᑎᒡᕙᐅᑉ ᐃᕐᓂᖓ ᑕᒪᑐᒥᖓ ᐊᑭᕋᕐᑐᓚᐅᕐᐴᒃ, ᐃᑲᔪᕐᑐᕐᑕᐅᓪᓗᑎᒃ ᓕᕔᑏᖕᓄᑦ ᒥᓱᓚᒻᒧᑦ ᓴᐱᑍᒧᓪᓗ.

¹⁶ ᑕᕝᕙ ᐊᐅᓪᓚᕈᑦᔭᐅᓯᒪᔪᕕᓃᑦ ᐅᑎᓚᐅᕐᑐᑦ ᓈᒻᒪᒃᓴᓚᐅᕐᐳᑦ ᐱᓇᓱᐊᕐᑕᐅᔪᒥᒃ ᑍᒤᓕᐅᓕᕐᓗᑎᒡᓗ. ᑍᒤᒻᒪᑦ ᐄᓱᕋ ᑐᓂᕐᕈᓯᕐᑎᑦᓯᔨ ᑎᓕᓯᓚᐅᕐᐳᖅ ᐊᖑᑎᓂᒃ ᐃᓚᒌᑦ ᐊᖓᔪᖅᑳᖏᓐᓂᒃ ᐊᑎᖏᓪᓗ ᑎᑎᕋᕐᑕᐅᓪᓗᑎᒃ; ᑕᖅᑭᐅᑉ 10ᖓᓂ ᐅᓪᓘᑉ ᓯᕗᓪᓕᕐᐹᖓᓂ ᑕᒪᑐᒥᖓ ᖃᐅᔨᓴᕆᐊᓯᓚᐅᕐᐳᑦ.

¹⁷ ᑕᖅᑮᑦ ᓯᕗᓪᓕᕐᐹᖓᑕ ᐅᓪᓗᖓᑕ ᓯᕗᓪᓕᕐᐹᖓᓄᑦ ᑎᑭᓪᓗᒍ ᐱᔭᕇᓚᐅᕐᐳᑦ ᖃᐅᔨᓴᕐᑕᒥᖕᓂᒃ ᐊᖑᑎᓂᒃ ᑕᒤᓐᓂᒃ ᓄᓕᐊᓂᒃᓯᒪᔪᓂᒃ ᐃᓅᖃᑎᒃᓴᔭᕆᓐᖏᑕᒥᖕᓂᒃ.

ᐊᖑᑏᑦ ᓄᓕᐊᖃᓚᐅᕐᑐᑦ ᐃᓅᖃᑎᒃᓴᔭᕆᓐᖏᑕᒥᖕᓂᒃ ᐊᕕᑦᑎᓂᖏᑦ

¹⁸ ᐅᑯᐊ ᑕᕝᕙ ᐊᖑᑏᑦ ᓄᓕᐊᖃᓚᐅᕐᑐᑦ ᐃᓅᖃᑎᒃᓴᔭᕆᓐᖏᑕᒥᖕᓂᒃ ᑐᓂᕐᕈᓯᕐᑎᑦᓯᔩᑦ, ᑎᑎᕋᕐᑕᐅᓯᒪᔪᑦ ᐃᓚᒌᖕᓂᖏᑎᒍᑦ: ᔩᓱᐊᑉ ᐃᓚᖏᑦ ᖃᑕᓐᖑᑎᖏᓪᓗ, ᔫᔭᑕᐅᑉ ᐃᕐᓂᖏᑦ ᖃᑕᓐᖑᑎᖏᓪᓗ, ᒫᓯᐊᒃᑯᑦ, ᐃᓔᓯᕆᒃᑯᑦ, ᔭᕆᑉᑯᑦ, ᒋᑕᓔᐊᒃᑯᓪᓗ.

¹⁹ ᑖᒃᑯᐊ ᐊᖏᓚᐅᕐᐳᑦ ᓄᓕᐊᒥᖕᓂᒃ ᐊᕕᑦᓯᔪᒪᓪᓗᑎᒃ; ᐸᓯᔭᒃᓴᐅᓂᕐᒥᖕᓄᑦ ᑐᓂᕐᕈᓯᓚᐅᕐᐳᑦ ᓰᐱᐅᑉ ᐊᖑᓴᓪᓗᖓᓂᒃ ᐊᔪᕐᑐᓕᓂᑎᒃ ᐃᓱᒪᒋᔪᓐᓁᕐᑕᐅᖁᓪᓗᒋᑦ.

²⁰ ᐊᒻᒪᑦᑕᐅᖅ ᐃᒥᕆᒃᑯᑦ ᐃᓚᒌᖏᓐᓂᑦ: ᕼᐊᓇᓁᒃᑯᓪᓗ, ᔨᐸᑍᐊᒃᑯᓪᓗ;

²¹ ᕼᐊᕆᒻᑯᑦ ᐃᓚᒌᖏᓐᓂᑦ: ᒫᓯᐊᒃᑯᑦ, ᐃᓔᑦᔭᒃᑯᑦ, ᓯᒤᐊᒃᑯᑦ, ᔨᕼᐃᐅᓪᑯᑦ, ᐅᓮᐊᒃᑯᓪᓗ;

²² ᐸᓱᕼᐅᕆᒃᑯᑦ ᐃᓚᒌᖏᓐᓂᑦ: ᐃᓔᐅᐃᓁᒃᑯᑦ, ᒫᓯᐊᒃᑯᑦ, ᐃᓯᒥᐅᓪᑯᑦ, ᓇᑖᓂᐅᓪᑯᑦ, ᔫᓴᐸᑦᑯᑦ, ᐃᓖᓴᒃᑯᓪᓗ.

²³ ᓕᕔᑏᑦ ᐅᑯᐊᖑᓚᐅᕆᕗᑦ: ᔫᓴᐸᑦᑯᑦ, ᓯᒥᐂᒃᑯᑦ, ᑭᓔᐊᒃᑯᑦ (ᑍᔭᐅᖕᒥᔪᖅ ᑭᓔᑕᒥᒃ), ᐱᑕᕼᐂᐊᒃᑯᑦ, ᔫᑕᒃᑯᑦ, ᐃᓔᓯᕆᒃᑯᓪᓗ.

²⁴ ᐃᓐᖏᕐᑏᑦ ᐅᑯᐊᖑᓚᐅᕆᕗᑦ: ᐃᓔᐊᓯᑉᑯᑦ; ᑐᒃᓯᐊᕐᕕᒡᔪᐊᑉ ᖃᐅᔨᓴᕐᑎᖏᓐᓂᑦ: ᓴᓗᒻᑯᑦ, ᑎᓕᒻᑯᑦ, ᐅᕆᒃᑯᓪᓗ.

²⁵ ᐊᓯᖏᑦ ᐃᓴᕆᐊᓕᒃᑯᑦ ᐅᑯᐊᖑᓚᐅᕆᕗᑦ: ᐸᕉᓯᒃᑯᑦ ᐃᓚᒌᖕᓂᖏᓐᓂᑦ: ᕋᒤᐊᒃᑯᑦ, ᔨᓯᐊᒃᑯᑦ, ᒪᓪᑬᔭᒃᑯᑦ, ᒤᔭᒥᒃᑯᑦ, ᐃᓕᓯᕆᒃᑯᑦ, ᒪᓪᓯᔭᒃᑯᑦ, ᐱᓁᐊᒃᑯᓪᓗ;

²⁶ ᐃᓛᒻᑯᑦ ᐃᓚᒌᖏᓐᓂᑦ: ᒪᑕᓁᐊᒃᑯᑦ, ᓴᑲᕅᐊᒃᑯᑦ, ᔨᕼᐃᐅᓪᑯᑦ, ᐊᑉᑍᒃᑯᑦ, ᔨᕆᒪᑎᒃᑯᑦ, ᐃᓔᑦᔭᒃᑯᓪᓗ.

²⁷ ᔭᑑᒃᑯᑦ ᐃᓚᒌᖏᓐᓂᑦ: ᐃᓔᐅᐃᓁᒃᑯᑦ, ᐃᓔᐊᓯᑉᑯᑦ, ᒪᑕᓁᐊᒃᑯᑦ, ᔨᕆᒪᑎᒃᑯᑦ, ᔧᐹᑎᒃᑯᑦ, ᐊᔨᔭᒃᑯᓪᓗ.

²⁸ ᐱᐰᒃᑯᑦ ᐃᓚᒌᖏᓐᓂᑦ: ᔨᕼᐅᕼᐊᓇᒃᑯᑦ, ᕼᐊᓇᓁᐊᒃᑯᑦ, ᔭᑉᐰᒃᑯᑦ, ᐊᑎᓔᒃᑯᓪᓗ.

²⁹ ᐹᓂᒃᑯᑦ ᐃᓚᒌᖏᓐᓂᑦ: ᒥᓱᓚᒻᑯᑦ, ᒪᓘᒃᑯᑦ, ᐊᑍᐊᒃᑯᑦ, ᔮᓱᑉᑯᑦ, ᓯᐅᓪᑯᑦ, ᔨᕆᒪᑎᒃᑯᓪᓗ.

³⁰ ᐸᕼᐊᑕ-ᒧᐊᐱᒃᑯᑦ ᐃᓚᒌᖏᓐᓂᑦ: ᐋᑦᓇᒃᑯᑦ, ᓯᓚᐅᓪᑯᑦ, ᐱᓁᐊᒃᑯᑦ, ᒫᓯᐊᒃᑯᑦ, ᒪᑕᓁᐊᒃᑯᑦ, ᐱᔭᓕᐅᓕᒃᑯᑦ, ᐱᓄᐃᒃᑯᑦ, ᒫᓇᓯᒃᑯᓪᓗ.

³¹ ᕼᐊᕆᒻᑯᑦ ᐃᓚᒌᖏᓐᓂᑦ: ᐃᓔᓯᕆᒃᑯᑦ, ᐃᓮᐊᒃᑯᑦ, ᒪᓪᑬᔭᒃᑯᑦ, ᓯᒤᐊᒃᑯᑦ, ᓯᕼᐃᒥᐅᓂᒃᑯᑦ,

³² ᐱᓐᔭᒥᓂᒃᑯᑦ, ᒪᓘᒃᑯᑦ, ᓯᒪᕅᐊᒃᑯᓪᓗ.

³³ ᕼᐊᓲᒻᑯᑦ ᐃᓚᒌᖏᓐᓂᑦ: ᒪᑎᓁᒃᑯᑦ, ᒪᑕᑕᒃᑯᑦ, ᔧᐹᑦᑯᑦ, ᐃᓕᕕᓕᑦᑯᑦ, ᔨᕆᒤᒃᑯᑦ, ᒫᓇᓯᒃᑯᑦ, ᓯᒥᐂᒃᑯᓪᓗ.

³⁴ ᐹᓂᐅᑉ ᐃᓚᒌᖏᓐᓂᑦ: ᒫᑍᒃᑯᑦ, ᐊᒪᕋᒃᑯᑦ, ᐅᐃᓪᑯᑦ,

³⁵ ᐱᓁᐊᒃᑯᑦ, ᐱᑎᐊᒃᑯᑦ, ᑭᓗᕼᐃᒃᑯᑦ,

³⁶ ᕙᓂᐊᒃᑯᑦ, ᒥᕆᒫᑎᒃᑯᑦ, ᐃᓔᐊᓯᒃᑯᑦ,

³⁷ ᒪᑕᓁᐊᒃᑯᑦ, ᒪᑎᓁᒃᑯᑦ, ᔮᓱᒃᑯᓪᓗ.

³⁸ ᐹᓂᐅᑉ ᐃᓚᒌᖏᓐᓂᑦ: ᓯᒥᐂᒃᑯᑦ,

³⁹ ᓯᓕᒤᐊᒃᑯᑦ, ᓁᑕᓂᒃᑯᑦ, ᐊᑍᐊᒃᑯᑦ,

⁴⁰ ᒪᒃᓇᑎᐰᒃᑯᑦ, ᓴᓮᒃᑯᑦ, ᓵᕅᒃᑯᑦ,

⁴¹ ᐊᔭᕆᐅᓪᑯᑦ, ᓯᓕᒤᐊᒃᑯᑦ, ᓯᒪᕅᐊᒃᑯᑦ,

⁴² ᓴᓗᒻᒥᒃᑯᑦ, ᐊᒪᕆᐊᒃᑯᑦ, ᔫᓯᐱᒃᑯᓪᓗ;

⁴³ ᓂᐴᒃᑯᑦ ᐃᓚᒌᖏᓐᓂᑦ: ᔨ-ᐂᓕᑯᑦ, ᒪᑎᑍᐊᒃᑯᑦ, ᔧᐹᑎᒃᑯᑦ, ᔨᐲᓇᒃᑯᑦ, ᔭᑍᒃᑯᑦ, ᔪᐃᓕᒃᑯᑦ, ᐱᓁᐊᒃᑯᓪᓗ.

⁴⁴ ᑖᒃᑯᐊᓕᒫᑦ ᑕᕝᕙ ᐊᖑᑏᑦ ᓄᓕᐊᖃᓚᐅᕐᑐᑦ ᐃᓅᖃᑎᒃᓴᔭᕆᓐᖏᑕᒥᖕᓂᒃ, ᐊᕕᓚᐅᕐᐰᑦ ᐊᐅᓪᓚᕐᑎᓪᓗᒋᓪᓗ ᐃᓚᖏᑦ ᕿᑐᕐᖓᖃᕐᕕᐅᒐᓗᐊᕐᑎᓪᓗᒋᑦ.