ᐃᓯᑭᐊᓕᐅᑉ ᐊᒡᓚᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕉᓴᓕᒥᐅᑦ ᓱᒋᐊᕐᑕᐅᓕᕐᓂᖓ

¹ ᒎᑎ ᓂᐱᖅᑯᕐᑐᓪᓗᓂ ᐅᖃᕐᑐᖅ ᑐᓴᕐᐸᕋ, “ᐃᒡᓗᒐᓴᒡᔪᐊᓂᒃ ᓱᒋᐊᕐᓯᓂᐊᕐᑐᑦ ᕾᓕᕐᓕᑦ, ᐊᓯᕈᐃᑦᔪᑎᒃᓴᒥᖕᓂᒃ ᓇᒃᓴᕐᓗᑎᒃ.”

² ᑕᑯᒋᓪᓗ, ᐊᖑᑎᑦ ᐱᖓᓲᔪᕐᑐᑦ ᑕᒪᐅᓐᖓᕐᐳᑦ ᑐᒃᓯᐊᕐᕕᒡᔪᐊᑉ ᓯᓚᓪᓕᕐᐹᖓᑕ ᐃᑎᕐᑕᕐᕕᖓᑕ ᓇᓛᓂᑦ, ᐅᓐᓄᐊᓪᓗᐊᑉ ᓇᓛᓄᑦ ᓵᓐᖓᔪᒥᑦ, ᐊᑐᓂᑦ ᓱᒋᐅᓯᔭᕐᓗᑎᒃ ᑐᑯᕅᑦᔪᑎᒥᖕᓂᒃ, ᐃᓚᖃᕐᓗᑎᒃ ᐊᖑᒻᒥᒃ ᖃᓪᓗᓈᕐᑕᓂᒃ ᓵᑦᑐᓂᒃ ᐊᓐᓄᕌᕐᓯᒪᔪᒥᒃ, ᑎᑎᕋᐅᒻᒧᑦ ᒥᓱᒃᑕᕐᕕᖕᒥᒃ ᕿᑎᕐᒥᐅᑕᓕᖕᒥᒃ ᓴᓂᕋᕐᒥᒍᑦ, ᑖᒃᑯᐊ ᐃᑎᕋᒥᒃ ᑐᓂᕐᕈᓯᕐᕕᐅᑉ ᑲᓐᓄᔭᐅᑉ ᓴᓂᐊᓂ ᓇᖏᓕᕐᐳᑦ.

³ ᐃᓴᕆᐊᓕᒥᐅᓪᓗ ᒎᑎᖓᑦᑕ ᐱᓐᓇᕐᓇᕐᓂᕐᔪᐊᖓ ᖁᒻᒧᐊᒃᐳᖅ ᓯᕋᐲᑦ ᐃᓴᕈᓖᑦ ᓇᔪᕐᑕᖏᓐᓂᑦ ᑐᒃᓯᐊᕐᕕᒡᔪᐊᑉ ᐃᑎᕐᕕᖓᓄᐊᕐᓗᓂ; ᐊᖑᓪᓗ ᖃᓪᓗᓈᕐᑕᓂᒃ ᓵᑦᑐᓂᒃ ᐊᓐᓄᕌᓕᒃ ᕾᖁᕚ, ᑖᓐᓇ ᑎᑎᕋᐅᒻᒧᑦ ᒥᓱᒃᑕᕐᕕᖕᒥᒃ ᕿᑎᕐᒥᐅᑕᓕᒃ ᓴᓂᕋᕐᒥᒍᑦ.

⁴ ᐊᑕᓂᐅᓪᓗ ᐅᖃᐅᑎᕚ, “ᔨᕉᓴᓕᐅᑉ ᐃᒡᓗᒐᓴᖏᑎᒍᑦ ᐃᖏᕐᕋᒋᑦ, ᖃᐅᖏᑎᒍᑦ ᓇᓗᓁᒃᑯᓯᕐᓱᐃᓗᑎᑦ ᐊᓂᕐᓴᐅᒥᑦᔪᑎᓕᖕᓂᒃ ᐅᒡᒍᐊᕈᑎᓕᖕᓂᒡᓗ ᓇᕐᕈᓇᕐᑐᓂᒃ ᐱᓂᐊᕐᓂᐅᕙᒃᑐᓂᒃ.”

⁵ ᐊᓯᖏᓐᓄᓪᓗ ᐅᖃᐅᑦᔨᔪᖅ ᑕᕝᕙᓃᖃᑎᒋᔭᖏᓐᓂᒃ ᑐᓴᕐᐸᕋ, “ᑖᓐᓇ ᒪᓕᒃᓯᐅᒃ ᐃᒡᓗᒐᓴᒡᔪᐊᑎᒍᑦ, ᑐᖁᕅᓗᓯᓗ; ᐊᓐᓁᑦᑍᓕᒋᑦᓯ, ᓂᑲᒋᔭᖃᕐᑍᓕᓗᓯᓗ.

⁶ ᐊᒥᐊᒃᑯᖏᑦᓯᐊᕐᓗᒋᑦ ᑐᖁᕅᒋᑦᓯ ᐃᑦᑐᓂᒃ, ᐃᓅᓱᒃᑐᓂᒃ ᐊᖑᑎᓂᒃ ᐊᕐᓇᓂᒡᓗ, ᓄᑕᖅᑲᓂᒃ ᐊᕐᓇᓂᒡᓗ, ᓇᓗᓁᒃᑯᓯᕐᓯᒪᔪᓂᒡᓕ ᑐᖁᑦᓯᑦᑍᓕᓗᓯ. ᐱᒋᐊᕐᓗᓯ ᐃᑦᔪᕐᓁᑦᑐᕕᖁᑎᓐᓂᑦ.” ᑖᒃᑯᐊᓗ ᐱᒋᐊᕐᐳᑦ ᐊᖓᔪᖅᑳᑦ ᑐᒃᓯᐊᕐᕕᒡᔪᐊᕐᒦᑦᑐᑦ ᐱᒋᐊᕐᕕᒋᓪᓗᒋᑦ.

⁷ ᑕᕝᕙ ᐅᖃᐅᑎᕔᑦ, “ᑐᒃᓯᐊᕐᕕᒡᔪᐊᖅ ᐃᑦᔪᕐᓇᕐᓯᑎᓯᐅᒃ, ᐊᓃᕋᔭᒡᕕᖏᑦ ᑐᖁᑕᐅᔪᓂᒃ ᓈᓗᒋᑦ. ᐊᑏ ᐂᓕᕆᑦᓯ.” ᐊᓂᒐᒥᒡᓗ, ᑐᖁᕅᓕᕐᐳᑦ ᐃᓄᖕᓂᒃ ᐃᒡᓗᒐᓴᒡᔪᐊᓃᑦᑐᓂᒃ.

⁸ ᑐᖁᕅᓕᕐᑎᓪᓗᒋᓪᓗ ᐃᓄᑑᓕᓚᐅᕐᐳᖓ, ᒪᓂᖅᑲᒧᑦ ᐹᒻᒪᒃᓗᖓ ᕾᒐᓛᓕᕐᐳᖓ, “ᐊᑕᓃᖅ ᒎᑏ! ᐃᓴᕆᐊᓕᒥᐅᑦ ᐊᒥᐊᒃᑯᖏᑦ ᓄᖑᑕᐅᑎᓕᕐᐱᒌᑦ ᓂᓐᖓᐅᒪᓗᐊᕐᓂᕐᓄᑦ ᔨᕉᓴᓕᒥ?”

⁹ ᑕᕝᕙ ᐅᖃᐅᑎᕚᖓ, “ᐃᓴᕆᐊᓕᐅᑉ ᔫᑕᐅᓪᓗ ᑭᖑᕚᖏᑦ ᐸᓯᔭᒃᓴᐅᓗᐊᕐᒪᑕ; ᓄᓇ ᐊᐅᖕᒥᒃ ᑕᑕᒻᒪᑦ, ᐃᒡᓗᒐᓴᒡᔪᐊᕐᒥᐅᓪᓗ ᐊᑦᔨᒌᒃᑎᑦᓯᓇᑎᒃ; ᐅᖃᖃᑦᑕᕐᒪᑕ, ‘ᐊᑕᓂᖅ ᓄᓇᒥᒃ ᖁᔭᓈᕐᓯᕗᖅ, ᑕᑯᓐᓇᕈᓐᓃᕐᓗᓂᓗ.’

¹⁰ ᐅᕙᖓᑦᑕᐅᖅ ᓇᒡᓕᒋᓗᒋᑦ ᑕᑯᓐᓇᕐᓂᐊᕈᓐᓃᕐᐸᒃᑲ, ᓂᑲᒋᓂᐊᕈᓐᓃᕐᓗᒋᓪᓗ, ᐊᑭᓂᐊᕐᕕᒋᓂᐊᓕᕐᐸᒃᑲ ᐱᓂᐊᕐᓂᖏᑦ ᒪᓕᒡᓗᒋᑦ.”

¹¹ ᑕᑯᒋᓪᓗ, ᐊᖑᑦ ᖃᓪᓗᓈᕐᑕᓂᒃ ᓵᑦᑐᓂᒃ ᐊᓐᓄᕌᓕᒃ, ᒥᓱᒃᑕᐅᑎᒃᑯᕕᖕᒥ ᓴᓂᕋᕐᒥᒍᑦ ᑭᑎᕐᒥᐅᑕᓕᒃ, ᐅᑎᕋᒥ ᐅᖃᕐᐳᖅ, “ᐱᔭᕇᕐᐳᖓ ᐅᕙᓐᓄᑦ ᑎᓕᓯᑦᔪᑎᒋᓚᐅᕐᑕᕐᓂᒃ.”