ᐃᓯᑭᐊᓕᐅᑉ ᐊᒡᓚᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓯᑭᐊᓕᐅᑉ ᑭᖑᓪᓕᕐᒥᒃ ᑕᑯᑎᑕᐅᓂᖓ ᒎᑎᒥᒃ ( 8:1—10:22 ) ᔨᕉᓴᓕᒥᐅᑦ ᒎᑎᓐᖑᐊᖃᕐᓂᖓ

¹ ᐊᕐᕌᒍᑦ ᐱᖓᓲᔪᕐᑐᖓᓐᓂ, ᑕᖅᑮᑦ ᐱᖓᓲᔪᕐᑐᖏᑕ, ᐅᓪᓗᖏᑕ ᑕᓪᓕᒪᖓᓐᓂ, ᔫᑕᐅᑉ ᐊᖓᔪᖅᑳᖏᓐᓂᒃ ᐃᒃᓯᕙᖃᑎᖃᕐᑎᓪᓗᖓ ᐃᒡᓗᓐᓂ, ᐊᑕᓂᐅᑉ ᒎᑎᐅᑉ ᐱᔪᓐᓇᕐᓂᕐᔪᐊᖓᓄᑦ ᑎᑭᑕᐅᕗᖓ.

² ᑕᕝᕙ ᑕᑯᓕᕐᐳᖓ, ᑕᑯᒋᓪᓗ, ᑕᑯᑎᑕᐅᕗᖓ ᐃᓅᔮᕐᑐᒥᒃ; ᕿᑎᕆᔮᕐᑕᖓᓂᑦ ᐱᒋᐊᕐᓗᒍ ᑕᐅᓄᖓ ᐃᑯᐊᓚᔪᒥᒃ, ᐊᒻᒪ ᕿᑎᕆᔮᕐᑕᖓᓂᑦ ᐱᒋᐊᕐᓗᒍ ᖃᐅᒪᔪᐊᓘᕗᖅ, ᑲᓐᓄᔭᑐᑦ ᕿᓪᓕᕐᑐᑐᑦ.

³ ᐃᓴᒃᓗᓂ ᐊᒡᒐᒋᔮᕐᑕᒥᓄᑦ ᓄᔭᒃᑯᑦ ᑎᒍᕚᖓ; ᐊᓂᕐᓂᐅᑉ ᖃᖓᑦᑕᕐᑎᑉᐹᖓ ᓄᓇᐅᓪᓗ ᕿᓚᐅᓪᓗ ᐊᑯᓐᓂᖓᓄᑦ, ᑕᑯᑎᑦᔪᑎᒃᑯᓪᓗ ᒎᑎᒥᑦ ᐱᔪᒃᑯᑦ ᔨᕉᓴᓕᒧᐊᕐᑎᑉᐹᖓ, ᑐᒃᓯᐊᕐᕕᒡᔪᐊᓪᓗ ᐃᑎᕆᐊᕐᕕᖓᓄᐊᕐᑎᑉᐹᖓ ᐃᓗᓪᓕᕐᒧᑦ ᐅᓐᓄᐊᓪᓗᐊᑉ ᓇᓛᓃᑦᑐᒧᑦ, ᒎᑎᓐᖑᐊᓕᐊᕆᓯᒪᔫᑉ ᐃᓂᖓᓄᑦ ᓯᖕᓇᒋᔭᐅᔪᒧᑦ, ᑖᑦᓱᒧᖓ ᓯᖕᓇᑎᑦᓯᔪᒧᑦ.

⁴ ᑕᑯᒋᓪᓗ, ᑕᑯᕗᖓ ᐃᓴᕆᐊᓕᒥᐅᑦ ᒎᑎᖓᑦᑕ ᐱᓐᓇᕐᓇᕐᓂᕐᔪᐊᖓᓂᒃ ᑕᕝᕙᓃᑦᑐᒥᒃ, ᑕᑯᓚᐅᕐᑕᒪ ᐊᑦᔨᖓᓂᒃ ᓇᑎᕐᓇᒥ.

⁵ ᑕᕝᕙ ᐅᖃᐅᑎᕚᖓ, “ᐃᓅᑉ ᐃᕐᓂᖓ, ᐅᓐᓄᐊᓪᓗᐊᑉ ᓇᓛᓄᑦ ᑕᑯᓴᕆᑦ.” ᑕᑯᓴᕋᒪ ᑕᑯᕗᖓ ᑐᓂᕐᕈᓯᕐᕕᐅᑉ ᐃᑎᕐᑕᕐᕕᖓᓂ ᐅᓐᓄᐊᓪᓗᐊᑉ ᓇᓛᓃᑦᑐᒥ ᐃᑎᕆᐊᕐᕕᒦᑦᑐᒥᒃ ᒎᑎᒧᑦ ᓯᖕᓇᒋᔭᐅᔪᒥᒃ.

⁶ ᐅᖃᐅᑎᕚᖓᓗ, “ᐃᓅᑉ ᐃᕐᓂᖓ, ᑕᑯᕖᑦ ᖃᓄᐃᓕᐅᕐᓂᖏᓐᓂᒃ? ᐃᓴᕆᐊᓕᐅᑉ ᑭᖑᕚᖏᑦ ᓇᕐᕈᒋᓂᕐᐹᓐᓂᒃ ᐱᓇᓱᐊᕐᑐᑦ, ᐃᑦᔪᕐᓁᑦᑐᕕᖁᑎᓐᓂᑦ ᐅᖓᓯᒃᓯᑎᑕᐅᓕᕐᐳᖔ? ᓱᓕ ᑕᑯᓂᐊᕐᐳᑎᑦ ᑕᒪᒃᑯᓇᓐᖓᑦ ᓇᕐᕈᓇᕐᓂᕐᓴᓂᒃ.”

⁷ ᐂᑎᑉᐹᖓᓗ ᐊᓃᕋᔭᒡᕕᖓᑕ ᐃᑎᕐᑕᕐᕕᖓᓄᑦ; ᑕᑯᓴᕋᒪᓗ, ᑕᑯᒋᑦ, ᐊᖕᒪᔪᕐᑕᖃᕐᐳᖅ ᐊᑭᓐᓇᕐᒥ.

⁸ ᐅᖃᐅᑎᓪᓗᓂᖓᓗ, “ᐃᓅᑉ ᐃᕐᓂᖓ, ᐊᑭᓐᓇᖅ ᐳᐊᕐᕆᔭᕈᒃ”; ᐊᑭᓐᓇᕐᓗ ᐳᐊᕆᔭᕋᒃᑯ, ᑕᑯᒋᑦ, ᐅᒃᑯᐊᖅ ᑕᑯᕙᕋ.

⁹ ᐅᖃᐅᑎᕚᖓᓗ, “ᐃᑎᕆᑦ, ᑕᑯᓗᑎᓪᓗ ᐱᐅᖏᑦᑐᕐᔪᐊᓂᒃ ᓇᕐᕈᓇᕐᑐᓂᒃ ᐱᓇᓱᐊᕐᓂᕆᔭᖏᓐᓂᒃ ᑕᕝᕙᓂ.”

¹⁰ ᑕᕝᕙ ᐃᑎᕐᐳᖓ ᑕᑯᓪᓗᖓᓗ; ᐊᑭᓐᓇᕐᒥ ᑎᑎᕋᐅᔭᕐᕕᒋᓯᒪᕗᑦ ᖁᐱᕐᕈᓐᖑᐊᓂᒃ ᐹᕐᖑᕐᑐᓂᒃ ᖃᓄᐃᑦᑐᑐᐃᓐᓇᕐᓂᒃ, ᐆᒪᔪᕐᓗᓐᖑᐊᓂᒃ ᓇᕐᕈᓇᕐᑐᓂᒃ, ᐃᓴᕆᐊᓕᐅᓪᓗ ᑭᖑᕚᖏᑕ ᒎᑎᓐᖑᐊᓕᒫᖏᓐᓂᒃ.

¹¹ 70ᓗ ᐃᓴᕆᐊᓕᐅᑉ ᑭᖑᕚᖏᓐᓂ ᓯᕗᓕᕐᑏᑦ ᑕᕝᕙᓃᑉᐳᑦ, ᐅᓇ ᓇᖏᖃᑕᐅᕗᖅ ᑕᕝᕙᓂ, ᔭ-ᐊᔭᓁᐊ ᓴᕙᓂᐅᑉ ᐃᕐᓂᖓ. ᑖᒃᑯᐊᓗ ᐊᑐᓂᑦ ᑎᒍᒥᐊᕐᐳᑦ ᐳᔫᕐᑎᑦᓯᑦᔪᑎᓂᒃ ᑎᐱᑦᓯᐊᕆᒃᑐᒥᒃ, ᐳᔪᖏᓪᓗ ᑎᐱᑦᓯᐊᕆᒃᑐᑦ ᖁᒻᒧᐊᒃᐳᑦ.

¹² ᑕᕝᕙ ᐅᖃᐅᑎᕚᖓ, “ᐃᓅᑉ ᐃᕐᓂᖓ, ᖃᐅᔨᕖᑦ? ᐃᓴᕆᐊᓕᐅᑉ ᑭᖑᕚᖏᑕ ᓯᕗᓕᕐᑎᖏᑦ ᐃᔨᕋᕐᑐᕐᓗᑎᒃ ᖃᓄᐃᓕᐅᕐᐸᖕᓂᖏᓐᓂᒃ, ᐃᒡᓗᕈᓯᕐᒥ ᐊᑐᓂᑦ ᒎᑎᓐᖑᐊᓂᒃ ᐊᑦᔨᓐᖑᐊᖁᑎᖃᐅᕐᐳᑦ; ᐅᖃᖃᑦᑕᕐᐳᑦ, ‘ᐊᑕᓂᐅᑉ ᑕᑯᓐᓇᓐᖏᓛᑎᒍᑦ, ᐊᑕᓂᐅᑉ ᓄᓇ ᕿᒪᒃᓯᒪᓕᕐᐹ.’”

¹³ ᐅᖃᐅᑎᓕᕆᕚᖓ, “ᑕᑯᓂᐊᕐᐳᑎᑦ ᓱᓕ ᓇᕐᕈᓇᕐᓂᕐᓴᓂᒃ ᐊᑐᖃᑦᑕᕐᑕᖏᓐᓂᒃ.”

¹⁴ ᐂᑎᒃᑭᕚᖓ ᐊᑕᓂᐅᑉ ᐃᒡᓗᖓᑕ ᐃᑎᕐᑕᕐᕕᖓᓄᑦ ᐅᓐᓄᐊᓪᓗᐊᑉ ᓇᓛᓃᑦᑐᒧᑦ; ᑕᑯᒋᓪᓗ, ᑕᕝᕙᓂ ᐊᕐᓁᑦ ᐃᒃᓯᕚᕐᐳᑦ ᒎᑎᓐᖑᐊᖅ ᑕᒨᔾ ᕿᐊᑦᔪᑎᒋᓪᓗᒍ.

¹⁵ ᑕᕝᕙ ᐅᖃᐅᑎᕚᖓ, “ᐃᓅᑉ ᐃᕐᓂᖓ, ᑖᓐᓇ ᑕᑯᕕᐅᒃ? ᑕᑯᓂᐊᕐᐳᑎᑦ ᓱᓕ ᑖᒃᑯᓇᓐᖓᑦ ᓇᕐᕈᓇᕐᓂᕐᓴᓂᒃ.”

¹⁶ ᐂᑎᒃᑭᕚᖓᓗ ᐊᑕᓂᐅᑉ ᐃᒡᓗᖓᑕ ᐊᓃᕋᔭᕐᕕᖓᑕ ᐃᓗᓪᓕᖓᓄᑦ; ᑕᑯᒋᓪᓗ, ᐊᑕᓂᐅᑉ ᑐᒃᓯᐊᕐᕕᖁᑎᖓᑕ ᐃᑎᕐᑕᕐᕕᖓᓂ, ᑐᕐᓲᖓᑕ ᑐᓂᕐᕈᓯᕐᕕᐅᓪᓗ ᐊᑯᓐᓂᖓᓂ, ᐊᖑᑎᓂᒃ 25 ᖃᓂᒋᔮᓃᑦᑐᓂᒃ, ᐊᑕᓂᐅᑉ ᑐᒃᓯᐊᕐᕕᖁᑎᖓᓂᒃ ᑐᓄᓐᖓᔪᓂᒃ, ᓯᕿᓂᐅᑉ ᓄᐃᕕᐊᑕ ᓇᓛᓄᑦ ᓵᓐᖓᔪᓂᒃ, ᓯᕿᓂᕐᒧᑦ ᑐᒃᓯᐊᕐᑐᓂᒃ.

¹⁷ ᑕᕝᕙ ᐅᖃᐅᑎᕚᖓ, “ᐃᓅᑉ ᐃᕐᓂᖓ, ᑕᑯᕕᒌᑦ? ᖃᓄᐃᓐᖏᓛᖅ? ᔫᑕᐅᑉ ᑭᖑᕚᖏᑦ ᓇᕐᕈᒋᔭᓐᓂᒃ ᐱᓇᓱᐊᑐᐃᓐᓇᕐᐸᑕ ᑕᕝᕙᓂ ᐱᓇᓱᐊᕐᑕᒥᖕᓂ, ᓄᓇ ᓈᔭᐅᑎᓪᓗᒍ ᐱᕋᔭᖕᓂᕐᓂᒃ, ᓱᓕ ᓂᓐᖓᒃᓴᒃᑲᓐᓂᕐᓗᖓ? ᑕᑯᒋᑦ, ᕿᔪᑯᑖᒥᒃ ᐊᑭᕈᕐᒥᒃ ᕿᖓᕐᒥᖕᓄᐊᕐᓯᕗᑦ.

¹⁸ ᑍᒤᒻᒪᑦ ᓂᓐᖓᐅᒪᓗᖓ ᐱᓇᓱᐊᕐᕕᒋᓂᐊᓕᕐᐸᒃᑲ; ᐊᓐᓇᒃᑎᓐᓂᐊᓐᖏᓚᒃᑲ ᓂᑲᒋᓂᐊᕐᓇᒋᓪᓗ; ᕾᒐᓛᕐᓗᑎᒃ ᓂᓪᓕᐊᒐᓗᐊᕐᐸᑕ ᐅᕙᓐᓄᑦ ᑐᓴᑦᔮᓐᖏᓚᒃᑲ.”