ᐃᓯᑭᐊᓕᐅᑉ ᐊᒡᓚᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓴᕆᐊᓕᒥᐅᑦ ᐃᓱᓕᑦᔪᑦᔭᐅᓕᕐᓂᖓ

¹ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᕝᕕᑦ, ᐃᓅᑉ ᐃᕐᓂᖓ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ ᐃᓴᕆᐊᓕᒥᐅᓄᑦ: ᐃᓱᓕᑉᐳᖅ! ᓄᓇᓕᒫᖅ ᐃᓘᓐᓈᑦ ᐃᓱᓕᕝᕕᒃᓴᒥᓄᑦ ᑎᑭᑉᐳᖅ.

³ “ᒫᓐᓇ ᐃᓱᐊᓄᑦ ᑎᑭᑉᐳᓯ, ᓂᓐᖓᐅᓯᓐᓄᑦ ᕿᓚᕈᑦᔮᕐᕕᒋᓕᕐᐸᑦᓯ, ᐱᓂᐊᕐᓂᓯ ᒪᓕᒡᓗᒋᑦ ᐃᖅᑲᕐᑐᕐᓂᐊᓕᕐᐸᑦᓯ; ᓱᒋᐊᕐᓂᐊᕐᐸᑦᓯᓗ ᓇᕐᕈᓇᕐᑐᓕᓯᒪᓂᓯ ᒪᓕᒡᓗᒋᑦ.

⁴ ᑕᑯᓐᖏᓮᓐᓇᕐᓂᐊᓐᖏᓚᑦᓯ, ᓂᑲᒋᓂᐊᕋᓯᓗ; ᓱᒋᐊᕐᓂᐊᕐᐸᑦᓯ ᐱᓂᐊᕐᓂᓯ ᒪᓕᒡᓗᒋᑦ, ᓇᕐᕈᒋᔭᓐᓂᒃ ᐱᓂᐊᕐᓂᖃᕋᑦᓯ ᓱᓕ. ᑕᕝᕙ ᖃᐅᔨᓂᐊᕐᐳᓯ ᐅᕙᖓ ᐊᑕᓂᐅᒐᒪ.

⁵ “ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑕᑯᒋᑦ, ᐊᓯᕈᕐᑕᐅᓇᕐᑐᑦ ᑭᖑᓕᕇᒃᑕᕐᓗᑎᒃ ᐃᓕᑦᓯᓐᓄᑦ ᑎᑭᓕᕐᐳᑦ!

⁶ ᓇᒡᒐᑖᓄᑦ ᑎᑭᐅᑎᕗᓯ, ᓇᒡᒐᑖ ᑎᑭᑉᐳᖅ; ᐃᓱᐊᓃᓕᕐᐳᓯ. ᑕᑯᒋᑦ, ᑎᑭᑉᐳᖅ.

⁷ ᐃᓕᑦᓯᓐᓄᑦ ᓱᒋᐊᕐᑕᐅᕕᒃᓴᖅ ᓇᓪᓕᐅᑎᕗᖅ, ᐃᓕᑦᓯ ᓄᓇᒥ ᓄᓇᖃᕐᑐᓯ; ᓇᓪᓕᐅᓐᓂᖅ ᑎᑭᐅᑎᕗᖅ, ᐅᓪᓗᖅ ᖃᒡᓕᕗᖅ, ᐅᓪᓗᖅ ᐅᐃᒻᒪᒃᓯᒪᕕᒃ, ᖁᕕᐊᓱᒡᕙᓗᒃᑐᑦ ᓂᓪᓕᐊᓂᐊᕈᓐᓃᕐᐳᑦ ᖃᖅᑲᓂ.

⁸ “ᒫᓐᓇ ᐊᑯᓂᐅᖏᑦᑐᖅ ᓂᓐᖓᐅᓯᓐᓄᑦ ᑎᑭᑕᐅᑎᓐᓂᐊᓕᕐᐸᑦᓯ, ᓂᓐᖓᐅᓯᓐᓄᑦ ᐱᓇᓱᐊᕐᕕᒋᓂᐊᓕᕐᐸᑦᓯ, ᐃᖅᑲᕐᑐᕐᓗᓯᓗ ᐱᓂᐊᕐᓂᓯ ᒪᓕᒡᓗᒋᑦ; ᐊᑭᓂᐊᕐᕕᒋᔪᒫᕐᐸᑦᓯᓗ ᓇᕐᕈᒋᔭᓐᓂᒃ ᐱᓇᓱᐊᕐᓂᕆᓯᒪᔭᓕᒫᓯ ᒪᓕᒡᓗᒋᑦ.

⁹ ᑕᑯᓐᖏᓮᓐᓇᕐᓂᐊᓐᖏᓚᑦᓯ, ᓂᑲᒋᓂᐊᕋᓯᓗ; ᓱᒋᐊᕐᓂᐊᕐᐸᑦᓯ ᐱᓂᐊᕐᓂᓯ ᒪᓕᒡᓗᒋᑦ, ᓇᕐᕈᒋᔭᓐᓂᒃ ᐱᓂᐊᕐᓂᖃᕋᑦᓯ ᓱᓕ. ᑕᕝᕙ ᖃᐅᔨᓂᐊᕐᐳᓯ ᐅᕙᖓ ᐊᑕᓂᐅᒐᒪ, ᓱᒋᐊᕐᓯᔨ.

¹⁰ “ᑕᑯᒋᑦ, ᑕᕝᕙ ᐅᓪᓗᖅ! ᑕᑯᒋᑦ, ᑎᑭᑉᐳᖅ! ᐊᓯᕈᕐᑕᐅᓂᒃᓴᓯ ᑎᑭᑉᐳᖅ, ᐊᑦᔨᒌᓐᖏᑎᑦᓯᓂᖅ ᐱᕈᕇᕐᓯᒪᓕᕐᒪᑦ, ᐱᐅᔪᕆᓂᐅᑉ ᐱᕈᕐᓂᒃᓴᖓ ᐆᒻᒪᕈᕐᐳᖅ.

¹¹ ᐱᓂᕐᓗᖕᓃᑦ ᐱᕈᕐᐸᓪᓕᐊᕗᑦ ᐱᐅᖏᑦᑐᓕᓂᖅ ᐊᖏᒡᓕᕙᓪᓕᐊᓪᓗᓂ; ᓇᓪᓕᖏᓪᓘᓐᓃᑦ ᑍᒤᓕᖎᓐᓇᕐᓂᐊᓐᖏᓚᑦ, ᐅᓄᕐᓯᕙᓪᓕᐊᑦᔮᓐᖏᓚᑦ, ᐊᒃᓱᐃᑦᑐᓐᖑᕐᓂᐊᕋᑎᒡᓗ; ᓇᓪᓕᐊᓪᓘᓐᓃᑦ ᐱᓪᓚᕆᓐᖑᕐᑐᖃᕐᓂᐊᓐᖏᓚᑦ.

¹² “ᓇᓪᓕᐅᑦᑐᒃᓴᖅ ᓇᓪᓕᐅᑎᕗᖅ, ᐅᓪᓗᖅ ᑎᑭᓕᕐᐳᖅ. ᓂᐅᕕᕐᐸᒃᑐᖅ ᖁᕕᐊᓱᖕᓂᐊᕋᓂ, ᓂᐅᕐᕈᑎᖃᕐᐸᒃᑐᕐᓗ ᕿᒃᓵᖕᓂᐊᕋᓂ, ᓂᓐᖓᐅᓯᐅᑉ ᐃᓄᒐᓴᒡᔪᐊᓕᒫᑦ ᑎᑭᑦᓱᒫᕐᒪᒋᑦ.

¹³ ᓂᐅᕐᕈᓯᕐᑏᑦ ᐅᑎᕐᑎᑦᓯᔪᓐᓇᕈᒫᓐᖏᓚᑦ ᓂᐅᕐᕈᑎᕕᓂᕐᒥᓂᒃ, ᐃᓅᓂᕐᒥᖕᓂ. ᓂᓐᖓᐅᓯᐅᑉ ᐃᓄᒐᓴᒡᔪᐊᓕᒫᑦ ᑎᑭᑦᓱᒫᕐᒪᒋᑦ; ᐅᑎᕆᐊᕈᓐᓇᕋᓂᓗ; ᐱᐅᖏᑦᑐᓕᓂᖏᑦ ᐱᑦᔪᑎᒋᓪᓗᒋᑦ, ᐃᓅᓯᕐᒥᓂᒃ ᐊᐅᓚᑦᓯᔪᖃᕈᓐᓇᖏᒻᒪᑦ.

¹⁴ ᑎᑦᑐᓚᐅᑦ ᓂᓪᓕᕐᑎᑉᐹᑦ ᐊᑐᐃᓐᓇᕈᕐᑐᐃᓐᓇᐅᓗᑎᒃ; ᐅᓇᑕᕆᐊᕈᓐᓇᕐᓯᓐᖏᓚᓪᓕ, ᓂᓐᖓᐅᓯᕐᒪ ᐃᓄᓕᒫᑦ ᑎᑭᒻᒪᒋᑦ.”

ᐃᓴᕆᐊᓕᒥᐅᑦ ᓱᒋᐊᕐᑕᐅᓂᖏᑦ ᐊᔪᕐᑐᓕᓂᖏᓐᓄᑦ

¹⁵ “ᓴᕕᒡᔪᐊᓕᔭᕐᑐᑦ ᓯᓚᑖᓃᑉᐳᑦ, ᖃᓂᒪᓇᕐᑐᖅ ᑳᖕᓇᕐᑐᕐᓗ ᐃᓗᐊᓃᑎᓪᓗᒋᑦ; ᐱᕈᕐᓰᕕᖕᒦᑦᑐᑦ ᓴᕕᒡᔪᐊᓄᑦ ᑐᖁᑕᐅᕗᑦ; ᐃᒡᓗᒐᓴᒡᔪᐊᓃᑦᑐᓪᓗ ᑐᑯᕋᕐᐳᑦ ᐱᕐᓕᕋᕐᓂᕐᒧᑦ ᐋᓐᓂᐊᓇᕐᑐᓄᓪᓗ.

¹⁶ ᕿᒫᓗᑎᒡᓕ ᐊᓐᓇᑦᑐᑦ, ᖃᖅᑲᓃᓕᕈᒫᕐᐳᑦ, ᑑᕕᑎᑐᑦ ᓇᕐᓴᐅᑉ ᐃᓗᐊᓂᑦ ᕿᒫᔪᑎᑐᑦ, ᐃᓘᓐᓇᑎᒡᓗ ᐅᒡᒍᐊᕈᑎᖃᕐᓗᑎᒃ ᐊᔪᕐᑐᓕᓯᒪᓂᕐᒥᖕᓂᒃ.

¹⁷ ᐊᒡᒐᓕᒫᖏᑦ ᓴᓐᖐᓕᔪᒫᕐᐳᑦ, ᓰᖅᑯᓕᒫᖏᓪᓗ ᓴᔪᓕᕐᓗᑎᒃ ᐃᒪᕐᑎᑐᑦ.

¹⁸ ᐳᑐᕐᓛᓂᒃ ᐊᓐᓄᕌᕈᒫᕐᐳᑦ, ᑲᑉᐱᐊᓱᖕᓂᕐᒧᑦ ᑕᑕᒥᓯᒪᓗᑎᒃ; ᑲᓐᖑᓱᖕᓂᖅ ᑮᓇᖏᓐᓂ ᑕᑯᒃᓴᐅᔪᒫᕐᐳᖅ, ᓂᐊᖁᑎᒡᓗ ᓴᓕᓗᒋᑦ ᓄᔧᕈᑎᔪᒫᕐᐰᑦ.

¹⁹ ᓯᐅᓪᕕᕆᖁᑎᑎᒃ ᐊᖅᑯᒻᒧᑦ ᐃᒋᐅᖅᑲᕈᒫᕐᐰᑦ, ᒎᓗᖁᑎᑎᒡᓗ ᓴᓂᕐᑎᑐᑦ ᑍᒤᓕᕈᒫᕐᐰᑦ; ᓯᐅᓪᕕᕆᓄᑦ ᒎᓗᓄᓪᓗ ᓴᐳᑎᔭᐅᔪᓐᓇᕈᒫᓐᖏᓚᑦ ᐊᑕᓂᐅᑉ ᓂᓐᖓᐅᓯᖓᑕ ᐅᓪᓗᖓᓄᑦ ᑎᑭᑕᐅᒍᑎᒃ; ᑕᒪᒃᑯᓄᖓ ᑳᒍᓐᓃᕐᑎᑕᐅᔪᓐᓇᕈᒫᓐᖏᓚᑦ ᐊᕿᐊᑦᑐᕐᑎᑕᐅᔪᓐᓇᕋᑎᒡᓗ. ᑕᒪᒃᑯᓄᖓ ᐊᔪᕐᑐᓕᑎᑕᐅᕙᓚᐅᕐᓂᖏᑦ ᐊᒡᕕᐊᕈᑕᐅᓕᕐᒪᑕ.

²⁰ ᐱᐅᓴᐅᑎᒥᖕᓂᒃ ᐱᔪᕆᐅᑎᖃᕐᐸᓚᐅᕐᐳᑦ, ᓇᕐᕈᓇᕐᑐᒥᒡᓕ ᒎᑎᓐᖑᐊᓕᐊᕆᓚᐅᕐᐰᑦ ᐃᑦᔪᕐᓇᕐᑐᓂᒡᓗ ᐱᓇᓱᐊᕈᑎᒋᓪᓗᒋᑦ; ᑍᒤᒻᒪᑦ ᓇᕐᕈᓇᕐᓯᑎᓐᓂᐊᓕᕐᐸᒃᑲ ᑖᒃᑯᓄᖓ.

²¹ “ᓄᓇᖃᑎᑐᖃᕆᓐᖏᑕᖏᓐᓄᑦ ᐊᕐᓵᕐᑕᐅᑎᑦᓱᒫᕐᐸᒃᑲ, ᐱᐅᖏᑦᑐᓕᔪᓄᓪᓗ ᓄᓇᕐᔪᐊᕐᒦᑦᑐᓄᑦ ᓇᒡᕚᕐᑖᖑᑎᓪᓗᒋᑦ; ᓇᕐᕈᓇᕐᓯᑎᑕᐅᓗᑎᒡᓗ.

²² ᑖᒃᑯᐊ ᐊᓚᕈᒫᕐᐸᒃᑲ, ᐃᑦᔪᕐᓁᑦᑐᕕᖁᑎᓐᓂᒃ ᓇᕐᕈᓇᕐᓯᑎᑦᓯᔪᓐᓇᖁᓪᓗᒋᑦ; ᑎᒡᓕᒃᑎᓄᑦ ᐃᑎᕐᑕᐅᓗᓂ ᓇᕐᕈᓇᕐᓯᑎᑕᐅᔪᒫᕐᐳᖅ.

²³ “ᓄᖑᕅᑦᔪᑎᒃᓴᓕᐅᕆᑦ; ᓇᓂᓕᒫᖅ ᓄᓇ ᐃᓄᐊᕐᑎᓂᒃ ᓈᓯᒪᖕᒪᑦ ᐃᒡᓗᒐᓴᒡᔪᐊᓪᓗ ᐱᕋᔭᒃᑎᓂᒃ ᑕᑕᓪᓗᑎᒃ.

²⁴ ᐃᓅᖃᑎᒌᒡᔪᐊᓂᑦ ᐱᐅᖏᓐᓂᕐᐹᓂᒃ ᑎᑭᑎᑦᓯᔪᒫᕐᐳᖓ ᐃᒡᓗᖏᑦ ᑖᒃᑯᓄᖓ ᐱᑖᕆᔭᐅᖁᓪᓗᒋᑦ; ᐱᐅᔪᕆᓂᕐᒧᑦ ᐊᔪᖏᑦᔪᑎᖏᑦ ᓄᖅᑲᕐᑎᑦᓱᒫᕐᐸᒃᑲ, ᐃᑦᔪᕐᓁᑦᑐᖁᑎᖏᓪᓗ ᓇᕐᕈᓇᕐᓯᑎᑕᐅᔪᒫᕐᐳᑦ.

²⁵ ᐃᓗᖏᕐᑐᕐᓇᕐᑐᖅ ᑎᑭᑉᐸᑦ, ᓮᓪᓕᓇᕐᑐᒥᒃ ᕿᓂᕈᒫᕐᐳᑦ, ᐱᑕᖃᕈᒫᓐᖏᓚᓪᓕ.

²⁶ ᐊᓯᕈᕐᑕᐅᓇᕐᑐᑦ ᑭᖑᓕᕇᒃᑕᕐᓗᑎᒃ ᓇᓪᓕᐅᑎᖃᑦᑕᕈᒫᕐᐳᑦ, ᑐᓴᐅᒪᑐᐃᓐᓇᕐᓂᒃᑯᑦ ᑐᓴᕐᑎᑦᓯᓃᑦ ᑭᖑᓕᕇᒃᑕᕈᒫᕐᐳᑦ; ᒎᑎᐅᓪᓗ ᐱᔪᒫᕐᑐᒃᓴᓂᒃ ᐅᖃᕐᑎᖏᑕ ᑕᑯᑎᑕᐅᓂᖏᓐᓂᒃ ᕿᓂᖃᑦᑕᕈᒫᕐᐳᑦ, ᑐᓂᕐᕈᓯᕐᑎᑦᓯᔩᓪᓗ ᐱᖁᔭᓂᒃ ᐊᓯᐅᔨᔪᒫᕐᐳᑦ, ᐃᓄᑐᖃᐅᔪᓪᓗ ᐅᖃᐅᑦᔨᒋᐊᕈᑎᒃᓴᖃᕈᓐᓁᕐᓗᑎᒃ.

²⁷ ᐊᖓᔪᖅᑳᕐᔪᐊᑦ ᕿᒃᓵᒃᑎᑕᐅᔪᒫᕐᐳᑦ, ᐃᕐᓂᖏᓪᓗ ᓴᐱᓕᕈᒫᕐᐳᑦ, ᐃᓄᐃᓪᓗ ᓄᓇᒦᑦᑐᑦ ᐃᕐᓯᓂᕐᒧᑦ ᓴᔪᒃᓱᓕᕈᒫᕐᐳᑦ. ᐱᓂᐊᕐᓂᖏᑦ ᒪᓕᒡᓗᒋᑦ ᐱᓂᐊᕐᕕᒋᔪᒫᕐᐸᒃᑲ, ᐃᖅᑲᕐᑐᐃᓂᖏᑦ ᒪᓕᒡᓗᒋᑦ ᐃᖅᑲᕐᑐᕈᒫᕐᐸᒃᑲ; ᖃᐅᔨᖁᓪᓗᒋᑦ ᐅᕙᖓ ᐊᑕᓂᐅᒐᒪ.”