ᐃᓯᑭᐊᓕᐅᑉ ᐊᒡᓚᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᓱᒋᐊᕐᓯᔪᒪᓂᖓ ᒎᑎᓐᖑᐊᓕᖕᓂᒃ

¹ ᐊᑕᓂᐅᑉ ᐅᖃᐅᓯᖓᑕ ᑎᑭᑉᐹᖓ ᐅᖃᕐᓗᓂ:

² “ᐃᓅᑉ ᐃᕐᓂᖓ, ᐃᓴᕆᐊᓕᒥᐅᑦ ᖃᖅᑲᖏᓐᓄᑦ ᓵᓐᖓᓗᑎᑦ, ᓇᓪᓕᐅᑎᔪᒫᕐᑐᓂᒃ ᐅᖃᐅᑦᔪᒃᑭᑦ.

³ ᐅᖃᐅᑎᓗᒋᓪᓗ, ᐃᓴᕆᐊᓕᒥᐅᑦ ᖃᖅᑲᖏᑦ ᑐᓴᖁᓪᓗᒋᑦ ᐊᑕᓂᐅᑉ ᒎᑎᐅᑉ ᐅᖃᐅᓯᕆᔭᖏᓐᓂᒃ, ᐅᖃᐅᑦᔪᐃᒋᑦ ᖃᖅᑲᓂᒃ, ᐱᖑᕐᓂᒃ, ᑰᕈᕐᓂᒃ, ᓇᕐᓴᓂᒡᓗ: ᑕᑯᒋᑦ, ᐅᕙᖓ ᓇᖕᒥᓂᖅ, ᑎᓕᓯᔪᒫᕐᐳᖓ ᐅᓇᑕᕐᑎᓂᒃ, ᐊᓯᕈᐃᖁᓪᓗᒋᑦ ᒎᑎᓐᖑᐊᓂᒃ.

⁴ ᑐᓂᕐᕈᓯᕐᕕᖁᑎᓯ ᕿᒪᒃᑕᐅᔪᒫᕐᐳᑦ, ᐳᔫᕐᑎᑦᓯᕕᓯᓗᑦᑕᐅᖅ ᓯᖁᑦᑎᕐᑕᐅᓗᑎᒃ; ᑐᖁᑕᐅᔨᐊᓯᓗ ᒎᑎᓐᖑᐊᖁᑎᑦᓯ ᓵᖓᓄᑦ ᐃᒋᑦᓱᒫᕐᐸᒃᑲ.

⁵ ᐃᓴᕆᐊᓕᒥᐅᑦ ᑎᒥᕕᓂᖏᑦ ᒎᑎᓐᖑᐊᖏᑕ ᓵᖓᓄᐊᕐᑎᑦᓱᒫᕐᐸᒃᑲ; ᓴᐅᓂᕕᓂᖏᓪᓗ ᑐᓂᕐᕈᓯᕐᕕᖏᑕ ᐊᕙᑖᓄᑦ ᓯᐊᒻᒪᒃᑎᓪᓗᒋᑦ.

⁶ ᓇᓂᑐᐃᓐᓇᖅ ᐃᒡᓗᒐᓴᒡᔪᐊᑦ ᐃᓂᒋᔭᓯ ᐊᓯᕈᕐᑕᐅᔪᒫᕐᐳᑦ ᒎᑎᓐᖑᐊᒃᑯᕕᓯᓗ, ᑐᓂᕐᕈᓯᕐᕕᖁᑎᓯᓗ ᓯᖁᑦᑎᕐᑕᐅᔪᒫᕐᐳᑦ, ᒎᑎᓐᖑᐊᖁᑎᓯ ᓯᖁᒥᑕᐅᔪᒫᕐᐳᑦ ᐊᓯᕈᕐᑕᐅᓗᑎᒡᓗ, ᐃᓯᕐᓗᐊᕐᓂᑎᑦᓯᕕᖕᒧᑦ ᑐᓂᕐᕈᓯᕐᕕᖁᑎᓯ ᐅᕐᕈᑎᑕᐅᓗᑎᒃ, ᓴᓇᓯᒪᔭᓯᓗ ᓄᖑᑕᐅᓗᑎᒃ.

⁷ ᑐᖁᑕᐅᔪᖃᖃᑦᑕᕈᒫᕐᐳᑦ ᐊᑯᓐᓇᑦᓯᓐᓂ, ᖃᐅᔨᖁᓪᓗᓯ ᐊᑕᓂᐅᒐᒪ.

⁸ “ᐊᒥᐊᒃᑯᖃᕐᑎᑦᓱᒫᕐᐸᑦᓯᓕ. ᐃᓚᖏᑦ ᓴᕕᒡᔪᐊᒥᑦ ᐊᓐᓇᒃᑎᑦᓱᒫᕐᐸᒃᑲ ᐃᓅᖃᑎᒌᒡᔪᐊᓂ, ᓯᐊᒻᒪᒃᑎᓪᓗᓯᓗ ᓄᓇᓕᒡᔪᐊᓄᑦ.

⁹ “ᐃᓕᑦᓯ ᐊᓐᓇᒃᓯᒪᔪᓯ ᐃᖅᑲᕈᒫᕐᐸᑦᓯᓐᖓ ᐃᓅᖃᑎᒌᒡᔪᐊᓃᓕᕐᑎᓪᓗᓯ ᐊᐅᓪᓚᕈᑦᔭᐅᓯᒪᕕᒋᔭᑦᓯᓐᓂ, ᐃᓱᒪᕐᓱᕈᒪᓂᓯ ᓯᖁᒥᑎᒍᒃᑭᑦ ᐅᕙᓐᓂᒃ ᕿᒤᑦᔪᑎᒋᓚᐅᕐᑕᓯ, ᑕᐅᑐᖏᑦᔪᑎᒋᓚᐅᕐᑕᑦᓯᓐᓂᒡᓗ ᒎᑎᓐᖑᐊᖃᕈᒪᓂᕐᒧᑦ; ᐃᓕᑦᓯᓐᓄᑦ ᓇᕐᕈᓇᕐᓯᔪᒫᕐᒪᑕ ᐊᒡᓛᑦ ᑕᑯᑐᐃᓐᓇᕐᓗᒋᑦ ᐊᔪᕐᑐᓕᑦᔪᑎᒋᓯᒪᔭᓯ, ᒎᑎᒧᓪᓗ ᑕᒪᕐᒥᒃ ᓇᕐᕈᓇᕐᑑᓂᖏᓐᓂᒃ.

¹⁰ ᖃᐅᔨᔪᒫᕐᐳᑦ ᐊᑕᓂᐅᓂᓐᓂᒃ; ᓯᕘᕋᓵᕆᑐᐃᓐᓇᕐᓗᖓᓗ ᐱᐅᖏᑦᑐᒥᒃ ᐱᓂᐊᕐᕕᒋᓯᒪᖏᓐᓇᒃᑭᑦ.”

¹¹ ᐃᒫᒃ ᐊᑕᓂᖅ ᒎᑎ ᐅᖃᕐᐳᖅ, “ᐸᑦᑕᒋᑦᓯ, ᐃᑎᒐᓯᓗ ᑐᒃᑲᕐᓗᒋᑦ, ᐅᖃᕐᓗᓯᓗ, ᐊᓱᐃᓛᒃ! ᐱᐅᖏᑦᑐᓄᑦ ᒎᑎᒧᓪᓗ ᓇᕐᕈᓇᕐᑐᓄᑦ ᐃᓴᕆᐊᓕᐅᑉ ᑭᖑᕚᖏᓐᓃᑦᑐᓄᑦ; ᑍᒤᓕᐅᕐᑐᑦ ᓴᕕᒡᔪᐊᕐᒧᑦ ᑐᖁᔪᒃᓴᐅᖕᒪᑕ, ᑳᖕᓇᕐᑐᕐᔪᐊᒧᓪᓗ, ᐋᓐᓂᐊᓇᕐᑐᓄᓪᓗ.

¹² ᐅᖓᓯᒃᑐᒦᑦᑐᖅ ᐋᓐᓂᐊᓇᕐᑐᓄᑦ ᑐᖁᔪᒫᕐᐳᖅ; ᖃᓂᑦᑐᒦᑦᑐᕐᓗ ᓴᕕᒡᔪᐊᕐᒧᑦ ᑐᖁᓗᓂ, ᐊᒥᐊᒃᑰᔪᕐᓗ ᑳᖕᓇᕐᑐᕐᔪᐊᕐᒧᑦ ᐱᕐᓕᕐᓗᓂ. ᑍᒫᒃ ᓂᓐᖓᐅᒪᕕᒡᔪᐊᕐᓂᓐᓄᑦ ᐱᓇᓱᐊᕈᒫᕐᐳᖓ ᑖᒃᑯᓄᖓ.

¹³ ᖃᐅᔨᔪᒫᕐᐳᓯᓗ ᐅᕙᖓ ᐊᑕᓂᐅᒐᒪ, ᑐᖁᖓᔪᑦ ᒎᑎᓐᖑᐊᖃᕐᕕᖕᓂ ᑐᓂᕐᕈᓯᕐᕕᖕᓂᓗ ᓯᐊᒻᒪᕐᓯᒪᓕᕐᐸᑕ, ᐱᖑᕐᓂᓗ ᐳᕐᑐᔪᓕᒫᓂ, ᖃᖅᑬᓪᓗ ᖄᖏᓐᓂ, ᓇᐹᕐᑐᐃᓪᓗ ᑐᖑᔪᕐᑐᑦ ᐊᑖᓂ, ᓇᐹᕐᑐᕐᔪᐊᓪᓗ ᐅᖃᐅᔭᖅᑯᕐᑐᔪᑦ ᐊᑖᓂ, ᓇᓂᑐᐃᓐᓇᕐᓗ ᒎᑎᓐᖑᐊᓕᒫᓄᑦ ᒪᒪᕐᑐᓂᒃ ᑐᓂᕐᕈᓯᕐᕕᖏᓐᓂ.

¹⁴ ᐱᔪᓐᓇᕐᓂᓐᓄᑦ ᓄᓇᒋᔭᖓ ᐱᒋᐊᕈᒫᕐᐸᕋ, ᐃᓄᖃᕈᓐᓃᕐᑎᓪᓗᒍ ᐊᑐᕐᑐᒃᓴᐅᔪᓐᓃᕐᑎᓪᓗᒍᓗ, ᓄᓇᒋᔭᓕᒫᖏᓐᓂ, ᐃᓄᖃᖏᑦᑐᒥᑦ ᕆᑉᓚᒧᑦ ᑎᑭᓪᓗᒍ. ᑕᕝᕙ ᖃᐅᔨᓕᕈᒫᕐᐳᑦ ᐅᕙᖓ ᐊᑕᓂᐅᒐᒪ.”