ᐃᓯᑭᐊᓕᐅᑉ ᐊᒡᓚᖏᑦ 48 - ᐊᒡᓔᑦ ᐃᑦᔪᕐᖕᓁᑦᑐᑦ

ᓄᓇᐅᑉ ᐊᕕᒃᑐᕐᑕᐅᓂᖓ ᑭᖑᕚᖑᖃᑎᒌᓄᑦ

¹ ᐅᑯᐊ ᑕᕝᕙ ᑭᖑᕚᖑᖃᑎᒌᑦ ᐊᑎᖏᑦ ᐃᒤᓕᖓᕗᑦ: ᐱᒋᐊᕐᓗᒋᑦ ᓄᓇᐅᑉ ᐊᕕᒃᓯᒪᓂᖓᓂᑦ ᐅᓐᓄᐊᓪᓗᐊᑦ ᓇᓛᓃᑦᑐᒥᑦ, ᓯᕿᓂᐅᑉ ᓄᐃᕕᐊᑕ ᓇᓛᓄᐊᖓᔪᒥᑦ ᑕᕆᐅᕌᓗᖕᒥᑦ ᒥᑎᑎᕇᓂᐊᒥᑦ ᐱᒋᐊᕐᓗᓂ ᕼᐃᓴᓚᓐᒥᑦ ᕼᐊᒫᑎᐅᑉ ᐃᓚᖓᓄᑦ, ᕼᐊᔭ-ᐃᓇᓐᒧᓪᓗ ᑎᑭᓪᓗᒍ ᐅᓐᓄᐊᓪᓘᐊᑉ ᓇᓛᓃᑦᑐᒧᑦ ᑕᒫᓯᑰᓯᐅᑉ ᑭᒡᓕᖓᓄᑦ ᕼᐊᒫᑎᐅᑉ ᐃᓚᖓᓄᐊᖓᔪᒧᑦ, ᑕᒪᓐᓇ ᑖᓐ ᑭᖑᕚᖏᓐᓄᑦ ᓄᓇᒋᔭᐅᕗᖅ.

² ᑖᓐ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᑕᒪᓐᓇ ᐋᓱᕆᐅᑉ ᑭᖑᕚᖏᓐᓄᑦ ᓄᓇᒋᔭᐅᕗᖅ.

³ ᐋᓱᕆᐅᑉ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᑕᒪᓐᓇ ᓈᑉᑕᓕᐅᑉ ᑭᖑᕚᖏᓐᓄᑦ ᓄᓇᒋᔭᐅᕗᖅ.

⁴ ᓈᑉᑕᓕᐅᑉ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᑕᒪᓐᓇ ᒫᓇᓯᐅᑉ ᑭᖑᕚᖏᓐᓄᑦ ᓄᓇᒋᔭᐅᕗᖅ.

⁵ ᒫᓇᓯᐅᑉ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᑕᒪᓐᓇ ᐃᕗᕅᒥᐅᑉ ᑭᖑᕚᖏᓐᓄᑦ ᓄᓇᒋᔭᐅᕗᖅ.

⁶ ᐃᕗᕅᒥᐅᑉ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᑕᒪᓐᓇ ᕉᐱᓂᐅᑉ ᑭᖑᕚᖏᓐᓄᑦ ᓄᓇᒋᔭᐅᕗᖅ.

⁷ ᕉᐱᓂᐅᑉ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᑕᒪᓐᓇ ᔫᑕᐅᑉ ᑭᖑᕚᖏᓐᓄᑦ ᓄᓇᒋᔭᐅᕗᖅ.

ᓄᓇᖁᑎᑖᕆᔭᐅᔪᑦ ᕿᑎᖓᓃᑦᑑᑉ ᐊᑦᔨᐅᖏᑦᑑᑎᑕᐅᓂᖓ

⁸ ᔫᑕᐅᑉ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᑕᒪᓐᓇ ᓄᓇ ᓴᓂᕐᕙᒃᓯᒪᔭᖃᕆᐊᖃᕐᐳᖅ, ᐊᖏᓂᖃᕐᓗᓂ ᓴᓂᒧᑦ 10ᒤᓕᒥᒃ ᐅᓐᓄᐊᓪᓗᐊᒥᑦ ᐅᓪᓗᓪᓗᐊᒧᑦ, ᐊᒻᒪ ᑍᒫᓪᓗᐊᖅ ᓯᕕᑐᑎᒋᖕᒥᓗᓂ ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᑦ, ᑭᖑᕚᕇᓄᑦ ᐊᕕᒃᑐᕐᑕᐅᔪᑎᑐᑦ ᐊᖏᑎᒋᓗᓂ, ᑕᕝᕙᓂ ᕿᑎᖓᓂ ᑐᒃᓯᐊᕐᕕᒡᔪᐊᖅ ᐃᓂᖃᕐᑐᒃᓴᐅᕗᖅ.

⁹ ᓄᓇ ᓴᓂᕐᕙᒃᓯᒪᔭᓯ ᐊᑕᓂᕐᒧᑦ ᐊᑐᕐᑐᒃᓴᐅᖁᓪᓗᒍ 10ᒤᓕᒥᒃ ᑐᑭᒧᖃᕐᑐᒃᓴᐅᕗᖅ, ᓴᓂᒧᖃᕐᓗᓂᓗ 8ᒤᓕᒥᒃ.

¹⁰ ᑕᒪᓐᓇ ᓄᓇ ᐃᑦᔪᕐᓁᑎᑕᐅᓯᒪᔪᒃᓴᐅᕗᖅ: ᑐᓂᕐᕈᓯᕐᑎᑦᓯᔩᑦ ᑕᒪᑐᒥᖓ ᓄᓇᖁᑎᖃᕐᑐᒃᓴᐅᕗᑦ ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᓂᐱᕕᐊᑕ ᓇᓛᓄᑦ ᐊᖏᓂᖃᕐᑐᒥᒃ 10ᒤᓕᒥᒃ, ᐅᓐᓄᐊᓪᓗᐊᓪᓗ ᓇᓛᓂᑦ ᐅᓪᓗᓪᓗᐊᑉ ᓇᓛᓄᑦ ᐊᖏᓂᖃᕐᓗᓂ 4ᒤᓕᒥᒃ, ᑖᑦᓱᒪ ᓄᓇᐅᑉ ᕿᑎᖓᓂ ᐊᑕᓂᐅᑉ ᑐᒃᓯᐊᕐᕕᒡᔪᐊᖁᑎᖓ ᐃᓂᖃᕐᑐᒃᓴᐅᕗᖅ.

¹¹ ᑖᓐᓇ ᓄᓇ ᐃᑦᔪᕐᓁᑎᑕᐅᓯᒪᔪᖅ ᑐᓂᕐᕈᓯᕐᑎᑦᓯᔨᓄᑦ ᑐᕌᖓᔪᒃᓴᐅᕗᖅ ᔭᑑᑭᐅᑉ ᑭᖑᕚᖏᓐᓄᑦ, ᑖᒃᑯᐊ ᓱᕐᕋᔪᐃᑦᑑᓪᓗᑎᒃ ᐅᕙᓐᓂᒃ ᐱᔨᑦᓯᓚᐅᕐᒪᑕ, ᐃᓴᕆᐊᓕᒥᐅᓄᑦ ᑕᒻᒪᕐᑐᓄᑦ ᐃᓚᐅᓇᑎᒃ, ᓕᕔᑎᑦ ᑭᖑᕚᖏᑕ ᐃᓚᖏᑎᑐᑦ.

¹² ᑕᒪᑐᒥᖓ ᓄᓇᖁᑎᑖᕐᑐᒃᓴᐅᕗᑦ ᐊᑦᔨᐅᖏᑦᑑᑎᑕᐅᔪᒥᒃ ᓄᓇᒥᑦ ᐃᑦᔪᕐᓁᑦᑐᒥᑦ, ᑕᒪᓐᓇᓗ ᐃᑦᔪᕐᓁᓐᓂᕐᐸᐅᑎᑕᐅᔪᒃᓴᐅᕗᖅ, ᓕᕔᑎᑦ ᓄᓇᖁᑎᖏᑕ ᓴᓂᐊᓃᓪᓗᓂ.

¹³ ᑐᓂᕐᕈᓯᕐᑎᑦᓯᔩᑦ ᓄᓇᖁᑎᖏᑕ ᓴᓂᐊᓃᑦᑐᒥᒃ, ᓕᕔᑎᑦ ᓄᓇᖁᑎᑖᕐᑎᑕᐅᔪᒃᓴᐅᕗᑦ 10ᒤᓕᒥᒃ ᑐᑭᒧᖃᕐᑐᒥᒃ, 4ᒤᓕᒥᒡᓗ ᓴᓂᒧᖃᕐᑐᒥᒃ.

¹⁴ ᑖᒃᑯᐊ ᓂᐅᕐᕈᑎᖃᕐᑐᒃᓴᐅᓐᖏᓚᑦ ᑕᐅᕐᓯᐅᑦᔨᔪᒃᓴᐅᓐᖏᓚᓪᓘᓐᓃᑦ ᓄᓇᖁᑎᒥᖕᓂᒃ; ᑕᒪᓐᓇ ᐃᒃᐱᒋᔭᐅᑦᓯᐊᕐᑐᒃᓴᐅᕗᖅ ᓄᓇᐅᑉ ᐱᐅᓂᕐᐹᕆᖕᒪᒍ, ᐊᑕᓂᕐᒧᑦ ᐃᑦᔪᕐᓁᑦᑑᒪᑦ.

¹⁵ ᓴᓂᕐᕙᒃᑕᐅᓯᒪᔪᒥ ᐊᒥᐊᒃᑰᔪᖅ 10ᒤᓕᓂᒃ ᑕᑭᓂᓕᒃ, 2ᒤᓕᒥᒃ ᓴᓂᒧᑐᓂᓕᒃ, ᐃᓄᖕᓄᑦ ᐃᒡᓗᒐᓴᖕᒥᐅᑐᐃᓐᓇᕐᓄᑦ ᐊᑐᒐᒃᓴᐅᔪᒃᓴᐅᕗᖅ, ᑕᕝᕙᓂ ᐃᒡᓗᖃᕈᓐᓇᕐᐳᑦ ᖃᓄᑐᐃᓐᓇᕐᓗ ᐊᑐᕈᒪᔭᒥᖕᓄᑦ ᐊᑐᕐᓗᒍ. ᑖᑦᓱᒪ ᓄᓇᐅᑉ ᕿᑎᖓᓂ ᐃᒡᓗᒐᓴᒡᔪᐊᖃᕐᑐᒃᓴᐅᕗᑦ.

¹⁶ ᑭᒃᐹᕆᓪᓗᐊᕐᑐᒃᓴᐅᕗᖅ ᐊᕙᑎᖏᒃ ᐊᑦᔨᒌᒥᒃ ᐊᖏᓂᖃᕐᓗᑎᒃ: ᐅᓐᓄᐊᓪᓗᐊᑉ ᓇᓛᓃᑦᑐᖅ 2,520ᓂᒃ ᐆᒃᑑᑎᓂᒃ ᓯᕕᑐᓂᖃᕐᓗᓂ ᐅᓪᓗᓪᓗᐊᓪᓗ ᓇᓛᓃᑦᑐᖅ ᑍᒤᓪᓗᐊᕐᓗᓂ, ᐊᕙᒻᒧᓪᓗ ᓯᑭᓂᐅᑉ ᓄᐃᕕᐊᓂᑦ ᓂᐱᕕᐊᓄᑦ ᑍᒤᓪᓗᐊᕐᒥᓗᓂ.

¹⁷ ᐃᒡᓗᒐᓴᒡᔪᐊᑦ ᓯᓚᑖᒍᑦ ᓄᓇᒥ ᐊᑐᐃᓐᓇᖃᒃᑲᓐᓂᕐᑐᒃᓴᐅᕗᖅ; ᐊᕙᒻᒧᑦ ᐊᑐᓂᑦ ᓴᓂᒧᓪᓗ 140ᓂᒃ ᐆᒃᑑᑎᓂᒃ ᐊᖏᓂᖃᕐᑐᒥᒃ.

¹⁸ ᐃᒡᓗᒐᓴᒡᔪᐊᑦ ᓱᓇᖃᖏᓐᓂᖓᑕ ᐊᒥᐊᒃᑯᖓ ᐃᑦᔪᕐᓁᑦᑐᒦᑦᑐᖅ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ ᐊᖏᓂᖃᕐᑐᒃᓴᐅᕗᖅ 4ᒤᓕᒥᒃ ᑐᑭᒧᖃᕐᓗᓂ 2ᒤᓕᒥᒡᓗ ᓴᓂᒧᑐᓂᖃᕐᓗᓂ, ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᖅ 4ᒤᓕᒥᒃ ᑕᑭᓂᖃᕐᓗᓂ 2ᒤᓕᒥᒃ ᓴᓂᒧᑐᓂᖃᕐᓗᓂ, ᐃᑦᔪᕐᓁᑎᑕᐅᓯᒪᔫᑉ ᓴᓂᐊᒎᖓᓗᓂ. ᑕᒪᑐᒪᓗ ᓄᓇᐅᑉ ᐱᕈᕐᑎᑕᖏᑦ ᐱᓇᓱᐊᕐᑎᓄᑦ ᓂᕿᒃᓴᐅᔪᒃᓴᐅᕗᖅ.

¹⁹ ᐃᒡᓗᒐᓴᒡᔪᐊᕐᒥᐅᑦ ᐱᓇᓱᐊᕐᑏᑦ, ᑭᖑᕚᕇᓂᑦ ᓇᓪᓕᐊᓐᓂᑐᐃᓐᓇᖅ ᐃᓴᕆᐊᓕᒥᐅᓂᑦ ᐱᓯᒪᒐᓗᐊᕈᑎᒃ, ᑕᒫᓂ ᐱᕈᕐᓰᕕᖃᕈᓐᓇᕐᐳᖅ.

²⁰ ᓴᓂᕐᕙᒃᑕᐅᓯᒪᔫᑉ ᐊᖏᓂᖓ ᐊᑕᖏᕐᓗᒍ ᐆᒃᑐᕋᕐᓯᒪᔪᒃᓴᐅᕗᖅ 10ᒤᓕᒥᒃ ᐊᑦᔨᒌᒥᒃ ᐊᖏᓂᖃᕐᓗᓂ ᑐᑭᒧᑦ ᓴᓂᒧᓪᓗ, ᑕᒪᓐᓇ ᐃᑦᔪᕐᓁᑦᑐᒃᑯᕕᐅᓗᓂ ᐃᓚᖓᓗ ᐃᒡᓗᒐᓴᒡᔪᐊᖃᕐᕕᐅᓗᓂ.

²¹ ᑖᑦᓱᒪ ᐃᑦᔪᕐᓁᑦᑐᒃᑯᕕᐅᑉ ᐊᕙᑎᖏᒃ ᐃᒡᓗᒐᓴᖃᕐᕕᐅᔪᕐᓗ ᐊᖓᔪᖅᑳᒧᑦ ᓄᓇᖁᑎᒋᔭᐅᔪᒃᓴᐅᕗᖅ. ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒥᑦ, ᓂᐱᕕᐊᑕ ᓇᓛᓄᐊᖓᔪᒧᑦ ᐊᖏᓂᖃᕐᓗᓂ 10ᒤᓕᒥᒃ ᐊᕙᒻᒧᑦ, ᑭᖑᕚᕇᑦ ᓄᓇᖁᑎᖏᓐᓄᑦ ᐋᖅᑭᒃᓯᒪᓂᖓ ᐊᑦᔨᒋᔭᐅᒐᓚᒡᓗᓂ, ᐊᖓᔪᖅᑳᑉ ᑕᒪᓐᓇ ᐱᒋᔭᒃᓴᕆᕚ. ᐃᑦᔪᕐᓁᑦᑐᒃᑯᕕᐅᓗᓂ ᕿᑎᖓᓂᓗ ᑐᒃᓯᐊᕐᕕᒡᔪᐊᖅ ᐃᓂᖃᕐᓗᓂ,

²² ᓕᕔᑎᓄᑦ ᓄᓇᖁᑎᒋᔭᐅᔫᑉ ᐃᒡᓗᒐᓴᒡᔪᐊᓄᓪᓗ ᐃᓂᒋᔭᐅᔫᑉ ᐊᒥᐊᒃᑯᖓ ᕿᑎᖓᓃᑦᑐᖅ ᐊᖓᔪᖅᑳᑉ ᓄᓇᖁᑎᒋᔭᒃᓴᕆᕚ. ᔫᑕᐅᑉ ᓄᓇᖁᑎᖓᑕ ᐱᓐᔭᒥᓂᐅᓪᓗ ᓄᓇᖁᑎᖓᑕ ᐊᑯᓐᓂᖓᓃᓪᓗᓂ.

ᓄᓇᒋᔭᐅᔪᒃᓴᑦ ᑭᖑᕚᖑᖃᑎᒌᑦ ᐃᓚᖏᓐᓄᑦ

²³ ᑭᖑᕚᖑᖃᑎᒌᑦ ᐃᓚᖏᑦ: ᓄᓇᖁᑎᑖᕆᐊᖃᕐᑐᑦ ᐊᕕᒃᑐᕈᓐᓇᕐᐳᑦ ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᓯᕿᓂᐅᑉ ᓂᐱᕕᐊᑕ ᓇᓛᓄᑦ, ᐱᓐᔭᒥᓂᒃᑯᑦ ᑭᖑᕚᖏᓐᓄᑦ ᓄᓇᒋᔭᐅᕗᑦ.

²⁴ ᐱᓐᔭᒥᓂᒃᑯᑦ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᓯᒥᐅᓂᒃᑯᑦ ᑭᖑᕚᖏᓐᓄᑦ ᓄᓇᒋᔭᐅᕗᖅ.

²⁵ ᓯᒥᐅᓂᐅᑉ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᐃᓴᑳᕆᒃᑯᑦ ᑭᖑᕚᖏᓐᓄᑦ ᓄᓇᒋᔭᐅᕗᖅ.

²⁶ ᐃᓴᑳᕆᒃᑯᑦ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᓯᐳᓗᓂᒃᑯᑦ ᑭᖑᕚᖏᓐᓄᑦ ᓄᓇᒋᔭᐅᕗᖅ.

²⁷ ᓯᐳᓗᓂᒃᑯᑦ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᐊᖓᓪᓗᓂ, ᒑᑦᑯᑦ ᑭᖑᕚᖏᓐᓄᑦ ᓄᓇᒋᔭᐅᕗᖅ.

²⁸ ᒑᑦᑯᑦ ᓄᓇᖓᑕ ᑭᒡᓕᖓᓂᑦ ᐱᒋᐊᕐᓗᓂ, ᐅᓪᓗᓪᓗᐊᑉ ᓇᓛᓄᐊᖓᓗᓂ, ᑕᒫᕆᐅᑉ ᓄᓇᖓᑕ ᑭᒡᓕᖓᓂᑦ ᒥᕆᐸ-ᑲᑎᓯᒧᐊᖓᓗᓂ, ᐅᓐᓄᐊᓪᓗᐊᑉ ᓇᓛᓄᐊᖓᓗᓂ ᐄᑦᔨᑉᑎᒥᐅᑦ ᓄᓇᖓᑕ ᑭᒡᓕᖓᒎᕐᓗᓂ ᑕᕆᐅᕐᔪᐊᖅ ᒥᑎᑎᕇᓂᐊ ᑎᑭᓪᓗᒍ.

²⁹ ᑕᒪᓐᓇ ᓄᓇ ᑍᒫᒃ ᐊᕕᒃᑐᕐᑕᒃᓴᕆᕙᓯ ᓇᓚᐅᑦᓵᕈᑎᒧᑦ ᑭᖑᕚᕇᑦ ᓄᓇᒥᒃ ᑭᖑᕐᖑᑎᔭᒃᓴᖏᓐᓂᒃ ᓄᓇᑖᖁᓪᓗᒋᑦ ᐃᓴᕆᐊᓕᐅᑉ ᑭᖑᕚᖏᑦ, “ᑍᒫᒃ ᑕᕝᕙ ᓄᓇ ᐊᕕᒃᑐᕐᑕᐅᓯᒪᔪᒃᓴᐅᕗᖅ, ᐊᑕᓂᖅ ᒎᑎ ᐅᖃᕐᐳᖅ.”

ᔨᕉᓴᓕᐅᑉ ᐃᑎᕐᑕᕐᕕᖏᑦ

³⁰ “ᐃᒡᓗᒐᓮᑦ ᐃᑎᕐᑕᕐᕕᖏᑦ ᐃᒤᓕᖓᔪᒃᓴᐅᕗᑦ: ᐃᑎᕐᑕᕐᕕᒃ ᐅᓐᓄᐊᓪᓗᐊᒦᑦᑐᖅ ᐊᖏᓂᖃᕐᑐᒃᓴᐅᕗᖅ 2,520ᓂᒃ ᐆᒃᑑᑎᓂᒃ,

³¹ ᐃᑎᕐᑕᕐᕖᑦ ᐱᖓᓱᑦ ᐅᓐᓄᐊᓪᓗᐊᑉ ᓇᓛᓃᑦᑐᑦ ᐊᑎᖃᕐᑐᒃᓴᐅᕗᑦ ᑭᖑᕚᕇᑦ ᐃᓴᕆᐊᓕᒥᐅᑦ ᐱᖓᓱᑦ ᐊᑎᖏᓐᓂᒃ: ᐃᑎᕐᑕᕐᕕᒃ ᕉᐱᓂ, ᐃᑎᕐᑕᕐᕕᒃ ᔫᑕ, ᐃᑎᕐᑕᕐᕕᒃ ᓕᕔ;

³² ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᑦ ᐃᑎᕐᑕᕐᕖᑦ ᐱᖓᓱᑦ ᐊᖏᓂᖃᕐᑐᒃᓴᐅᕗᑦ 2,520ᓂᒃ ᐆᒃᑑᑎᓂᒃ: ᐊᑎᖃᕐᑐᒃᓴᐅᕗᑦ, ᐃᑎᕐᑕᕐᕕᒃ ᔫᓯᐱ, ᐃᑎᕐᑕᕐᕕᒃ ᐱᓐᔭᒥᓂ, ᐃᑎᕐᑕᕐᕕᒃ ᑖᓐ;

³³ ᐅᓪᓗᓪᓗᐊᑉ ᓇᓛᓃᑦᑐᑦ, ᐃᑎᕐᑕᕐᕖᑦ ᐱᖓᓱᑦ ᐊᖏᓂᖃᕐᑐᒃᓴᐅᕗᑦ 2,520ᓂᒃ ᐆᒃᑑᑎᓂᒃ: ᐊᑎᖃᕐᑐᒃᓴᐅᕗᑦ, ᐃᑎᕐᑕᕐᕕᒃ ᓯᒥᐅᓂ, ᐃᑎᕐᑕᕐᕕᒃ ᐃᓴᑳᕆ, ᐃᑎᕐᑕᕐᕕᒃ ᓯᐳᓗᓂ;

³⁴ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᑦ ᐃᑎᕐᑕᕖᑦ ᐱᖓᓱᑦ ᐊᖏᓂᖃᕐᑐᒃᓴᐅᕗᑦ 2,520ᓂᒃ ᐆᒃᑑᑎᓂᒃ: ᐊᑎᖃᕐᑐᒃᓴᐅᕗᑦ; ᐃᑎᕐᑕᕐᕕᒃ ᒑᑦ, ᐃᑎᕐᑕᕐᕕᒃ ᐋᓱᕆ, ᐃᑎᕐᑕᕐᕕᒃ ᓈᑉᑕᓕ.

³⁵ ᐊᕙᓗᕐᔪᐊᑉ ᐊᖏᓂᖓ ᑐᑭᒧᑦ ᓴᓂᒧᓪᓗ 10,080ᓂᒃ ᐆᒃᑑᑎᓂᒃ ᐊᖏᓂᖃᕐᑐᒃᓴᐅᕗᖅ; ᒫᓐᓇᒥᑦ ᐱᒋᐊᕐᓗᒍ ᐃᒡᓗᒐᓴᒡᔪᐊᑦ ᑖᒃᑯᐊ ᐊᑎᖃᕐᑐᒃᓴᐅᕗᑦ, ᐊᑕᓂᖅ ᑕᕝᕙᓃᑉᐳᖅ.”