ᐃᓯᑭᐊᓕᐅᑉ ᐊᒡᓚᖏᑦ 47 - ᐊᒡᓔᑦ ᐃᑦᔪᕐᖕᓁᑦᑐᑦ

ᑰᒃ ᑐᒃᓯᐊᕐᕕᒡᔪᐊᕐᒥᑦ ᑰᒃᑐᖅ

¹ ᑕᕝᕙ ᐅᑎᕈᑎᕚᖓ ᑐᒃᓯᐊᕐᕕᒡᔪᐊᑉ ᐃᑎᕐᑕᕐᕕᖓᓄᑦ; ᑕᑯᒋᓪᓗ, ᐃᑎᕐᑕᕐᕕᐅᑉ ᐊᑖᒍᑦ ᑰᒃᑕᖃᕐᐳᖅ ᓯᕿᓂᐅᑉ ᓄᐃᕕᐊᑕ ᓇᓛᓄᑦ ᑰᒃᑐᒥᒃ ᑐᒃᓯᐊᕐᕕᒡᔪᐊᑉ ᓵᓐᖓᔭᖓᓄᑦ; ᑰᒃᑐᕐᓗ ᐱᒋᐊᕐᓯᒪᕗᖅ ᑐᒃᓯᐊᕐᕕᒡᔪᐊᑉ ᐊᑖᓂᑦ ᐅᓪᓗᓪᓗᐊᑉ ᓇᓛᓂᑦ, ᑐᓂᕐᕈᓯᕐᕕᐅᑉ ᐅᓪᓗᓪᓗᐊᖓᑕ ᓇᓛᓂᑦ.

² ᑕᕝᕙ ᐊᓂᖃᑎᒋᕚᖓ ᐃᑎᕐᑕᕐᕕᒃᑯᑦ ᐅᓐᓄᐊᓪᓗᐊᑉ ᓇᓛᓃᑦᑐᒃᑯᑦ, ᐃᑎᕐᑕᕐᕕᖕᒧᐊᕈᑎᕚᖓᓗ ᓯᕿᓂᐅᑉ ᓄᐃᕕᐊᑕ ᓇᓛᓄᑦ ᓵᓐᖓᔪᒧᑦ; ᑰᒃᑐᕐᓗ ᐅᓪᓗᓪᓗᐊᑉ ᓇᓛᓂᑦ ᑰᒃᐳᖅ.

³ ᐊᖑᑎᐅᑉ ᐆᒃᑐᕋᐅᑎᒥᓄᑦ ᕿᕋᑕᔪᒧᑦ ᐆᒃᑐᕋᕐᓗᓂᐅᒃ 560ᓂᒃ ᐆᒃᑑᑎᓂᒃ ᐅᓪᓗᓪᓗᐊᑉ ᓇᓛᓄᑦ, ᑰᑉ ᑰᖕᓂᖓ ᒪᓕᒡᓗᒍ ᐆᒃᑐᕋᕋᑖᕐᑕᒥᓄᑦ ᐃᐸᕌᖁᕚᖓ; ᐃᐸᕌᕋᒪ ᐃᒪᐅᑉ ᐃᑎᓂᖓ ᓯᖏᕐᓂᓐᓄᑦ ᑎᑭᐅᑎᓯᒪᕗᖅ.

⁴ ᐊᒻᒪ ᐆᒃᑐᕋᒃᑲᓐᓂᕆᕗᖅ 560ᓂᒃ ᐆᒃᑑᑎᓂᒃ, ᐃᒫᓄᑦ ᐆᒃᑐᕋᕋᑖᕐᑕᒥᓄᐊᕐᑎᒻᒪᖓ; ᑲᓈᓐᓄᑦ ᑎᑭᐅᑎᕗᖅ. ᐊᒻᒪ 560ᑲᓐᓂᕐᓂᒃ ᐆᒃᑐᕋᒥᒐᒥ ᐃᒫᓄᑦ ᐆᒃᑐᕋᕋᑖᕐᑕᖓᓄᐊᕐᑎᒻᒪᖓ; ᓯᕝᕕᐊᓐᓄᑦ ᑎᑭᐅᑎᕗᖅ.

⁵ ᐊᒻᒪ 560ᑲᓐᓂᕐᓂᒃ ᐆᒃᑐᕋᕐᒥᖕᒪᑦ, ᑰᖑᖕᒪᑦ ᐃᐸᕋᒃᓴᑐᐃᓐᓇᕈᓐᓁᓪᓕᕙᕋ, ᐃᑎᓗᐊᓕᕐᒪᑦ ᐳᐃᑦᔭᕐᓗᓂ ᑭᓯᐊᓂ ᐃᖏᕐᕋᕕᒃᓴᐅᓕᕐᐳᖅ, ᐱᓱᒡᕕᒃᓴᐅᔪᓐᓃᕐᒪᑦ.

⁶ ᐅᖃᐅᑎᕚᖓᓗ, “ᐃᓅᑉ ᐃᕐᓂᖓ ᑕᒪᒃᑯᐊᓕᒫᑦ ᑕᑯᑦᓯᐊᕐᐱᒌᑦ?” ᑕᕝᕙ ᐅᑎᕐᑎᒃᑭᕚᖓ ᑰᑉ ᓯᓈᓄᑦ.

⁷ ᑰᑉ ᓯᓈᓄᑦ ᐅᑎᕋᒪ, ᑕᑯᓕᕐᐳᖓ ᑰᑉ ᓯᓈᓂ ᓇᐹᕐᑐᒐᓴᒡᔪᐊᓂᒃ ᐃᒡᓗᒃᑐᑦ ᐊᑭᓕᕇᓂᒃ.

⁸ ᐅᖃᐅᑎᕚᖓᓗ, “ᑕᒪᓐᓇ ᑰᒃᐳᖅ ᓯᕿᓂᐅᑉ ᓄᐃᕕᐊᑕ ᓇᓛᓄᑦ ᐊᕋᐸᐅᑉ ᓇᕐᓴᖓᓄᑦ; ᑕᓯᕐᔪᐊᕐᒧᑦ ᑐᖁᖓᔪᒧᑦ ᑎᑭᐅᓯᒪᕗᖅ, ᑕᓯᕐᔪᐊᒧᑦ ᑎᑭᓐᓇᒥ ᑕᕆᐅᖑᔪᓐᓃᕐᑎᑦᓯᓪᓗᓂ ᐃᒥᑦᓯᐊᕙᕈᕐᑎᑦᓯᕗᖅ.

⁹ ᑰᑉ ᑕᒪᑐᒪ ᑰᒡᕕᒋᔭᖏᑦ ᐆᒪᔪᓕᒫᓂᒃ ᐆᒻᒪᕐᑎᑦᓯᔪᒫᕐᐳᑦ, ᐃᖃᓗᒐᓴᒡᔪᐊᖃᓕᕈᒫᕐᐳᖅ; ᑰᒃ ᑕᒪᓐᓇ ᑰᒃᐳᖅ, ᑕᓯᕐᔪᐊᕐᒥᒃ ᑕᕆᐅᖑᔪᓐᓁᕐᑎᑦᓯᖁᓪᓗᒍ; ᑰᒡᕕᒋᔭᓕᒫᖏᑦ ᐆᒻᒪᕐᑐᐃᓐᓇᐅᖁᓪᓗᒋᑦ.

¹⁰ ᐃᖃᓗᒃᓯᐅᕐᑐᓂᒃ ᑕᓯᐅᑉ ᓯᓈ ᓈᓯᒪᔪᒫᕐᐳᖅ; ᐃᓐ-ᒋᑎᒥᑦ ᐱᒋᐊᕐᓗᓂ ᐃᓐ-ᐃᒡᓔᒻ ᐃᒪᖓ ᑎᑭᓪᓗᒍ ᓄᓗᐊᒥᖕᓂᒃ ᐸᓂᕐᓰᔪᓂᒃ; ᐊᑦᔨᒌᖏᑦᑐᓂᒡᓗ ᐃᖃᓗᖃᕈᒫᕐᐳᖅ, ᑕᕆᐅᕐᔪᐊᒥ ᒥᑎᑐᕇᓂᐊᑉ ᐃᖃᓗᖏᑎᑐᑦ ᐅᓄᕐᑎᒋᔪᓂᒃ.

¹¹ ᑕᓯᕐᔪᐊᓪᓕ ᓯᓚᑖᓃᑦᑐᑦ ᐃᒫᕐᓱᐃᑦ ᑕᓯᕐᓗᐃᓪᓗ ᐃᒪᑦᓯᐊᓐᖑᕈᒫᓐᖏᓚᑦ; ᑕᕆᐅᕆᔭᐅᖁᓪᓗᒋᑦ.

¹² ᑰᓪᓗ ᓰᓇ, ᐊᑦᔨᒌᖏᑦᑐᓂᒃ ᓇᐹᕐᑐᖃᕈᒫᕐᐳᖅ ᐊᑭᓕᕇᓂᒃ, ᓂᕿᒃᓴᖃᕐᕕᐅᔪᒫᕐᑐᓂᒃ. ᐅᖃᐅᔭᖏᑦ ᑐᖁᓕᔪᐃᑦᑑᔪᒫᕐᐳᑦ ᐱᕈᕐᑐᐃᕈᑎᔪᓐᓇᖏᓪᓗᑎᒡᓗ, ᑕᖅᑭᑕᒫᓪᓕ ᓄᑖᓂᒃ ᐸᐅᕐᖓᕐᑖᖃᑦᑕᕈᒫᕐᐳᑦ, ᐃᒪᖃᕐᑎᑕᐅᒐᒥᒃ ᑐᒃᓯᐊᕐᕕᒡᔪᐊᕐᒥᑦ ᑰᒃᑐᒧᑦ. ᐱᕈᕐᑐᖏᑦ ᓂᕿᒃᓴᐅᔪᒫᕐᐳᑦ, ᐅᖃᐅᔭᖏᓪᓗ ᐃᓅᓕᓴᐅᑎᐅᔪᒫᕐᐳᑦ ᐋᖅᑭᒃᑕᐅᓇᕐᑑᓗᑎᒃ.”

ᓄᓇᐅᑉ ᐊᕕᒃᑐᕐᓯᒪᓂᖏᑦ

¹³ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: “ᐅᑯᐊ ᑕᕝᕙ ᓄᓇᐅᑉ ᐊᕕᒃᑐᕐᓯᒪᓂᕆᔭᕆᐊᓕᖏᑦ ᑭᖑᕐᖑᑎᔭᐅᓗᑎᒃ ᐊᕕᒃᑐᕐᑕᐅᑎᑦᓴᕆᐊᓕᑎᑦ ᑭᖑᕚᖑᖃᑎᒌᓄᑦ 12ᓄᑦ ᐃᓴᕆᐊᓕᒥᐅᓄᑦ. ᔫᓯᐱᐅᓪᓕ ᑭᖑᕚᖏᑦ ᒪᕐᕈᐃᓕᖅᑲᖓᔪᒥᒃ ᓄᓇᖁᑎᑖᕐᑐᒃᓴᐅᕗᑦ.

¹⁴ ᐊᕕᒃᑐᕐᑕᒃᓴᕆᕙᓯ ᑍᒤᓪᓗᐊᕐᑐᒥᒃ ᓄᓇᖁᑎᑖᕐᑎᓪᓗᒋᑦ; ᐅᖃᕕᒃᓯᒪᒐᒪ ᓯᕗᓕᕕᓂᑦᓯᓐᓄᑦ ᓄᓇᒥᒃ ᑕᒪᑐᒥᖓ ᑐᓂᓯᓂᐊᕐᓂᕋᕐᓗᖓ, ᑕᒪᓐᓇ ᓄᓇ ᑐᓂᓂᐊᕐᓂᕋᕐᓗᒍ ᐃᓕᑦᓯᓐᓄᑦ ᑭᖑᕐᖑᑎᔭᐅᖁᓪᓗᒍ.

¹⁵ “ᓄᓇᐅᑉ ᐊᕕᒃᓯᒪᓂᖓ ᐃᒫᒃ ᑭᒡᓕᖃᕐᑐᒃᓴᐅᕗᖅ: ᐅᓐᓄᐊᓪᓗᐊᑉ ᓇᓛᓃᑦᑐᖅ, ᑕᕆᐅᕐᔪᐊᒥᑦ ᒥᑎᑎᕇᓂᐊᒥᑦ ᐱᒋᐊᕐᓗᓂ ᓯᕿᓂᐅᑉ ᓄᐃᕕᐊᑕ ᓇᓛᓄᐊᖓᓗᓂ ᕼᐃᓴᓚᐅᑉ ᐃᒡᓗᒐᓴᖏᑦ ᐊᖅᑯᓵᕐᓗᒋᑦ ᕼᐊᒫᓯᐅᑉ ᐊᖅᑯᑎᖓᓄᑦ ᑎᑭᓪᓗᒍ, ᔨᑖᑎᒥᐅᑦ ᐃᒡᓗᒐᓴᖏᓐᓄᑦ ᑎᑭᓪᓗᒍ.

¹⁶ ᐱᕉᓴᒧᑦ, ᓯᑉᕅᒻᒧᓪᓗ ᑎᑭᓪᓗᒍ ᑕᒫᓯᑰᓯᐅᑉ ᕼᐊᒫᑎᐅᓪᓗ ᓄᓇᖓᑦᑕ ᑭᒡᓕᖓᓃᑦᑐᒧᑦ, ᕼᐂᔭ-ᕼᐊᑎᑲᓐᒥᐅᑦ ᐃᒡᓗᒐᓴᖏᑦ ᑎᑭᓪᓗᒋᑦ, ᕼᐊᐅᕋᓐ ᓄᓇᖓᑕ ᑭᒡᓕᖓᓃᑦᑐᒧᑦ.

¹⁷ ᑍᒤᒻᒪᑦ ᓄᓇᐅᑉ ᐊᕕᒃᓯᒪᓂᖓᑕ ᑭᒡᓕᖓ ᐅᓐᓄᐊᓪᓗᐊᑉ ᓇᓛᓃᑦᑐᖅ ᐊᖏᓂᖃᕆᐊᖃᕐᐳᖅ ᑕᕆᐅᕐᔪᐊᕐᒥᑦ ᒥᑎᑎᕇᓂᐊᒥᑦ ᐱᒋᐊᕐᓗᒍ ᕼᐊᔭ-ᐃᓇᓐᒧᑦ ᑎᑭᓪᓗᒍ, ᑕᒫᓯᑰᓯᐅᑉ ᑕᕐᕋᖓᓃᑦᑐᒧᑦ ᓄᓇᖓᑕ ᑭᒡᓕᖓᓄᑦ, ᕼᐊᒫᑎᐅᓪᓗ ᑕᕐᕋᖓᑕ ᓄᓇᖓᑕ ᑭᒡᓕᖓᓄᑦ. ᑕᒪᓐᓇ ᑕᕝᕙ ᐅᓐᓄᐊᓪᓗᐊᑉ ᓇᓛᓃᑦᑐᖅ ᑍᒤᓕᖓᔪᒃᓴᐅᕗᖅ.

¹⁸ “ᓄᓇᐅᑉ ᐊᕕᒃᓯᒪᓂᖓ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ, ᐱᒋᐊᕐᓯᒪᔪᒃᓴᐅᕗᖅ ᕼᐊᔭᕆᓇᒥᑦ ᑕᒫᓯᑰᓯᐅᑉ ᕼᐊᐅᕋᓐᓗ ᐊᑯᓐᓂᖓᓂᑦ; ᔪᐊᕐᑕᓂᐅᑉ ᑰᖓ ᐃᓚᖅᑯᓪᓗᒍ ᒋᓕᐊᑎᐅᑉ ᐃᓴᕆᐊᓕᐅᓪᓗ ᓄᓇᖓᑕ ᐊᑯᓐᓂᖓᓂᑦ; ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ ᑕᒫᕐ ᑎᑭᓪᓗᒍ ᑕᓯᕐᔪᐊᑉ ᑕᕆᐅᕋᓘᑉ ᐃᓚᖓᓃᑦᑐᖅ. ᑕᒪᓐᓇ ᑕᕝᕙ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ ᑍᒤᓕᖓᔪᒃᓴᐅᕗᖅ.

¹⁹ “ᓄᓇᐅᑉ ᐊᕕᒃᑐᕐᓯᒪᓂᖓᑕ ᑭᒡᓕᖓ ᐅᓪᓗᓪᓗᐊᑉ ᓇᓛᓃᑦᑐᖅ, ᐱᒋᐊᕐᓯᒪᔪᒃᓴᐅᕗᖅ ᑕᒫᕆ ᐃᓚᖓᓂᑦ ᒥᕆᐸ-ᑲᑎᓯᐅᑉ ᐃᒪᖓ ᑎᑭᓪᓗᒍ, ᐅᓐᓄᐊᓪᓗᐊᑉ ᓇᓛᓄᐊᖓᓪᓗᓂ ᐄᑦᔨᑉᑎᐅᑉ ᓄᓇᖓᓃᑦᑐᖅ ᑰᑉ ᑭᒡᓕᖓ ᑎᑭᓪᓗᒍ ᑕᕆᐅᕌᓗᖕᒧᑦ ᒥᑎᑎᕇᓂᒧᐊᖓᓪᓗᓂ. ᑕᒪᓐᓇ ᑕᕝᕙ ᐅᓪᓗᓪᓗᐊᑉ ᓇᓛᓃᑦᑐᖅ ᑍᒤᓕᖓᔪᒃᓴᐅᕗᖅ.

²⁰ “ᓄᓇᐅᑉ ᐊᕕᒃᓯᒪᓂᖓ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑐᖅ, ᒥᑎᑎᕇᓂᐊᒥᑦ ᑕᕆᐅᕌᓗᖕᒥᑦ ᐱᒋᐊᕐᓯᒪᔪᒃᓴᐅᕗᖅ ᐅᓐᓄᐊᓪᓗᐊᑉ ᓇᓛᓄᐊᖓᓗᓂ ᕼᐊᒫᑎᐅᑉ ᐊᑭᐊᓄᑦ ᑎᑭᓪᓗᓂ. ᑕᒪᓐᓇ ᑕᕝᕙ ᓯᕿᓂᐅᑉ ᓂᐱᕕᐊᓃᑦᑐᖅ ᑍᒤᓕᖓᔪᒃᓴᐅᕗᖅ.

²¹ “ᑍᒫᒃ ᑕᕝᕙ ᓄᓇ ᐊᕕᒃᑐᕐᑕᒃᓴᕆᕙᓯ ᐃᓴᕆᐊᓕᒥᐅᑦ ᑭᖑᕚᖏᑦ ᒪᓕᒡᓗᒋᑦ.

²² ᑕᒪᓐᓇ ᓇᖕᒥᓂᕐᑖᕆᓗᒍ ᓄᓇᖁᑎᑖᕆᔭᒃᓴᕆᕙᓯ ᑭᖑᕐᖑᑎᓕᕐᓗᒍ ᓄᓇᖃᑎᑐᖃᕆᓐᖏᑕᓯᓗ ᓄᓇᑦᓯᓐᓂ ᕿᑐᕐᖏᐅᕐᓯᒪᔪᑦ ᓄᓇᒥᒃ ᐊᕕᒃᑐᐃᓕᕈᑦᓯ ᐱᖃᑕᐅᑎᑕᐅᔪᒃᓴᐅᕗᑦ. ᐃᓴᕆᐊᓕᒥᐅᑕᓪᓚᕆᒃᑎᑐᑦ ᐃᓱᒪᒋᔭᐅᔪᒃᓴᐅᕗᑦ; ᓄᓇᑖᕈᓐᓇᕐᑎᑕᐅᔪᒃᓴᐅᕗᓪᓗ ᐃᓴᕆᐊᓕᒥᐅᑦ ᑭᖑᕚᖑᖃᑎᒌᑦ ᓄᓇᖁᑎᒃᓴᒥᖕᓂᒃ ᐱᓇᓱᐊᓕᕐᐸᑕ ᐃᓚᒋᔭᐅᑦᓯᐊᕐᓗᑎᒃ.

²³ ᐃᓅᖃᑎᑐᖃᕆᓐᖏᑕᓯ ᐊᑐᓂᑦ ᓇᔪᕐᑕᒥᖕᓂ ᑭᖑᕚᕇᖑᔪᓂ ᐱᖃᑕᐅᔪᒃᓴᐅᕗᑦ ᐃᓅᖃᑎᒋᓕᕐᑕᒥᖕᓄᑦ ᑭᖑᕐᖑᑦᔨᖃᑕᐅᓕᕐᓗᑎᒃ, ᐊᑕᓂᖅ ᒎᑎ ᐅᖃᕐᐳᖅ.”