ᐃᓯᑭᐊᓕᐅᑉ ᐊᒡᓚᖏᑦ 46 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖓᔪᖅᑳᖅ ᓇᓪᓕᐅᓐᓂᕐᓯᐅᕐᓃᓪᓗ

¹ “ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᑐᕐᓲᖑᔭᕐᒧᑦ ᐃᓗᕙᓯᖕᓂᕐᓴᒧᑦ ᐃᑎᕐᑕᕐᕕᒃ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ ᒪᑐᓯᒤᓐᓇᕐᑐᒃᓴᐅᕗᖅ ᐅᓪᓗᑦ ᐱᖓᓲᔪᕐᑐᑦ ᐱᓇᓱᐊᕐᕕᐅᕙᒃᑐᑦ ᐊᑐᕐᑎᓪᓗᒋᑦ; ᓴᐸᑎᐅᓕᕌᖓᓪᓕ ᐅᒃᑯᐃᓐᖔᕐᑐᒃᓴᐅᕗᖅ ᑕᖅᑭᓂᕋᑖᒥᓗ ᓇᓪᓕᐅᓐᓂᕐᓯᐅᕐᓃᑦ ᐊᑐᓕᕌᖓᑕ.

² ᐊᖓᔪᖅᑳᖅ ᐃᑎᕐᑐᒃᓴᐅᕗᖅ ᑐᕐᓲᖑᔭᕐᒥᑦ ᓯᓚᕙᓯᖕᓂᕐᓴᒥᑦ, ᓇᖏᕐᑐᒃᓴᐅᕗᕐᓗ ᐃᑎᕐᑕᕐᕕᐅᑉ ᐊᕙᓗᖏᒃᑕ ᓴᓂᐊᓂ. ᑕᕝᕙ ᑐᓂᕐᕈᓯᕐᑎᑦᓯᔨ ᑐᓂᕐᕈᓯᕐᑐᒃᓴᐅᕗᖅ ᐃᑯᐊᓚᑦᓯᓗᓂ ᐃᓅᖃᑎᒌᑦᓯᐊᕐᓂᕐᒧᓪᓗ ᑐᓂᕐᕈᓯᕐᓗᓂ, ᑕᕝᕙᓂᓗ ᐃᑎᕐᑕᕐᕕᐅᑉ ᐅᒃᑯᐊᖃᕐᕕᖓᓂ ᑐᒃᓯᐊᕐᑐᒃᓴᐅᕗᖅ. ᑐᒃᓯᐊᕇᕈᓂ ᐊᓂᔪᒃᓴᐅᕗᖅ, ᐃᑎᕐᑕᕐᕕᒡᓕ ᐅᑯᐊᕐᑕᐅᔪᒃᓴᐅᓐᖏᓚᖅ ᐅᓐᓄᖕᒧᑦ ᑎᑭᓪᓗᒍ.

³ ᓴᐸᑎᐅᓕᕌᖓᑦ ᑕᖅᑮᓚᓪᓗᐊᒥᓗ ᓇᓪᓕᐅᓐᓂᕐᓯᐅᕐᕕᐅᓕᕌᖓᑦ ᐃᓄᐃᑦ ᐃᑎᕐᑕᕐᕕᐅᑉ ᓵᖓᓃᓪᓗᑎᒃ ᑐᒃᓯᐊᖃᑦᑕᕐᑐᒃᓴᐅᕗᑦ ᐊᑕᓂᕐᒧᑦ.

⁴ ᓴᐸᑎᐅᓕᕌᖓᑦ ᐊᖓᔪᖅᑳᖅ ᐊᑕᓂᕐᒧᑦ ᑐᓂᕐᕈᓯᕐᑐᒃᓴᐅᕗᖅ ᐃᑯᐊᓚᑎᑕᒃᓴᓂᒃ ᐱᖓᓲᔪᕐᑐᓂᒃ ᓄᕐᕋᐅᔭᕐᓂᒃ ᖃᓄᐃᓗᑕᖃᖏᑦᑐᓂᒃ ᐊᑕᐅᓯᕐᒥᒡᓗ ᓰᐱᐅᑉ ᐊᖑᓴᓪᓗᖓᓂᒃ ᖃᓄᐃᓗᑕᖃᖏᑦᑐᒥᒃ;

⁵ ᓰᐱᐅᑉ ᐊᖑᓴᓪᓗᖓᓂᒃ ᑐᓂᕐᕈᓯᓕᕈᓂ ᖃᑦᑕᐅᔭᐅᑉ ᓇᑉᐸᓪᓗᐊᖓᑐᑦ ᐊᖏᑎᒋᔪᒥᒃ ᓂᐊᖂᔭᒃᓴᒥᒃ ᐱᖃᓯᐅᑦᔨᔪᒃᓴᐅᕗᖅ, ᓄᕐᕋᐅᔭᕐᓂᒡᓗ ᑐᓂᕐᕈᓯᓕᕈᓂ ᑐᓂᖃᓯᐅᑎᔪᓐᓇᕐᑕᓕᒫᒥᓂᒃ ᑐᓂᖃᓯᐅᑦᔨᔪᓐᓇᕐᐳᖅ, ᑐᓂᕐᕈᑎᒋᔭᖏᑦ ᐃᓚᖃᕐᓗᑎᒃ ᖃᑦᑕᐅᔭᐅᑉ ᓇᑉᐸᓪᓗᐊᖓᑎᑑᕐᑐᒥᒃ ᓂᐊᖂᔭᒃᓴᒥᒃ ᐸᐅᕐᖎᓪᓗ ᐅᕐᓱᖓᓂᒃ ᐅᕐᓱᒃᓴᖃᐅᑎᑎᑐᑦ ᐱᖓᓱᑎᑐᑦ ᐊᖏᑎᒋᔪᒥᒃ.

⁶ ᑕᖅᑮᓚᓪᓗᐊᒥᒃ ᓇᓪᓕᐅᓐᓂᕐᓯᐅᕐᑎᓪᓗᒋᑦ ᑐᓂᕐᕈᓯᕐᑐᒃᓴᐅᕗᖅ ᐃᒻᒧᒃᓯᐅᒐᐅᑉ ᐊᖑᓴᓪᓗᖓᓂᒃ ᐊᑕᐅᓯᕐᒥᒃ ᖃᓄᐃᓗᑕᖃᖏᑦᑐᒥᒃ, ᓄᕋᐅᔭᕐᓂᒡᓗ ᐱᖓᓲᔪᕐᑐᓂᒃ, ᓰᐲᓪᓗ ᐊᖑᓴᓪᓗᖓᓂᒃ ᐊᑕᐅᓯᕐᒥᒃ, ᖃᓄᐃᓗᑕᖃᖏᑦᑐᓂᒃ.

⁷ ᐊᖑᓴᓪᓗᕐᒥᒃ ᓰᐲᓪᓗ ᐊᖑᓴᓪᓗᖓᓂᒃ ᑐᓂᓯᓕᕈᓂ ᐃᓚᖃᖃᑦᑕᕐᑐᒃᓴᐅᕗᑦ ᖃᑦᑕᐅᔭᐅᑉ ᓇᑉᐸᓪᓗᐊᖓᓂᒃ ᓂᐊᖂᔭᒃᓴᒥᒃ, ᓄᕐᕋᐅᔭᕐᓂᒃ ᑐᓂᓯᓕᕈᓂ ᐃᓚᖃᖃᑦᑕᕐᑐᒃᓴᐅᕗᖅ ᐊᖓᔪᖅᑳᑉ ᑐᓂᔪᓐᓇᕐᑕᓕᒫᖏᓐᓂᒃ, ᐃᓚᖃᕐᑎᓪᓗᒋᑦ ᐸᐅᕐᖎᑦ ᐅᕐᓱᖓᓂᒃ ᐅᕐᓱᒃᓴᖃᐅᑎᑎᑐᑦ ᐱᖓᓱᑎᑐᑦ ᐊᖏᑎᒋᔪᓂᒃ ᓂᐊᖂᔭᒃᓴᓂᒡᓗ ᖃᑦᑕᐅᔭᐅᑉ ᓇᑉᐸᓪᓗᐊᖓᑎᑐᑦ ᐊᖏᑎᒋᔪᓂᒃ.

⁸ ᐊᖓᔪᖅᑳᖅ ᐃᑎᕐᑕᕐᕕᐅᑉ ᑐᕐᓲᖑᔭᖓᒍᑦ ᐃᑎᕈᓂ, ᐊᓂᔪᒃᓴᐅᕗᖅ ᑕᕝᕘᓇᑦᓮᓐᓇᖅ ᐃᑎᕐᕕᒋᓚᐅᕐᑕᒥᒍᑦ.

⁹ “ᐃᓄᐃᓪᓕ ᐊᑕᓂᕐᒧᐊᕈᑎᒃ ᓇᓪᓕᐅᓐᓂᕐᓯᐅᕐᓇᐅᑎᓪᓗᒍ, ᐅᓐᓄᐊᓪᓗᐊᑉ ᓇᓛᓃᑦᑐᒃᑯᑦ ᐃᑎᕐᑐᕕᓃᑦ ᐊᓂᔪᒃᓴᐅᕗᑦ ᐅᓪᓗᓪᓗᐊᑉ ᓇᓛᓃᑦᑐᒃᑯᑦ ᐃᑎᕐᑕᕐᕕᒃᑯᑦ; ᐅᓪᓗᓪᓗᐊᓪᓗ ᓇᓛᓃᑦᑐᒃᑯᑦ ᐃᑎᕐᑐᕕᓃᑦ ᐅᓐᓄᐊᓪᓗᐊᑉ ᓇᓛᓃᑦᑐᒃᑯᑦ ᐊᓂᔪᒃᓴᐅᕗᑦ; ᓇᓪᓕᐊᑦ ᐃᑎᕐᕕᒋᓚᐅᕐᑕᒥᒍᑦ ᐊᓂᔪᒃᓴᐅᓐᖏᓚᖅ, ᐃᑎᕐᕕᒋᓚᐅᑕᖏᑕᓕ ᐊᑭᓪᓗᐊᖓᒍᑦ ᐊᓂᔪᒃᓴᐅᕗᑦ.

¹⁰ ᐃᓄᐃᑦ ᐃᑎᓕᕐᐸᑕ ᐊᖓᔪᖅᑳᖅ ᐃᑎᖃᑕᐅᔪᒃᓴᐅᕗᖅ ᐊᑕᐅᑦᓯᒃᑯᑦ ᐃᑎᖃᑎᒋᓗᒋᑦ; ᐊᓂᓕᕐᐸᑕᓗ ᐊᓂᖃᑕᐅᖕᒥᓗᓂ.

¹¹ ᓇᓪᓕᐅᓐᓂᕐᓯᐅᕐᕖᑦ ᓇᓪᓕᐅᓯᒪᑎᓪᓗᒋᑦ ᐊᖑᓴᓪᓗᕐᒥᒃ ᑐᓂᕐᕈᓯᕐᓂᐊᕐᑎᓪᓗᒋᑦ ᓰᐱᐅᓪᓘᓐᓃᑦ ᐊᖑᓴᓪᓗᖓᓂᒃ ᓂᐊᖂᔭᒃᓮᑦ ᑐᓂᕐᕈᑕᐅᓂᐊᕐᑐᖅ ᖃᑦᑕᐅᔭᐅᑉ ᓇᑉᐸᓪᓗᐊᖓᑐᑦ ᐊᖏᑎᒋᔪᒃᓴᐅᕗᖅ, ᓄᕐᕋᐅᔭᕐᓂᒃ ᑐᓂᕐᕈᑎᖃᕐᑎᓪᓗᒋᑦ ᑐᓂᔪᓐᓇᕐᑕᓕᒫᒥᖕᓂᒃ ᑐᓂᓯᔪᒃᓴᐅᕗᑦ, ᐃᓚᖃᕐᑎᓪᓗᒋᑦ ᓇᐹᕐᑑᑉ ᐅᕐᓱᖓᓂᒃ ᐅᕐᓱᒃᓴᖃᐅᑎᑎᑐᑦ ᐱᖓᓱᑎᑐᑦ ᐊᖏᑎᒋᔪᒥᒃ.

¹² “ᐊᖓᔪᖅᑳᖅ ᐃᓱᒪᕐᓱᕐᓗᓂ ᑐᓂᕐᕈᑎᒋᔪᒪᔭᒥᓂᒃ ᑐᓂᓯᔪᒪᒃᐸᑦ ᐊᑕᓂᕐᒧᑦ, ᐃᑯᐊᓚᑎᑕᒃᓴᒥᒃ ᐃᓅᖃᑎᖃᑦᓯᐊᕐᓂᕐᒧᖔᔪᒥᒡᓘᓐᓃᑦ ᐃᑎᕐᑕᕐᕕᒃᑯᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒃᑯᑦ ᐃᑎᕐᑐᒃᓴᐅᕗᖅ; ᑐᓂᕐᕈᓯᕐᑐᒃᓴᐅᕗᕐᓗ ᓴᐸᑎᒥ ᑐᓂᕐᕈᓯᕐᓗᓂ ᐱᐅᓯᕆᕙᒃᑕᒥᑐᑦ. ᐱᔭᕇᕈᓂ ᑕᕝᕙᓐᖓᑦ ᐊᓂᔪᒃᓴᐅᕗᖅ, ᐊᓂᔭᕇᕐᐸᓪᓗ ᐃᑎᕐᑕᕐᕕᒃ ᐅᒃᑯᐊᕐᑕᐅᔪᒃᓴᐅᕗᖅ.”

ᖃᐅᑕᒫᑦ ᑐᓂᕐᕈᑕᐅᖃᑦᑕᕐᑐᒃᓮᑦ

¹³ “ᖃᐅᑕᒫᑦ ᓄᕐᕋᐅᔭᕐᒥᒃ ᐊᑕᐅᓯᕐᒥᒃ ᐊᕐᕌᒍᓕᖕᒥᒃ ᐊᑐᐃᓐᓇᕈᐃᔪᒃᓴᐅᕗᖅ ᖃᓄᐃᓗᑕᖃᖏᑦᑐᒥᒃ ᐃᑯᐊᓚᑎᑕᐅᓗᓂ ᐊᑕᓂᕐᒧᑦ ᑐᓂᕐᕈᑕᐅᖁᓪᓗᒍ; ᖃᐅᑕᒫᑦᓯᐊᖅ ᐊᑐᐃᓐᓇᕈᐃᖃᑦᑕᕐᑐᒃᓴᐅᕗᖅ ᐅᓪᓛᑕᒫᑦ.

¹⁴ ᐅᓪᓛᑕᒫᓪᓗ ᓂᐊᖂᔭᒃᓴᒥᒃ ᑕᓪᓕᒪᓂᒃ ᐅᖁᒤᓐᓂᓕᖕᒥᒃ ᑐᓂᕐᕈᓯᕐᓃᑦ ᐃᓚᒃᓴᖏᓐᓂᒃ ᐸᐅᕐᖎᓪᓗ ᐅᕐᓱᖓᓂᒃ ᐅᕐᓱᒃᓴᖃᐅᑎᑎᑐᑦ ᐊᖏᑎᒋᔪᒥᒃ ᐃᓚᓕᐅᑎᔪᒃᓴᒥᒃ ᓂᐊᖂᔭᒃᓴᒧᑦ ᑐᓂᕐᕈᓯᕈᑕᐅᓗᑎᒃ ᐊᑕᓂᕐᒧᑦ ᐊᑐᐃᓐᓇᕈᐃᖃᑦᑕᕐᑐᒃᓴᐅᕗᖅ; ᑕᒪᑦᔭ ᑐᓂᕐᕈᓯᕐᓂᕐᒧᑦ ᐃᑯᐊᓚᑎᑕᒃᓴᒧᑦ ᒪᓕᒐᒃᓮᑦ ᐊᑐᕐᑕᐅᔪᒃᓴᐅᔪᑦ ᑍᒪᓐᖓᓕᒫᖅ.

¹⁵ ᑍᒫᒃ ᓄᕐᕋᐅᔧᑦ, ᓂᐊᖂᔭᒃᓮᓪᓗ, ᐸᐅᕐᖎᓪᓗ ᐅᕐᓱᖏᑦ ᐊᑕᓂᕐᒧᑦ ᐊᑐᐃᓐᓇᕈᕐᑕᐅᖃᑦᑕᕐᑐᒃᓴᐅᕗᑦ, ᐅᓪᓛᑕᒫᑦᓯᐊᖅ, ᐃᑯᐊᓚᑎᑕᐅᓗᑎᒃ ᑐᓂᕐᕈᑎᒃᓴᐅᖁᓪᓗᒋᑦ.”

ᐊᖓᔪᖅᑳᑉ ᓄᓇᒥᒃ ᐊᑐᕐᓂᖓ

¹⁶ “ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐊᖓᔪᖅᑳᖅ ᓄᓇᖁᑎᒥ ᐃᓚᖓᓂᒃ ᐃᕐᓂᕐᒥᓄᑦ ᑐᓂᕐᕈᑎᖃᕐᐸᑦ, ᐃᕐᓂᖓᑕ ᑭᖑᕚᖏᑕᓗ ᓄᓇᖁᑎᑖᕆᔭᒃᓴᕆᕚᑦ, ᑭᖑᕐᖑᑎᓕᕐᓗᒍ.

¹⁷ ᐊᖓᔪᖅᑳᕐᓕ ᐱᔨᒥ ᐃᓚᖓᓐᓄᑦ ᓄᓇᖁᑎᒥᓂᒃ ᑐᓂᕐᕈᑎᖃᕐᐸᑦ, ᑖᑦᓱᒪ ᐱᔨᐅᑉ ᓄᓇᖁᑎᒋᔭᒃᓴᕆᕚ; ᑭᓯᐊᓂᓕ ᐅᑎᕐᑎᑦᓯᕕᒃᓴᖅ ᓇᓪᓕᐅᑎᒃᐸᑦ ᐅᑎᕐᑎᑦᓴᕆᐊᖃᕋᔭᕐᐹ ᐊᖓᔪᖅᑳᒥᓄᑦ; ᐃᕐᓂᖏᓐᓄᑐᐊᖅ ᓄᓇ ᑐᓂᕐᕈᑕᐅᓯᒪᔪᖅ ᑭᖑᕐᖑᑎᔭᐅᔪᒃᓴᐅᖕᒪᑦ.

¹⁸ ᐊᖓᔪᖅᑳᕐᓕ ᐃᓄᐃᑦ ᓄᓇᖁᑎᖓᓂᒃ ᓇᓪᓕᐊᓐᓂᒡᓘᓐᓃᑦ ᓄᓇᖁᑎᑖᕐᑐᒃᓴᐅᓐᖏᓚᖅ, ᓄᓇᖃᑎᒋᔭᐅᔪᒥᒃ ᐊᕐᓵᕐᓯᓗᓂ; ᓄᓇᒥᒡᓕ ᑐᓂᓯᓂᐊᕈᓂ ᐃᕐᓂᕐᒥᓄᑦ ᓄᓇᖁᑎᒥᓂᒃ ᑭᓯᐊᓂ ᑐᓂᓯᔪᒃᓴᐅᕗᖅ, ᐃᓄᖁᑎᓐᓂᒃ ᐅᖁᒤᒃᓴᕐᑎᑦᓯᖁᓇᒍ ᓄᓇᖁᑎᖏᓐᓂᒃ ᓄᓇᖁᑎᑖᕐᓂᕐᒧᑦ.”

ᑐᒃᓯᐊᕐᕕᒡᔪᐊᑉ ᓂᕿᓕᐅᕐᕕᖏᑦ

¹⁹ ᑕᕝᕙ ᐃᑎᕐᑕᕐᕕᖕᒧᐊᕈᑎᓪᓗᖓ ᐃᑎᕐᑎᑉᐹᖓ ᐃᑎᕐᑕᕐᕕᒃᑯᑦ, ᐃᒡᓗᕈᓯᕐᒧᐊᕈᑎᓪᓗᖓᓗ ᐅᓐᓄᐊᓪᓗᐊᑉ ᓇᓛᓄᑦ ᓵᓐᖓᔪᒧᑦ ᑐᓂᕐᕈᓯᕐᑎᑦᓯᔨᓄᑦ ᐃᒡᓗᕈᓯᕆᔭᐅᔪᒃᓴᓄᑦ ᐃᑦᔪᕐᓁᑦᑐᓄᑦ; ᑕᕝᕙᓂᓗ ᑕᑯᕗᖓ ᑖᕙᓂ ᓯᕿᓂᐅᑉ ᓂᐱᕕᐊᑕ ᓇᓛᓃᑦᑑᒥᒃ.

²⁰ ᐅᖃᐅᑎᕚᖓᓗ, “ᐅᕙᓂ ᑐᓂᕐᕈᓯᕐᑎᑦᓯᔩᑦ ᐆᑦᓯᔪᒃᓴᐅᕗᑦ ᓂᕿᓂᒃ ᐸᓯᔭᒃᓴᐅᓂᕐᒧᑦ ᐊᑭᓕᐅᑎᒃᓴᒧᑦ ᑐᓂᕐᕈᑕᐅᔪᕕᓂᕐᓂᒃ ᐊᔪᕐᓂᕐᒧᓪᓗ ᑐᓂᕐᕈᑕᐅᔪᕕᓂᕐᓂᒃ, ᑕᕝᕙᓂᓗ ᓂᐊᖂᔭᒃᓴᓂᒃ ᑐᓂᕐᕈᑕᐅᔪᕕᓂᕐᓂᒃ ᐆᑦᓯᓗᑎᒃ, ᐃᑦᔪᕐᓁᑎᑕᐅᓯᒪᔪᑦ ᐊᓐᓂᑦᔭᐅᖁᓇᒋᑦ ᑐᕐᓲᖑᔭᕐᒧᑦ ᓯᓚᕙᓯᖕᓂᕐᓴᒧᑦ ᐃᓄᐃᑦ ᖃᓄᐃᓐᓇᕐᑐᒧᐊᕐᑎᑕᐅᖁᓇᒋᑦ.”

²¹ ᐊᓂᑎᒃᑭᕚᖓᓗ ᑐᕐᓲᖑᔭᕐᒧᑦ ᓯᓚᕙᓯᖕᓂᕐᓴᒧᑦ, ᑕᑯᑎᑉᐹᖓᓗ ᑐᕐᓲᖑᔭᐅᑉ ᑎᕆᖅᑯᖏᓐᓂᒃ ᓯᑕᒪᓂᒃ; ᑖᒃᑯᐊᓗ ᑎᕆᖅᑯᖏᑦ ᐊᑐᓂᑦ ᑐᕐᓲᖑᔭᖃᕐᐳᑦ.

²² ᑎᕆᖅᑯᖏᓪᓗ ᐊᑐᓂᑦ ᓂᕈᑭᑦᑐᓂᒃ ᑐᕐᓲᖑᔭᖃᕐᐳᑦ, 68ᓂᒃ ᐃᑎᒐᖕᓂᒃ ᑐᑭᒧᖃᕐᓗᑎᒃ 48ᓂᒡᓗ ᓴᓂᒧᑐᓂᖃᕐᐳᑦ.

²³ ᐃᓗᖏᑦ ᐊᑐᓂᑦ ᐅᔭᕋᖕᓂᒃ ᐊᕙᓗᓕᐅᕐᓯᒪᕗᑦ, ᐊᑐᓂᓪᓗ ᐊᕙᓗᖏᓐᓄᑦ ᐊᒃᑐᐊᔪᓂᒃ ᐃᑯᐊᓚᑦᓯᕕᖃᕐᐳᑦ ᓂᕿᓕᐅᕐᕕᖃᕐᑐᓂᒃ ᐊᑖᒍᑦ.

²⁴ ᑕᕝᕙ ᐅᖃᐅᑎᕚᖓ, “ᑖᒃᑯᐊ ᑕᕝᕙ ᑐᒃᓯᐊᕐᕕᒡᔪᐊᕐᒥ ᐱᓇᓱᐊᕐᑎᓄᑦ ᐃᒐᕕᐅᖃᑦᑕᕐᓂᐊᕐᑐᑦ ᐃᓄᖕᓄᑦ ᑐᓂᕐᕈᑕᐅᓯᒪᔪᓕᒫᓂᒃ.”