ᐃᓯᑭᐊᓕᐅᑉ ᐊᒡᓚᖏᑦ 44 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᑎᕐᑕᕐᕕᐅᑉ ᐊᑐᕐᑕᐅᓂᒃᓴᖓ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᖅ

¹ ᑕᕝᕙ ᐃᑎᕐᑕᕐᕕᒧᐊᕐᑎᑉᐹᖓ ᓯᓚᓪᓕᕐᒧᑦ ᑐᒃᓯᐊᕐᕕᒡᔪᐊᕐᒦᑦᑐᒧᑦ, ᓯᕿᓂᐅᑉ ᓄᐃᕕᐊᓄᑦ ᓵᓐᖓᔪᒧᑦ; ᑖᓐᓇᓗ ᐅᒃᑯᐊᕐᓯᒪᕗᖅ.

² ᐊᑕᓂᐅᓪᓗ ᐅᖃᐅᑎᕚᖓ, “ᑖᓐᓇ ᐃᑎᕐᑕᕐᕕᒃ ᐅᒃᑯᐊᕐᓯᒤᓐᓇᕐᑐᒃᓴᐅᕗᖅ; ᐅᒃᑯᐃᕐᑕᐅᔪᒃᓴᐅᓇᓂᓗ, ᓇᓪᓕᐊᓐᓄᓪᓘᓐᓃᑦ ᐃᑎᕐᑕᐅᔪᒃᓴᐅᓐᖏᓚᖅ, ᐊᑕᓂᐅᑉ ᐃᓴᕆᐊᓕᐅᑉ ᒎᑎᖓᑦᑕ ᐃᑎᕐᑕᕐᕕᒋᖕᒪᒍ; ᑍᒤᒻᒪᑦ ᐅᒃᑯᐊᕐᓯᒤᓐᓇᕐᑐᒃᓴᐅᕗᖅ.

³ ᐊᖓᔪᖅᑳᕐᔪᐊᖅ ᑕᕝᕙᓂ ᓂᕆᔪᓐᓇᕐᑐᑑᕗᖅ ᐊᑕᓂᐅᑉ ᓵᖓᓂ; ᐃᑎᕐᑐᒃᓴᐅᕗᖅ ᐃᑎᕐᑕᕐᕕᐅᑉ ᑐᕐᓲᖑᔭᖓᑕ ᐃᒡᓗᕈᓯᖓᒍᑦ ᐃᓱᐊᓃᑦᑐᒃᑯᑦ, ᑕᕝᕘᓇᓗ ᐊᓂᖕᒥᓗᓂ.”

ᑐᒃᓯᐊᕐᕕᒡᔪᐊᑉ ᐃᑎᕐᑕᐅᖃᑦᑕᕐᓂᒃᓴᖓᑕ ᒪᓕᒐᖏᑦ

⁴ ᐊᒻᒪ ᐃᑎᕐᑕᕐᕕᖕᒧᐊᕐᑎᑉᐹᖓ ᐅᓐᓄᐊᓪᓗᐊᑉ ᓇᓛᓃᑦᑐᒧᑦ ᑐᒃᓯᐊᕐᕕᒡᔪᐊᑉ ᓯᕗᕌᓃᑦᑐᒧᑦ; ᑕᑯᓴᕋᒪᓗ ᑕᑯᕗᖓ, ᐊᑕᓂᐅᑉ ᓂᕐᑐᕐᓇᕐᓂᕐᔪᐊᖓᓄᑦ ᑐᒃᓯᐊᕐᕕᒡᔪᐊᖅ ᑕᑕᑕᐅᓯᒪᔪᖅ; ᒪᓂᖅᑲᒧᓪᓗ ᐹᒻᒪᒃᐳᖓ.

⁵ ᐊᑕᓂᐅᓪᓗ ᐅᖃᐅᑎᕚᖓ, “ᐃᓅᑉ ᐃᕐᓂᖓ, ᑕᑯᔭᑎᑦ ᐅᑦᔨᕆᑦᓯᐊᒃᑭᑦ, ᑐᓴᑦᓯᐊᕐᓗᒋᓪᓗ ᓯᐅᑎᖕᓄᑦ ᐅᖃᐅᓯᕆᓂᐊᕐᑕᓕᒫᒃᑲ ᐃᓕᖕᓄᑦ ᐊᑕᓂᐅᑉ ᑐᒃᓯᐊᕐᕕᒡᔪᐊᖓᑕ ᒪᓕᒐᖏᑦ ᐱᖁᔭᖏᓪᓗ; ᐃᒃᐱᒋᑦᓯᐊᕐᓗᒋᓪᓗ ᑐᒃᓯᐊᕐᕕᒡᔪᐊᕐᒥ ᑎᓕᔭᐅᖃᑦᑕᕈᒫᕐᑐᑦ ᑭᓇᒃᑯᓪᓗ ᐃᑦᔪᕐᓁᑦᑐᕕᖕᒧᑦ ᐃᑎᕈᓐᓇᕐᑎᑕᐅᔭᕆᐊᖃᖏᒻᒪᖔᑕ.

⁶ “ᐃᓴᕆᐊᓕᐅᑉ ᑭᖑᕚᖏᑦ ᓈᓚᒍᓐᓇᖏᑦᑐᑦ ᐅᖃᐅᑎᒃᑭᑦ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐃᓴᕆᐊᓕᐅᑉ ᑭᖑᕚᖏᑦ, ᓇᕐᕈᓇᕐᑐᒥᒃ ᐱᓇᓱᐊᖃᑦᑕᕐᓂᓕᒫᓯ ᓄᖅᑲᕐᑎᓕᕐᓯᐅᒃ.

⁷ ᓄᓇᓕᑐᖃᐅᖏᑦᑐᓂᒃ ᐃᑎᕐᑎᑦᓯᓯᒪᒐᑦᓯ ᐆᒻᒪᑎᒃᑯᑦ ᑎᒥᒃᑯᓪᓗ ᑭᐱᒪᖏᑦᑐᓂᒃ, ᐃᑦᔪᕐᓁᑦᑐᕕᖁᑎᓐᓂᒃ ᓇᕐᕈᓇᕐᓯᑎᑦᓯᓚᐅᕐᐳᓯ, ᐆᒪᔪᓂᒃ ᐅᕙᓐᓄᑦ ᓂᕿᒃᓴᐅᖁᓪᓗᒋᑦ ᑐᓂᕐᕈᓯᕐᓯᒪᒐᑦᓯ, ᑐᓐᓄᖏᓐᓂᒃ ᐊᐅᖏᓐᓂᒡᓗ. ᐊᖏᖃᑎᒌᒍᑎᒋᓯᒪᔭᒃᑲ ᓯᖁᒥᓚᐅᕐᐸᓯ, ᓇᕐᕈᓇᕐᑐᓂᒃ ᐱᓇᓱᐊᕐᓯᒪᓂᑦᓯᓐᓄᑦ ᐃᓚᓕᐅᑎᓪᓗᒋᑦ.

⁸ ᐰᕐᓯᑦᓯᐊᓚᐅᓐᖏᓚᓯᓗ ᐃᑦᔪᕐᓁᑦᑐᖁᑎᓐᓂᒃ; ᐊᐅᓚᑦᓯᔨᖃᓕᓚᐅᕐᐳᓯᓕ ᓄᓇᖃᕐᑐᑐᖃᐅᖏᑦᑐᓂᒃ ᐃᑦᔪᕐᓁᑦᑐᖁᑎᓐᓂ.

⁹ “ᑍᒤᒻᒪᑦ ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᓄᓇᖃᕐᑐᑐᖃᐅᖏᑦᑐᖅ ᑭᐱᔭᐅᓯᒪᖏᒃᑯᓂ ᐆᒻᒪᑎᒃᑯᑦ ᑎᒥᒃᑯᓪᓗ, ᐃᓅᖃᑎᒋᔭᐅᔪᓕᒫᑦ ᐃᓴᕆᐊᓕᒥᐅᓄᑦ, ᐃᑦᔪᕐᓁᑦᑐᕕᖁᑎᓐᓄᑦ ᐃᑎᕐᑐᒃᓴᐅᓐᖏᓚᖅ.”

ᓕᕔᑎᑦ ᑐᓂᕐᕈᓯᕐᑎᑦᓯᔨᓄᑦ ᐃᓚᐅᖁᔭᐅᖏᓐᓂᖓᑦ

¹⁰ “ᓕᕔᑎᓪᓕ ᐅᕙᓐᓂᑦ ᐅᖓᓯᒃᓯᓚᐅᕐᐳᑦ, ᐅᕙᓐᓂᒃ ᕿᒤᓪᓗᑎᒃ ᒎᑎᓐᖑᐊᓄᑦ ᓵᖔᓕᕐᓗᑎᒃ ᐃᓴᕆᐊᓕᒥᐅᑦ ᐃᓚᒋᓪᓗᒋᑦ, ᑖᒃᑯᐊ ᓱᒋᐊᕐᑕᐅᓂᒃᓴᒥᖕᓂᒃ ᓇᔪᕐᑎᖃᓕᕐᐳᑦ.

¹¹ ᐃᑦᔪᕐᓁᑦᑐᕕᖁᑎᓐᓂ ᐱᔨᑦᓯᕈᓐᓇᕐᓂᐊᕋᓗᐊᕐᐹᖓ, ᑐᒃᓯᐊᕐᕕᒡᔪᐊᑉ ᐃᑎᕐᑕᕐᕕᖓᓂ ᑲᒪᔨᐅᓗᑎᒃ, ᑐᒃᓯᐊᕐᕕᒡᔪᐊᒥᓗ ᐱᓇᓱᐊᕐᑎᐅᓗᑎᒃ; ᑐᖅᑯᕅᔨᐅᓗᑎᒡᓗ ᑐᓂᕐᕈᑎᒃᓴᓂᒃ ᐃᑯᐊᓚᑎᑕᐅᔪᒃᓴᓂᒃ ᑐᓂᕐᕈᑕᐅᓂᐊᕐᑐᓂᒡᓗ ᐃᓄᐃᑦ ᐱᑦᔪᑎᒋᓗᒋᑦ, ᐃᓄᖕᓄᑦ ᐃᓚᐅᔪᒃᓴᐅᕗᑦ, ᑖᒃᑯᓂᖓ ᐱᔨᑦᓯᕐᓗᑎᒃ.

¹² ᐱᔨᑦᓯᖃᑦᑕᓚᐅᕐᒪᑕ ᒎᑎᓐᖑᐊᓄᑦ ᐊᒡᕕᐊᕈᑎᒃᓴᐅᓕᕐᓗᑎᒡᓗ ᐊᔪᕐᑐᓕᑎᑦᓯᓯᒪᓂᕐᒥᖕᓄᑦ ᐃᓴᕆᐊᓕᐅᑉ ᑭᖑᕚᖏᓐᓂᒃ, ᑍᒤᒻᒪᑦ ᐅᖃᕕᓚᐅᕐᐳᖓ ᑖᒃᑯᐊ ᐱᓪᓗᒋᑦ, ᐊᑕᓂᖅ ᒎᑎ ᐅᖃᕐᐳᖅ, ᓱᒋᐊᕐᑕᐅᓂᒃᓴᒥᖕᓂᒃ ᓇᔪᕐᑎᖃᓕᕐᐳᑦ.

¹³ ᐅᕙᓐᓂᒃ ᐱᔨᑦᓯᕐᑐᒃᓴᐅᔪᓐᓁᕐᐳᑦ ᑐᓂᕐᕈᓯᕐᑎᑦᓯᔨᐅᓗᑎᒃ, ᐃᑦᔪᕐᓁᑦᑐᖁᑎᓐᓄᓪᓗ ᓇᓪᓕᐊᓐᓄᓪᓘᓐᓃᑦ ᖃᒡᓕᔪᒃᓴᐅᔪᓐᓁᕐᐳᑦ ᐃᑦᔪᕐᓁᓐᓂᕐᐹᒧᓪᓗ ᐃᑎᕐᑐᒃᓴᐅᔪᓐᓁᕐᓗᑎᒃ; ᑲᓐᖑᓲᑎᒃᓴᒥᖕᓂᒡᓕ ᓇᔪᕐᑎᖃᓕᕐᐳᑦ, ᓇᕐᕈᓇᕐᑐᓂᒃ ᐱᓇᓱᐊᕐᐸᓚᐅᕐᓂᕐᒥᖕᓄᑦ.

¹⁴ ᓱᓕᓕ ᑎᓕᓂᐊᕐᐸᒃᑲ ᑐᒃᓯᐊᕐᕕᒡᔪᐊᑉ ᐃᓗᐊᓂ ᐱᔭᕆᐊᓕᖕᓂᒃ ᑲᒪᔨᐅᖁᓪᓗᒋᑦ, ᐱᔨᑦᓯᕆᐊᓕᖕᓂᒡᓗ ᐱᔨᑦᓯᕐᑎᐅᖁᓪᓗᒋᑦ ᐱᓇᓱᐊᕐᑕᐅᔭᕆᐊᓕᓕᒫᓂᒃ.”

ᑐᓂᕐᕈᓯᕐᑎᑦᓯᔩᑦ

¹⁵ “ᑐᓂᕐᕈᓯᕐᑎᑦᓯᔩᓪᓕ ᓕᕔᒃᑯᑦ ᐃᓚᒌᖕᓂᖏᓐᓂᑦ ᐱᓯᒪᔪᑦ ᔭᑑᑭᐅᑉ ᑭᖑᕚᖏᓐᓂᓐᖔᕐᑐᑦ, ᓱᕐᕋᔪᐃᑦᑑᓪᓗᑎᒃ ᑐᒃᓯᐊᕐᕕᒡᔪᐊᕐᒥ ᐱᔨᑦᓯᓚᐅᕐᒪᖓ ᐊᓯᓕᒫᖏᑦ ᐃᓴᕆᐊᓕᒥᐅᑦ ᐅᕙᓐᓂᒃ ᕿᒤᒐᓗᐊᕐᑎᓪᓗᒋᑦ, ᑖᒃᑯᐊᑐᐊᑦ ᐅᕙᓐᓂᒃ ᐱᔨᑦᓯᕐᑐᒃᓴᐅᕗᑦ ᓇᔪᕐᑕᓐᓄᓪᓗ ᑐᓂᕐᕈᓯᕆᐊᕐᑐᕈᓐᓇᕐᓗᑎᒃ ᑐᓂᕐᕈᑎᑦ ᑐᓐᓄᖏᓐᓂᒃ ᐊᐅᖏᓐᓂᒡᓗ, ᐊᑕᓂᖅ ᒎᑎ ᐅᖃᕐᐳᖅ.

¹⁶ ᑖᒃᑯᐊᑐᐊᖅ ᐃᑦᔪᕐᓁᑦᑐᕕᖁᑎᓐᓄᑦ ᐃᑎᕈᓐᓇᕐᑐᒃᓴᐅᕗᑦ, ᑐᓂᕐᕈᓯᕐᕕᖕᒥᓗ ᓵᒥ ᐱᓇᓱᐊᕈᓐᓇᕐᓗᑎᒃ ᐅᕙᓐᓄᑦ, ᑕᕝᕙᓂᓗ ᑲᒪᔨᐅᓗᑎᒃ.

¹⁷ ᐃᑎᕐᑕᕐᕕᖕᒧᑦ ᐃᓗᓪᓕᕐᒧᑦ ᐃᑎᓕᕈᑎᒃ, ᑐᕐᓲᖑᔭᕐᒥ ᐃᓗᕙᓯᖕᓂᕐᓴᒥ ᐊᓐᓄᕌᓂᒃ ᓵᑦᑐᓂᒃ ᐊᑎᔪᒃᓴᐅᕗᑦ; ᐃᑦᔪᓂᕐᓴᓂᒃ ᓄᕕᕐᓵᒃᓴᓂᒃ ᐊᑐᕐᑐᒃᓴᐅᓐᖏᓚᑦ, ᐱᓇᓱᐊᕐᓂᕐᒥᖕᓂ ᑐᒃᓯᐊᕐᕕᒡᔪᐊᕐᒥ ᐃᓗᕙᓯᖕᓂᕐᓴᒥ ᐃᓗᐊᓃᓪᓗᑎᒡᓘᓐᓃᑦ.

¹⁸ ᓵᑦᑐᓂᒃ ᓂᐊᖁᖏᑦ ᓂᒥᕐᓯᒪᔪᒃᓴᐅᕗᑦ, ᓵᑦᑐᓂᒡᓗ ᖃᒡᓕᒃᓯᒪᓗᑎᒃ; ᑕᑦᓯᕈᓯᔭᕐᑐᒃᓴᐅᓐᖏᓚᑦ ᐊᐅᒃᑲᕐᓂᖓᒍᑕᐅᒐᔭᕐᑐᒥᒃ.

¹⁹ ᐊᓂᓕᕈᑎᒃ ᑐᕐᓲᖑᔭᕐᒧᑦ ᓯᓚᕙᓯᖕᓂᕐᓴᒧᑦ ᐃᓄᐃᑦ ᓇᔪᒐᖓᓐᓄᑦ, ᐊᓐᓄᕌᑦ ᐊᑐᕋᑖᕐᑕᑎᒃ ᐱᓇᓱᐊᕐᓗᑎᒃ ᐲᕐᑕᒃᓴᕆᕔᑦ, ᐃᒡᓗᕈᓯᕐᒧᑦ ᐃᑦᔪᕐᓁᑦᑐᒃᑯᕕᖕᒧᑦ ᐃᓕᓗᒋᑦ; ᐊᓯᖏᓐᓂᒃ ᐊᓐᓄᕌᕐᑐᒃᓴᐅᕗᑦ, ᐃᑦᔪᕐᓁᑦᑐᒥᒃ ᐱᓇᓱᐊᕈᕆᑎᒋᓚᐅᕐᑕᖏᑦ ᐃᓄᖕᓂᒃ ᖃᓄᐃᓕᑎᑦᓯᖁᓇᒋᑦ.

²⁰ “ᓂᐊᖁᖏᑦ ᓴᓕᓗᑎᒃ ᓄᔭᖃᖏᑦᑑᔪᒃᓴᐅᓐᖏᓚᑦ ᓄᔭᕐᒥᖕᓂᒡᓘᓐᓃᑦ ᑕᑭᓕᑎᑦᓯᔪᒃᓴᐅᓇᑎᒃ; ᓈᒻᒪᒃᑐᒥᒡᓕ ᓄᔭᖏᑦ ᑭᑦᔭᕐᓯᒪᔪᒃᓴᐅᕗᑦ.

²¹ ᑐᓂᕐᕈᓯᕐᑎᑦᓯᔩᑦ ᕔᓂᒥᒃ ᐃᒥᕐᑐᒃᓴᐅᓐᖏᓚᑦ, ᐃᓗᕙᓯᖕᓂᕐᓴᒧᑦ ᑐᕐᓲᖑᔭᕐᒧᐊᕐᓂᐊᕈᑎᒃ.

²² ᓄᓕᐊᓂᒃᑐᒃᓴᐅᓐᖏᓚᓪᓗ ᐅᐃᒡᒐᕐᓂᑯᒥᒃ, ᐊᕕᑦᑎᓯᒪᔪᒥᒡᓘᓐᓃᑦ, ᐊᖑᒻᒧᓪᓕ ᐊᒃᑐᕐᑕᐅᓚᐅᕐᓯᒪᖏᑦᑐᒥᒃ ᓄᓕᐊᓂᒃᑐᒃᓴᐅᕗᑦ ᐃᓴᕆᐊᓕᒥᐅᑦ ᑭᖑᕚᖏᓐᓂᑦ, ᐅᕝᕙᓗ ᐅᐃᒡᒐᕐᓂᕐᒥᒃ ᑐᓂᕐᕈᓯᕐᑎᑦᓯᔨᐅᑉ ᓄᓕᐊᕕᓂᖓᓂᒃ.

²³ “ᐃᓄᖁᑎᓐᓂᒃ ᐊᔪᕆᕐᑐᐃᖃᑦᑕᕐᑐᒃᓴᐅᕗᑦ ᓱᓇᑦ ᐃᑦᔪᕐᓁᒻᒪᖔᑕ ᓱᓁᓪᓗ ᐃᑦᔪᕐᓁᑦᑑᖏᒻᒪᖔᑕ, ᓱᓁᓪᓗ ᐅᒃᐱᕐᓂᒃᑯᑦ ᓇᕐᕈᓇᕐᒪᖔᑕ ᓱᓁᓪᓗ ᓇᕐᕈᓇᖏᒻᒪᖔᑕ.

²⁴ ᑲᒪᒋᔭᐅᔭᕆᐊᖃᕐᑐᒥᒃ ᐃᓱᐊᖏᑦᔪᑎᒃᓴᖃᕐᑐᖃᓕᕐᐸᑦ ᐃᖅᑲᕐᑐᐃᔪᓐᓇᕐᐳᑦ, ᑲᒪᔪᒃᓴᐅᕗᓪᓗ ᐃᖅᑲᕐᑐᐃᓂᕋ ᒪᓕᒡᓗᒍ. ᐱᖁᔭᒃᑲ ᒪᓕᒃᑕᐅᖁᔭᒃᑲᓗ ᓇᓪᓕᐅᓐᓂᕐᓯᐅᕕᐅᑎᑕᒃᑲᓗ ᒪᓕᑦᓯᐊᕐᑕᒃᓴᕆᕔᑦ, ᓴᐸᑎᖁᑎᒃᑲᓗ ᐃᑦᔪᕐᓁᑎᑕᒃᓴᕆᕔᑦ.

²⁵ “ᐃᒻᒥᖕᓂᒃ ᓴᓗᒤᓕᑎᕐᑐᒃᓴᐅᓐᖏᓚᑦ ᑐᖁᖓᔪᒥᒃ ᐊᒃᑐᕐᓯᓂᕐᒥᖕᓄᑦ; ᑭᓯᐊᓂᓕ, ᐊᑖᑕᒋᒍᓂᐅᒃ ᐊᓈᓇᒋᒍᓂᐅᒡᓘᓐᓃᑦ, ᕿᑐᕐᖓᕆᒍᓂᐅᒡᓘᓐᓃᑦ, ᖃᑕᓐᖑᑎᒋᒍᓂᐅᒡᓗ ᓇᔭᒋᒍᓂᐅᒡᓘᓐᓃᑦ ᐂᑉᐸᕐᑖᓚᐅᕐᓯᒪᖏᑉᐸᑦ ᐊᒃᑐᕐᓯᔪᓐᓇᕐᐳᑦ, ᓴᓗᒤᓕᑎᕋᓗᐊᕐᓗᓂ.

²⁶ ᓴᓗᒤᓕᑎᕐᑐᕕᓂᐅᒍᓂ ᐊᒃᑐᕐᓯᓂᕐᒥᓄᑦ, ᐅᑕᖅᑭᔪᒃᓴᐅᕗᖅ ᐅᓪᓗᓂᑦ 7ᓂᒃ, ᑖᒃᑯᐊᓗ ᐊᓂᒍᕐᐸᑕ ᓴᓗᒻᒪᕋᔭᕆᕗᖅ.

²⁷ ᐅᓪᓗᖅ ᐃᑦᔪᕐᓁᑦᑐᕕᖕᒧᑦ ᐃᑎᕐᕕᒃᓴᖓ ᓇᓪᓕᐅᑎᒃᐸᑦ, ᑐᕐᓲᖑᔭᕐᒧᑦ ᐃᓗᕙᓯᖕᓂᕐᓴᒧᑦ, ᐱᔨᑦᓯᕐᓂᐊᕐᓗᓂ ᐃᑦᔪᕐᓁᑦᑐᓂᒃ, ᐊᔪᕐᓂᕐᒥᓄᑦ ᓴᓗᒻᒪᕐᑕᐅᑦᔪᑎᒥᒃ ᑐᓂᕐᕈᓯᕐᑐᒃᓴᐅᕗᖅ, ᐊᑕᓂᖅ ᒎᑎ ᐅᖃᕐᐳᖅ.

²⁸ “ᑭᖑᕐᖑᑎᔭᒃᓴᖃᕐᑐᒃᓴᐅᓐᖏᓚᑦ; ᐅᕙᖓ ᑖᒃᑯᓄᖓ ᑭᖑᕐᖑᑎᔭᒃᓴᕆᔭᐅᒐᒪ; ᓄᓇᖁᑎᑖᕐᑎᑕᒃᓴᕆᓐᖏᓚᑎᑦ ᐃᓴᕆᐊᓕᒥᐅᑦ ᓄᓇᖓᓂ; ᐅᕙᖓ ᑖᒃᑯᓇᓐᖓᑦ ᐱᖁᑎᒋᔭᐅᒐᒪ.

²⁹ ᑐᓂᕐᕈᑎᕕᓂᕐᓂᒃ ᓂᕆᖃᑦᑕᕐᑐᒃᓴᐅᕗᑦ ᓂᐊᖂᔭᒃᓴᓂᒃ, ᐊᔪᕐᑐᓕᓂᖅ ᐱᓪᓗᒍ ᑐᓂᕐᕈᑎᕕᓂᕐᓂᒃ, ᐸᓯᔭᒃᓴᐅᓂᕐᒧᓪᓗ ᐊᑭᓕᐅᑎᒃᓴᓄᑦ ᑐᓂᕐᕈᑎᕕᓂᕐᓂᒃ; ᐱᑖᖃᑦᑕᕐᑐᒃᓴᐅᕗᓪᓗ ᐃᓴᕆᐊᓕᒥᐅᓄᑦ ᐅᕙᓐᓄᑦ ᑐᓂᕐᕈᑕᐅᓯᒪᔪᓕᒫᓂᒃ.

³⁰ ᑲᑎᕐᓱᕐᑕᐅᔪᓕᒫᑦ ᓯᕗᓪᓕᕐᐹᖏᑕ ᐱᐅᓂᖏᓐᓂᒃ, ᐅᕙᓐᓄᓪᓗ ᑐᓂᔭᐅᔪᓕᒫᓂᒃ ᐊᑦᔨᒌᖏᑦᑐᓂᒃ, ᑐᓂᕐᕈᓯᕐᑎᑦᓯᔩᑦ ᐱᖃᕐᑐᒃᓴᐅᕗᑦ; ᓂᐊᖂᔭᓕᐅᕐᑕᐅᔪᓪᓗ ᓯᕗᓪᓕᕐᐹᖅ ᐆᑕᐅᔪᖅ, ᐊᖏᕐᕋᓯ ᓮᒻᒪᕐᑎᑕᐅᓯᒪᖁᓪᓗᒍ.

³¹ ᑐᓂᕐᕈᓯᕐᑎᑦᓯᔩᑦ ᓂᕆᔪᒃᓴᐅᓐᖏᓚᑦ ᖃᓄᐃᑦᑐᑐᐃᓐᓇᓂᒃ, ᑎᖕᒥᐊᕕᓂᕐᒥᒃ ᐆᒪᔪᕕᓂᕐᒥᒡᓘᓐᓃᑦ ᓇᖕᒥᓂᖅ ᑐᖁᑐᐃᓐᓇᕐᑐᕕᓂᕐᒥᒃ, ᐅᕝᕙᓗ ᐆᒪᔫᖃᑎᖓᓄᑦ ᑐᖁᑕᕕᓂᕐᒥᒃ.”