ᐃᓯᑭᐊᓕᐅᑉ ᐊᒡᓚᖏᑦ 43 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᐅᑎᕐᓂᖓ ᑐᒃᓯᐊᕐᕕᒡᔪᐊᕐᒧᑦ

¹ ᑭᖑᓂᖓᒍᑦ ᐃᑎᕐᑕᕐᕕᖕᒧᐊᕐᑎᑉᐹᖓ, ᓯᕿᓂᐅᑉ ᓄᐃᕕᐊᓄᑦ ᓵᓐᖓᔪᒧᑦ.

² ᑕᑯᒋᓪᓗ, ᓯᕿᓂᐅᑉ ᓄᐃᕕᐊᑕ ᓇᓛᓂᑦ ᐃᓴᕆᐊᓕᒥᐅᑦ ᒎᑎᖓᑕ ᓂᕐᑐᕐᓇᕐᓂᕐᔪᐊᖓᑕ ᕾᓕᕐᓂᖓᓂᒃ ᑕᑯᕗᖓ; ᑎᑭᓕᕐᓂᖓᓗ ᑐᓴᕐᓴᐅᕗᖅ ᑕᕆᐅᕐᔪᐊᑉ ᒥᕿᑦᑕᕐᓂᖓᑕ ᐃᒃᑑᓕᔮᕐᓂᖓᑐᑦ; ᓄᓇᓗ ᖃᐅᒻᒪᒃᑕᐅᕗᖅ ᓂᕐᑐᕐᓇᕐᓂᕐᔪᐊᖓᑕ ᖃᐅᒪᓂᖓᓄᑦ.

³ ᑖᓐᓇᓗ ᑕᑯᑎᑕᐅᓂᕋ ᑕᑯᑎᑕᐅᓂᕆᓚᐅᕐᓯᒪᔭᑦᑐᑦ ᑍᒤᑉᐳᖅ ᒎᑎ ᐊᓯᕈᐃᔭᕐᑐᓕᕐᑎᓪᓗᒍ ᔨᕉᓴᓕᒥᒃ, ᐊᒻᒪ ᑕᑯᓚᐅᕐᓯᒪᔭᓐᓂᒃ ᐊᑦᔨᖃᕆᕗᖅ ᑰᑉ ᓰᐸᕆᐅᑉ ᓯᓈᓂ; ᑕᕝᕙ ᓄᓇᒧᑦ ᐅᑯᓪᓗᖓ ᐹᒻᒪᒃᐳᖓ.

⁴ ᐊᑕᓂᐅᓪᓗ ᓂᕐᑐᕐᓇᕐᓂᕐᔪᐊᖓ ᐃᑎᕐᑕᕐᕕᒃᑰᕐᓗᓂ ᓯᕿᓂᐅᑉ ᓄᐃᕕᐊᑕ ᓇᓛᒍᑦ ᑐᒃᓯᐊᕐᕕᒡᔪᐊᒧᑦ ᐃᑎᕐᐳᖅ.

⁵ ᑕᕝᕙ ᐊᓂᕐᓂᐅᑉ ᒪᑭᑎᓪᓗᖓ, ᐃᓗᕙᓯᖕᓂᕐᓴᒧᑦ ᑐᕐᓲᖑᔭᕐᒧᐊᕐᑎᑉᐹᖓ; ᑕᑯᒋᓪᓗ, ᐊᑕᓂᐅᑉ ᓂᕐᑐᕐᓇᕐᓂᕐᔪᐊᖓᓄᑦ ᑐᒃᓯᐊᕐᕕᒡᔪᐊᖅ ᑕᑕᑕᐅᓯᒪᕗᖅ.

⁶ ᐊᖑᓪᓗ ᓇᖏᕐᑎᓪᓗᒍ ᓴᓂᓐᓂ, ᐅᕙᓐᓄᑦ ᐅᖃᕐᑐᒥᒃ ᑐᓴᕐᐳᖓ ᑐᒃᓯᐊᕐᕕᒡᔪᐊᑉ ᐃᓗᐊᓂᑦ;

⁷ ᐅᖃᐅᑎᓪᓗᖓᓗ, “ᐃᓅᑉ ᐃᕐᓂᖓ, ᑖᓐᓇ ᑕᕝᕙ ᐃᒃᓯᕙᐅᑕᕐᔪᐊᒪ ᐃᓂᖓ ᐃᑎᒐᖕᒪᓗ ᐃᑯᕋᖏᑕ ᐃᓂᖓ, ᑕᕝᕙᓂ ᐃᓂᖃᕐᓂᐊᕐᐳᖓ ᐃᓱᖃᖏᑦᑐᒧᑦ ᐃᓴᕆᐊᓕᒥᐅᑦ ᐃᓄᖏᑕ ᐊᑯᕐᖓᓐᓂ. ᐃᓴᕆᐊᓕᒥᐅᓪᓗ ᑭᖑᕚᖏᑕ ᐊᑎᕋ ᐃᑦᔪᕐᓁᑦᑐᖅ ᓇᕐᕈᓇᕐᓯᑎᓐᓂᐊᕈᓐᓁᕐᐹᑦ, ᑖᒃᑯᐊᓘᓐᓃᑦ, ᐊᖓᔪᖅᑳᕐᔪᐊᖏᑕᓘᓐᓃᑦ, ᒎᑎᒥᒡᓗ ᐊᓯᓐᓂᐊᕐᓯᒪᓂᖏᓐᓄᑦ, ᐊᖓᔪᖅᑳᕐᔪᐊᕕᓂᖏᑕᓘᓐᓃᑦ ᑎᒥᕕᓂᖏᓐᓄᑦ.

⁸ ᐊᖓᔪᖅᑳᕐᔪᐊᑦ ᐅᒃᑯᐊᓕᐅᕐᓯᒪᓚᐅᕐᐳᑦ ᑐᒃᓯᐊᕐᕕᒡᔪᐊᖁᑎᒪ ᐅᒃᑯᐊᖃᕐᕕᖓᑕ ᓴᓂᐊᒍᑦ ᑐᖕᒥᕌᖃᕐᓗᑎᒡᓗ ᑐᖕᒥᕌᒪ ᑭᒡᓕᖓᒍᑦ, ᐃᒡᓘᑉ ᐊᑭᓐᓇᖓᓂᒃ ᐊᑯᓐᓂᖃᑐᐃᓐᓇᕐᓗᑕ. ᐊᑎᕋᓗ ᐃᑦᔪᕐᓁᑦᑐᖅ ᓇᕐᕈᓇᕐᓯᑎᓚᐅᕐᐹᑦ ᐱᓂᐊᕐᓂᕐᒥᖕᓄᑦ, ᑍᒤᒻᒪᑦ ᓂᓐᖓᖕᓂᒃᑯᑦ ᓄᖑᓚᐅᕐᐸᒃᑲ.

⁹ ᒫᓐᓇ ᐊᓯᓐᓂᒃ ᒎᑎᖃᕐᓂᕐᒥᒃ ᓄᖅᑲᐅᑦᔨᓕᕐᓕᑦ ᐊᖓᔪᖅᑳᕐᔪᐊᕕᓂᖏᑕᓗ ᑎᒥᕕᓂᖏᑦ ᐅᕙᓐᓂᑦ ᐅᖓᓯᒃᓯᑎᑕᐅᓗᑎᒃ, ᑕᕝᕙ ᐊᑯᕐᖓᓐᓂ ᐃᓂᖃᓕᕐᓂᐊᕐᐳᖓ ᐃᓱᖃᖏᑦᑐᒧᑦ.

¹⁰ “ᐃᕝᕕᓪᓕ ᐃᓅᑉ ᐃᕐᓂᖓ, ᐃᓴᕆᐊᓕᐅᑉ ᑭᖑᕚᖏᑦ ᓇᓗᓁᕐᓯᕕᒋᒃᑭᑦ ᑐᒃᓯᐊᕐᕕᒡᔪᐊᑉ ᑕᐅᑦᑐᖓᓂᒃ ᐸᕐᓇᒃᑕᐅᓯᒪᓂᖓᓂᒡᓗ, ᑲᓐᖑᓲᑎᖃᓕᖁᓪᓗᒋᑦ ᐊᔪᕐᑐᓕᓂᕐᒥᖕᓂᒃ.

¹¹ ᑲᓐᖑᓲᑎᖃᕈᓐᓇᕐᓯᒃᐸᑕ ᐱᓂᐊᕐᓂᕆᓯᒪᔭᓕᒫᒥᖕᓂᒃ, ᑐᒃᓯᐊᕐᕕᒡᔪᐊᑉ ᓴᓇᓯᒪᓂᒃᓴᖓᓂᒃ, ᐋᖅᑭᒃᓯᒪᓂᒃᓴᖓᓂᒡᓗ, ᐊᓂᕕᒃᓴᖏᓐᓂᒃ ᐃᑎᕐᑕᕐᕕᒃᓴᖏᓐᓂᒡᓗ, ᓴᓇᔭᐅᓯᒪᓂᒃᓴᓕᒫᖓᓂᒡᓗ; ᖃᐅᔨᑎᓛᕐᐸᑎᑦ ᒪᓕᒐᓕᒫᖏᓐᓂᒃ ᐱᖁᔭᓕᒫᖏᓐᓂᒡᓗ; ᑕᑯᓐᓇᕐᑎᓪᓗᒋᓪᓗ ᑎᑎᕋᓛᕐᐸᑎᑦ, ᒪᓕᒍᓐᓇᖁᓪᓗᒋᑦ ᐱᓇᓱᐊᖁᓪᓗᒋᓪᓗ ᐱᖁᔭᓕᒫᖏᓐᓂᒃ ᒪᓕᒐᒃᓴᓕᒫᖏᓐᓂᒡᓗ.

¹² ᐅᓇ ᑕᕝᕙ ᑐᒃᓯᐊᕐᕕᒡᔪᐊᑉ ᐱᖁᔭᖓ; ᖃᖅᑲᐅᑉ ᖄᖓᑕ ᖃᓂᒋᔭᓕᒫᖓ ᐃᑦᔪᕐᓁᑦᑑᓂᕐᐸᐅᔪᒃᓴᐅᕗᖅ. ᑕᑯᒋᑦ, ᑕᒪᓐᓇ ᑕᕝᕙ ᑐᒃᓯᐊᕐᕕᒡᔪᐊᑉ ᐱᖁᔭᖓ.”

ᑐᓂᕐᕈᓯᕐᕕᒃ

¹³ “ᐅᑯᐊ ᑕᕝᕙ ᑐᓂᕐᕈᓯᕐᕕᐅᑉ ᐊᖏᓂᖓᓄᑦ ᐆᒃᑐᕋᐅᑎᖏᑦ: ᑐᒃᓯᐊᕐᕕᒡᔪᐊᒥᒃ ᐆᒃᑐᕋᐅᑕᐅᓚᐅᕐᑐᑦ ᐊᑦᔨᖏᑦ ᐊᑐᕐᓗᒋᑦ, ᑐᓂᕐᕈᓯᕐᕕᐅᑉ ᑐᓐᖓᕕᖓᑕ ᓇᑎᖓ ᐃᑎᕐᓴᓕᐅᕐᓯᒪᓗᓂ ᐊᕙᑎᓕᒫᖓ ᑕᓕᕐᑐᑦ ᐊᑕᐅᓯᕐᑐᑦ ᐃᓗᑐᓂᖃᕐᓗᓂ ᑕᓕᕐᑐᓪᓗ ᐊᑕᐅᓯᕐᑐᑦ ᓴᓂᒧᑐᖃᕐᑐᒃᓴᐅᕗᖅ, ᐃᑎᒐᐅᑉ ᕿᑎᖅᑲᖓᓂᒃ ᐳᕐᑐᓂᖃᕐᓗᓂ ᓯᓚᑖᒍᑦ ᐊᖏᓂᕐᓴᒥᒃ ᐃᓚᓯᒪᓗᓂ. ᑍᒫᒃ ᑐᓂᕐᕈᓯᕐᕕᒃ ᐳᕐᑐᓂᑲᕐᑐᒃᓴᐅᕗᖅ.

¹⁴ ᑐᓂᕐᕈᓯᕐᕕᐅᑉ ᑐᓐᖓᕕᖓᑕ ᓯᓚᑖᒍᑦ ᐃᑎᕐᓴᓕᐅᕐᓯᒪᓂᖓᓂᑦ ᐆᒃᑐᕋᕐᓗᒍ ᐳᕐᑐᓂᖃᕐᑐᒃᓴᐅᕗᖅ ᓯᑕᒪᓂᒃ ᐃᑎᒐᖕᓂᒃ, ᐊᒻᒪ ᐃᒡᓕᕐᓇᐅᔭᖓᑕ ᐂᑉᐸᖓ ᐳᕐᑐᓂᕐᓴᖅ ᒪᕐᕈᑲᓵᖕᓂᒃ ᐃᑎᒑᖕᓂᒃ ᕿᒪᕈᖓᓂᖃᕐᓗᓂ ᓯᓈᓂᑦ ᐊᑦᔨᒌᒥᒃ ᐊᕙᑖᒍᑦ 7ᓂᒃ ᐃᑎᒃᑲᓂᒃ ᐳᕐᑐᓂᖃᕆᐊᖃᕐᐳᖅ. ᐊᒻᒪ ᐃᒡᓕᕐᓇᐅᔭᒃᑲᓐᓂᖓ ᕿᒪᕈᖓᓂᖃᕆᐊᖃᕐᐳᖅ ᓯᓈᓂᑦ ᐃᑎᒑᖕᓂᒃ ᒪᕐᕈᑲᓵᖕᓂᒃ ᐊᕙᑖᒍᑦ ᐊᑦᔨᒌᒥᒃ.

¹⁵ ᑐᓂᕐᕈᓯᕐᕕᐅᑉ ᖄᖓ ᑐᓂᕐᕈᑎᒃᓴᓂᒃ ᐃᑯᐊᓚᑦᓯᕕᒃ 7ᓂᒃ ᐃᑎᒐᖕᓂᒃ ᓇᑎᖓᓂᑦ ᐳᕐᑐᓂᖃᕆᐊᖃᕐᐳᖅ; ᑎᕆᖅᑯᖏᑎᒍᑦ ᓯᑕᒪᓂᒃ ᓇᒡᔪᓐᖑᐊᖃᕐᓗᓂ ᐳᕐᑐᓂᖓᓂᑦ ᐊᑭᑦᔪᑎᓯᒪᔪᓂᒃ.

¹⁶ ᑐᓂᕐᕈᓯᕐᕕᐅᑉ ᖄᖓ ᑭᒃᐹᕆᓪᓗᐊᕐᑐᒃᓴᐅᕗᖅ 20ᓂᒃ ᐃᑎᒐᖕᓂᒃ ᓴᓂᒧᑐᓂᖃᕐᓗᓂ ᑐᑭᒧᓪᓗ.

¹⁷ ᕿᑎᖓᒍᑦ ᖄᖓᓂᑦ ᐊᖏᓂᕐᓴᒥᒃ ᑭᒃᐹᕆᓪᓗᐊᕐᑐᒥᒃ ᐃᓚᖃᕐᑐᒃᓴᐅᒋᕗᖅ 24ᓂᒃ ᐃᑎᒐᖕᓂᒃ ᓴᓂᒧᑐᓂᖃᕐᓗᓂ ᑐᑭᒧᓪᓗ, ᖃᖓᒎᑦ ᓯᓈᓂᑦ ᐊᖏᓂᕐᓴᐅᓗᓂ 10ᐃᓐᓴᓯᒥᒃ ᖄᖓᒎᕈᑦᑎᕐᓯᒪᓗᓂ, ᐃᓗᑐᓂᐅᔭᖓ ᑐᓂᕐᕈᓯᕐᕕᐅᑉ ᓇᑎᖓᓃᑦᑐᖅ ᐊᕙᑖᓂ ᐃᑎᒑᖕᓂᒃ ᒪᕐᕈᑲᓵᖕᓂᒃ ᐃᓗᑐᓂᖃᕐᑐᒃᓴᐅᕗᖅ, ᑐᖕᒥᕌᖃᕐᓗᓂ ᑐᓂᕐᕈᓯᕐᕕᐅᑉ ᓴᓂᕌᒍᑦ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᓂᒃ.”

ᑐᓂᕐᕈᓯᕐᕕᐅᑉ ᐃᑦᔪᕐᓁᑎᑕᐅᓂᖓ

¹⁸ ᐅᕙᓐᓄᓪᓗ ᐅᖃᕐᐳᖅ, “ᐃᓅᑉ ᐃᕐᓂᖓ, ᐊᑕᓂᖅ ᒎᑎ ᐃᒫᒃ ᐅᖃᕐᐳᖅ: ᐅᑯᐊ ᒪᓕᒃᑕᐅᔪᒃᓴᐅᕗᑦ ᑐᓂᕐᕈᓯᕐᕕᐅᑉ ᐃᑦᔪᕐᓁᑎᑕᐅᓂᒃᓴᖓᓄᑦ: ᐱᔭᕇᕐᑕᐅᒃᐸᑦ ᐅᓪᓗᒥ ᑕᕝᕙᓂ ᑐᓂᕐᕈᓯᕐᑐᒃᓴᐅᕗᓯ ᐃᑯᐊᓚᑦᓯᕕᒋᓗᒍ ᖄᖓᓂ; ᐆᒪᔫᓪᓗ ᐊᐅᖓᓂᒃ ᓯᕐᐸᕐᓴᕐᕕᒋᔭᒃᓴᕆᕙᓯ.

¹⁹ ᑐᓂᕐᕈᓯᕐᑎᑦᓯᔩᑦ ᓕᕔᑦ ᐃᓚᒌᖕᓂᖓᓐᓂᑦ ᐱᓯᒪᔪᑦ ᔭᑑᑭᐅᑉ ᑭᖑᕚᖏᑦ ᑖᒃᑯᐊᑐᐊᖅ ᓇᔪᕐᑕᓐᓂ ᐱᔨᑦᓯᕐᑐᒃᓴᐅᕗᑦ ᐅᕙᓐᓂᒃ, ᐊᑕᓂᖅ ᒎᑎ ᐅᖃᕐᐳᖅ, ᐊᖑᓴᓪᓗᕐᒥᒃ ᐊᔪᕐᓂᕐᒧᑦ ᑐᓂᕐᕈᓯᐅᑕᐅᓂᐊᕐᑐᒥᒃ ᐱᑎᑕᒃᓴᕆᕙᑎᑦ.

²⁰ ᐊᐅᖓᑕ ᐃᓚᖓᓂᒃ ᐱᓗᑎᑦ ᑐᓂᕐᕈᓯᕐᕕᐅᑉ ᓇᒡᔪᓐᖑᐊᖏᑦ ᓯᑕᒪᑦ ᐊᐅᒥᑎᕐᑕᒃᓴᕆᕙᑎᑦ, ᖄᖓᑕᓗ ᑎᕆᖁᖏᑦ, ᐊᕙᑖᑕᓗ ᓯᓇᕐᔪᖏᑦ; ᑍᒤᓕᐅᕐᓗᑎᑦ ᑐᓂᕐᕈᓯᕐᕕᒃ ᐃᑦᔪᕐᓁᑎᑕᒃᓴᕆᕙᑦ ᐊᑐᕐᑕᐅᔪᓐᓇᕐᓯᑎᓪᓗᒍᓗ.

²¹ ᐊᖑᓴᓪᓗᕐᓗ ᐊᔪᕐᓂᕐᒧᑦ ᑐᓂᕐᕈᑎᒃᓴᖅ, ᐃᓂᒃᓴᓕᐅᕐᑕᐅᓯᒪᔪᒥ ᑐᒃᓯᐊᕐᕕᒡᔪᐊᑉ ᐃᓗᐊᓂ ᐃᑯᐊᓚᑎᑕᒃᓴᕆᕙᑦ, ᐃᑦᔪᕐᓁᑦᑐᒃᑯᕕᐅᑉ ᓯᓚᑖᓂ.

²² ᐅᓪᓘᓪᓗ ᐂᑉᐸᖓᓂ ᐊᖑᓴᓪᓗᕐᒥᒃ ᒎᑦᓯᒥᒃ ᖃᓄᐃᓐᓂᖃᖏᑦᑐᒥᒃ ᐊᔪᕐᑐᓕᓂᕐᓄᑦ ᑐᓂᕐᕈᓯᕐᑐᒃᓴᐅᕗᑎᑦ; ᑕᕝᕙ ᑐᓂᕐᕈᓯᕐᕕᒃ ᐊᐅᖓᓄᑦ ᐃᑦᔪᕐᓁᑎᑕᐅᓂᐊᕐᐳᖅ, ᐊᖑᓴᓪᓗᕐᒧᑦ ᓴᓗᒻᒪᕐᑕᐅᓚᐅᕐᓂᖓᑐᑦ.

²³ ᑍᒫᒃ ᓴᓗᒻᒪᕐᑕᐅᑎᑦᓴᕇᕈᕕᐅᒃ, ᐊᖑᓴᓪᓗᕐᒥᒃ ᑐᓂᕐᕈᓯᕐᑐᒃᓴᐅᕗᑎᑦ ᖃᓄᐃᓐᓂᖃᖏᑦᑐᒥᒃ ᓰᐱᐅᓪᓗ ᐊᖑᓴᓪᓗᖓᓂᒃ ᖃᓄᐃᓐᓂᖃᖏᑦᑐᒥᒃ ᑕᒪᖏᒃ ᖃᓄᐃᑦᔪᑎᖃᖏᑦᓯᐊᕐᑐᒃᓴᐅᕘᒃ.

²⁴ ᑖᒃᑯᐊᒃ ᐊᑕᓂᕐᒧᑦ ᑐᓂᕐᕈᑎᒋᔭᒃᓴᕆᕚᒃᑭᒃ, ᑐᓂᕐᕈᓯᕐᑎᑦᓯᔨᓄᓪᓗ ᑕᕆᐅᓕᕐᑕᐅᔪᒃᓴᐅᕘᒃ ᑐᓂᕐᕈᑕᐅᓗᑎᒡᓗ ᐃᑯᐊᓚᑎᑕᐅᓗᑎᒃ ᐊᑕᓂᕐᒧᑦ.

²⁵ ᖃᐅᑕᒫᑦ ᐅᓪᓗᓂᒃ 7ᓂᒃ ᐊᔪᕐᓂᕐᓄᑦ ᑐᓂᕐᕈᓯᐅᑎᒃᓴᓂᒃ ᐊᑐᐃᓐᓇᕈᐃᖃᑦᑕᕐᑐᒃᓴᐅᕗᑎᑦ ᒎᑦᓯᒥᒃ; ᐊᖑᓴᓪᓗᕐᒥᒡᓗ ᓰᐱᐅᓪᓗ ᐊᖑᓴᓪᓗᖓᓂᒃ, ᖃᓄᐃᑦᔪᑎᖃᖏᑦᓯᐊᕐᑐᓂᒃ.

²⁶ ᐅᓪᓗᓂᒃ 7ᓂᒃ ᑐᓂᕐᕈᓯᕐᑎᑦᓯᔩᑦ ᑐᓂᕐᕈᓯᕐᕕᖕᒥᒃ ᓴᓗᒻᒪᕐᓮᔪᒃᓴᐅᕗᑦ ᐃᑦᔪᕐᓁᓕᑎᓪᓗᒍᓗ.

²⁷ ᑕᒪᒃᑯᐊ ᐅᓪᓗᐃᑦ ᓈᔭᐅᒃᐸᑕ, ᐅᓪᓗᐃᑦ ᓯᑕᒪᐅᔪᕐᑐᖓᓂᑦ ᐱᒋᐊᕐᓗᑎᒃ ᑐᓂᕐᕈᓯᕐᑎᑦᓯᔩᑦ ᑐᓂᕐᕈᓯᕐᕕᖕᒥ ᑐᓂᕐᕈᓯᖃᑦᑕᓯᒋᐊᕐᑐᒃᓴᐅᕗᑦ ᑐᓂᕐᕈᑎᓂᒃ ᐃᑯᐊᓚᑎᑕᒃᓴᓂᒃ ᓮᒻᒪᖃᑎᒌᖕᓂᕐᒧᓪᓗ ᑐᓂᕐᕈᓯᕈᑎᓂᒃ; ᑕᕝᕙ ᐃᓚᓕᐅᕐᓂᐊᕐᐸᑦᓯ, ᐊᑕᓂᖅ ᒎᑎ ᐅᖃᕐᐳᖅ.”