ᐃᓯᑭᐊᓕᐅᑉ ᐊᒡᓚᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓯᑭᐊᓕᐅᑉ ᐆᒃᑐᕋᐅᑎᖃᕐᓂᖓ ᔨᕉᓴᓕᒥᐅᑦ ᑎᒍᔭᐅᓂᒃᓴᖏᓐᓂᒃ

¹ “ᐃᓅᑉ ᐃᕐᓂᖓ, ᖁᐊᕐᑎᑕᒐᕐᒥᒃ ᐱᓗᑎᑦ, ᓵᖕᓄᐊᕐᓗᒍ ᑎᑎᕋᐅᔭᕐᕕᒋᒍᒃ ᐃᑎᕐᓴᓕᐅᕐᓗᒍ, ᔨᕉᓴᓕᐅᑉ ᐃᒡᓗᒐᓴᒡᔪᐊᓐᖑᐊᖏᓐᓂᒃ.

² ᐊᑭᕋᖏᓐᓄᑦ ᐊᕙᑕᖏᕐᑕᐅᓯᒪᓂᖓ ᓇᓗᓁᕐᓗᒍ, ᐃᑎᕐᓴᓕᐅᕐᓯᒪᔪᓂᒃ; ᓄᓇᓗ ᖃᓕᕇᒃᓯᓯᒪᓗᒍ; ᐃᑎᕐᑕᕐᕕᖕᓂᒡᓗ ᓯᖁᒥᑦᓯᓇᓲᑎᓂᒃ ᐊᕙᓗᕐᔪᐊᖓᑕ ᓯᓚᑎᓕᒫᖓ ᓈᓗᒍ.

³ ᓵᑦᑑᔭᐅᒻᒥᒃ ᓴᕕᕋᔭᖕᒥᒃ ᐱᓗᑎᑦ ᐃᒡᓗᒐᓴᒡᔪᐊᓕᐊᓐᖑᐊᕐᐱᑦ ᐃᕝᕕᓪᓗ ᐊᑯᓐᓂᑦᓯᓐᓄᐊᕐᓗᒍ ᐊᕙᓗᕐᔪᐊᓐᖑᐊᖑᓂᐊᕐᒪᑦ, ᐃᒡᓗᒐᓴᒡᔪᐊᑦ ᓵᓐᖓᓗᒋᑦ, ᐊᕙᓗᓯᓯᒪᔪᓂᒃ ᐃᕝᕕᑦ ᓵᓐᖓᓯᓐᖑᐊᕐᓗᑎᑦ. ᑕᒪᓐᓇ ᐃᓴᕆᐊᓕᐅᑉ ᑭᖑᕚᖏᓐᓄᑦ ᓇᓗᓁᖁᑕᐅᓂᐊᕐᒪᑦ.

⁴ “ᓴᐅᒥᖕᓄᑦ ᐃᓐᓇᖓᓗᑎᑦ, ᐃᓴᕆᐊᓕᐅᑉ ᑭᖑᕚᖏᑕ ᓱᒋᐊᕐᑕᐅᑦᔪᑎᒃᓴᖏᑦ ᐃᓕᖕᓄᑦ ᐃᓕᓂᐊᕐᐸᒃᑲ; ᐅᓪᓗᐃᑦ ᐅᓄᕐᓂᖏᑦ ᓇᓪᓚᖓᓂᕆᔭᑎᑦ, ᑖᒃᑯᐊ ᐃᓴᕆᐊᓕᐅᑉ ᑭᖑᕚᖏᑦ ᓱᒋᐊᕐᑕᐅᓂᖏᑕ ᓯᕕᑐᓂᕆᓂᐊᕐᐰᑦ.

⁵ ᐊᔪᕐᑐᓕᓂᖏᑕ ᓱᒋᐊᕐᑕᐅᑦᔪᑎᒃᓴᖏᓐᓂᒃ ᐅᓪᓗᓂᒃ 390ᓂᒃ ᑐᓂᓯᕕᒋᓂᐊᕐᐸᒋᑦ, ᐊᕐᕌᒍᐃᑦ ᓱᒋᐊᕐᑕᐅᓂᒃᓴᖏᑕ ᓯᕕᑐᓂᖏᑦ ᒪᓕᒡᓗᒋᑦ; ᑍᒫᒃ ᓯᕕᑐᑎᒋᔪᒥᒃ ᓱᒋᐊᕐᑕᐅᔪᒫᕐᐳᑎᑦ ᐃᓴᕆᐊᓕᐅᑉ ᑭᖑᕚᖏᑕ ᓱᒋᐊᕐᑕᐅᓂᒃᓴᖏᓐᓄᑦ.

⁶ ᑍᒤᓕᖓᔭᕆᐊᖃᕐᓃᑦ ᓈᒻᒪᒃᓯᒃᐸᑦ, ᑕᓕᕐᐱᖔᕐᓄᑦ ᓵᓪᓗᑎᑦ ᔫᑕᐅᑉ ᑭᖑᕚᖏᑕ ᐊᔪᕐᑐᓕᓂᖏᑦ ᓱᒋᐊᕐᑕᐅᑦᔪᑎᒃᓴᕆᕙᑎᑦ ᐅᓪᓗᓂᒃ 40ᓂᒃ, ᐊᔪᕐᑐᓕᓂᖏᑕ ᓱᒋᐊᕐᑕᐅᑦᔪᑎᒃᓴᖏᑦ ᒪᓕᒡᓗᒋᑦ, ᐅᓪᓗᖅ ᐊᑕᐅᓯᖅ ᑐᕌᖓᓗᓂ ᐊᕐᕌᒍᒧᑦ ᐊᑕᐅᓯᕐᒧᑦ.

⁷ “ᔨᕉᓴᓕᐅᑉ ᐊᑭᕋᖏᓐᓄᑦ ᐊᕙᓗᔭᐅᓯᒪᓂᖓ ᓵᓐᖓᓗᒍ, ᑕᓖᑦ ᐅᕕᓃᓐᓇᕈᕐᓗᒍ; ᓇᓪᓕᐅᑎᓛᕐᑐᓂᒃ ᐃᒡᓗᒐᓮᑦ ᐅᖃᓪᓚᒡᕕᒋᒃᑭᑦ.

⁸ ᑕᑯᒋᓪᓗ, ᕿᓚᒃᓱᕐᓂᐊᕐᐸᒋᑦ ᓇᓪᓕᐊᓐᓄᑐᐃᓐᓇᖅ ᓵᖃᑦᑕᖁᓇᒃ, ᐊᕙᓗᔭᐅᓯᒪᓂᕐᐱᑦ ᐅᓪᓗᖏᑦ ᐊᓂᒍᓚᐅᖏᓐᓂᖏᓐᓂ.

⁹ “ᓂᐊᖂᔭᒃᓴᒥᒃ ᓯᑎᔪᓂᒡᓗ ᓂᐊᖂᔭᒃᓴᓂᒃ, ᐲᓐᓂᓯᓂᒃ, ᐱᕈᕐᑐᕕᓂᕐᓂᒃ, ᐃᕕᐅᔭᓂᒡᓗ ᓂᐊᖂᔭᒃᓴᓂᒃ, ᐱᕈᕐᓯᐊᒃᓴᓂᒃ, ᑲᑎᓪᓗᒋᑦ ᓂᐊᖂᔭᓕᐊᕆᒃᑭᑦ, ᑍᒤᑦᑐᒥᒃ ᑕᕝᕙ ᓂᕆᖃᑦᑕᕆᐊᖃᕈᒫᕐᐳᑎᑦ ᓴᐅᒥᖔᕐᓄᑦ ᐃᓂᓪᓚᖓᓂᓕᒫᕐᓂ ᐅᓪᓗᓂᒃ 390ᓂᒃ.

¹⁰ ᑏᑑᑎᑎᑐᑦ ᐊᖏᑎᒋᔪᒥᒃ ᖃᐅᑕᒫᑦ ᓂᕆᖃᑦᑕᕆᐊᖃᕈᒫᕐᐳᑎᑦ ᑖᓐᓇᓗ ᓂᕆᔭᑐᐊᕆᕙᒡᓗᒍ ᐅᓪᓗᖅ ᐊᑕᐅᓯᐊᕐᓗᒍ.

¹¹ ᐅᓪᓗᓕᒫᖅ ᐃᒥᖃᑦᑕᕆᐊᖃᕐᓂᐊᕐᐳᑎᑦ ᑏᑑᑏᖕᓂᒃ ᒪᕐᕈᓪᓗᐊᑐᑦ ᐊᖏᑎᒋᔪᒥᒃ.

¹² ᓂᐊᖂᔭᓕᐅᓕᕈᕕᑦ ᐃᑯᐊᓚᑦᓯᔪᒃᓴᐅᕗᑎᑦ ᐃᓄᐃᑦ ᐊᓇᖏᓐᓂᒃ ᕿᔪᖃᕐᓗᑎᑦ, ᐆᑦᑎᔭᑎᓪᓗ ᐃᓄᐃᑦ ᑕᑯᓐᓇᕐᑎᓪᓗᒋᑦ ᓂᕆᓗᒋᑦ.”

¹³ ᐊᑕᓂᖅ ᐅᖃᕐᐳᖅ, “ᑍᒫᒃᑕᐅᖅ ᑕᕝᕙ ᐃᓴᕆᐊᓕᒥᐅᑦ ᓂᕆᔭᕆᐊᖃᖃᑦᑕᕈᒫᕐᐳᑦ ᐱᖁᔭᑎᒍᑦ ᓴᓗᒪᖏᑦᑐᒥᒃ ᐃᓅᖃᑎᒌᒡᔪᐊᓄᑦ ᐊᐅᓪᓚᕈᑦᔭᐅᑎᒃᑯᒃᑭᑦ.”

¹⁴ ᑕᕝᕙ ᑭᐅᕙᕋ, “ᐊᑕᓃᖅ ᒎᑏ! ᑕᑯᒋᑦ, ᓇᖕᒥᓂᖅ ᓇᕐᕈᓇᕐᓯᑎᓚᐅᕐᓯᒪᓐᖏᓚᖓ; ᓄᑕᕋᐅᓂᓐᓂᑦ ᐅᓪᓗᒥᒧᑦ ᑎᑭᓪᓗᒍ ᐆᒪᔪᕕᓂᕐᒥᒃ ᐃᒻᒥᓃᓐᓇᖅ ᑐᖁᔪᕕᓂᕐᒥᒃ ᓂᕆᓚᐅᕐᓯᒪᓐᖏᓚᖓ ᐆᒪᔪᓄᓪᓗ ᑐᖁᑕᕕᓂᕐᒥᒃ, ᓂᕿᒥᒡᓗ ᒪᒪᖏᑦᑐᒥᒃ ᐅᖁᒻᒦᓚᐅᕐᓯᒪᓇᖓ.”

¹⁵ ᑕᕝᕙ ᐅᖃᐅᑎᕚᖓ, “ᑕᑯᒋᑦ, ᐃᒻᒧᒃᓯᐅᒐᐅᑉ ᐊᓇᖏᓐᓂᒃ ᐃᑯᐊᓪᓚᖅᑯᑎᖃᖃᑦᑕᖁᓕᕐᐸᒋᑦ, ᐃᓅᑉ ᐊᓇᖏᓐᓂᐅᖏᑦᑐᖅ, ᓂᐊᖂᔭᓕᐅᓕᕈᕕᑦ.”

¹⁶ ᐅᖃᐅᑎᒃᑲᓐᓂᕐᐹᖓᓗ, “ᐃᓅᑉ ᐃᕐᓂᖓ, ᑕᑯᒋᑦ ᔨᕉᓴᓕᒥᐅᑦ ᓂᐊᖂᔭᒃᓴᕐᑖᕐᕕᒋᕙᒃᑕᖏᑦ ᓄᖅᑲᕐᑎᓐᓂᐊᕐᐸᒃᑲ; ᓂᕆᖃᑦᑕᓕᕈᒫᕐᐳᑦ ᐆᒃᑑᑎᒧᑦ ᐆᒃᑐᕐᑕᐅᓯᒪᔪᒥᒃ ᑲᑉᐱᐊᓱᒡᓗᑎᒃ; ᐃᒥᖃᑦᑕᕈᒫᕐᐳᓪᓗ ᐆᒃᑐᕋᐅᑦ ᒪᓕᒡᓗᒍ ᐃᓱᒪᔮᕐᓗᑎᒃ.

¹⁷ ᑍᒤᓕᐅᕐᕕᒋᔪᒫᕐᐸᒃᑲ ᓂᕿᒃᓮᕈᑎᓗᑎᒃ ᐃᒥᒃᓮᕈᑎᓗᑎᒡᓗ, ᐃᓱᒪᔮᕐᓗᑎᒃ ᐃᒻᒥᖕᓄᑦ ᑕᑯᓴᖃᑦᑕᐅᑎᔪᒫᕐᐳᑦ, ᐊᔪᕐᓴᕐᓂᕐᒧᑦ ᓄᖑᑉᐸᓪᓕᐊᓕᕈᒫᕐᐳᑦ ᐊᔪᕐᑐᓕᓯᒪᓂᕐᒥᖕᓄᑦ ᓱᒋᐊᕐᑕᐅᓕᕈᑎᒃ.”